TEUTALŌNOME

1 Ko e ngaahi lea eni naʻe fai ʻe Mōsese ki he kau ʻIsileli kotoa pē ʻi he feituʻu ʻo Sioatani ʻi he toafá, ʻi he toafa tokalelei ʻi muʻa ʻi Sufá, ʻi he vahaʻa ʻo Pēlana, Tōfeli, Lēpani, Heseloti, mo Tisahipí. 2 ʻOku ʻaho ʻe 11 mei Hōlepi ki Kētesi-pānea+ ʻo fou ʻi he hala ʻoku huʻu ki Moʻunga Seiá. 3 ʻI he taʻu hono 40,+ ʻi he māhina hono 11, ʻi he ʻuluaki ʻaho ʻo e māhiná, naʻe lea ai ʻa Mōsese ki he kau ʻIsilelí* ʻo fakatatau ki he meʻa kotoa kuo fakahinohino ʻe Sihova kiate ia ke ne tala kiate kinautolú. 4 Naʻe fai eni ʻi he hili ʻene ikunaʻi ʻa Sīhoni+ ko e tuʻi ʻo e kau ʻĀmolí, ʻa ia naʻe nofo ʻi Hesiponí, pea mo ʻOki+ ko e tuʻi ʻo Pēsaní, ʻa ia naʻe nofo ʻi ʻAsitelotí, ʻi ʻEtilei.+ 5 ʻI he feituʻu ko ia ʻo Sioatani ʻi he fonua ko Mōapé, naʻe kamata ai ke fakamatalaʻi ʻe Mōsese ʻa e Laó ni,+ ʻo ne pehē:

6 “Ko Sihova ko hotau ʻOtuá naʻá ne folofola mai kiate kitautolu ʻi Hōlepi, ‘Kuo ʻosi feʻunga hoʻomou nofo ʻi he feituʻu moʻungaʻia+ ko ení. 7 Mou hiki ʻo ʻalu ki he feituʻu moʻungaʻia ʻo e kau ʻĀmolí+ pea ki he kotoa honau ngaahi kaungāʻapi ʻi he ʻAlapá,*+ mo e feituʻu moʻungaʻiá, mo e Sefelaʻá,* mo e feituʻu Nīkepí,* pea mo e matātahí,+ ʻa e fonua ʻo e kau Kēnaní, mo Lepanoni,*+ ʻo aʻu ki he vaitafe lahí, ʻa e vaitafe ʻIufaletesí.+ 8 Vakai, kuó u tuku atu ʻa e fonuá ʻi homou ʻaó. ʻAlu atu ʻo maʻu ʻa e fonua naʻe fuakava ʻa Sihova fekauʻaki mo ia ki hoʻomou ngaahi tamaí, kia ʻĒpalahame, ʻAisake,+ mo Sēkope,+ ke foaki ia kiate kinautolu mo honau hako ʻi he hili kinautolú.’+

9 “Pea naʻá ku tala atu kiate kimoutolu ʻi he taimi ko iá, ‘Heʻikai lava ke u fua kimoutolu ʻiate au pē.+ 10 Ko Sihova ko homou ʻOtuá kuó ne fakatokolahi kimoutolu, pea ko kimoutolu eni he ʻahó ni ʻoku hangē homou tokolahí ko e ngaahi fetuʻu ʻo e langí.+ 11 Fakatauange ke hanga ʻe Sihova, ko e ʻOtua ʻo hoʻomou ngaahi kuí, ʻo fakatokolahi kimoutolu+ ʻo liunga afe ʻo hangē pē ko homou tokolahí, pea fakatauange ke ne tāpuakiʻi kimoutolu ʻo hangē pē ko ia kuó ne talaʻofaʻaki kiate kimoutolú.+ 12 ʻE lava fēfē ke u fua ʻiate au pē ʻa e mafasiaʻanga ko kimoutolú pea mo e kavenga ko kimoutolú pea mo hoʻomou fakakeé?+ 13 Fili ha kau tangata poto, mo anga-fakapotopoto, pea mo taukei mei homou ngaahi matakalí, pea te u fakanofo kinautolu ko e ngaahi ʻulu kiate kimoutolu.’+ 14 Naʻa mou tali mai kiate au, ‘Ko e meʻa kuó ke tala mai kiate kimautolu ke mau faí ʻoku lelei.’ 15 Ko ia naʻá ku toʻo mai ʻa e ngaahi ʻulumotuʻa ʻo homou ngaahi matakalí, ʻa e kau tangata poto mo taukeí, pea fakanofo kinautolu ko e ngaahi ʻulu kiate kimoutolu, ko e ngaahi ʻeiki ki he ngaahi toko afe, ko e ngaahi ʻeiki ki he ngaahi toko teau, ko e ngaahi ʻeiki ki he ngaahi toko nimangofulu, ko e ngaahi ʻeiki ki he ngaahi toko hongofulu, pea mo e kau ʻōfisa ʻo homou ngaahi matakalí.+

16 “ʻI he taimi ko iá naʻá ku fakahinohino ai ki homou kau fakamāú, ‘ʻI hoʻomou fanongo ki ha meʻa ʻi he vahaʻa homou fanga tokouá, te mou fakamaau ʻi he māʻoniʻoni+ ʻi he vahaʻa ʻo ha tangata mo hono tokouá pe ko ha muli.+ 17 Kuo pau ke ʻoua naʻa filifilimānako ʻa hoʻomou fakamāú.+ ʻOku totonu ke mou fanongo ki he māʻulaló ʻo hangē pē ko hoʻomou fanongo ki he māʻolungá.+ Kuo pau ke ʻoua naʻa mou hoko ʻo teteki ʻi ha tangata,+ he ko e fakamāú ʻoku ʻa e ʻOtuá ia;+ pea kapau ʻoku fuʻu faingataʻa ha meʻa kiate kimoutolu, ʻoku totonu ke mou ʻomi ia kiate au, pea te u fanongo ki ai.’+ 18 ʻI he taimi ko iá naʻá ku fakahinohino ai kiate kimoutolu ʻo fekauʻaki mo e ngaahi meʻa kotoa pē ʻoku totonu ke mou faí.

19 “Naʻa tau mavahe leva mei Hōlepi ʻo laka atu ʻi he toafa lahi mo fakamanavahē+ kotoa ko ia naʻa mou mamata ai ʻi he hala ki he feituʻu moʻungaʻia ʻo e kau ʻĀmolí,+ ʻo hangē tofu pē ko e tuʻutuʻuni ʻa Sihova ko hotau ʻOtuá kiate kitautolú, pea naʻe faifai pē ʻo tau aʻu ki Kētesi-pānea.+ 20 Naʻá ku pehē atu ai kiate kimoutolu, ‘Kuo mou aʻu mai ki he feituʻu moʻungaʻia ʻo e kau ʻĀmolí, ʻa ia ʻoku foaki mai ʻe Sihova ko hotau ʻOtuá kiate kitautolú. 21 Vakai, ko Sihova ko ho ʻOtuá kuó ne foaki atu ʻa e fonuá kiate koe. ʻAlu hake ʻo maʻu ia, ʻo hangē pē ko e folofola ʻa Sihova, ko e ʻOtua ʻo hoʻo ngaahi kuí, kiate koé.+ ʻOua ʻe ilifia pe manavahē.’

