ʻIsikeli

16 Naʻe toe hoko mai ʻa e folofola ʻa Sihová kiate au, ʻo pehē: 2 “Foha ʻo e tangata, ʻai ke ʻiloʻi ʻe Selusalema ʻa ʻene ngaahi tōʻonga fakalieliá.+ 3 Kuo pau ke ke pehē, ‘Ko e folofola eni ʻa e ʻEiki Hau ko Sihová ki Selusalemá: “Naʻá ke tupu pea fanauʻi koe ʻi he fonua ʻo e kau Kēnaní. Ko hoʻo tamaí ko e ʻĀmoli,+ pea ko hoʻo faʻeé ko e Heti.+ 4 ʻI ho fanauʻí, ʻi he ʻaho naʻe fāʻeleʻi ai koé, naʻe ʻikai tā ho uhó, naʻe ʻikai kaukauʻi ʻaki koe ha vai ke ke maʻa, naʻe ʻikai ke milimili ʻaki koe ha māsima, pea naʻe ʻikai ke takatakaiʻi ʻaki koe ha tupenu. 5 Naʻe ʻikai ha taha ʻe fakaʻofaʻia ʻiate koe ke ne fai ai ha taha ʻo e ngaahi meʻá ni. Naʻe ʻikai ha taha ʻe manavaʻofa kiate koe. ʻI hono kehé, naʻe lī koe ki he loto ʻataʻataá koeʻuhí naʻe fehiʻanekinaʻi koe ʻi he ʻaho ʻo ho fanauʻí.

6 “‘“ʻI heʻeku laka atú, naʻá ku sio ki hoʻo ʻakafute holo ʻi ho totó tonu, pea ʻi he lolotonga hoʻo tokoto ʻi ho totó, naʻá ku pehē atu: ‘Ke ke moʻui!’ ʻIo, naʻá ku pehē atu kiate koe ʻi hoʻo tokoto ʻi ho totó: ‘Ke ke moʻui!’ 7 Naʻá ku ʻai koe ko ha fuʻu kakai tokolahi ʻaupito, ʻo hangē ha ʻakau ʻoku huli ʻi he ngoué, pea naʻá ke tupu hake ʻo fuʻu lahi pea naʻá ke ʻai ʻa e meʻa-teuteu lelei tahá. Naʻe tupu ho ongo huhú, mo ho louʻulú; ka naʻá ke kei telefua pē mo taʻevala.”’

8 “‘ʻI heʻeku laka atu ʻo sio kiate koé, naʻá ku fakatokangaʻi kuó ke fuʻu lahi feʻunga ke fakahāhā ʻa e ʻofá. Ko ia naʻá ku folahi hoku kofú* ʻiate koe+ peá u ʻufiʻufi hoʻo telefuá peá u fai ha fakapapau mo ha fuakava mo koe,’ ko e fakahaaʻi ia ʻe he ʻEiki Hau ko Sihová, ‘pea naʻá ke hoko ko ʻeku meʻa. 9 ʻIkai ko ia pē, naʻá ku kaukauʻi koe ʻaki ʻa e vai pea fakamaʻa ʻa e totó meiate koe pea tākai lolo koe.+ 10 Naʻá ku fakakofu leva koe ʻaki ʻa e kofu kuo tui-teuteu pea ʻoatu kiate koe ha senitolo leta lelei* pea takatakaiʻi koe ʻaki ʻa e līneni lelei, pea naʻá ku fakakofu koe ʻaki ʻa e ngaahi kofu totongi mamafa. 11 Naʻá ku teuteuʻi koe ʻaki ʻa e ngaahi meʻa-teuteu pea ʻai ʻa e ngaahi vesa ki ho nimá mo ha kahoa ki ho kiá. 12 Naʻá ku toe ʻai foki ha mama ki ho ihú mo ha hau ki ho telingá pea mo ha kalauni fakaʻofoʻofa ki ho ʻulú. 13 Naʻá ke hanganaki teuteuʻi ʻaki koe ʻa e koula mo e siliva, pea ko ho kofú ko e līneni lelei, ko ha tupenu totongi mamafa, pea ko ha kofu kuo tui-teuteu. Ko e mahoaʻa lelei, hone, mo e lolo ʻa e meʻa naʻá ke kaí, pea naʻá ke tupu ʻo hoihoifua ʻaupito,+ pea naʻá ke taau ke hoko ko ha kuini.’”*

14 “‘Ko ho ongoongó* naʻe kamata ke mafola atu ʻi he lotolotonga ʻo e ngaahi puleʻangá+ koeʻuhí ko ho fakaʻofoʻofá, he naʻe haohaoa ia koeʻuhí ko ʻeku ʻai kiate koe ʻa hoku ngeiá tonu,’+ ko e fakahaaʻi ia ʻe he ʻEiki Hau ko Sihová.”

