ʻAisea
21 Ko ha fanongonongo ki he toafa ʻo e tahí:*+
Ko ha fakatamaki ʻoku haʻu ʻo hangē ha matangi afaá ʻokú ne ngaʻunu mai ʻi he tongá,
Mei he toafá, mei ha fonua fakailifia.+
2 Kuo fakahā mai kiate au ha vīsone fakamamahi:
Ko e tokotaha kākaá ʻokú ne faikākā,
Pea ko e tokotaha faifakaʻauhá ʻokú ne faifakaʻauha.
ʻAlu hake, ʻe ʻĪlami! Fai ha ʻākoloʻi, ʻe Mītia!+
Te u fakangata ʻa e māpuhoi kotoa kuó ne fakatupungá.+
3 Ko e ʻuhinga ia ʻoku ou toʻe lahi aí.*+
Kuo maʻu au ʻe he langá,
ʻO hangē ko ia ko e langā ʻa ha fefine fāʻelé.
ʻOku ou fuʻu loto-mafasia ʻo ʻikai lava ke u fanongo;
ʻOku ou fuʻu loto-hohaʻa ʻo ʻikai lava ke u sio.
4 ʻOku tatū ʻa hoku mafú; ʻoku ou tete ʻi he ilifiá.
Ko e mamalu ʻa e poʻulí ʻa ia naʻá ku fakaʻamu ki aí ʻokú ne ʻai au ke u tetetete.
5 Teuteu ʻa e tēpilé pea fokotuʻutuʻu ʻa e ngaahi nofoʻangá!
Mou kai mo inu!+
Mou tuʻu hake, ʻa kimoutolu kau houʻeiki ʻo tākai lolo ʻa e paá!
6 He ko e meʻa eni naʻe folofolaʻaki ʻe Sihova kiate aú:
“ʻAlu ʻo fokotuʻu ha tokotaha leʻo pea fekau ke ne fakahā mai ʻa e meʻa ʻokú ne sio ki aí.”
7 Pea naʻá ne sio ki ha saliote tau ʻoku toho ʻe ha ongo hoosi,
Ko ha saliote tau ʻoku toho ʻe ha fanga ʻasi,
Mo ha saliote tau ʻoku toho ʻe ha fanga kāmeli.
Naʻá ne siofi fakalelei, ʻo ne mātuʻaki tokanga ki ai.
8 Pea naʻá ne kalanga ʻo hangē ha laioné:
“ʻE Sihova, ʻoku ou tuʻu maʻu pē ʻi he ʻahó ʻi he taua leʻó,
Pea ʻoku ou tuʻu ʻi hoku feituʻu leʻó ʻi he pō kotoa.+
9 Vakai atu ki he meʻa ʻoku haʻú:
Ko ha kau tangata ʻoku nau haʻu ʻi ha saliote tau ʻoku toho mai ʻe ha ongo hoosi!”+
Pea naʻá ne lea ʻo ne pehē:
“Kuó ne tō! Kuo tō ʻa Pāpilone!+
Ko e ngaahi ʻīmisi kotoa pē kuo tongi ʻo hono ngaahi ʻotuá kuó Ne laiki ʻi he kelekelé!”+
10 ʻE hoku kakai ʻa ia kuo ʻauʻau ʻo hangē ha uité,
Ko e fua ʻoku maʻu* mei heʻeku ʻauʻauʻanga uité,+
Kuó u fakahā atu kiate kimoutolu ʻa e meʻa kuó u fanongo ki ai meia Sihova ʻo e ngaahi kau tau, ko e ʻOtua ʻo ʻIsilelí.
11 Ko ha fanongonongo ki Tuma:*
ʻOku ui mai ha taha kiate au mei Seia:+
“Tangata leʻo, kuo mei pongipongi?
Tangata leʻo, kuo mei pongipongi?”
12 Naʻe pehē ange ʻe he tangata leʻó:
“ʻOku haʻu ʻa e pongipongí, pea pehē ki he poʻulí.
Kapau te mou fai ha fehuʻi, mou fehuʻi.
Mou toe haʻu pē!”
13 Ko ha fanongonongo ki he toafa tokaleleí:
Te mou mohe ʻi he vaotā ʻi he toafa tokaleleí,
ʻA e siʻi kau fononga kāmeli ʻo Titaní.+
14 ʻOmi ha vai ke inu ʻa e tokotaha fieinuá,
ʻA kimoutolu kakai ʻo e fonua ko Teimá,+
Pea ʻomi mo ha mā ki he tokotaha ʻoku holá.
15 He kuo nau hola mei he heletaá, mei he heletā kuo unuhí,
Mei he kaufana kuo fusiʻí, pea mei he anga-fakamamahi ʻo e taú.
16 He ko e meʻa eni naʻe folofolaʻaki ʻe Sihova kiate aú: “ʻI loto ʻi he taʻu pē ʻe taha, hangē ko e ngaahi taʻu ʻo ha tokotaha ngāue totongi,* ʻe ngata ai ʻa e lāngilangi kotoa ʻo Ketá.+ 17 Ko e toenga ʻo e kau fana ngahau ʻi he kau tau ʻa Ketá ʻe tokosiʻi, he kuo folofolaʻaki ia ʻe Sihova ko e ʻOtua ʻo ʻIsilelí.”