ʻOkú Ke Manatuʻi?

Kuó ke fai ha fakakaukau tokanga ki he ngaahi ʻīsiu fakamuimui ʻo e Taua Leʻo? Kapau ko ia, te ke ʻilo ʻoku fakamānako ke fakamanatu eni:

◻ Ko e hā ʻa e ngaahi fehuʻi ʻe ʻeke nai ʻe ha ongo Kalisitiane kiate kinaua ki muʻa ke na kamata fakakaukau ke fakamaʻú?

‘ʻOku ou fakapapauʻi moʻoni ʻa e tuʻunga fakalaumālie mo e līʻoa ʻa e tokotaha ko eé ki he ʻOtuá? ʻE lava ke u sioloto atu te u tauhi fakataha mo e tokotaha ko iá ki he ʻOtuá ʻi he kotoa ʻo ʻema moʻuí? Kuó ma ʻosi fefakaeʻaʻaki feʻunga homa ngaahi ʻulungāngá taki taha? ʻOku ou loto-falala te ma hoko ʻo feongoongoi tuʻuloa? Kuó ma ʻosi ʻilo feʻunga ki he ngaahi tōʻonga ki muʻa mo e ngaahi tuʻunga lolotonga ʻo e tokotaha taki taha?’​—8/15, peesi 31.

◻ Ko e hā ʻa e ʻuhinga ʻa Sīsuú ʻi heʻene pehē ki hono kau muimuí: “Ko kimoutolu ko e masima ʻo e fonua”? (Mātiu 5:​13)

Naʻe fakahaaʻi ai ʻe Sīsū ko e malanga ʻa hono kau muimuí ki he niʻihi kehé fekauʻaki mo e Puleʻanga ʻo e ʻOtuá ʻe ala hoko ia ko ha tākiekina fakatolonga, pe fakahaofi-moʻui, ki heʻenau kau fanongó. Ko e moʻoni, ko e faʻahinga ʻoku nau ngāueʻaki ʻa e ngaahi lea ʻa Sīsuú ʻe maluʻi kinautolu mei he hōloa fakaeʻulungaanga mo e fakalaumālie ʻi he māmaní.​—8/15, peesi 32.

◻ ʻOku malava fēfē ke fakaʻehiʻehi ʻa e ongo meʻa faisoó mei he tauhele ʻo e fehokotaki fakasino taʻetāú?

Kapau ʻokú ke faialea, ʻoku fakapotopoto ke ke fakaʻehiʻehi mei haʻo tokotaha pē mo ho hoa ʻoku ʻamanekiná ʻi ha ngaahi tuʻunga taʻefeʻunga. ʻOku lelei tahá ke fiefia ʻi hoʻomo feohí ʻi ha haʻohaʻonga ʻo ha niʻihi kehe pe ʻi ha ngaahi feituʻu kakai. Fokotuʻu ha ngaahi fakangatangata ki hono fakahāhā ʻo e ʻofa manakó, tauʻaki fetokaʻiʻaki ʻi he ngaahi ongoʻí mo e konisēnisi.​—9/1, peesi 17, 18.

◻ Ko e hā ʻa e mahinó?

Ko e malava ia ke sio ki ha meʻa pea ʻiloʻi ʻa hono faʻungá ʻaki hono makupusi ʻa e ngaahi fehokotakiʻanga ʻi he vahaʻa ʻo hono ngaahi kongokongá pea mo hono tuʻunga kakató, ʻo maʻu ai hono ʻuhingá. (Palovepi 4:1)​—9/15, peesi 13.

◻ Ko e hā ʻoku fiemaʻu ʻe Sihova meiate kitautolu he ʻaho ní?

Ko hono moʻoní, ko e meʻa ʻoku fiemaʻu mai ʻe Sihova meiate kitautolú ke fakaongo ki Hono ʻAló pea muimui ʻi heʻene faʻifaʻitakiʻangá mo ʻene ngaahi akonakí. (Mātiu 16:24; 1 Pita 2:​21)​—9/15, peesi 22.

◻ Ko hai pē ʻoku lava ke ne aʻusia ʻa e melinó?

Koeʻuhi ko Sihova ʻa e “ʻOtua ʻoku ʻa ʻEne ʻAfio ʻa e fakamelino,” ʻe lava ke hokosia pē ʻa e melinó ʻe he kakai ko ia ʻoku nau maʻu ʻa e ʻofa ki he ʻOtuá mo ʻapasia loloto ki heʻene ngaahi tefitoʻi moʻoni māʻoniʻoní. (Loma 15:33)​—10/1, peesi 11.

◻ Naʻe anga-fēfē hono maʻu ʻe Siosifa ʻa e mālohi fakaeʻulungaanga ke tali ʻikai ai ki he uaifi ʻo Pōtifá ʻi he ʻaho ki he ʻaho?

Naʻe fakamahuʻingaʻi ʻe Siosifa ʻa hono vahaʻangatae mo Sihová ʻo mahulu atu ia ʻi heʻene fakamahuʻingaʻi ko ia ha fiefia fakataimi pē. ʻIkai ko ia pē, neongo naʻe ʻikai te ne ʻi he malumalu ʻo ha ngaahi lao fakaʻotua, naʻe maʻu ʻe Siosifa ia ha mahino maʻalaʻala ki he ngaahi tefitoʻi moʻoni fakaeʻulungāngá. (Senesi 39:9)​—10/1, peesi 29.