15 “‘Ka naʻe kamata ke ke falala ki ho fakaʻofoʻofá,+ pea koeʻuhi ko ho ongoongó naʻá ke hoko ai ko ha tokotaha feʻauaki.+ Naʻá ke faifeʻauaki tavale mo e tokotaha kotoa pē naʻe haʻu,+ pea naʻe ʻaʻana ʻa ho fakaʻofoʻofá. 16 Naʻá ke toʻo ha niʻihi ʻo ho ngaahi kofú peá ke teuteuʻiʻaki ha ngaahi potu māʻolunga lanu kehekehe ʻa ia naʻá ke fai ai hoʻo feʻauakí+—ko e ngaahi meʻa naʻe ʻikai totonu ke pehē, pea naʻe ʻikai totonu ke faifai ange pea hoko. 17 Naʻá ke toʻo foki ʻa hoʻo siueli* fakaʻofoʻofa naʻe ngaohi mei he koula mo e siliva ʻa ia naʻá ku ʻoatu maʻaú ʻo ke ngaohiʻaki maʻau ʻa e ngaahi ʻīmisi tangata peá ke faifeʻauaki mo kinautolu.+ 18 Pea naʻá ke toʻo ho ngaahi kofu kuo tui-teuteú ʻo ʻufiʻufiʻaki kinautolu,* pea naʻá ke foaki kiate kinautolu ʻa ʻeku loló mo ʻeku ʻinisēnisí.+ 19 Pea ko e mā ʻa ia kuó u foaki kiate koé—naʻe ngaohi mei he mahoaʻa lelei, lolo, mo e hone ʻa ia naʻá ku ʻoatu ke ke kaí—naʻá ke toe foaki ia kiate kinautolu ke hoko ko ha meʻa ʻoku ngangatu fakahōifua.*+ Ko e meʻa tofu pē ia naʻe hokó,’ ko e fakahaaʻi ia ʻe he ʻEiki Hau ko Sihová.”

20 “‘Naʻá ke toʻo ho ngaahi foha mo ho ngaahi ʻofefine naʻá ke fanauʻi kiate aú,+ peá ke foaki atu kinautolu ki he ngaahi ʻaitolí ko ha feilaulau+—kuo ʻikai koā ke feʻunga ʻa hoʻo faifeʻauakí? 21 Naʻá ke tāmateʻi hoku ngaahi fohá, peá ke foaki atu kinautolu ko e ngaahi feilaulau ʻaki hono ʻai ke nau fou atu ʻi he afí.*+ 22 Lolotonga hoʻo fai ʻa hoʻo ngaahi tōʻonga fakalieliá kotoa mo hoʻo faifeʻauakí, naʻe ʻikai te ke manatu ki he ngaahi ʻaho ʻo hoʻo talavoú, ʻa e taimi naʻá ke telefua ai mo taʻevala, mo ʻakafute holo ai ʻi ho totó tonu. 23 ʻI he hili ʻa hoʻo koví kotoa, ʻoiauē, ʻoiauē ka ko koe,’+ ko e fakahaaʻi ia ʻe he ʻEiki Hau ko Sihová. 24 ‘Naʻá ke langa ha foʻi tafunga maʻau mo ha potu māʻolunga maʻau ʻi he malaʻe fakakolo* kotoa pē. 25 Naʻá ke langa ho ngaahi potu māʻolungá ʻi he feituʻu tuʻu-ki-muʻa taha ʻo e hala kotoa pē, pea naʻá ke ʻai ho fakaʻofoʻofá ke hoko ko ha meʻa fakalielia ʻaki hono foaki atu koe* ki he tokotaha kotoa pē ʻoku haʻú,+ pea naʻá ke ʻai ke lahi ʻaupito ʻa hoʻo faifeʻauakí.+ 26 Naʻá ke faifeʻauaki mo e ngaahi foha ʻo ʻIsipité,+ ʻa ho ngaahi kaungāʻapi holi koví, pea naʻá ke fakaʻitaʻi au ʻaki hoʻo faifeʻauaki taʻefaʻalauá. 27 Ko eni te u mafao atu hoku nima mālohí kiate koe ʻo fakasiʻisiʻi ho ʻinasi meʻakaí+ pea te u tuku atu koe ke faʻiteliha ki ai ʻa e kau fefine ʻoku nau fehiʻa kiate koé,+ ʻa e ngaahi ʻofefine ʻo e kau Filisitiá, ʻa ia naʻa nau fakatumutumu koeʻuhi ko hoʻo tōʻonga palakuú.+

