Tangata Malanga

10 Hangē pē ko hono fakatupunga ʻe he fanga lango maté ʻa e lolo ʻa e tokotaha ngaohi loló ke namukū mo koví, ʻoku pehē ʻa hono fakameleʻi ʻe ha vale siʻisiʻi ʻa e potó mo e lāngilangí.+

2 Ko e loto ʻo e tokotaha potó ʻokú ne taki ia ʻi he ʻalunga totonú,* ka ko e loto ʻo e tokotaha valé ʻokú ne taki ia ʻi he ʻalunga halá.*+ 3 ʻIlonga ha hala ʻoku ʻalu ai ʻa e valé, ʻoku ʻikai ke ne fakakaukau lelei,*+ pea ʻokú ne ʻai ʻa e tokotaha kotoa ke nau ʻilo ko ha vale ia.+

4 Kapau ʻe puho hake ʻa e ʻita ʻa ha* pule kiate koe, ʻoua te ke mavahe mei ho feituʻú,+ he ko e anga-mokomokó ʻokú ne holoki hifo ʻa hono fai ha ngaahi angahala lahi.+

5 ʻOku ʻi ai ha meʻa fakamamahi kuó u mamata ai ʻi he lalo laʻaá, ko e faʻahinga fehālaaki ko ē naʻe fai ʻe kinautolu ʻoku pulé:+ 6 ʻOku fokotuʻu ʻa e kau valé ki he ngaahi tuʻunga lahi ʻoku māʻolunga, kae nofo pē ʻa e kau koloaʻiá* ʻi he ngaahi tuʻunga māʻulaló.

7 Kuó u mamata ki ha kau sevāniti ʻoku nau heka hoosi kae lue lalo ʻa e kau houʻeikí ia ʻo hangē ha kau sevānití.+

8 Ko e tokotaha ʻokú ne keli ha luo te ne tō nai ki ai;+ pea ko e tokotaha ʻokú ne holoki ha ʻā maka ʻe uʻu nai ia ʻe ha ngata.

9 Ko e tokotaha ʻokú ne foa ha maka te ne lavea nai ai, pea ko e tokotaha ʻokú ne fahi ha ngaahi kupuʻi ʻakau te ne matuʻutāmaki nai ai.*

10 Kapau ʻoku peku ha meʻangāue ukamea pea ʻoku ʻikai ke fakamata ia ʻe ha taha, ʻe fiemaʻu ke ne fakamoleki ai ha fuʻu ivi lahi. Ka ʻoku tokoni ʻa e potó ke lavaʻi ʻa e ngāué.

11 Kapau ʻe uʻu ʻa e ngatá ki muʻa ke fai ki ai ha faimaná, ʻoku ʻikai hano ʻaonga ʻo e tokotaha pōtoʻi faimaná.*

12 Ko e ngaahi lea mei he ngutu ʻo e tokotaha potó ʻokú ne ʻomi ha lelei,+ ka ko e loungutu ʻo e tokotaha valé ko hono ʻauhaʻanga.+ 13 Ko e ʻuluaki ngaahi foʻi lea ʻoku haʻu mei hono ngutú ko e koto fakasesele,+ pea ko ʻene ngaahi foʻi lea fakaʻosí ko e koto vale-ngangau fakatupu ʻauha. 14 Ka ʻoku hokohoko atu pē ʻa e lea ia ʻa e valé.+

ʻOku ʻikai ke ʻilo ʻe ha tangata ʻa e meʻa ʻe hokó; ko hai ʻe lava ke ne tala kiate ia ʻa e meʻa ʻe hoko mai ʻi he hili ʻene puli atú?+

15 Ko e ngāue mālohi ʻa e tokotaha valé ʻokú ne fakaongosiaʻi ia, he ʻoku aʻu ʻo ʻikai te ne ʻilo ʻa e hala ke ne ʻalu ai ki he koló.

16 He meʻa fakamamahi ē ki ha fonua kapau ko hono tuʻí ko ha tamasiʻi+ pea ko hono kau houʻeikí ʻoku kamata ʻenau kai kātoangá ʻi he pongipongí! 17 He fiefia ē ko e fonuá kapau ko hono tuʻí ko e foha ʻo ha kau māʻolunga pea ko e kau houʻeikí ʻoku nau kai ʻi he taimi totonu ke maʻu ai honau mālohí, ʻo ʻikai koeʻuhí ke nau konā ai!+

18 Koeʻuhi ko e tōtuʻa ʻa e fakapikopikó ʻoku ngāvaivai ai ʻa e ngaahi pimi ʻo e ʻató, pea koeʻuhi ko e nima taʻefiengāué ʻoku tutulu ai ʻa e falé.+

19 ʻOku ngaohi ʻa e maá* maʻá e tokotaha ʻoku katá, pea ko e uainé ʻokú ne ʻai ke fakafiefia ʻa e moʻuí;+ ka ko e paʻangá ʻokú ne talia ʻa e fiemaʻu kotoa pē.+

20 Naʻa mo e ʻi hoʻo fakakaukaú,* ʻoua naʻá ke laukovi ki he* tuʻí,+ pea ʻoua naʻá ke laukovi ki he koloaʻiá ʻi ho loki mohé; he ʻe fakaongo atu ia* ʻe ha manupuna,* pe ko hano toe leaʻaki ʻe ha meʻamoʻui kapakau ʻa e meʻa naʻá ke leaʻakí.