LIVITIKO

1 Pea naʻe ui ʻe Sihova ʻa Mōsese ʻo ne folofola kiate ia mei he tēniti feʻiloakiʻangá,+ ʻo pehē: 2 “Lea ki he kau ʻIsilelí,* pea tala kiate kinautolu, ‘Kapau ʻe fai ʻe ha taha ʻo kimoutolu ha foaki kia Sihova mei he fanga manu lalatá, ʻoku totonu ke mou fai hoʻomou foakí mei he fanga pulú pe mei he fanga sipí.+

3 “‘Kapau ko ʻene foakí ko ha feilaulau tutu mei he fanga pulú, ʻoku totonu ke ne ʻoatu ha monumanu tangata taʻemele.+ ʻOku totonu ke ne ʻoatu ia ʻi heʻene loto-lelei+ ki ai ʻi he ʻao ʻo Sihová ʻi he hūʻanga ʻo e tēniti feʻiloakiʻangá. 4 Te ne hilifaki hono nimá ʻi he ʻulu ʻo e feilaulau tutú, pea ʻe tali ia koeʻuhi ko ia ke faiʻaki ha feilaulau ʻufiʻufi angahala maʻana.

5 “‘Pea kuo pau ke tāmateʻi ʻa e kiʻi pulu tangatá ʻi he ʻao ʻo Sihová, pea ko e ngaahi foha ʻo ʻĒloné, ʻa e kau taulaʻeikí,+ te nau ʻoatu ʻa e totó pea afuhi ʻa e totó ʻi he tafaʻaki kotoa pē ʻo e funga ʻōlitá,+ ʻa ia ʻoku ʻi he hūʻanga ʻo e tēniti feʻiloakiʻangá. 6 Ko e feilaulau tutú ʻoku totonu ke fohi hono kilí pea tuʻutuʻu fakakongokonga.+ 7 Ko e ngaahi foha ʻo ʻĒloné, ʻa e kau taulaʻeikí, te nau ʻai ʻa e afi ki he ʻōlitá+ mo fokotuʻutuʻu ʻa e fefie ʻi he afí. 8 Ko e ngaahi foha ʻo ʻĒloné, ʻa e kau taulaʻeikí, te nau fokotuʻutuʻu ʻa e ngaahi kongokonga ʻo e feilaulaú+ fakataha mo e ʻulú pea mo e ngakó* ʻi he fefie ʻa ia ʻoku ʻi he afi ʻi he funga ʻōlitá. 9 Ko hono ngākaú mo hono ngaahi kauvaʻé ʻe fufulu ʻaki ia ʻa e vai, pea ko e taulaʻeikí te ne tutu kotoa ia ke kohu ʻi he ʻōlitá ko ha feilaulau tutu, ko ha feilaulau ʻoku fai ʻaki ʻa e afi, ko ha ngangatu fakahōifua* kia Sihova.+

10 “‘Kapau ko ʻene foaki ki ha feilaulau tutú ʻoku mei he tākangá,+ mei he fanga kiʻi sipi tangatá pe ko e fanga kosí, ʻoku totonu ke ne ʻoatu ha monumanu tangata taʻemele.+ 11 ʻE tāmateʻi ia ʻi he tafaʻaki fakatokelau ʻo e ʻōlitá ʻi he ʻao ʻo Sihová, pea ko e ngaahi foha ʻo ʻĒloné, ʻa e kau taulaʻeikí, te nau afuhi ʻa hono totó ʻi he tafaʻaki kotoa pē ʻo e funga ʻōlitá.+ 12 Te ne tuʻutuʻu fakakongokonga ia, ʻe fokotuʻutuʻu ia ʻe he taulaʻeikí fakataha mo hono ʻulú mo hono ngakó* ʻi he fefie ʻi he afi he funga ʻōlitá. 13 Te ne fufulu ʻa e ngākaú mo e ngaahi kauvaʻé ʻaki ʻa e vai, pea ko e taulaʻeikí te ne ʻoatu kotoa ia pea tutu ia ke kohu ʻi he ʻōlitá. Ko ha feilaulau tutu ia, ko ha feilaulau ʻoku fai ʻaki ʻa e afi, ko ha ngangatu fakahōifua* kia Sihova.

14 “‘Kae kehe, kapau ʻokú ne foaki ha fanga manupuna ko ha feilaulau tutu kia Sihova, te ne fai ʻene foakí mei he fanga kulukulú pe lupe muí.+ 15 Ko e taulaʻeikí te ne ʻoatu ia ʻi he ʻōlitá pea te ne fesiʻi hono ʻulú pea tutu ia ke kohu ʻi he funga ʻōlitá, ka ko hono totó ʻoku totonu ke fakatafe ia ki tuʻa ʻi he tafaʻaki ʻo e ʻōlitá. 16 ʻOku totonu ke ne toʻo ʻa hono tangakakaí mo hono fulufulú ʻo laku ia ki he tafaʻaki ʻōlitá, ki he hahaké, ki he tukuʻanga efuefú.*+ 17 Te ne fahi ia ʻi hono ongo kapakaú ʻo ʻikai ke motuhi ia ʻo konga ua. ʻE tutu leva ia ʻe he taulaʻeikí ke kohu ʻi he ʻōlitá ʻi he funga fefie ʻa ia ʻoku ʻi he afí. Ko ha feilaulau tutu ia, ko ha feilaulau ʻoku fai ʻaki ʻa e afi, ko ha ngangatu fakahōifua* kia Sihova.

2 “‘Ko eni kapau ʻe ʻoatu ʻe ha taha ha feilaulau meʻakai*+ kia Sihova, ko ʻene feilaulaú kuo pau ke fai ʻaki ia ʻa e mahoaʻa lelei, pea ʻoku totonu ke ne lingi ki ai ʻa e lolo pea ʻai ki ai+ ha ʻinisēnisi hinehina. 2 Pea te ne ʻomi ia ki he ngaahi foha ʻo ʻĒloné, ʻa e kau taulaʻeikí, pea ko e taulaʻeikí te ne toʻo ha falukunga mahoaʻa lelei pea mo e lolo mo e kotoa ʻo hono ʻinisēnisi hinehiná, pea te ne tutu ia ke kohu ko ha feilaulau fakaefakaʻilonga*+ ʻi he funga ʻōlitá, ko ha feilaulau ʻoku fai ʻaki ʻa e afi, ko ha ngangatu fakahōifua* kia Sihova. 3 Ko ha meʻa pē ʻe toe ʻi he feilaulau meʻakaí ʻe ʻa ʻĒlone ia mo hono ngaahi fohá+ ko ha meʻa mātuʻaki toputapu+ mei he ngaahi feilaulau kia Sihova ʻoku fai ʻaki ʻa e afí.

4 “‘Kapau ʻokú ke ʻoatu ha feilaulau meʻakai ʻa ia kuo taʻo ʻi he ʻōvaní, ʻoku totonu ke fai ʻaki ia ʻa e mahoaʻa lelei, mā taʻelēvani fuo hangē ha foʻi mamá kuo natu ʻaki ʻa e lolo pe ko e mā manifinifi taʻelēvani kuo valiʻaki ʻa e lolo.+

5 “‘Kapau ko hoʻo feilaulaú ko ha feilaulau meʻakai mei he lauʻiʻumea taʻoʻanga meʻá,+ ʻoku totonu ke fai ʻaki ia ʻa e mahoaʻa lelei taʻelēvani kuo fio mo e lolo. 6 ʻOku totonu ke pakipaki ia, pea te ke lingi ki ai ʻa e lolo.+ Ko ha feilaulau meʻakai ia.

7 “‘Kapau ko hoʻo feilaulaú ko ha feilaulau meʻakai kuo teuteu ʻi ha fakapaku, ʻoku totonu ke ngaohiʻaki ia ʻa e mahoaʻa lelei fakataha mo e lolo. 8 ʻOku totonu ke ke ʻomi ʻa e feilaulau meʻakai naʻe ngaohiʻaki ʻa e ngaahi meʻa ko ení kia Sihova, pea ʻe ʻoatu ia ki he taulaʻeikí, ʻa ia te ne ʻomi ia ke ofi ki he ʻōlitá. 9 Pea ko e taulaʻeikí te ne toʻo hake ha meʻa mei he feilaulau meʻakaí ko ha feilaulau fakaefakaʻilonga*+ pea tutu ia ke kohu ʻi he ʻōlitá ko ha feilaulau ʻoku fai ʻaki ʻa e afi, ko ha ngangatu fakahōifua* kia Sihova.+ 10 Ko ha meʻa ʻe toe ʻi he feilaulau meʻakaí ʻoku ʻa ʻĒlone ia mo hono ngaahi fohá ko ha meʻa mātuʻaki toputapu ʻi he ngaahi feilaulau kia Sihova ʻoku fai ʻaki ʻa e afí.+

11 “‘ʻOku ʻikai totonu ke fakalēvani+ ʻa e feilaulau meʻakai te mou ʻoatu kia Sihová, he kuo pau ke ʻoua naʻa mou tutu ha takaonga pē ʻoku fakalēvani pe huhuaʻi foʻiʻakau ke kohu ko ha feilaulau ʻoku fai ʻaki ʻa e afi kia Sihova.

12 “‘Te mou ʻoatu ia kia Sihova ko ha feilaulau ʻo e ʻuluaki fuá,+ ka kuo pau ke ʻoua ʻe ʻomi ia ki he ʻōlitá ke hoko ko ha ngangatu fakahōifua.*

13 “‘Ko e feilaulau meʻakai kotoa pē ʻokú ke faí ʻe fakakonokona ʻaki ia ʻa e māsima; pea kuo pau ke ʻoua naʻá ke tuku ke hala mei hoʻo feilaulau meʻakaí ʻa e māsima ʻo e fuakava ʻo ho ʻOtuá. Te ke ʻoatu fakataha mo e māsimá+ ʻa hoʻo feilaulau kotoa pē.

14 “‘Kapau te ke ʻoatu ʻa e feilaulau meʻakai ʻo e ʻuluaki fua kuo motuʻá kia Sihova, ʻoku totonu ke ke ʻoatu ʻa e uite foʻou* kuo tunu ʻi he afí, ko e uite foʻou kuo momosi momo lalahi, ke hoko ko e feilaulau meʻakai ʻo hoʻo ʻuluaki fua kuo motuʻá.+ 15 Te ke ʻai ki ai ʻa e lolo pea ʻai ki ai mo e ʻinisēnisi hinehiná. Ko ha feilaulau meʻakai ia. 16 Ko e taulaʻeikí te ne tutu ia ke kohu ko ha feilaulau fakaefakaʻilonga,*+ ʻa ia, ko ha meʻa mei he uite momo lalahí mo e loló fakataha mo e kotoa ʻo hono ʻinisēnisi hinehiná, ko ha feilaulau ia ʻoku fai ʻaki ʻa e afi kia Sihova.

3 “‘Kapau ko ʻene feilaulaú ko ha feilaulau feʻinasiʻaki,*+ pea kapau ʻokú ne ʻoatu ia mei he fanga pulú, ko ha pulu tangata pe ko ha pulu fefine, ʻoku totonu ke ne ʻoatu ha monumanu taʻemele ʻi he ʻao ʻo Sihová. 2 Te ne hilifaki hono nimá ki he ʻulu ʻo ʻene feilaulaú, pea ʻe tāmateʻi ia ʻi he hūʻanga ʻo e tēniti feʻiloakiʻangá; pea ko e ngaahi foha ʻo ʻĒloné, ʻa e kau taulaʻeikí, te nau afuhi ʻa e totó ʻi he ngaahi tafaʻaki kotoa ʻo e ʻōlitá. 3 Te ne ʻoatu ʻa e konga ʻo e feilaulau feʻinasiʻakí ko ha feilaulau ʻoku fai ʻaki ʻa e afi kia Sihova:+ Ko e ngako+ ʻokú ne ʻufiʻufi ʻa e ngākaú, ko e ngako kotoa ʻoku takatakai ʻi he ngākaú, 4 mo e ongo kofuuá fakataha mo e ngako ʻi aí ʻa ia ʻoku ofi ki he fasi-ʻa-tuʻá. Te ne toe toʻo ʻa e ngako ʻo e ʻaté fakataha mo e ongo kofuuá.+ 5 Ko e ngaahi foha ʻo ʻĒloné te nau tutu ia ke kohu ʻi he ʻōlitá ʻi ʻolunga ʻi he feilaulau tutu ʻa ia ʻoku hilifaki ʻi he fefie ʻa ia ʻoku ʻi he afí;+ ko ha feilaulau ʻoku fai ʻaki ʻa e afi ko ha ngangatu fakahōifua* kia Sihova.+

6 “‘Kapau ko ʻene feilaulaú ʻoku mei he fanga sipí pe kosí ko ha feilaulau feʻinasiʻaki kia Sihova, te ne ʻoatu ha monumanu tangata pe ko ha monumanu fefine taʻemele.+ 7 Kapau ʻokú ne ʻoatu ha kiʻi sipi tangata ko ʻene feilaulaú ia, te ne ʻoatu leva ia ʻi he ʻao ʻo Sihová. 8 Te ne hilifaki hono nimá ʻi he ʻulu ʻo ʻene feilaulaú, pea ʻe tāmateʻi ia ʻi muʻa ʻi he tēniti feʻiloakiʻangá. Ko e ngaahi foha ʻo ʻĒloné te nau afuhi hono totó ʻi he ngaahi tafaʻaki kotoa ʻo e ʻōlitá. 9 Te ne ʻoatu ʻa e ngakó mei he feilaulau feʻinasiʻakí ko ha feilaulau ʻoku fai ʻaki ʻa e afi kia Sihova.+ Te ne toʻo kakato ʻa e hiku ngakó ʻo ofi ki he huituʻá, ko e ngako ʻokú ne ʻufiʻufi ʻa e ngākaú, ko e ngako kotoa ʻoku takatakai ʻi he ngākaú, 10 mo e ongo kofuuá fakataha mo e ngako ʻoku ʻi aí ʻa ia ʻoku ofi ki he fasi-ʻa-tuʻá. Te ne toʻo foki mo e ngako ʻo e ʻaté fakataha mo e ongo kofuuá.+ 11 Pea ko e taulaʻeikí te ne tutu ia ke kohu ʻi he ʻōlitá ko ha meʻakai,* ko ha feilaulau ʻoku fai ʻaki ʻa e afi kia Sihova.+

12 “‘Kapau ko ʻene feilaulaú ko ha kosi, te ne ʻoatu leva ia ʻi he ʻao ʻo Sihová. 13 Te ne hilifaki hono nimá ʻi hono ʻulú, pea ʻe tāmateʻi ia ʻi muʻa ʻi he tēniti feʻiloakiʻangá, pea ko e ngaahi foha ʻo ʻĒloné kuo pau ke nau afuhi hono totó ʻi he ngaahi tafaʻaki kotoa ʻo e ʻōlitá. 14 Ko e konga te ne ʻoatu ko ʻene feilaulau ʻoku fai ʻaki ʻa e afi kia Sihová ko e ngako ko ia ʻokú ne ʻufiʻufi ʻa e ngākaú, ko e ngako kotoa ʻoku takatakai ʻi he ngākaú,+ 15 mo e ongo kofuuá mo e ngako ʻoku ʻi aí ʻa ia ʻoku ofi ki he fasi-ʻa-tuʻá. Te ne toʻo foki ʻa e ngako ʻo e ʻaté fakataha mo e ongo kofuuá. 16 Ko e taulaʻeikí te ne tutu ia ke kohu ʻi he funga ʻōlitá ko ha meʻakai,* ko ha feilaulau ʻoku fai ʻaki ʻa e afi ko ha ngangatu fakahōifua.* Ko e ngakó kotoa ʻoku ʻa Sihova ia.+

17 “‘Ko ha tuʻutuʻuni taʻengata ia ki homou ngaahi toʻutangatá, ʻi he kotoa ʻo homou ngaahi nofoʻangá: Kuo pau ke ʻoua ʻaupito naʻa mou kai ha faʻahinga ngako pē pe ko ha toto.’”+

4 Naʻe hoko atu ʻa Sihova ʻo ne folofola kia Mōsese: 2 “Tala ki he kau ʻIsilelí, ‘Kapau ʻe faiangahala fāinoa+ ha taha ʻaki ʻene fai ha taha pē ʻo e ngaahi meʻa naʻe tuʻutuʻuni ʻe Sihova ke ʻoua te ne faí:

3 “‘Kapau ʻe faiangahala+ ʻa e taulaʻeiki kuo paní+ ʻo ne fakahalaiaʻi ai ʻa e kakaí, kuo pau leva ke ne ʻoatu ha kiʻi pulu tangata taʻemele kia Sihova ko ha feilaulau angahala koeʻuhi ko e angahala naʻá ne faí.+ 4 Te ne ʻomi ʻa e pulú ki he hūʻanga ʻo e tēniti feʻiloakiʻangá+ ʻi he ʻao ʻo Sihová ʻo ne hilifaki hono nimá ki he ʻulu ʻo e pulú, pea te ne tāmateʻi ʻa e pulú ʻi he ʻao ʻo Sihová.+ 5 Pea ʻe toʻo ʻe he taulaʻeiki kuo paní+ ha konga ʻo e toto ʻo e pulú ʻo ne ʻomi ia ki he loto tēniti feʻiloakiʻangá; 6 pea ʻe unu ʻe he taulaʻeikí hono tuhú ʻi he totó+ ʻo ne afuhi tuʻo fitu+ ʻa e konga ʻo e totó ʻi he ʻao ʻo Sihová ʻi muʻa ʻi he puipui ʻo e potu toputapú. 7 Ko e taulaʻeikí te ne toe ʻai foki ʻa e konga ʻo e totó ki he ngaahi meʻatui ʻo e ʻōlita ʻo e ʻinisēnisi namu-kakalá,+ ʻa ia ʻoku ʻi he ʻao ʻo Sihová ʻi he tēniti feʻiloakiʻangá; pea te ne lilingi ʻa e toenga kotoa ʻo e toto ʻo e pulú ʻi he veʻe ʻōlita ʻo e feilaulau tutú,+ ʻa ia ʻoku ʻi he hūʻanga ʻo e tēniti feʻiloakiʻangá.

8 “‘Te ne toʻo leva ʻa e ngako kotoa ʻo e pulu ʻo e feilaulau angahalá, ʻo kau ai ʻa e ngako ʻokú ne ʻufiʻufi ʻa e ngākaú mo e ngako ʻoku takatakai ʻi he ngākaú, 9 pea mo e ongo kofuuá mo e ngako ʻoku ʻi aí ʻa ia ʻoku ofi ki he fasi-ʻa-tuʻá. Pea te ne toʻo ʻa e ngako ʻo e ʻaté fakataha mo e ongo kofuuá.+ 10 ʻE tatau pē ia mo e meʻa ʻoku toʻo mei ha pulu ʻo e feilaulau feʻinasiʻakí.+ Pea ʻe tutu ia ʻe he taulaʻeikí ke kohu ʻi he funga ʻōlita ʻo e feilaulau tutú.

11 “‘Ka ko e meʻa ki he kili ʻo e pulú mo e kotoa ʻo hono kakanó fakataha mo hono ʻulú, ko hono ngaahi kauvaʻé, ko hono ngākaú, mo hono kinohaʻá+— 12 ʻa e toenga kotoa ʻo e pulú—te ne ʻai ke ʻave ia ki he tuʻa ʻapitangá ki ha feituʻu ʻoku maʻa ʻa ia ʻoku laku ki ai ʻa e efuefú,* pea te ne tutu ia ʻaki ʻa e afi ʻi he fefié.+ ʻOku totonu ke tutu ia ʻi he feituʻu ʻoku laku ki ai ʻa e efuefú.

13 “‘Kapau leva kuo hoko ʻo halaia ʻa e fuʻu fakataha fakakātoa ʻo ʻIsilelí ʻi hono fai ha angahala fāinoa,+ ka naʻe ʻikai ʻiloʻi ʻe he fakatahaʻangá kuo nau fai ha meʻa naʻe tuʻutuʻuni ʻe Sihova ke ʻoua te nau fai,+ 14 pea toki hoko ʻo ʻilolahia ʻa e angahalá, kuo pau ke ʻoatu ʻe he fakatahaʻangá ha kiʻi pulu tangata ki ha feilaulau angahala pea ʻomi ia ki muʻa ki he tēniti feʻiloakiʻangá. 15 Ko e kau mātuʻa ʻo e fuʻu fakatahá te nau hilifaki honau nimá ʻi he ʻulu ʻo e pulú ʻi he ʻao ʻo Sihová, pea ʻe tāmateʻi ʻa e pulú ʻi he ʻao ʻo Sihová.

16 “‘Pea ʻe ʻomi ʻe he taulaʻeiki kuo paní ʻa e konga ʻo e toto ʻo e pulú ki he loto tēniti feʻiloakiʻangá. 17 Ko e taulaʻeikí te ne unu hono tuhú ʻi he totó ʻo ne afuhi tuʻo fitu ha konga ʻo ia ʻi he ʻao ʻo Sihová ʻi muʻa ʻi he puipuí.+ 18 Te ne ʻai leva ha konga ʻo e totó ki he ngaahi meʻatui ʻo e ʻōlitá+ ʻa ē ʻoku ʻi he ʻao ʻo Sihová, ʻa ia ʻoku ʻi he tēniti feʻiloakiʻangá; pea te ne lilingi ʻa e toenga kotoa ʻo e totó ʻi he veʻe ʻōlita ʻo e feilaulau tutú, ʻa ia ʻoku ʻi he hūʻanga ʻo e tēniti feʻiloakiʻangá.+ 19 Te ne toʻo ʻa hono ngakó kotoa ʻo tutu ia ke kohu ʻi he ʻōlitá.+ 20 Te ne fai ki he pulú ʻo hangē tofu pē ko ʻene fai ki he pulu ko ē ʻo e feilaulau angahalá. ʻE pehē ʻene fai iá, pea ʻe fai ʻe he taulaʻeikí ha feilaulau ʻufiʻufi angahala maʻanautolu,+ pea ʻe fakamolemoleʻi kinautolu. 21 Te ne ʻai ke ʻave ʻa e pulú ki he tuʻa ʻapitangá pea tutu ia, ʻo hangē tofu pē ko ʻene tutu ʻa e ʻuluaki pulú.+ Ko ha feilaulau angahala ia maʻá e fakatahaʻangá.+

22 “‘ʻI he taimi ʻe faiangahala fāinoa ai ha ʻeiki+ ʻaki ʻene fai ha taha ʻi he ngaahi meʻa kotoa ʻoku tuʻutuʻuni ʻe Sihova ko hono ʻOtuá ke ʻoua te ne faí peá ne hoko ʻo halaia, 23 pe kapau ʻokú ne ʻilo kuó ne fai ha angahala ʻa ia ʻoku fepaki mo e tuʻutuʻuní, kuo pau leva ke ne ʻomi ha kiʻi kosi tangata taʻemele ko ʻene feilaulaú ia. 24 Te ne hilifaki hono nimá ʻi he ʻulu ʻo e kosi muí pea tāmateʻi ia ʻi he feituʻu ʻoku tāmateʻi ai ʻa e feilaulau tutú ʻi he ʻao ʻo Sihová.+ Ko ha feilaulau angahala ia. 25 ʻE toʻo ʻe he taulaʻeikí ʻaki hono tuhú ha konga ʻo e toto ʻo e feilaulau angahalá pea ʻai ia ʻi he ngaahi meʻatui+ ʻo e ʻōlita ʻo e feilaulau tutú, pea te ne lilingi ʻa e toenga ʻo hono totó ʻi he veʻe ʻōlita ʻo e feilaulau tutú.+ 26 Te ne tutu ʻa hono ngakó kotoa ke kohu ʻi he ʻōlitá ʻo hangē ko e ngako ʻo e feilaulau feʻinasiʻakí;+ pea ʻe fai ʻe he taulaʻeikí ha feilaulau ʻufiʻufi angahala maʻana koeʻuhi ko ʻene angahalá, pea ʻe fakamolemoleʻi ia.

27 “‘Kapau ʻe faiangahala fāinoa ha taha pē ʻo e kakai ʻo e fonuá peá ne hoko ai ʻo halaia ʻi heʻene fai ha taha ʻo e ngaahi meʻa ʻoku tuʻutuʻuni ʻe Sihova ke ʻoua ʻe faí,+ 28 pe kapau ʻokú ne ʻilo ha angahala kuó ne fai, ʻoku totonu leva ke ne ʻomi ha kiʻi kosi fefine taʻemele ko ʻene feilaulaú ia koeʻuhi ko e angahala kuó ne faí. 29 Te ne hilifaki hono nimá ki he ʻulu ʻo e feilaulau angahalá pea tāmateʻi ʻa e feilaulau angahalá ʻi he feituʻu tatau ʻoku tāmateʻi ai ʻa e feilaulau tutú.+ 30 ʻE toʻo ʻe he taulaʻeikí ʻaki hono tuhú ha konga ʻo hono totó pea ʻai ia ʻi he ngaahi meʻatui ʻo e ʻōlita ʻo e feilaulau tutú, pea te ne lilingi ʻa e toenga kotoa ʻo hono totó ʻi he veʻe ʻōlitá.+ 31 Te ne toʻo ʻa hono ngakó kotoa,+ ʻo hangē tofu pē ko hono toʻo ʻo e ngakó mei he feilaulau feʻinasiʻakí,+ pea ʻe tutu ia ʻe he taulaʻeikí ke kohu ʻi he ʻōlitá ko ha ngangatu fakahōifua* kia Sihova; pea ʻe fai ʻe he taulaʻeikí ha feilaulau ʻufiʻufi angahala maʻana, pea ʻe fakamolemoleʻi ia.

32 “‘Ka ʻo kapau te ne foaki ha lami ko ʻene feilaulau angahalá ia, ʻoku totonu ke ne ʻomi ha lami fefine taʻemele. 33 Te ne hilifaki hono nimá ʻi he ʻulu ʻo e feilaulau angahalá pea tāmateʻi ia ko ha feilaulau angahala ʻi he feituʻu ʻa ia ʻoku tāmateʻi ai ʻa e feilaulau tutú.+ 34 ʻE toʻo ʻe he taulaʻeikí ʻaki hono tuhú ha konga ʻo e toto ʻo e feilaulau angahalá pea ʻai ia ʻi he ngaahi meʻatui ʻo e ʻōlita ʻo e feilaulau tutú,+ pea te ne lilingi ʻa e toenga kotoa ʻo hono totó ʻi he veʻe ʻōlitá. 35 Te ne toʻo ʻa hono ngakó kotoa ʻo hangē pē ko hono toʻo ʻo e ngako ʻo e kiʻi sipi tangata ʻo e feilaulau feʻinasiʻakí, pea ʻe tutu ia ʻe he taulaʻeikí ke kohu ʻi he ʻōlitá ʻi ʻolunga ʻi he ngaahi feilaulau ʻoku fai ʻaki ʻa e afi kia Sihová;+ pea ʻe fai ʻe he taulaʻeikí ha feilaulau ʻufiʻufi angahala maʻana koeʻuhi ko e angahala kuó ne faí, pea ʻe fakamolemoleʻi ia.+

5 “‘Kapau ʻe faiangahala ha taha koeʻuhí kuó ne fanongo ki ha fanongonongo ke ne fai ha fakamoʻoni,*+ pea ko ha tokotaha fakamoʻoni ia pe kuó ne sio pe ʻilo fekauʻaki mo ia pea ʻoku ʻikai te ne fakahā ia, te ne fua leva ʻa e nunuʻa ʻo ʻene faihalá.

2 “‘Pe ʻi he taimi ʻoku ala ai ha tokotaha ki ha meʻa pē ʻoku taʻemaʻa, pe ko e sino ʻo ha manu kaivao taʻemaʻa kuo mate, ko ha manu lalata taʻemaʻa, pe ko ha taha pē ʻo e fanga kiʻi meʻamoʻui iiki fakapupunga taʻemaʻá,+ ʻokú ne taʻemaʻa ai pea kuó ne hoko ai ʻo halaia neongo kapau ʻoku ʻikai te ne ʻiloʻi ia. 3 Pe kapau ko ha taha ʻi he ʻikai te ne ʻilo ki aí ʻokú ne ala ki he taʻemaʻaʻanga ʻo ha tangata+—ko ha faʻahinga meʻa taʻemaʻa pē te ne ʻai nai ia ke ne taʻemaʻa—peá ne hoko ʻo ʻilo ki ai, ʻokú ne hoko leva ai ʻo halaia.

4 “‘Pe kapau ʻoku fai fakavave ʻe ha taha ha fakapapau ke ne fai ha meʻa—ke fai ha meʻa ʻoku lelei pe ke fai ha meʻa ʻoku kovi, tatau ai pē pe ko e hā nai ia—pea naʻe ʻikai te ne ʻiloʻi, ka ʻokú ne toki fakatokangaʻi hake kuó ne fai fakavave ʻa e fakapapaú, ʻokú ne hoko ai ʻo halaia.*+

5 “‘Kapau ʻokú ne hoko ʻo halaia ʻi he fekauʻaki mo e taha ʻo e ngaahi meʻa ko ení, kuo pau leva ke ne vetehia+ ki he founga kuó ne faiangahala aí. 6 Te ne ʻomai foki ʻa ʻene feilaulau halaiá kia Sihova ki he angahala naʻá ne faí,+ ʻa ia, ko ha manu fefine mei he tākangá, ko ha lami fefine pe ko ha kiʻi kosi fefine, ki ha feilaulau angahala. ʻE fai leva ʻe he taulaʻeikí ha feilaulau ʻufiʻufi angahala maʻana koeʻuhi ko ʻene angahalá.

7 “‘Kae kehe, kapau heʻikai lava ke ne maʻu ha sipi, kuo pau ke ne ʻomai kia Sihova ha ongo foʻi kulukulu pe ko ha ongo lupe mui ʻe ua+ ko ʻene feilaulau halaia ia ki he angahalá, ko e taha ki ha feilaulau angahala pea ko e taha ki ha feilaulau tutu.+ 8 Te ne ʻomi ia ki he taulaʻeikí, ʻa ia te ne ʻuluaki ʻoatu ʻa e taha ki he feilaulau angahalá pea fesiʻi ʻa hono ʻulú ʻi hono lalo kiá ʻo ʻikai motuhi ia. 9 Te ne afuhi ʻa e konga ʻo e toto ʻo e feilaulau angahalá ʻi he tafaʻaki ʻo e ʻōlitá, ka ko e toenga ʻo e totó ʻe fakatafe ia ki tuʻa ʻi he veʻe ʻōlitá.+ Ko ha feilaulau angahala ia. 10 Te ne faiʻaki ʻa e manu ʻe tahá ha feilaulau tutu ʻo fakatatau ki he founga anga-mahení;+ pea ʻe fai ʻe he taulaʻeikí ha feilaulau ʻufiʻufi angahala maʻana koeʻuhi ko e angahala kuó ne faí, pea ʻe fakamolemoleʻi ia.+

11 “‘Ko eni kapau heʻikai lava ke ne maʻu ha ongo foʻi kulukulu pe ko ha ongo lupe mui ʻe ua, kuo pau ke ne ʻomi ko ʻene feilaulau ki heʻene angahalá ha vahe hongofulu ʻo ha efa*+ ʻo e mahoaʻa lelei ko ha feilaulau angahala. ʻOku totonu ke ʻoua te ne tānaki ha lolo ki ai pe ʻai ki ai ha ʻinisēnisi hinehina, he ko ha feilaulau angahala ia. 12 Te ne ʻomi ia ki he taulaʻeikí, pea ko e taulaʻeikí te ne toʻo mei ai haʻane falukunga ko ha feilaulau fakaefakaʻilonga* pea tutu ia ke kohu ʻi he ʻōlitá ʻi ʻolunga he ngaahi feilaulau ʻoku fai ʻaki ʻa e afi kia Sihová. Ko ha feilaulau angahala ia. 13 ʻE fai ʻe he taulaʻeikí ha feilaulau ʻufiʻufi angahala maʻana ki he angahala kuó ne faí, ha taha pē ʻo e ngaahi angahala ko ení, pea ʻe fakamolemoleʻi ia.+ Ko e toenga ʻo e feilaulaú ʻe ʻa e taulaʻeikí ia,+ ʻo hangē tofu pē ko e feilaulau meʻakaí.’”+

14 Naʻe hoko atu ʻa Sihova ʻo ne folofola kia Mōsese, ʻo pehē: 15 “Kapau ʻe taʻefaitōnunga ha taha ʻaki ʻene faiangahala fāinoa ki he ngaahi meʻa toputapu ʻa Sihová,+ te ne ʻomi kia Sihova ha sipi tangata taʻemele mei he tākangá ko ha feilaulau halaia;+ ko hono mahuʻinga ʻi he sikeli* silivá ʻe fakatatau ia ki he tuʻunga ʻo e fua sikeli ʻo e potu toputapú.*+ 16 Pea te ne fai ha totongi huhuʻi koeʻuhi ko e angahala kuó ne fai ki he potu toputapú pea te ne tānaki foki ki ai ha vahe nima ʻo hono mahuʻingá.+ Te ne ʻave ia ki he taulaʻeikí, koeʻuhí ke lava ʻo fai ʻe he taulaʻeikí ha feilaulau ʻufiʻufi angahala+ maʻana ʻaki ʻa e sipi tangata ʻo e feilaulau halaiá, pea ʻe fakamolemoleʻi ia.+

17 “Kapau ʻe faiangahala ha taha ʻaki hono fai ha taha ʻo e ngaahi meʻa ʻoku tuʻutuʻuni ʻe Sihova ke ʻoua ʻe faí, neongo kapau ʻoku ʻikai te ne ʻilo ki ai, ʻokú ne kei halaia pē pea te ne fua ʻa e nunuʻa ʻo ʻene faihalá.+ 18 ʻOku totonu ke ne ʻomi ki he taulaʻeikí ha sipi tangata taʻemele mei he tākangá ʻo fakatatau ki he mahuʻinga kuo fakamahuʻingaʻi ki aí, ko ha feilaulau halaia.+ ʻE fai leva ʻe he taulaʻeikí ha feilaulau ʻufiʻufi angahala maʻana ki he fehālaaki fāinoa naʻá ne fai ʻi he taʻeʻiló, pea ʻe fakamolemoleʻi ia. 19 Ko ha feilaulau halaia ia. Kuó ne hoko moʻoni ʻo halaia ʻi he faiangahala kia Sihova.”

