ʻUluaki Kalonikali
14 Naʻe tuku atu ʻe Tuʻi Hailame+ ʻo Tāiá ha kau talafekau kia Tēvita, fakataha mo e papa sita, mo e kau tufunga maka,* pea mo e kau tufunga ke nau langa ha fale* moʻona.+ 2 Pea naʻe ʻilo ʻe Tēvita kuo fokotuʻu maʻu ia ʻe Sihova ko e tuʻi ki ʻIsileli,+ he ko hono tuʻunga-tuʻí naʻe hakeakiʻi ia ʻo māʻolunga koeʻuhí ko ʻIsileli ko ʻEne kakaí.+
3 Naʻe maʻu ʻe Tēvita ha ngaahi uaifi+ tokolahi ange ʻi Selusalema, pea naʻe hoko ʻa Tēvita ko e tamai ia ki ha ngaahi foha mo e ngaahi ʻofefine tokolahi ange.+ 4 Ko e hingoa eni ʻo e fānau naʻe fanauʻi kiate ia ʻi Selusalemá:+ Ko Samua, Sōpapi, Nētane,+ Solomone,+ 5 ʻIpihale, ʻElisua, ʻElipeleti, 6 Noka, Nēfeki, Safia, 7 ʻElisama, Peliata, pea mo ʻElifeleti.
8 ʻI he fanongo ʻa e kau Filisitiá kuo pani ʻa Tēvita ko e tuʻi ki ʻIsilelí kotoa,+ naʻe ʻalu hake kotoa ʻa e kau Filisitiá ke kumi kia Tēvita.+ ʻI he fanongo ai ʻa Tēvitá, naʻá ne ʻalu atu kiate kinautolu. 9 Naʻe haʻu leva ʻa e kau Filisitiá ʻo hanganaki fai ha ngaahi ʻohofi ʻi he Teleʻa* ʻo Lifaimí.+ 10 Naʻe fehuʻi ʻa Tēvita ki he ʻOtuá, ʻo ne pehē: “Te u ʻalu hake ʻo tauʻi ʻa e kau Filisitiá? Te ke tuku mai kinautolu ki hoku nimá?” ʻI he meʻá ni naʻe folofola ange ʻa Sihova kiate ia: “ʻAlu hake, pea te u tuku moʻoni atu kinautolu ki ho nimá.”+ 11 Ko ia naʻe ʻalu hake ʻa Tēvita ki Pēali-pilasimi,+ pea naʻá ne taaʻi ai kinautolu. Ko ia naʻe pehē ai ʻe Tēvita: “Kuo ʻohofi ʻe he ʻOtua moʻoní ʻa hoku ngaahi filí ʻaki hoku nimá, ʻo hangē ko ha luo kuo keli ʻe he vaí.” Ko e ʻuhinga ia naʻa nau fakahingoa ai ʻa e feituʻu ko iá ko Pēali-pilasimí.* 12 Naʻe liʻaki ʻi ai ʻe he kau Filisitiá honau ngaahi ʻotuá, pea ʻi hono ʻoange ʻe Tēvita ʻa e tuʻutuʻuní, naʻe tutu ʻa e ngaahi meʻá ni ʻi he afí.+
13 Ki mui ai, naʻe toe fai ʻe he kau Filisitiá ha ʻohofi ʻi he teleʻá.*+ 14 Naʻe toe fai ʻe Tēvita ha fehuʻi ki he ʻOtuá, ka naʻe folofola ange ʻa e ʻOtua moʻoní kiate ia: “ʻOua naʻá ke ʻalu hangatonu atu kiate kinautolu. Ka te ke takai atu mei mui ʻiate kinautolu, peá ke ʻalu atu ʻo tauʻi kinautolu ʻi muʻa ʻi he vao pakahá.*+ 15 Pea ʻi hoʻo fanongo ki he ongo mai ʻa e ngahaha mei ʻolunga ʻi he vao pakahá, kamata leva hoʻo ʻohofí, he ʻe hāʻele muʻomuʻa atu ʻa e ʻOtua moʻoní ʻiate koe ke taaʻi ʻa e kau tau ʻa e kau Filisitiá.”+ 16 Ko ia naʻe fai ʻe Tēvita ʻa e meʻa tofu pē naʻe tuʻutuʻuni ʻe he ʻOtua moʻoní kiate iá,+ pea naʻa nau taaʻi ʻa e kau tau Filisitiá mei Kipione ki Kēseli.+ 17 Pea naʻe mafola atu ʻa e ongoongo ʻo Tēvitá ki he ngaahi fonuá kotoa, pea naʻe ʻai ʻe Sihova ke ilifia ʻiate ia ʻa e ngaahi puleʻangá kotoa.+