ʻAisea
3 He vakai, ko e ʻEiki moʻoní, ʻa Sihova ʻo e ngaahi kau tau,
ʻOkú ne toʻo mei Selusalema mo Siuta ʻa e faʻahinga tokoni mo e tokonaki kotoa pē,
ʻA e kotoa ʻo e tokoni maá mo e vaí,+
2 ʻA e tangata toʻa mo e pāteʻi tau,
ʻA e fakamaau mo e palōfita,+ ʻa e tokotaha vavalo mo e tokotaha mātuʻa,
3 ʻA e ʻeiki ʻo e toko 50,+ ʻa e tokotaha taki, mo e tokotaha faleʻi,
ʻA e tokotaha faimana mataotao mo e tokotaha pōtoʻi faifakalouʻakau.+
4 Te u fakanofo ha tamaiki tangata ko honau kau houʻeiki,
Pea ʻe pule kiate kinautolu ʻa e tokotaha anga-feliuliuaki.
5 ʻE tauʻaki fakamālohi ʻa e kakaí,
ʻA e tokotaha ko ē ki he tokotaha ko ē.+
ʻE ʻohofi ʻe he tamasiʻí ʻa e tangata taʻumotuʻá,
Pea ko e tokotaha ʻoku ʻikai loko mahuʻingá te ne angatuʻu ki he tokotaha ʻoku fakaʻapaʻapaʻí.+
6 Ko e tokotaha taki taha te ne puke ʻa hono tokouá ʻi he fale ʻo ʻene tamaí ʻo ne pehē ange:
“Ko koe ʻoku ʻi ai ho pulupulú—te ke hoko koe ko homau taki.
Pule koe ki he fuʻu fokotuʻunga maumau ko ení.”
7 Ka te ne talituʻu mai ʻi he ʻaho ko iá ʻo pehē:
“Heʻikai te u hoko ko homou tokotaha haʻi lavea;*
ʻOku ʻikai ke ʻi ai ha meʻakai pe ha vala ʻi hoku falé.
ʻOua te mou fakanofo au ko ha taki ki he kakaí.”
8 He kuo tūkia ʻa Selusalema,
Pea kuo tō ʻa Siuta,
Koeʻuhí ʻoku nau fakafepaki kia Sihova ʻi he lea mo e ngāue;
9 Ko e fakafōtunga ʻo honau matá ʻokú ne fakamoʻoniʻi mai ʻenau angahalá,
Pea ʻoku nau talaki ʻenau angahalá ʻo hangē ko Sōtomá;+
ʻOku ʻikai te nau feinga ke fufū ia.
ʻOiauē ka ko kinautolu, he ʻoku nau ʻomi ha fakatamaki kiate kinautolu pē!
10 Tala ki he māʻoniʻoní te nau lelei pē kinautolu;
11 He ʻoiauē ki he tokotaha fulikivanú!
ʻE tō kiate ia ha fakatamaki,
He ko e meʻa kuo fai ʻe hono nimá ʻe fai ia kiate ia!
12 ʻI he fekauʻaki mo hoku kakaí, ko honau kau taki ngāué ʻoku nau anga-fakamamahi,
Pea ʻoku pule kiate kinautolu ha kau fefine.
ʻE hoku kakai, ʻoku ʻai koe ʻe ho kau takí ke ke hē,
Pea ʻoku nau fakapuputuʻuʻi ʻa ho ngaahi halá.+
13 ʻOku hoko mai ʻa Sihova ki hono tuʻungá ke fai ha talatalaakiʻi;
ʻOkú ne tuʻu hake ke hilifaki ha tautea ki he ngaahi kakaí.
14 ʻE fakamāuʻi ʻe Sihova ʻa e kau mātuʻa mo e kau houʻeiki ʻi hono kakaí.
“Kuo mou tutu ʻa e ngoue kālepí,
Pea ko e meʻa kuo mou kaihaʻasi mei he masivá ʻoku ʻi homou ngaahi falé.+
15 ʻOku anga-fēfē hoʻomou laiki hoku kakaí
Mo olo ʻa e mata ʻo e masivá ʻi he kelekelé?”+ Ko e folofola ia ʻa e ʻEiki Haú, ʻa Sihova ʻo e ngaahi kau tau.
16 ʻOku folofola mai ʻa Sihova: “Koeʻuhi ko e hīkisia ʻa e ngaahi ʻofefine ʻo Saioné,
ʻOku nau ʻalu mo fakamāhiki honau ʻulú,*
Mo fakatauele ʻaki honau matá, pea ʻi heʻenau laká,
ʻOku nau ʻai ke ongo mai ʻa e pakihikihi ʻa e fanga kiʻi vesa ʻo honau vaʻé,
17 ʻE taaʻi foki ʻe Sihova ʻa e ʻulu ʻo e ngaahi ʻofefine ʻo Saioné ʻaki ʻa e pala fakamongumangu,
Pea ʻe ʻai ʻe Sihova ke tula ʻa honau ʻulú.+
18 ʻI he ʻaho ko iá ʻe toʻo ai ʻe Sihova ʻa honau teuteu fakaʻofoʻofá, ʻa honau ngaahi vesa vaʻé,
ʻA e ngaahi meʻa-haʻi teuteu ki he laʻé mo e ngaahi meʻa-teuteu fuo hangē ha māhina-kalipá,+
19 ʻA e ngaahi haú,* ʻa e ngaahi vesá, pea mo e ngaahi pūloú,
20 ʻA e ngaahi tatā faʻufaʻú, ʻa e ngaahi sēini vaʻé, mo e ngaahi noʻo teuteu ki he fatafatá,*
ʻA e ngaahi ʻaiʻanga meʻa fakanamuleleí mo e fanga kiʻi meʻa-teuteu ʻomi monuú,*
21 ʻA e ngaahi mama-nimá mo e ngaahi mama-ihú,
22 ʻA e ngaahi kofu tōtōlofa ki he kātoangá, ʻa e ngaahi kofu tuʻá, ʻa e ngaahi pulupulú, mo e ngaahi pēsí,
23 ʻA e ngaahi sioʻata teuteú+ mo e ngaahi kofu līnení,*
ʻA e ngaahi faʻufaʻu ki he ʻulú mo e ngaahi pūloú.
24 ʻI he ʻikai ke nanamu mai ko ha lolo paʻamé,*+ ʻe haʻu ʻa e namukū meiate kinautolu;
ʻI he ʻikai ko ha letá, te nau noʻo ha maea;
ʻI he ʻikai fakaʻofoʻofa honau ʻulú, te nau hoko ʻo tula;+
ʻI he ʻikai kofu tuʻumālié, te nau ʻai ha teunga tauangaʻa;+
Pea te nau maʻu ha fakaʻilonga pōpula* kae ʻikai ko e hoihoifua.
25 ʻE tō ʻa hoʻo kau tangatá ʻi he heletaá,
Mo hoʻo kau tangata toʻá ʻi he taú.+