6 Naʻe hoko atu ʻa Sihova ʻo ne folofola kia Mōsese: 2 “Kapau ʻoku faiangahala ha tokotaha pea taʻefaitōnunga kia Sihova+ ʻaki ʻene kākaaʻi ʻa hono kaungāʻapí ʻi he fekauʻaki mo ha meʻa naʻe tuku kiate ia ke ne tauhi,+ pe ko ha meʻa naʻe ʻoange ke tuku ʻiate ia, pe ʻokú ne kaihaʻasi pe toʻo taʻetotonu ha meʻa mei hono kaungāʻapí, 3 pe ʻokú ne ʻilo ha meʻa naʻe mole pea faikākā fekauʻaki mo ia, pea kapau ʻokú ne fuakava loi ʻi ha angahala pehē kuó ne fai nai,+ ko e meʻa eni ʻoku totonu ke ne faí: 4 Kapau kuó ne faiangahala pea ʻokú ne halaia, kuo pau ke ne fakafoki ʻa e meʻa naʻá ne kaihaʻasí, ʻa e meʻa naʻá ne maʻu fakamālohí, ʻa e meʻa naʻá ne toʻo taʻetotonú, ʻa e meʻa naʻe tuku kiate ia ke ne tauhí, pe ko e meʻa mole naʻá ne maʻú, 5 pe ko ha meʻa pē ʻa ia naʻá ne fuakava loi ki ai, pea kuo pau ke ne fai ha totongi huhuʻi kakato ki ai,+ pea te ne tānaki ki ai ha vahe nima ʻo hono mahuʻingá. Te ne ʻoange ia ki he tokotaha ʻoku ʻaʻaná ʻi he ʻaho ʻe fakamoʻoniʻi ai ʻokú ne halaiá. 6 Pea te ne ʻomi ki he taulaʻeikí ko ʻene feilaulau halaia kia Sihova ha sipi tangata taʻemele mei he tākangá ʻo fakatatau ki he mahuʻinga kuo fakamahuʻingaʻi ki aí, ko ha feilaulau halaia.+ 7 Ko e taulaʻeikí te ne fai ha feilaulau ʻufiʻufi angahala maʻana ʻi he ʻao ʻo Sihová, pea ʻe fakamolemoleʻi ia ʻi ha meʻa pē kuó ne fai ʻo tupu ai ʻene halaiá.”+

8 Naʻe hoko atu ʻa Sihova ʻo ne folofola kia Mōsese, ʻo pehē: 9 “Tuʻutuʻuni kia ʻĒlone mo hono ngaahi fohá ʻo pehē, ‘Ko e lao eni ʻo e feilaulau tutú:+ Ko e feilaulau tutú ʻe tuku ai pē ia ʻi he tafuʻanga afi ʻi he funga ʻōlitá ʻi he poó kotoa ʻo aʻu ki he pongipongí, pea ko e afí ʻe ʻai ke moʻumoʻui ai pē ia ʻi he ʻōlitá. 10 ʻE tui ʻe he taulaʻeikí ʻa hono kofu līneni makehé,+ pea te ne tui ʻa e talausese mutu*+ līnení ʻo taupotu ki hono sinó. Te ne toʻo leva ʻa e efuefu*+ ʻo e feilaulau tutú ʻa ia naʻe keina ʻe he afí ʻi he funga ʻōlitá ʻo tuku ia ʻi he veʻe ʻōlitá. 11 Pea te ne toʻo ʻa hono ngaahi kofú+ pea tui ʻa e ngaahi kofu kehe pea ʻave ʻa e efuefú ki ha feituʻu maʻa ʻi he tuʻa ʻapitangá.+ 12 ʻE ʻai ke moʻumoʻui ai pē ʻa e afí ʻi he ʻōlitá. Kuo pau ke ʻoua naʻa mate ia. Ko e taulaʻeikí kuo pau ke ne tafu ia ʻaki ʻa e fefié+ ʻi he pongipongi taki taha pea fokotuʻutuʻu ʻa e feilaulau tutú ʻi he afí, pea te ne tutu ʻa e ngako ʻo e ngaahi feilaulau feʻinasiʻakí ke kohu ʻi he afí.+ 13 ʻE ʻai ke moʻumoʻui maʻu ai pē ʻa e afí ʻi he ʻōlitá. Kuo pau ke ʻoua naʻa mate ia.

14 “‘Ko e lao leva eni ʻo e feilaulau meʻakaí:+ Ko kimoutolu ʻa e ngaahi foha ʻo ʻĒloné te mou ʻoatu ia ʻi he ʻao ʻo Sihová ʻi muʻa ʻi he ʻōlitá. 15 Ko e toko taha ʻo kinautolu te ne toʻo ha falukunga mei he mahoaʻa lelei ʻo e feilaulau meʻakaí mo e konga ʻo hono loló mo e kotoa ʻo e ʻinisēnisi hinehina ʻoku ʻi he funga feilaulau meʻakaí, pea te ne tutu ia ke kohu ʻi he funga ʻōlitá ko ha ngangatu fakahōifua,* ko ha feilaulau fakaefakaʻilonga* kia Sihova.+ 16 Ko e meʻa ʻe toe mei aí ʻe kai ia ʻe ʻĒlone mo hono ngaahi fohá.+ ʻE kai ia ko ha mā taʻelēvani ʻi ha feituʻu toputapu. Te nau kai ia ʻi he lotoʻā ʻo e tēniti feʻiloakiʻangá.+ 17 ʻOku ʻikai totonu ke taʻo ia ʻaki ha meʻa pē ʻoku lēvani.+ Kuó u foaki ia ko honau ʻinasi mei he ngaahi feilaulau kiate au ʻoku fai ʻaki ʻa e afí.+ Ko e meʻa ia ʻoku mātuʻaki toputapu,+ ʻo hangē ko e feilaulau angahalá pea hangē ko e feilaulau halaiá. 18 Ko e tangata kotoa pē ʻi he lotolotonga ʻo e ngaahi foha ʻo ʻĒloné te nau kai ia.+ Ko honau ʻinasi tuʻuloa ia ʻi he kotoa ʻo homou ngaahi toʻutangatá mei he ngaahi feilaulau kia Sihova ʻoku fai ʻaki ʻa e afí.+ Ko e meʻa kotoa pē ʻe pā ki aí* ʻe hoko ia ʻo toputapu.’”

19 Naʻe toe folofola ʻa Sihova kia Mōsese: 20 “Ko e feilaulau eni ʻe ʻoatu ʻe ʻĒlone mo hono ngaahi fohá kia Sihova ʻi he ʻaho ʻe pani ai iá:+ Ko e vahe hongofulu ʻo ha efa*+ ʻo e mahoaʻa lelei ko ha feilaulau meʻakai tuʻumaʻu,+ ʻa ia ko e vaeua ʻo ia ʻi he pongipongí mo e vaeua ʻo ia ʻi he efiafí. 21 ʻE ngaohi ia ʻaki ʻa e lolo ʻi he lauʻiʻumea taʻoʻanga meʻá.+ Te ke ʻomi ia kuo ʻosi fio lelei mo e loló pea ʻoatu ia ko ha feilaulau meʻakai kuo taʻo ʻa ia kuo pakipaki ko ha ngangatu fakahōifua* kia Sihova. 22 Ko e taulaʻeiki ʻa ia kuo pani mei he lotolotonga ʻo hono ngaahi fohá+ ke ne fetongi iá ko ia ia te ne ʻoatu iá. Ko ha tuʻutuʻuni taʻengata ia: ʻI he tuʻunga ko ha feilaulau kakató ʻe tutu ia ke kohu kia Sihova. 23 Ko e feilaulau meʻakai kotoa pē ʻa ha taulaʻeiki ʻoku totonu ke tutu kotoa ia. Kuo pau ke ʻoua naʻa kai ia.”

24 Naʻe toe folofola ʻa Sihova kia Mōsese ʻo pehē: 25 “Tala kia ʻĒlone mo hono ngaahi fohá, ‘Ko e lao eni ʻo e feilaulau angahalá:+ ʻI he feituʻu ʻa ia ʻoku tāmateʻi ai ʻa e feilaulau tutú,+ ʻe tāmateʻi foki ai ʻa e feilaulau angahalá ʻi he ʻao ʻo Sihová. Ko ha meʻa mātuʻaki toputapu ia. 26 Ko e taulaʻeiki ʻokú ne ʻoatu ia koeʻuhi ko e angahalá te ne kai ia.+ ʻE kai ia ʻi ha potu toputapu, ʻi he lotoʻā ʻo e tēniti feʻiloakiʻangá.+

27 “‘Ko e meʻa kotoa pē ʻoku pā ki hono kakanó ʻe hoko ia ʻo toputapu, pea ʻi he taimi ʻoku afuhi fāinoa ai ʻe ha taha pē ha konga ʻo hono totó ʻi hono kofú, ʻoku totonu ke ke fō ʻa e meʻa naʻe afuhi ʻaki ʻa e totó ʻi ha potu toputapu. 28 Ko e ʻaiʻanga meʻa ʻumea ʻa ia naʻe haka aí ʻe foa ia. Ka ʻo kapau naʻe haka ia ʻi ha ʻaiʻanga meʻa kopa, pea kuo pau ke olo ʻa e ʻaiʻanga meʻá pea fufuluʻaki ʻa e vai.

29 “‘Ko e tangata kotoa pē ʻi he lotolotonga ʻo e kau taulaʻeikí te ne kai ia.+ Ko ha meʻa ia ʻoku mātuʻaki toputapu.+ 30 Kae kehe, heʻikai ke kai ha feilaulau angahala kapau ʻoku ʻomi ha konga ʻo hono totó ki he tēniti feʻiloakiʻangá ke faiʻaki ha feilaulau ʻufiʻufi angahala ʻi he potu toputapú.+ ʻE tutu ia ʻaki ʻa e afi.

7 “‘Ko e lao eni ʻo e feilaulau halaiá:+ Ko ha meʻa ia ʻoku mātuʻaki toputapu. 2 Te nau tāmateʻi ʻa e feilaulau halaiá ʻi he feituʻu ʻoku nau tāmateʻi ai ʻa e ngaahi feilaulau tutú, pea ko hono totó+ ʻoku totonu ke afuhi ia ʻi he ngaahi tafaʻaki kotoa ʻo e ʻōlitá.+ 3 Te ne ʻoatu ʻa hono ngakó kotoa,+ ʻo kau ai ʻa e hiku ngakó, ko e ngako ʻokú ne ʻufiʻufi ʻa e ngākaú, 4 mo e ongo kofuuá fakataha mo hona ngako ʻa ia ʻoku ofi ki he fasi-ʻa-tuʻá. Te ne toʻo foki ʻa e ngako ʻo e ʻaté fakataha mo e ongo kofuuá.+ 5 ʻE tutu ia ʻe he taulaʻeikí ke kohu ʻi he ʻōlitá ko ha feilaulau ʻoku fai ʻaki ʻa e afi kia Sihova.+ Ko ha feilaulau halaia ia. 6 Ko e tangata kotoa pē ʻi he lotolotonga ʻo e kau taulaʻeikí te ne kai ia,+ pea ʻoku totonu ke kai ia ʻi ha potu toputapu. Ko ha meʻa ia ʻoku mātuʻaki toputapu.+ 7 Ko e lao ʻo kau ki he feilaulau angahalá ʻoku ngāueʻaki tatau pē ia ki he feilaulau halaiá; ko e meʻa ko ia ʻoku faiʻaki ʻe he taulaʻeikí ʻa e feilaulau ʻufiʻufi angahalá ko e meʻa ia ʻaʻana.+

8 “‘ʻI he taimi ʻoku ʻoatu ai ʻe he taulaʻeikí ʻa e feilaulau tutú koeʻuhi ko ha taha, ʻe hoko ko e meʻa ʻa e taulaʻeikí ʻa e kili+ ʻo e feilaulau tutu naʻe ʻoatu kiate iá.

9 “‘Ko e feilaulau meʻakai kotoa pē ʻoku taʻo ʻi he ʻōvaní pe ngaohi ʻi he fakapakú pe ʻi he lauʻiʻumea taʻoʻanga meʻá+ ʻe maʻu ia ʻe he taulaʻeiki ʻokú ne ʻoatu iá. ʻE hoko ia ko e meʻa ʻaʻana.+ 10 Ka ko e feilaulau meʻakai kotoa pē ʻoku fio mo e loló+ pe ko ia ʻoku mōmoá+ ʻe maʻu ia ʻe he ngaahi foha kotoa ʻo ʻĒloné; ʻe maʻu ʻe he tokotaha taki taha ha ʻinasi tatau.

11 “‘Ko e lao leva eni ʻo e feilaulau feʻinasiʻaki+ ʻe ʻoatu ʻe ha taha kia Sihová: 12 Kapau ʻokú ne ʻoatu ia ko ha fakahāhaaʻi ʻo e fakafetaʻi,+ te ne ʻoatu fakataha mo e feilaulau fakafetaʻí ʻa e mā taʻelēvani fuo hangē ha foʻi mamá kuo natu ʻaki ʻa e lolo, ko e mā manifinifi taʻelēvani kuo valiʻaki ʻa e lolo, mo e mā fuo hangē ha foʻi mamá kuo ngaohiʻaki ʻa e mahoaʻa lelei, kuo natu lelei mo fioʻaki ʻa e lolo. 13 Te ne ʻoatu ʻene feilaulaú fakataha mo e mā lēvani fuo hangē ha foʻi mamá pea mo ʻene ngaahi feilaulau feʻinasiʻakí, ʻa ia ko e feilaulau fakafetaʻí ia. 14 Te ne ʻoatu ha foʻi mā ʻe taha mei he feilaulau taki taha ko ha ʻinasi toputapu ia kia Sihova; ko e meʻa ia ʻa e taulaʻeiki ʻokú ne afuhi ʻa e toto ʻo e ngaahi feilaulau feʻinasiʻakí.+ 15 Ko e kakano ʻo ʻene ngaahi feilaulau feʻinasiʻakí, ʻa ia ko e feilaulau fakafetaʻí ʻe kai ia ʻi he ʻaho ʻokú ne foaki atu ai iá. Kuo pau ke ʻoua naʻá ne fakatoe ha meʻa mei ai ʻo aʻu ki he pongipongí.+

16 “‘Kapau ko e feilaulau ʻokú ne foakí ko ha fuakava+ pe ko ha feilaulau loto-tauʻatāina,+ ʻe kai ia ʻi he ʻaho ʻokú ne ʻoatu ai ʻene feilaulaú, pea ko e meʻa ʻoku toe mei aí ʻe malava ke toe kai foki mo ia ʻi he ʻaho hono hokó. 17 Ka ko ha meʻa pē ʻe toe mei he kakano ʻo e feilaulaú ʻi he ʻaho hono tolú ʻe tutu ia ʻaki ʻa e afi.+ 18 Kae kehe, kapau naʻe kai ha meʻa pē mei he kakano ʻo ʻene feilaulau feʻinasiʻakí ʻi he ʻaho hono tolú, ko e tokotaha ʻokú ne ʻoatu iá ʻe ʻikai te ne maʻu ʻa e hōifuá. ʻE ʻikai ha leleiʻia ʻiate ia; ko ha meʻa palakū ia, pea ko e tokotaha ʻokú ne kai ha meʻa mei aí te ne fua ʻa e nunuʻa ʻo ʻene faihalá.+ 19 Ko e kakano ʻa ia ʻoku pā ki ha meʻa taʻemaʻa pē ʻe ʻikai ke kai ia. ʻE tutu ia ʻaki ʻa e afi. Ko e tokotaha kotoa pē ʻa ia ʻoku maʻá te ne kai ʻa e kakano ʻoku maʻá.

20 “‘Ka ko ha tokotaha pē ʻoku taʻemaʻa ʻokú ne kai ʻa e kakano ʻo e feilaulau feʻinasiʻakí, ʻa ia ʻoku maʻa Sihová, kuo pau ke tuʻusi ʻa e tokotaha ko iá mei hono kakaí.*+ 21 Kapau ʻe pā ha taha ki ha meʻa pē ʻoku taʻemaʻa, pe ko e taʻemaʻaʻanga ʻo ha tangata+ pe ko ha manu taʻemaʻa+ pe ko ha meʻa palakū pē ʻoku taʻemaʻa,+ peá ne kai ha meʻa mei he kakano ʻo e feilaulau feʻinasiʻakí, ʻa ia ʻoku maʻa Sihová, kuo pau ke tuʻusi ʻa e tokotaha ko iá mei hono kakaí.’”*

22 Naʻe hoko atu ʻa e folofola ʻa Sihova kia Mōsesé, ʻo pehē: 23 “Tala ki he kau ʻIsilelí, ‘Kuo pau ke ʻoua naʻa mou kai ha ngako+ pē ʻo ha pulu tangata pe ko ha kiʻi sipi tangata pe ko ha kosi. 24 Ko e ngako ʻo ha manu naʻe maʻu kuo mate pea mo e ngako ʻo ha manu naʻe tāmateʻi ʻe ha manu ʻe taha ʻe lava ke ngāueʻaki ia ki ha faʻahinga taumuʻa kehe pē, ka kuo pau ke ʻoua ʻaupito naʻa mou kai ia.+ 25 He ʻilonga ha taha ʻokú ne kai ʻa e ngako mei ha manu ʻokú ne ʻoatu ko ha feilaulau ʻoku fai ʻaki ʻa e afi kia Sihová kuo pau ke tuʻusi ia mei hono kakaí.*

26 “‘Kuo pau ke ʻoua naʻa mou kai ha toto+ pē ʻi ha taha pē ʻo homou ngaahi nofoʻangá, pe ko e toto ʻo e manupuná pe ko e toto ʻo e fanga manú. 27 Ko ha taha pē ʻokú ne kai ha toto kuo pau ke tuʻusi+ ia mei hono kakaí.’”*

28 Naʻe hoko atu ʻa Sihova ʻo ne folofola kia Mōsese, ʻo pehē: 29 “Tala ki he kau ʻIsilelí, ‘ʻIlonga ha taha ʻokú ne ʻoatu ʻene feilaulau feʻinasiʻakí kia Sihova te ne ʻomi ha konga ʻo ʻene feilaulau feʻinasiʻakí kia Sihova.+ 30 Te ne toʻo mai ʻi hono nimá ʻa e ngakó+ fakataha mo e fatafatá ko ha feilaulau ia ʻoku fai ʻaki ʻa e afi kia Sihova, pea te ne hapai ia ki muʻa mo mui ko ha feilaulau hapai+ ʻi he ʻao ʻo Sihová. 31 Ko e taulaʻeikí te ne tutu ke kohu ʻa e ngakó ʻi he funga ʻōlitá,+ ka ko e fatafatá ko e meʻa ia ʻa ʻĒlone mo hono ngaahi fohá.+

32 “‘Te mou foaki ʻa e alanga mui toʻomataʻú ko ha ʻinasi toputapu ia ki he taulaʻeikí mei hoʻomou ngaahi feilaulau feʻinasiʻakí.+ 33 Ko e foha ʻo ʻĒlone ʻokú ne ʻoatu ʻa e toto ʻo e ngaahi feilaulau feʻinasiʻakí pea mo e ngakó te ne maʻu ʻa e alanga mui toʻomataʻú ko hono ʻinasí ia.+ 34 He ʻoku ou toʻo ʻa e fatafata ʻo e feilaulau hapaí mo e alanga ʻo e ʻinasi toputapú mei he ngaahi feilaulau feʻinasiʻaki ʻa e kau ʻIsilelí, pea ʻoku ou ʻoange ia kia ʻĒlone ko e taulaʻeikí mo hono ngaahi fohá ko ha tuʻutuʻuni taʻengata ki he kau ʻIsilelí.+

35 “‘Ko e ʻinasi eni mei he ngaahi feilaulau kia Sihova ʻoku fai ʻaki ʻa e afí ke vaheʻi ia maʻá e kau taulaʻeikí, moʻo ʻĒlone mo hono ngaahi fohá, ʻi he ʻaho naʻá ne ʻoatu ai kinautolu ke nau ngāue ko e kau taulaʻeiki kia Sihová.+ 36 Naʻe tuʻutuʻuni ʻe Sihova ke ʻoange maʻanautolu ʻa e ʻinasi ko eni mei he kau ʻIsilelí ʻi he ʻaho naʻá ne pani ai kinautolú.+ Ko ha tuʻutuʻuni tuʻuloa ia ki honau ngaahi toʻutangatá.’”

37 Ko e lao eni ʻo fekauʻaki mo e feilaulau tutú,+ ko e feilaulau meʻakaí,+ ko e feilaulau angahalá,+ ko e feilaulau halaiá,+ ko e feilaulau fakanofó,+ pea mo e feilaulau feʻinasiʻakí,+ 38 ʻo hangē tofu pē ko e tuʻutuʻuni ʻa Sihova kia Mōsese ʻi Moʻunga Sainaí+ ʻi he ʻaho naʻá ne tuʻutuʻuni ai ki he kau ʻIsilelí ke ʻoatu ʻenau ngaahi feilaulaú kia Sihova ʻi he toafa Sainaí.+

8 Naʻe hoko atu ʻa Sihova ʻo ne folofola kia Mōsese, ʻo pehē: 2 “ʻAve ʻa ʻĒlone fakataha mo hono ngaahi fohá,+ mo e ngaahi kofú,+ ko e lolo paní,+ ko e pulu tangata ʻo e feilaulau angahalá, ko e ongo sipi tangatá, mo e kato ʻo e mā taʻelēvaní,+ 3 pea ʻai ʻa e fuʻu fakatahá kotoa ke nau fakatahataha ki he hūʻanga ʻo e tēniti feʻiloakiʻangá.”

4 Naʻe fai leva ʻe Mōsese ʻa e meʻa tofu pē naʻe tuʻutuʻuni ʻe Sihova kiate iá, pea naʻe fakatahataha ʻa e fuʻu fakatahá ʻi he hūʻanga ʻo e tēniti feʻiloakiʻangá. 5 Naʻe pehē leva ʻe Mōsese ki he fuʻu fakatahá: “Ko e meʻa eni kuo tuʻutuʻuni mai ʻe Sihova ke tau faí.” 6 Ko ia naʻe fakaofi mai ʻe Mōsese ʻa ʻĒlone mo hono ngaahi fohá peá ne ʻai ke nau kaukau ʻi he vaí.+ 7 ʻI he hili iá, naʻá ne fakatui ʻia ʻĒlone ʻa e kofu tōtōlofá,+ takai ʻiate ia ʻa e noʻó,+ fakatui ʻiate ia ʻa e kofu taʻenimá,+ pea ʻai kiate ia ʻa e ʻēfotí+ pea nonoʻo ia ʻaki ʻa e leta*+ kuo lalanga ʻo e ʻēfotí, ʻo haʻi maʻu ia ʻiate ia. 8 Ko hono hokó naʻá ne ʻai ʻa e sifa-fatafatá+ kiate ia pea tuku ʻa e ʻŪlimí mo e Tūmemí+ ʻi he sifa-fatafatá. 9 Naʻá ne ʻai leva ʻa e faʻufaʻu makehé+ ki hono ʻulú, peá ne ʻai ʻi muʻa he faʻufaʻú ʻa e lauʻimeʻa koula ngingilá, ʻa e fakaʻilonga toputapu ʻo e fakatapuí,+ ʻo hangē tofu pē ko e tuʻutuʻuni ʻa Sihova kia Mōsesé.

10 Naʻe toʻo leva ʻe Mōsese ʻa e lolo paní ʻo ne pani ʻa e tāpanekalé mo e meʻa kotoa naʻe ʻi aí+ pea fakatoputapuʻi ia. 11 Hili iá, naʻá ne afuhi tuʻo fitu ha konga ʻo ia ʻi he funga ʻōlitá ʻo pani ai ʻa e ʻōlitá mo e kotoa ʻo hono ngaahi naunaú mo e fuʻu pēsoní mo hono tuʻuʻangá koeʻuhí ke fakatoputapuʻi ia. 12 Fakaʻosí, naʻá ne lilingi ha konga ʻo e lolo paní ʻi he ʻulu ʻo ʻĒloné ʻo ne pani ia koeʻuhí ke fakamāʻoniʻoniʻi ia.+

13 Naʻe ʻomi leva ʻe Mōsese ke ofi ʻa e ngaahi foha ʻo ʻĒloné ʻo fakatui ʻiate kinautolu ʻa e ngaahi kofu tōtōlofá pea takai ʻiate kinautolu ʻa e ngaahi noʻo pea ʻai* honau faʻufaʻú ʻiate kinautolu,+ ʻo hangē tofu pē ko e tuʻutuʻuni ʻa Sihova kia Mōsesé.

14 Naʻá ne ʻomi leva ʻa e pulu tangata ʻo e feilaulau angahalá, pea naʻe hilifaki ʻe ʻĒlone mo hono ngaahi fohá ʻa honau nimá ʻi he ʻulu ʻo e pulu tangata ʻo e feilaulau angahalá.+ 15 Naʻe tāmateʻi ia ʻe Mōsese pea toʻo ʻa e totó+ ʻaki hono tuhú ʻo ʻai ia ʻi he ngaahi meʻatui ʻo e ʻōlitá ʻi hono ngaahi tafaʻakí kotoa, peá ne fakamaʻa ʻa e ʻōlitá mei he angahalá, ka ko e toenga ʻo e totó naʻá ne lilingi ia ʻi he veʻe ʻōlitá, koeʻuhí ke fakatoputapuʻi ia ke fai ai ha feilaulau ʻufiʻufi angahala. 16 Hili iá, naʻá ne toʻo ʻa e ngako kotoa naʻe ʻi he ngākaú, ko e ngako ʻo e ʻaté, mo e ongo kofuuá mo hona ngakó, pea naʻe tutu ia ʻe Mōsese ke kohu ʻi he funga ʻōlitá.+ 17 Naʻá ne ʻai leva ʻa e toenga ʻo e pulu tangatá, ʻa hono kilí, ko hono kakanó, mo hono kinohaʻá, ke tutu ʻaki ʻa e afi ʻi he tuʻa ʻapitangá,+ ʻo hangē tofu pē ko e tuʻutuʻuni ʻa Sihova kia Mōsesé.

18 Naʻá ne ʻomi leva ʻa e sipi tangata ʻo e feilaulau tutú ke ofi, pea naʻe hilifaki ʻe ʻĒlone mo hono ngaahi fohá honau nimá ʻi he ʻulu ʻo e sipi tangatá.+ 19 Naʻe tāmateʻi leva ia ʻe Mōsese pea afuhi ʻa e totó ʻi he ngaahi tafaʻaki kotoa ʻo e ʻōlitá. 20 Naʻá ne tuʻutuʻu ʻa e sipi tangatá ʻi hono ngaahi kongokongá, pea naʻe tutu ʻe Mōsese ʻa e ʻulú, ko e ngaahi kongokongá, pea mo e ngakó* ke kohu. 21 Naʻá ne fufulu ʻa e ngākaú mo e ngaahi kauvaʻé ʻaki ʻa e vai, pea naʻe tutu ʻe Mōsese ke kohu ʻa e sipi tangatá kotoa ʻi he funga ʻōlitá. Ko ha feilaulau tutu ia ko ha ngangatu fakahōifua.* Ko ha feilaulau ʻoku fai ʻaki ʻa e afi kia Sihova, ʻo hangē tofu pē ko e tuʻutuʻuni ʻa Sihova kia Mōsesé.

22 Naʻá ne ʻomi leva ʻa e sipi tangata hono uá, ʻa e sipi tangata ʻo e fakanofó,+ pea ko ʻĒlone mo hono ngaahi fohá naʻa nau hilifaki honau nimá ʻi he ʻulu ʻo e sipi tangatá.+ 23 Naʻe tāmateʻi ia ʻe Mōsese pea toʻo ha konga ʻo hono totó ʻo ʻai ʻi he lauʻitelinga toʻomataʻu ʻo ʻĒloné pea ʻi he motuʻa-tuhu ʻo hono nima toʻomataʻú pea ʻi he motuʻa-vaʻe ʻo hono vaʻe toʻomataʻú. 24 Ko hono hokó naʻe ʻomi ʻe Mōsese ʻa e ngaahi foha ʻo ʻĒloné ki muʻa ʻo ne ʻai ha konga ʻo e totó ʻi honau lauʻitelinga toʻomataʻú pea ʻi he motuʻa-tuhu ʻo honau nima toʻomataʻú pea ʻi he motuʻa-vaʻe ʻo honau vaʻe toʻomataʻú; ka naʻe afuhi ʻe Mōsese ʻa e toenga ʻo e totó ʻi he ngaahi tafaʻaki kotoa ʻo e ʻōlitá.+

25 Naʻá ne toʻo leva ʻa e ngakó, ko e hiku ngakó, ko e ngako kotoa naʻe ʻi he ngākaú, ko e ngako ʻo e ʻaté, ko e ongo kofuuá mo hona ngakó, pea mo e alanga mui toʻomataʻú.+ 26 Naʻá ne toʻo ki tuʻa mei he kato ʻo e mā taʻelēvani ʻa ia naʻe ʻi he ʻao ʻo Sihová ha foʻi mā ʻe taha taʻelēvani fuo hangē ha foʻi mamá,+ ko e foʻi mā ʻe taha fuo hangē ha foʻi mamá kuo fio mo e lolo+ mo e foʻi mā manifinifi ʻe taha. Naʻá ne tuku leva ia ki he ngaahi kongokonga ʻo e ngakó mo e alanga mui toʻomataʻú. 27 Hili iá, naʻá ne ʻai kotoa ia ki he ongo ʻaofinima ʻo ʻĒloné mo e ʻaofinima ʻo hono ngaahi fohá pea kamata ke hapai ia ki muʻa mo mui ko ha feilaulau hapai ʻi he ʻao ʻo Sihová. 28 Naʻe toʻo leva ia ʻe Mōsese mei honau nimá pea tutu ia ke kohu ʻi he funga ʻōlitá ʻi ʻolunga ʻi he feilaulau tutú. Ko ha feilaulau fakanofo ia ko ha ngangatu fakahōifua.* Ko ha feilaulau ia ʻoku fai ʻaki ʻa e afi kia Sihova.

29 Naʻe toʻo leva ʻe Mōsese ʻa e fatafatá ʻo hapai ia ki muʻa mo mui ko ha feilaulau hapai ʻi he ʻao ʻo Sihová.+ Naʻe hoko ia ko e ʻinasi ʻo Mōsese mei he sipi tangata ʻo e fakanofó, ʻo hangē tofu pē ko e tuʻutuʻuni ʻa Sihova kia Mōsesé.+

30 Pea naʻe toʻo ʻe Mōsese ha konga ʻo e lolo paní+ mo e konga ʻo e toto naʻe ʻi he funga ʻōlitá ʻo afuhi ia ʻia ʻĒlone mo hono ngaahi kofú pea ʻi hono ngaahi fohá mo e ngaahi kofu ʻo hono ngaahi fohá ʻa ia naʻe ʻiate iá. Ko ia naʻá ne fakamāʻoniʻoniʻi ai ʻa ʻĒlone mo hono ngaahi kofú pea mo hono ngaahi fohá+ mo honau ngaahi kofú.+

31 Naʻe pehē leva ʻe Mōsese kia ʻĒlone mo hono ngaahi fohá: “Haka+ ʻa e kakanó ʻi he hūʻanga ʻo e tēniti feʻiloakiʻangá, pea te mou kai ia ʻi ai fakataha mo e mā ʻa ia ʻoku ʻi he kato ʻo e fakanofó, ʻo hangē ko ia naʻe tuʻutuʻuni kiate aú, ‘ko ʻĒlone mo hono ngaahi fohá te nau kai ia.’+ 32 Ko e meʻa ʻe toe ʻi he kakanó pea mo e maá te mou tutu ia ʻaki ʻa e afi.+ 33 Kuo pau ke ʻoua naʻa mou hū ki tuʻa mei he hūʻanga ʻo e tēniti feʻiloakiʻangá ʻi he ʻaho ʻe fitu, kae ʻoua kuo ʻosi ʻa e ngaahi ʻaho ki hono fakakakato homou fakanofó, koeʻuhí ʻe feʻunga mo e ʻaho ʻe fitu ʻa hono fakanofo kimoutolu ke hoko ko e kau taulaʻeikí.*+ 34 Kuo tuʻutuʻuni ʻe Sihova ke tau fai ʻa e meʻa kuo tau fai he ʻaho ní koeʻuhí ke fai ha feilaulau ʻufiʻufi angahala maʻamoutolu.+ 35 Te mou nofo ʻi he hūʻanga ʻo e tēniti feʻiloakiʻangá ʻi he ʻaho mo e pō ʻo ʻaho ʻe fitu+ pea fakahoko homou fatongia kia Sihová,+ koeʻuhí ke ʻoua naʻa mou mate; he naʻe pehē ʻa e tuʻutuʻuni kiate aú.”