22 “Kae kehe, naʻa mou ʻunuʻunu kotoa mai kiate au ʻo mou pehē, ‘Tuku ke tau fekauʻi atu ha kau tangata ke nau muʻomuʻa ʻiate kitautolu ʻo vakaiʻi ʻa e fonuá maʻatautolu pea foki mai kiate kitautolu mo ha fakamatala fekauʻaki mo e hala ʻoku totonu ke tau ʻalu aí pea ko e ngaahi kolo fēfē te tau fetaulaki mo iá.’+ 23 Naʻe hā lelei kiate au ʻa e fokotuʻú, ko ia naʻá ku fili ai ha toko 12 mei hoʻomou kau tangatá, ko e toko taha maʻá e matakali taki taha.+ 24 Naʻa nau mavahe atu ʻo ʻalu hake ki he feituʻu moʻungaʻiá+ pea nau aʻu ki he Teleʻa* ʻEsikolí ʻo asiasi ʻa e fonuá. 25 Naʻa nau toʻo ha konga ʻo e fua ʻo e fonuá pea fua mai ia ʻi heʻenau foki mai kiate kitautolú, pea naʻa nau haʻu mo ha fakamatala kiate kitautolu, ‘Ko e fonua ʻoku foaki mai ʻe Sihova ko hotau ʻOtuá kiate kitautolú ʻoku lelei.’+ 26 Ka naʻa mou fakafisi ke ʻalu hake, pea naʻa mou angatuʻu ki he tuʻutuʻuni ʻa Sihova ko homou ʻOtuá.+ 27 Naʻa mou ngulungulu ai pē ʻi homou ngaahi tēnití pea mou pehē, ‘Koeʻuhi ko e fehiʻa ʻa Sihova ʻiate kitautolú naʻá ne ʻomi ai kitautolu mei he fonua ko ʻIsipité ke tuku atu kitautolu ki he kau ʻĀmolí ke fakaʻauha ʻosi kitautolu. 28 Ko e faʻahinga feituʻu fēfē ʻoku tau ʻalu ki aí? Ko hotau fanga tokouá naʻa nau fakavaivaiʻi hotau lotó*+ ʻaki ʻenau pehē, “Ko ha kakai kinautolu ʻoku nau lalahi ange mo māʻolunga ange ʻiate kitautolu, pea ko honau ngaahi koló ʻoku lalahi mo fakakolotau ʻo aʻu ki he langí,*+ pea naʻa mau sio ai ki he matakali ʻo e kau ʻĀnakí.”’+

29 “Ko ia naʻá ku pehē ai kiate kimoutolu, ‘ʻOua ʻe manavahē pe ilifia koeʻuhi ko kinautolu.+ 30 Ko Sihova ko homou ʻOtuá te ne hāʻele muʻomuʻa ʻiate kimoutolu pea te ne faitau maʻamoutolu,+ ʻo hangē pē ko ia naʻá ne fai ʻi ʻIsipite ʻo mou mamata tonu ki aí.+ 31 Pea naʻá ke mamata ʻi he toafá ki he anga hono fua koe ʻe Sihova ko ho ʻOtuá ʻo hangē pē ko hono fua ʻe ha tangata ʻa hono fohá, ʻi he feituʻu kotoa pē naʻa mou ʻalu ki aí kae ʻoua kuo mou aʻu mai ki he feituʻú ni.’ 32 Ka neongo ʻa e meʻá ni kotoa, naʻe ʻikai te mou tui kia Sihova ko homou ʻOtuá,+ 33 ʻa ia naʻe hāʻele muʻomuʻa ʻiate kimoutolu ʻi he halá ke fakasio ha feituʻu maʻamoutolu ke mou ʻapitanga ai. Naʻá ne hā ʻi ha afi ʻi he poʻulí pea ʻi ha ʻao ʻi he ʻahó ke fakahā kiate kimoutolu ʻa e hala ʻoku totonu ke mou ʻalu aí.+

34 “Lolotonga ení naʻe fanongo ʻa Sihova ki he meʻa naʻa mou leaʻakí, peá ne hoko ʻo houhau ʻo ne mātuʻaki fuakava ai,+ 35 ‘ʻE ʻikai ha taha ʻo e kau tangata ko eni ʻo e toʻutangata koví ni ʻe sio ʻi he fonua lelei naʻá ku fuakava ke foaki ki hoʻomou ngaahi tamaí,+ 36 tuku kehe pē ʻa Kēlepi ko e foha ʻo Sīfuné. Te ne sio ai, pea te u foaki ʻa e fonua naʻá ne laka atu aí kiate ia pea ki hono ngaahi fohá, koeʻuhí kuó ne muimui ʻaufuatō*+ kia Sihova. 37 (Naʻe aʻu ʻo houhau ʻa Sihova ʻiate au koeʻuhí ko kimoutolu peá ne folofola, “Ko koe foki ʻe ʻikai te ke hū ki ai.+ 38 Ko Siosiua ko e foha ʻo Nuní, ʻa ia ʻokú ne tuʻu ʻi ho ʻaó,+ ʻa e tokotaha ʻe hū ki he fonuá.+ ʻAi ia ke ne mālohi,*+ he te ne ʻai ʻa ʻIsileli ke nau maʻu ia.”) 39 ʻIkai ngata aí, ko hoʻomou fānaú ʻa ia naʻa mou pehē ʻe ʻave fakamālohí+ pea ko homou ngaahi fohá ʻa ia ʻoku ʻikai te nau ʻilo he ʻahó ni ʻa e leleí pe koví, ko e faʻahinga eni te nau huú, pea te u foaki ia kiate kinautolu ke nau maʻu.+ 40 Ka ko e meʻa kiate kimoutolú, mou tafoki pea mavahe ki he toafá ʻi he hala ʻoku huʻu ki he Tahi Kulokulá.’+

41 “Naʻa mou pehē mai leva kiate au, ‘Kuo mau faiangahala kia Sihova. Te mau ʻalu hake he taimí ni ʻo tau, ʻo hangē tofu pē ko e tuʻutuʻuni ʻa Sihova ko homau ʻOtuá kiate kimautolú!’ Ko ia ko e tokotaha taki taha ʻo kimoutolú naʻá ne ʻai ʻene ngaahi meʻataú, pea naʻa mou fakakaukau ko ha meʻa faingofua ke ʻalu hake ki he moʻungá.+ 42 Ka naʻe folofola mai ʻa Sihova kiate au, ‘Tala kiate kinautolu: “Kuo pau ke ʻoua naʻa mou ʻalu hake ʻo tau, koeʻuhí ʻe ʻikai te u ʻiate kimoutolu.+ Kapau te mou fai pehē, ʻe ikuʻi kimoutolu ʻe homou ngaahi filí.”’ 43 Ko ia naʻá ku lea kiate kimoutolu, ka naʻe ʻikai te mou fanongo. ʻI hono kehé, naʻa mou angatuʻu ki he tuʻutuʻuni ʻa Sihová pea mou ʻafungi ʻo mou feinga ke ʻalu hake ki he moʻungá. 44 Ko e kau ʻĀmolí leva ʻa ia naʻa nau nofo ʻi he moʻunga ko iá naʻa nau haʻu ke fakafetaulaki kiate kimoutolu pea nau tuli kimoutolu ʻo hangē ko ia ʻoku fai ʻe he fanga honé, pea nau fakamovetevete kimoutolu ki Seia ʻo aʻu ki Hoama. 45 Ko ia naʻa mou foki pea kamata ke mou tangi ʻi he ʻao ʻo Sihová, ka naʻe ʻikai ke fanongo ʻa Sihova kiate kimoutolu pe tokanga mai kiate kimoutolu. 46 Ko e ʻuhinga ia naʻa mou hanganaki nofo ai pē ʻi Kētesi ʻo hangē ko e fuoloa ko ia naʻa mou ʻi aí.

2 “Naʻa tau hiki leva ʻo mavahe ki he toafá ʻi he hala ʻoku huʻu ki he Tahi Kulokulá, ʻo hangē tofu pē ko ia naʻe folofola mai ʻaki ʻe Sihova kiate aú,+ pea naʻa tau fononga ʻi he ngaahi ʻaho lahi ʻo takai holo ʻi Moʻunga Seia. 2 Faifai atu pē naʻe folofola mai ʻa Sihova kiate au, 3 ‘Kuo ʻosi feʻunga hoʻomou takai holo ʻi he moʻungá ni. Mou afe leva ki he tokelaú. 4 Pea ʻoatu ʻa e fekaú ni ki he kakaí: “Te mou fou atu ʻi he kauʻāfonua ʻo homou fanga tokouá, ʻa e hako ʻo ʻĪsoa+ ʻa ia ʻoku nau nofo ʻi Seiá,+ pea te nau ilifia ʻiate kimoutolu,+ pea kuo pau ke mou tokanga ʻaupito. 5 ʻOua ʻe fakafili kiate* kinautolu, koeʻuhí heʻikai te u ʻoatu maʻamoutolu ha konga pē ʻo honau fonuá, naʻa mo ha kiʻi konga feʻunga ke tuʻu ai homou vaʻé, koeʻuhí kuó u foaki ʻa Moʻunga Seia kia ʻĪsoa ke hoko ko hono tofiʻa.+ 6 ʻOku totonu ke mou ʻoange kiate kinautolu ha paʻanga ki he meʻakai te mou kaí, pea ʻoku totonu ke mou totongi ʻa e vai te mou inú.+ 7 He kuo faitāpuekina koe ʻe Sihova ko ho ʻOtuá ʻi he meʻa kotoa kuó ke faí. ʻOkú ne ʻafioʻi lelei ʻa hoʻo fononga holo ʻi he fuʻu toafa lahí ni. Ko e ngaahi taʻu ko eni ʻe 40 kuo ʻiate koe ai ʻa Sihova ko ho ʻOtuá, pea kuo ʻikai te ke masiva ʻi ha meʻa.”’+ 8 Ko ia naʻa tau ʻalu atu ai mei hotau fanga tokouá, ʻa e hako ʻo ʻĪsoa+ ʻa ia ʻoku nau nofo ʻi Seiá, ʻo fakamamaʻo mei he hala ʻo e ʻAlapá, mei ʻEliati pea mei ʻEsioni-kepa.+

