ʻAisea
16 ʻOatu ha sipi tangata ki he pule ʻo e fonuá,
Mei Saila ʻo fou atu ʻi he toafá
Ki he moʻunga ʻo e ʻofefine ʻo Saioné.
2 ʻI he hangē ha manupuna kuo tuli mei hono punungá,+
ʻE pehē ʻa e ngaahi ʻofefine ʻo Mōapé ʻi he ngaahi ʻāhanga ʻo ʻAlanoní.+
3 “ʻOatu ha faleʻi, fakahoko ʻa e tuʻutuʻuní.
ʻAi ke ke hoko ko e fakamalumalu ʻi he hoʻatā mālié ʻo hangē ko e poʻulí.
Fufū ʻa e faʻahinga kuo moveté pea ʻoua ʻe lavakiʻi ʻa e faʻahinga kuo holá.
4 ʻOfa ke nofo ʻa ʻeku faʻahinga kuo moveté ʻiate koe, ʻe Mōape.
Ke ke hoko ko ha feituʻu toitoiʻanga kiate kinautolu koeʻuhi ko e tokotaha fakaʻauhá.+
ʻE aʻu ʻa e tokotaha fakafeʻātungiá ki hono ngataʻangá,
ʻE ngata ʻa e fakaʻauhá,
Pea ko e faʻahinga ʻoku nau tāmalaki ʻa e niʻihi kehé te nau ʻauha mei he māmaní.
5 ʻE fokotuʻu maʻu leva ha taloni ʻi he ʻofa mateaki.
Ko e tokotaha ʻoku ʻafio ai ʻi he tēniti ʻo Tēvitá ʻe faitōnunga;+
Te ne fakamaau totonu pea ʻe vave ʻa ʻene fakahoko ʻa e māʻoniʻoní.”+
6 Kuo mau fanongo fekauʻaki mo e pōlepole ʻa Mōapé—ʻokú ne pōlepole ʻaupito+—
ʻA ʻene hīkisiá mo ʻene pōlepolé mo ʻene ʻitá;+
Ka ko ʻene lea koto ngeʻesí ʻe hoko pē ko e meʻa noa.
7 Ko ia ʻe fākafoa ʻa Mōape koeʻuhí ko Mōape;
Te nau fākafoa hono kotoa.+
Ko e faʻahinga kuo tāʻí te nau toʻe ke maʻu mai ʻa e takaonga fuamelie* ʻo Kili-halesetí.+
8 He ko e ngaahi ngoue ʻo Hesiponí+ kuo mae,
ʻA e kālepi ʻo Sipimá,+
Ko e kau taki ʻo e ngaahi puleʻangá kuo nau tāmalaki ʻa hono ngaahi vaʻa lanu kulokula māmá;*
Kuo aʻu atu hono ngaahi vaʻá ki Siasea;+
Kuo aʻu atu ia ki he toafá.
Ko hono ngaahi hulí kuo mafola atu ʻo aʻu ki he tahí.
9 Ko e ʻuhinga ia te u tangi ai koeʻuhi ko e kālepi ʻo Sipimá ʻo hangē ko ʻeku tangi koeʻuhi ko Siaseá.
Te u fakaviviku kimoua ʻaki hoku loʻimatá, ʻe Hesiponi mo ʻEleale,+
Koeʻuhí kuo ngata ʻa e kaikaila koeʻuhí ko hoʻomo fuaʻiʻakau ʻi he faʻahitaʻu māfaná mo hoʻomo utu-taʻú.*
10 Kuo ʻave ʻa e fiefiá mo e mavavá mei he ngoue fuaʻiʻakaú,
Pea ʻoku ʻikai ha ngaahi hiva fiefia pe kaikaila ʻi he ngaahi ngoue kālepí.+
Ko e tokotaha malakí ʻoku ʻikai te ne kei malamalaki ʻa e uaine ʻi he ngaahi tataʻoʻangá,
He kuó u ʻai ke ngata ʻa e kaikailá.+
11 Ko e ʻuhinga ia ʻoku ou tetetete ai ʻi loto koeʻuhi ko Mōapé,+
ʻO hangē ha tā ʻa ha haʻapé,
Pea mo hoku tangata ʻi lotó koeʻuhi ko Kili-haleseti.+
12 Naʻa mo e taimi ʻoku ongosia ai ʻa Mōape ʻi he potu māʻolungá pea ʻalu atu ke lotu ʻi hono feituʻu toputapú, ʻe ʻikai te ne lavaʻi ha meʻa ʻe taha.+
13 Ko e folofola eni naʻe folofolaʻaki ʻe Sihova ki muʻa ʻo fekauʻaki mo Mōapé. 14 Pea ko eni ʻoku folofola ʻa Sihova: “ʻI loto ʻi he taʻu ʻe tolu, hangē ko e ngaahi taʻu ʻo ha tokotaha ngāue totongi,* ko e lāngilangi ʻo Mōapé ʻe fakamaaʻi ʻaki ha faʻahinga maveuveu kehekehe, pea ko e faʻahinga ʻe toé te nau mātuʻaki tokosiʻi mo ʻikai hanau mahuʻinga.”+