28 “‘Koeʻuhi ko e ʻikai te ke fiemālié, naʻá ke feʻauaki leva mo e ngaahi foha ʻo ʻAsīliá,+ ka ʻi he hili hoʻo faifeʻauaki mo kinautolú, naʻe kei ʻikai pē te ke maʻu ha fiemālie. 29 Ko ia naʻá ke fakalahi hoʻo feʻauakí ki he fonua ʻo e kau fefakatauʻakí* pea ki he kau Kalitiá,+ ka naʻa mo eni foki naʻe ʻikai pē te ke maʻu ha fiemālie. 30 He mahakiʻia* ē ka ko ho lotó,’* ko e fakahaaʻi ia ʻe he ʻEiki Hau ko Sihová, ‘ʻi hoʻo fai ʻa e ngaahi meʻa kotoa ko ení, ʻo hangē hoʻo tōʻongá ko ha tokotaha feʻauaki taʻemīngaó!+ 31 Ka ʻi he taimi naʻá ke langa ai hoʻo foʻi tafungá ʻi he feituʻu tuʻu-ki-muʻa taha ʻo e hala kotoa pē pea ʻai ʻa ho potu māʻolungá ʻi he malaʻe fakakolo kotoa pē, naʻe ʻikai te ke hangē ko ha tokotaha feʻauakí, koeʻuhí naʻá ke fakafisi ke tali ha faʻahinga totongi. 32 Ko ha uaifi tono koe ʻokú ke ʻofa ʻi he kau solá kae ʻikai ko ho husepāniti ʻoʻoú!+ 33 ʻOku foaki ʻe he kakaí ha meʻaʻofa ki he kau feʻauaki kotoa pē,+ ka ko koe ʻa e tokotaha kuó ke foaki ʻa e ngaahi meʻaʻofa ki he faʻahinga kotoa ʻoku holi kovi kiate koé,+ pea ʻokú ke totongi fufū kinautolu ke nau haʻu kiate koe mei he feituʻu kotoa pē ke mou faifeʻauaki.+ 34 Ko koé ʻokú ke kehe mei he kau fefine kehe ʻoku faifeʻauakí. ʻOku ʻikai ke faifeʻauaki ha taha ʻo hangē ko hoʻo foungá! ʻOkú ke totongiʻi ʻa e niʻihi kehé, pea ʻoku ʻikai te nau ʻoatu ha totongi kiate koe. Ko hoʻo foungá ʻoku kehe ia.’

35 “Ko ia ai, ʻa koe tokotaha faifeʻauaki,+ fanongo ki he folofola ʻa Sihová. 36 Ko e folofola eni ʻa e ʻEiki Hau ko Sihová: ‘Koeʻuhí ko hoʻo fakahaaʻi tavale atu ʻa hoʻo holi koví pea kuo fakaeʻa hoʻo telefuá lolotonga hoʻo faifeʻauaki mo ho ngaahi ʻofaʻangá pea mo e kotoa ʻo hoʻo ngaahi ʻaitoli fakalielia*+ mo palakū ʻa ia kuo aʻu ʻo ke feilaulau ʻaki ki ai ʻa e toto ʻo ho ngaahi fohá,+ 37 ko ia ai, ʻoku ou tānaki fakataha ʻa e kotoa ho ngaahi ʻofaʻanga kuó ke fakafiefiaʻí, ʻa e faʻahinga kotoa naʻá ke ʻofa aí fakataha mo e faʻahinga kotoa naʻá ke fehiʻa ki aí. Te u tānaki fakataha kinautolu mei he feituʻu kotoa ke faitau kiate koe pea fakaeʻa hoʻo telefuá kiate kinautolu, pea te nau sio atu ki hoʻo mātuʻaki telefuá.+

