Tangata Malanga
12 Ke ke manatu leva ki ho Tokotaha-Fakatupu Maʻongoʻongá ʻi he ngaahi ʻaho ʻo hoʻo talavoú,+ ki muʻa ke hoko mai ʻa e ngaahi ʻaho ʻo e mamahí*+ pea aʻu mai mo e ngaahi taʻu ʻa ia te ke pehē ai: “ʻOku ʻikai ke u fiefia ʻi he moʻuí”; 2 ki muʻa ke hoko ʻo fakapoʻuli ʻa e maama ʻo e laʻaá mo e māhiná pea mo e ngaahi fetuʻú,+ pea toe foki mai ʻa e ngaahi ʻaó ʻi he hili ʻa e* lōvaí; 3 ʻi he ʻaho ʻoku hoko ai ʻo tetetete ʻa e kau leʻo* ʻi he falé, pea fehapekaki ʻa e kau tangata mālohí, pea tuku ʻe he kau fefiné ʻenau momosí koeʻuhí kuo nau hoko ʻo tokosiʻi, pea nenefu ʻa e sio atu ʻa e kau taʻahiné ki tuʻa ʻi he ngaahi matapaá;+ 4 ʻi he taimi kuo tāpuni ai ʻa e ongo matapā ʻoku hanga ki halá, ʻi he taimi ʻoku leʻo-siʻi ai ʻa e ongo mai ʻa e maka momosí, ʻi he taimi ʻoku ʻā hake ai ha taha ʻi he tangi ʻa ha manupuna, pea fakaʻau ke leʻo-siʻi ʻa e hiva ʻa e ngaahi ʻofefiné kotoa.+ 5 Pehē foki, ʻoku ilifia ha tokotaha ʻi he ngaahi meʻa ʻoku māʻolungá, pea hohaʻa fekauʻaki mo ha fakatuʻutāmaki ʻi he halá. Pea ʻoku matala ʻa e ʻalimoní,+ pea totoho ʻa e ʻalu ʻa e heʻé, pea mafahifahi ʻa e fuaʻiʻakau ʻokú ne ʻai ke ifo ʻa e kaí, koeʻuhí he ʻoku ʻalu atu ʻa e tangatá ki hono ʻapi maʻú+ pea feʻaluʻaki ʻa e kau tengihiá ʻi he halá;+ 6 ki muʻa ke toʻo ʻa e filo silivá, pea laiki ʻa e poulu koulá, pea maumau ʻa e siā ʻi he matavaí, pea lailai mo e veʻeteka ʻutu-vai ʻo e vaikelí. 7 Pea ʻoku foki leva ʻa e efú ki he kelekelé,+ ʻo hangē ko ia naʻe ʻi ai ʻi muʻá, pea foki leva ʻa e laumālié* ki he ʻOtua moʻoní ʻa ia naʻá ne foaki mai iá.+
8 “Ko e koto muna,”* ko e lea ia ʻa e tangata malangá.*+ “Ko e muna ʻa e meʻa kotoa pē.”+
9 Naʻe ʻikai ngata pē ʻi hono maʻu ʻe he tangata malangá ʻa e potó ka naʻe hokohoko atu ʻene akoʻi ʻa e kakaí ki he meʻa naʻá ne ʻiló,+ pea naʻá ne fakakaukauloto mo fai ha fekumi fakaʻāuliliki koeʻuhí ke tātānaki* ha ngaahi palōveepi lahi.+ 10 Naʻe fekumi ʻa e tangata malangá ke maʻu ʻa e ngaahi lea vovo+ pea ke hiki ʻa e ngaahi foʻi lea totonu ʻo e moʻoní.
11 Ko e ngaahi lea ʻa e kau potó ʻoku hangē ia ha ngaahi tao fakateka pulú,+ pea ko ʻenau ngaahi lea kuo tātānakí ʻoku hangē ia ha ngaahi faʻo kuo tuki ʻo ne fakamaʻu ha meʻá; kuo ʻomi ia mei he tauhi-sipi pē ʻe toko taha. 12 Pea ka ʻi ai ha meʻa kehe mei he ngaahi meʻá ni, ʻe hoku foha, ke ke tokanga: Ko hono faʻu ʻo ha ngaahi tohi lahí ʻoku ʻikai hano ngataʻanga, pea ko e līʻoa lahi ki aí ʻoku fakaongosia ia ki he kakanó.+
13 Ko e fakamulitukú leva eni, hili hono fanongoa ʻa e meʻa kotoa pē: Manavahē ki he ʻOtua moʻoní+ pea tauhi ʻene ngaahi fekaú,+ he ko e ngafa kotoa eni ʻo e tangatá.+ 14 He ko e ʻOtua moʻoní te ne fakamāuʻi ʻa e ngāue kotoa pē, ʻo kau ai ʻa e ngaahi meʻa kotoa pē ʻoku fufuú, ʻo tatau ai pē pe ʻoku lelei pe kovi.+