ʻIsikeli
25 Naʻe toe hoko mai ʻa e folofola ʻa Sihová kiate au, ʻo pehē: 2 “Foha ʻo e tangata, hanga ho matá ki he kau ʻĀmoní,+ pea fai ha kikite kiate kinautolu.+ 3 Kuo pau ke ke lea ʻo fekauʻaki mo e kau ʻĀmoní, ‘Fanongo ki he folofola ʻa e ʻEiki Hau ko Sihová. Ko e meʻa eni ʻoku folofolaʻaki ʻe he ʻEiki Hau ko Sihová: “Koeʻuhi naʻá ke pehē ‘Sai ē,’ ki hoku feituʻu toputapú ʻi he taimi naʻe taʻefakaʻapaʻapaʻi ai iá, pea ki he fonua ko ʻIsilelí ʻi he taimi naʻe maomaonganoa aí, pea ki he fale ʻo Siutá ʻi he taimi naʻe ʻave fakamālohi ai kinautolú, 4 ko ia ai, te u tuku atu koe ki he kakai ʻo e Hahaké ke nau maʻu. Te nau fokotuʻu honau ngaahi ʻapitangá* ʻi loto ʻiate koe pea fokotuʻu mo honau ngaahi tēnití ʻi ho lotolotongá. Te nau kai ʻa e fua ʻo ho fonuá, pea te nau inu ʻa hoʻo huʻakaú. 5 Te u ʻai ʻa Lapa+ ko ha kaikaiʻanga ʻo e fanga kāmelí, pea mo e fonua ʻo e kau ʻĀmoní ko ha mālōlōʻanga ʻo e fanga sipí; pea kuo pau ke mou ʻilo ko Sihova au.”’”
6 “He ko e meʻa eni ʻoku folofolaʻaki ʻe he ʻEiki Hau ko Sihová: ‘Koeʻuhi naʻá ke pasi nima+ mo fakapatū ho vaʻé peá ke katakataʻi ʻa e fonua ko ʻIsilelí ʻaki ha fuʻu manuki pehē fau,+ 7 ko ia ai, te u mafao atu hoku nimá kiate koe ke ʻoatu koe ki he ngaahi puleʻangá ko ha koloa vete. Te u tuʻusi koe mei he ngaahi kakaí pea te u fakaʻauha koe mei he ngaahi fonuá.+ Te u fakaʻauha ʻosi koe, pea kuo pau ke ke ʻilo ko Sihova au.’
8 “Ko e meʻa eni ʻoku folofolaʻaki ʻe he ʻEiki Hau ko Sihová: ‘Koeʻuhi kuo pehē ʻe Mōape+ mo Seia,+ “Vakai! Ko e fale ʻo Siutá ʻoku hangē pē ko e kotoa ʻo e ngaahi puleʻanga kehé,” 9 te u ʻai ʻa e ngaahi kolo ʻi he kauʻāfonua ʻo Mōapé ke ʻikai ke kei malu, ʻa e fakaʻofoʻofaʻanga* ʻo hono fonuá, ʻa Pete-sisimoti, Pēali-meoni, ʻo aʻu ki Kiliataimi.+ 10 Te u ʻave ia fakataha mo e kau ʻĀmoní ke maʻu ʻe he kakai ʻo e Hahaké,+ koeʻuhi ke ʻoua naʻa manatua ʻa e kau ʻĀmoní ʻi he lotolotonga ʻo e ngaahi puleʻangá.+ 11 Pea te u fakahoko ha fakamaau ʻi Mōape,+ pea kuo pau ke nau ʻilo ko Sihova au.’
12 “Ko e meʻa eni ʻoku folofolaʻaki ʻe he ʻEiki Hau ko Sihová: ‘Kuo fai ʻe ʻĪtomi ha sāuni ki he fale ʻo Siutá pea kuó ne fakatupunga ai haʻane halaia lahi ʻi heʻene fai ha sāuni kiate kinautolú;+ 13 ko ia ai, ko e meʻa eni ʻoku folofolaʻaki ʻe he ʻEiki Hau ko Sihová: “Te u mafao atu foki hoku nimá ki ʻĪtomi ʻo tuʻusi fakatouʻosi mei ai ʻa e tangata mo e manu, pea te u ʻai ia ke hoko ʻo lala.+ Mei Tīmani ʻo aʻu ki Titani, te nau tō ʻi he heletā.+ 14 ‘Te u faisāuni ki ʻĪtomi fakafou ʻi he nima ʻo hoku kakai ʻIsilelí.+ Te nau fakahoko ʻa ʻeku ʻitá mo ʻeku tuputāmakí ki ʻĪtomi, koeʻuhi ke nau hokosia tonu ʻa ʻeku faisāuní,’+ ko e fakahaaʻi ia ʻe he ʻEiki Hau ko Sihová.”’
15 “Ko e meʻa eni ʻoku folofolaʻaki ʻe he ʻEiki Hau ko Sihová: ‘Koeʻuhi ko e fakafili taʻemālōlō ʻa e kau Filisitiá, kuo nau feinga fakalotokovi ai ke fakahoko ha sāuni mo ha fakaʻauha.+ 16 Ko ia ai, ko e meʻa eni ʻoku folofolaʻaki ʻe he ʻEiki Hau ko Sihová: “Ko au eni ʻoku ou mafao atu hoku nimá ki he kau Filisitiá,+ pea te u tuʻusi ʻa e kau Kēletí+ mo fakaʻauha ʻa e toenga kakai ʻi he matāfonuá.+ 17 Te u fakahoko kiate kinautolu ha fuʻu faisāuni fakataha mo e ngaahi tautea kakaha, pea kuo pau ke nau ʻilo ko Sihova au ʻi heʻeku faisāuni kiate kinautolú.”’”