ʻIsikeli
31 ʻI he taʻu hono 11, ʻi he māhina hono tolú, ʻi he ʻuluaki ʻaho ʻo e māhiná, naʻe toe hoko mai ai ʻa e folofola ʻa Sihová kiate au, ʻo pehē: 2 “Foha ʻo e tangata, lea kia Felo ko e tuʻi ʻo ʻIsipité mo ʻene fuʻu kakaí,+
‘Ko hai ʻoku tatau mo koe ʻi ho lahí?
3 Naʻe ʻi ai ha tokotaha ʻAsīlia, ko ha fuʻu sita ʻi Lepanoni,
Naʻe fakaʻofoʻofa ʻa hono ngaahi vaʻá ʻo hangē ha pupunga ʻakau fakamalumalú, pea naʻe māʻolunga ʻaupito;
Ko hono tumutumú naʻe aʻu hake ki he ngaahi ʻaó.
4 Naʻe ʻai ia ʻe he vaí ke ne tupu ʻo fuʻu lahi, pea naʻe ʻai ia ʻe he ngaahi matavai lolotó ke ne tupu ʻo māʻolunga.
Naʻe takatakai ʻi he feituʻu naʻe tō aí ha ngaahi tafengavai;
Ko honau ngaahi mangaʻivaí naʻe maʻu vai mei ai ʻa e ʻuluʻakau kotoa ʻo e ngoué.
5 Ko e ʻuhinga ia naʻá ne tupu ai ʻo māʻolunga ange ʻi he ʻuluʻakau kehe kotoa ʻo e ngoué.
Naʻe lahi ʻa hono ngaahi vaʻa lalahí, pea naʻe lōloa ʻa e tupu ʻa hono ngaahi vaʻa īkí
Koeʻuhi ko e lahi ʻa e vai ʻi hono ngaahi tafengavaí.
6 Ko e fanga manupuna kotoa ʻo e ʻataá naʻa nau ʻai pununga ʻi hono ngaahi vaʻa lalahí,
Ko e fanga manu fekai kotoa ʻo e vaó naʻa nau fanafanau ʻi lalo ʻi hono ngaahi vaʻa īkí,
Pea ko e ngaahi puleʻanga lalahi kotoa pē naʻa nau nofo ʻi hono malumalú.
7 Naʻe hoko ia ʻo fisifisimuʻa ʻi hono fakaʻofoʻofá pea ʻi he lōloa ʻa hono ngaahi vaʻa īkí,
He naʻe ʻalu hifo hono ngaahi aká ki he ngaahi vai lahi.
8 Naʻe ʻikai ha toe fuʻu sita ʻi he ngoue ʻa e ʻOtuá+ naʻe lava ke fakahoa ki ai.
Naʻe ʻikai ha fuʻu siunipa ʻi he ʻulu siunipá naʻe hangē ʻa hono ngaahi vaʻa lalahí ko iá,
Pea naʻe ʻikai ha fuʻu paleini ʻi he ʻulu paleiní naʻe vāvātatau mo hono ngaahi vaʻá.
Naʻe ʻikai ha toe fuʻu ʻakau ʻi he ngoue ʻa e ʻOtuá naʻe lava ke ne fakauouaʻi ʻa hono fakaʻofoʻofá.
9 Naʻá ku ngaohi ia ke fakaʻofoʻofa, mo mohu lau,
Pea naʻe meheka ki ai ʻa e ʻuluʻakau kehe kotoa pē ʻi ʻĪteni, ʻa e ngoue ʻa e ʻOtua moʻoní.’