“Ko hono hokó naʻa tau hiki ʻo fononga ʻi he hala ʻoku huʻu ki he toafa ʻo Mōapé.+ 9 Naʻe folofola mai leva ʻa Sihova kiate au, ‘ʻOua ʻe fakafili pe tau mo Mōape, koeʻuhí heʻikai te u foaki atu kiate koe ha konga pē ʻo hono fonuá ke hoko ko hao tofiʻa he kuó u foaki ʻa ʻAle ke hoko ko ha tofiʻa ʻo e hako ʻo Loté.+ 10 (Ko e kau ʻĪmimé+ naʻa nau nofo ai ki muʻa, ko ha kakai mālohi mo tokolahi mo lalahi ʻo hangē ko e kau ʻĀnakí. 11 Naʻe toe vakai foki ki he kau Lifaimí+ naʻa nau hangē ko e kau ʻĀnakí,+ pea naʻe faʻa ui kinautolu ʻe he kau Mōapé ko e kau ʻĪmime. 12 Ki muʻá, naʻe nofo ʻa e kau Holí+ ʻi Seia, ka ko e hako ʻo ʻĪsoá naʻa nau ikunaʻi pea fakaʻauha ʻosi kinautolu pea nofo ʻi honau feituʻú,+ ʻo hangē pē ko ia ʻe fai ʻe ʻIsileli ki he fonua ʻa ia ko honau tofiʻa, ʻa ia ʻe foaki moʻoni ʻe Sihova kiate kinautolú.) 13 ʻAlu atu leva ʻo kolosi ʻi he Teleʻa* ko Saletí.’ Ko ia naʻa tau kolosi ai ʻi he Teleʻa* ko Saletí.+ 14 Ko e taimi ʻetau fononga mei Kētesi-pānea ʻo aʻu ki heʻetau kolosi ʻi he Teleʻa* ko Saletí ko e taʻu ʻe 38, ʻo aʻu ki he ʻauha mei he ʻapitangá ʻa e toʻutangata kotoa ʻo e kau tangata taú, ʻo hangē tofu pē ko e fuakava ʻa Sihova kiate kinautolú.+ 15 Ko e nima ʻo Sihová naʻe mafao atu kiate kinautolu ke toʻo kinautolu mei he ʻapitangá kae ʻoua kuo nau ʻauha.+

16 “ʻI he mate pē ʻa e kau tangata tau kotoa pē mei he lotolotonga ʻo e kakaí,+ 17 naʻe toe folofola mai ʻa Sihova kiate au, ʻo pehē, 18 ‘ʻI he ʻahó ni te ke fou atu ai ʻi he feituʻu ʻo Mōape, ʻa ia ko ʻAlé. 19 ʻI hoʻo fakaofi atu ki he kau ʻĀmoní, ʻoua ʻe fakahohaʻasi pe fakaʻitaʻi kinautolu, koeʻuhí heʻikai te u foaki kiate koe ha konga pē ʻo e fonua ʻo e kau ʻĀmoní ke hoko ko hao tofiʻa, he kuó u foaki ia ki he hako ʻo Loté ke hoko ko honau tofiʻa.+ 20 Ko eni foki naʻe faʻa vakai ki ai ko e fonua ʻo e kau Lifaimí.+ (Ko e kau Lifaimí naʻa nau nofo ai ki muʻa, pea naʻe faʻa ui kinautolu ʻe he kau ʻĀmoní ko e kau Samisumi. 21 Ko ha kakai mālohi mo tokolahi mo lalahi kinautolu ʻo hangē pē ko e kau ʻĀnakí;+ ka naʻe fakaʻauha ʻosi ʻe Sihova kinautolu ʻi he ʻao ʻo e kau ʻĀmoní, pea naʻe kapusi kinautolu ʻe he faʻahingá ni pea nofo ʻi honau feituʻú. 22 Ko e meʻa ia naʻá ne fai ki he hako ʻo ʻĪsoá, ʻa ia ʻoku nau nofo he taimí ni ʻi Seiá,+ ʻi he taimi naʻá ne fakaʻauha ʻosi ai ʻa e kau Holí+ mei honau ʻaó, koeʻuhi ke lava ai ʻo nau ikunaʻi kinautolu pea nau nofo ʻi honau feituʻú ʻo aʻu mai ai pē ki he ʻahó ni. 23 Ko e meʻa ki he kau ʻAví, naʻa nau nofo ʻi he ngaahi nofoʻanga naʻe lele ʻo aʻu ki Kesa+ ʻo aʻu ki he taimi naʻe haʻu ai mei Kafitoli* ʻa e kau Kafitolí+ ʻo fakaʻauha ʻosi kinautolu pea nau nofo ʻi honau feituʻú.)

24 “‘Tuʻu hake, pea mou fononga atu ʻo kolosi ʻi he Teleʻa*+ ʻAlanoní. Vakai, kuó u tuku atu ki ho nimá ʻa Sīhoni+ ko e ʻĀmolí, ʻa e tuʻi ʻo Hesiponí. Ko ia mou kamata maʻu ʻa hono fonuá, pea tau mo ia. 25 ʻI he ʻahó ni, te u kamata tuku ke tailiili mo manavahē kiate koe ʻa e kakai kotoa ʻi he lalo langí ʻoku nau fanongo ki he fakamatala fekauʻaki mo koé. Te nau hohaʻa pea te nau tetetete* koeʻuhí ko koe.’+

26 “Naʻá ku fekauʻi atu leva ʻa e kau talafekau mei he toafa Ketemotí+ kia Tuʻi Sīhoni ʻo Hesiponí, mo e ngaahi lea fakamelino ko ení,+ 27 ‘Tuku ke u fou atu ʻi ho fonuá. Te u ʻalu ai pē ʻi he halá ʻo ʻikai ke afe ki he toʻomataʻú pe ki he toʻohemá.+ 28 Te u kai pē ʻa e meʻakai mo inu pē ʻa e vai te ke fakatau mai kiate aú. Fakaʻatā mai pē au ke u laka atu ai 29 —ko e meʻa ia naʻe fai kiate au ʻe he hako ʻo ʻĪsoa ʻoku nau nofo ʻi Seiá mo e kau Mōape ʻoku nau nofo ʻi ʻAlé—kae ʻoua ke u fou atu ʻi Sioatani ki he fonua ʻoku foaki mai ʻe Sihova ko homau ʻOtuá kiate kimautolú.’ 30 Ka ko Tuʻi Sīhoni ʻo Hesiponí naʻe ʻikai te ne tuku ke tau fou atu ai, koeʻuhí ko Sihova ko ho ʻOtuá naʻá ne fakaʻatā ia ke ne hoko ʻo ongongataʻa+ pea ke hoko hono lotó ʻo fefeka, koeʻuhí ke tuku atu ia ki ho nimá ʻo hangē ko ia ʻoku lolotonga hokó.+

