ʻAisea
62 Koeʻuhi ko Saione heʻikai te u fakalongolongo,+
Pea koeʻuhi ko Selusalema heʻikai te u mālōlō
Kae ʻoua ke ulo atu ʻene māʻoniʻoní ʻo hangē ha maama ngingilá+
Pea ulo atu ʻene fakamoʻuí ʻo hangē ha tūhulú.+
2 “ʻE sio ʻa e ngaahi puleʻangá ki hoʻo māʻoniʻoní, ʻe fefine,+
Pea mo e ngaahi tuʻí kotoa ki ho lāngilangí.+
Pea ʻe uiʻaki koe ha hingoa foʻou,+
ʻA ia ʻe fakahaaʻi mei he ngutu tonu ʻo Sihová.
3 Te ke hoko ko ha kalauni fakaʻofoʻofa ʻi he nima ʻo Sihová,
Ko ha tatā faʻufaʻu fakatuʻi ʻi he ʻaofinima ʻo ho ʻOtuá.
Ka ʻe ui koe ʻo pehē Ko ʻEku Hōifuá ʻOku ʻIate Ia,+
Pea ko ho fonuá ʻe ui ko e Tokotaha Mali.
He ʻe hōifua ʻa Sihova kiate koe,
Pea ko ho fonuá ʻe hangē ha tokotaha malí.
5 He hangē ko e mali ʻa ha kiʻi talavou mo ha finemui kei nofo anga-maʻá,
ʻE mali ʻa ho kakaí mo koe.
Hangē ko e fiefia ʻa ha tangata mali ʻi ha taʻahine malí,
ʻE fiefia ʻa ho ʻOtuá ʻiate koe.+
6 Kuó u fekauʻi atu ha kau tangata leʻo ki ho ngaahi funga ʻaá, ʻe Selusalema.
Pea hokohoko atu ʻi he ʻahó kotoa mo e poó kotoa, ʻoku ʻikai totonu ke nau fakalongolongo.
Ko kimoutolu ʻoku mou lea ʻo fekauʻaki mo Sihová,
ʻOua ʻe mālōlō,
7 Pea ʻoua ʻe tuku ke ne mālōlō kae ʻoua kuó ne fokotuʻu maʻu ʻa Selusalema,
ʻIo, kae ʻoua kuó ne ʻai ia ke fakahīkihikiʻi ʻe he māmaní.”+
8 Kuo fai ʻe Sihova ha fuakava ʻaki hono nima toʻomataʻú, ʻaki hono nima mālohí:
“Heʻikai te u toe foaki hoʻo uité ki ho ngaahi filí ko haʻanau meʻakai,
Pea heʻikai ke inu ʻe he kau mulí hoʻo uaine foʻoú, ʻa ia kuó ke fakaongosia aí.+
9 Ka ko e faʻahinga ʻoku nau tānaki ʻa e uité te nau kai ia pea te nau fakahīkihikiʻi ʻa Sihova;
Pea ko kinautolu ʻoku nau tānaki ʻa e uainé te nau inu ia ʻi hoku ongo lotoʻā toputapú.”+
10 Laka atu, laka atu ʻi he ngaahi matapaá.
Fakaʻataʻatā ʻa e halá ki he kakaí.+
Tanu hake, tanu hake ʻa e hala lahí.
Toʻo mei ai ʻa e ngaahi maká.+
Fokotuʻu ha fakaʻilonga* ki he ngaahi kakaí.+
11 Vakai! Kuo fanongonongo ʻe Sihova ʻo aʻu ki he ngaahi ngataʻanga ʻo e māmaní:
“Lea ki he ʻofefine ʻo Saioné,
‘Vakai! ʻOku haʻu homou fakamoʻuí.+
Vakai! ʻOku ʻiate ia ʻa ʻene palé,
Pea ko e totongi te ne ʻoatú ʻoku ʻi hono ʻaó.’”+