Siope
30 “Pea ʻoku nau kataʻi au+
—ʻA e kau tangata ʻoku taʻu siʻi ange ʻiate aú,
ʻA ia ko ʻenau ngaahi tamaí ʻe ʻikai te u tali
Ke nau kau fakataha mo e fanga kulī ʻoku nau leʻohi ʻa ʻeku tākangá.
2 Ko e hā hano ʻaonga ʻa e mālohi honau nimá kiate aú?
Kuo ʻauha honau iví.
3 Kuo mole honau iví tupu mei he masivá mo e fiekaiá;
ʻOku nau ngau ʻa e kelekele pakukā
ʻA ia kuo taʻeʻaonga mo lalá.
4 ʻOku nau paki ʻa e fanga kiʻi lauʻiʻakau konokona mei he ʻakau ʻo e vaó;
Ko ʻenau meʻakaí ko e aka ʻo e ʻuluʻakau ʻo e vaó.
5 ʻOku kapusi kinautolu mei he koló;+
ʻOku kailaʻi kinautolu ʻe he kakaí ʻo hangē ha kaihaʻá.
6 ʻOku nau nofo ʻi he ngaahi ngutungutu ʻo e ngaahi teleʻá,*
ʻI he ngaahi luo ʻi he kelekelé pea ʻi he ngaahi maká.
7 ʻOku nau kalanga mai mei he vao ʻakaú
Pea ʻoku nau pupunga fakataha ʻi he lotolotonga ʻo e ngaahi ʻakau talatalá.
8 ʻI heʻenau hoko ko e ngaahi foha ʻo e kau valé mo e kau taʻeʻiloá,
Kuo kapusi* ai kinautolu mei he fonuá.
9 Ka ko eni ʻoku nau lumaʻi au naʻa mo e ʻi heʻenau ngaahi hivá;+
10 ʻOku nau fakaliliʻa ʻiate au mo fakamamaʻo meiate au;+
ʻOku ʻikai te nau toumoua ke ʻanuhi ʻa hoku matá.+
11 Koeʻuhí kuo hanga ʻe he ʻOtuá ʻo toʻo ʻeku meʻataú* mo fakamāʻulaloʻi au,
ʻOku ʻikai te nau taʻotaʻofi kinautolu* ʻi heʻenau ngaohikoviʻi aú.
12 ʻI hoku toʻomataʻú ʻoku nau tuʻu hake ʻo hangē ha fuʻu pupunga kakai fakamoveuveú;
ʻOku nau tuku au ke u hola
Pea nau fokotuʻu ha ngaahi ʻā ʻo e fakaʻauha ʻi hoku halá.
13 ʻOku nau maumauʻi ʻa hoku halá
Pea ʻai ke toe kovi ange ʻa hoku mamahí,+
ʻO ʻikai ha taha ke ne taʻofi kinautolu.*
14 ʻOku nau haʻu ʻo hangē haʻanau hū mai ʻi ha fuʻu ava ʻi he ʻaá;
ʻOku nau ngaʻunu mai ʻi he lotolotonga ʻo e ʻauhá.
15 ʻOku lōmekina au ʻe he manavaheé;
ʻOku mole atu hoku ngeiá ʻo hangē ko e matangí,
Pea ko hoku fakamoʻuí ʻoku puli atu ʻo hangē ha ʻaó.
16 Ko eni ʻoku fakaʻaʻau ke ʻosi atu ʻeku moʻuí meiate au;+
ʻOku puke au ʻe he ngaahi ʻaho ʻo e faingataʻá.+
17 Ko e langá ʻokú ne hokohokaʻi hoku ngaahi huí* ʻi he poʻulí;+
Ko e langa feʻolá ʻoku ʻikai ʻaupito ke ʻosi.+
18 Kuo hanga ʻe ha fuʻu mālohi lahi ʻo fakamatamatakoviʻi ʻa hoku kofú;*
ʻOkú ne sisina au ʻo hangē ko e kola ʻo hoku kofú.
19 Kuo lī au ʻe he ʻOtuá ki he pelepelá;
Kuó u hoko ko e efu mo e efuefu.
20 ʻOku ou tangi kiate koe ki ha tokoni, ka ʻoku ʻikai te ke fai mai ha tali kiate au;+
ʻOku ou tuʻu hake, ka ʻokú ke siosio mai pē.
21 Kuó ke tafoki hake ʻo fakamamahiʻi au;+
ʻOkú ke ʻohofi au ʻaki ʻa e mālohi kakato ʻo ho nimá.
22 ʻOkú ke ʻohake au ʻo ke tuku ke ʻave ʻe he matangí;
Peá ke tupeʻi au ʻi he afaá.*
23 He ʻoku ou ʻiloʻi te ke ʻohifo au ki he maté,
Ki he fale ʻa ia ʻe fakataha ki ai ʻa e tokotaha kotoa pē ʻoku moʻuí.
24 Ka ʻe ʻikai taaʻi ʻe ha taha ha tangata kuo fasifasi*+
ʻI heʻene tangi ki ha tokoni lolotonga ʻa e taimi ʻo ʻene faingataʻaʻiá.
25 ʻIkai kuó u tangi koeʻuhi ko e faʻahinga kuo nau tō ʻi he ngaahi taimi faingataʻá?*
ʻIkai naʻá ku tengihia ʻa e masivá?+
26 Neongo naʻá ku ʻamanaki ki ha lelei, ko e koví ia naʻe hoko maí;
Naʻá ku ʻamanekina ʻa e maama, ka naʻe hoko mai ʻa e fakapoʻulí ia.
27 Ko e hohaʻatuʻu ʻi loto ʻiate aú naʻe ʻikai ke ʻosi;
Naʻe fakafetaulaki mai kiate au ʻa e ngaahi ʻaho ʻo e mamahí.
28 ʻOku ou ʻalu fakaumiuminoa holo;+ ʻoku ʻikai ha maama.
ʻI he lotolotonga ʻo e fuʻu fakatahá, ʻoku ou tuʻu hake peá u tangi ki ha tokoni.
29 Kuó u hoko ko ha tokoua ʻo e fanga siakalí
Mo ha kaungāmeʻa ʻo e ngaahi ʻofefine ʻo e ʻositalesí.+
31 Ko ʻeku haʻapé ʻoku ngāueʻakí pē ki he tengihia,
Pea ko ʻeku fulutá ki he leʻo ʻo e tangi.