Ua Sāmiuela
19 Naʻe fakahā kia Sioape: “Ko e tuʻí ē ʻoku tangi mo mamahi koeʻuhi ko ʻApisalome.”+ 2 Ko ia ko e ikuna* ʻi he ʻaho ko iá naʻe liliu ia ko e mamahi ki he kakaí kotoa, koeʻuhí naʻa nau fanongo ʻoku loto-mamahi ʻa e tuʻí koeʻuhí ko hono fohá. 3 Naʻe foki fakalongolongo ai ʻa e kakaí ki he koló+ ʻi he ʻaho ko iá ʻo hangē ha kakai ʻoku nau mā koeʻuhí ko haʻanau hola ʻi he taú. 4 Naʻe pūlou ʻe he tuʻí hono fofongá peá ne tangi leʻo-lahi ai pē: “ʻE hoku foha ʻApisalome! ʻApisalome hoku foha, ʻe hoku foha!”+
5 Pea naʻe hū atu ki fale ʻa Sioape ki he tuʻí ʻo ne pehē: “ʻI he ʻahó ni kuó ke fakamaaʻi ai ʻa hoʻo kau sevāniti kotoa ʻa ia naʻa nau fakahaofi ʻa hoʻo moʻuí ʻi he ʻaho ko ení pea mo e moʻui ʻa ho ngaahi fohá,+ mo ho ngaahi ʻofefiné,+ mo ho ngaahi uaifí, pea mo hoʻo kau sinifú.+ 6 ʻOkú ke ʻofa ʻi he faʻahinga ʻoku fehiʻa ʻiate koé peá ke fehiʻa ʻi he faʻahinga ʻoku nau ʻofa ʻiate koé, he kuó ke fakamahino mai he ʻahó ni ʻoku ʻikai te ke tokanga koe ki hoʻo ngaahi ʻeikí mo hoʻo kau sevānití, koeʻuhí ʻoku ou fakapapauʻi kapau naʻe kei moʻui ʻa ʻApisalome he ʻahó ni kae mate ʻa e toenga ʻo kimautolú, te ke leleiʻia pē koe ai. 7 Ko ia ke ke tuʻu hake peá ke ʻalu atu ʻo fakafiemālieʻi* hoʻo kau sevānití, koeʻuhí he ʻoku ou fuakava ʻia Sihova kapau ʻe ʻikai te ke ʻalu atu, ʻe ʻikai ha tangata ʻe toe ʻiate koe ʻi he poó ni. ʻE kovi ange ʻa e meʻá ni kiate koe ʻi he kovi kotoa pē kuo hoko kiate koe talu mei hoʻo kei talavoú ʻo aʻu mai ki he taimí ni.” 8 Ko ia naʻe mālanga hake ʻa e tuʻí ʻo ne tangutu ʻi he matapā ʻo e koló, pea naʻe fakahā ki he kakaí kotoa: “Ko eni ʻoku ʻafio ʻa e tuʻí ʻi he matapā ʻo e koló.” Ko ia naʻe omi ʻa e kakaí kotoa ki he ʻao ʻo e tuʻí.
Ka ko ʻIsileli naʻa nau hola, ʻa e tokotaha taki taha ki hono ʻapi.+ 9 Ko e kakai kotoa ʻi he ngaahi matakali kotoa pē ʻo ʻIsilelí naʻa nau fekīhiaki, ʻo pehē: “Naʻe fakahaofi kitautolu ʻe he tuʻí mei hotau ngaahi filí,+ pea naʻá ne fakahaofi kitautolu mei he kau Filisitiá; ka ko ena kuó ne hola mei he fonuá koeʻuhi ko ʻApisalome.+ 10 Pea ko ʻApisalome, ʻa ia naʻa tau pani ke pule mai kiate kitautolú,+ kuó ne mate ʻi he taú.+ Ko ia ko e hā leva ʻoku ʻikai te mou fai ai ha meʻa ke fakafoki mai ʻa e tuʻí?”