36 Pea ko ʻĒlone mo hono ngaahi fohá naʻa nau fai ʻa e meʻa kotoa pē naʻe tuʻutuʻuni ʻe Sihova fakafou ʻia Mōsesé.

9 ʻI he ʻaho hono valú,+ naʻe ui ʻe Mōsese ʻa ʻĒlone mo hono ngaahi fohá pea mo e kau mātuʻa ʻo ʻIsilelí. 2 Naʻá ne pehē kia ʻĒlone: “Toʻo maʻau ha ʻuhikiʻi pulu ko ha feilaulau angahala+ mo ha sipi tangata ko ha feilaulau tutu, ko e ongo manu taʻemele, pea ʻoatu ia ʻi he ʻao ʻo Sihová. 3 Ka te ke pehē ki he kau ʻIsilelí, ‘Toʻo ha kosi tangata ko ha feilaulau angahala mo ha ʻuhikiʻi pulu pea mo ha kiʻi sipi tangata, ʻokú na fakatou taʻu taha mo taʻemele ko ha feilaulau tutu, 4 mo ha pulu tangata pea mo ha sipi tangata ko ha ngaahi feilaulau feʻinasiʻaki+ ke feilaulauʻi ia ʻi he ʻao ʻo Sihová, pea mo ha feilaulau meʻakai+ kuo fio mo e loló, he ʻe hā ʻa Sihova he ʻahó ni kiate kimoutolu.’”+

5 Ko ia naʻa nau ʻave ʻa e meʻa naʻe tuʻutuʻuni ʻe Mōsesé ki muʻa ki he tēniti feʻiloakiʻangá. Naʻe haʻu leva ʻa e fuʻu fakatahá kotoa ki muʻa ʻo nau tuʻu ʻi he ʻao ʻo Sihová. 6 Pea naʻe pehē ʻe Mōsese: “Ko e meʻa eni kuo tuʻutuʻuni ʻe Sihova kiate kimoutolu ke mou faí, koeʻuhí ke lava ʻo hā atu ai ʻa e lāngilangi ʻo Sihová kiate kimoutolu.”+ 7 Naʻe pehē leva ʻe Mōsese kia ʻĒlone: “ʻUnuʻunu atu ki he ʻōlitá ʻo ʻoatu hoʻo feilaulau angahalá+ mo hoʻo feilaulau tutú, pea fai ha feilaulau ʻufiʻufi angahala maʻau+ pea maʻa ho falé; pea ʻoatu ʻa e feilaulau ʻa e kakaí+ mo fai ha feilaulau ʻufiʻufi angahala maʻanautolu,+ ʻo hangē tofu pē ko e tuʻutuʻuni ʻa Sihová.”

8 Naʻe ʻunuʻunu atu leva ʻa ʻĒlone ki he ʻōlitá ʻo ne tāmateʻi ʻa e ʻuhikiʻi pulu ʻo e feilaulau angahala naʻe ʻai maʻaná.+ 9 Naʻe ʻoatu leva ʻe he ngaahi foha ʻo ʻĒloné ʻa e totó+ kiate ia, peá ne unu hono tuhú ʻi he totó ʻo ne ʻai ia ki he ngaahi meʻatui ʻo e ʻōlitá, peá ne lilingi ʻa e toenga ʻo e totó ʻi he veʻe ʻōlitá.+ 10 Naʻá ne tutu ʻa e ngako mo e ongo kofuua pea mo e ngako ʻo e ʻate mei he feilaulau angahalá ke kohu ʻi he funga ʻōlitá, ʻo hangē tofu pē ko e tuʻutuʻuni ʻa Sihova kia Mōsesé.+ 11 Pea naʻá ne tutu ʻa e kakanó mo e kilí ʻaki ʻa e afi ʻi he tuʻa ʻapitangá.+

12 Naʻá ne tāmateʻi leva ʻa e feilaulau tutú, pea naʻe ʻoange ʻe he ngaahi foha ʻo ʻĒloné kiate ia ʻa e totó peá ne afuhi ia ʻi he ngaahi tafaʻaki kotoa ʻo e ʻōlitá.+ 13 Naʻa nau ʻoange kiate ia ʻa e ngaahi kongokonga ʻo e feilaulau tutú fakataha mo e ʻulú, pea naʻá ne tutu ia ke kohu ʻi he funga ʻōlitá. 14 ʻIkai ko ia pē, naʻá ne fufulu ʻa e ngākaú mo e ngaahi kauvaʻé peá ne tutu ia ke kohu ʻi he funga feilaulau tutu ʻi he ʻōlitá.

15 Naʻá ne ʻoatu leva ʻa e feilaulau ʻa e kakaí peá ne toʻo ʻa e kosi ʻo e feilaulau angahala naʻe ʻai maʻá e kakaí ʻo ne tāmateʻi ia peá ne ngaohiʻaki ia ha feilaulau angahala ʻo hangē ko e ʻuluaki feilaulaú. 16 Pea naʻá ne ʻoatu ʻa e feilaulau tutú ʻo ne fakahoko ia ʻo fakatatau ki he founga naʻe anga-maheni ʻakí.+

17 Ko hono hokó, naʻá ne ʻoatu ʻa e feilaulau meʻakaí,+ ʻo ne fakafonu hono nimá ʻaki hano konga pea tutu ia ke kohu ʻi he funga ʻōlitá, ʻo tānaki atu ki he feilaulau tutu ʻo e pongipongí.+

18 ʻI he hili iá, naʻá ne tāmateʻi ʻa e pulu tangata mo e sipi tangata ʻo e feilaulau feʻinasiʻaki naʻe ʻai maʻá e kakaí. Naʻe ʻoange leva ʻe he ngaahi foha ʻo ʻĒloné kiate ia ʻa e totó, peá ne afuhi takatakai ia ʻi he ngaahi tafaʻaki kotoa ʻo e ʻōlitá.+ 19 Pea ki he ngaahi kongokonga ngako ʻo e pulu tangatá,+ ko e hiku ngako ʻo e sipi tangatá, ko e ngako ʻokú ne ʻufiʻufi ʻa e toʻotoʻongá, ko e ongo kofuuá, pea mo e ngako ʻo e ʻaté,+ 20 naʻa nau hili ʻa e ngaahi kongokonga ngako kotoa ko iá ʻi he ngaahi fatafatá, ʻa ia ʻi he hili iá naʻá ne tutu ʻa e ngaahi kongokonga ngakó ke kohu ʻi he funga ʻōlitá.+ 21 Ka ko e ngaahi fatafatá mo e alanga mui toʻomataʻú naʻe hapai ia ʻe ʻĒlone ki muʻa mo mui ko ha feilaulau hapai ʻi he ʻao ʻo Sihová, ʻo hangē tofu pē ko e tuʻutuʻuni ʻa Mōsesé.+

22 Naʻe hiki leva ʻe ʻĒlone hono ongo nimá ki he kakaí ʻo ne tāpuakiʻi kinautolu+ peá ne ʻalu hifo mei hono fai ʻa e feilaulau angahalá mo e feilaulau tutú pea mo e ngaahi feilaulau feʻinasiʻakí. 23 Fakaʻosí, naʻe hū ʻa Mōsese mo ʻĒlone ki he tēniti feʻiloakiʻangá peá na hū mai ki tuʻa ʻo tāpuakiʻi ʻa e kakaí.+

Naʻe hā mai he taimi ko ení ʻa e lāngilangi ʻo Sihová ki he kakaí kotoa,+ 24 pea naʻe haʻu ha afi meia Sihova+ ʻo ne kamata keina ʻa e feilaulau tutú mo e ngaahi kongokonga ngako ʻi he funga ʻōlitá. ʻI he sio ʻa e kakaí kotoa ki aí, naʻa nau kamata kaikaila pea naʻa nau tō foʻohifo ki he kelekelé.+

10 Ki mui ai, ko e ongo foha ʻo ʻĒlone ko Nātapi mo ʻĀpiú+ naʻá na toʻo taki taha ʻena ʻaiʻanga afi ʻo na ʻai ki ai ʻa e afi pea ʻai ki ai mo e ʻinisēnisi.+ Naʻe kamata leva ke na foaki ʻi he ʻao ʻo Sihová ʻa e afi kuo ʻikai fakamafaiʻi,+ ʻa ia naʻe ʻikai te ne tuʻutuʻuni kiate kinaua ke na fai. 2 ʻI he meʻá ni, naʻe haʻu ha afi mei he ʻao ʻo Sihová ʻo ne keina kinaua,+ ko ia naʻá na mate ai ʻi he ʻao ʻo Sihová.+ 3 Naʻe pehē ange leva ʻe Mōsese kia ʻĒlone: “Ko e meʻa eni kuo folofolaʻaki ʻe Sihová, ‘ʻE fakamāʻoniʻoniʻi au ʻi he lotolotonga ʻo e faʻahinga ʻoku ofi kiate aú,+ pea ʻe fakalāngilangiʻi au ʻi he ʻao ʻo e kakaí kotoa.’” Pea naʻe hanganaki fakalongolongo pē ʻa ʻĒlone.

4 Ko ia naʻe ui ʻe Mōsese ʻa Misaeli mo ʻElisafani, ko e ongo foha ʻo ʻOsieli,+ ko e tokoua ʻo e tamai ʻa ʻĒloné, peá ne pehē kiate kinaua: “Mo omi ki heni, fata homo ongo tokouá mei he mata tēniti toputapú ki ha feituʻu ʻi he tuʻa ʻapitangá.” 5 Ko ia naʻá na laka mai ki muʻa ʻo na fata atu ʻa e ongo tangatá ʻokú na kei kofu tōtōlofa pē ki ha feituʻu ʻi he tuʻa ʻapitangá, ʻo hangē tofu pē ko hono tala ʻe Mōsese kiate kinauá.

6 Naʻe pehē ange leva ʻe Mōsese kia ʻĒlone pea ki hono ongo foha kehe ko ʻEliesa mo ʻĪtamá: “ʻOua ʻe tuku taʻetokangaʻi homou ʻulú pe hae homou ngaahi kofú,+ koeʻuhí ke ʻoua naʻa mou mate pea ke ʻoua naʻa hoko mai ʻa e houhau ʻa e ʻOtuá ki he fuʻu fakatahá kotoa. Ko homou fanga tokouá, ʻa e fale kotoa ʻo ʻIsilelí te nau tengihia kinaua kuo tāmateʻi ʻaki ʻe Sihova ʻa e afí. 7 Kuo pau ke ʻoua naʻa mou hū ki tuʻa mei he hūʻanga ʻo e tēniti feʻiloakiʻangá telia naʻa mou mate, he ʻoku ʻiate kimoutolu ʻa e lolo pani+ ʻa Sihová.” Ko ia ai, naʻa nau fai ʻo fakatatau ki he lea ʻa Mōsesé.

8 Naʻe folofola leva ʻa Sihova kia ʻĒlone: 9 “ʻOua naʻá ke inu uaine pe ko ha ngaahi inu ʻolokaholo kehe, ʻa koe mo ho ongo foha ʻoku ʻiate koé, ʻi he taimi te mou hū ai ki he tēniti feʻiloakiʻangá,+ ke ʻoua naʻa mou mate. Ko ha tuʻutuʻuni tuʻuloa ia ki homou ngaahi toʻutangatá. 10 Ko e fai eni ke fakafaikehekeheʻi ʻa e meʻa ʻoku toputapú mo e meʻa ʻoku ʻikai toputapú pea mo e meʻa ʻoku taʻemaʻá mo e meʻa ʻoku maʻá,+ 11 pea ke akoʻi ki he kau ʻIsilelí ʻa e ngaahi tuʻutuʻuni kotoa kuo folofolaʻaki ʻe Sihova kiate kinautolu fakafou ʻia Mōsesé.”+

12 Naʻe lea leva ʻa Mōsese kia ʻĒlone pea kia ʻEliesa mo ʻĪtama, ʻa hono ongo foha naʻe toé: “Toʻo ʻa e toenga ʻo e feilaulau meʻakai mei he ngaahi feilaulau naʻe fai ʻaki ʻa e afi kia Sihová pea kai ia ko ha mā taʻelēvani ʻo ofi ki he ʻōlitá,+ koeʻuhí ko ha meʻa mātuʻaki toputapu ia.+ 13 Kuo pau ke mou kai ia ʻi ha potu toputapu,+ koeʻuhí ko ho ʻinasi ia pea ko e ʻinasi ia ʻo ho ongo fohá mei he ngaahi feilaulau ʻoku fai ʻaki ʻa e afi kia Sihová, he ko e meʻa eni kuo tuʻutuʻuni kiate aú. 14 Pea te mou kai foki ʻa e fatafata ʻo e feilaulau hapaí pea mo e alanga ʻo e ʻinasi toputapú+ ʻi ha feituʻu ʻoku maʻa, ʻa koe mo ho ongo fohá pea mo ho ngaahi ʻofefine ʻoku ʻiate koé,+ koeʻuhí ko e ngaahi meʻá ni kuo foaki atu ia ko ho ʻinasi pea ko e ʻinasi ʻo ho ongo fohá mei he ngaahi feilaulau feʻinasiʻaki ʻa e kau ʻIsilelí. 15 Te nau ʻomi ʻa e alanga ʻo e ʻinasi toputapú pea mo e fatafata ʻo e feilaulau hapaí fakataha mo e ngaahi feilaulau ʻo e ngako ʻoku fai ʻaki ʻa e afí, koeʻuhí ke hapai ʻa e feilaulau hapaí ki muʻa mo mui ʻi he ʻao ʻo Sihová; pea ʻe hoko ia ko ha ʻinasi tuʻuloa kiate koe mo ho ongo foha ʻoku ʻiate koé,+ ʻo hangē tofu pē ko e tuʻutuʻuni ʻa Sihová.”

16 Pea naʻe kumi tōtōivi ʻe Mōsese ʻa e kosi ʻo e feilaulau angahalá,+ pea naʻá ne ʻilo kuo ʻosi tutu ia. Ko ia naʻá ne hoko ai ʻo ʻita lahi kia ʻEliesa mo ʻĪtama, ʻa e ongo foha ʻo ʻĒlone naʻe toé, peá ne pehē: 17 “Ko e hā naʻe ʻikai te mo kai ai ʻa e feilaulau angahalá ʻi he potu toputapú,+ koeʻuhí ko ha meʻa mātuʻaki toputapu ia pea kuó ne foaki ia kiate kimoua koeʻuhí ke mo fua ʻa e faihala ʻa e fuʻu fakatahá pea fai ai ha feilaulau ʻufiʻufi angahala maʻanautolu ʻi he ʻao ʻo Sihová? 18 Vakai! Ko e toto ʻo e feilaulau angahalá kuo teʻeki ke ʻomi ia ki loto ki he potu toputapú.+ Naʻe totonu moʻoni ke mo kai ia ʻi he potu toputapú, ʻo hangē tofu pē ko e tuʻutuʻuni naʻe fai kiate aú.” 19 Naʻe tali ange ʻe ʻĒlone kia Mōsese: “Vakai! ʻI he ʻahó ni naʻa nau ʻoatu ai ʻenau feilaulau angahalá mo ʻenau feilaulau tutú ʻi he ʻao ʻo Sihová,+ neongo ʻa e ngaahi meʻa ko eni naʻe hoko kiate aú. Kapau naʻá ku kai ʻa e feilaulau angahalá he ʻahó ni, naʻe mei fakahōifua koā ia kia Sihova?” 20 ʻI he fanongo ki ai ʻa Mōsesé, naʻá ne fiemālie.

11 Naʻe folofola leva ʻa Sihova kia Mōsese mo ʻĒlone: 2 “Tala ki he kau ʻIsilelí, ‘Ko e ngaahi meʻamoʻui eni ʻo e māmaní* ʻe lava ke mou kaí:+ 3 Ko e manu kotoa pē ʻoku mavaeua hono topuvaʻé* mo mafahi ʻa hono ngaahi topuvaʻé pea ʻoku kai fakahake ʻe lava ke kai ia.

4 “‘Ka kuo pau ke ʻoua naʻa mou kai ʻa e fanga manu ko eni ʻoku nau kai fakahake pe mavaeua honau topuvaʻé: Ko e kāmelí, ʻa ia ʻoku kai fakahake ia ka ʻoku ʻikai mavaeua hono topuvaʻé. ʻOku taʻemaʻa ia kiate kimoutolu.+ 5 Pehē foki mo e safaná,*+ koeʻuhí ʻoku kai fakahake ia ka ʻoku ʻikai ke mavaeua ʻa hono pesipesí. ʻOku taʻemaʻa ia kiate kimoutolu. 6 Pehē foki ki he heá, koeʻuhí ʻoku kai fakahake ia ka ʻoku ʻikai mavaeua ʻa hono pesipesí. ʻOku taʻemaʻa ia kiate kimoutolu. 7 Pehē foki ki he puaká,+ koeʻuhí ʻoku mavaeua hono pesipesí pea ʻi ai ha mafahi ʻi hono pesipesí ka ʻoku ʻikai ke kai fakahake ia. ʻOku taʻemaʻa ia kiate kimoutolu. 8 Kuo pau ke ʻoua naʻa mou kai ha meʻa pē mei honau kakanó pe pā ki honau sino kuo maté. ʻOku nau taʻemaʻa kiate kimoutolu.+

9 “‘Ko e meʻa eni ʻe lava ke mou kai ʻi he meʻa kotoa pē ʻoku ʻi he vaí: Ko ha meʻa pē ʻi he vaí ʻoku ʻi ai hono kaponga mo e ʻuno, pe ʻoku ʻi he tahí pe ʻi he ngaahi vaitafé, ko e meʻa ia ʻe lava ke mou kaí.+ 10 Ka ko ha meʻa pē ʻoku ʻi he tahí pea ʻi he ngaahi vaitafé ʻoku ʻikai hano kaponga mo hano ʻuno, ʻi he lotolotonga ʻo e fanga kiʻi meʻamoʻui iiki kotoa pē ʻoku fakapupungá pea ʻi he meʻamoʻui kehe kotoa pē ʻa ia ʻoku ʻi he vaí, ko ha meʻa fakalielia ia kiate kimoutolu. 11 ʻIo, ʻoku totonu ke fakalielia ia kiate kimoutolu, pea kuo pau ke ʻoua naʻa mou kai ha meʻa pē mei honau kakanó+ pea kuo pau ke mou fakaliliʻa ʻi honau ngaahi ʻangaʻangá. 12 Ko e meʻa kotoa pē ʻoku ʻi he vaí ʻoku ʻikai hano kaponga mo hano ʻunó ko ha meʻa fakalielia ia kiate kimoutolu.

13 “‘Ko e ngaahi meʻamoʻui eni ʻoku puna ke mou fakaliliʻa aí; ʻoku ʻikai totonu ke kai he ʻoku fakalielia ia: Ko e ʻīkalé,+ ko e hoke tahí, ko e vulitua ʻuliʻulí,+ 14 ko e lofa kulokulá mo e faʻahinga kotoa ʻo e lofa ʻuliʻulí, 15 ko e faʻahinga kotoa ʻo e lēvení, 16 ko e ʻositalesí, ko e lulú, ko e talá, ko e faʻahinga kotoa ʻo e hoké,* 17 ko e lulu īkí, ko e komolaní,* ko e lulu telinga lōloá, 18 ko e suaní, ko e pelikaní, ko e vulituá, 19 ko e sitoaké, ko e faʻahinga kotoa pē ʻo e motukú, ko e hupó, pea mo e peká. 20 Ko e fanga kiʻi meʻamoʻui iiki kapakau kotoa pē ʻoku fakapupunga* ʻa ia ʻoku ʻalu veʻe-faá ko e meʻa fakalielia ia kiate kimoutolu.

21 “‘Mei he fanga kiʻi meʻamoʻui iiki kapakau ʻoku fakapupunga ʻa ia ʻoku ʻalu veʻe-faá, te mou kai pē ʻa e faʻahinga ko ia ʻoku toe ʻi ai honau ongo vaʻe ʻa ia ʻoku nau hopo ʻaki ʻi he kelekelé.* 22 Te mou kai mei he faʻahinga ko ení: Ko e faʻahinga kehekehe ʻo e heʻe lalahí, ko e faʻahinga kehe ʻo e fanga heʻe ʻoku kaí,+ kakalu, mo e fanga heʻe kehe. 23 Ko e fanga kiʻi meʻamoʻui iiki kapakau kehe kotoa pē ʻoku fakapupunga ʻa ia ʻoku veʻe-faá ko e meʻa fakalielia ia kiate kimoutolu. 24 ʻI he ngaahi meʻá ni te mou ʻai ai kimoutolu ke mou taʻemaʻa. Ko e tokotaha kotoa pē ʻoku ala ki honau sino kuo maté ʻe taʻemaʻa ia ʻo aʻu ki he efiafi.+ 25 Ko ha taha pē te ne toʻo ha taha ʻo honau ngaahi sino kuo maté ʻoku totonu ke ne fō hono ngaahi kofú;+ te ne taʻemaʻa ʻo aʻu ki he efiafi.

26 “‘Ko ha manu pē ʻoku mavaeua hono topuvaʻé ka ʻoku ʻikai mafahi pea ʻoku ʻikai kai fakahake ʻoku taʻemaʻa ia kiate kimoutolu. Ko e tokotaha kotoa pē ʻoku ala ki aí ʻe taʻemaʻa.+ 27 Ko e meʻamoʻui kotoa pē ʻoku ʻalu ʻaki hono ʻaofivaʻé ʻi he lotolotonga ʻo e ngaahi meʻamoʻui ʻoku ʻalu veʻe-faá ʻoku taʻemaʻa ia kiate kimoutolu. Ko e tokotaha kotoa pē ʻoku ala ki honau sino kuo maté ʻe taʻemaʻa ia ʻo aʻu ki he efiafi. 28 Ko e tokotaha ʻokú ne fua honau sino kuo maté ʻoku totonu ke ne fō hono ngaahi kofú,+ pea te ne taʻemaʻa ʻo aʻu ki he efiafi.+ ʻOku nau taʻemaʻa kiate kimoutolu.

29 “‘Ko e fanga kiʻi meʻamoʻui iiki fakapupunga eni ʻo e māmaní ʻoku taʻemaʻa kiate kimoutolú: Ko e kumā kelí, ko e kumaá,+ faʻahinga kotoa pē ʻo e mokó, 30 ʻa e ʻanaká, ko e koaká, ko e letaʻá, ko e kōmetá, pea mo e fōkaí. 31 Ko e fanga kiʻi meʻamoʻui iiki fakapupunga ko ení ʻoku taʻemaʻa ia kiate kimoutolu.+ Ko e tokotaha kotoa pē ʻoku ala ki honau sino kuo maté ʻe taʻemaʻa ia ʻo aʻu ki he efiafi.+

32 “‘Pea ko ha meʻa pē ʻoku nau tō ai ʻi heʻenau maté ʻe taʻemaʻa ia, pe ko ha meʻa ngaohi-kai papa, ko ha kofu, ko ha kiliʻimanu, pe ko ha konga tupenu fefeka. Ko ha meʻa ngaohi-kai pē ʻoku ngāueʻaki ʻoku totonu ke unu ia ʻi he vaí, pea ʻe taʻemaʻa ia ʻo aʻu ki he efiafí; pea ʻe toki maʻa leva ia. 33 Kapau te nau tō ʻi ha ʻaiʻanga meʻa ʻumea, te mou fahi ia, pea ko ha meʻa pē naʻe ʻi loto ai ʻe taʻemaʻa.+ 34 Ko ha faʻahinga meʻakai pē ʻe tau ki ai ha vai mei ha ʻaiʻanga meʻa pehē ʻe taʻemaʻa, pea ko ha huhuʻa pē ʻoku ala inu ʻi ha ʻaiʻanga meʻa pehē ʻe taʻemaʻa. 35 Ko ha meʻa pē ʻe tō ai honau sino kuo maté ʻe taʻemaʻa. Pe ko ha ʻōvani pe ko ha kiʻi sitou, ʻoku totonu ke laiki ia ke kongokonga. ʻOku nau taʻemaʻa, pea te nau taʻemaʻa ai pē kiate kimoutolu. 36 Kae kehe, kapau te nau tō ʻi ha vaitupu pe ko ha lepa ki he tānakiʻanga vaí, ʻe hokohoko atu pē ʻa e maʻa ʻa e ngaahi meʻá ni, ka ko ha taha pē ʻe ala ki honau sino kuo maté te ne taʻemaʻa. 37 Kapau ʻe tō honau sino kuo maté ʻi ha tengaʻi ʻakau ʻoku teu ke tūtuuʻi, ʻe maʻa ia. 38 Ka ʻo kapau ʻoku ʻai ha vai ki ha tengaʻi ʻakau pea tō ai ha konga ʻo honau sino kuo maté, ʻe taʻemaʻa ʻa e tengaʻi ʻakaú kiate kimoutolu.

39 “‘Pea kapau ʻe mate ha monumanu ʻoku mou ngāueʻaki ki he meʻakaí, ʻilonga ʻa ia ʻoku ala ki hono sino kuo maté ʻe taʻemaʻa ia ʻo aʻu ki he efiafi.+ 40 ʻIlonga ʻa ia te ne kai ha meʻa pē mei hono sino kuo maté ʻoku totonu ke ne fō hono ngaahi kofú, pea te ne taʻemaʻa ʻo aʻu ki he efiafi.+ ʻIlonga ʻa ia te ne fua hono sino kuo maté ʻoku totonu ke ne fō hono ngaahi kofú, pea te ne taʻemaʻa ʻo aʻu ki he efiafi. 41 Ko e fanga kiʻi meʻamoʻui iiki fakapupunga kotoa pē ʻo e māmaní ko ha meʻa fakalielia ia.+ Kuo pau ke ʻoua naʻa kai ia. 42 Kuo pau ke ʻoua naʻa mou kai ha meʻamoʻui pē ʻoku ngaolo ʻaki hono keté, ko ha meʻamoʻui pē ʻoku ʻalu veʻe-fā, pe ko ha taha pē ʻo e fanga kiʻi meʻamoʻui iiki fakapupunga ʻo e māmaní ʻoku lahi hono vaʻé, he ko ha meʻa fakalielia kinautolu.+ 43 ʻOua naʻa fakalieliaʻi kimoutolu ko e meʻa ʻi ha taha pē ʻo e fanga kiʻi meʻamoʻui iiki fakapupungá, pea ʻoua naʻa ʻuliʻi kimoutolu pea hoko ai ʻo taʻemaʻa ʻiate kinautolu.+ 44 He ko au Sihova ko homou ʻOtuá,+ pea kuo pau ke mou fakamāʻoniʻoniʻi kimoutolu pea mou hoko ʻo māʻoniʻoni,+ koeʻuhí he ʻoku ou māʻoniʻoni.+ Ko ia kuo pau ke ʻoua naʻa mou ʻai ke mou taʻemaʻa ʻi ha taha pē ʻo e fanga kiʻi meʻamoʻui iiki fakapupunga ʻoku ngaue ʻi he māmaní. 45 He ko au Sihova, ʻoku ou taki mai kimoutolu mei he fonua ko ʻIsipité ke u fakamoʻoniʻi ko e ʻOtua au kiate kimoutolu,+ pea kuo pau ke mou māʻoniʻoni+ koeʻuhí he ʻoku ou māʻoniʻoni.+

46 “‘Ko e lao eni fekauʻaki mo e fanga manú, ko e ngaahi meʻamoʻui ʻoku puná, ko e meʻamoʻui kotoa pē ʻoku ngaue ʻi he ngaahi vaí, pea ʻi he fekauʻaki mo e meʻamoʻui kotoa pē ʻoku ngaeve ʻi he māmaní, 47 koeʻuhí ke fakafaikehekeheʻi ʻa e taʻemaʻá mo e maʻá pea mo e ngaahi meʻamoʻui ʻoku lava ke kaí mo ia ʻe ʻikai lava ke kaí.’”+

12 Naʻe hoko atu ʻa Sihova ʻo ne folofola kia Mōsese: 2 “Tala ki he kau ʻIsilelí, ‘Kapau ʻe hoko ha fefine ʻo feitama* pea fanauʻi ha tamasiʻi, te ne taʻemaʻa ʻi he ʻaho ʻe fitu, ʻo hangē tofu pē ko e ngaahi ʻaho ʻo ʻene taʻemaʻa ʻi he taimi ʻo ʻene puke fakamāhiná.+ 3 ʻI he ʻaho hono valú, ko e kakano ʻo e muʻa kili ʻo e fakatangata ʻo e tamasiʻí ʻe kamu ia.+ 4 Te ne hokohoko atu ʻi hono fakamaʻa ia mei he totó ʻi he ʻaho ʻe 33 hono hokó. ʻOku ʻikai totonu ke ne ala ki ha meʻa pē ʻoku toputapu, pea ʻoku ʻikai totonu ke ne haʻu ki he potu toputapú kae ʻoua ke ne fakakakato ʻa e ngaahi ʻaho ʻo hono fakamaʻa iá.

5 “‘Kapau te ne fanauʻi ha taʻahine, te ne taʻemaʻa leva ai ʻi he ʻaho ʻe 14, ʻo hangē tofu pē ko ia ʻi he lolotonga ʻo ʻene puke fakamāhiná. Te ne hokohoko atu ʻi hono fakamaʻa ia mei he totó ʻi he ʻaho ʻe 66 hono hokó. 6 ʻI he taimi ʻe kakato ai ʻa e ngaahi ʻaho ʻo hono fakamaʻa ia ʻi ha foha pe ko ha ʻofefiné, te ne ʻomi ki he hūʻanga ʻo e tēniti feʻiloakiʻangá, ki he taulaʻeikí ha kiʻi sipi tangata ʻi hono ʻuluaki taʻú ki ha feilaulau tutu+ mo ha lupe mui pe ko ha foʻi kulukulu ki ha feilaulau angahala. 7 ʻE foaki ia ʻe he taulaʻeikí ʻi he ʻao ʻo Sihová pea fai ha feilaulau ʻufiʻufi angahala maʻana, pea te ne maʻa mei heʻene ʻau totó. Ko e lao eni fekauʻaki mo e fefine ʻa ia ʻokú ne fanauʻi ha tamasiʻi pe ko ha taʻahiné. 8 Ka ʻo kapau heʻikai lava ke ne maʻu ha paʻanga ke fakatau mai ʻaki ha sipi, kuo pau leva ke ne ʻave ha ongo foʻi kulukulu pe ko ha ongo lupe mui ʻe ua,+ ko e taha ki ha feilaulau tutu pea ko e taha ki ha feilaulau angahala, pea ʻe fai ʻe he taulaʻeikí ha feilaulau ʻufiʻufi angahala maʻana, pea te ne maʻa.’”

13 Naʻe hoko atu ʻa e folofola ʻa Sihova kia Mōsese mo ʻĒloné, ʻo pehē: 2 “Kapau ʻe ʻi ai ha tangata ʻe tupu ʻi hono kilí* ha pupula, ko ha mongumangu, pe ko ha ʻila pea ʻe malava ke hoko ko e mahaki ia ko e kilia*+ ʻi hono kilí, kuo pau leva ke ʻomi ia kia ʻĒlone ko e taulaʻeikí pe ki he taha ʻo hono ngaahi fohá, ʻa e kau taulaʻeikí.+ 3 Ko e taulaʻeikí te ne vakaiʻi ʻa e mahaki ʻi hono kilí. ʻI he maliu ʻo hinehina ʻa e fulufulu ʻi he konga ʻoku maʻu ʻe he mahakí pea ʻi heʻene ʻasi mai ʻa e mahakí ʻoku loloto ange ia ʻi he kilí, ko e mahaki ia ko e kiliá. ʻE vakaiʻi ia ʻe he taulaʻeikí pea fakahaaʻi ia ʻokú ne taʻemaʻa. 4 Ka ʻo kapau ko e ʻila ʻi hono kilí ʻoku hinehina pea ʻoku hā mai ʻoku ʻikai loloto ange ia ʻi he kilí pea kuo ʻikai ke maliu ʻo hinehina ʻa e fulufulú, ʻe fakamavaheʻi leva ʻe he taulaʻeikí ʻa e tokotaha mahakí ʻi he ʻaho ʻe fitu.+ 5 Ko e taulaʻeikí te ne vakaiʻi leva ia ʻi he ʻaho hono fitú, pea kapau ʻe hā mai kuo ngata ʻa e mahakí pea kuo ʻikai ke mafola ʻi he kilí, ʻe fakamavaheʻi ia ʻe he taulaʻeikí ʻi ha toe ʻaho ʻe fitu.

6 “ʻOku totonu ke toe vakaiʻi ia ʻe he taulaʻeikí ʻi he ʻaho hono fitú, pea kapau ko e mahakí kuo tamatemate hifo pea kuo ʻikai ke mafola ia ʻi he kilí, ko e taulaʻeikí te ne fakahaaʻi ia ʻokú ne maʻa;+ ko ha mongumangu pē ia. ʻE fō leva ʻe he tangatá ʻa hono ngaahi kofú peá ne hoko ai ʻo maʻa. 7 Ka ʻo kapau ko e mongumangú* kuo mafola moʻoni ia he kilí ʻi he hili ʻene hā ʻi he ʻao ʻo e taulaʻeikí ke fakahaaʻi ʻokú ne maʻá, te ne toe hā leva ʻi he ʻao ʻo e taulaʻeikí. 8 ʻE vakaiʻi ia ʻe he taulaʻeikí, pea kapau kuo mafola ʻa e mongumangú ʻi he kilí, ʻe fakahaaʻi leva ia ʻe he taulaʻeikí ʻokú ne taʻemaʻa. Ko e kiliá ia.+

9 “Kapau ʻe tupu ʻa e mahaki ko e kiliá ʻi ha tangata, kuo pau ke ʻomi leva ia ki he taulaʻeikí, 10 pea ko e taulaʻeikí te ne vakaiʻi ʻa e tangatá.+ Kapau ʻe ʻi ai ha pupula hinehina ʻi he kilí peá ne ʻai ke maliu ʻa e fulufulú ʻo hinehina pea ʻoku ʻi ai ha mataʻi lavea+ ʻi he pupulá, 11 ko e kilia fuoloa ia ʻi hono kilí, pea ko e taulaʻeikí te ne fakahaaʻi ia ʻokú ne taʻemaʻa. ʻOku ʻikai totonu ke ne fakamavaheʻi ia ki hano toe vakaiʻi,+ he ʻokú ne taʻemaʻa. 12 Fakatatau ki he meʻa ʻoku malava ke sio ki ai ʻa e taulaʻeikí, kapau leva ʻoku ʻasi mai ʻa e kiliá ʻi he kilí kotoa pea ʻoku ʻufiʻufi ʻe he kiliá ʻa e tokotaha mahakí mei he ʻulú ki he vaʻé, 13 pea kuo vakaiʻi ʻe he taulaʻeikí ʻa e tangatá peá ne sio kuo ʻufiʻufi ʻe he kiliá ʻa hono kilí kotoa, te ne fakahaaʻi leva kuo maʻa ʻa e tokotaha mahakí.* Kuo maliu kotoa ia ʻo hinehina, pea ʻokú ne maʻa. 14 Ka ʻi ha taimi pē ʻe hā ai ha mataʻi laveá, te ne taʻemaʻa. 15 ʻI he sio ʻa e taulaʻeikí ki he mataʻi laveá, te ne fakahaaʻi ia ʻokú ne taʻemaʻa.+ Ko e mataʻi laveá ʻoku taʻemaʻa. Ko e kilia ia.+ 16 Ka ʻo kapau ʻoku toe maliu ʻa e mataʻi laveá ʻo hinehina, te ne haʻu leva ki he taulaʻeikí. 17 Ko e taulaʻeikí te ne vakaiʻi ʻa e tangatá,+ pea kapau ko e mahakí kuo maliu ʻo hinehina, ʻe fakahaaʻi leva ʻe he taulaʻeikí ʻoku maʻa ʻa e tokotaha mahakí. ʻOkú ne maʻa.

