ʻIsikeli
15 Naʻe toe hoko mai ʻa e folofola ʻa Sihová kiate au, ʻo pehē: 2 “Foha ʻo e tangata, ʻoku anga-fēfē ʻa hono fakahoa ʻa e vaʻa ʻo ha fuʻu kālepi mo e vaʻa ʻo ha fuʻu ʻakau kehe pe ko ha vaʻa mei he ʻuluʻakau ʻo e vaotaá? 3 ʻE lava ke maʻu mei ai ha foʻi pou ke faiʻaki ha ngāue? Pe ʻoku ngaohi nai ʻe he kakaí mei ai ha pine ke tautauʻanga meʻa? 4 Vakai! ʻOku lī ia ki he afí ko ha fefie, pea ʻoku keina ʻe he afí ʻa e ongo muiʻi vaʻakaú pea vela mo loto. ʻOku feʻunga leva ia he taimí ni ki ha faʻahinga ngāue? 5 Naʻa mo ʻene kei kakató, naʻe ʻikai lava ke ngāueʻaki ia ki ha faʻahinga meʻa. Huanoa ai ʻa e siʻi ange ʻa hono ʻaongá ʻi he hili hono keina mo tutu ia ʻe he afí!”
6 “Ko ia ai, ko e folofola eni ʻa e ʻEiki Hau ko Sihová: ‘Hangē tofu pē ko e vaʻa ʻo e fuʻu kālepí ʻi he lotolotonga ʻo e ʻuluʻakau ʻo e vaotaá, ʻa ia kuó u tuku atu ko ha fefie ki he afí, ʻe pehē pē ʻa e meʻa te u fai ki he kakai ʻo Selusalemá.+ 7 Kuó u fakafepakiʻi kinautolu. Kuo nau hao mei he afí, ka ʻe keina kinautolu ʻe ha afi ʻe taha. Pea kuo pau ke mou ʻilo ko Sihova au ʻi he taimi te u fakafepakiʻi ai kinautolú.’”+
8 “‘Pea te u ʻai ke maomaonganoa+ ʻa e fonuá koeʻuhí ko ʻenau taʻefaitōnungá,’+ ko e fakahaaʻi ia ʻe he ʻEiki Hau ko Sihová.”