Tangata Malanga
6 ʻOku toe ʻi ai ʻa e meʻa fakamamahi* kuó u mamata ai ʻi he lalo laʻaá, pea ʻoku hoko lahi ia ʻi he lotolotonga ʻo e faʻahinga ʻo e tangatá: 2 ʻOku foaki ʻe he ʻOtua moʻoní ki ha tangata ʻa e koloa mo e ngaahi meʻa fakamatelie pea mo e lāngilangi, koeʻuhi ke ʻoua te ne masiva ʻi ha meʻa ʻokú ne holi ki ai; ka neongo ia, ʻoku ʻikai ʻai ʻe he ʻOtua moʻoní ke ne maʻu ia, ka ʻoku maʻu nai ia ʻe ha sola. Ko e muna eni pea ko ha tā mātuʻaki fakamamahi moʻoni. 3 Kapau ʻe maʻu ʻe ha tangata ha fānau ʻe toko teau peá ne moʻui ʻi ha ngaahi taʻu lahi peá ne aʻu ʻo taʻumotuʻa, ka ʻoku ʻikai te ne fiefia ʻi heʻene ngaahi meʻa leleí ki muʻa ke ne aʻu ki he faʻitoká,* kuo pau ke u tala atu ʻoku lelei ange ha kiʻi tama ia ʻe fanauʻi mai kuo mate ʻiate ia.+ 4 He naʻe hoko mai ʻa e tokotahá ni ʻi he muna peá ne ʻalu atu ʻi he fakapoʻuli, pea ko hono hingoá ʻoku puli ia ʻi he fakapoʻulí. 5 Neongo naʻe ʻikai ʻaupito te ne sio ʻi he laʻaá pe ʻilo ha meʻa ʻe taha, ʻokú ne kei lelei ange pē* ʻi he tokotaha ki muʻá.+ 6 Ko e hā hono ʻaonga ʻo e moʻui ʻi ha taʻu ʻe ua afe kae ʻikai maʻu ha fiefia? ʻIkai ʻoku ʻalu kotoa pē ki he feituʻu tatau?+
7 Ko e ngāue mālohi kotoa ʻa ha tangata ke fakafonu pē hono ngutú;+ neongo ia ʻoku ʻikai ʻaupito ke fakatōliʻa ai ʻene holi ke kaí. 8 He ko e hā ha lelei ʻoku maʻu ʻe he tokotaha potó ʻo laka ange ia ʻi he tokotaha valé,+ pe ko e hā hano ʻaonga hono ʻilo ʻe he tangata masivá ʻa e founga ke ne moʻui aí?* 9 ʻOku lelei ange ke te fiefia ʻi he meʻa ʻoku sio ki ai hoto matá ʻi haʻate tulimui holo ʻi heʻete ngaahi holí. Ko e muna mo eni foki, ko ha tuli pē ki he matangí.
10 ʻIlonga ha meʻa kuo hoko mai kuo ʻosi ʻi ai hono hingoa, pea ʻoku ʻiloʻi ʻa e tuʻunga ʻoku ʻi ai ʻa e tangatá; pea ʻoku ʻikai te ne malava ke fakakikihi mo e* tokotaha ʻoku mālohi ange ʻiate iá. 11 Ko e lahi ange ʻa e ngaahi leá,* ko e lahi ange ia ʻa e muná; pea ko e hā ha lelei ʻoku ʻomi ʻe he meʻá ni ki ha tangata? 12 Ko hai ʻokú ne ʻilo ʻa e meʻa ʻoku lelei taha ki ha tangata ke ne fai ʻi he moʻuí he lolotonga ʻa e ngaahi ʻaho siʻi ʻo ʻene moʻui muná, ʻa ia ʻoku mole atu meiate ia hangē ha ʻatá?+ He ko hai ʻe lava ke ne tala ki ha tangata ʻa e meʻa ʻe hoko ʻi he lalo laʻaá ʻi he hili ʻene puli atú?