18 “Kapau ʻe tupu ha hangatāmaki ʻi he kili ʻo ha taha pea moʻui, 19 ka kuo hā ʻi he tuʻuʻanga ʻo e hangatāmakí ha pupula hinehina pe ko ha ʻila hinehina meimei kulokula, kuo pau leva ke ne hā ʻi he ʻao ʻo e taulaʻeikí. 20 Ko e taulaʻeikí te ne vakaiʻi ia,+ pea kapau ʻoku hā mai ʻoku loloto ange ia ʻi he kilí pea ko e fulufulu ʻi aí kuo maliu ʻo hinehina, ʻe fakahaaʻi leva ia ʻe he taulaʻeikí ʻokú ne taʻemaʻa. Ko e mahaki ia ko e kiliá kuo ʻasi mai ʻi he hangatāmakí. 21 Ka ʻo kapau ʻe vakaiʻi ia ʻe he taulaʻeikí peá ne sio ʻoku ʻikai ha fulufulu hinehina ʻi ai pea ʻoku ʻikai ke loloto ange ia ʻi he kilí pea ʻoku hā mai ʻoku tamatemate hifo, ʻe fakamavaheʻi leva ia ʻe he taulaʻeikí ʻi he ʻaho ʻe fitu.+ 22 Pea kapau ʻoku hā mahino kuo mafola ia ʻi he kilí, ʻe fakahaaʻi leva ia ʻe he taulaʻeikí ʻokú ne taʻemaʻa. Ko ha mahaki ia. 23 Ka ʻo kapau ʻoku tuʻumaʻu ʻa e ʻilá ʻi he feituʻu pē ʻe taha pea kuo ʻikai ke mafola, ko ha fufula pē ia ʻi he hangatāmakí, pea ʻe fakahaaʻi ia ʻe he taulaʻeikí ʻokú ne maʻa.+

24 “Pe kapau ʻe ʻi ai ha vela ʻi ha taha mei he afí pea hoko ʻa e kakano ʻi he velá ko ha ʻila hinehina meimei kulokula pe ko ha ʻila hinehina, 25 ʻe vakaiʻi leva ia ʻe he taulaʻeikí. Kapau kuo maliu ʻa e fulufulu ʻi he ʻilá ʻo hinehina pea hā mai ʻoku loloto ange ia ʻi he kilí, ko e kilia ia kuo ʻasi mai ʻi he velá, pea ʻe fakahaaʻi ia ʻe he taulaʻeikí ʻokú ne taʻemaʻa. Ko e mahaki ia ko e kiliá. 26 Ka ʻo kapau ʻe vakaiʻi ia ʻe he taulaʻeikí peá ne sio ʻoku ʻikai ha fulufulu hinehina ʻi he ʻilá pea ʻoku ʻikai ke loloto ange ia ʻi he kilí pea kuo tamatemate hifo, ʻe fakamavaheʻi leva ia ʻe he taulaʻeikí ʻi he ʻaho ʻe fitu.+ 27 ʻE vakaiʻi ʻe he taulaʻeikí ʻa e tangatá ʻi he ʻaho hono fitú, pea kapau ʻoku hā mahino kuo mafola ia ʻi he kilí, ʻe fakahaaʻi leva ia ʻe he taulaʻeikí ʻokú ne taʻemaʻa. Ko e mahaki ia ko e kiliá. 28 Ka ʻo kapau ʻoku tuʻumaʻu ʻa e ʻilá ʻi he feituʻu pē ʻe taha pea kuo ʻikai ke mafola ʻi he kilí pea kuo tamatemate hifo ia, ko ha pupula pē ia ʻi he velá, pea ʻe fakahaaʻi ia ʻe he taulaʻeikí ʻokú ne maʻa, koeʻuhí ko ha fufula ia ʻi he velá.

29 “ʻI he taimi ʻe tupu ai ʻi ha tangata pe ko ha fefine ha mahaki ʻi he ʻulú pe ʻi he kumukumú, 30 ʻe vakaiʻi leva ʻe he taulaʻeikí ʻa e mahakí.+ Kapau ʻe hā ʻoku loloto ange ia ʻi he kilí pea ko e fulufulú ʻoku engeenga mo manifi, ʻe fakahaaʻi leva ʻe he taulaʻeikí ʻa e tokotaha ko iá ʻokú ne taʻemaʻa; ko ha mahaki ia ʻi he ngeʻesi-ʻulú pe ko e kavá. Ko e kilia ia ʻi he ʻulú pe ko e kumukumú. 31 Ka ʻo kapau ʻe sio ʻa e taulaʻeikí ko e mahakí ʻoku ʻikai hā ʻoku loloto ange ia ʻi he kilí pea ʻoku ʻikai ha fulufulu ʻuliʻuli ʻi ai, ʻoku totonu ke fakamavaheʻi ʻe he taulaʻeikí ʻa e tokotaha mahakí ʻi he ʻaho ʻe fitu.+ 32 ʻE vakaiʻi ʻe he taulaʻeikí ʻa e mahakí ʻi he ʻaho hono fitú, pea kapau kuo ʻikai ke mafola ʻa e konga kuo maʻu ʻe he mahakí pea kuo ʻikai ke tupu ha fulufulu engeenga ʻi ai pea ko e hā mai ʻa e konga naʻe maʻu ʻe he mahakí ʻoku ʻikai ke loloto ange ia ʻi he kilí, 33 ʻoku totonu leva ki he tokotahá ke ne tele, ka heʻikai te ne tele ʻa e konga kuo maʻu ʻe he mahakí. ʻE fakamavaheʻi leva ʻe he taulaʻeikí ʻa e tokotaha mahakí ʻi he ʻaho ʻe fitu.

34 “Ko e taulaʻeikí te ne toe vakaiʻi ʻa e konga kuo maʻu ʻe he mahakí ʻi he ʻaho hono fitú, pea kapau ko e mahaki ʻi he ngeʻesi-ʻulú mo e kavá kuo ʻikai ke mafola ʻi he kilí pea ʻoku ʻikai ke hā mai ʻoku loloto ange ia ʻi he kilí, kuo pau leva ke fakahaaʻi ia ʻe he taulaʻeikí ʻokú ne maʻa, pea ʻoku totonu ke ne fō hono ngaahi kofú peá ne hoko ai ʻo maʻa. 35 Ka ʻo kapau ʻoku hā mahino ʻoku mafola ʻa e mahakí ʻi he kilí ʻi he hili hono fakamaʻá, 36 ʻe vakaiʻi ʻe he taulaʻeikí ʻa e tangatá, pea kapau kuo mafola ʻa e mahakí ʻi he kilí, ʻoku ʻikai fiemaʻu ki he taulaʻeikí ke ne fakasio ha fulufulu engeenga; ʻoku taʻemaʻa ʻa e tokotaha ko iá. 37 Ka ʻo kapau ʻoku hā mei hono vakaiʻí kuo ʻikai mafola ʻa e mahakí pea kuo tupu ha fulufulu ʻuliʻuli ʻi ai, kuo moʻui ʻa e mahakí. ʻOkú ne maʻa, pea ʻe fakahaaʻi ia ʻe he taulaʻeikí ʻokú ne maʻa.+

38 “Kapau ʻe ʻi ai ha tangata pe ko ha fefine ʻe tupu ʻi hono kilí* ha ngaahi ʻila pea ko e ngaahi ʻilá ʻoku hinehina, 39 ʻe vakaiʻi ia+ ʻe he taulaʻeikí. Kapau ko e ngaahi ʻila ʻi he kilí ʻoku tamatemate hifo ʻene hinehiná, ko ha petepete ia ʻoku ʻikai fakatuʻutāmaki ʻa ia kuo ʻasi mai ʻi he kilí. Ko e tokotaha ko iá ʻokú ne maʻa.

40 “Kapau ʻe ngangana ʻa e fulufulu ʻo e ʻulu ʻo ha tangata peá ne hoko ʻo tula, ʻokú ne maʻa. 41 Kapau ʻe ngangana ʻa e fulufulu ʻi hono muʻa ʻulú pea hoko ʻo tula ai, ʻokú ne maʻa. 42 Ka ʻo kapau ʻe tupu ha pala hinehina meimei kulokula ʻi he konga ʻo hono ngeʻesi-ʻulú ʻa ia ʻoku tulá pe ko hono laʻé, ko e kilia ia ʻoku ʻasi mai ʻi hono ngeʻesi-ʻulú pe ko hono laʻé. 43 ʻE vakaiʻi ʻe he taulaʻeikí ʻa e tangatá, pea kapau ko e pupula ʻi he mahakí ʻoku hinehina meimei kulokula ʻi he feituʻu ʻoku tulá ʻi he tumuʻaki ʻo hono ʻulú pe ko hono laʻé pea ʻoku hā mai ʻo hangē ha kilia ʻi hono kilí, 44 ko ha tokotaha kilia ia. ʻOkú ne taʻemaʻa, pea ʻoku totonu ke fakahaaʻi ia ʻe he taulaʻeikí ʻokú ne taʻemaʻa koeʻuhí ko e mahaki ʻi hono ʻulú. 45 Ko e meʻa ki he tokotaha kilia ʻokú ne maʻu ʻa e mahakí, ʻoku totonu ke hae hono ngaahi kofú pea ʻoku totonu ke tuku ʻo ʻikai ngaahi ʻa hono ʻulú pea ʻoku totonu ke ne ʻufiʻufi ʻa e kiʻi kava ʻi ʻolunga ʻi hono loungutú peá ne kaila, ‘Taʻemaʻa, taʻemaʻa!’ 46 Te ne taʻemaʻa ʻi he taimi kotoa ʻokú ne maʻu ai ʻa e mahakí. Koeʻuhí ko ʻene taʻemaʻá, ʻoku totonu ai ke ne nofo mavahe. Ko hono nofoʻangá ʻe ʻi he tuʻa ʻapitangá ia.+

47 “Kapau ʻoku uesia ʻe he mahaki ko e kiliá ha kofu, pe ko ha kofu fulufuluʻisipi pe līneni, 48 pe ʻi he filo lalanga fakalōloa pe ko e filo lalanga fakamaaukupu ʻo e līnení pe ʻo e fulufuluʻisipí, pe ʻi ha kiliʻimanu pe ko ha meʻa pē kuo ngaohi mei he kiliʻimanú, 49 pea ko e meʻa kuo tau lanu mata meimei engeenga pe meimei kulokula mei he mahakí ʻokú ne uesia ʻa e kofú, ko ha kiliʻimanu, ko e filo lalanga fakalōloá, ko e filo lalanga fakamaaukupú, pe ko ha meʻa pē kuo ngaohi mei he kiliʻimanú, ko ha uesia ia mei he kiliá, pea ʻoku totonu ke fakahā ia ki he taulaʻeikí. 50 ʻE vakaiʻi ʻe he taulaʻeikí ʻa e mahakí, pea kuo pau ke ne fakamavaheʻi ʻa e mahakí ʻi he ʻaho ʻe fitu.+ 51 ʻI heʻene vakaiʻi ʻa e mahakí ʻi he ʻaho hono fitú peá ne sio ai kuo mafola ia ʻi he kofú, ʻi he filo lalanga fakalōloá, ko e filo lalanga fakamaaukupú, pe ʻi he kiliʻimanú (tatau ai pē pe ko e hā ʻa e meʻa ʻoku ngāueʻaki ki ai ʻa e kiliʻimanú), ko e mahakí ko e kilia fakatuʻutāmaki pea ʻoku taʻemaʻa.+ 52 ʻOku totonu ke ne tutu ʻa e kofú pe ko e filo lalanga fakalōloa pe ko e filo lalanga fakamaaukupu ʻi he fulufuluʻisipí pe ʻi he līnení pe ko ha meʻa pē kuo ngaohi mei he kiliʻimanú ʻa ia kuo tupu ai ʻa e mahakí, he ko ha kilia fakatuʻutāmaki ia. ʻOku totonu ke tutu ia ʻi he afí.

53 “Ka ʻo kapau ʻe vakaiʻi ia ʻe he taulaʻeikí pea kuo ʻikai ke mafola ʻa e mahakí ʻi he kofú pe ʻi he filo lalanga fakalōloá pe ko e filo lalanga fakamaaukupú pe ko ha meʻa pē kuo ngaohi mei he kiliʻimanú, 54 ʻe tuʻutuʻuni leva ʻe he taulaʻeikí ke fō ʻa e meʻa kuo uesiá, pea te ne fakamavaheʻi ia ʻi ha toe ʻaho ʻe fitu. 55 Ko e taulaʻeikí te ne vakaiʻi leva ʻa e meʻa kuo uesiá ʻi he hili hono fō fakaʻāulilikí. Kapau kuo ʻikai liliu ʻa e fōtunga ʻo e meʻa kuo uesiá, neongo kapau kuo ʻikai mafola ʻa e mahakí, ʻoku taʻemaʻa ia. ʻOku totonu ke ke tutu ia ʻi he afí koeʻuhí kuo keina ia, mei loto pe ʻi tuʻa.

56 “Ka ʻo kapau kuo vakaiʻi ia ʻe he taulaʻeikí pea ko e konga kuo uesiá ʻoku tamatemate hifo hili hono fō fakaʻāulilikí, te ne hae leva ia mei he kofú pe ko e kiliʻimanú pe ko e filo lalanga fakalōloá pe ko e filo lalanga fakamaaukupú. 57 Kae kehe, kapau ʻoku kei hā pē ia ʻi ha konga kehe ʻo e kofú pe ʻi he filo lalanga fakalōloá pe ʻi he filo lalanga fakamaaukupú pe ʻi ha meʻa pē kuo ngaohi mei he kiliʻimanú, kuo mafola ia, pea ʻoku totonu ke ke tutu ʻi he afí ha meʻa pē kuo uesia.+ 58 Ka ʻi he taimi ʻe puli ai ʻa e mahakí mei he kofú pe ko e filo lalanga fakalōloá pe ko e filo lalanga fakamaaukupú pe ko ha meʻa pē kuo ngaohi mei he kiliʻimanú ʻa ia kuó ke foó, ʻoku totonu leva ke toe fō tuʻo ua ia, pea ʻe maʻa ia.

59 “Ko e lao eni ʻo e mahaki ko e kiliá ʻi ha kofu fulufuluʻisipi pe līneni, pe ʻi he filo lalanga fakalōloá pe ʻi he filo lalanga fakamaaukupú, pe ʻi ha meʻa pē kuo ngaohi mei he kiliʻimanú, ke fakahaaʻi ai ia ʻoku maʻa pe taʻemaʻa.”

14 Naʻe hoko atu ʻa Sihova ʻo ne folofola kia Mōsese, ʻo pehē: 2 “Ko e lao eni ki he tokotaha kiliá ʻi he ʻaho ʻo hono fakahaaʻi ia ʻokú ne maʻá, ʻi he taimi ʻe ʻomi ai ia ki he taulaʻeikí.+ 3 ʻE ʻalu ʻa e taulaʻeikí ki he tuʻa ʻapitangá ʻo vakaiʻi ia. Kapau kuo moʻui ʻa e tokotaha kiliá mei he kiliá, 4 ʻe fekauʻi ia ʻe he taulaʻeikí ke ne ʻomai ʻa e ongo manupuna maʻa ʻoku moʻui, vaʻa sita, filo kula ʻahoʻaho, mo e ʻīsope ki hono fakamaʻa iá.+ 5 ʻE fekauʻi ʻe he taulaʻeikí ke tāmateʻi ʻa e foʻi manupuna ʻe taha ʻi ʻolunga ʻi ha ʻaiʻanga meʻa ʻumea ʻoku ʻi ai ha vai maʻa. 6 Ka ʻoku totonu ke ne toʻo ʻa e foʻi manupuna moʻuí fakataha mo e vaʻa sitá, ko e filo kula ʻahoʻahó, pea mo e ʻīsopé, ʻo unu fakataha kinautolu ʻi he toto ʻo e foʻi manupuna ko ē naʻe tāmateʻi ʻi ʻolunga ʻi he vai maʻá. 7 Te ne afuhi tuʻo fitu leva ia ʻi he tokotaha ʻoku fakamaʻa mei he kiliá pea fakahaaʻi ia ʻokú ne maʻa, pea te ne tuku ange ʻa e foʻi manupuna moʻuí ki he manafá.+

8 “Ko e tokotaha ʻoku fai hono fakamaʻá kuo pau ke ne fō hono ngaahi kofú pea tele kotoa hono fulufulú ʻo ne kaukau ʻi he vaí pea te ne maʻa. Hili iá, ʻe lava ke ne hū ki he loto ʻapitangá, ka te ne nofo ʻi tuʻa ʻi hono tēnití ʻi he ʻaho ʻe fitu. 9 ʻI he ʻaho hono fitú, ʻoku totonu ke ne tele ai ʻa e kotoa ʻo e fulufulu ʻi hono ʻulú mo hono kumukumú mo hono ongo kemó. Hili ʻene tele kotoa ʻa hono fulufulú, te ne fō ʻa hono ngaahi kofú peá ne kaukau ʻi he vaí, pea te ne maʻa.

10 “ʻI he ʻaho hono valú, te ne toʻo ai ha ongo kiʻi sipi tangata taʻemele, lami fefine taʻemele+ ʻe taha ʻi hono ʻuluaki taʻú, vahe hongofulu ʻe tolu ʻo ha efa* ʻo e mahoaʻa lelei kuo fio mo e lolo ko ha feilaulau meʻakai,+ mo e fua loka* ʻe taha ʻo e lolo;+ 11 pea ko e taulaʻeiki ʻokú ne fakahaaʻi ia ʻokú ne maʻá te ne ʻoatu ʻa e tangata ʻoku fai hono fakamaʻá, fakataha mo e ngaahi feilaulaú, ʻi he ʻao ʻo Sihová ʻi he hūʻanga ʻo e tēniti feʻiloakiʻangá. 12 Ko e taulaʻeikí te ne toʻo ʻa e kiʻi sipi tangata ʻe taha ʻo foaki ia ko ha feilaulau halaia+ fakataha mo e fua loka ʻo e loló, pea te ne hapai ia ki muʻa mo mui ko ha feilaulau hapai ʻi he ʻao ʻo Sihová.+ 13 Te ne tāmateʻi leva ʻa e kiʻi sipi tangatá ʻi he feituʻu ʻa ia ʻoku faʻa tāmateʻi+ ai ʻa e feilaulau angahalá mo e feilaulau tutú, ʻi ha potu toputapu, koeʻuhí, ʻi he hangē ko e feilaulau angahalá, ko e feilaulau halaiá ko e meʻa ia ʻa e taulaʻeikí.+ Ko ha meʻa mātuʻaki toputapu ia.+

14 “ʻE toʻo leva ʻe he taulaʻeikí ʻa e konga ʻo e toto ʻo e feilaulau halaiá, pea ʻe ʻai ia ʻe he taulaʻeikí ʻi he lauʻitelinga toʻomataʻu ʻo e tokotaha ʻoku fai hono fakamaʻá pea ʻi he motuʻa-tuhu ʻo hono nima toʻomataʻú pea ʻi he motuʻa-vaʻe ʻo hono vaʻe toʻomataʻú. 15 Pea ʻe toʻo ʻe he taulaʻeikí ʻa e konga ʻo e fua loka ʻo e loló+ ʻo lilingi ia ki hono ʻaofinima toʻohema ʻoʻoná. 16 ʻE unu leva ʻe he taulaʻeikí ʻa hono foʻi tuhu toʻomataʻú ʻi he lolo ʻa ia ʻoku ʻi hono ʻaofinima toʻohemá pea afuhi tuʻo fitu ʻaki hono foʻi tuhú ʻa e konga ʻo e loló ʻi he ʻao ʻo Sihová. 17 ʻE ʻai leva ʻe he taulaʻeikí ʻa e konga ʻo e lolo ʻoku toe ʻi hono ʻaofinimá ki he lauʻitelinga toʻomataʻu ʻo e tokotaha ʻoku fai hono fakamaʻá pea ʻi he motuʻa-tuhu ʻo hono nima toʻomataʻú pea ʻi he motuʻa-vaʻe ʻo hono vaʻe toʻomataʻú ʻi ʻolunga ʻi he toto ʻo e feilaulau halaiá. 18 Ko e taulaʻeikí te ne ʻai ʻa e meʻa ʻoku toe mei he lolo ʻi hono ʻaofinimá ki he ʻulu ʻo e tokotaha ʻoku fai hono fakamaʻá, pea ʻe fai ai ʻe he taulaʻeikí ha ʻufiʻufi angahala maʻá e tokotahá ʻi he ʻao ʻo Sihová.+

19 “ʻE fai ʻe he taulaʻeikí ha feilaulau angahala+ ke ʻufiʻufi ai ʻa e angahala ʻa e tokotaha ʻokú ne fakamaʻa ia mei heʻene taʻemaʻá, pea ʻi he hili iá, te ne tāmateʻi leva ʻa e feilaulau tutú. 20 Pea ʻe ʻoatu ʻe he taulaʻeikí ʻa e feilaulau tutú mo e feilaulau meʻakaí+ ʻi he funga ʻōlitá, ʻo fai ai ʻe he taulaʻeikí ha feilaulau ʻufiʻufi angahala maʻá e tokotahá,+ pea te ne maʻa.+

21 “Kae kehe, kapau ʻokú ne masiva pea ʻoku ʻikai te ne maʻu ha meʻa feʻunga, te ne toʻo leva ʻa e kiʻi sipi tangata ʻe taha ko ha feilaulau halaia ko ha feilaulau hapai ia, koeʻuhi ke fai ha feilaulau ʻufiʻufi angahala maʻana, fakataha mo e vahe hongofulu ʻe taha ʻo ha efa* ʻo e mahoaʻa lelei kuo fio mo e loló ko ha feilaulau meʻakai, ko ha fua loka ʻo e loló, 22 mo ha ongo foʻi kulukulu pe ko ha ongo lupe mui ʻe ua, ʻo fakatatau ki he meʻa ʻokú ne maʻú. ʻE ngāueʻaki ʻa e taha ki ha feilaulau angahala, pea ko e taha ki ha feilaulau tutu.+ 23 ʻI he ʻaho hono valú,+ te ne ʻomai ia ki he taulaʻeikí ki hono fakahaaʻi ia ʻokú ne maʻá ʻi he hūʻanga ʻo e tēniti feʻiloakiʻangá ʻi he ʻao ʻo Sihová.+

24 “Ko e taulaʻeikí te ne toʻo ʻa e kiʻi sipi tangata ʻo e feilaulau halaiá+ mo e fua loka ʻo e loló, pea ʻe hapai ia ʻe he taulaʻeikí ki muʻa mo mui ko ha feilaulau hapai ʻi he ʻao ʻo Sihová.+ 25 Te ne tāmateʻi leva ʻa e kiʻi sipi tangata ʻo e feilaulau halaiá, pea ʻe toʻo ʻe he taulaʻeikí ʻa e konga ʻo e toto ʻo e feilaulau halaiá ʻo ʻai ia ʻi he lauʻitelinga toʻomataʻu ʻo e tokotaha ʻoku fai hono fakamaʻá pea ʻi he motuʻa-tuhu ʻo hono nima toʻomataʻú pea ʻi he motuʻa-vaʻe ʻo hono vaʻe toʻomataʻú.+ 26 Ko e taulaʻeikí te ne lilingi ʻa e konga ʻo e loló ki hono ʻaofinima toʻohema ʻoʻoná,+ 27 pea te ne afuhi tuʻo fitu leva ʻaki hono foʻi tuhu toʻomataʻú ʻa e konga ʻo e lolo ʻa ia ʻoku ʻi hono ʻaofinima toʻohemá ʻi he ʻao ʻo Sihová. 28 Pea ʻe ʻai ʻe he taulaʻeikí ʻa e konga ʻo e lolo ʻa ia ʻoku ʻi hono ʻaofinimá ki he lauʻitelinga toʻomataʻu ʻo e tokotaha ʻoku fai hono fakamaʻá pea ʻi he motuʻa-tuhu ʻo hono nima toʻomataʻú pea ʻi he motuʻa-vaʻe ʻo hono vaʻe toʻomataʻú ʻi he ngaahi feituʻu tatau naʻá ne ʻai ki ai ʻa e toto ʻo e feilaulau halaiá. 29 ʻE ʻai leva ʻe he taulaʻeikí ʻa e meʻa ʻoku toe mei he lolo ʻi hono ʻaofinimá ki he ʻulu ʻo e tokotaha ʻoku fai hono fakamaʻá, koeʻuhí ke fai ai ha ʻufiʻufi angahala maʻana ʻi he ʻao ʻo Sihová.

30 “Te ne foaki ʻa e taha ʻo e ongo foʻi kulukulú pe ko e taha ʻo e ongo lupe muí ʻo fakatatau ki he meʻa ʻokú ne maʻú,+ 31 ʻa e taha ʻoku lava ke ne maʻú ko ha feilaulau angahala pea ko e taha ko ha feilaulau tutu+ fakataha mo e feilaulau meʻakaí; pea ʻe fai ʻe he taulaʻeikí ha feilaulau ʻufiʻufi angahala maʻá e tokotaha ʻoku fai hono fakamaʻá ʻi he ʻao ʻo Sihová.+

32 “Ko e lao eni ki he tokotaha ʻa ia naʻe maʻu ʻe he mahaki ko e kiliá ka ʻoku ʻikai te ne maʻu ʻa e meʻa ʻoku fiemaʻu ʻi he taimi ʻo hono fakahaaʻi ia ʻokú ne maʻá.”

33 Naʻe folofola leva ʻa Sihova kia Mōsese mo ʻĒlone: 34 “ʻI hoʻomou hū ki he fonua ko Kēnaní,+ ʻa ia ʻoku ou foaki kiate kimoutolu ko ha tofiʻá,+ peá u taaʻi ha fale ʻi homou fonuá ʻaki ʻa e mahaki ko e kiliá,+ 35 ko e tokotaha ʻoku ʻoʻona ʻa e falé ʻoku totonu leva ke ne haʻu ʻo tala ki he taulaʻeikí, ‘Kuo hā ha meʻa hangē ko ha mahakí ʻi hoku falé.’ 36 Ko e taulaʻeikí te ne fai ha ngaahi tuʻutuʻuni ke fetuku ki tuʻa ʻa e meʻa kotoa ʻi he falé ki muʻa ke ne haʻu ʻo vakaiʻi ʻa e mahakí, koeʻuhí ke ʻoua naʻá ne fakahaaʻi ko e meʻa kotoa pē ʻoku ʻi he falé ʻoku taʻemaʻa; pea ʻi he hili iá, ʻe hū ki loto ʻa e taulaʻeikí ke sivi ʻa e falé. 37 Te ne vakaiʻi ʻa e feituʻu ʻoku uesiá, pea kapau ko e ngaahi holisi ʻo e falé ʻoku uesia ʻe ha ngaahi taluo lanu mata meimei engeenga pe lanu meimei kulokula pea ʻoku hā mai ʻoku ʻalu ia ki loto ʻi he holisí, 38 ʻe hū leva ki tuʻa ʻa e taulaʻeikí mei he falé pea tāpuni ʻa e falé ʻi he ʻaho ʻe fitu.+

39 “ʻE toe foki mai leva ʻa e taulaʻeikí ʻi he ʻaho hono fitú ʻo fai hano sivi. Kapau ko e mahakí kuo mafola ia ʻi he ngaahi holisi ʻo e falé, 40 ʻe fai leva ʻe he taulaʻeikí ha ngaahi tuʻutuʻuni, pea ko e ngaahi maka kuo uesiá kuo pau ke taʻaki ia ʻo lī ki he tuʻa koló ki ha feituʻu ʻoku taʻemaʻa. 41 Te ne ʻai leva ke vau fakaʻāuliliki ʻa e loto falé, pea ko e ʻumea ʻa ia ʻoku toʻó ʻoku totonu ke laku ia ki he tuʻa koló ki ha feituʻu ʻoku taʻemaʻa. 42 Te nau fakahū leva ʻa e ngaahi maka kehe ʻo fetongiʻaki ʻa e ngaahi maka naʻa nau toʻó, pea ʻoku totonu ke ne ngāueʻaki ha ʻumea kehe pea ʻai ke palasitā ʻa e falé.

43 “Kae kehe, kapau ʻe foki mai ʻa e mahakí ʻo ʻasi mai ʻi he falé hili hono taʻaki ʻa e ngaahi maká pea vau mo toe palasitā ʻa e falé, 44 ʻe hū leva ki loto ʻa e taulaʻeikí ʻo sivi ia. Kapau kuo mafola ʻa e mahakí ʻi he falé, ko e kilia fakatuʻutāmaki+ ia ʻi he falé. ʻOku taʻemaʻa ʻa e falé. 45 Te ne ʻai leva ke holoki ʻa e falé—ko hono ngaahi maká, ko hono ngaahi papá, pea mo e ʻumea kotoa ʻo e falé—pea fetuku ia ki he tuʻa koló ki ha feituʻu ʻoku taʻemaʻa.+ 46 Kae ʻilonga ʻa ia ʻe hū ki he falé ʻi he taha ʻo e ngaahi ʻaho ʻoku tāpuni aí+ te ne taʻemaʻa ʻo aʻu ki he efiafi;+ 47 pea ʻilonga ʻa ia ʻe tokoto ʻi he falé ʻoku totonu ke ne fō hono ngaahi kofú, pea ʻilonga ʻa ia ʻe kai ʻi he falé ʻoku totonu ke ne fō hono ngaahi kofú.

48 “Kae kehe, kapau ʻe haʻu ʻa e taulaʻeikí ʻo ne sio kuo ʻikai mafola ʻa e mahakí ʻi he falé hili hono toe palasitā ʻa e falé, ʻe fakahaaʻi leva ʻe he taulaʻeikí ʻoku maʻa ʻa e falé, koeʻuhí he kuo puli ʻa e mahakí. 49 Koeʻuhi ke fakamaʻa ʻa e falé mei he taʻemaʻá,* te ne toʻo ha ongo foʻi manupuna, ko e vaʻa sita, filo kula ʻahoʻaho, pea mo e ʻīsope.+ 50 Te ne tāmateʻi ʻa e foʻi manupuna ʻe taha ʻi ʻolunga ʻi ha ʻaiʻanga meʻa ʻumea ʻa ia ʻoku ʻi ai ʻa e vai maʻá. 51 Te ne toʻo leva ʻa e vaʻa sitá, ko e ʻīsopé, ko e filo kula ʻahoʻahó, mo e foʻi manupuna moʻuí ʻo unu kinautolu ʻi he toto ʻo e foʻi manupuna naʻe tāmateʻí pea ʻi he vai maʻá, pea kuo pau ke ne afuhi ia ki he falé ʻo tuʻo fitu.+ 52 Pea te ne fakamaʻa ʻa e falé mei he tuʻunga taʻemaʻá* ʻaki ʻa e toto ʻo e foʻi manupuná, ko e vai maʻá, ko e foʻi manupuna moʻuí, ko e vaʻa sitá, ko e ʻīsopé, pea mo e filo kula ʻahoʻahó. 53 Te ne tuku ange atu leva ʻa e foʻi manupuna moʻuí ʻi he tuʻa koló ki he manafá. Ko ia te ne toʻo ai ʻa e taʻemaʻá mei he falé pea ʻe maʻa ia.

54 “Ko e lao eni ʻo fekauʻaki mo ha faʻahinga tuʻunga pē ʻo e kiliá, mahaki ʻi he ngeʻesi-ʻulú pe ko e kavá,+ 55 kilia ʻa e kofú+ pe ko e falé,+ 56 pea ʻi he fekauʻaki mo e ngaahi pupulá, ngaahi mongumangú, mo e ngaahi ʻilá,+ 57 koeʻuhi ke fakapapauʻi ai ʻa e taimi ʻoku taʻemaʻa ai ha meʻa mo e taimi ʻoku maʻa ai ha meʻa.+ Ko e lao eni ʻi he fekauʻaki mo e kiliá.”+

15 Naʻe hoko atu ʻa Sihova ʻo ne folofola kia Mōsese mo ʻĒlone, ʻo pehē: 2 “Lea ki he kau ʻIsilelí ʻo tala kiate kinautolu, ‘Kapau ʻoku ʻau ha tangata mei hono fakatangatá,* ʻoku ʻai ia ʻe he ʻau ko ení ke ne taʻemaʻa.+ 3 ʻOkú ne taʻemaʻa mei he ʻaú, tatau ai pē pe ʻoku hokohoko atu ʻa e tafe ʻa e ʻaú mei hono fakatangatá pe ʻoku kiʻi mapuni, ʻokú ne kei taʻemaʻa pē.