11 Naʻe ʻoatu ʻe Tuʻi Tēvita ʻa e fekau ko ení kia Sātoki+ mo ʻĀpaiata+ ko e ongo taulaʻeikí: “Lea ki he kau mātuʻa ʻo Siutá,+ ʻo pehē, ‘Ko e hā ke mou hoko ai ko e faʻahinga fakamuimui taha ke mou fakafoki mai ʻa e tuʻí ki hono falé, he kuo aʻu mai ʻa e lea ʻa e kotoa ʻo ʻIsilelí ki he tuʻí ki hono falé? 12 Ko hoku fanga tokoua kimoutolu; ko hoku hui mo hoku kakano tonu kimoutolu.* Ko e hā ke mou hoko ai ko e faʻahinga fakamuimui taha ke mou fakafoki mai ʻa e tuʻí?’ 13 Pea te mo pehē kia ʻĀmasa,+ ‘ʻIkai ko koé ko hoku hui mo hoku kakano tonu? ʻOfa ke fai pehē ʻa e ʻOtuá kiate au pea hulu atu ai kapau ʻe ʻikai te ke hoko ko ʻeku ʻeikitau mei he taimí ni ʻo faai atu ko e fetongi ʻo Sioape.’”+
14 Ko ia naʻá ne maʻu* ʻa e loto ʻo e kau tangata kotoa ʻo Siutá, pea naʻa nau ʻoatu ha lea ki he tuʻí: “Foki mai, ʻa koe mo hoʻo kau sevānití kotoa.”
15 Naʻe kamata ke foki ʻa e tuʻí peá ne aʻu ki Sioatani, pea naʻe ʻalu atu ʻa e kakai ʻo Siutá ki Kilikali+ ke fakafetaulaki ki he tuʻí pea ke fakafeʻao mai ia ki he kauvai ʻe taha ʻo Sioataní. 16 Pea ko Simi+ ko e foha ʻo Kelá, ko e tangata Penisimani mei Pahulimí, naʻá ne fakavave hifo mo e kau tangata ʻo Siutá ke fakafetaulaki kia Tuʻi Tēvita, 17 pea naʻe ʻiate ia ʻa e kau tangata ʻe toko 1,000 mei Penisimani. Pehē foki mo Sipa,+ ʻa e tamaioʻeiki ʻo e fale ʻo Saulá, fakataha mo hono ngaahi foha ʻe toko 15 mo e kau sevāniti ʻe toko 20, naʻa nau fakatoʻotoʻo hifo ki Sioatani ʻo nau muʻomuʻa ki ai ʻi he tuʻí. 18 Naʻá ne* kolosi atu ʻi he ʻāhangá ke ʻomi ʻa e fāmili ʻo e tuʻí ki he kauvai ʻe tahá pea ke fai ha meʻa pē ʻoku loto ki ai ʻa e tuʻí. Ka ko Simi ko e foha ʻo Kelá naʻá ne tō hifo ʻi he ʻao ʻo e tuʻí ʻi he teu ke ne kolosi ʻi Sioataní. 19 Naʻá ne pehē ange ki he tuʻí: “ʻOua muʻa naʻa fakahalaiaʻi au ʻe hoku ʻeikí, pea ʻoua naʻa manatu ki he hala naʻe fai ʻe hoʻo sevānití+ ʻi he ʻaho naʻe ʻalu atu ai ʻa hoku ʻeiki ko e tuʻí mei Selusalemá. Fakatauange ke ʻoua ʻe tukulotoʻi ia ʻe he tuʻí, 20 he ʻoku ʻiloʻi lelei ʻe hoʻo sevāniti ko aú kuó u faiangahala; ko ia ko au ʻa e ʻuluaki ʻi he fale kotoa ʻo Siosifá kuo aʻu mai ʻi he ʻahó ni ke fakafetaulaki ki hoku ʻeiki ko e tuʻí.”
21 Naʻe pehē atu leva ʻe ʻApisai+ ko e tama ʻa Seluvaiá:+ “ʻIkai ʻoku totonu ke tāmateʻi ʻa Simi ʻi he meʻá ni, koeʻuhí naʻá ne talatukiʻi ʻa e pani ʻa Sihová?”+ 22 Ka naʻe pehē ʻe Tēvita: “Ko e hā leva haʻamo kaunga ki ai, ʻa kimoua ongo tama ʻa Seluvaiá,+ ke mo fai ai ha meʻa ke fakafepaki kiate au he ʻahó ni? ʻE tāmateʻi koā ha taha ʻi ʻIsileli he ʻahó ni? He ʻoku ʻikai koā ke u ʻilo ʻoku ou tuʻi ki ʻIsileli ʻi he ʻahó ni?” 23 Pea naʻe pehē ange ʻe he tuʻí kia Simi: “ʻE ʻikai te ke mate.” Pea ko e fuakava+ ia naʻe fai ange ʻe he tuʻí kiate iá.
