Ua Sāmiuela

18 Pea naʻe lau ʻe Tēvita ʻa e kau tangata naʻe ʻiate iá pea fokotuʻu kiate kinautolu ʻa e ngaahi ʻeiki ʻo e ngaahi toko afe pea mo e ngaahi ʻeiki ʻo e ngaahi toko teau.+ 2 Pea naʻe tuku atu ʻe Tēvita ʻa e vahe tolu ʻe taha ʻo e kau tangatá ki he malumalu ʻo e pule ʻa* Sioapé,+ pea ko e vahe tolu ʻe taha ki he malumalu ʻo e pule ʻa e tokoua ʻo Sioape ko ʻApisai+ ko e tama ʻa Seluvaiá,+ pea ko e vahe tolu ʻe taha ki he malumalu ʻo e pule ʻa ʻĪtai+ ko e tangata Katí. Naʻe pehē ange leva ʻe he tuʻí ki he kau tangatá: “Te u ʻalu foki mo kimoutolu.” 3 Ka naʻa nau pehē: “Kuo pau ke ʻoua naʻá ke ʻalu,+ he kapau te mau hola, heʻikai te nau tokanga mai kinautolu* kiate kimautolu; pea kapau ʻe mate ha vaeua ʻo kimautolu, heʻikai te nau tokanga mai kinautolu kiate kimautolu, koeʻuhí ko ho mahuʻingá ʻoku tatau ia mo e toko 10,000 ʻo kimautolu.+ Ko ia ai, ʻe lelei ange kapau te ke ʻomai ha tokoni kiate kimautolu mei he koló.” 4 Naʻe pehē ange ʻe he tuʻí kiate kinautolu: “Ko e hā pē ʻa e meʻa ʻoku hā lelei taha kiate kimoutolú, te u fai ia.” Ko ia naʻe tuʻu ʻa e tuʻí ʻi he veʻe matapā ʻo e koló, pea naʻe ʻalu atu ʻa e kau tangatá kotoa ʻi he ngaahi toko teau pea ʻi he ngaahi toko afe. 5 Pea naʻe ʻoange ʻe he tuʻí ʻa e tuʻutuʻuni ko ení kia Sioape mo ʻApisai pea mo ʻĪtai: “Fai fakaalaala ki he talavou ko ʻApisalomé koeʻuhí ko au.”+ Naʻe fanongo ʻa e kau tangatá kotoa ʻi he taimi naʻe ʻoange ai ʻe he tuʻí ʻa e tuʻutuʻuni fekauʻaki mo ʻApisalomé ki he kotoa ʻo e ngaahi ʻeikí.

6 Naʻe ʻalu atu ʻa e kau tangatá ki he vaó ke fetaulaki mo ʻIsileli, pea naʻe fai ʻa e taú ʻi he vaotā ʻo ʻIfalemí.+ 7 ʻI aí naʻe ikunaʻi ai ʻa e kakai ʻo ʻIsilelí+ ʻe he kau sevāniti ʻa Tēvitá,+ pea naʻe hoko ha tāmate lahi ʻi he ʻaho ko iá—ko e kau tangata ʻe toko 20,000. 8 Naʻe mafola atu ʻa e taú ʻi he kotoa ʻo e vahefonuá. ʻIkai ngata aí, naʻe tokolahi ange ʻa e kakai naʻe keina ʻe he vaotaá ʻi he faʻahinga naʻe keina ʻe he heletaá ʻi he ʻaho ko iá.