4 “‘Ko ha mohenga pē ʻoku tokoto ai ʻa e tokotaha ʻoku ʻaú ʻe taʻemaʻa ia, pea ko ha meʻa pē ʻokú ne tangutu ai ʻe taʻemaʻa. 5 Ko ha tangata ʻe pā ki hono mohengá kuo pau ke ne fō hono ngaahi kofú, pea ʻoku totonu ke ne kaukau ʻi ha vai pea te ne taʻemaʻa ʻo aʻu ki he efiafi.+ 6 ʻIlonga ha taha ʻoku tangutu ʻi ha meʻa naʻe tangutu ai ʻa e tokotaha ʻoku ʻaú ʻoku totonu ke ne fō hono ngaahi kofú, kaukau ʻi ha vai, pea te ne taʻemaʻa ʻo aʻu ki he efiafi. 7 ʻIlonga ha taha ʻe pā ki he kakano ʻo e tokotaha ʻoku ʻaú ʻoku totonu ke ne fō hono ngaahi kofú, kaukau ʻi ha vai, pea te ne taʻemaʻa ʻo aʻu ki he efiafi. 8 Kapau ʻe ʻaʻanu ʻa e tokotaha ʻoku ʻaú ki ha tokotaha ʻoku maʻa, kuo pau ki he tokotaha ko iá ke ne fō hono ngaahi kofú, kaukau ʻi ha vai, pea te ne taʻemaʻa ʻo aʻu ki he efiafi. 9 Ko ha nofoʻa pē ʻoku heka ai ʻa e tokotaha ʻoku ʻaú ʻe taʻemaʻa ia. 10 ʻIlonga ha taha ʻe pā ki ha meʻa pē naʻe ʻi lalo ʻiate ia ʻe taʻemaʻa ia ʻo aʻu ki he efiafi, pea ʻilonga ha taha ʻokú ne fua ʻa e ngaahi meʻa ko iá te ne fō hono ngaahi kofú, kaukau ʻi ha vai, pea te ne taʻemaʻa ʻo aʻu ki he efiafi. 11 Kapau kuo ʻikai ke fanofano ʻe he tokotaha ʻoku ʻaú+ hono nimá ʻi ha vai pea ʻokú ne pā ki ha taha, kuo pau leva ki he tokotaha ko iá ke ne fō hono ngaahi kofú, kaukau ʻi ha vai, pea te ne taʻemaʻa ʻo aʻu ki he efiafi. 12 Ko ha ʻaiʻanga meʻa ʻumea ʻoku pā ki ai ʻa e tokotaha ʻoku ʻaú ʻoku totonu ke fahi ia, pea ko ha ʻaiʻanga meʻa ʻakau pē ʻoku totonu ke fufulu ʻaki ia ʻa e vai.+

13 “‘ʻI he tuʻu ʻa e ʻaú pea hoko ʻa e tokotahá ʻo maʻa mei aí, te ne lau leva ha ʻaho ʻe fitu ki hono fakamaʻá, pea kuo pau ke ne fō hono ngaahi kofú, kaukau ʻi ha vai maʻa, pea te ne hoko ai ʻo maʻa.+ 14 ʻI he ʻaho hono valú, ʻoku totonu ke ne toʻo ai ha ongo foʻi kulukulu pe ko ha ongo lupe mui ʻe ua+ pea haʻu ki he ʻao ʻo Sihová ki he hūʻanga ʻo e tēniti feʻiloakiʻangá ʻo ʻoatu kinaua ki he taulaʻeikí. 15 Pea ʻe feilaulauʻaki kinaua ʻe he taulaʻeikí, ko e taha ko ha feilaulau angahala pea ko e taha ko ha feilaulau tutu, pea ʻe fai ʻe he taulaʻeikí ha feilaulau ʻufiʻufi angahala maʻana ʻi he ʻao ʻo Sihová ʻi he fekauʻaki mo ʻene ʻaú.

16 “‘Pea ka ʻi ai ha tangata ʻe mahua mai ki tuʻa meiate ia hono huhuʻá, ʻoku totonu ke ne kaukauʻi hono sinó kotoa ʻi ha vai pea te ne taʻemaʻa ʻo aʻu ki he efiafi.+ 17 Kuo pau ke ne fō ʻaki ha vai ha kofu pē mo ha meʻa kiliʻimanu pē ʻoku papani ai ʻa e huhuʻá, pea ʻe taʻemaʻa ʻa e meʻa ko iá ʻo aʻu ki he efiafi.

18 “‘ʻI he mohe* ha tangata mo ha fefine pea mahua mai meiate ia hono huhuʻá, ʻoku totonu ke na kaukau ʻi ha vai pea te na taʻemaʻa ʻo aʻu ki he efiafi.+

19 “‘Kapau ʻoku ʻau toto ha fefine mei hono sinó, ʻe hokohoko atu ʻene taʻemaʻa ʻi heʻene puke fakamāhiná ʻi he ʻaho ʻe fitu.+ ʻIlonga ha taha ʻe pā kiate ia te ne taʻemaʻa ʻo aʻu ki he efiafi.+ 20 Ko ha meʻa pē ʻokú ne tokoto ai lolotonga ʻene taʻemaʻa ʻi heʻene puke fakamāhiná ʻe taʻemaʻa ia, pea ko e meʻa kotoa pē ʻokú ne tangutu aí ʻe taʻemaʻa.+ 21 ʻIlonga ha taha ʻe pā ki hono mohengá ʻoku totonu ke ne fō hono ngaahi kofú, kaukau ʻi ha vai, pea te ne taʻemaʻa ʻo aʻu ki he efiafi. 22 ʻIlonga ha taha ʻe pā ki ha meʻa pē naʻá ne tangutu ai ʻoku totonu ke ne fō hono ngaahi kofú, kaukau ʻi ha vai, pea te ne taʻemaʻa ʻo aʻu ki he efiafi. 23 Kapau ʻe pā ha taha ki he mohenga pe ko ha meʻa kehe pē naʻá ne tangutu ai, te ne taʻemaʻa ʻo aʻu ki he efiafi.+ 24 Pea ka ʻi ai ha tangata ʻe mohe mo ia pea tau ʻiate ia ʻa e taʻemaʻa ʻo ʻene puke fakamāhiná,+ te ne taʻemaʻa leva ʻi he ʻaho ʻe fitu, pea ko ha mohenga pē te ne tokoto ai ʻe taʻemaʻa.

25 “‘Ka ʻi ai ha fefine ʻokú ne ʻau toto ʻi ha ngaahi ʻaho lahi+ ka ʻoku ʻikai ko e taimi pau ia ʻo ʻene puke fakamāhiná,+ pe kapau te ne ʻau ʻo fuoloa ange ia ʻi heʻene puke fakamāhina anga-mahení, te ne taʻemaʻa he lolotonga ʻo e ngaahi ʻaho kotoa ʻo ʻene ʻaú, hangē pē ko ia ʻi he ngaahi ʻaho ʻo ʻene taʻemaʻa ʻi heʻene puke fakamāhiná. 26 Ko ha mohenga pē te ne tokoto ai ʻi he lolotonga ʻa e ngaahi ʻaho ʻo ʻene ʻaú ʻe hangē pē ia ko e mohenga ʻi heʻene taʻemaʻa ʻi heʻene puke fakamāhiná,+ pea ko ha meʻa pē te ne tangutu ai ʻe hoko ia ʻo taʻemaʻa hangē ko ʻene taʻemaʻa ʻi heʻene puke fakamāhiná. 27 ʻIlonga ha taha ʻe pā ki he ngaahi meʻa ko iá te ne taʻemaʻa, pea kuo pau ke ne fō hono ngaahi kofú, kaukau ʻi ha vai, pea te ne taʻemaʻa ʻo aʻu ki he efiafi.+

28 “‘Kae kehe, ʻi heʻene maʻa mei heʻene ʻaú, te ne lau maʻana ha ʻaho ʻe fitu, pea ʻi he hili iá te ne maʻa.+ 29 ʻI he ʻaho hono valú, ʻoku totonu ke ne toʻo ai ha ongo foʻi kulukulu pe ko ha ongo lupe mui ʻe ua,+ pea te ne ʻomi kinaua ki he taulaʻeikí ki he hūʻanga ʻo e tēniti feʻiloakiʻangá.+ 30 ʻE ʻai ʻe he taulaʻeikí ʻa e taha ko ha feilaulau angahala pea ko e taha ko ha feilaulau tutu, pea ʻe fai ʻe he taulaʻeikí ha feilaulau ʻufiʻufi angahala maʻana ʻi he ʻao ʻo Sihová ʻi he fekauʻaki mo ʻene taʻemaʻa ʻi heʻene ʻaú.+

31 “‘Kuo pau ke peheni hoʻomo tauhi ʻa e kau ʻIsilelí ke nau mavahe mei heʻenau taʻemaʻá, koeʻuhi ke ʻoua naʻa nau mate ʻi heʻenau taʻemaʻa ʻi hono ʻuliʻi hoku tāpanekalé, ʻa ia ʻoku ʻi honau lotolotongá.+

32 “‘Ko e lao ʻeni fekauʻaki mo e tangata ʻoku ʻaú, ko e tangata ʻa ia ʻoku taʻemaʻa koeʻuhi ko ha mahua mai ki tuʻa meiate ia hono huhuʻá,+ 33 ko e fefiné he lolotonga ʻene taʻemaʻa ʻi heʻene puke fakamāhiná,+ ko ha tangata pe ko ha fefine pē ʻokú ne ʻau mei hono sinó,+ pea mo ha tangata ʻokú ne mohe mo ha fefine taʻemaʻa.’”

16 Naʻe folofola ʻa Sihova kia Mōsese ʻi he hili ʻa e mate ʻa e ongo foha ʻo ʻĒloné ʻa ia naʻá na mate ʻi heʻena fakaofiofi kia Sihová.+ 2 Naʻe pehē ʻe Sihova kia Mōsese: “Tala kia ʻĒlone ko ho tokouá ke ʻoua te ne hū ʻi ha faʻahinga taimi pē ki he potu toputapu+ ʻi he loto puipuí,+ ki muʻa ʻi he tāpuni ʻoku ʻi he funga ʻAʻaké, koeʻuhí ke ʻoua naʻá ne mate,+ he te u hā ʻi ha ʻao+ ʻi ʻolunga ʻi he tāpuní.+

3 “Ko e meʻa eni ʻoku totonu ke ʻomi ʻe ʻĒlone ʻi heʻene hū ki he potu toputapú: Ko ha kiʻi pulu tangata ki ha feilaulau angahala+ pea mo ha sipi tangata ki ha feilaulau tutu.+ 4 ʻOku totonu ke ne tui ʻa e kofu līneni tōtōlofa toputapú,+ pea ʻoku totonu ke ʻufiʻufi ʻe he talausese mutu*+ līnení ʻa hono sinó, pea ʻoku totonu ke ne takai ʻiate ia ʻa e noʻo līnení+ pea mo ʻai ʻa e faʻufaʻu makehe līnení+ ʻi hono ʻulú. Ko ha ngaahi teunga toputapu ia.+ Te ne kaukau ʻi ha vai+ pea tui ia.

5 “ʻOku totonu ke ne toʻo mei he fuʻu fakataha ʻa e kau ʻIsilelí+ ha ongo kiʻi kosi tangata ki ha feilaulau angahala pea mo ha sipi tangata ʻe taha ki ha feilaulau tutu.

6 “Kuo pau leva ke ʻoatu ʻe ʻĒlone ʻa e pulu tangata ʻo e feilaulau angahalá, ʻa ia ʻoku maʻaná, pea te ne fai ha feilaulau ʻufiʻufi angahala maʻana+ pea mo hono falé.

7 “Te ne ʻave leva ʻa e ongo kosí pea ʻai ke na tuʻu ʻi he ʻao ʻo Sihová ʻi he hūʻanga ʻo e tēniti feʻiloakiʻangá. 8 ʻE fai ʻe ʻĒlone ha lulu ki he ongo kosí, ko e taha kia Sihova pea ko e taha ki he ʻAsaselí.* 9 ʻE ʻoatu ʻe ʻĒlone ʻa e kosi naʻe vaheʻi kia Sihova fakafou ʻi he lulú+ pea ʻai ia ko ha feilaulau angahala. 10 Ka ko e kosi naʻe vaheʻi ki he ʻAsaselí fakafou ʻi he lulú ʻoku totonu ke ʻomi moʻui ia ke tuʻu ʻi he ʻao ʻo Sihová koeʻuhí ke fai ai ʻa e ʻufiʻufi angahalá, kae fekauʻi atu ia ki he ʻAsaselí ki he toafá.+

11 “ʻE ʻoatu ʻe ʻĒlone ʻa e pulu ʻo e feilaulau angahala, ʻa ia ʻoku maʻaná, pea fai ha feilaulau ʻufiʻufi angahala maʻana pea mo hono falé; ʻi he hili iá, te ne tāmateʻi ʻa e pulu ʻo e feilaulau angahala, ʻa ia ʻoku maʻaná.+

12 “Te ne toʻo leva ʻa e ʻaiʻanga afi+ ʻoku fonu ʻi he malalaʻi afi uloulo mei he ʻōlitá+ ʻi he ʻao ʻo Sihová mo e falukunga ʻe ua ʻo e ʻinisēnisi momo iiki namu-kakala,+ pea te ne ʻomi ia ki he loto puipuí.+ 13 Te ne ʻai foki ʻa e ʻinisēnisí ki he afí ʻi he ʻao ʻo Sihová,+ pea ko e kohu ʻo e ʻinisēnisí te ne kāpui ʻa e tāpuni ʻo e ʻAʻaké,+ ʻa ia ʻoku ʻi he Fakamoʻoní,+ koeʻuhí ke ʻoua naʻá ne mate.

14 “Te ne toʻo ʻa e konga ʻo e toto ʻo e pulú+ peá ne afuhi ia ʻaki hono tuhú ʻi muʻa ʻi he tāpuní ʻi he tafaʻaki fakahahaké, pea te ne afuhi tuʻo fitu ʻaki hono tuhú ha konga ʻo e totó ʻi muʻa ʻi he tāpuní.+

15 “Te ne tāmateʻi leva ʻa e kosi ʻo e feilaulau angahalá, ʻa ia ʻoku maʻá e kakaí,+ pea ʻomi ʻa hono totó ki he loto puipuí+ ʻo fai ki hono totó+ ʻa e meʻa tatau mo ia naʻá ne fai ki he toto ʻo e pulú; te ne afuhi ia ki he tāpuní pea ʻi muʻa ʻi he tāpuní.

16 “Kuo pau ke ne fai ha feilaulau ʻufiʻufi angahala koeʻuhi ko e potu toputapú ʻi he fekauʻaki mo e ngaahi tōʻonga taʻemaʻa ʻa e kau ʻIsilelí pea fekauʻaki mo ʻenau ngaahi laka halá mo ʻenau ngaahi angahalá,+ pea ko e meʻa ia ʻoku totonu ke ne fai ki he tēniti feʻiloakiʻangá, ʻa ia ʻoku tuʻu ʻi honau haʻohaʻongá ʻi he uhouhonga ʻo ʻenau ngaahi tōʻonga taʻemaʻá.

17 “ʻOku ʻikai totonu ki ha tangata kehe ke ne ʻi he tēniti feʻiloakiʻangá mei he taimi te ne hū ai ki loto ke fai ha feilaulau ʻufiʻufi angahala ʻi he potu toputapú kae ʻoua ke ne hū ki tuʻa. Te ne fai ha feilaulau ʻufiʻufi angahala maʻana pea mo hono falé+ pea maʻá e fakatahaʻanga fakakātoa ʻo ʻIsilelí.+

18 “Te ne hū leva ki tuʻa ki he ʻōlitá,+ ʻa ia ʻoku ʻi he ʻao ʻo Sihová, pea fai ha feilaulau ʻufiʻufi angahala koeʻuhi ko ia, pea te ne toʻo ʻa e konga ʻo e toto ʻo e pulú mo e konga ʻo e toto ʻo e kosí pea ʻai ia ki he ngaahi meʻatui ʻo e ʻōlitá ʻi he ngaahi tafaʻakí kotoa. 19 Te ne afuhi tuʻo fitu foki ʻi ai ʻa e konga ʻo e totó ʻaki hono tuhú pea fakamaʻa ia mo fakatoputapuʻi ia mei he ngaahi tōʻonga taʻemaʻa ʻa e kau ʻIsilelí.

20 “ʻI he ʻosi ʻene fai ʻa e feilaulau ʻufiʻufi angahala+ koeʻuhi ko e potu toputapú mo e tēniti feʻiloakiʻangá pea mo e ʻōlitá,+ te ne ʻoatu foki ʻa e kosi moʻuí.+ 21 ʻE hilifaki ʻe ʻĒlone hono ongo nimá fakatouʻosi ʻi he ʻulu ʻo e kosi moʻuí peá ne vete ai ʻa e ngaahi faihala kotoa ʻa e kau ʻIsilelí, mo ʻenau laka halá kotoa pea mo ʻenau ngaahi angahalá kotoa, pea te ne hilifaki ia ʻi he ʻulu ʻo e kosí+ pea fekauʻi atu ia ki he toafá ʻi he nima ʻo ha tangata kuo vaheʻi ke ne fai eni.* 22 ʻE fua ʻe he kosí ʻiate ia ʻa ʻenau ngaahi faihalá kotoa+ ki ha fonua toafa,+ pea te ne fekauʻi atu ʻa e kosí ki he toafá.+

23 “ʻE hū leva ʻa ʻĒlone ki he tēniti feʻiloakiʻangá ʻo ne vete ʻa e ngaahi teunga līneni naʻá ne tui ʻi he taimi naʻá ne hū ai ki he potu toputapú, pea te ne tuku ia ai. 24 Kuo pau ke ne kaukau tonu* ʻi he vaí+ ʻi ha potu toputapu pea tui hono ngaahi kofú;+ te ne hū leva ki tuʻa ʻo ne ʻohake ʻa ʻene feilaulau tutú+ mo e feilaulau tutu ʻa e kakaí+ pea fai ha feilaulau ʻufiʻufi angahala maʻana pea mo e kakaí.+ 25 Te ne tutu ʻa e ngako ʻo e feilaulau angahalá ke kohu ʻi he funga ʻōlitá.

26 “Ko e tangata naʻá ne ʻave ʻa e kosi ki he ʻAsaselí+ ʻoku totonu ke ne fō hono ngaahi kofú pea kaukau ʻi ha vai, pea ʻi he hili iá, ʻe lava ke ne hū ki he ʻapitangá.

27 “Pea ko e pulu ʻo e feilaulau angahalá mo e kosi ʻo e feilaulau angahalá, ʻa ia ko hona totó ē naʻe ʻomi ki he potu toputapú ke faiʻaki ʻa e feilaulau ʻufiʻufi angahalá, ʻe ʻave ia ki he tuʻa ʻapitangá, pea ko hona kilí mo hona kakanó mo hona kinohaʻá ʻe tutu ia ʻi he afí.+ 28 Ko e tokotaha te ne tutu iá ʻoku totonu ke ne fō hono ngaahi kofú mo kaukau ʻi ha vai, pea ʻi he hili iá, ʻe lava ke ne hū ki he ʻapitangá.

29 “ʻE hoko ia ko ha tuʻutuʻuni taʻengata kiate kimoutolu: ʻI he māhina hono fitú, ʻi he ʻaho hono hongofulu ʻo e māhiná, ʻoku totonu ke mou fakamamahi ai,* pea kuo pau ke ʻoua naʻa mou fai ai ha faʻahinga ngāue,+ ʻo tatau ai pē pe ko ha tupuʻi fonua pe ko ha muli ʻoku nofo ʻi homou lotolotongá. 30 ʻI he ʻaho ko ení ʻe fai ai ha feilaulau ʻufiʻufi angahala+ maʻamoutolu ke fakahaaʻi ʻoku mou maʻa. Te mou maʻa ai mei hoʻomou ngaahi angahala kotoa ʻi he ʻao ʻo Sihová.+ 31 Ko ha Sāpate* ia ʻo e mālōlō fakaʻaufuli kiate kimoutolu, pea ʻoku totonu ke mou fakamamahi ai.+ Ko ha tuʻutuʻuni taʻengata ia.

32 “Ko e taulaʻeiki ʻoku pani+ mo fakanofo* ke ngāue ko e taulaʻeiki+ ʻo fetongi ʻa ʻene tamaí+ te ne fai ha feilaulau ʻufiʻufi angahala peá ne tui ʻa e ngaahi kofu līnení,+ ʻa e ngaahi kofu toputapú.+ 33 Te ne fai ha feilaulau ʻufiʻufi angahala koeʻuhi ko e feituʻu mātuʻaki toputapú,+ ko e tēniti feʻiloakiʻangá,+ pea mo e ʻōlitá;+ pea te ne fai ha feilaulau ʻufiʻufi angahala maʻá e kau taulaʻeikí pea maʻá e kakai kotoa pē ʻi he fakatahaʻangá.+ 34 ʻE hoko eni ko ha tuʻutuʻuni taʻengata kiate kimoutolu,+ ke fai ha feilaulau ʻufiʻufi angahala maʻá e kau ʻIsilelí ʻi he fekauʻaki mo e kotoa ʻo ʻenau ngaahi angahalá ʻo tuʻo taha ʻi he taʻu taki taha.”+

Ko ia naʻá ne fai ʻo hangē tofu pē ko e meʻa naʻe tuʻutuʻuni ʻe Sihova kia Mōsesé.

17 Naʻe hoko atu ʻa Sihova ʻo ne folofola kia Mōsese: 2 “Lea kia ʻĒlone mo hono ngaahi fohá pea mo e kau ʻIsilelí kotoa ʻo pehē kiate kinautolu, ‘Ko e meʻa eni kuo tuʻutuʻuni ʻe Sihová:

3 “‘“Kapau ʻe ʻi ai ha tangata ʻi he fale ʻo ʻIsilelí te ne tāmateʻi ha pulu tangata pe ko ha kiʻi sipi tangata pe ko ha kosi ʻi he ʻapitangá pe kapau te ne tāmateʻi ia ʻi he tuʻa ʻapitangá, 4 kae ʻikai ke ne ʻomi ia ki he hūʻanga ʻo e tēniti feʻiloakiʻangá ke foaki ko ha feilaulau kia Sihova ʻi muʻa ʻi he tāpanekale ʻo Sihová, ʻe lau ʻoku halaia ʻi he toto ʻa e tangata ko iá. Kuó ne lilingi ʻa e toto, pea ko e tangata ko iá kuo pau ke tuʻusi ia mei he lotolotonga ʻo hono kakaí.* 5 ʻOku fai ení koeʻuhi ke ʻomai ʻe he kau ʻIsilelí ʻa e ngaahi feilaulau, ʻa ia ʻoku nau lolotonga faifeilaulau ʻaki ʻi he loto ʻataʻataá kia Sihova, ki he hūʻanga ʻo e tēniti feʻiloakiʻangá ki he taulaʻeikí. Te nau faifeilaulau ʻaki eni ko e ngaahi feilaulau feʻinasiʻaki kia Sihova.+ 6 Pea ʻe afuhi ʻe he taulaʻeikí ʻa e totó ʻi he funga ʻōlita ʻo Sihová ʻi he hūʻanga ʻo e tēniti feʻiloakiʻangá pea tutu ke kohu ʻa e ngakó ko ha ngangatu fakahōifua* kia Sihova.+ 7 Ko ia ʻoku ʻikai totonu ke nau kei fai ʻa e ngaahi feilaulau ki he fanga tēmeniō hangē ha kosí,*+ ʻa ia ʻoku nau taʻefaitōnunga ʻo lotu ki aí.*+ ʻE hoko eni ko ha tuʻutuʻuni taʻengata kiate kimoutolu ʻi he kotoa ʻo homou ngaahi toʻutangatá.”’

8 “ʻOku totonu ke ke pehē kiate kinautolu, ‘Ko ha tangata pē ʻi he fale ʻo ʻIsilelí pe ko ha muli ʻoku nofo ʻi homou lotolotongá ʻa ia ʻokú ne ʻohake ha feilaulau tutu pe ko ha feilaulau 9 pea ʻikai te ne ʻomi ia ki he hūʻanga ʻo e tēniti feʻiloakiʻangá ke foaki ai ia kia Sihova kuo pau ke tuʻusi ia mei hono kakaí.*+

10 “‘Kapau ʻe ʻi ai ha tangata ʻi he fale ʻo ʻIsilelí pe ko ha muli ʻoku nofo ʻi homou lotolotongá te ne kai ha faʻahinga toto pē,+ te u siʻaki moʻoni ʻa e tokotaha ko ia ʻoku kai totó, pea te u tuʻusi ia mei he lotolotonga ʻo hono kakaí.* 11 He ko e moʻui ʻa e kakanó ʻoku ʻi he totó,+ pea ko au tonu kuó u ʻoatu ia ʻi he ʻōlitá+ koeʻuhi ko kimoutolu ke faiʻaki ha feilaulau ʻufiʻufi angahala maʻa hoʻomou moʻuí, he ko e totó ʻoku faiʻaki ʻa e feilaulau ʻufiʻufi angahalá+ koeʻuhi ko e moʻui ʻoku ʻi aí. 12 Ko e ʻuhinga ia kuó u lea ai ki he kau ʻIsilelí: “ʻOku ʻikai totonu ki ha taha ʻo kimoutolu ke ne kai ʻa e totó, pea ʻoku ʻikai totonu ki ha muli ʻa ia ʻoku nofo ʻi homou lotolotongá+ ke ne kai ʻa e totó.”+

13 “‘Kapau ʻe tulimanu ha taha ʻo e kau ʻIsilelí pe ko ha muli ʻoku nofo ʻi homou lotolotongá peá ne maʻu ha manu kaivao pe ko ha manupuna ʻa ia ʻe lava ke kai, kuo pau ke ne lilingi ʻa hono totó+ pea ʻufiʻufi ia ʻaki ʻa e efú. 14 He ko e moʻui ʻa e faʻahinga kakano kotoa pē ko hono totó, koeʻuhí he ʻoku ʻi ai ʻa e moʻuí. Ko ia naʻá ku pehē ai ki he kau ʻIsilelí: “Kuo pau ke ʻoua naʻa mou kai ʻa e toto ʻo ha faʻahinga kakano pē koeʻuhí ko e moʻui ʻa e faʻahinga kakano kotoa pē ko hono totó. Ko ha taha pē te ne kai ia ʻe tuʻusi.”*+ 15 Kapau ʻe ʻi ai ha taha, ko ha tupuʻi fonua pe ko ha muli, te ne kai ha manu naʻe maʻu kuo mate pe ko ha manu kuo hae ʻe ha manu fekai,+ kuo pau leva ke ne fō ʻa hono ngaahi kofú pea kaukau ʻi ha vai pea te ne taʻemaʻa ʻo aʻu ki he efiafi;+ pea te ne toki maʻa leva. 16 Ka ʻo kapau heʻikai te ne fō ia pea ʻikai te ne kaukau,* te ne fua ʻa e nunuʻa ʻo ʻene faihalá.’”+

18 Naʻe hoko atu ʻa Sihova ʻo ne folofola kia Mōsese, ʻo pehē: 2 “Lea ki he kau ʻIsilelí ʻo pehē kiate kinautolu, ‘Ko au Sihova ko homou ʻOtuá.+ 3 Kuo pau ke ʻoua naʻa hangē hoʻomou tōʻongá ko e meʻa ʻoku fai ʻe kinautolu ʻi he fonua ko ʻIsipité ʻa ia naʻa mou nofo aí, pea kuo pau ke ʻoua naʻa mou fai ʻa e meʻa ʻoku fai ʻe kinautolu ʻi he fonua ko Kēnaní, ʻa ia ʻoku ou ʻomi kimoutolu ki aí.+ Pea kuo pau ke ʻoua naʻa mou fou ʻi heʻenau ngaahi tuʻutuʻuní. 4 ʻOku totonu ke mou fakahoko ʻa ʻeku ngaahi tuʻutuʻuni fakaefakamāú, pea ʻoku totonu ke mou tauhi ʻeku ngaahi laó pea fou ai.+ Ko au Sihova ko homou ʻOtuá. 5 Kuo pau ke mou tauhi ʻeku ngaahi laó mo ʻeku ngaahi tuʻutuʻuni fakaefakamāú; ko ha taha pē ʻokú ne fai pehē te ne moʻui koeʻuhi ko e ngaahi meʻa ko iá.+ Ko Sihova au.

6 “‘ʻOku ʻikai totonu ki ha tangata ʻi homou lotolotongá ke ne fakaofiofi ki ha taha pē ʻo hono ngaahi kāinga ofí ke mohe*+ mo ia. Ko Sihova au. 7 Kuo pau ke ʻoua naʻá ke mohe mo hoʻo tamaí, pea kuo pau ke ʻoua naʻá ke mohe mo hoʻo faʻeé. Ko hoʻo faʻē ia, pea kuo pau ke ʻoua naʻá ke mohe mo ia.

8 “‘Kuo pau ke ʻoua naʻá ke mohe mo e uaifi ʻo hoʻo tamaí.+ Ko hono fakaeʻa atu ia ʻa hoʻo tamaí ki he tuʻunga fakamā.*

9 “‘Kuo pau ke ʻoua naʻá ke mohe mo ho tuofefiné, tatau ai pē pe ko e ʻofefine ʻo hoʻo tamaí pe ko e tama ʻa hoʻo faʻeé, pe ʻoku fanauʻi ia ʻi he fāmili tatau pe fanauʻi ʻi tuʻa mei ai.+

10 “‘Kuo pau ke ʻoua naʻá ke mohe mo e ʻofefine ʻo ho fohá pe ko e tama ʻa ho ʻofefiné, koeʻuhí ʻe hoko ko ha meʻa fakamā ia kiate koe.*

11 “‘Kuo pau ke ʻoua naʻá ke mohe mo e tama ʻa e uaifi ʻo hoʻo tamaí, ʻa e hako ʻo hoʻo tamaí, koeʻuhí ko ho tuofefine ia.

12 “‘Kuo pau ke ʻoua naʻá ke mohe mo e tuofefine ʻo hoʻo tamaí. Ko e kāinga ʻi he toto ia ʻo hoʻo tamaí.+

13 “‘Kuo pau ke ʻoua naʻá ke mohe mo e tokoua ʻo hoʻo faʻeé, koeʻuhí ko e kāinga ʻi he toto ia ʻo hoʻo faʻeé.

14 “‘Kuo pau ke ʻoua naʻá ke fakaeʻa atu ki he tuʻunga fakamā* ʻa e tokoua ʻo hoʻo tamaí ʻaki ʻa e mohe mo hono uaifí. Ko ho kāinga ia.+

15 “‘Kuo pau ke ʻoua naʻá ke mohe mo ho ʻofefine-ʻi-he-fonó.+ Ko e uaifi ia ʻo ho fohá, pea kuo pau ke ʻoua naʻá ke mohe mo ia.

16 “‘Kuo pau ke ʻoua naʻá ke mohe mo e uaifi ʻo ho tokouá,+ koeʻuhí ʻoku fakaeʻa atu ai ho tokouá ki he tuʻunga fakamā.*

17 “‘Kuo pau ke ʻoua naʻá ke mohe mo ha fefine pea mo ʻene tamá.+ Kuo pau ke ʻoua naʻá ke ʻave ʻa e ʻofefine ʻo hono fohá mo e tama ʻa ʻene tamá koeʻuhí ke ke mohe mo ia. Ko hono ngaahi kāinga ofi ia; ko ha tōʻonga fakalielia ia.*

18 “‘Kuo pau ke ʻoua naʻá ke mali mo e tokoua ho uaifí ke hoko ko ha uaifi hono ua+ pea mohe mo ia lolotonga ʻoku kei moʻui ʻa hono tokouá.

19 “‘Kuo pau ke ʻoua naʻá ke fakaofiofi ki ha fefine lolotonga ʻa ʻene taʻemaʻa ʻi he puke fakamāhiná ke ke mohe mo ia.+

20 “‘Kuo pau ke ʻoua naʻá ke mohe mo e uaifi ʻo ha taha kehe,* ʻo ʻai ai koe ke ke taʻemaʻa.+

21 “‘Kuo pau ke ʻoua naʻá ke fakaʻatā ha taha ʻo hoʻo fānaú ke foaki atu* ia kia Moloke.+ Kuo pau ke ʻoua naʻá ke taʻefakaʻapaʻapaʻi ʻa e huafa ʻo ho ʻOtuá ʻi he founga ko iá.+ Ko Sihova au.

22 “‘Kuo pau ke ʻoua naʻá ke mohe mo ha tangata ʻo hangē ko hoʻo mohe mo ha fefiné.+ Ko ha tōʻonga fakalielia ia.

23 “‘Kuo pau ke ʻoua naʻa mohe ha tangata mo ha manu ke ne hoko ʻo taʻemaʻa ai; pea ʻoku ʻikai foki totonu ki ha fefine ke ne tuku atu ia ki ha manu ke ne mohe mo ia.+ Ko hano maumauʻi ia ʻo e meʻa ʻoku fakanatulá.

24 “‘ʻOua naʻa ʻai kimoutolu ke mou taʻemaʻa ʻi ha taha ʻo e ngaahi meʻá ni, he ko e ngaahi meʻa kotoa eni kuo ʻai ai ʻe he ngaahi puleʻanga ʻa ia ʻoku ou kapusi mei homou ʻaó ke nau taʻemaʻa aí.+ 25 Ko ia ai, ʻoku taʻemaʻa ʻa e fonuá, pea te u ʻomai ʻa e tautea ki ai ʻi heʻene faihalá, pea ʻe puʻaki ki tuʻa ʻe he fonuá ʻa hono kakaí.+ 26 Ka ko kimoutolu tonu kuo pau ke mou tauhi ʻeku ngaahi laó mo ʻeku ngaahi tuʻutuʻuni fakaefakamāú,+ pea kuo pau ke ʻoua naʻa mou fai ha taha ʻo e ngaahi meʻa fakalielia ko ení, ʻo tatau ai pē pe ko ha tupuʻi fonua pe ko ha muli ʻa ia ʻoku nofo ʻi homou lotolotongá.+ 27 He ko e ngaahi meʻa fakalielia kotoa ko ení naʻe fai ia ʻe he kau tangata naʻa nau nofo ʻi he fonuá ki muʻa ʻiate kimoutolú,+ pea ko eni ʻoku taʻemaʻa ʻa e fonuá. 28 ʻE ʻikai leva ai ke puʻaki kimoutolu ki tuʻa ʻe he fonuá ʻi hono ʻuliʻi iá ʻi he founga tatau te ne puʻaki ai ki tuʻa ʻa e ngaahi puleʻanga naʻe ʻi muʻa ʻiate kimoutolú. 29 Kapau ʻe fai ʻe ha taha ha taha ʻo e ngaahi meʻa fakalielia ko ení, ko e faʻahinga kotoa ʻoku nau fai iá kuo pau ke tuʻusi kinautolu mei he lotolotonga ʻo honau kakaí.* 30 Kuo pau ke mou tauhi homou fatongia kiate aú ʻaki ʻa e ʻoua ʻe fai ha taha ʻo e ngaahi tōʻonga fakalielia ʻa ia naʻe fai ki muʻa ʻiate kimoutolú,+ koeʻuhí ke ʻoua naʻa mou ʻai ai kimoutolu ke mou taʻemaʻa. Ko au Sihova ko homou ʻOtuá.’”

