ʻIsikeli
35 Naʻe toe hoko mai ʻa e folofola ʻa Sihová kiate au, ʻo pehē: 2 “Foha ʻo e tangata, hanga ki he feituʻu moʻungaʻia ʻo Seiá,+ peá ke fai ha kikite ki ai.+ 3 Te ke lea ki ai ʻo pehē, ‘Ko e folofola eni ʻa e ʻEiki Hau ko Sihová: “Ko eni ʻoku ou hoko ko ho fili, ʻe feituʻu moʻungaʻia ʻo Seia, pea te u mafao atu hoku nimá kiate koe ʻo ʻai koe ke ke maomaonganoa.+ 4 Te u ʻai ho ngaahi koló ke hoko ko ha ngaahi fokotuʻunga maumau, pea te ke hoko ʻo maomaonganoa;+ pea kuo pau ke ke ʻilo ko Sihova au. 5 He naʻe ʻikai tuku ʻa hoʻo fakafilí,+ pea naʻá ke tuku ʻa e kau ʻIsilelí ki he heletaá ʻi he taimi ʻo ʻenau tuʻutāmakí, ʻi he taimi ʻo honau tautea fakaʻosí.”’+
6 “‘Ko ia ai, ʻoku ou fuakava ʻiate au,’* ko e fakahaaʻi ia ʻe he ʻEiki Hau ko Sihová, ‘te u teuteuʻi koe ki he lingitoto, pea ʻe tulimui kiate koe ʻa e lingitotó.+ Koeʻuhi ko e toto naʻá ke fehiʻa aí, ʻe tulimui kiate koe ʻa e lingitotó.+ 7 Te u ʻai ke maomaonganoa+ ʻa e feituʻu moʻungaʻia ʻo Seiá, pea te u tuʻusi mei ai ha taha pē ʻe fou atu ai mo ha taha pē ʻe foki mai ai. 8 Te u fakafonu ʻa hono ngaahi moʻungá ʻi he faʻahinga kuo tāmateʻí; pea ko e faʻahinga kuo tāmateʻi ʻaki ʻa e heletaá te nau tō ʻi ho ngaahi feituʻu māʻolungá, ʻi ho ngaahi teleʻá, pea ʻi ho ngaahi vaitafé kotoa. 9 Te u ʻai koe ke ke hoko ko ha feituʻu lala ʻo taʻengata, pea heʻikai ke nofoʻi ʻa ho ngaahi koló;+ pea kuo pau ke mou ʻilo ko Sihova au.’
10 “Koeʻuhí naʻá ke pehē, ‘ʻE ʻaʻaku ʻa e ongo puleʻangá ni mo e ongo fonuá ni, pea te mau maʻu fakatouʻosi ia,’+ neongo naʻe ʻi ai tonu ʻa Sihova, 11 ‘ko ia ai, ʻoku ou fuakava ʻiate au,’* ko e fakahaaʻi ia ʻe he ʻEiki Hau ko Sihová, ‘te u fai kiate koe ʻo fakatatau ki he ʻita mo e meheka tatau naʻá ke fakahāhā ʻi hoʻo tāufehiʻa kiate kinautolú;+ pea te u ʻai ke nau ʻiloʻi au ʻi honau lotolotongá ʻi he taimi te u fakamāuʻi ai koé. 12 Kuo pau leva ai ke ke ʻilo ko au Sihova tonu, kuó u fanongo ki he kotoa ʻo hoʻo ngaahi laukovi naʻe fai ki he ngaahi moʻunga ʻo ʻIsilelí ʻi hoʻo pehē, “Kuo hoko ia ko ha feituʻu lala pea kuo tuku mai ke mau keina.”* 13 Pea kuo mou fai ʻa e lea pōlepole kiate au, pea kuo mou fakalahi ʻa hoʻomou lau kiate aú.+ Naʻá ku fanongo kotoa ki ai.’
14 “Ko e folofola eni ʻa e ʻEiki Hau ko Sihová: ‘ʻE fiefia ʻa māmani kātoa ʻi heʻeku ʻai koe ke ke maomaonganoá. 15 Hangē pē ko hoʻo fiefia ʻi he maomaonganoa ʻa e tofiʻa ʻo e fale ʻo ʻIsilelí, ʻe pehē ʻa e meʻa te u fai kiate koé.+ Te ke hoko ko ha feituʻu maumau mo maomaonganoa, ʻe feituʻu moʻungaʻia ʻo Seia, ʻio, ʻa ʻĪtomi kātoa;+ pea kuo pau ke nau ʻilo ko Sihova au.’”