◻ ʻOku mahuʻinga fēfē ʻetau loto-lelei ke fakamolemoleʻi hotau fanga tokouá?

Ko ʻetau ngaahi ʻamanaki ke hokohoko atu hono maʻu ʻa e fakamolemole ʻa e ʻOtuá ʻoku fakatuʻunga lahi ia ʻi heʻetau loto-lelei ke fakamolemoleʻi ʻa e niʻihi kehé. (Mātiu 6:​12, 14; Luke 11:4)​—10/15, peesi 17.

◻ Ko e faʻahinga angahala fēfē naʻe tuhu ki ai ʻa e Mātiu 18:​15-​17, pea ko e hā ʻokú ne fakahaaʻi iá?

Ko e ngaahi angahala naʻe ʻuhinga ki ai ʻa Sīsuú naʻe mamafa feʻunga he ʻe malava ke taki atu ki he vakai ki he tokotaha faihalá ko “ha senitaile pe ko ha tokotaha tānaki tukuhau.” Naʻe ʻikai feohi ʻa e kau Siú mo e kau Senitailé, pea naʻa nau fakamamaʻo mei he kau tānaki tukuhaú. Ko ia, ko e lave ʻa e Mātiu 18:​15-​17 ki he ngaahi angahala mamafa, ʻikai ki he fanga kiʻi fakalotomamahi fakafoʻituitui pe fakatupu loto-lavea ʻa ia ʻe lava pē ke ke fakamolemoleʻi pea fakangaloʻí. (Mātiu 18:​21, 22)​—10/15, peesi 19.

◻ Ko e hā ʻoku kau ki he ʻofa moʻoni ki he Folofola ʻa e ʻOtuá?

Ko e ʻofa ki he Folofola ʻa e ʻOtuá ʻoku taki atu ai ha taha ke moʻui ʻo fehoanaki mo e ngaahi fiemaʻu aí. (Sāme 119:​97, 101, 105) ʻOku fiemaʻu ki he meʻá ni ʻa e fakatonutonu tuʻumaʻu ʻo ʻete fakakaukaú mo e founga moʻuí.​—11/1, peesi 14.

◻ ʻI he maʻu ʻo fuʻu lahi mei he toʻukupu ʻo Sihová, ko e hā ʻoku lava ke tau toe fakafoki ki he Tuʻi mo e Tokotaha-Foaki lahi tahá?

ʻOku fakahaaʻi ʻe he Tohitapú ko e meʻaʻofa lahi taha ʻoku lava ke tau foaki kia Sihová ko e “feilaulau fakafetaʻi.” (Hepelu 13:15) Ko e hā hono ʻuhingá? Koeʻuhi he ko e feilaulaú ni ʻoku felāveʻi hangatonu ia ki he fakahaofi ʻo e moʻuí, ko ha tokanga lahi ia ʻa Sihova ʻi he taimi ko eni ʻo e ngataʻangá. (Isikeli 18:23)​—11/1, peesi 21.

◻ Ko e hā e ʻuhinga ʻa Solomone ʻi heʻene tohi: “Ko e ngaahi lea ʻa e kau poto ʻoku hange ia koni tao fakateka pulu”? (Koheleti 12:11)

Ko e ngaahi lea ʻa e faʻahinga ʻoku nau maʻu ʻa e poto fakaʻotuá ʻokú ne ueʻi ʻa e kau lautohí pe kau fanongó ke nau fai ha laka ki muʻa ʻo fehoanaki mo e ngaahi lea poto naʻa nau lau pe fanongoá.​—11/15, peesi 21.

◻ Ko e hā ʻa e ʻiloʻilo fakaʻotua?

Ko e malava ia ke fakafaikehekeheʻi ʻa e tonú mei he halá pea toki fili leva ʻa e ʻalunga totonú. Ko e ako mo ngāueʻaki ʻa e Folofola ʻa e ʻOtuá ʻoku ʻomai ai ʻa e ʻiloʻiló.​—11/15, peesi 25.

◻ Ko e hā ʻoku totonu ke fakamafamafatatau mo ha loto-lelei ke tali ʻa e ngaahi fatongiá? (1 Timote 3:1)

ʻOku totonu ke fakamafamafatatau ia ʻaki ʻa e fakafuofua lelei. ʻOku ʻikai totonu ki ha taha ke ne fua ha ngaahi ngafa lahi fau ʻo mole ai meiate ia ʻa ʻene fiefia ʻi he ngāue ʻa Sihová. ʻOku taau ke fakaongoongoleleiʻi ha laumālie loto-lelei, ka ko e loto-leleí kuo pau ke toe tapua mai ai ʻa e anga-fakanānā mo e “anga fakamaʻumaʻu.” (Taitusi 2:​12; Fakahā 3:​15, 16)​—12/1, peesi 28.

◻ ʻE anga-fēfē nai ʻa e fekuki mo e pole ʻo hono tauhi hake ha fānaú?

ʻOku akonakiʻi ʻe he ʻOtuá ʻa e ngaahi mātuʻá ke nau hoko ko e ngaahi faʻifaʻitakiʻanga, ngaahi takanga, kau fetuʻutaki, mo e kau faiako. (Teutalonome 6:​6, 7)​—12/1, peesi 32.