ʻAisea
47 ʻAlu hifo ʻo nofo ʻi he efú,
ʻE ʻofefine kei nofo anga-maʻa ʻo Pāpilone.+
Tangutu ʻi he kelekelé ʻa ia ʻoku ʻikai ha taloni,+
ʻE ʻofefine ʻo e kau Kalitiá,
Koeʻuhí heʻikai ʻaupito ke toe lau ʻe he kakaí ʻoku tokangaʻi lelei koe mo fakapelepeleʻi.
2 Toʻo ha maka momosi-nima pea momosi ʻa e mahoaʻá.
Toʻo hifo ho pūloú.
Vete ho kofu tōtōlofá, ʻai ke ʻasi ho vaʻé.
Kolosi atu ʻi he ngaahi vaitafé.
3 ʻE ʻasi hoʻo telefuá.
ʻE fakaeʻa ʻa hoʻo maá.
Te u fai ha sāuni,+ pea ʻe ʻikai ha tangata te ne taʻofi au.*
4 “Ko e Tokotaha ʻokú ne huhuʻi kitautolú
—Ko Sihova ʻo e ngaahi kau tau ʻa hono huafá—
ʻA e Tokotaha Māʻoniʻoni ʻo ʻIsilelí.”+
5 Tangutu fakalongolongo ʻi ai pea ʻi he fakapoʻuli,
ʻE ʻofefine ʻo e kau Kalitiá;+
ʻE ʻikai ke nau toe ui koe ko e Pule* ʻo e ngaahi Puleʻangá.+
6 Naʻá ku ʻita ki hoku kakaí.+
Ka naʻe ʻikai te ke fakahaaʻi ha meesi kiate kinautolu.+
Naʻa mo e tokotaha taʻumotuʻá naʻá ke hilifaki ki ai ha ʻioke mamafa.+
7 Naʻá ke pehē: “Te u hoko maʻu ai pē ko e Pule,* ʻo taʻengata.”+
Naʻe ʻikai te ke ʻai ki ho lotó ʻa e ngaahi meʻá ni;
Naʻe ʻikai te ke fakakaukau ki he ikuʻanga ʻo e meʻá ni.
8 Ko eni fanongo ki he meʻá ni, ʻa e tokotaha ʻoku ʻofa ʻi he mālié,+
ʻA ia ʻoku nofo ʻi he malu, ʻa ia ʻokú ne pehē ʻi hono lotó:
“Ko au toko taha pē, pea ʻoku ʻikai mo ha toe taha kehe.+
ʻE ʻikai te u hoko ko ha uitou.
ʻE ʻikai ʻaupito te u hokosia ha mole ʻa ʻeku fānaú.”+
9 Ka ko e ongo meʻá ni te na hoko fakafokifā atu kiate koe, ʻi he ʻaho pē ʻe taha:+
ʻA e mole ʻa e fānaú mo e hoko ko e uitoú.
Te na hoko kakato atu kiate koe+
Koeʻuhi ko e* lahi ʻa hoʻo faifakalouʻakaú mo e kotoa ʻo hoʻo faimana mālohí.+
10 Naʻá ke falala ki hoʻo tōʻonga fulikivanú.
Naʻá ke pehē: “ʻOku ʻikai ha taha ʻe sio mai kiate au.”
Ko ho potó mo hoʻo ʻiló ʻa ia naʻá na takiheeʻi koé,
Pea ʻokú ke pehē ʻi ho lotó: “Ko au toko taha pē, pea ʻoku ʻikai mo ha toe taha kehe.”
11 Ka ʻe hoko mai ʻa e fakatamaki kiate koe,
Pea heʻikai ke taʻofi ia ʻe ha taha ʻo hoʻo ngaahi faimaná.*
ʻE tō ʻa e kovi kiate koe; heʻikai te ke malava ke kalofi ia.
ʻE hoko fakafokifā mai ʻa e ʻauha kiate koe ʻa ia naʻe ʻikai ʻaupito te ke hokosia.+
12 Ko ia, hoko atu ʻa hoʻo ngaahi faimaná mo hoʻo faifakalouʻakau lahí,+
ʻA ia naʻá ke ngāueʻaki talu mei hoʻo kei talavoú.
Mahalo pē ʻe lava ke ke maʻu ʻaonga mei ai;
Mahalo pē te ke taaʻi ʻaki ai ʻa e kakaí ʻa e manavahē.
13 Kuó ke hoko ʻo ongosia ʻi he tokolahi ʻa hoʻo kau faleʻí.
Tuku ke nau tuʻu hake he taimí ni ʻo fakahaofi koe,
ʻA kinautolu ʻoku nau lotu ki he ngaahi langí,* ʻoku nau sio fakamamaʻu ki he ngaahi fetuʻú,+
ʻA kinautolu ʻoku nau ʻoatu ʻa e ʻilo ʻi he sio ki he ngaahi māhina foʻoú
ʻO fekauʻaki mo e ngaahi meʻa ʻe hoko mai kiate koé.
14 Vakai! ʻOku nau hangē ha mohukú.
ʻE tutu kinautolu ʻe ha afi.
Heʻikai ke nau lava ʻo fakahaofi kinautolu mei he mālohi ʻo e ulo ʻa e afí.
ʻOku ʻikai ko ha malala eni ke fai ai ha fakamāfana,
Pea ʻoku ʻikai ko ha afi eni ke tangutu ʻi muʻa ai.
15 Ko ia ʻe hoko ʻo pehē ʻa hoʻo kau faimaná,
ʻA kinautolu naʻá ke ngāue mo ia talu mei hoʻo kei talavoú.
Te nau ʻalu fano holo, ʻa e tokotaha taki taha ʻi hono hala* pē ʻoʻona.
ʻE ʻikai ha taha ke ne fakahaofi koe.+