31 “Naʻe folofola mai leva ʻa Sihova kiate au, ‘Vakai, kuó u ʻosi kamata ke tuku atu ʻa Sīhoni mo hono fonuá kiate koe. Te ke kamata leva ke maʻu ʻa hono fonuá.’+ 32 ʻI he haʻu ʻa Sīhoni fakataha mo hono kakaí kotoa ke fakafetaulaki mai ke tau mo kitautolu ʻi Siahasá,+ 33 naʻe tuku mai ia ʻe Sihova ko hotau ʻOtuá kiate kitautolu, ko ia naʻa tau ikunaʻi ai ia, ko hono ngaahi fohá, mo e kotoa ʻo hono kakaí. 34 Naʻa tau puke ʻa e kotoa ʻo hono ngaahi koló ʻi he taimi ko iá pea tuku atu ʻa e kolo kotoa pē ki he fakaʻauha, ʻo kau ai ʻa e kakai tangatá, kakai fefiné, mo e fānaú. Naʻe ʻikai ai te tau tuku ha taha ke hao.+ 35 Naʻa tau faʻao fakamālohi maʻatautolu ʻa e fanga manú pē fakataha mo e ngaahi koloa vete* mei he ngaahi kolo naʻa tau puké. 36 Mei ʻAloeli,+ ʻa ia ʻoku ʻi he veʻe Teleʻa* ʻAlanoní (ʻo kau ai ʻa e kolo ʻa ia ʻoku ʻi he teleʻá), ʻo aʻu ki Kiliati, naʻe ʻikai ha kolo naʻa tau taʻeaʻu ki ai. Ko Sihova ko hotau ʻOtuá naʻá ne tuku mai kinautolu kotoa kiate kitautolu.+ 37 Kae kehe, naʻe ʻikai te ke fakaofi atu ki he fonua ʻo e kau ʻĀmoní,+ ʻa e veʻe Teleʻa* Siapokí+ kotoa mo e ngaahi kolo ʻo e feituʻu moʻungaʻiá, pe ko ha toe feituʻu kehe pē naʻe tapui ʻe Sihova ko hotau ʻOtuá.

3 “Naʻa tau mavahe leva ʻo ʻalu hake ʻi he Hala ʻo Pēsaní. Pea naʻe haʻu ʻa ʻOki, ko e tuʻi ʻo Pēsaní, mo hono kakaí kotoa ke fakafetaulaki kiate kitautolu ʻi he tau ʻi ʻEtileí.+ 2 Ko ia naʻe folofola mai ʻa Sihova kiate au, ‘ʻOua naʻá ke ilifia kiate ia, he te u foaki atu ia mo e kotoa ʻo hono kakaí mo hono fonuá ki ho nimá, pea te ke fai kiate ia ʻo hangē tofu pē ko e meʻa naʻá ke fai kia Sīhoni ko e tuʻi ʻo e kau ʻĀmolí, ʻa ia naʻe nofo ʻi Hesiponí.’ 3 Ko ia ko Sihova ko hotau ʻOtuá naʻá ne toe tuku mai ʻa Tuʻi ʻOki ʻo Pēsaní mo hono kakaí kotoa ki hotau nimá, pea naʻa tau hanganaki taaʻi ia kae ʻoua kuo ʻikai hao moʻui ha taha ʻi hono kakaí. 4 Naʻa tau puke leva ʻa e kotoa ʻo hono ngaahi koló. Naʻe ʻikai te tau taʻetoʻo ha kolo meiate kinautolu—ko e kolo fakakātoa ʻe 60 ʻi he feituʻu ʻo ʻĀkopá, ʻa e puleʻanga ʻo ʻOki ʻi Pēsaní.+ 5 Ko e ngaahi kolo kotoa ko ení naʻe fakakolotauʻi ʻaki ha ngaahi ʻā māʻolunga, ngaahi matapā, mo e ngaahi meʻa fakamaʻu, kaeʻumaʻā ha fanga kiʻi kolo ʻuta lahi ʻaupito. 6 Kae kehe, naʻa tau tuku atu ia ki he fakaʻauha,+ ʻo hangē pē ko ia naʻa tau fai kia Tuʻi Sīhoni ʻo Hesiponí, ʻi hono tuku atu ʻa e kolo kotoa ki he fakaʻauhá, ʻo kau ai ʻa e kakai tangatá, kakai fefiné, mo e fānaú.+ 7 Pea naʻa tau toʻo maʻatautolu ʻa e fanga manú kotoa mo e koloa vete ʻo e ngaahi koló.

8 “ʻI he taimi ko iá naʻa tau puke ʻa e fonua ʻo e ongo tuʻi ʻĀmoli+ ʻa ia naʻá na ʻi he feituʻu Sioataní, mei he Teleʻa* ʻAlanoní ʻo aʻu ki Moʻunga Heamoni+ 9 (ʻa e moʻunga naʻe faʻa ui ʻe he kau Saitoní ko Silioní pea naʻe faʻa ui ia ʻe he kau ʻĀmolí ko Senilí), 10 ko e ngaahi kolo kotoa ʻo e fonua tokalelei mo māʻolungá,* ko Kiliati kotoa, mo Pēsani kotoa ʻo aʻu ki Salika mo ʻEtilei,+ ʻa e ongo kolo ʻo e puleʻanga ʻo ʻOki ʻi Pēsaní. 11 He ko Tuʻi ʻOki ʻo Pēsaní ʻa e tokotaha fakamuimui taha naʻe toe ʻi he kau Lifaimí. Ko e mohenga* ki hono ʻangaʻangá naʻe ngaohi mei he ukameá,* pea ʻoku kei ʻi Lapa ia ʻo e kau ʻĀmoní. ʻOku kiupite* ʻe hiva ʻa hono lōloá pea kiupite ʻe fā ʻa hono fālahí, ʻo fakatatau ki he kiupite anga-mahení. 12 ʻI he taimi ko iá naʻa tau maʻu ai ʻa e fonuá ni: Mei ʻAloeli,+ ʻa ia ʻoku ʻi he veʻe Teleʻa* ʻAlanoní, mo e vaeua ʻo e feituʻu moʻungaʻia ʻo Kiliatí, pea kuó u foaki ʻa hono ngaahi koló ki he haʻa Lūpení mo e haʻa Katá.+ 13 Pea ko e toenga ʻo Kiliatí mo Pēsani kātoa ʻo e puleʻanga ʻo ʻOkí kuó u foaki ia ki he vaeua ʻo e matakali ʻo Manasé.+ Ko e feituʻu kotoa ʻo ʻĀkopá, ʻa ia ʻoku ʻo Pēsaní, naʻe ʻiloa ia ko e fonua ʻo e kau Lifaimí.

14 “Ko Saili+ ko e hako ʻo Manasé naʻá ne maʻu ʻa e feituʻu kotoa ʻo ʻĀkopá+ ʻo aʻu ki he kauʻāfonua ʻo e kau Kēsulí mo e kau Māká+ pea fakahingoa ʻa e ngaahi kolo ko ia ʻo Pēsaní kiate ia, ko Havoti-saili,*+ ʻo aʻu mai ki he ʻahó ni. 15 Pea kuó u foaki ʻa Kiliati kia Mākili.+ 16 Pea kuó u foaki ki he haʻa Lūpení mo e haʻa Katá+ mei Kiliati ki he Teleʻa* ʻAlanoní, ʻa ia ko hono ngataʻangá ʻa e loto teleʻá, pea aʻu ki Siapoki, ʻa e teleʻa ʻa ia ko e kauʻāfonua ia ʻo e kau ʻĀmoní, 17 pea mo e ʻAlapá mo Sioatani mo e kauʻāfonuá, mei Kineleti ki he Tahi ʻo e ʻAlapá, ʻa e Tahi Māsimá,* ʻi lalo ʻi he ngaahi tahifo ʻo Pisikaá ki he hahaké.+