24 Naʻe ʻalu hifo foki ʻa Mefipōseti,+ ko e mokopuna ʻo Saulá, ke fakafetaulaki ki he tuʻí. Naʻe ʻikai te ne fufulu hono vaʻé pe kosikosi hono kavá pe fō hono ngaahi kofú talu mei he ʻaho naʻe mavahe ai ʻa e tuʻí ʻo aʻu ki he ʻaho naʻá ne foki atu ai ʻi he melinó. 25 ʻI heʻene haʻu ki* Selusalema ke fakafetaulaki ki he tuʻí, naʻe pehē ange ʻe he tuʻí kiate ia: “ʻE Mefipōseti, ko e hā naʻe ʻikai te ke ʻalu ai mo aú?” 26 ʻI he meʻá ni naʻá ne pehē ange: “ʻE hoku ʻeiki ko e tuʻí, naʻe kākaaʻi au ʻe heʻeku sevānití.+ He naʻe pehē ʻe hoʻo sevāniti ko aú, ‘Te u teuteu ʻa ʻeku ʻasí koeʻuhí ke u heka ai ʻo ʻalu mo e tuʻí,’ he ko hoʻo sevānití ʻoku heke.+ 27 Ka naʻá ne lauʻikovi loi ʻa hoʻo sevānití ki hoku ʻeiki ko e tuʻí.+ Kae kehe, ko hoku ʻeiki ko e tuʻí ʻokú ne hangē ha ʻāngelo ʻa e ʻOtua moʻoní, ko ia ke ke fai ha meʻa pē ʻoku hā lelei kiate koé. 28 Ko e kotoa ʻa e fāmili ʻo ʻeku tamaí naʻa nau mei ʻauha ʻi hono tāmateʻi ʻe hoku ʻeiki ko e tuʻí, ka neongo ia naʻá ke fokotuʻu ʻa hoʻo sevānití ke kau ʻi he faʻahinga ʻoku nau kai ʻi hoʻo tēpilé.+ Ko ia ko e hā ʻeku totonu ke u toe fakatangi ai ki he tuʻí?”
29 Kae kehe, naʻe pehē ange ʻe he tuʻí kiate ia: “Ko e hā ʻokú ke kei lea peheni aí? Kuó u tuʻutuʻuni ke mo vahevahe mo Sipa ʻa e kelekelé.”+ 30 ʻI he meʻá ni, naʻe pehē ange ʻe Mefipōseti ki he tuʻí: “Tuku ke ne maʻu kotoa ʻe ia, he ko eni kuo foki mai ʻa hoku ʻeiki ko e tuʻí ki hono falé ʻi he melino.”