9 Naʻe faai atu pē ʻo fakatokangaʻi hake ʻe ʻApisalome kuó ne fehangahangai mo e kau sevāniti ʻa Tēvitá. Naʻe heka ʻa ʻApisalome ʻi ha miuli, pea naʻe ʻalu atu ʻa e miulí ʻi lalo ʻi ha ngaahi vaʻa fihifihi ʻo ha fuʻu ʻakau, pea naʻe fihia ʻa e ʻulu ʻo ʻApisalomé ʻi he fuʻu ʻakau ko iá ʻo ne tautau ai ʻi he ʻeá,* lolotonga ia naʻe hoko atu pē ʻa e fononga ia ʻa e miuli naʻá ne heka aí. 10 Pea naʻe sio ha tokotaha ki ai peá ne tala ange kia Sioape:+ “Vakai! Naʻá ku sio kia ʻApisalome ʻokú ne tautau ʻi ha fuʻu ʻakau.” 11 Naʻe tali ange ʻe Sioape ki he tangata naʻá ne tala ange ia kiate iá: “Kapau naʻá ke sio ai, ko e hā naʻe ʻikai te ke taaʻi ai ia ʻi he taimi pē ko iá ke tō hifo ki he kelekelé? Naʻe mei peheni haʻaku foaki fiefia atu kiate koe ha konga siliva ʻe hongofulu mo hao leta.” 12 Ka naʻe pehē ʻe he tangatá kia Sioape: “Neongo kapau naʻe ʻomi kiate au* ha konga siliva ʻe 1,000, naʻe ʻikai te u mei hiki ʻe au hoku nimá ki he foha ʻo e tuʻí, he naʻa mau fanongo ki he tuʻutuʻuni ʻa e tuʻí kiate koe mo ʻApisai pea mo ʻĪtaí, ‘Tatau ai pē pe ko hai koe, tokanga ki he talavou ko ʻApisalomé.’+ 13 Kapau naʻá ku talangataʻa peá u toʻo ʻene moʻuí, naʻe ʻikai ʻaupito mei malava ke fufū ia mei he tuʻí, pea naʻe ʻikai te ke mei maluʻi ʻe koe au.” 14 ʻI he meʻá ni naʻe pehē ange ʻe Sioape: “Heʻikai te u toe fakamole taimi mo koe!” Ko ia naʻá ne toʻo ha ngaahi meʻa mata māsila* ʻe tolu ʻi hono nimá peá ne hokaʻi ʻaki ʻa e mafu ʻo ʻApisalomé lolotonga ʻene kei moʻui ʻo fihia ʻi he fuʻu ʻakaú. 15 Pea ko e kau tamaioʻeiki ʻe toko hongofulu naʻa nau toʻo ʻa e ngaahi meʻatau ʻa Sioapé, naʻa nau haʻu ʻo nau taaʻi ʻa ʻApisalome kae ʻoua kuó ne mate.+ 16 Naʻe ifi leva ʻe Sioape ʻa e meʻaifí, pea naʻe foki mai ʻa e kau tangatá mei heʻenau tuli ki ʻIsilelí; ko ia naʻe taʻofituʻu kinautolu ʻe Sioape. 17 Naʻa nau ʻave ʻa ʻApisalome ʻo lī ia ki ha fuʻu luo ʻi he vaotaá pea nau fokotuʻu ha fuʻu fokotuʻunga maka lahi ʻaupito+ ʻiate ia. Pea naʻe hola ʻa e kotoa ʻo ʻIsilelí ki honau ngaahi ʻapí.

18 Pea ko ʻApisalome, ʻi he lolotonga ʻene kei moʻuí, naʻá ne ʻave ʻo fokotuʻu ha fuʻu pou moʻona ʻi he Teleʻa* ʻo e Tuʻí,+ he naʻá ne pehē: “ʻOku ʻikai haku foha ke fakamanatu ai hoku hingoá.”+ Ko ia naʻá ne fakahingoa ʻa e fuʻu poú kiate ia pē, pea ʻoku ui ia ko e Pou Fakamanatu ʻo ʻApisalomé ʻo aʻu mai ki he ʻahó ni.

19 Naʻe pehē ʻe ʻAhimaasi+ ko e foha ʻo Sātokí: “Tuku muʻa ke u lele ʻo fakahā ʻa e ongoongó ki he tuʻí, he kuo fai ʻe Sihova ha fakamaau totonu kiate ia ʻaki hono fakatauʻatāinaʻi ia mei hono ngaahi filí.”+ 20 Ka naʻe pehē ange ʻe Sioape kiate ia: “ʻE ʻikai te ke hoko ko ha tokotaha ʻave ongoongo he ʻahó ni. Te ke fakahā ʻa e ongoongó ʻi ha ʻaho kehe, ka ʻi he ʻahó ni ʻe ʻikai te ke fakahā ai ʻa e ongoongó, koeʻuhí kuo mate+ ʻa e foha tonu ʻo e tuʻí.” 21 Naʻe pehē ange leva ʻe Sioape ki ha tangata Kusa:+ “ʻAlu ʻo tala ki he tuʻí ʻa e meʻa kuó ke mamata aí.” Naʻe punou leva ʻa e tangata Kusá kia Sioape peá ne lele. 22 Naʻe toe pehē ange ʻe ʻAhimaasi ko e foha ʻo Sātokí kia Sioape: “Tatau ai pē pe ko e hā ʻe hokó, kātaki ʻo tuku mo au ke u lele mui atu ʻi he tangata Kusá.” Kae kehe, naʻe pehē ange ʻe Sioape: “Ko e hā ke ke lele aí ʻe hoku foha, lolotonga ia ʻoku ʻikai ha ongoongo ke ke tala?” 23 Naʻá ne kei pehē ange pē: “Tatau ai pē pe ko e hā ʻe hokó, tuku mai ke u lele.” Ko ia naʻe pehē ange ʻe Sioape kiate ia: “Lele!” Pea naʻe lele ʻa ʻAhimaasi ʻi he hala ʻo e vahefonua ʻo Sioataní, pea naʻe faifai pē ʻo ne fakalaka atu ʻi he tangata Kusá.