19 Naʻe toe folofola ʻa Sihova kia Mōsese, ʻo pehē: 2 “Lea ki he fuʻu fakataha fakakātoa ʻo e kau ʻIsilelí ʻo tala kiate kinautolu, ‘ʻOku totonu ke mou māʻoniʻoni, koeʻuhí ko au Sihova ko homou ʻOtuá, ʻoku ou māʻoniʻoni.+

3 “‘Ko e tokotaha taki taha ʻo kimoutolú ʻoku totonu ke ne fakaʻapaʻapa* ki heʻene faʻeé mo ʻene tamaí,+ pea ʻoku totonu ke mou tauhi ʻa hoku ngaahi Sāpaté.+ Ko au Sihova ko homou ʻOtuá. 4 ʻOua naʻa mou tafoki ki he ngaahi ʻotua taʻeʻaongá+ pe ngaohi maʻamoutolu ha ngaahi ʻotua ʻo e mētale kuo haka.+ Ko au Sihova ko homou ʻOtuá.

5 “‘Ko eni kapau te mou fai ha feilaulau feʻinasiʻaki kia Sihova,+ ʻoku totonu ke mou feilaulauʻi ia ʻi ha founga ʻa ia te mou maʻu ai ʻa e hōifuá.+ 6 ʻOku totonu ke kai ia ʻi he ʻaho ʻo hoʻomou feilaulaú pea ʻi he ʻaho hono hokó, ka ko e meʻa ʻe toe ʻo aʻu ki he ʻaho hono tolú ʻoku totonu ke tutu ia ʻi he afí.+ 7 Kae kehe, kapau ʻe kai ha konga ʻo ia ʻi he ʻaho hono tolú, ko ha meʻa palakū ia ʻa ia ʻe ʻikai ke tali ʻi he hōifua. 8 Ko e tokotaha ʻokú ne kai iá te ne fua ʻa e nunuʻa ʻo ʻene faihalá koeʻuhí kuó ne taʻefakaʻapaʻapaʻi ha meʻa toputapu ʻa Sihova, pea ko e tokotaha ko iá kuo pau ke tuʻusi ia mei hono kakaí.*

9 “‘ʻI he taimi ʻe fai ai hoʻomou tuʻusi ʻi he utu-taʻu ʻo homou fonuá, kuo pau ke ʻoua naʻá ke tuʻusi ke ʻosi ʻa e ngatangataʻanga ʻo hoʻo ngoué pea kuo pau ke ʻoua naʻá ke tufi ʻa e toetoenga ʻo* hoʻo utu-taʻú.+ 10 Pehē foki, kuo pau ke ʻoua naʻá ke toli ʻa e ngaahi meʻa naʻe toe ʻi hoʻo ngoue kālepí pe tufi ʻa e ngaahi kālepi kuo movete ʻi hoʻo ngoue kālepí. ʻOku totonu ke ke tuku ia maʻá e masivá*+ pea mo e mulí. Ko au Sihova ko homou ʻOtuá.

11 “‘Kuo pau ke ʻoua naʻa mou kaihaʻa,+ kuo pau ke ʻoua naʻa mou kākā,+ pea kuo pau ke ʻoua naʻa mou taʻefaitotonu ʻi hoʻomou feangaingaʻakí. 12 Kuo pau ke ʻoua naʻa mou fuakava loi ʻi hoku huafá+ pea taʻefakaʻapaʻapaʻi ai ʻa e huafa ʻo ho ʻOtuá. Ko Sihova au. 13 Kuo pau ke ʻoua naʻá ke kākaaʻi ha taha kehe,+ pea kuo pau ke ʻoua naʻá ke kaihaʻa.+ ʻOku ʻikai totonu ke ke tauhi ʻa e totongi ʻa ha tokotaha ngāue totongi ʻi he poó kotoa ʻo aʻu ki he pongipongí.+

14 “‘Kuo pau ke ʻoua naʻá ke talatukiʻi ha* tangata tuli pe ʻai ha tūkiaʻanga ʻi he ʻao ʻo ha tangata kui,+ pea kuo pau ke ke manavahē ki ho ʻOtuá.+ Ko Sihova au.

15 “‘Kuo pau ke ʻoua naʻa mou taʻefaitotonu ʻi hoʻomou fakamāú. Kuo pau ke ʻoua naʻá ke fakahāhā ʻa e filifilimānako ki he masivá pe leleiʻia ange ʻi he koloaʻiá.+ ʻOku totonu ke ke fakamāuʻi ha taha kehe ʻaki ʻa e fakamaau totonú.

16 “‘Kuo pau ke ʻoua naʻá ke ʻalu takai holo ʻo fakamafola ha laukovi loi ʻi he lotolotonga ho kakaí.+ Kuo pau ke ʻoua naʻá ke feinga ke toʻo ʻa e moʻui* ʻa ha taha kehe.*+ Ko Sihova au.

17 “‘Kuo pau ke ʻoua naʻá ke fehiʻa ki ho tokouá ʻi ho lotó.+ ʻOku mātuʻaki totonu ke ke valokiʻi ha taha kehe,+ koeʻuhí ke ʻoua naʻá ke fua ʻa e angahalá fakataha mo ia.

18 “‘Kuo pau ke ʻoua naʻá ke faisāuni+ pe tukulotoʻi ha ʻita ki he ngaahi foha ʻo ho kakaí, pea kuo pau ke ke ʻofa ki he tokotaha kehé ʻo hangē pē ko hoʻo ʻofa kiate koé.+ Ko Sihova au.

19 “‘ʻOku totonu ke mou tauhi ʻa ʻeku ngaahi tuʻutuʻuní: Kuo pau ke ʻoua naʻá ke fakatouʻiaʻi ha faʻahinga kehekehe ʻe ua ʻo hoʻo fanga manu lalatá. Kuo pau ke ʻoua naʻá ke tūtuuʻi ʻi hoʻo ngoué ha faʻahinga tenga kehekehe ʻe ua,+ pea kuo pau ke ʻoua naʻá ke tui ha kofu kuo ngaohiʻaki ha faʻahinga filo kehekehe ʻe ua kuo fakatahaʻi.+

20 “‘Ko eni kapau ʻe tokoto ha tangata mo ha fefine peá ne mohe* mo ia pea ko ha kaunanga ia ʻa ia kuo vaheʻi ki ha tangata ʻe taha, ka kuo teʻeki ai ke totongi huhuʻi ia pe ʻoange ʻa ʻene tauʻatāiná, ʻoku totonu ke ʻi ai ha tautea. Kae kehe, ʻoku ʻikai totonu ke tāmateʻi kinaua, he kuo teʻeki ai fakatauʻatāinaʻi ia. 21 ʻOku totonu ke ʻoatu ʻe he tangatá ʻa ʻene feilaulau halaia kia Sihová ki he hūʻanga ʻo e tēniti feʻiloakiʻangá, ko ha sipi tangata ʻo e feilaulau halaia.+ 22 ʻE fai ʻe he taulaʻeikí ha feilaulau ʻufiʻufi angahala maʻana ʻaki ʻa e sipi tangata ʻo e feilaulau halaiá ʻi he ʻao ʻo Sihová koeʻuhi ko e angahala naʻá ne faí, pea ʻe fakamolemoleʻi ia ʻi he angahala naʻá ne faí.

23 “‘ʻI he taimi te mou hū ai ki he fonuá pea mou tō ha faʻahinga fuʻu ʻakau pē ki ha meʻakai, kuo pau ke mou vakai ki hono fuá ʻoku taʻemaʻa pea ʻoku tapu. Ko e taʻu ʻe tolu ʻe tapui ai ia meiate kimoutolu. Kuo pau ke ʻoua naʻa kai ia. 24 Ka ʻi he taʻu hono faá, ko hono fuá kotoa ʻe toputapu ia ki ha fakafiefia ʻi he ʻao ʻo Sihová.+ 25 ʻI he taʻu leva hono nimá, te mou kai ai ʻa hono fuá koeʻuhí ke fakalahi atu ai ʻa hono fuá ki hoʻomou utu-taʻú. Ko au Sihova ko homou ʻOtuá.

26 “‘Kuo pau ke ʻoua naʻa mou kai ha meʻa ʻoku ʻi ai ʻa e totó.+

“‘Kuo pau ke ʻoua naʻa mou kumi ki ha ngaahi fakaʻilonga pe fai ha faimana.+

27 “‘Kuo pau ke ʻoua naʻa mou tele* ʻa e fulufuluʻiʻulu he tafaʻaki ʻo homou ʻulú pe fakamatamatakoviʻi ʻa e hikuhiku ʻo ho kavá.+

28 “‘Kuo pau ke ʻoua naʻa mou hifi ʻa homou kakanó koeʻuhi ko ha tokotaha mate,*+ pea kuo pau ke ʻoua naʻa mou ʻai ha tā-tatau ʻiate kimoutolu. Ko Sihova au.

29 “‘ʻOua naʻá ke fakamaaʻi ho ʻofefiné ʻaki hono ʻai ia ko ha feʻauaki,+ koeʻuhí ke ʻoua naʻa faifeʻauaki ʻa e fonuá pea fonu ai ʻi he anga-mousaʻá.+

30 “‘Kuo pau ke mou tauhi ʻa hoku ngaahi Sāpaté,+ pea kuo pau ke mou fakahaaʻi ʻa e ʻapasia* ki hoku feituʻu toputapú. Ko Sihova au.

31 “‘ʻOua naʻa tafoki ki he kau taula faʻahikehé,+ pea ʻoua ʻe kumi faleʻi ki he kau tala meʻa ki he kahaʻú+ koeʻuhí ke mou hoko ai ʻo taʻemaʻa ʻiate kinautolu. Ko au Sihova ko homou ʻOtuá.

32 “‘ʻOku totonu ke ke tuʻu ki ʻolunga ʻi he ʻao ʻo e ʻulu hinaá,+ pea kuo pau ke ke fakahāhā ʻa e fakaʻapaʻapa ki ha tangata taʻumotuʻa,+ pea kuo pau ke ke manavahē ki ho ʻOtuá.+ Ko Sihova au.

33 “‘Kapau ʻoku nofo ha muli mo koe ʻi homou fonuá, kuo pau ke ʻoua naʻa mou ngaohikoviʻi ia.+ 34 Ko e muli ʻoku nofo mo kimoutolú ʻoku totonu ke ne hoko kiate kimoutolu ʻo hangē ko ha tupuʻi fonua ʻi homou lotolotongá;+ pea kuo pau ke ke ʻofa kiate ia ʻo hangē pē ko hoʻo ʻofa kiate koé, he naʻa mou hoko ko e kau muli ʻi he fonua ko ʻIsipité.+ Ko au Sihova ko homou ʻOtuá.

35 “‘Kuo pau ke ʻoua naʻa mou ngāueʻaki ʻa e ngaahi fua taʻefaitotonu ki hono fua ʻa e lōloá, mamafá, pe ko e lahi ʻo ha meʻa.+ 36 ʻOku totonu ke mou ngāueʻaki ʻa e ngaahi meʻafua totonu, ngaahi fakamamafa totonu, ko ha meʻafua mōmoa totonu,* pea mo ha meʻafua huhuʻa totonu.*+ Ko au Sihova ko homou ʻOtuá, ʻa ia naʻá ku ʻomi kimoutolu mei he fonua ko ʻIsipité. 37 Ko ia kuo pau ke mou tauhi ʻa e kotoa ʻo ʻeku ngaahi laó mo e kotoa ʻo ʻeku ngaahi tuʻutuʻuni fakaefakamāú, pea kuo pau ke mou muimui ki ai.+ Ko Sihova au.’”

20 Naʻe hoko atu ʻa Sihova ʻo ne folofola kia Mōsese, ʻo pehē: 2 “Te ke lea ki he kau ʻIsilelí, ‘Ko ha tangata pē ʻi ʻIsileli mo ha muli pē ʻoku nofo ʻi ʻIsileli ʻa ia ʻokú ne ʻoatu ha taha ʻo ʻene fānaú kia Moloke ʻoku totonu ke mātuʻaki tāmateʻi ia.+ Ko e kakai ʻo e fonuá ʻoku totonu ke nau tolomakaʻi ia ke ne mate. 3 Ko au tonu te u siʻaki ʻa e tangata ko iá, pea te u tuʻusi ia mei he lotolotonga ʻo hono kakaí,* koeʻuhí kuó ne ʻoatu ʻa e niʻihi ʻo ʻene fānaú kia Moloke pea kuó ne ʻuliʻi ʻa hoku potu toputapú+ pea taʻefakaʻapaʻapaʻi ʻa hoku huafa māʻoniʻoní. 4 Kapau ʻe fakakuikui ʻosi fakakaukauʻi ʻa e kakai ʻo e fonuá ki he meʻa ʻoku fai ʻe he tangata ko iá ʻi heʻene ʻoatu ʻa ʻene fānaú kia Moloké pea ʻikai te nau tāmateʻi ia,+ 5 te u siʻaki moʻoni leva ʻe au ʻa e tangata ko iá mo hono fāmilí.+ Te u tuʻusi mei hono kakaí* ʻa e tangata ko iá mo e faʻahinga kotoa ʻoku kau fakataha mo ia ʻi he taʻefaitōnunga ʻo lotu kia* Moloké.

6 “‘Ka ki he tokotaha ʻoku tafoki ki he kau taula faʻahikehé+ mo e kau tala meʻa ki he kahaʻú+ koeʻuhi ke faifeʻauaki fakalaumālie mo kinautolú, te u siʻaki moʻoni ʻa e tokotaha ko iá pea tuʻusi ia mei hono kakaí.*+

7 “‘Kuo pau ke mou fakamāʻoniʻoniʻi kimoutolu pea hoko ʻo māʻoniʻoni,+ koeʻuhí ko au Sihova ko homou ʻOtuá. 8 Pea kuo pau ke mou tauhi ʻa ʻeku ngaahi tuʻutuʻuní pea fakahoko ia.+ Ko au Sihova, ʻoku ou fakamāʻoniʻoniʻi kimoutolú.+

9 “‘Kapau ʻoku ʻi ai ha tangata ʻokú ne talatukiʻi ʻa ʻene* tamaí pe ko ʻene faʻeé, ʻoku totonu ke mātuʻaki tāmateʻi ia.+ Koeʻuhi kuó ne kape ki heʻene tamaí pe ko ʻene faʻeé, ʻe ʻi hono tumuʻakí pē ʻa hono totó.

10 “‘Ko eni ʻi he fekauʻaki mo ha tangata ʻokú ne fai ha tono mo ha uaifi ʻo ha tangata kehe: Ko e tokotaha ʻokú ne fai ʻa e tono mo e uaifi ʻo ha taha kehé ʻoku totonu ke mātuʻaki tāmateʻi, ʻa e tangata tonó mo e fefine tonó.+ 11 Ko ha tangata ʻoku mohe* mo e uaifi ʻo ʻene tamaí kuó ne fakaeʻa atu ʻa ʻene tamaí ki he tuʻunga fakamā.*+ Ko kinaua fakatouʻosi ʻoku totonu ke mātuʻaki tāmateʻi. ʻE ʻi hona tumuʻakí pē ʻa hona totó. 12 Kapau ʻe mohe ha tangata mo e mali ʻo hono fohá, ko kinaua fakatouʻosi ʻoku totonu ke mātuʻaki tāmateʻi. Kuó na maumauʻi ʻa e meʻa ʻoku fakanatulá. ʻE ʻi hona tumuʻakí pē ʻa hona totó.+

13 “‘Kapau ʻe mohe ha tangata mo ha tangata ʻo hangē pē ko e mohe ʻa ha tangata mo ha fefiné, ko kinaua fakatouʻosi kuó na fai ha meʻa fakalielia.+ ʻOku totonu ke mātuʻaki tāmateʻi kinaua. ʻE ʻi hona tumuʻakí pē ʻa hona totó.

14 “‘Kapau ʻe mali ha tangata mo ha fefine peá ne mohe mo e faʻē ʻa e fefiné, ko ha tōʻonga fakalielia ia.*+ ʻOku totonu ke nau tutu ʻa e tangatá mo kinaua ʻi he afí,+ koeʻuhi ke ʻoua naʻa hokohoko atu ʻa e tōʻonga fakalieliá ʻi homou lotolotongá.

15 “‘Kapau ʻe mohe ha tangata mo ha manu, ʻoku totonu ke mātuʻaki tāmateʻi ia, pea ʻoku totonu ke mou tāmateʻi ʻa e manú.+ 16 Kapau ʻe fakaofiofi ha fefine ki ha faʻahinga manu pē ke mohe mo ia,+ kuo pau ke ke tāmateʻi ʻa e fefiné pea mo e manú. ʻOku totonu ke mātuʻaki tāmateʻi kinaua. ʻE ʻi hona tumuʻakí pē ʻa hona totó.

17 “‘Kapau ʻoku mohe ha tangata mo hono tuofefiné, ʻa e ʻofefine ʻo ʻene tamaí pe ko e tama ʻa ʻene faʻeé, pea sio ʻa e tangatá ki he telefua ʻa e taʻahiné, pea sio ʻa e taʻahiné ki he telefua ʻa e tangatá, ko ha meʻa fakamā ia.+ Kuo pau ke tuʻusi* kinaua ʻo mamata ki ai ʻa e ngaahi foha ʻo hona kakaí. Kuó ne fakaeʻa atu ʻa hono tuofefiné ki he tuʻunga fakamā.* ʻOku totonu ke ne fua ʻa e nunuʻa ʻo ʻene faihalá.

18 “‘Kapau ʻe tokoto ha tangata mo ha fefine ʻoku puke fakamāhina peá ne mohe mo ia, kuó na fakahāhā fakatouʻosi ʻoku ʻikai toputapu ʻa e totó kiate kinaua.+ Ko kinaua fakatouʻosi kuo pau ke tuʻusi mei he lotolotonga ʻo hona kakaí.*

19 “‘Kuo pau ke ʻoua naʻá ke mohe mo e tokoua ʻo hoʻo faʻeé pe ko e tuofefine ʻo hoʻo tamaí, koeʻuhí ʻe fakaeʻa atu ai ha kāinga ʻi he toto ki ha tuʻunga fakamā.+ ʻOku totonu ke na fua ʻa e nunuʻa ʻo ʻena faihalá. 20 Ko ha tangata ʻoku mohe mo e uaifi ʻo e tokoua ʻo ʻene tamaí kuó ne fakaeʻa atu ai ʻa e tokoua ʻo ʻene tamaí ki he tuʻunga fakamā.*+ ʻOku totonu ke na fua ʻa e nunuʻa ʻo ʻena angahalá. ʻOku totonu ke na mate taʻefanau. 21 Kapau ʻe mali ha tangata mo e uaifi ʻo hono tokouá, ko ha meʻa fakalielia ia.+ Kuó ne fakaeʻa atu ʻa hono tokouá ki he tuʻunga fakamā.* ʻOku totonu ke na hoko ʻo taʻefanau.

22 “‘Kuo pau ke mou tauhi ʻa e kotoa ʻo ʻeku ngaahi laó mo e kotoa ʻo ʻeku ngaahi tuʻutuʻuni fakaefakamāú+ pea fakahoko ia,+ koeʻuhi ke ʻoua naʻa puʻaki kimoutolu ki tuʻa ʻe he fonua ʻoku ou ʻomi kimoutolu ke mou nofo aí.+ 23 Kuo pau ke ʻoua naʻa mou fou ʻi he ngaahi tuʻutuʻuni ʻa e ngaahi puleʻanga ʻa ia ʻoku ou kapusi mei homou ʻaó;+ he kuo nau fai ʻa e ngaahi meʻa kotoa ko ení pea ʻoku ou fakaliliʻa kiate kinautolu.+ 24 Ko e ʻuhinga ia naʻá ku pehē ai kiate kimoutolu: “Te mou maʻu ʻa honau fonuá, pea te u foaki ia kiate kimoutolu ko homou tofiʻa, ko ha fonua ʻoku mahutafea ʻi he huʻakau mo e hone.+ Ko Sihova au ko homou ʻOtuá, ʻa ia kuó u fakamavaheʻi kimoutolu mei he ngaahi kakaí.”+ 25 Kuo pau ke mou ʻai ke ʻi ai ha faikehekehe ʻi he vahaʻa ʻo e manu maʻá mo e taʻemaʻá pea ʻi he vahaʻa ʻo e manupuna taʻemaʻá pea mo e maʻá;+ kuo pau ke ʻoua naʻa mou fakalieliaʻi kimoutolu ko e meʻa ʻi ha manu pe ko ha manupuna pe ko ha meʻa pē ʻoku totolo mo ngaolo ʻi he kelekelé ʻa ia kuó u fakamavaheʻi ke mou vakai ki ai ʻoku taʻemaʻa.+ 26 Kuo pau ke mou māʻoniʻoni kiate au, koeʻuhí ko au Sihova, ʻoku ou māʻoniʻoni,+ pea ʻoku ou fakamavaheʻi kimoutolu mei he ngaahi kakaí ke mou hoko ko e meʻa ʻaʻaku.+

27 “‘Ko ha tangata pē pe ko ha fefine ʻoku ngāue ko ha taula faʻahikehe pe ko ha tokotaha tala meʻa ki he kahaʻú* ʻoku totonu ke mātuʻaki tāmateʻi.+ ʻOku totonu ke tolomakaʻi kinaua ʻe he kakaí ke na mate. ʻE ʻi hona tumuʻakí pē ʻa hona totó.’”

21 Naʻe hoko atu ʻa Sihova ʻo ne folofola kia Mōsese: “Lea ki he kau taulaʻeikí, ʻa e ngaahi foha ʻo ʻĒloné, ʻo pehē kiate kinautolu, ‘ʻOku ʻikai totonu ke ʻuliʻi ʻe ha taha ʻa ia tonu koeʻuhi ko ha tokotaha mate ʻi he lotolotonga ʻo hono kakaí.+ 2 Ka ʻe lava ke ne fai pehē ki ha kāinga ofi ʻi he totó, ki heʻene faʻeé, ko ʻene tamaí, ko hono fohá, ko hono ʻofefiné, ko hono tokouá, 3 pea ʻe lava ke ne ʻuliʻi ʻa ia tonu koeʻuhi ko hono tuofefiné, kapau ko ha fefine kei nofo anga-maʻa ia ʻa ia ʻoku ofi kiate ia pea kuo teʻeki ai ke ne mali. 4 ʻE ʻikai te ne ʻuliʻi ʻa ia tonu peá ne taʻefakamāʻoniʻoniʻi ia koeʻuhi ko ha fefine ʻa ia ko e uaifi ia ʻo ha husepāniti ʻi hono kakaí. 5 ʻOku ʻikai totonu ke nau tele honau ʻulú+ pe tele ʻa e ongo tafaʻaki ʻo honau kavá pe hifi ʻa honau sinó.+ 6 ʻOku totonu ke nau māʻoniʻoni ki honau ʻOtuá,+ pea ʻoku ʻikai totonu ke nau taʻefakaʻapaʻapaʻi ʻa e huafa ʻo honau ʻOtuá,+ he ʻoku nau ʻoatu ʻa e ngaahi feilaulau ʻoku fai ʻaki ʻa e afi kia Sihová, ʻa e mā* ʻa honau ʻOtuá, pea kuo pau ke nau māʻoniʻoni.+ 7 ʻOku ʻikai totonu ke nau mali mo ha feʻauaki,+ ko ha fefine ʻa ia kuo ʻuliʻi, pe ko ha fefine kuo veteʻi mei hono husepānití,+ koeʻuhí ko e taulaʻeikí ʻokú ne māʻoniʻoni ki hono ʻOtuá. 8 Kuo pau ke mou fakamāʻoniʻoniʻi ia,+ koeʻuhí he ko ia ʻokú ne ʻoatu ʻa e mā ʻa homou ʻOtuá. ʻOku totonu ke ne māʻoniʻoni kiate kimoutolu, koeʻuhí ko au Sihova, ʻa e tokotaha ʻokú ne fakamāʻoniʻoniʻi kimoutolú, ʻoku ou māʻoniʻoni.+

9 “‘Ko eni kapau ʻoku tuku ʻe he ʻofefine ʻo ha taulaʻeiki ke mole ʻa hono lāngilangí ʻaki haʻane faifeʻauaki, ʻokú ne taʻefakalāngilangiʻi ai ʻa ʻene tamaí. ʻOku totonu ke tutu ia ʻi he afí.+

10 “‘Ko e taulaʻeiki lahi ʻi he lotolotonga ʻo hono fanga tokoua ko e kau taulaʻeikí, ʻa ia ko hono ʻulú ē ʻoku lilingi ai ʻa e lolo paní+ pea kuo fakanofo* ke ne tui ʻa e ngaahi kofu fakataulaʻeikí,+ ʻoku ʻikai totonu ke ne tuku taʻetokangaʻi ʻa hono ʻulú pe hae ʻa hono ngaahi kofú.+ 11 ʻOku ʻikai totonu ke ne fakaofiofi ki ha tokotaha mate pē;*+ ʻe ʻikai te ne ʻuliʻi ia neongo kapau ko ʻene tamai pe ko ʻene faʻē. 12 ʻOku ʻikai totonu ke ne hū ki tuʻa mei he feituʻu toputapú pea ʻoku ʻikai totonu ke ne taʻefakamāʻoniʻoniʻi ʻa e feituʻu toputapu ʻa hono ʻOtuá,+ he ko e fakaʻilonga ʻo e fakatapuí, ʻa e lolo pani ʻa hono ʻOtuá,+ ʻoku ʻiate ia. Ko Sihova au.

13 “‘Kuo pau ke ne ʻave ke hoko ko hano uaifi ha fefine ʻoku kei nofo anga-maʻa.+ 14 ʻE ʻikai te ne mali mo ha uitou, ko ha fefine kuo vete, ko e tokotaha ʻa ia kuo ʻuliʻi, pe ko ha feʻauaki; ka ʻoku totonu ke ne ʻave ha fefine kei nofo anga-maʻa mei hono kakaí ke hoko ko hano uaifi. 15 ʻOku ʻikai totonu ke ne taʻefakamāʻoniʻoniʻi ʻa hono hakó ʻi he lotolotonga ʻo hono kakaí,+ he ko au Sihova, ʻoku ou fakamāʻoniʻoniʻi iá.’”

16 Naʻe hoko atu ʻa Sihova ʻo ne folofola kia Mōsese, ʻo pehē: 17 “Tala kia ʻĒlone, ‘ʻE ʻikai ha tangata ʻi ho hakó ʻi he kotoa ʻo honau ngaahi toʻutangatá ʻa ia ʻoku ʻi ai hano mele ʻe lava ke fakaofiofi mai ke ʻoatu ʻa e mā ʻa hono ʻOtuá. 18 Kapau ʻoku ʻi ai ha tangata ʻoku ʻi ai hano mele, ʻe ʻikai lava ke ne fakaofiofi mai: Ko ha tangata ʻa ia ʻoku kui pe heke pe matamatakovi hono fofongá* pe fuʻu lōloa hano nima pe vaʻe ʻe taha, 19 ko ha tangata ʻoku fasi hano vaʻe pe fasi hano nima, 20 ko ha tuʻapiko pe ko ha puku* pe ko ha tangata ʻoku ʻi ai ha mele ʻi hono matá pe mahaki kili pe lafā pe maumauʻi ʻa hono fakatangatá.+ 21 ʻE ʻikai ha tangata ʻi he hako ʻo ʻĒlone ko e taulaʻeikí ʻa ia ʻoku ʻi ai hano mele ʻe lava ke ne fakaofiofi mai ke ʻoatu ʻa e ngaahi feilaulau kia Sihova ʻoku fai ʻaki ʻa e afí. Koeʻuhí ʻoku ʻi ai hano mele, ʻe ʻikai lava ke ne fakaofiofi mai ke ʻoatu ʻa e mā ʻa hono ʻOtuá. 22 ʻE lava ke ne kai ʻa e mā ʻa hono ʻOtuá mei he ngaahi meʻa mātuʻaki toputapú+ pea mei he ngaahi meʻa toputapú.+ 23 Kae kehe, ʻe ʻikai lava ke ne haʻu ʻo ofi ki he puipuí,+ pea ʻe ʻikai lava ke ne fakaofiofi ki he ʻōlitá,+ koeʻuhí ʻoku ʻi ai ha mele ʻiate ia; pea ʻoku ʻikai totonu ke ne taʻefakamāʻoniʻoniʻi ʻa hoku feituʻu toputapú,+ he ko au Sihova, ʻoku ou fakamāʻoniʻoniʻi kinautolú.’”+

24 Ko ia naʻe pehē ʻa e lea ʻa Mōsese kia ʻĒlone mo hono ngaahi fohá pea mo e kotoa ʻo e kau ʻIsilelí.

22 Naʻe toe folofola ʻa Sihova kia Mōsese, ʻo pehē: 2 “Tala kia ʻĒlone mo hono ngaahi fohá ʻoku totonu ke nau tokanga ʻi he anga ʻo ʻenau ngāue ki he* ngaahi meʻa toputapu ʻa e kau ʻIsilelí pea ʻoua ʻe taʻefakaʻapaʻapaʻi ʻa hoku huafa māʻoniʻoní+ ʻi he fekauʻaki mo e ngaahi meʻa ʻoku nau fakatoputapuʻi kiate aú.+ Ko Sihova au. 3 Te ke pehē kiate kinautolu, ‘ʻI he kotoa ʻo homou ngaahi toʻutangatá, ko ha taha pē ʻi homou hakó, lolotonga ʻene taʻemaʻá, ʻe haʻu ʻo ofi ki he ngaahi meʻa toputapu ʻa ē ʻoku fakatoputapuʻi ʻe he kau ʻIsilelí kia Sihová, ko e tokotaha ko iá ʻe tuʻusi* ia mei hoku ʻaó.+ Ko Sihova au. 4 ʻE ʻikai ha tangata ʻo e hako ʻo ʻĒloné ʻa ia ʻoku kilia+ pe ʻau+ te ne kai ʻa e ngaahi meʻa toputapú kae ʻoua ke ne hoko ʻo maʻa,+ ʻo tatau pē mo e tangata ʻokú ne ala ki ha taha ʻa ia kuó ne hoko ʻo taʻemaʻa ʻi ha tokotaha mate,+ pe ko ha tangata kuo mahua mai ki tuʻa ʻa hono huhuʻá,+ 5 pe ko ha tangata ʻoku ala ki ha taha pē ʻo e fanga kiʻi meʻamoʻui iiki fakapupunga taʻemaʻá+ pe ʻokú ne ala ki ha tangata ʻa ia ʻoku taʻemaʻa ʻi ha faʻahinga ʻuhinga pea ʻe lava ke ne ʻai ia ke ne taʻemaʻa.+ 6 Ko e tokotaha ʻoku ala ki ha taha ʻo e ngaahi meʻá ni ʻe taʻemaʻa ia ʻo aʻu ki he efiafi pea ʻe ʻikai te ne kai ha taha ʻo e ngaahi meʻa toputapú, ka ʻoku totonu ke ne kaukau ʻi ha vai.+ 7 ʻI he tō ʻa e laʻaá, te ne hoko ʻo maʻa, pea ʻi he hili iá ʻe lava ke ne kai ha konga ʻo e ngaahi meʻa toputapú koeʻuhí ko ʻene meʻakai ia.+ 8 Pehē foki, ʻoku ʻikai totonu ke ne kai ha manu pē ʻoku maʻu kuo mate pe ko ha meʻa pē kuo hae ʻe ha fanga manu fekai ʻo ne hoko ʻo taʻemaʻa ai.+ Ko Sihova au.

9 “‘Kuo pau ke nau tauhi honau fatongia kiate aú, ke ʻoua naʻa nau hoko ai ʻo angahala koeʻuhi ko ia pea pau ai ke nau mate koeʻuhí ko ia he naʻa nau taʻefakatoputapuʻi ʻa e ngaahi meʻa toputapú. Ko au Sihova, ʻoku ou fakamāʻoniʻoniʻi kinautolú.

10 “‘ʻE ʻikai ke kai ʻe ha tokotaha taʻefakamafaiʻi* ha meʻa pē ʻoku toputapu.+ ʻE ʻikai ke kai ʻe ha muli ʻoku ʻāunofo ʻi ha taulaʻeiki pe ko ha tokotaha ngāue totongi ha meʻa pē ʻoku toputapu. 11 Ka ʻo kapau ʻe fakatau mai ʻe ha taulaʻeiki ha taha ʻaki ʻene paʻanga ʻaʻaná, ko e tokotaha ko iá ʻe lava ke ne kau ʻi hono kai iá. Ko e kau sevāniti ʻoku fanauʻi ʻi hono falé te nau kau foki ʻi hono kai ʻa ʻene meʻakaí.+ 12 Kapau ʻe mali ha ʻofefine ʻo ha taulaʻeiki mo ha tokotaha ʻoku ʻikai ko ha taulaʻeiki,* ʻe ʻikai te ne kai mei he ngaahi meʻaʻofa toputapú. 13 Ka ʻo kapau ʻe hoko ʻa e ʻofefine ʻo ha taulaʻeiki ko ha uitou pe kuó ne vete pea ʻoku ʻikai haʻane fānau peá ne foki ki he fale ʻo ʻene tamaí ʻo hangē ko ia ʻi heʻene finemuí, ʻe lava ke ne kai ha meʻa mei he meʻakai ʻa ʻene tamaí;+ ka ʻe ʻikai ke kai ia ʻe ha tokotaha taʻefakamafaiʻi.*

14 “‘Ko eni kapau ʻe kai ʻe ha tangata ha meʻa toputapu ʻi ha fehālaaki, kuo pau ke ne tānaki atu ki ai ha vahe nima ʻe taha ʻo hono mahuʻingá pea ʻave ʻa e feilaulau toputapú ki he taulaʻeikí.+ 15 Ko ia ʻoku ʻikai totonu ke nau taʻefakatoputapuʻi ʻa e ngaahi meʻa toputapu ʻa e kau ʻIsilelí ʻa ia ʻoku nau meʻaʻofaʻaki kia Sihová+ 16 pea fakatupunga ai ke hoko ha tautea kiate kinautolu ʻi heʻenau halaiá koeʻuhi ko hono kai ʻenau ngaahi meʻa toputapú; he ko au Sihova, ʻoku ou fakamāʻoniʻoniʻi kinautolú.’”