38 “‘Pea te u tauteaʻi koe ʻaki ʻa e ngaahi fakamaau ʻa ia ʻoku tuha mo e kau tono tangatá+ mo e kau fefine lingitotó,+ pea ko ho totó ʻe lilingi ia ʻi he houhau mo e fuaʻa.+ 39 Te u tuku koe ki honau nimá, pea te nau holoki hoʻo ngaahi foʻi tafungá, pea ko ho ngaahi potu māʻolungá ʻe tuku hifo;+ pea te nau hae ho ngaahi kofú+ pea toʻo hoʻo siueli*+ fakaʻofoʻofá pea tuku telefua koe mo taʻevala. 40 Te nau ʻomi ha fuʻu kakai+ ke fakafepakiʻi koe, pea te nau tolomakaʻi koe+ pea tāmateʻi koe ʻaki ʻenau ngaahi heletaá.+ 41 Te nau tutu ho ngaahi falé ʻaki ʻa e afi+ pea fakahoko ʻa e fakamaau kiate koé ʻi he ʻao ʻo e kau fefine tokolahi; pea te u fakangata ʻa hoʻo feʻauakí,+ pea ʻe tuku ʻa hoʻo ʻoatu ha totongí. 42 ʻE lolou ai ʻa ʻeku ʻita kiate koé,+ pea ko ʻeku tuputāmakí ʻe toʻo ia meiate koe;+ pea te u nonga ʻo ʻikai te u kei ongoʻi ʻita.’

43 “‘Koeʻuhí naʻe ʻikai te ke toe manatu ki he ngaahi ʻaho ʻo hoʻo talavoú+ pea kuó ke fakaʻitaʻi au ʻaki hono fai ʻa e ngaahi meʻá ni kotoa, te u ʻomi leva ʻa e ngaahi nunuʻa ʻo ho ngaahi ʻalungá ki ho tumuʻakí tonu,’ ko e fakahaaʻi ia ʻe he ʻEiki Hau ko Sihová, ‘pea heʻikai te ke kei hoko atu ʻi hoʻo tōʻonga palakuú mo e kotoa ʻo hoʻo ngaahi tōʻonga fakalieliá.

44 “‘Vakai! Ko e tokotaha kotoa pē ʻokú ne ngāueʻaki ʻa e ngaahi palōvēpí te ne ngāueʻaki ʻa e lea ko ení kiate koe: “ʻOku hoko pē ʻa e taʻahiné ki heʻene faʻeé!”+ 45 Ko e tama koe ʻa hoʻo faʻeé, ʻa ia naʻá ne taʻetokaʻi ʻa hono husepānití mo ʻene fānaú. Pea ko e tokoua koe ʻo ho fanga tokouá, ʻa ia naʻa nau taʻetokaʻi honau ngaahi husepānití mo ʻenau fānaú. Ko hoʻo faʻeé ko e Heti, pea ko hoʻo tamaí ko e ʻĀmoli.’”+

46 “‘Ko ho tokoua lahí ko Samēlia,+ ʻa ia ʻoku nofo ʻi he tafaʻaki fakatokelau ʻoʻoú*+ mo ʻene fānau fefiné,* pea ko ho tokoua siʻisiʻí, ʻa ia ʻoku nofo ʻi he tafaʻaki fakatonga ʻoʻoú,* ko Sōtoma+ mo ʻene fānau fefiné.+ 47 Naʻe ʻikai ngata pē ʻi hoʻo ʻaʻeva ʻi honau ngaahi ʻalungá pea muimui ʻi heʻenau ngaahi tōʻonga fakalieliá, ka ʻi ha kiʻi taimi nounou naʻe toe kovi ange ʻa e kotoa ho ʻulungāngá ʻoʻou ʻiate kinautolu.+ 48 ʻOku ou fuakava ʻiate au,’* ko e fakahaaʻi ia ʻe he ʻEiki Hau ko Sihová, ‘Kuo ʻikai fai ʻe Sōtoma ko ho tokouá mo ʻene fānau fefiné ʻa e meʻa kuó ke fai mo hoʻo fānau fefiné. 49 Vakai! Ko e angahala eni naʻe fai ʻe Sōtoma ko ho tokouá: Ko ia mo ʻene fānau fefiné+ naʻa nau pōlepole+ pea naʻe lahi ʻa e meʻakai+ naʻa nau maʻú pea nau nofo nonga ʻo ʻikai ha hohaʻa;+ ka neongo ia naʻe ʻikai te nau tokoni ki he faʻahinga faingataʻaʻiá pea mo e masivá.+ 50 Naʻa nau hīkisia ai pē+ mo fai ʻa e ngaahi tōʻonga fakalielia ʻi hoku ʻaó,+ ko ia naʻe fiemaʻu ai ke u toʻo atu kinautolu.+