10 “Ko ia ai, ko e folofola eni ʻa e ʻEiki Hau ko Sihová: ‘Koeʻuhí ko ʻene* hoko ʻo fuʻu māʻolunga, pea mahiki hake hono tumutumú ʻo aʻu ki he ngaahi ʻaó, pea ʻafungi ʻa hono lotó koeʻuhí ko ʻene māʻolungá, 11 te u tuku atu ia ki he tokotaha pule mālohi ʻo e ngaahi puleʻangá.+ Kuo pau moʻoni ke ne fai ha meʻa ki ai, pea te u siʻaki ia koeʻuhi ko ʻene fulikivanú. 12 Pea ʻe tā hifo ia ʻe ha kau muli, ko e kau anga-fakamamahi taha ʻi he ngaahi puleʻangá, pea te nau liʻaki ia ʻi he ngaahi moʻungá, pea ʻe ngangana ʻa hono ngaahi laú ʻi he kotoa ʻo e ngaahi teleʻá, pea ʻe fetākotoʻi hono ngaahi vaʻá kuo mafesifesi ʻi he tafengavai kotoa ʻo e fonuá.+ Ko e kotoa ʻo e ngaahi kakai ʻo e māmaní te nau mavahe mei hono malumalú pea nau liʻaki ia. 13 Ko e fanga manupuna kotoa ʻo e ʻataá te nau nofo ʻi hono sino kuo holó, pea ʻe nofo ʻa e fanga manu fekai kotoa ʻo e vaó ʻi hono ngaahi vaʻá.+ 14 ʻOku hoko ení koeʻuhí ke ʻoua naʻa ʻi ai ha fuʻu ʻakau ʻoku ofi ki he ngaahi vaí ʻe tupu ʻo māʻolunga ʻaupito pe mahiki hake ʻa hono tumutumú ʻo aʻu ki he ngaahi ʻaó, pea ʻikai ha fuʻu ʻakau mohu vai ʻe aʻu hake ki ai ʻa hono māʻolungá. He ʻe tuku atu kinautolu kotoa ki he maté, ki lolofonua, fakataha mo e ngaahi foha ʻo e faʻahinga ʻo e tangatá, ʻa ia ʻoku nau ʻalu hifo ki he luó.’*
15 “Ko e folofola eni ʻa e ʻEiki Hau ko Sihová: ‘ʻI he ʻaho ʻe ʻalu hifo ai ki Faʻitoká,* te u ʻai ke fai ha fakamamahi. Ko ia ai, te u tāpuni ʻa e ngaahi vai lolotó pea taʻofi ʻa hono ngaahi tafengavaí koeʻuhí ke tuʻu ʻo ʻoua naʻa toe maʻu ha vai lahi. Te u ʻai ke fakapoʻuli ʻa Lepanoni koeʻuhí ko ia, pea ko e ʻuluʻakau ʻo e ngoué ʻe mae hono kotoa. 16 ʻI he ongo mai ʻa ʻene toó, te u ʻai ʻa e ngaahi puleʻangá ke nau tetetete ʻi heʻeku ʻohifo ia ki Faʻitoka* fakataha mo e faʻahinga kotoa ʻoku ʻalu hifo ki he luó,* pea ko e ʻuluʻakau kotoa ʻi ʻĪtení,+ ʻa e ʻuluʻakau fungani mo lelei taha ʻo Lepanoní, mo ia kotoa ʻoku mohu vaí, ʻe fakafiemālieʻi ʻi lolofonua. 17 Kuo nau ʻalu hifo ki Faʻitoka* fakataha mo ia, ki he faʻahinga kuo tāmateʻi ʻaki ʻa e heletaá,+ fakataha mo hono kau poupou* naʻa nau nofo ʻi hono malumalú ʻi he lotolotonga ʻo e ngaahi puleʻangá.’+
18 “‘Ko fē ʻi he ʻuluʻakau ʻo ʻĪtení naʻe tatau mo koe ʻa hono lāngilangí mo hono lahí?+ Ka ko hono moʻoní ʻe ʻohifo koe fakataha mo e ʻuluʻakau ʻo ʻĪtení ki lolofonua. Te ke tokoto ʻi he lotolotonga ʻo e kau taʻekamú fakataha mo e faʻahinga kuo tāmateʻi ʻaki ʻa e heletaá. ʻE hoko ʻa e meʻá ni kia Felo pea mo ʻene fuʻu kakaí kotoa,’ ko e fakahaaʻi ia ʻe he ʻEiki Hau ko Sihová.”