17 Naʻe hoko atu ʻa e folofola ʻa Sihova kia Mōsesé, ʻo pehē: 18 “Lea kia ʻĒlone pea ki hono ngaahi fohá mo e kau ʻIsilelí kotoa ʻo pehē kiate kinautolu, ‘ʻI he taimi ʻe ʻoatu ai ʻe ha tangata ʻIsileli pe ko ha muli ʻi ʻIsileli ha feilaulau tutu+ kia Sihova ke fakahoko ʻa ʻene ngaahi fuakavá pe ke fai ha feilaulau loto-tauʻatāina,+ 19 ʻoku totonu ke ne ʻoatu ha manu tangata taʻemele+ mei he fanga pulú, mei he fanga kiʻi sipi tangatá, pe mei he fanga kosí, koeʻuhí ke ne maʻu ai ʻa e hōifuá. 20 Kuo pau ke ʻoua naʻa mou ʻoatu ha meʻa pē ʻoku ʻi ai hano mele,+ koeʻuhí ʻe ʻikai hoko ʻo mou maʻu ai ʻa e hōifuá.

21 “‘Kapau ʻe ʻoatu ʻe ha tangata ha feilaulau feʻinasiʻaki+ kia Sihova ke fai ha fuakava pe ko ha feilaulau loto-tauʻatāina, ʻoku totonu ko ha manu taʻemele ia mei he fanga pulú pe ko e fanga sipí, koeʻuhí ke ne maʻu ai ʻa e hōifuá. ʻOku ʻikai ʻaupito totonu ke ʻi ai hano mele. 22 ʻOku ʻikai totonu ke ʻi ai ha monumanu feilaulau ʻe kui, fasi hano hui, lavea, ʻi ai ha lefetona, fakamongumangu, pe lafā; kuo pau ke ʻoua naʻa mou ʻoatu ha taha ʻo e ngaahi meʻá ni kia Sihova pe fai ha feilaulau pehē kia Sihova ʻi he ʻōlitá. 23 ʻE lava ke ke ʻoatu ha pulu tangata pe ko ha sipi ʻoku fuʻu lōloa pe fuʻu nounou hono vaʻé ko ha feilaulau loto-tauʻatāina, ka heʻikai ke tali ia ʻi he hōifua ko ha feilaulau fuakava. 24 Kuo pau ke ʻoua naʻa mou ʻoatu kia Sihova ha manu kuo fakapoka pe maumauʻi pe fakavolu pe faitoʻo, pea ʻoku ʻikai totonu ke mou feilaulauʻaki ha fanga manu pehē ʻi homou fonuá. 25 Pea kuo pau ke ʻoua naʻa mou ʻoatu ha taha ʻo e ngaahi meʻa ko ení mei he nima ʻo ha muli ke hoko ko e mā ʻa homou ʻOtuá, he ʻoku nau taʻefeʻunga mo mele. ʻE ʻikai tali kinautolu fakataha mo e hōifua kiate kimoutolu.’”

26 Naʻe toe folofola ʻa Sihova kia Mōsese, ʻo pehē: 27 “ʻI he taimi ʻe fāʻeleʻi ai ha pulu tangata pe ko ha kiʻi sipi tangata pe ko ha kosi, ʻe hokohoko atu ʻene nofo mo ʻene faʻeé ʻi he ʻaho ʻe fitu,+ ka mei hono ʻaho valú ʻo faai atu ai ʻe tali ia fakataha mo e hōifua ko ha feilaulau, ko ha feilaulau ʻoku fai ʻaki ʻa e afi kia Sihova. 28 Ka ki ha pulu tangata pe ko ha sipi, kuo pau ke ʻoua naʻa mou tāmateʻi ia mo hono ʻuhikí ʻi he ʻaho tatau.+

29 “Kapau te mou fai ha feilaulau fakafetaʻi kia Sihova,+ ʻoku totonu ke mou fai ia ke mou maʻu ai ʻa e hōifuá. 30 ʻOku totonu ke kai ia ʻi he ʻaho ko iá. Kuo pau ke ʻoua naʻa mou tuku ha meʻa mei ai ʻo aʻu ki he pongipongí.+ Ko Sihova au.

31 “Kuo pau ke mou tauhi ʻa ʻeku ngaahi fekaú pea fakahoko ia.+ Ko Sihova au. 32 Kuo pau ke ʻoua naʻa mou taʻefakaʻapaʻapaʻi ʻa hoku huafa māʻoniʻoní,+ pea kuo pau ke fakamāʻoniʻoniʻi au ʻi he lotolotonga ʻo e kau ʻIsilelí.+ Ko au Sihova, ʻoku ou fakamāʻoniʻoniʻi kimoutolú,+ 33 ʻa e tokotaha naʻá ne ʻomai kimoutolu mei he fonua ko ʻIsipité ke fakamoʻoniʻi ai au ko e ʻOtua kiate kimoutolu.+ Ko Sihova au.”

23 Naʻe hoko atu ʻa Sihova ʻo ne folofola kia Mōsese, ʻo pehē: 2 “Lea ki he kau ʻIsilelí ʻo tala kiate kinautolu, ‘Ko e ngaahi kātoanga fakafaʻahitaʻu+ ʻa Sihova ʻa ia ʻoku totonu ke mou fanongonongó+ ko e ngaahi fakataha-lahi toputapu ia. Ko ʻeku ngaahi kātoanga fakafaʻahitaʻú eni:

3 “‘Ko e ʻaho ʻe ono ʻe fai ai ʻa e ngāué, ka ʻi he ʻaho hono fitú ko ha Sāpate ia ʻo e mālōlō fakaʻaufuli,+ ko ha fakataha-lahi toputapu. ʻE ʻikai te mou fai ai ha faʻahinga ngāue pē. ʻE hoko ia ko ha Sāpate kia Sihova ʻi ha feituʻu pē ʻoku mou nofo ai.+

4 “‘Ko e ngaahi kātoanga fakafaʻahitaʻu eni ʻa Sihova, ko e ngaahi fakataha-lahi toputapu ʻa ia ʻoku totonu ke mou fanongonongo ʻi he ngaahi taimi kuo kotofa ki aí: 5 ʻI he ʻuluaki māhiná, ʻi he ʻaho hono 14 ʻo e māhiná,+ ʻi he mamalu ʻa e poʻulí* ʻe fai ai ʻa e Pāsova*+ kia Sihova.

6 “‘ʻI he ʻaho hono 15 ʻo e māhina ko ení ʻe fai ai ʻa e Kātoanga ʻo e Mā Taʻelēvani kia Sihova.+ Ko e ʻaho ʻe fitu ʻoku totonu ke mou kai ai ʻa e mā taʻelēvaní.+ 7 ʻI he ʻuluaki ʻahó, te mou fai ai ha fakataha-lahi toputapu.+ ʻOku ʻikai totonu ke mou fai ai ha ngāue mamafa ʻe taha. 8 Ka te mou ʻoatu ha feilaulau ʻoku fai ʻaki ʻa e afi kia Sihova ʻi he ʻaho ʻe fitu. ʻE ʻi ai ha fakataha-lahi toputapu ʻi he ʻaho hono fitú. ʻOku ʻikai totonu ke mou fai ai ha ngāue mamafa ʻe taha.’”

9 Naʻe hoko atu ʻa Sihova ʻo ne folofola kia Mōsese, ʻo pehē: 10 “Lea ki he kau ʻIsilelí ʻo tala kiate kinautolu, ‘ʻI he taimi ʻe faifai pea mou hū ai ki he fonua ʻoku ou foaki kiate kimoutolú pea kuo mou fai ʻa e tuʻusi ʻi hono utu-taʻú, kuo pau ke mou ʻomi foki ha haʻinga ʻo e ʻuluaki fua+ ʻo hoʻomou utu-taʻú ki he taulaʻeikí.+ 11 Pea te ne hapai ʻa e haʻingá ki muʻa mo mui ʻi he ʻao ʻo Sihová ke mou maʻu ai ʻa e hōifuá. ʻOku totonu ke hapai ia ʻe he taulaʻeikí ʻi he ʻaho hili ʻa e Sāpaté. 12 ʻI he ʻaho kuo mou ʻai ke hapai ai ʻa e haʻingá, kuo pau ke mou foaki ha kiʻi sipi tangata taʻemele ʻi hono ʻuluaki taʻú, ko ha feilaulau tutu kia Sihova. 13 Ko hono feilaulau meʻakaí ko e vahe hongofulu ʻe ua ʻo ha efa* ʻo e mahoaʻa lelei kuo fio mo e lolo, ko ha feilaulau ʻoku fai ʻaki ʻa e afi kia Sihova, ko ha ngangatu fakahōifua.* Ko hono feilaulau inú ko ha vahe fā ia ʻe taha ʻo ha hini* ʻo e uaine. 14 Kuo pau ke ʻoua naʻa mou kai ha faʻahinga mā pē, uite kuo tunu, pe ko e uite mata kae ʻoua ke aʻu ki he ʻaho ko ení, kae ʻoua kuo mou ʻomi ʻa e feilaulau ki homou ʻOtuá. Ko ha tuʻutuʻuni taʻengata ia ki he kotoa ʻo homou ngaahi toʻutangatá ʻi ha feituʻu pē ʻoku mou nofo ai.

15 “‘Te mou lau ʻa e Sāpate ʻe fitu mei he ʻaho hili ʻa e Sāpaté, mei he ʻaho ʻoku mou ʻomi ai ʻa e haʻinga ʻo e feilaulau hapaí.+ ʻOku totonu ke hoko ia ko e ngaahi uike kakato. 16 Te mou lau ʻa e ʻaho ʻe 50+ ki he ʻaho hili ʻa e Sāpate hono fitú, pea ʻoku totonu leva ke mou ʻoatu ai ha feilaulau meʻakai foʻou kia Sihova.+ 17 ʻOku totonu ke mou ʻomi mei homou ngaahi nofoʻangá ʻa e ongo foʻi mā ʻe ua ko ha feilaulau hapai. ʻOku totonu ke ngaohiʻaki eni ʻa e vahe hongofulu ʻe ua ʻo ha efa* ʻo e mahoaʻa lelei. ʻOku totonu ke taʻo ia ʻaki ʻa e lēvani,+ ko e ongo ʻuluaki fua ia kuo motuʻa kia Sihova.+ 18 Pea ʻoku totonu ke mou ʻoatu fakataha mo e ongo foʻi maá ʻa e lami tangata taʻemele ʻe fitu, taki taʻu taha, mo e kiʻi pulu tangata ʻe taha mo e sipi tangata ʻe ua.+ Te nau hoko ko ha feilaulau tutu kia Sihova fakataha mo e feilaulau meʻakai mo e ngaahi feilaulau inu feʻungamālié, ko ha feilaulau ʻoku fai ʻaki ʻa e afi, ko ha ngangatu fakahōifua* kia Sihova. 19 Pea kuo pau ke mou foaki ʻa e kosi mui ʻe taha ko ha feilaulau angahala+ pea mo e ongo lami tangata, taki taʻu taha, ko ha feilaulau feʻinasiʻaki.+ 20 Ko e taulaʻeikí te ne hapai ia ki muʻa mo mui fakataha mo e ongo foʻi mā ʻo e ongo ʻuluaki fua kuo motuʻá, ko ha feilaulau hapai ʻi he ʻao ʻo Sihová, fakataha mo e ongo lami tangatá. ʻOku totonu ke hoko ia ko e meʻa toputapu kia Sihova pea ko e meʻa ia ʻa e taulaʻeikí.+ 21 ʻI he ʻaho ko ení te mou fai ai ha fanongonongo+ ki ha fakataha-lahi toputapu maʻamoutolu. ʻE ʻikai te mou fai ai ha faʻahinga ngāue mamafa ʻe taha. Ko ha tuʻutuʻuni taʻengata ia ʻi he kotoa ʻo homou ngaahi nofoʻangá ki he kotoa ʻo homou ngaahi toʻutangatá.

22 “‘ʻI he taimi ʻe fai ai hoʻomou tuʻusi ʻi he utu-taʻu ʻo homou fonuá, kuo pau ke ʻoua te ke tuʻusi ke ʻosi ʻa e ngatangataʻanga ʻo hoʻo ngoué pea ʻoku ʻikai totonu ke ke tufi ʻa e toetoenga ʻo hoʻo utu-taʻú.+ ʻOku totonu ke ke tuku ia ki he masivá*+ pea ki he mulí.+ Ko au Sihova ko homou ʻOtuá.’”

23 Naʻe hoko atu ʻa Sihova ʻo ne folofola kia Mōsese, ʻo pehē: 24 “Tala ki he kau ʻIsilelí, ‘ʻI he māhina hono fitú, ʻi hono ʻuluaki ʻaho ʻo e māhiná, ʻoku totonu ke mou fai ai ha mālōlō fakaʻaufuli, ko ha fakamanatu kuo fakaʻilongaʻi ʻaki ha ifi ʻa ha talupite,+ ko ha fakataha-lahi toputapu. 25 ʻE ʻikai te mou fai ha faʻahinga ngāue mamafa ʻe taha, pea te mou ʻoatu ha feilaulau ʻoku fai ʻaki ʻa e afi kia Sihova.’”

26 Naʻe toe folofola ʻa Sihova kia Mōsese, ʻo pehē: 27 “Kae kehe, ʻi hono hongofulu ʻo e māhina ko eni hono fitú ko e ʻAho ʻo e ʻUfiʻufi Angahala* ia.+ ʻOku totonu ke mou fai ai ha fakataha-lahi toputapu, pea kuo pau ke mou fakamamahi*+ pea ʻoatu ai ha feilaulau ʻoku fai ʻaki ʻa e afi kia Sihova. 28 ʻE ʻikai te mou fai ha faʻahinga ngāue pē ʻi he ʻaho tonu ko ení koeʻuhí ko ha ʻaho ia ʻo e ʻufiʻufi angahala ke fai ai ha ʻufiʻufi angahala+ maʻamoutolu ʻi he ʻao ʻo Sihova ko homou ʻOtuá. 29 Ko ha taha pē ʻe ʻikai ke fakamamahi* ʻi he ʻaho ko ení ʻe tuʻusi ia mei hono kakaí.*+ 30 Pea te u fakaʻauha mei he lotolotonga ʻo hono kakaí ʻa e tokotaha kotoa pē te ne fai ha faʻahinga ngāue pē ʻi he ʻaho ko ení. 31 Kuo pau ke ʻoua naʻa mou fai ha faʻahinga ngāue pē. Ko ha tuʻutuʻuni taʻengata ia ki he kotoa ʻo homou ngaahi toʻutangatá ʻi ha feituʻu pē ʻoku mou nofo ai. 32 Ko ha Sāpate ia ʻo e mālōlō fakaʻaufuli kiate kimoutolu, pea te mou fakamamahi+ ʻi hono ʻaho hiva ʻo e māhiná ʻi he efiafí. ʻOku totonu ke mou tauhi hoʻomou Sāpaté mei he efiafi ki he efiafi.”

33 Naʻe hoko atu ʻa e folofola ʻa Sihova kia Mōsesé, ʻo pehē: 34 “Tala ki he kau ʻIsilelí, ‘ʻI he ʻaho hono 15 ʻo e māhina hono fitu ko ení ko e Kātoanga ʻo e Falelouʻakaú* ia ʻi he ʻaho ʻe fitu kia Sihova.+ 35 ʻE ʻi ai ha fakataha-lahi toputapu ʻi he ʻuluaki ʻahó, pea ʻoku ʻikai totonu ke mou fai ai ha faʻahinga ngāue mamafa ʻe taha. 36 Kuo pau ke mou ʻoatu ʻi he ʻaho ʻe fitu ha feilaulau ʻoku fai ʻaki ʻa e afi kia Sihova. ʻI he ʻaho hono valú, ʻoku totonu ke mou fai ai ha fakataha-lahi toputapu,+ pea ʻoku totonu ke mou ʻoatu ai ha feilaulau ʻoku fai ʻaki ʻa e afi kia Sihova. Ko ha fuʻu fakataha makehe ia. ʻE ʻikai te mou fai ai ha faʻahinga ngāue mamafa ʻe taha.

37 “‘Ko e ngaahi kātoanga fakafaʻahitaʻu+ eni ʻa Sihova ʻa ia ʻoku totonu ke mou fanongonongo ko e ngaahi fakataha-lahi toputapu+ ki hono ʻoatu ha feilaulau ʻoku fai ʻaki ʻa e afi kia Sihova: ʻA e feilaulau tutú+ mo e feilaulau meʻakaí+ mo e ngaahi feilaulau inú+ ʻo fakatatau ki he taimi-tēpile fakaʻahó. 38 Ko e ngaahi meʻá ni ʻe tānaki atu ia ki he meʻa ʻoku foaki ʻi he ngaahi Sāpate ʻa Sihová,+ pea ki hoʻomou ngaahi meʻaʻofá,+ ki hoʻomou ngaahi feilaulau fuakavá,+ mo hoʻomou ngaahi feilaulau loto-tauʻatāiná,+ ʻa ia ʻoku totonu ke mou ʻoatu kia Sihová. 39 Kae kehe, ʻi he ʻaho hono 15 ʻo e māhina hono fitú, ʻi he ʻosi hoʻomou tānaki ʻa e fua ʻo e fonuá, ʻoku totonu ke mou kātoangaʻi ʻa e kātoanga kia Sihová ʻi he ʻaho ʻe fitu.+ ʻI he ʻuluaki ʻahó ko ha ʻaho mālōlō fakaʻaufuli ia pea ʻi he ʻaho hono valú ko ha ʻaho mālōlō fakaʻaufuli ia.+ 40 ʻI he ʻuluaki ʻahó, te mou toʻo ai ʻa e fuaʻiʻakau ʻo e ʻuluʻakau lelei tahá, ʻa e ngaahi lauʻipāmé,+ ko e ngaahi vaʻa ʻo e ʻakau mohu laú mo e ʻuluʻakau* ʻo e teleʻá,* pea te mou fiefia+ ʻi he ʻao ʻo Sihova ko homou ʻOtuá ʻi he ʻaho ʻe fitu.+ 41 Te mou kātoangaʻi ia ko ha kātoanga kia Sihova ʻi he ʻaho ʻe fitu ʻi he taʻu.+ ʻI he tuʻunga ko ha tuʻutuʻuni taʻengata ʻi he kotoa ʻo homou ngaahi toʻutangatá, ʻoku totonu ke mou kātoangaʻi ia ʻi he māhina hono fitú. 42 ʻOku totonu ke mou nofo ʻi he ngaahi falelouʻakaú ʻi he ʻaho ʻe fitu.+ Ko e tupuʻi ʻIsileli kotoa pē ʻoku totonu ke nau nofo ʻi he ngaahi falelouʻakaú, 43 koeʻuhi ke ʻilo ʻe homou ngaahi toʻutangata ʻi he kahaʻú+ ko e ngaahi falelouʻakau naʻá ku ʻai ke nofo ai ʻa e kau ʻIsilelí ʻi he taimi naʻá ku ʻomi ai kinautolu mei he fonua ko ʻIsipité.+ Ko au Sihova ko homou ʻOtuá.’”

44 Ko ia naʻe pehē ʻa e lea ʻa Mōsese ki he kau ʻIsilelí ʻo fekauʻaki mo e ngaahi kātoanga fakafaʻahitaʻu ʻa Sihová.

24 Naʻe hoko atu ʻa e folofola ʻa Sihova kia Mōsesé, ʻo pehē: 2 “Fekau ki he kau ʻIsilelí ke ʻomi kiate koe ha lolo ʻōlive haohaoa kuo tuki ki he ngaahi māmá, ke tauhi ʻa e ngaahi māmá ke ulo maʻu pē.+ 3 ʻI he tuʻa puipui ʻo e Fakamoʻoní ʻi he tēniti feʻiloakiʻangá, ʻoku totonu ke fokotuʻutuʻu ai ʻe ʻĒlone ke tauhi ʻa e ngaahi māmá ke ulo mei he efiafi ki he pongipongi ʻi he ʻao ʻo Sihová maʻu ai pē. Ko ha tuʻutuʻuni tuʻuloa ia ki he kotoa ʻo homou ngaahi toʻutangatá. 4 ʻOku totonu ke ne fokotuʻutuʻu maau ʻa e ngaahi māmá ʻi he tuʻunga-maama+ koula haohaoá ʻi he ʻao ʻo Sihová maʻu ai pē.

5 “Te ke toʻo ʻa e mahoaʻa lelei pea taʻoʻaki ia ʻa e ngaahi foʻi mā fuo hangē ha foʻi mamá ʻe 12. ʻOku totonu ke ʻai ki he foʻi mā taki taha ʻa e vahe hongofulu ʻe ua ʻo ha efa.* 6 Te ke fakaʻotu ia ki ʻolunga ʻi he tuʻunga ʻe ua, ko e ono ʻi he tuʻunga,+ ʻi he funga tēpile koula haohaoá ʻi he ʻao ʻo Sihová.+ 7 ʻOku totonu ke ke ʻai ki he tuʻunga taki taha ʻa e ʻinisēnisi hinehina haohaoa, pea ʻe hoko ia ko e mā ki ha feilaulau fakaefakaʻilonga*+ ʻoku fai ʻaki ʻa e afi kia Sihova. 8 ʻOku totonu ke ne fokotuʻutuʻu maʻu pē ia ʻi he ʻao ʻo Sihová+ ʻi he ʻaho Sāpate taki taha. Ko ha fuakava taʻengata ia mo e kau ʻIsilelí. 9 ʻE hoko ia ko e meʻa ʻa ʻĒlone mo hono ngaahi fohá,+ pea te nau kai ia ʻi ha potu toputapu,+ koeʻuhí ko ha meʻa mātuʻaki toputapu ia maʻana mei he ngaahi feilaulau kia Sihova ʻoku fai ʻaki ʻa e afí, ko ha tuʻutuʻuni taʻengata.”

10 ʻI he haʻohaʻonga leva ʻo e kau ʻIsilelí naʻe ʻi ai ha tama ʻa ha fefine ʻIsileli mo ha tangata ʻIsipite,+ pea naʻá ne kē mo ha tangata ʻIsileli ʻi he ʻapitangá. 11 Ko e tama ʻa e fefine ʻIsilelí naʻe kamata ke ne laukovi ki he Huafá* ʻo ne talatukiʻi ia.*+ Ko ia naʻa nau ʻomi ia kia Mōsese.+ Kae kehe, ko ʻene faʻeé ko Selomiti, ko e ʻofefine ʻo Tipili ʻo e matakali ʻo Taní. 12 Naʻa nau tauhi ia kae ʻoua ke fakamahino mai kiate kinautolu ʻa e tuʻutuʻuni ʻa Sihová.+

13 Naʻe folofola leva ʻa Sihova kia Mōsese: 14 “ʻOmi ʻa e tokotaha naʻá ne fai ʻa e talatukí ki he tuʻa ʻapitangá, pea ko e faʻahinga kotoa naʻa nau fanongo kiate iá kuo pau ke nau hilifaki honau nimá ʻi hono ʻulú, pea ko e fuʻu fakatahá fakakātoa leva kuo pau ke nau tolomakaʻi ia.+ 15 Pea ʻoku totonu ke ke tala ki he kau ʻIsilelí, ‘Ka ai ha tangata te ne talatukiʻi hono ʻOtuá, te ne fua ʻa e nunuʻa ʻo ʻene angahalá. 16 Ko ia ko e tokotaha naʻe laukovi ki he huafa ʻo Sihová ʻoku totonu ke mātuʻaki tāmateʻi ia.+ Ko e fuʻu fakatahá fakakātoa ʻoku totonu ke nau mātuʻaki tolomakaʻi ia. Ko e mulí ʻo tatau pē mo e tupuʻi fonuá ʻoku totonu ke tāmateʻi ia ʻi heʻene laukovi ki he Huafá.

17 “‘Kapau ʻe toʻo ʻe ha tangata ha moʻui ʻa ha taha, ʻoku totonu ke mātuʻaki tāmateʻi ia.+ 18 ʻIlonga ha taha te ne taaʻi ʻo mate ha manu lalata ʻoku totonu ke ne fai ha totongi huhuʻi ki ai, ko e moʻui ki he moʻui. 19 Kapau ʻe fakalaveaʻi ʻe ha tangata ha taha kehe, ko e meʻa leva kuó ne faí ʻoku totonu ke fai ia kiate ia.+ 20 Ko e fasi ki he fasi, mata ki he mata, nifo ki he nifo, ʻoku totonu ke fai kiate ia ʻa e faʻahinga fakalavea tatau pē mo ia naʻá ne faí.+ 21 Ko e tangata ʻokú ne taaʻi ʻo mate ha manu ʻoku totonu ke ne fai ha totongi huhuʻi ki ai,+ ka ko e tokotaha ʻokú ne taaʻi ʻo mate ha tangatá ʻoku totonu ke tāmateʻi ia.+

22 “‘ʻE taha pē ʻa e tuʻutuʻuni fakaefakamaau ʻe ngāueʻaki kiate kimoutolú, ʻo tatau pē ki ha muli pe ki ha tupuʻi fonua,+ koeʻuhí ko au Sihova ko homou ʻOtuá.’”

23 Naʻe lea leva ʻa Mōsese ki he kau ʻIsilelí, pea naʻa nau ʻomi ʻa e tokotaha ʻa ia naʻá ne leaʻaki ʻa e talatukí ki he tuʻa ʻapitangá, pea nau tolomakaʻi ia.+ Ko ia ai, naʻe fai ʻe he kau ʻIsilelí ʻa e meʻa tofu pē ko ia naʻe tuʻutuʻuni ʻe Sihova kia Mōsesé.

25 Naʻe toe folofola ʻa Sihova kia Mōsese ʻi Moʻunga Sainai, ʻo pehē: 2 “Lea ki he kau ʻIsilelí pea tala kiate kinautolu, ‘ʻI he faifai pea mou hū ki he fonua ʻoku ou foaki kiate kimoutolú,+ ʻe tauhi leva ai ʻe he fonuá ha Sāpate kia Sihova.+ 3 Ko e taʻu ʻe ono te ke tūtuuʻi ai ha tenga ʻi hoʻo ngoué, pea ko e taʻu ʻe ono te ke ʻauhani ai hoʻo ngoue kālepí, pea te ke tānaki ai ʻa e fua ʻo e fonuá.+ 4 Ka ʻi he taʻu hono fitú, ʻoku totonu ke hoko ia ko ha Sāpate ʻo e mālōlō fakaʻaufuli ki he fonuá, ko ha Sāpate kia Sihova. ʻE ʻikai te ke tūtuuʻi ha tenga ʻi hoʻo ngoué pe ʻauhani hoʻo ngoue kālepí. 5 Kuo pau ke ʻoua naʻá ke tuʻusi ʻa e meʻa naʻe tupu ʻiate ia pē mei he uite naʻe toe ʻi he hili ʻa e utu-taʻú, pea ko e kālepi mei hoʻo ʻulu kālepi naʻe ʻikai ʻauhaní kuo pau ke ʻoua naʻá ke tānaki. ʻOku totonu ke ʻi ai ha taʻu ʻo e mālōlō fakaʻaufuli ki he fonuá. 6 Kae kehe, te mou kai ʻa e meʻakai ʻoku tupu ʻi he fonuá lolotonga ʻa hono Sāpaté; ʻa koe, ko hoʻo kau tamaioʻeikí mo hoʻo kau kaunangá, ko hoʻo tokotaha ngāue totongí, mo e kau muli nofo hili ʻoku nau nofo mo koé, te mou kai ia, 7 pea pehē ki he fanga manu lalata mo e fanga manu kaivao ʻi ho fonuá. Ko e meʻa kotoa pē ʻoku tupu ʻi he fonuá ʻe lava ke kai ia.

8 “‘Te ke lau ʻa e taʻu Sāpate ʻe fitu, ko e fitu liungaʻaki ʻa e taʻu ʻe fitu, pea ko e ngaahi ʻaho ʻo e taʻu Sāpate ʻe fitú ʻe feʻunga ia mo e taʻu ʻe 49. 9 Te ke fakaongo leʻo-lahi atu leva ʻa e meʻaifí ʻi he māhina hono fitú, ʻi he ʻaho hongofulu ʻo e māhiná; ʻi he ʻAho ʻo e ʻUfiʻufi Angahalá,*+ ʻoku totonu ke mou ʻai ke ongona ʻa e leʻo ʻo e meʻaifí ʻi homou fonuá kotoa. 10 Kuo pau ke mou fakatoputapuʻi ʻa e taʻu hono 50 pea fanongonongo ha tauʻatāina ʻi he fonuá ki he faʻahinga kotoa ʻoku nofo aí.+ ʻE hoko ia ko ha Siupeli kiate kimoutolu, pea ko e tokotaha taki taha ʻo kimoutolú te ne foki ki hono tofiʻá pea ko e tokotaha taki taha ʻo kimoutolú ʻoku totonu ke ne foki ki hono fāmilí.+ 11 ʻE hoko ʻa e taʻu hono 50 ko iá ko ha Siupeli kiate kimoutolu. ʻE ʻikai te mou tūtuuʻi ai ha tenga pe tuʻusi ʻa e meʻa naʻe tupu ʻiate ia pē mei he uite naʻe toé pe tānaki kālepi mei he ʻulu kālepi naʻe ʻikai ʻauhaní.+ 12 He ko ha Siupeli ia. ʻE toputapu ia kiate kimoutolu. Te mou kai pē ʻa e meʻa ʻoku tupu ʻiate ia pē ʻi he fonuá.+

13 “‘ʻI he taʻu ko eni ʻo e Siupelí, ko e tokotaha taki taha ʻo kimoutolu ʻoku totonu ke ne foki ki hono tofiʻá.+ 14 Kapau te mou fakatau atu ha meʻa ki ha taha kehe pe kapau te mou fakatau mai meiate ia, ʻoua naʻa mou fengāueʻaki taʻefaitotonu.+ 15 ʻOku totonu ke ke fakakaukauʻi ʻa e lahi ʻo e ngaahi taʻu kuo mahili atu mei he Siupelí ʻi hoʻo fakatau mai mei ha taha kehe pea ʻoku totonu ke ne fakatau atu kiate koe ʻo fakatatau ki he toenga ʻo e ngaahi taʻu ʻe tānaki ai ʻa e fuá.+ 16 Kapau ʻoku lahi ʻa e ngaahi taʻu ʻoku toé, te ne fakalahi ʻa hono totongi fakataú, pea ʻi he siʻi ʻa e ngaahi taʻu ʻoku toé, ʻoku totonu ke ne holoki ʻa hono totongi fakataú, koeʻuhí he ʻokú ne fakatau atu kiate koe ʻa e lahi ʻo e fua ʻe maʻú. 17 ʻOku ʻikai totonu ke ngāue taʻefaitotonu ha taha ʻi homou lotolotongá ki ha taha kehe,+ pea kuo pau ke ke manavahē ki ho ʻOtuá,+ he ko au Sihova ko homou ʻOtuá.+ 18 ʻI hoʻomou fai ki heʻeku ngaahi laó pea tauhi ʻeku ngaahi tuʻutuʻuni fakaefakamāú, te mou nofo malu ai ʻi he fonuá.+ 19 ʻE ʻomai ʻe he fonuá ʻa hono fuá,+ pea te mou kai ʻo mākona pea nofo malu ʻi ai.+

20 “‘Ka ʻo kapau te mou pehē: “Ko e hā te mau kai ʻi he taʻu hono fitú kapau ʻe ʻikai te mau tūtuuʻi ʻa e tengá pe tānaki ʻa e fua ʻo ʻemau ngoué?”+ 21 Te u tuku atu ʻeku tāpuakí kiate kimoutolu ʻi he taʻu hono onó, pea ʻe tupu ʻi he fonuá ha fua ʻe feʻunga ki he taʻu ʻe tolu.+ 22 Te mou tūtuuʻi leva ʻa e tenga ʻi he taʻu hono valú pea kai mei he fua motuʻá ʻo aʻu ki he taʻu hono hivá. ʻI he teʻeki ke motuʻa ʻa hono fuá, te mou kai mei he fua motuʻá.

23 “‘ʻE ʻikai ke fakatau ʻosi+ atu ʻa e fonuá, koeʻuhí ko e fonuá ʻoku ʻoʻoku ia.+ He ko e kau nofo muli mo e kau nofo hili kimoutolu ʻi heʻeku vakaí.+ 24 ʻI he kotoa ʻo e fonua ʻoku mou maʻú, ʻoku totonu ke mou tuku atu ʻa e totonu ke toe fakatau fakafoki ʻa e fonuá.

25 “‘Kapau ʻoku hoko ʻo masiva ho tokouá pea pau ai ke ne fakatau atu ha konga ʻo hono tofiʻá, kuo pau ke haʻu ha tokotaha totongi huhuʻi ʻa ia ʻoku kāinga ofi mo ia ʻo fakatau fakafoki mai ʻa e meʻa naʻe fakatau atu ʻe hono tokouá.+ 26 Kapau ʻoku ʻi ai ha taha ʻoku ʻikai hano tokotaha totongi huhuʻi ka ʻokú ne hoko ʻo tuʻumālie pea maʻu ʻa e meʻa ke toe fakatau mai ʻaki iá, 27 ʻoku totonu ke ne fikaʻi ʻa hono mahuʻingá mei he ngaahi taʻu kuó ne fakatau atu ai iá pea totongi fakafoki ʻa e toengá ki he tangata ʻa ia naʻá ne fakatau ia ki aí. ʻE lava leva ai ke ne foki ki hono tofiʻá.+

28 “‘Ka ʻo kapau ʻoku ʻikai te ne maʻu ha meʻa ke fakafoki mai ia meiate ia, ko e meʻa kuó ne fakatau atú ʻe kei ʻi he tokotaha pē ia naʻá ne fakataú kae ʻoua ke aʻu ki he taʻu Siupelí;+ pea ʻe foki mai ia kiate ia ʻi he Siupelí, pea te ne foki ai ki hono tofiʻá.+

29 “‘Ko eni kapau ʻe fakatau atu ʻe ha tangata ha ʻapi ʻi ha kolo kuo ʻaaʻi, ko ʻene totonu ke toe fakatau maí ʻe hokohoko atu foki ia kae ʻoua ke aʻu ki he ngataʻanga ʻo e taʻú mei he taimi ʻo ʻene fakakakato ʻa hono fakatau atú; ko ʻene totonu ke toe fakatau maí+ ʻe lele ia ʻi ha taʻu kakato. 30 Ka ʻo kapau ʻe ʻikai fakatau fakafoki mai ia ʻi he aʻu ki he ngataʻanga ʻo e taʻu kakato ʻe tahá, ko e fale ʻi loto ʻi he kolo kuo ʻāʻí ʻe hoko ko e tofiʻa tuʻuloa ia ʻo e tokotaha naʻá ne fakataú ʻi he kotoa ʻo hono ngaahi toʻutangatá. ʻE ʻikai ke tuku ange ia ʻi he Siupelí. 31 Kae kehe, ko e ngaahi fale he ngaahi nofoʻanga ʻoku ʻikai ʻaaʻi takatakaí ʻoku totonu ke vakai ki ai ko e konga ia ʻo e vao ʻo e feituʻu ʻutá. Ko e totonu ke toe fakatau mai iá ʻe kei hokohoko atu pē, pea ʻe tuku ange ia ʻi he Siupelí.