31 Pea ko Pāsiliai+ ko e tangata Kiliatí naʻá ne ʻalu hifo mei Lokelimi ki he feituʻu Sioataní ke fakafeʻao atu ʻa e tuʻí ki he vaitafe Sioataní. 32 Naʻe motuʻa ʻaupito ʻa Pāsiliai, naʻá ne taʻu 80, pea naʻá ne tokonaki ha meʻakai maʻá e tuʻí lolotonga ʻene nofo ʻi Mehanemí,+ he ko ha tangata naʻe koloaʻia ʻaupito. 33 Ko ia naʻe pehē ʻe he tuʻí kia Pāsiliai: “Haʻu ke ta kolosi atu mo au, pea te u tokonaki ha meʻakai maʻau ʻi Selusalema.”+ 34 Ka naʻe pehē ʻe Pāsiliai ki he tuʻí: “Ko e ngaahi ʻaho* ʻe fiha ʻoku kei toe ʻi heʻeku moʻuí ke u ʻalu hake ai mo e tuʻí ki Selusalemá? 35 ʻOku ou taʻu 80 he ʻahó ni.+ ʻE lava koā ke u tala ʻa e leleí mei he koví? ʻE lava koā ʻe hoʻo sevāniti ko aú ke ʻahiʻahiʻi ʻo ʻilo ʻa e ifo ʻo e meʻa ʻoku ou kai mo inú? ʻE kei lava koā ke u fanongo ki he leʻo ʻo e kau tangata mo e kau fefine hivá?+ Ko ia ko e hā ke hoko ai ʻa hoʻo sevānití ko ha toe fakakavenga ki hoku ʻeiki ko e tuʻí? 36 ʻOku ʻosi feʻunga pē ki hoʻo sevānití ke ne ʻave ʻa e tuʻí ki Sioatani. Ko e hā ke totongi fakafoki mai ai ʻe he tuʻí kiate au ha totongi peheni? 37 Tuku muʻa ke foki ʻa hoʻo sevāniti ko aú, pea tuku ke u mate pē ʻi hoku koló ʻo ofi ki he tanuʻanga ʻo ʻeku tamaí mo ʻeku faʻeé.+ Ka ko ena ʻa hoʻo sevāniti ko Kīmami.+ Tuku ke ne kolosi atu mo hoku ʻeiki ko e tuʻí, pea ke ke fai kiate ia ha meʻa pē ʻoku hā lelei kiate koé.”
38 Ko ia naʻe pehē ʻe he tuʻí: “Te u ʻalu mo Kīmami ki he kauvai ʻe tahá, pea te u fai kiate ia ʻa e meʻa ʻoku hā lelei kiate koé; ʻilonga ha meʻa te ke kole kiate au te u fai ia maʻau.” 39 Naʻe kamata leva ke kolosi atu ʻa e kakaí kotoa ʻi Sioatani, pea ʻi he kolosi atu ʻa e tuʻí, naʻe ʻuma ʻa e tuʻí kia Pāsiliai+ peá ne tāpuakiʻi ia; pea naʻe foki ʻa Pāsiliai ki hono ʻapí. 40 ʻI he kolosi atu ʻa e tuʻí ki Kilikalí,+ naʻe kolosi fakataha atu mo ia ʻa Kīmami. Ko e kakai kotoa ʻo Siutá pea mo e vaeua ʻo e kakai ʻo ʻIsilelí naʻa nau ʻave ʻa e tuʻí ki he kauvai ʻe tahá.+
41 Pea naʻe fakaofiofi atu ʻa e kau tangata kotoa ʻo ʻIsilelí ki he tuʻí ʻo nau pehē kiate ia: “Ko e hā naʻe ʻave fakakaihaʻasi ai koe ʻe homau fanga tokouá, ʻa e kau tangata ʻo Siutá pea ʻomi koe mo ho fāmilí ʻi Sioatani, fakataha mo hoʻo kau tangatá kotoa?”+ 42 Naʻe tali ange ʻe he kau tangata kotoa ʻo Siutá ki he kau tangata ʻo ʻIsilelí: “Koeʻuhí he ʻoku kāinga ʻa e tuʻí mo kimautolu.+ Ko e hā ʻoku mou ʻita ai ʻi he meʻá ni? Kuo mau kai ha meʻa ʻe taha ʻo hoko ko ha fakamole ki he tuʻí, pe kuo foaki mai koā ha meʻaʻofa kiate kimautolu?”
43 Kae kehe, naʻe tali ange ʻe he kau tangata ʻo ʻIsilelí ki he kau tangata ʻo Siutá: “Ko e konga ʻe hongofulu ʻoku mau maʻu ʻi he puleʻangá. Ko ia ai, ʻi he fekauʻaki mo Tēvitá ʻoku lahi ange ʻemau totonú ʻi he totonu ʻoku mou maʻú. Ko e hā leva naʻa mou taʻetokaʻi ai kimautolú? ʻIkai ko kimautolu naʻe totonu ke mau ʻuluaki fakafoki mai ʻa e tuʻí?” Ka naʻe mālohi ange* ʻa e lea ʻa e kau tangata ʻo Siutá ʻi he lea ʻa e kau tangata ko ia ʻo ʻIsilelí.