51 “‘Pea naʻe ʻikai ke fai ʻe Samēlia+ naʻa mo e vaeua ʻo e ngaahi angahala naʻá ke faí. Naʻá ke hanganaki fai hoʻo ngaahi tōʻonga fakalieliá ʻo hulu atu ia ʻiate kinautolu, ʻo aʻu ki he tuʻunga naʻe hā māʻoniʻoni ai ho fanga tokouá ʻoʻou koeʻuhí ko e kotoa ʻo hoʻo ngaahi tōʻonga fakalieliá.+ 52 Ko ia kuo pau ke ke fua ʻa hoʻo fakamaá koeʻuhí kuó ke fakatonuhiaʻi ʻa e ʻulungaanga ʻo ho* fanga tokouá. Koeʻuhi ko hoʻo angahala ʻi hoʻo fai ʻa e meʻa fakalielia ange ʻiate kinautolú, ʻoku nau māʻoniʻoni ange ai ʻiate koe. Ko ia ai, ke ke mā peá ke fua ʻa e fakamā ʻo hoʻo ʻai ke hā māʻoniʻoni ho fanga tokouá.’

53 “‘Pea te u tānaki ʻenau kau pōpulá, ʻa e kau pōpula ʻo Sōtomá mo ʻene fānau fefiné pea mo e kau pōpula ʻo Samēlia mo ʻene fānau fefiné; te u tānaki foki ʻa hoʻo kau pōpulá fakataha mo kinautolu,+ 54 koeʻuhí ke ke fua ʻa hoʻo fakamaá; pea te ke ongoʻi mā koeʻuhí ko e meʻa kuó ke faí ʻi hono fakafiemālieʻi kinautolú. 55 Ko ho fanga tokouá tonu, ʻa Sōtoma mo ʻene fānau fefiné, te nau toe foki ki honau tuʻunga ki muʻá, pea ko Samēlia mo ʻene fānau fefiné te nau toe foki ki honau tuʻunga ki muʻá, pea ko koe mo hoʻo fānau fefiné te mou toe foki ki homou tuʻunga ki muʻá.+ 56 Ko Sōtoma ʻa ho tokouá naʻe ʻikai taau ia ke ke lave ki ai ʻi he ʻaho ʻo hoʻo pōlepolé, 57 ki muʻa ke fakaeʻa ʻa hoʻo fulikivanú.+ Ko ia ʻoku lumaʻi koe ʻe he fānau fefine ʻa Sīliá mo hono ngaahi kaungāʻapí, pea ko e fānau fefine ʻa e kau Filisitiá,+ ʻa e faʻahinga takatakai ʻiate koé, ʻoku nau manukiʻi koe. 58 Te ke fua ʻa e ngaahi nunuʻa ʻo hoʻo tōʻonga palakuú mo hoʻo ngaahi tōʻonga fakalieliá,’ ko e fakahaaʻi ia ʻe Sihová.”

59 “He ko e folofola eni ʻa e ʻEiki Hau ko Sihová: ‘Te u fai leva he taimí ni kiate koe ʻa e meʻa tofu pē naʻá ke faí,+ he kuó ke taʻetokaʻi ʻa e fakapapaú ʻaki hono maumauʻi ʻa ʻeku fuakavá.+ 60 Ka ko au tonu te u manatuʻi ʻa e fuakava naʻá ku fai mo koe ʻi he ngaahi ʻaho ʻo hoʻo kei talavoú, pea te u fokotuʻu ha fuakava tuʻuloa mo koe.+ 61 Te ke manatuʻi ʻa hoʻo tōʻongá peá ke ongoʻi mā+ ʻi hoʻo talitali lelei ʻa ho fanga tokouá, ʻa kinautolu ʻoku lahi ʻiate koé pea pehē kiate kinautolu ʻoku siʻi ʻiate koé, pea te u foaki atu kinautolu kiate koe ko hoʻo fānau fefine, ʻo ʻikai koeʻuhí ko hoʻo fuakavá.’

62 “‘Pea te u fokotuʻu ʻe au ʻa ʻeku fuakava mo koé; pea kuo pau ke ke ʻilo ai ko Sihova au. 63 Pea te ke manatuʻi peá ke hoko ʻo mā ʻaupito ke ava ho ngutú koeʻuhí ko hoʻo maá,+ ʻi heʻeku fai ha ʻufiʻufi angahala maʻau neongo ʻa e meʻa kotoa kuó ke faí,’+ ko e fakahaaʻi ia ʻe he ʻEiki Hau ko Sihová.”