18 “Naʻá ku fai atu leva kiate kimoutolu ʻa e tuʻutuʻuni ko ení: ‘Ko Sihova ko homou ʻOtuá kuó ne foaki atu kiate kimoutolu ʻa e fonuá ni ke mou maʻu. Ko e kotoa ʻo hoʻomou kau tangata toʻá te nau toʻo meʻatau pea kolosi atu ʻo muʻomuʻa ʻi homou fanga tokouá, ʻa e kau ʻIsilelí.+ 19 Ko homou ngaahi uaifí pē, ko hoʻomou fānaú, mo hoʻomou fanga manú (ʻoku ou ʻiloʻi lelei ʻoku mou maʻu ha fanga manu tokolahi) ʻe hokohoko atu ʻenau nofo ʻi he ngaahi kolo kuó u foaki atu maʻamoutolú, 20 kae ʻoua ke ʻoange ʻe Sihova ha mālōlō ki homou fanga tokouá, ʻo hangē pē ko ʻene fai kiate kimoutolú, pea nau maʻu foki ʻa e fonua ʻe ʻoange moʻonautolu ʻe Sihova ko homou ʻOtuá ʻi he tafaʻaki ʻe taha ʻo Sioataní. Te mou foki mai leva, ʻa e tokotaha taki taha ki hono tofiʻa kuó u foaki atu kiate kimoutolú.’+

21 “ʻI he taimi ko iá naʻá ku ʻoange ai ʻa e tuʻutuʻuni ko ení kia Siosiua:+ ‘Kuó ke sio tonu ki he meʻa kuo fai ʻe Sihova ko homou ʻOtuá ki he ongo tuʻi ko ení. ʻE fai ʻe Sihova ʻa e meʻa tatau ki he ngaahi puleʻanga kotoa ko ia te ke kolosi atu ki aí.+ 22 Kuo pau ke ʻoua naʻa mou ilifia kiate kinautolu, he ko Sihova ko homou ʻOtuá ʻa e tokotaha ʻoku tau maʻamoutolú.’+

23 “ʻI he taimi ko iá naʻá ku kōlenga ai kia Sihova, ʻo pehē, 24 ‘ʻEiki Hau Sihova, kuo kamata ke ke fakahā ki hoʻo sevānití ʻa ho lahí mo ho nima māfimafí,+ he ko hai ia ha ʻotua ʻi he langí pe ʻi he māmaní ʻokú ne fakahoko ha ngaahi ngāue māfimafiʻia pehē ʻo hangē ko koé?+ 25 Tuku muʻa ke u laka atu ʻo sio ʻi he fonua lelei ʻa ia ʻoku ʻi he tafaʻaki ʻe taha ʻo Sioataní, ʻa e feituʻu lelei moʻungaʻia ko ení pea mo Lepanoni.’+ 26 Ka naʻe kei houhau pē ʻa Sihova ʻiate au koeʻuhí ko kimoutolu,+ pea naʻe ʻikai te ne fanongo mai kiate au. ʻI hono kehé, naʻe folofola mai ʻa Sihova, ‘Kuo feʻunga! ʻOua ʻaupito naʻá ke toe lea mai kiate au ʻo fekauʻaki mo e meʻá ni. 27 ʻAlu hake ki he tumutumu ʻo Pisikaá,+ pea sio atu ki he hihifó mo e tokelaú mo e tongá pea mo e hahaké ʻo mamata tonu atu ki he fonuá, koeʻuhí heʻikai te ke kolosi ʻi heni ʻi Sioatani.+ 28 Fakanofo ʻa Siosiua+ pea fakalototoʻaʻi ia mo fakaivimālohiʻi ia, koeʻuhí ko ia ʻa e tokotaha ʻa ia ʻe kolosi ʻo muʻomuʻa+ ʻi he kakaí ni pea ko ia ʻa e tokotaha te ne ʻai kinautolu ke nau maʻu ʻa e fonua te ke sio ki aí.’ 29 Naʻe hoko kotoa eni lolotonga ʻetau nofo ʻi he teleʻá ʻi muʻa ʻi Pete-peoli.+

4 “Ko eni, ʻe ʻIsileli, fanongo ki he ngaahi lao mo e ngaahi tuʻutuʻuni fakaefakamaau ʻoku ou akoʻi kiate kimoutolu ke mou tauhí, koeʻuhí ke mou moʻui+ pea mou hū atu ʻo maʻu ʻa e fonua ʻoku foaki ʻe Sihova, ko e ʻOtua ʻo hoʻomou fanga kuí, kiate kimoutolú. 2 Kuo pau ke ʻoua naʻa mou fakalahi ʻa e lea ʻoku ou tuʻutuʻuni kiate kimoutolú, pea kuo pau foki ke ʻoua naʻa mou toʻo ha meʻa mei ai,+ koeʻuhí ke tauhi ʻa e ngaahi fekau ʻa Sihova ko homou ʻOtuá ʻa ia ʻoku ou tuʻutuʻuni atu kiate kimoutolú.

3 “Kuo mātā ʻe homou matá tonu ʻa e meʻa naʻe fai ʻe Sihova ʻi he fekauʻaki mo Pēali ʻo Peolí; naʻe fakaʻauha ʻosi ʻe Sihova ko ho ʻOtuá mei ho lotolotongá ʻa e tangata kotoa pē naʻe muimui ʻia Pēali ʻo Peolí.+ 4 Ka ko kimoutolu ko ia ʻoku piki maʻu kia Sihova ko homou ʻOtuá ʻoku mou moʻui kotoa he ʻahó ni. 5 Vakai, kuó u akoʻi kiate kimoutolu ʻa e ngaahi lao mo e ngaahi tuʻutuʻuni fakaefakamaau,+ ʻo hangē tofu pē ko e fekau ʻa Sihova ko hoku ʻOtuá kiate aú, koeʻuhí ke mou tauhi ia ʻi he fonua te mou maʻú. 6 Kuo pau ke mou mātuʻaki muimui ki ai,+ koeʻuhí ʻe hā ʻi he meʻá ni ʻa hoʻomou potó+ mo hoʻomou mahinó+ ʻi he ʻao ʻo e ngaahi kakai te nau fanongo ʻo fekauʻaki mo e ngaahi tuʻutuʻuni kotoa ko ení, pea te nau pehē, ‘Ko e fuʻu puleʻangá ni ko e moʻoni ko ha kakai poto mo mahino kinautolu.’+ 7 He ko fē ha fuʻu puleʻanga ʻoku ofi ki ai hono ngaahi ʻotuá ʻo hangē ko e ofi ʻa Sihova ko hotau ʻOtuá kiate kitautolú ʻi ha taimi pē ʻoku tau ui ai kiate ia?+ 8 Pea ko fē ha fuʻu puleʻanga ʻoku ʻi ai haʻane ngaahi lao mo haʻane ngaahi tuʻutuʻuni fakaefakamaau māʻoniʻoni ʻo hangē ko e Lao kotoa ko eni ʻoku ou tuku atu ʻi hoʻomou ʻaó he ʻaho ní?+

9 “Ke ke tokanga ʻaupito pea mātuʻaki leʻohi koe, koeʻuhí ke ʻoua naʻa ngalo ʻiate koe ʻa e ngaahi meʻa kuo mātā ʻe ho matá pea koeʻuhi ke ʻoua naʻa mahuʻi ia mei ho lotó ʻi he ngaahi ʻaho kotoa ʻo hoʻo moʻuí. Kuo pau foki ke ke ʻai ia ke ʻilo ʻe ho ngaahi fohá mo ho fanga makapuná.+ 10 ʻI he ʻaho naʻá ke tuʻu ai ʻi he ʻao ʻo Sihova ko ho ʻOtuá ʻi Hōlepí, naʻe folofola mai ai ʻa Sihova kiate au, ‘Fakatahatahaʻi mai ʻa e kakaí kiate au koeʻuhí ke u tuku ke nau fanongo ki heʻeku ngaahi leá,+ koeʻuhí ke nau ako ke manavahē kiate au+ ʻi he ngaahi ʻaho kotoa ʻo ʻenau moʻui ʻi he funga kelekelé pea ke nau akoʻi ai honau ngaahi fohá.’+

11 “Ko ia naʻa mou fakaofiofi mai ʻo tuʻu ʻi he veʻe moʻungá, pea naʻe ulo afi ʻa e moʻungá ʻo aʻu ki he langí tonu;* naʻe ʻi ai ʻa e fakapoʻuli, mo e ʻao, mo e poʻuli matolu.+ 12 Pea naʻe kamata ke folofola ʻa Sihova kiate kimoutolu mei he loto afí.+ Naʻa mou fanongo ki he ongo ʻo ha ngaahi lea, ka naʻe ʻikai lava ke mou sio ki ha taha+—ko ha leʻo pē.+ 13 Pea naʻá ne fakahaaʻi ʻene fuakavá kiate kimoutolu,+ ʻa ē ko ia naʻá ne tuʻutuʻuni ke mou tauhí—ʻa e Fekau ʻe Hongofulú.*+ ʻI he hili iá, naʻá ne hiki ia ʻi he ongo lauʻimaká.+ 14 ʻI he taimi ko iá, naʻe tuʻutuʻuni mai ai ʻa Sihova kiate au ke u akoʻi kiate kimoutolu ʻa e ngaahi lao mo e ngaahi tuʻutuʻuni fakaefakamaau, ʻa ia te mou tauhi ʻi he fonua te mou hū ki ai ʻo maʻú.