24 Pea ko Tēvita naʻá ne tangutu ʻi he vahaʻa ʻo e ongo matapā ʻo e koló,+ pea naʻe ʻalu hake ʻa e tangata leʻó+ ki he ʻato ʻo e matapā ʻo e koló ʻoku ʻi he ʻaá. Naʻá ne hanga hake ʻo ne sio atu ki ha tangata ʻoku lele toko taha mai. 25 Ko ia naʻe ui ʻa e tangata leʻó ʻo ne fakahā ki he tuʻí. Naʻe pehē ʻe he tuʻí: “Kapau ʻokú ne toko taha pē, ʻokú ne haʻu mo ha ongoongo ke tala mai.” ʻI he fakaʻau ke ne toe ofi maí, 26 naʻe sio ʻa e tangata leʻó ki ha toe tangata ʻe taha ʻoku lele mai. Naʻe ui leva ʻa e tangata leʻó ki he leʻo matapaá: “Vakai! Ko ha tangata ena ʻe taha ʻoku lele toko taha mai!” Naʻe pehē ʻe he tuʻí: “Ko e tokotahá ni ʻokú ne toe haʻu mo ha ongoongo.” 27 Naʻe pehē ʻe he tangata leʻó: “ʻOku ou sio ko e ʻuluaki tangata ʻoku lele maí ʻoku hangē mai ko ʻAhimaasi+ ko e foha ʻo Sātokí,” ko ia naʻe pehē ʻe he tuʻí: “Ko ha tangata lelei ia, pea ʻokú ne haʻu mo ha ongoongo lelei.” 28 Naʻe ui atu leva ʻa ʻAhimaasi ki he tuʻí: “ʻOku lelei ʻa e meʻa kotoa!” Naʻá ne punou leva ki he tuʻí ʻo ne hanga ki he kelekelé. Pea naʻá ne pehē: “ʻOfa ke fakahīkihikiʻi ʻa Sihova ko ho ʻOtuá, ʻa ia kuó ne ʻai ke tukulolo atu ʻa e kau tangata ko ia naʻa nau angatuʻu* ki hoku ʻeiki ko e tuʻí!”+

29 Kae kehe, naʻe pehē ange ʻe he tuʻí: “ʻOku lelei ʻa e meʻa kotoa pē fekauʻaki mo e talavou ko ʻApisalome?” ʻI he meʻá ni naʻe pehē ʻe ʻAhimaasi: “Naʻá ku sio ki he fuʻu vālautuʻu ʻi he taimi naʻe fekauʻi mai ai ʻe Sioape ʻa e sevāniti ʻa e tuʻí pea mo hoʻo sevānití, ka naʻe ʻikai te u ʻilo pe ko e hā ia.”+ 30 Ko ia naʻe pehē ʻe he tuʻí: “Manga hake ki hē ʻo tuʻu ai.” Ko ia naʻá ne manga hake ʻo tuʻu ai.

31 Naʻe aʻu mai leva ʻa e tangata Kusá,+ pea naʻe pehē ʻe he tangata Kusá: “Ke tali ʻe hoku ʻeiki ko e tuʻí ʻa e ongoongó ni: ʻI he ʻahó ni kuo fakahoko ai ʻe Sihova ʻa e fakamaau totonu ʻaki hono fakatauʻatāinaʻi koe mei he nima ʻo e faʻahinga kotoa naʻa nau angatuʻu kiate koé.”+ 32 Ka naʻe pehē ʻe he tuʻí ki he tangata Kusá: “ʻOku lelei ʻa e meʻa kotoa pē fekauʻaki mo e talavou ko ʻApisalomé?” ʻI he meʻá ni naʻe pehē ʻe he tangata Kusá: “ʻOfa ke hoko ʻo hangē ko e talavoú ni+ ʻa e ngaahi fili kotoa pē ʻo hoku ʻeiki ko e tuʻí, pea mo e faʻahinga kotoa naʻa nau angatuʻu atu ke fai ha kovi kiate koé!”

33 Naʻe hohaʻatuʻu ʻa e tuʻí ʻi he meʻá ni, pea naʻá ne ʻalu hake ki he loki ʻi ʻolunga ʻi he funga matapā hūʻanga ʻo e koló peá ne tangi, ʻo ne ʻalu pē mo pehē: “ʻE hoku foha ʻApisalome, ʻe hoku foha, ʻe hoku foha ʻApisalome! Taumaiā naʻá ku mate au ko ho fetongi, ʻApisalome hoku foha, ʻe hoku foha!”+