32 “‘Ka ki he ngaahi fale ʻo e kau Līvaí ʻi honau ngaahi koló,+ ʻe maʻu ʻe he kau Līvaí ʻa e totonu taʻefakangatangata ke toe fakatau mai ia. 33 ʻI he ʻikai ke toe fakatau fakafoki mai ʻa e tofiʻa ʻo e kau Līvaí, ko e fale ʻoku ʻonautolu kuo fakatau atu ʻi he koló ʻe toe tuku ange mai ia ʻi he Siupelí,+ koeʻuhí ko e ngaahi fale ʻi he ngaahi kolo ʻo e kau Līvaí ko honau tofiʻa ia ʻi he lotolotonga ʻo e kau ʻIsilelí.+ 34 ʻIkai ngata aí, ko e kaikaiʻanga+ takatakai ʻi honau ngaahi koló ʻe ʻikai lava ke fakatau atu ia, he ko honau tofiʻa tuʻuloa ia.

35 “‘Kapau ʻe hoko ʻo masiva ʻa ho tokoua ʻoku nofo ofi atu kiate koé pea ʻikai lava ke ne tauhi ia, kuo pau ke ke tokangaʻi ia+ ʻo hangē ko hoʻo fai ki ha muli mo ha tokotaha nofo hili mai,+ koeʻuhí ke ne kei moʻui atu ai pē fakataha mo koe. 36 ʻOua naʻá ke toʻo ha totongi tupu pe ʻai ke maʻu ha totongi fakalahi* meiate ia.+ Kuo pau ke ke manavahē ki ho ʻOtuá,+ pea ʻe kei moʻui atu ai pē ʻa ho tokouá fakataha mo koe. 37 Kuo pau ke ʻoua te ke tuku ke ne nō ʻa hoʻo paʻangá ke ke maʻu ai ha totongi tupu+ pe foaki atu hoʻo meʻakaí ke maʻu ai ha totongi fakalahi. 38 Ko au Sihova ko homou ʻOtuá, ʻa ia naʻá ku ʻomi kimoutolu mei he fonua ko ʻIsipité+ ke foaki kiate kimoutolu ʻa e fonua ko Kēnaní, ke fakamoʻoniʻi ai ko homou ʻOtuá au.+

39 “‘Kapau ʻe hoko ʻo masiva ho tokoua ʻoku nofo ofi atu kiate koé pea pau ai ke ne fakatau atu ia kiate koe,+ kuo pau ke ʻoua naʻá ke fakamālohiʻi ia ke ne ngāue hangē ha pōpulá.+ 40 ʻOku totonu ke fai kiate ia ʻo hangē ko ha tokotaha ngāue totongí,+ hangē ha tokotaha nofo hili maí. ʻOku totonu ke ne ngāue kiate koe ʻo aʻu ki he taʻu Siupelí. 41 Pea te ne mavahe leva meiate koe, ʻa ia mo ʻene fānau* ʻoku ʻiate iá, pea foki ki hono fāmilí. ʻOku totonu ke ne foki ki he tofiʻa ʻo ʻene fanga kuí.+ 42 He ko ʻeku kau tamaioʻeiki kinautolu ʻa ia naʻá ku ʻomi mei he fonua ko ʻIsipité.+ ʻOku ʻikai totonu ke nau fakatau atu kinautolu ʻo hangē ko hono fakatau atu ʻo ha tamaioʻeikí. 43 Kuo pau ke ʻoua naʻá ke anga-fakamamahi kiate ia,+ pea kuo pau ke ke manavahē ki ho ʻOtuá.+ 44 Ko hoʻomou kau tamaioʻeikí mo e kau kaunangá ʻe maʻu ia mei he ngaahi puleʻanga takatakai ʻiate kimoutolú, ʻe lava ke mou fakatau mai meiate kinautolu ha tamaioʻeiki pe ha kaunanga. 45 Pehē foki mei he ngaahi foha ʻo e kau muli nofo hili mai ʻoku nau nofo mo kimoutolú,+ ʻe lava ke mou fakatau mai ha kau tamaioʻeiki meiate kinautolu pea mei honau ngaahi fāmili kuo fanauʻi kiate kinautolu ʻi homou fonuá, pea te nau hoko ko hoʻomou koloa. 46 Te mou tuku atu kinautolu ko ha tofiʻa tukufakaholo ki homou ngaahi foha ʻi he hili kimoutolú ke nau maʻu ko ʻenau koloa tuʻuloa. Te mou ngāueʻaki kinautolu ko ha kau ngāue, ka ko homou fanga tokoua ʻIsilelí kuo pau ke ʻoua naʻá ke fakamoʻulaloaʻi ki ha tōʻonga anga-fakamamahi.+

47 “‘Ka ʻo kapau ʻe hoko ha muli pe ko ha tokotaha nofo hili mai ʻi ho lotolotongá ʻo koloaʻia pea hoko ho tokouá ʻo masiva ʻi hono tafaʻakí pea pau ai ke ne fakatau atu ia ki he mulí pe ko e tokotaha nofo hili mai ʻoku nofo ʻi ho lotolotongá, pe ki ha mēmipa ʻo e fāmili ʻo e mulí, 48 ʻe hokohoko atu pē ʻene maʻu ʻa e totonu ki he toe fakatau maí ʻi he hili ʻene fakatau atu iá. Ko ha taha ʻo hono fanga tokouá ʻe lava ke ne fakatau fakafoki mai ia,+ 49 pe ko e tokoua ʻene tamaí pe ko e foha ʻo e tokoua ʻene tamaí ʻe lava ke ne fakatau fakafoki mai ia, pe ko ha kāinga ofi pē,* ha taha ʻo hono fāmilí, ʻe lava ke ne fakatau fakafoki mai ia.

“‘Pe kapau kuó ne hoko ʻa ia tonu ʻo koloaʻia, te ne toe fakatau fakafoki mai pē ʻa ia tonu.+ 50 ʻOku totonu ke ne fikaʻi mo e tokotaha naʻá ne fakatau iá ʻa e taimi mei he taʻu naʻá ne fakatau atu ai ia kiate iá ʻo aʻu ki he taʻu Siupelí,+ pea ko e paʻanga naʻe fakatau atu ʻaki iá ʻe hoamālie ia mo e lahi ʻo e taʻú.+ Ko hono ngaahi ʻaho ngāue lolotonga ʻa e taimi ko iá ʻe fakafuofuaʻi ʻo fakatatau ki he totongi ʻa ha tokotaha ngāue totongi.+ 51 Kapau ʻoku lahi ʻa e ngaahi taʻu ʻoku toé, ʻoku totonu ke ne totongi ʻa e mahuʻinga ʻo hono toe fakatau mai iá ʻo fehoanaki mo e ngaahi taʻu ʻoku toé. 52 Ka ʻo kapau ko ha ngaahi taʻu siʻi pē ʻoku toe pea aʻu ki he taʻu Siupelí, ʻoku totonu leva ke ne fikaʻi ʻa ia tonu pea totongi ʻa e mahuʻinga ʻo hono toe fakatau mai iá ʻo fehoanaki mo e ngaahi taʻu ʻoku toé. 53 ʻE hokohoko atu ʻene ngāue kiate iá ʻi he taʻu ki he taʻu ko ha tokotaha ngāue totongi; pea ʻoku totonu ke ke fakapapauʻi ʻoku ʻikai te ne anga-fakamamahi kiate ia.+ 54 Kae kehe, kapau ʻe ʻikai lava ke ne fakatau fakafoki mai ia ʻi he ngaahi tuʻunga ko ení, te ne tauʻatāina leva ʻi he taʻu ʻo e Siupelí,+ ʻa ia mo ʻene fānau* ʻoku ʻiate iá.

55 “‘He ko e kau ʻIsilelí ko e kau tamaioʻeiki ʻaʻaku. Ko ʻeku kau tamaioʻeiki kinautolu ʻa ia naʻá ku ʻomi mei he fonua ko ʻIsipité.+ Ko au Sihova ko homou ʻOtuá.

26 “‘Kuo pau ke ʻoua naʻa mou ngaohi maʻamoutolu ha ngaahi ʻotua taʻeʻaonga,+ pea kuo pau ke ʻoua naʻa mou fokotuʻu maʻamoutolu ha ʻīmisi kuo tongi+ pe ko ha pou maka toputapu, pea kuo pau ke ʻoua naʻa mou fokotuʻu ha ʻīmisi maka+ ʻi homou fonuá koeʻuhí ke punou ki ai;+ he ko au Sihova ko homou ʻOtuá. 2 ʻOku totonu ke mou tauhi ʻa hoku ngaahi Sāpaté pea fakahāhā ʻa e ʻapasia* ki hoku feituʻu toputapú. Ko Sihova au.

3 “‘Kapau ʻe hokohoko atu ʻa hoʻomou ʻaʻeva ʻi heʻeku ngaahi tuʻutuʻuní mo tauhi ʻa ʻeku ngaahi fekaú pea mou fakahoko ia,+ 4 te u ʻoatu kiate kimoutolu ʻa e ngaahi ʻuha ʻi honau taimi totonu,+ pea ʻe tupu ʻi he fonuá ʻa hono fuá,+ pea ʻe fua ʻa e ʻuluʻakau ʻo e ngoué. 5 Ko hoʻomou faʻahitaʻu ʻauʻaú ʻe aʻu ia ki hoʻomou faʻahitaʻu toli kālepí, pea ko e faʻahitaʻu toli kālepí ʻe aʻu ia ki he faʻahitaʻu tūtūʻí; pea te mou kai hoʻomou maá ʻo mākona pea nofo malu ʻi homou fonuá.+ 6 Te u tuku ʻa e melinó ki he fonuá,+ pea te mou tākoto ʻo ʻikai ha taha te ne ʻai kimoutolu ke mou ilifia;+ pea te u toʻo mei he fonuá ʻa e fanga manu fekaí, pea ʻe ʻikai ʻalu atu ha heletā ʻo e tau ʻi homou fonuá. 7 Te mou mātuʻaki tuli ʻa homou ngaahi filí, pea te nau tō ʻi homou ʻaó ʻi he heletaá. 8 ʻE tuli ʻe homou toko 5 ʻa e toko 100, pea ʻe tuli ʻe homou toko 100 ʻa e toko 10,000, pea ʻe tō ʻa homou ngaahi filí ʻi homou ʻaó ʻi he heletaá.+

9 “‘Te u hōifua* kiate kimoutolu pea ʻai kimoutolu ke mou fanafanau pea fakatokolahi kimoutolu,+ pea te u tauhi ʻa ʻeku fuakava mo kimoutolú.+ 10 Lolotonga hoʻomou kei kai ʻa e fua motuʻa ʻo e taʻu ki muʻá, ʻe fiemaʻu ke mou liʻaki atu ʻa e fua motuʻá kae hū mai ʻa e fua foʻoú. 11 Pea te u fokotuʻu hoku tāpanekalé ʻi homou lotolotongá,+ pea ʻe ʻikai te u siʻaki kimoutolu. 12 Te u ʻaʻeva ʻi homou lotolotongá pea hoko ko homou ʻOtua,+ pea ko kimoutolú te mou hoko ko hoku kakai.+ 13 Ko au Sihova ko homou ʻOtuá, ʻa ia naʻá ku ʻomi kimoutolu mei he fonua ko ʻIsipité ke ʻoua naʻa mou kei hoko ko ʻenau kau pōpula, pea naʻá ku fesiʻi ʻa e ʻakau ʻo hoʻomou ʻioké pea ʻai ke mou ʻalu ʻoku hiki hake homou ʻulú.*

14 “‘Kae kehe, kapau ʻe ʻikai te mou fanongo kiate au pe tauhi ʻa e kotoa ʻo e ngaahi fekaú ni,+ 15 pea kapau te mou siʻaki ʻa ʻeku ngaahi laó,+ pea kapau te mou fakaliliʻa ki heʻeku ngaahi tuʻutuʻuni fakaefakamāú ʻo ʻikai ai te mou tauhi ʻa e kotoa ʻo ʻeku ngaahi fekaú, pea mou maumauʻi ʻa ʻeku fuakavá,+ 16 ko au, ʻi heʻeku tafaʻakí, te u fai ʻa e meʻá ni kiate kimoutolu: Te u tauteaʻi kimoutolu ʻaki ʻa e mamahi, ʻi he mahaki-fatafata mo e mofi lahi, ʻo ʻai ai ke kovi hoʻomou sió pea mou fakaʻauʻausino. Te mou tūtuuʻi hoʻomou tengá ʻo ʻikai pē ke maʻu mei ai ha meʻa, he ko homou ngaahi filí te nau kai ia.+ 17 Te u siʻaki kimoutolu, pea ʻe ikunaʻi kimoutolu ʻe homou ngaahi filí;+ pea ko e faʻahinga ʻoku nau fehiʻa ʻiate kimoutolú te nau tāmoloki kimoutolu,+ pea te mou hola lolotonga ia ʻoku ʻikai ha taha te ne tuli kimoutolu.+

18 “‘Neongo kapau ʻe ʻikai ke ʻai kimoutolu ʻe he meʻá ni ke mou fanongo kiate au, ʻe pau ke u tauteaʻi kimoutolu ʻo tuʻo fitu ʻi hoʻomou ngaahi angahalá. 19 Te u laiki ʻa hoʻomou hīkisia loto-fefeká pea ʻai ke hangē ha ukameá homou langí+ pea ke hangē ha kopá homou kelekelé. 20 Te mou fakamoleki noa homou iví ʻo ʻikai maʻu mei ai ha meʻa, he ko homou kelekelé ʻe ʻikai tupu mei ai ha fua,+ pea ko e ʻuluʻakau ʻo e fonuá ʻe ʻikai fua.

21 “‘Ka ʻo kapau te mou hanganaki ʻaʻeva ʻo fakafepaki kiate au pea fakafisi ke fanongo kiate au, ʻe pau leva ai ke u taaʻi kimoutolu ʻo tuʻo fitu, ʻo fakatatau ki hoʻomou ngaahi angahalá. 22 Te u fekauʻi atu ʻa e fanga manu kaivaó ki homou lotolotongá,+ pea te nau ʻave ʻa hoʻomou fānaú+ pea fakaʻauha ʻosi ʻa hoʻomou fanga manu lalatá pea fakatokosiʻi kimoutolu, pea ʻe maomaonganoa homou ngaahi halá.+

23 “‘Kapau ʻe ʻikai te mou tali ʻa ʻeku fakatonutonú+ neongo ʻa e ngaahi meʻá ni pea mou vilitaki ke ʻaʻeva ʻo fakafepaki kiate au, 24 ko au leva te u ʻaʻeva foki ʻo fakafepaki kiate kimoutolu, pea ko au tonu te u taaʻi kimoutolu ʻo tuʻo fitu ʻi hoʻomou ngaahi angahalá. 25 Te u ʻomi ha heletā faisāuni kiate kimoutolu ʻi hono maumauʻi ʻa e fuakavá.+ Kapau te mou fakatahataha ki homou ngaahi koló, te u tuku atu ha mahaki ki homou lotolotongá,+ pea ʻe tuku atu kimoutolu ki he nima ʻo ha fili.+ 26 ʻI he taimi te u fakaʻauha ai hoʻomou tokonaki* maá,*+ ʻe malava ʻe he kau fefine ʻe toko hongofulu ke taʻo hoʻomou maá ʻi he ʻōvani pē ʻe taha pea toki tufa fakafuofua atu leva hoʻomou maá ʻaki hano fua mamafa;+ pea te mou kai ka ʻe ʻikai te mou mākona.+

27 “‘Kapau ʻe ʻikai te mou fanongo kiate au neongo ʻa e meʻá ni pea mou vilitaki ke ʻaʻeva ʻo fakafepaki kiate au, 28 te u fakalahi ʻeku fakafepaki kiate kimoutolú,+ pea ko au tonu ʻe pau ke u tautea kimoutolu ʻo tuʻo fitu ʻi hoʻomou ngaahi angahalá. 29 Ko ia ʻe pau ai ke mou kai ʻa e kakano ʻo homou ngaahi fohá, pea te mou kai ʻa e kakano ʻo homou ngaahi ʻofefiné.+ 30 Te u fakaʻauha ʻosi homou ngaahi potu māʻolunga toputapú+ pea tā hifo hoʻomou ngaahi tuʻuʻanga ʻinisēnisí pea fokotuʻutuʻu homou ngaahi ʻangaʻangá ʻi he ngaahi ʻangaʻanga ʻo hoʻomou ngaahi ʻaitoli fakalieliá,*+ pea te u hanga kehe meiate kimoutolu ʻi he fakalieliaʻia.+ 31 Te u tuku homou ngaahi koló ki he heletaá+ pea ʻai ke maomaonganoa homou ngaahi feituʻu toputapú, pea heʻikai te u nanamu ki he ngangatu fakahōifua* ʻo hoʻomou ngaahi feilaulaú. 32 Ko au tonu te u ʻai ke maomaonganoa ʻa e fonuá,+ pea ko homou ngaahi fili ʻoku nau nofo aí te nau sio fakamamaʻu ki ai ʻi he ofoofo.+ 33 Pea te u fakamovetevete kimoutolu ʻi he lotolotonga ʻo e ngaahi puleʻangá,+ pea te u unuhi ha heletā ʻo tulimui ʻiate kimoutolu;+ pea ʻe ʻai homou fonuá ke maomaonganoa,+ pea ʻe fakaʻauha homou ngaahi koló.

34 “‘ʻI he taimi ko iá ʻe toe maʻu mai ʻe he fonuá ʻa hono ngaahi Sāpaté ʻi he ngaahi ʻaho kotoa ʻe maomaonganoa ai, lolotonga ia hoʻomou ʻi he fonua ʻo homou ngaahi filí. ʻI he taimi ko iá ʻe mālōlō* ʻa e fonuá, he kuo pau ke ne toe maʻu mai ʻa hono ngaahi Sāpaté.+ 35 Ko e ngaahi ʻaho kotoa ʻe maomaonganoa aí ʻe mālōlō ai ia, koeʻuhí he naʻe ʻikai ke mālōlō ia lolotonga hoʻomou ngaahi Sāpaté ʻi he taimi naʻa mou nofo ai ʻi aí.

36 “‘Ka ki he faʻahinga ʻe haó,+ te u fakafonu honau lotó ʻaki ʻa e ʻamanaki-tōnoa ʻi he ngaahi fonua ʻo honau ngaahi filí; pea ko e ongo ʻo ha lauʻiʻakau ʻoku puhi ʻe ʻai ai kinautolu ke nau hola, pea te nau hola ʻo hangē ko ha taha ʻoku lele mei he heletaá pea te nau tō ʻo ʻikai ha taha ʻe tuli kiate kinautolu.+ 37 Te nau fehumuhumuʻi ʻo hangē ha faʻahinga ʻoku lele mei ha heletaá, neongo ʻoku ʻikai ha taha te ne tuli kinautolu. ʻE ʻikai te mou malava ke talitekeʻi homou ngaahi filí.+ 38 Te mou ʻauha ʻi he lotolotonga ʻo e ngaahi puleʻangá,+ pea ko e fonua ʻo homou ngaahi filí te ne keina kimoutolu. 39 Ko e faʻahinga ʻiate kimoutolu ʻe toé ʻe tuku ke nau ʻauʻaunga ʻi he ngaahi fonua ʻo homou ngaahi filí+ koeʻuhí ko hoʻomou faihalá. ʻIo, te nau ʻauʻaunga koeʻuhí ko e ngaahi faihala ʻa ʻenau ngaahi tamaí.+ 40 Te nau toki vete leva ʻenau faihalá tonu+ pea mo e faihala mo e taʻefaitōnunga ʻa ʻenau ngaahi tamaí pea fakahaaʻi kuo nau taʻefaitōnunga ʻi heʻenau ʻaʻeva ʻo fakafepaki kiate aú.+ 41 Naʻá ku toe ʻaʻeva leva ʻi he fakafepaki kiate kinautolu+ ʻaki hono ʻave kinautolu ki he fonua ʻo honau ngaahi filí.+

“‘Mahalo ʻi he taimi leva ko iá ʻe fakavaivaiʻi+ ai honau loto taʻekamú,* pea te nau fai leva ha totongi ki heʻenau faihalá. 42 Pea te u manatuʻi ʻa ʻeku fuakava mo Sēkopé,+ mo ʻeku fuakava mo ʻAisaké,+ pea te u manatuʻi ʻeku fuakava mo ʻĒpalahamé,+ pea te u manatuʻi ʻa e fonuá. 43 Lolotonga ʻenau liʻaki ʻa e fonuá, naʻe toe maʻu mai ʻe he fonuá ʻa hono ngaahi Sāpaté+ pea naʻe maomaonganoa ʻi he ʻikai te nau ʻi aí, pea naʻa nau fai ha totongi ki heʻenau faihalá, koeʻuhí naʻa nau siʻaki ʻeku ngaahi tuʻutuʻuni fakaefakamāú pea nau fakaliliʻa ʻi heʻeku ngaahi laó.+ 44 Ka neongo ʻa e meʻa kotoa ko ení, lolotonga ʻenau ʻi he fonua ʻo honau ngaahi filí, heʻikai ʻaupito te u siʻaki fakaʻaufuli kinautolu+ pe liʻaki kinautolu ʻo aʻu ki he tuʻunga ko hono fakaʻauhamālie kinautolu, ʻa ia ʻe maumauʻi ai ʻeku fuakava+ mo kinautolú, he ko au Sihova ko honau ʻOtuá. 45 Koeʻuhi ko kinautolu, te u manatuʻi ai ʻa e fuakava mo ʻenau fanga kuí+ ʻa ia naʻá ku ʻomai mei he fonua ko ʻIsipité ʻi he mamata ki ai ʻa e ngaahi puleʻangá,+ koeʻuhí ke fakamoʻoniʻi ai au ko honau ʻOtua. Ko Sihova au.’”

46 Ko eni ʻa e ngaahi fekau, ko e ngaahi tuʻutuʻuni fakaefakamaau, mo e ngaahi lao naʻe fokotuʻu ʻe Sihova ʻi hono vahaʻa mo e kau ʻIsilelí ʻi Moʻunga Sainai fakafou ʻia Mōsesé.+

27 Naʻe hoko atu ʻa e folofola ʻa Sihova kia Mōsesé, ʻo pehē: 2 “Lea ki he kau ʻIsilelí ʻo tala kiate kinautolu, ‘Kapau ʻe fai ʻe ha tangata ha fuakava makehe+ ke foaki kia Sihova ʻa e mahuʻinga ʻo ha taha kuo fakamahuʻingaʻi, 3 ko e mahuʻinga ʻo ha tangata ʻa ia kuo fakamahuʻingaʻi mei he taʻu 20 ki he 60 ʻe sikeli* siliva ʻe 50 ʻo fakatatau ki he tuʻunga ʻo e fua sikeli ʻo e potu toputapú.* 4 Ka ʻo kapau ko ha fefine, ko e mahuʻinga kuo fakamahuʻingaʻí ko e sikeli ʻe 30. 5 Kapau ko e taʻumotuʻá ʻoku mei he taʻu 5 ki he 20, ko e mahuʻinga ʻo e tangatá ʻa ia kuo fakamahuʻingaʻí ko e sikeli ʻe 20 pea sikeli ʻe 10 ki he fefiné. 6 Kapau ko e taʻumotuʻá ʻoku mei he māhina tahá ʻo aʻu ki he taʻu nimá, ko e mahuʻinga ʻo e tangatá ʻa ia kuo fakamahuʻingaʻí ko e sikeli siliva ʻe nima pea sikeli siliva ʻe tolu ki he fefiné.

7 “‘Kapau ko e taʻumotuʻá ko e taʻu 60 ki ʻolunga, ko e mahuʻinga ʻa ia kuo fakamahuʻingaʻí ko e sikeli ʻe 15 ki he tangatá pea sikeli ʻe 10 ki he fefiné. 8 Ka ʻo kapau ʻokú ne fuʻu masiva ke ne totongi ʻa e mahuʻinga ʻa ia kuo fakamahuʻingaʻí,+ ʻe tuʻu ʻa e tokotahá ʻi he ʻao ʻo e taulaʻeikí, pea ko e taulaʻeikí te ne fakamahuʻingaʻi ia. ʻE fai ʻe he taulaʻeikí ʻa e fakamahuʻingá ʻo fakatatau ki he meʻa ʻoku malava ke maʻu ʻe he tokotaha ʻokú ne fai ʻa e fuakavá.+

9 “‘Kapau ko e fuakavá ʻoku kau ki ai ha manu ʻoku feʻunga ke foaki kia Sihova, ko e hā pē ha meʻa ʻe foaki kia Sihová ʻe hoko ia ko ha meʻa toputapu. 10 ʻE ʻikai te ne fetongi ia pe fakafetongi ʻa e leleí ʻaki ʻa e kovi pe ko e koví ʻaki ʻa e lelei. Ka ʻo kapau te ne fakafetongi ha manu ʻaki ha manu ʻe taha, ko e ʻuluaki manú mo e manu ʻoku fakafetongiʻaki iá te na fakatou hoko ʻo toputapu. 11 Kapau ko ha manu taʻemaʻa+ ʻa ia ʻe ʻikai lava ke ʻoatu ia ko ha foaki kia Sihova, te ne fokotuʻu leva ʻa e manú ʻi he ʻao ʻo e taulaʻeikí. 12 ʻE fakamahuʻingaʻi leva ia ʻe he taulaʻeikí, pe ʻoku lelei ia pe kovi. Ko e mahuʻinga ʻa ia kuo fakamahuʻingaʻi ʻe he taulaʻeikí ʻe tuʻu ai pē. 13 Ka ʻo kapau ʻe faifai ange peá ne loto ke toe fakatau fakafoki mai ia, kuo pau leva ke ne foaki hano vahe nima ʻe taha ʻo tānaki atu ki he mahuʻinga kuo fakamahuʻingaʻí.+

14 “‘Kapau leva ʻe fakatapui ʻe ha tangata ʻa hono falé ko ha meʻa toputapu kia Sihova, ʻe fakamahuʻingaʻi leva ia ʻe he taulaʻeikí, pe ʻoku lelei ia pe kovi. Fakatatau ki he fakamahuʻinga ʻa e taulaʻeikí, ʻe pehē ʻa hono totongí.+ 15 Ka ʻo kapau ʻoku loto ʻa e tokotaha ʻokú ne fakatapui hono falé ke toe fakatau fakafoki mai ia, kuo pau leva ke ne foaki ha vahe nima ʻe taha ʻo e paʻanga ʻo e mahuʻinga kuo fakamahuʻingaʻí ʻo tānaki atu ki ai, pea ʻe hoko ia ko ʻene meʻa.

16 “‘Kapau ʻe fakatapui ʻe ha tangata kia Sihova ha konga ʻo e kelekele ʻokú ne maʻú, ʻe fakamahuʻingaʻi ʻa e mahuʻingá ʻo fakatatau ki he tenga ʻe fiemaʻu ke tūtuuʻi ʻi aí: Ko ha homa* ʻo e tengaʻi paʻalé ʻe sikeli siliva ʻe 50. 17 Kapau te ne fakatapui hono kelekelé mei he taʻu ʻo e Siupelí,+ ʻe tuʻu ai pē ʻa e mahuʻinga ʻa ia kuo fakamahuʻingaʻí. 18 Kapau te ne fakatapui hono kelekelé ʻi he hili ʻa e Siupelí, ʻe fikaʻi ʻe he taulaʻeikí maʻana ʻa e totongí ʻo fakatatau ki he ngaahi taʻu ʻoku toe ki he taʻu Siupeli hono hokó, pea ʻe holoki ʻa e mahuʻinga kuo fakamahuʻingaʻí.+ 19 Ka ʻo kapau ko e tokotaha naʻá ne fakatapui iá ʻe faifai ange peá ne toe fakatau fakafoki mai ʻa e kelekelé, kuo pau leva ke ne foaki ha vahe nima ʻe taha ʻo e paʻanga ʻo e mahuʻinga kuo fakamahuʻingaʻí ʻo tānaki atu ki ai, pea ʻe ʻaʻana ai pē ia. 20 Kapau leva ʻe ʻikai te ne toe fakatau fakafoki mai ʻa e kelekelé pea ʻoku fakatau atu ʻa e kelekelé ia ki ha tangata ʻe taha, ʻe ʻikai lava ke toe fakatau fakafoki mai ia. 21 ʻI he taimi ʻe tuku ange ai ʻa e kelekelé ʻi he Siupelí, ʻe hoko ia ko ha meʻa toputapu kia Sihova, ko ha kelekele kuo līʻoa kiate ia. ʻE hoko ia ko e tofiʻa ʻo e kau taulaʻeikí.+

22 “‘Kapau ʻe fakatapui ʻe ha tangata kia Sihova ha kelekele naʻá ne fakatau mai ʻa ia ʻoku ʻikai ko ha konga ia ʻo hono tofiʻa tukufakaholó,+ 23 ʻe fikaʻi ʻe he taulaʻeikí maʻana ʻa e lahi ʻo e fakamahuʻingá ʻo aʻu ki he taʻu ʻo e Siupelí, pea te ne ʻoange ʻa e mahuʻinga kuo fakamahuʻingaʻí ʻi he ʻaho ko iá.+ Ko ha meʻa toputapu ia kia Sihova. 24 ʻI he taʻu ʻo e Siupelí, ʻe foki ʻa e kelekelé ki he tokotaha naʻá ne fakatau mai ia mei aí, ki he tokotaha ʻoku ʻaʻana ʻa e kelekelé.+

25 “‘Ko e mahuʻinga kotoa pē ʻe fakamahuʻingaʻi ia ʻo fakatatau ki he tuʻunga ʻo e fua sikeli ʻo e potu toputapú. Ko e sikelí ko e kela* ia ʻe 20.

26 “‘Kae kehe, ʻe ʻikai fakatapui ʻe ha taha ʻa e ʻuluaki ʻuhiki tangata ʻo e fanga manú, koeʻuhí kuo fanauʻi ia ko e ʻuluaki ʻuhiki maʻa Sihova.+ Tatau ai pē pe ko ha pulu pe ko ha sipi, kuo ʻosi hoko ia ko e meʻa ʻa Sihova.+ 27 Kapau ʻoku kau ia ʻi he fanga manu taʻemaʻá peá ne totongi huhuʻi ia ʻo fakatatau ki he mahuʻinga kuo fakamahuʻingaʻí, te ne foaki ha vahe nima ʻe taha ʻo ia ʻo tānaki atu ki ai.+ Ka ʻo kapau ʻe ʻikai ke toe fakatau fakafoki mai ia, ʻe fakatau atu ia ʻo fakatatau ki he mahuʻinga kuo fakamahuʻingaʻí.

28 “‘Ka ʻe ʻikai ha meʻa kuo līʻoa atu ʻa ia ʻoku līʻoa fakaʻaufuli atu* ʻe ha tangata kia Sihova mei heʻene ngaahi meʻá ʻe lava ke fakatau atu pe toe fakatau fakafoki mai, tatau ai pē pe ko ha tangata pe fanga manu pe ko e kelekele ʻokú ne maʻú. Ko e meʻa kotoa pē ʻoku līʻoa atú ʻoku mātuʻaki toputapu ia kia Sihova.+ 29 ʻIkai ko ia pē, ʻe ʻikai lava ke totongi huhuʻi ha taha kuo fakahalaiaʻi* ʻa ia kuo fakamavaheʻi ki he fakaʻauhá.+ ʻOku totonu ke mātuʻaki tāmateʻi ia.+

30 “‘Ko e vahe hongofulu ʻe taha+ kotoa pē ʻo e fonuá, tatau ai pē pe ʻoku mei he fua ʻo e ngoué pe ko e fua ʻo e ʻuluʻakaú, ʻoku ʻa Sihova ia. Ko ha meʻa ia ʻoku toputapu kia Sihova. 31 Kapau ʻe faifai ange pea loto ha tangata ke toe fakatau fakafoki mai ha taha ʻo ʻene vahe hongofulu ʻe tahá, te ne ʻoatu ha vahe nima ʻe taha ʻo hono totongí ʻo tānaki atu ki hono mahuʻingá. 32 Pea ko e vahe hongofulu ʻe taha kotoa pē ʻo e fanga pulú mo e fanga sipí, ʻa e manu kotoa pē ʻoku fakalaka hake ʻi lalo ʻi he tokotoko ʻo e tauhi-sipí, ko e manu* hono hongofulú ʻe hoko ia ko ha meʻa toputapu kia Sihova. 33 ʻE ʻikai te ne siviʻi ia pe ʻoku lelei pe kovi, pea ʻe ʻikai te ne fakafetongi ia. Ka ʻo kapau ʻe faifai ange peá ne feinga ke fakafetongi ia, ʻe hoko fakatouʻosi ʻa e ʻuluaki manú mo e manu ʻoku fakafetongiʻaki iá ko ha meʻa toputapu.+ ʻE ʻikai lava ke toe fakatau fakafoki mai ia.’”

34 Ko e ngaahi tuʻutuʻuni eni naʻe ʻoange ʻe Sihova kia Mōsese maʻá e kau ʻIsilelí ʻi Moʻunga Sainai.+