15 “Ko ia ai, mou mātuʻaki leʻohi kimoutolu—he naʻe ʻikai te mou sio ki ha meʻa ʻi he ʻaho naʻe folofola atu ai ʻa Sihova kiate kimoutolu ʻi Hōlepi mei he loto afí— 16 koeʻuhi ke ʻoua naʻa mou faikākā ʻaki hono ngaohi maʻamoutolu ha ʻīmisi kuo tongi ʻokú ne maʻu ʻa e fuo ʻo ha faʻahinga fakaʻilonga pē, ko e tatau ʻo ha tangata pe fefine,+ 17 ko e tatau ʻo ha manu pē ʻi he māmaní pe ko e tatau ʻo ha manupuna pē ʻoku puna ʻi he ʻataá,+ 18 ko e tatau ʻo ha meʻa pē ʻoku totolo mo ngaolo ʻi he kelekelé pe ko e tatau ʻo ha ika pē ʻi he ngaahi vaí ʻi lolofonua.+ 19 Pea ʻi he taimi ʻe hanga hake ai ho matá ki he langí ʻo sio ki he laʻaá, mo e māhiná pea mo e ngaahi fetuʻú—ʻa e kongakau kotoa ʻo e langí—ʻoua naʻa fakataueleʻi ai koe ʻo ke punou hifo ki ai pea tauhi ki ai.+ Kuo tuku kinautolu ʻe Sihova ko ho ʻOtuá ki he ngaahi kakai kotoa pē ʻi he lalo langí kotoa. 20 Ka ko kimoutolu ia ʻa e faʻahinga naʻe toʻo ʻe Sihova ʻo ne ʻomi mei he fōnise hakaʻanga ukameá, mei ʻIsipite, ke hoko ko e kakai ʻa ia ko ʻene meʻa ʻaʻana,*+ ʻo hangē ko ia ʻokú ke ʻi ai he ʻaho ní.

21 “Naʻe hoko ʻo houhau ʻa Sihova ʻiate au koeʻuhi ko kimoutolu,+ peá ne fuakava ʻo pehē heʻikai te u kolosi ʻi Sioatani pe hū ki he fonua lelei ʻoku foaki ʻe Sihova ko ho ʻOtuá kiate koe ke hoko ko hao tofiʻá.+ 22 He ko aú te u mate ʻi he fonuá ni; ʻe ʻikai te u kolosi ʻi Sioatani,+ ka ko kimoutolu te mou kolosi atu ʻo maʻu ʻa e fonua lelei ko ení. 23 Tokanga ke ʻoua naʻa ngalo ʻiate kimoutolu ʻa e fuakava ʻa Sihova ko homou ʻOtuá ʻa ia naʻá ne fai mo kimoutolú,+ pea ʻoua naʻa mou ngaohi maʻamoutolu ha ʻīmisi kuo tongi, ko e fuo ʻo ha meʻa pē kuo tapui kiate koe ʻe Sihova ko ho ʻOtuá.+ 24 He ko Sihova ko ho ʻOtuá ko ha afi faifakaʻauha,+ ko ha ʻOtua ʻokú ne fiemaʻu ʻa e anga-līʻoa maʻataʻataá.+

25 “Kapau te ke hoko ko e tamai ʻo ha ngaahi foha mo ha fanga makapuna pea kuo fuoloa hoʻomou nofo ʻi he fonuá pea mou fai ha tōʻonga fakatupu ʻauha pea ngaohi ha faʻahinga ʻīmisi pē kuo tongi+ peá ke fai ʻa e meʻa ʻoku kovi ʻi he vakai mai ʻa Sihova ko ho ʻOtuá ʻo fakalotomamahiʻi ai ia,+ 26 ʻoku ou ui ki he langí mo e māmaní ke na hoko ko e ongo fakamoʻoni maʻaku kiate kimoutolu ʻi he ʻahó ni, ko ia te mou ʻauha moʻoni mo vave mei he fonua ʻa ē ʻoku mou kolosi atu ʻi Sioatani ke maʻú. ʻE ʻikai te mou tolonga ai, ka ʻe fakaʻauha ʻosiʻosingamālie+ kimoutolu. 27 ʻE fakamovetevete kimoutolu ʻe Sihova ki he lotolotonga ʻo e ngaahi kakaí,+ pea ko homou kiʻi tokosiʻi pē ʻe hao moʻui+ ʻi he lotolotonga ʻo e ngaahi puleʻanga ʻe kapusi kimoutolu ʻe Sihova ki aí. 28 Kuo pau ke mou tauhi ʻi ai ki he ngaahi ʻotua ʻakau mo e ʻotua maka ko e ngaohi ʻe he nima ʻo e tangatá,+ ko e ngaahi ʻotua ʻa ia ʻoku ʻikai lava ke nau sio pe fanongo pe kai pe nāmuʻi ha meʻa.

29 “Kapau te mou kumi ʻi ai kia Sihova ko ho ʻOtuá, te ke maʻu moʻoni ia,+ kapau te ke haʻao kiate ia ʻaki ho lotó kotoa mo hoʻo moʻuí+ kotoa. 30 ʻI he taimi te ke faingataʻaʻia lahi aí pea kuo hoko kotoa ʻa e ngaahi meʻá ni kiate koe ʻi he ngaahi taimi ʻamuí, te ke toki foki ai kia Sihova ko ho ʻOtuá pea fanongo ki hono leʻó.+ 31 He ko Sihova ko ho ʻOtuá ko ha ʻOtua mohu meesi.+ Heʻikai te ne liʻaki koe pe fakaʻauha koe pe fakangaloʻi ʻa e fuakava naʻá ne fakapapauʻaki ki hoʻo fanga kuí.+

32 “ʻEke he taimí ni ʻo fekauʻaki mo e ngaahi ʻaho ki muʻa ho taimí, mei he ʻaho naʻe fakatupu ai ʻe he ʻOtuá ʻa e tangatá ʻi he māmaní; kumi mei he ngataʻanga ʻe taha ʻo e langí ki he ngataʻanga ʻe taha ʻo e langí. Kuo ʻi ai nai ha meʻa fakaofo pehē kuo faifai ange pea hoko pe kuo ʻi ai nai ha meʻa hangē ko iá kuo faifai ange pea fanongoa?+ 33 Kuo toe ʻi ai ha kakai kehe kuo nau fanongoa ʻa e leʻo ʻo e ʻOtuá ʻoku folofola mai mei he loto afí ʻo hangē ko ia kuó ke fanongo aí pea kei moʻui?+ 34 Pe kuo faifai ange pea feinga ʻa e ʻOtuá ke toʻo maʻana ha puleʻanga mei he lotolotonga ʻo ha puleʻanga ʻe taha fakataha mo e ngaahi fakamaau,* mo e ngaahi fakaʻilonga, mo e ngaahi mana,+ mo e tau,+ mo ha nima mālohi,+ mo ha nima kuo mafao atu, pea mo ha ngaahi ngāue fakamanavahē,+ ʻo hangē ko ia naʻe fai ʻe Sihova ko homou ʻOtuá maʻamoutolu ʻi ʻIsipite ʻo ke mamata tonu ki aí? 35 Ko kimoutolu tonu kuo fakahaaʻi atu ki ai ʻa e ngaahi meʻá ni ko ia te ke ʻiloʻi ai ko Sihova ʻa e ʻOtua moʻoní;+ ʻoku ʻikai ha toe ʻotua kehe tuku kehe pē ia.+ 36 Naʻá ne ʻai koe ke ke fanongo ki hono leʻó mei he langí ke fakatonutonuʻi koe, pea ʻi he māmaní naʻá ne ʻai ai koe ke ke sio ki heʻene fuʻu afí, pea ko ʻene ngaahi folofolá naʻá ke fanongo ai ʻi heʻene haʻu mei he loto afí.+

