ʻIsikeli

1 ʻI he taʻu hono 30,* ʻi he ʻaho hono nima ʻo e māhina hono faá, lolotonga ʻeku ʻi he lotolotonga ʻo e kakai naʻe ʻave fakamālohí+ ʻi he veʻe vaitafe ko Kipá,+ naʻe fakaava mai ʻa e langí pea naʻe kamata ke u sio ki ha ngaahi vīsone mei he ʻOtuá. 2 ʻI he ʻaho hono nima ʻo e māhiná—ʻa ia, ʻi he taʻu hono nima ʻo e ʻave fakamālohi ʻo Tuʻi Sihoiakiní+— 3 naʻe hoko mai ai ʻa e folofola ʻa Sihová kia ʻIsikeli* ko e foha ʻo Pusi ko e taulaʻeikí ʻi he veʻe vaitafe ko Kipá ʻi he fonua ʻo e kau Kalitiá.+ Ko e feituʻu ia naʻe hoko mai ai kiate ia ʻa e nima ʻo Sihová.+

4 ʻI he lolotonga ʻeku sió, naʻá ku mamata ki ha fuʻu matangi mālohi+ ʻoku haʻu mei he tokelaú, pea naʻe ʻi ai ha fuʻu konga ʻao mo ha afi naʻe tapa*+ ʻo takatakaiʻi ʻe ha maama ngingila, pea naʻe hā mei he loto afí ha meʻa naʻe hangē ha mētale ngingilá.*+ 5 ʻI loto aí naʻe hā mai ha meʻa hangē ha ngaahi meʻamoʻui ʻe fā,+ pea ko e fōtunga ʻo e meʻamoʻui taki taha naʻe hangē ha tangatá. 6 Naʻe maʻu ʻe he toko taha taki taha ʻa e mata ʻe fā mo e kapakau ʻe fā.+ 7 Ko honau vaʻé naʻe hangatonu, pea ko honau ʻaofivaʻé naʻe hangē ko e topuvaʻe ʻo ha ʻuhikiʻi pulú, pea naʻe ulo ngingila ia ʻo hangē ko e ngingila ʻo ha kopa kuo fakangingilá.+ 8 Naʻa nau maʻu ha nima fakaetangata ʻi lalo ʻi honau ngaahi kapakau ʻe faá, pea naʻe maʻu ʻe he toko faá ni ha ngaahi mata mo ha ngaahi kapakau. 9 Naʻe felaveʻaki honau ngaahi kapakaú. Naʻe ʻikai te nau tafoki ʻi heʻenau ʻalú; naʻa nau taki taha ʻalu hangatonu pē ki muʻa.+

10 Ko e fōtunga eni ʻo honau matá: Ko e meʻamoʻui taki taha ʻi he toko faá ni naʻá ne maʻu ha mata ʻo e tangata pea ʻi he toʻomataʻú ko ha mata ʻo ha laione,+ ʻi he toʻohemá ko ha mata ʻo ha pulu,+ pea naʻe taki taha maʻu ʻe he toko faá ni ha mata+ ʻo ha ʻīkale.+ 11 Ko e anga ia ʻo honau matá. Ko honau ngaahi kapakaú naʻe mafola hake ia ki ʻolunga ʻiate kinautolu. Ko e tokotaha taki taha naʻe felaveʻaki hono ongo kapakau ʻe ua pea ko e kapakau ʻe ua naʻá ne ʻufiʻufi hono sinó.+

12 Naʻa nau taki taha ʻalu hangatonu pē ki muʻa, ʻo ʻalu ki ha feituʻu pē naʻe tataki kinautolu ki ai ʻe he laumālié.+ Naʻe ʻikai te nau tafoki ʻi heʻenau ʻalú. 13 Pea ko e fōtunga ʻo e ngaahi meʻamoʻuí naʻe hangē ha ngaahi malalaʻi afi ulouló, pea naʻe ʻi ai ha meʻa hangē ha ngaahi tūhulu ʻo e afi ulo kakaha naʻe feʻaluʻaki mei muʻa ki mui ʻi he vahaʻa ʻo e ngaahi meʻamoʻuí, pea naʻe tapa mai ha ʻuhila mei he afí.+ 14 Pea ʻi he taimi naʻe ʻalu atu ai mo foki ʻa e ngaahi meʻamoʻuí, naʻe hangē ʻenau ngaʻunú ko e tapa ʻa e ʻuhilá.