37 “Koeʻuhi ko ʻene ʻofa ʻi hoʻo fanga kuí pea kuó ne fili ʻa honau hako ʻi he hili kinautolú,+ naʻe ʻomi koe mei ʻIsipite ʻi hono ʻaó ʻaki hono fuʻu ivi mālohí. 38 Naʻá ne kapusi mei ho ʻaó ʻa e ngaahi puleʻanga lalahi ange mo mālohi ange ʻiate koé, ke fakahū mai koe pea foaki kiate koe ʻa honau fonuá ko hao tofiʻa, ʻo hangē ko ia he ʻaho ní.+ 39 Ko ia ai, ke ke ʻiloʻi ʻi he ʻahó ni, pea ʻai ki ho lotó ko Sihova ʻa e ʻOtua moʻoní, ʻi he langí ʻi ʻolungá na pea ʻi he māmaní ʻi laló ni.+ ʻOku ʻikai ha toe ʻotua kehe.+ 40 Kuo pau ke ke tauhi ʻene ngaahi tuʻutuʻuni mo ʻene ngaahi fekau ʻoku ou tuʻutuʻuni atu kiate koe he ʻaho ní, koeʻuhí ka ke lakalakaimonū ai mo ho ngaahi foha ʻi he hili koé, koeʻuhí ke ke nofo fuoloa ʻi he fonua ʻoku foaki kiate koe+ ʻe Sihova ko ho ʻOtuá.”

41 ʻI he taimi ko iá naʻe fakamavaheʻi ai ʻe Mōsese ʻa e ngaahi kolo ʻe tolu ʻi he tafaʻaki fakahahake ʻo Sioataní.+ 42 Kapau ʻe tāmateʻi fāinoa ʻe ha tokotaha tāmate tangata ha taha pea naʻe ʻikai te ne fehiʻa ai ki muʻa,+ kuo pau ke ne hola ki ha taha ʻo e ngaahi koló ni peá ne moʻui.+ 43 Ko e ngaahi koló ko Pēseli+ ʻi he toafa ʻo e fonua tokalelei mo māʻolungá* maʻá e haʻa Lūpení, mo Lēmoti+ ʻi Kiliati maʻá e haʻa Katá, pea mo Kōlani+ ʻi Pēsani maʻá e haʻa Manasé.+

44 Pea ko eni ʻa e Lao+ naʻe fokotuʻu ʻe Mōsese ʻi he ʻao ʻo e kakai ʻo ʻIsilelí. 45 Ko eni ʻa e ngaahi fakamanatu, mo e ngaahi lao, mo e ngaahi tuʻutuʻuni fakaefakamaau naʻe ʻoange ʻe Mōsese ki he kau ʻIsilelí ʻi he hili ʻenau haʻu mei ʻIsipité,+ 46 ʻi he feituʻu ʻo Sioatani, ʻi he teleʻa ʻoku hanga ki Pete-peolí,+ ʻi he fonua ʻo Tuʻi Sīhoni ʻo e kau ʻĀmolí, ʻa ia naʻe nofo ʻi Hesiponí,+ ʻa ē naʻe ikunaʻi ʻe Mōsese mo e kau ʻIsilelí ʻi he hili ʻenau haʻu mei ʻIsipité.+ 47 Pea naʻa nau maʻu ʻa hono fonuá mo e fonua ʻo Tuʻi ʻOki+ ʻo Pēsaní, ʻa e ongo tuʻi ʻo e kau ʻĀmolí ʻa ia naʻá na ʻi he feituʻu hahake ʻo Sioataní, 48 mei ʻAloeli,+ ʻa ia ʻoku ʻi he veʻe Teleʻa* ʻAlanoní, ʻo aʻu ki he Moʻunga ko Saioní, ʻa ia ko Heamoni+ ia, 49 pea mo e kotoa ʻo e ʻAlapá ʻi he feituʻu hahake ʻo Sioataní, pea aʻu ki he Tahi ʻo e ʻAlapá,* ʻi lalo ʻi he ngaahi tahifo ʻo Pisikaá.+

5 Naʻe ui leva ʻe Mōsese ʻa ʻIsileli kotoa ʻo ne pehē kiate kinautolu: “Fanongo mai, ʻe ʻIsileli, ki he ngaahi lao mo e ngaahi tuʻutuʻuni fakaefakamaau ʻoku ou fakahaaʻi atu kiate kimoutolu ʻi he ʻaho ní, pea kuo pau ke mou ako ia mo tokanga ke tauhi ia. 2 Ko Sihova ko hotau ʻOtuá naʻá ne fai ha fuakava mo kitautolu ʻi Hōlepi.+ 3 Naʻe ʻikai fai ʻe Sihova ʻa e fuakavá ni mo ʻetau fanga kuí, ka ko kitautolu, ʻa kitautolu kotoa ʻoku moʻui ʻi heni ʻi he ʻaho ní. 4 Naʻe folofola ʻa Sihova kiate kimoutolu mata ki he mata ʻi he moʻungá, mei he loto afí.+ 5 Naʻá ku tuʻu ʻi he vahaʻa ʻo Sihova mo kimoutolú ʻi he taimi ko iá+ ke fakahoko atu kiate kimoutolu ʻa e folofola ʻa Sihová, he naʻa mou ilifia koeʻuhí ko e afí pea naʻe ʻikai te mou ʻalu hake ki he moʻungá.+ Naʻá ne folofola mai:

6 “‘Ko au Sihova ko ho ʻOtuá, ʻa ia naʻá ku ʻomi koe mei he fonua ko ʻIsipité, mei he fale fakapōpulá.+ 7 Kuo pau ke ʻoua ʻaupito naʻa ʻi ai hao toe ngaahi ʻotua kehe tuku kehe pē au.*+

8 “‘Kuo pau ke ʻoua naʻá ke ngaohi maʻau ha ʻīmisi kuo tongi+ pe ko ha fakatātā ʻo fakatatau ki ha meʻa pē ʻoku ʻi he langí ʻi ʻolunga pe ʻi he māmaní ʻi lalo pe ʻi he ngaahi vaí ʻi lolofonua. 9 Kuo pau ke ʻoua naʻá ke punou hifo kiate kinautolu pe tataki koe ke tauhi kiate kinautolu,+ he ko au Sihova ko ho ʻOtuá, ko ha ʻOtua ʻokú ne fiemaʻu ʻa e anga-līʻoa maʻataʻatā,+ ʻoku ou ʻomai ʻa e tautea ki he faihala ʻa e ngaahi tamaí ʻo hilifaki ki he ngaahi fohá, ki he toʻutangata hono tolú pea ki he toʻutangata hono fā ʻo e faʻahinga ʻoku fehiʻa kiate aú,+ 10 kae fakahāhā ʻa e ʻofa mateaki* ki he afeʻi toʻutangata ʻo e faʻahinga ʻoku ʻofa kiate au mo tauhi ʻeku ngaahi fekaú.

11 “‘Kuo pau ke ʻoua naʻá ke ngāuehalaʻaki+ ʻa e huafa ʻo Sihova ko ho ʻOtuá, he ko Sihová ʻe ʻikai te ne tuku taʻetautea ha taha pē ʻokú ne ngāuehalaʻaki ʻa hono huafá.+

12 “‘Tauhi ʻa e ʻaho Sāpaté* ʻo ʻai ia ke toputapu, ʻo hangē tofu pē ko e fekau+ ʻa Sihova ko ho ʻOtuá kiate koé. 13 Ko hoʻo fakaongosiá mo hoʻo ngāué kotoa ke fai ia ʻi he ʻaho ʻe ono,+ 14 ka ko e ʻaho hono fitú ko ha Sāpate ia kia Sihova ko ho ʻOtuá.+ Kuo pau ke ʻoua naʻá ke fai ai ha ngāue,+ ʻa koe pe ko ho fohá pe ko ho ʻofefiné pe ko hoʻo tamaioʻeikí pe ko hoʻo kaunangá pe ko hoʻo pulú pe ko hoʻo ʻasí pe ko ha taha pē ʻi hoʻo fanga manu lalatá pe ko hoʻo muli ʻa ia ʻoku ʻi ho ngaahi koló,*+ koeʻuhí ke mālōlō ai ʻa hoʻo tamaioʻeikí mo hoʻo kaunangá ʻo hangē pē ko koé.+ 15 Manatuʻi naʻá ke hoko ko ha pōpula ʻi he fonua ko ʻIsipité pea naʻe ʻomi koe ʻe Sihova ko ho ʻOtuá mei ai ʻaki ha nima mālohi mo ha nima kuo mafao atu.+ Ko e ʻuhinga ia naʻe fekauʻi atu ai ʻe Sihova ko ho ʻOtuá ke ke tauhi ʻa e ʻaho Sāpaté.