15 ʻI heʻeku siofi ʻa e ngaahi meʻamoʻuí, naʻá ku mamata ai ki ha veʻeteka ʻe taha ʻi he kelekelé naʻe tuʻu ʻi he tafaʻaki ʻo e meʻamoʻui taki taha ʻokú ne maʻu ʻa e mata ʻe faá.+ 16 Ko e ngaahi veʻeteká mo honau faʻungá naʻe hā ngingila mai ʻo hangē ko e kalisolaité, pea naʻe tatau pē ʻa e fōtunga ʻo e ngaahi veʻeteka ʻe faá. Ko ʻenau hā maí mo honau faʻungá naʻe hangē ha veʻeteka ʻoku ʻi loto ʻi ha veʻeteká.* 17 ʻI he taimi naʻa nau ngaʻunu aí, naʻe lava ke nau ʻalu ki ha taha pē ʻo e ngaahi tafaʻaki ʻe faá ʻo ʻikai tafoki ʻi heʻenau ʻalú. 18 Naʻe māʻolunga ʻaupito ʻa e ngaahi veʻeteká ʻo fakatupu moʻutāfuʻua, pea naʻe fonu ʻa e tapa takatakai ʻo e ngaahi veʻeteka ʻe faá ʻi he ngaahi foʻi mata.+ 19 ʻI he taimi pē naʻe ngaʻunu ai ʻa e ngaahi meʻamoʻuí, naʻe ngaʻunu fakataha mo kinautolu ʻa e ngaahi veʻeteká, pea ʻi he taimi pē naʻe mahiki hake ai ʻa e ngaahi meʻamoʻuí mei he kelekelé, naʻe mahiki hake foki mo e ngaahi veʻeteká.+ 20 Naʻa nau ʻalu ki he feituʻu naʻe tataki kinautolu ki ai ʻe he laumālié, ki ha feituʻu pē naʻe ʻalu ki ai ʻa e laumālié. Naʻe mahiki hake fakataha mo kinautolu ʻa e ngaahi veʻeteká, he ko e laumālie naʻe ngāue ʻi he ngaahi meʻamoʻuí* naʻe toe ʻi he ngaahi veʻeteká foki. 21 ʻI he taimi naʻe ngaʻunu ai ʻa e ngaahi meʻamoʻuí, naʻe ngaʻunu mo e ngaahi veʻeteká; pea ʻi he taimi naʻa nau tuʻu maʻu aí, naʻe tuʻu maʻu mo e ngaahi veʻeteká; pea ʻi he taimi naʻa nau mahiki hake ai mei he kelekelé, naʻe mahiki hake fakataha mo kinautolu ʻa e ngaahi veʻeteká, he ko e laumālie naʻe ngāue ʻi he ngaahi meʻamoʻuí naʻe toe ʻi he ngaahi veʻeteká foki.

22 ʻI ʻolunga ʻi he ʻulu ʻo e ngaahi meʻamoʻuí naʻe mafola atu ai ha meʻa hangē ha faliki kilisitala naʻe fetapaki hangē ha ʻaisí pea hā mātuʻaki fakaofo.+ 23 ʻI lalo ʻi he faliki kilisitalá naʻe tuʻu hangatonu hake ai* honau ngaahi kapakaú, ʻo felaveʻaki ʻa e taha ki he taha. Ko e meʻamoʻui taki taha naʻe ʻi ai hono kapakau ʻe ua ke ʻufiʻufiʻaki ʻa e tafaʻaki ʻe taha ʻo honau sinó pea ko e ua ke ʻufiʻufiʻaki ʻa e tafaʻaki ʻe tahá. 24 ʻI heʻeku fanongo ki he ongo mai ʻa e leʻo ʻo honau kapakaú, naʻe hangē ia ko e ongo mai ʻa ha ngaahi vai ʻoku tafe mālohí, hangē ko e ongo mai ʻa e Māfimafi-Aoniú.+ ʻI heʻenau ngaʻunú, naʻe hangē ia ko e ongo mai ʻa ha kau taú. ʻI heʻenau tuʻu maʻú, naʻa nau tuku hifo ʻa honau ngaahi kapakaú.

25 Naʻe ongo mai ha leʻo mei he funga faliki kilisitala naʻe ʻi ʻolunga ʻi honau ʻulú. (ʻI heʻenau tuʻu maʻú, naʻa nau tuku hifo ʻa honau ngaahi kapakaú.) 26 ʻI he funga faliki kilisitala naʻe ʻi ʻolunga ʻi honau ʻulú naʻe hā mei ai ha meʻa hangē ha maka sāfaiá,+ pea naʻe tatau ia mo ha taloni.+ Naʻe ʻafio ʻi he taloni ʻi ʻolungá ha tokotaha ʻa ia ko hono fōtungá naʻe tatau mo ha tangata.+ 27 Naʻá ku sio ki ha meʻa naʻe ulo hangē ha mētale ngingilá+ ʻa ia naʻe hangē ha afi ʻoku huhulu mei ha meʻa naʻe hā mai ko hono kongalotó ia ʻo faai hake ki ʻolunga; pea mei hono kongalotó ʻo faai hifo ki lalo, naʻá ku sio ai ki ha meʻa hangē ha afí.+ Naʻe ʻi ai ha ulo ngingila takatakai ʻiate ia 28 hangē ko e ulo ʻa ha ʻumata+ ʻi ha konga ʻao ʻi ha ʻaho ʻuha. Ko e anga ia ʻo e hā mai ʻa e maama ngingila takatakaí. Naʻe hangē ia ko e hā mai ʻa e lāngilangi ʻo Sihová.+ ʻI heʻeku sio ki aí, naʻá ku tō foʻohifo pea naʻe kamata ke u fanongo ki he leʻo ʻo ha tokotaha ʻoku lea.