16 “‘Fakaʻapaʻapa ki hoʻo tamaí mo hoʻo faʻeé,+ ʻo hangē tofu pē ko e fekau ʻa Sihova ko ho ʻOtuá kiate koé, koeʻuhí ke ke moʻui fuoloa ai pea ke ke lakalakaimonū* ʻi he fonua ʻoku foaki kiate koe ʻe Sihova ko ho ʻOtuá.+

17 “‘Kuo pau ke ʻoua naʻá ke fakapō.+

18 “‘Pea kuo pau ke ʻoua naʻá ke tono.+

19 “‘Pea kuo pau ke ʻoua naʻá ke kaihaʻa.+

20 “‘Pea kuo pau ke ʻoua naʻá ke fakamoʻoni loi ki ha taha kehe.+

21 “‘Pea kuo pau ke ʻoua naʻá ke fakaʻamua ʻa e uaifi ʻo ha taha kehe.+ Pea kuo pau ke ʻoua naʻá ke holi siokita ki he fale ʻo ha taha kehe pe ko ʻene ngoué pe ko ʻene tamaioʻeikí pe ko ʻene kaunangá pe ko ʻene pulú pe ko ʻene ʻasí pe ko ha meʻa pē ʻa e tokotaha kehé.’+

22 “Ko e ngaahi fekau* eni naʻe folofolaʻaki ʻe Sihova ki he kotoa ʻo hoʻomou fakatahaʻangá ʻi he moʻungá, mei he loto afí, ko e ʻaó, pea mo e poʻuli matolú,+ ʻi ha leʻo-lahi, pea naʻe ʻikai te ne toe tānaki ha meʻa ʻe taha ki ai; naʻá ne tohi leva ia ʻi ha ongo lauʻimaka peá ne ʻomai ia kiate au.+

23 “Ka ʻi he hili pē hoʻomou fanongo ki he leʻo ko ia mei he fakapoʻulí, lolotonga ia ʻa e ulo afi+ ʻa e moʻungá, naʻe fakaofiofi mai ʻa e ngaahi ʻulumotuʻa kotoa ʻo homou ngaahi matakalí pea mo e kau mātuʻá kiate au. 24 Naʻa mou pehē leva, ‘Ko Sihova eni ko hotau ʻOtuá kuó ne fakahaaʻi mai kiate kimautolu hono lāngilangí mo hono lahí, pea kuo mau fanongo ki hono leʻó mei he loto afí.+ ʻI he ʻahó ni kuo mau sio ai ʻoku lava ʻa e ʻOtuá ke folofola ki ha tangata pea kei lava pē ke ne moʻui.+ 25 Ko eni, ko e hā ke mau mate aí? He ko e fuʻu afí ni te ne keina kimautolu. Kapau ʻe hokohoko atu ʻemau fanongo ki he leʻo ʻo Sihova ko hotau ʻOtuá, kuo pau moʻoni ke mau mate. 26 He ko hai ia ʻi he kakano kotoa pē* kuo fanongo ki he leʻo ʻo e ʻOtua moʻuí ʻoku folofola mai mei he loto afí ʻo hangē ko kimautolú pea kei hokohoko atu pē ʻene moʻuí? 27 Ko koe tonu kuo pau ke ke fakaofiofi atu ke fanongo ki he meʻa kotoa ʻe folofolaʻaki ʻe Sihova ko hotau ʻOtuá, pea ko koe ʻa e tokotaha te ke tala mai kiate kimautolu ʻa e meʻa kotoa ʻe folofolaʻaki ʻe Sihova ko hotau ʻOtuá kiate koé, pea te mau fanongo ki ai pea fai ia.’+

28 “Ko ia naʻe fanongo ʻa Sihova ki he ngaahi lea naʻa mou leaʻaki kiate aú, pea naʻe folofola mai ʻa Sihova kiate au, ‘Kuó u fanongo ki he ngaahi lea kuo leaʻaki ʻe he kakaí ni kiate koé. Ko e meʻa kotoa kuo nau leaʻakí ʻoku lelei.+ 29 Taumaiā naʻa nau maʻu maʻu pē ha loto ʻoku hehema ke manavahē kiate au+ pea ke tauhi ʻa ʻeku ngaahi fekaú kotoa;+ pea ʻe toki hoko leva ai ʻo nau lakalakaimonū mo honau ngaahi fohá ʻo taʻengata!+ 30 ʻAlu ʻo lea kiate kinautolu: “Mou foki ki homou ngaahi tēnití.” 31 Ka te ke nofo koe ʻi heni mo au, pea tuku ke u tala atu kiate koe ʻa e kotoa ʻo e ngaahi fekau, ko e ngaahi lao, mo e ngaahi tuʻutuʻuni fakaefakamaau ʻoku totonu ke ke akoʻi kiate kinautolú pea kuo pau ke nau tauhi ʻi he fonua ko ia ʻoku ou foaki kiate kinautolu ke nau maʻú.’ 32 Pea ko kimoutolú kakai ʻoku totonu ke mou tokanga ke fai ʻo hangē tofu pē ko e fekau+ ʻa Sihova ko homou ʻOtuá kiate kimoutolú. Kuo pau ke ʻoua naʻa mou afe ki he toʻomataʻú pe ki he toʻohemá.+ 33 ʻOku totonu ke mou ʻaʻeva ʻi he hala kotoa kuo fekauʻi atu ʻe Sihova ko homou ʻOtuá kiate kimoutolú,+ koeʻuhí ke mou moʻui mo lakalakaimonū pea lōloa ai homou ngaahi ʻahó ʻi he fonua te mou maʻú.+

6 “Ko eni ʻa e ngaahi fekau, mo e ngaahi lao, pea mo e ngaahi tuʻutuʻuni fakaefakamaau kuo ʻomai ʻe Sihova ko homou ʻOtuá ke akoʻi atu kiate kimoutolú, koeʻuhí ke mou tauhi ia ʻi he taimi te mou kolosi atu ai ki he fonua te mou maʻú, 2 koeʻuhi ke ke manavahē kia Sihova ko ho ʻOtuá pea tauhi ʻa ʻene ngaahi tuʻutuʻuni mo ʻene ngaahi fekau kotoa ʻa ia ʻoku ou fekauʻi atu kiate koé—ʻa koe mo ho fohá pea mo ho mokopuná+—ʻi he ngaahi ʻaho kotoa ʻo hoʻo moʻuí, koeʻuhí ke ke moʻui fuoloa ai.+ 3 Pea kuo pau ke ke fanongo, ʻe ʻIsileli, pea tokanga ke tauhi ia, koeʻuhi ke ke lakalakaimonū ai pea hoko ʻo mātuʻaki tokolahi ʻi he fonua ʻoku mahutafea ʻi he huʻakaú mo e honé, ʻo hangē tofu pē ko e talaʻofa ʻa Sihova, ko e ʻOtua ʻo hoʻo fanga kuí kiate koé.

4 “Fanongo mai, ʻe ʻIsileli: Ko Sihova ko hotau ʻOtuá ko e tahaʻi Sihova+ ia. 5 Kuo pau ke ke ʻofa kia Sihova ko ho ʻOtuá ʻaki ho lotó kotoa mo hoʻo moʻuí+ kotoa pea mo ho mālohí*+ kotoa. 6 Ko e ngaahi lea ko eni ʻoku ou fekau atu kiate koe he ʻaho ní kuo pau ke ʻi ho lotó ia, 7 pea kuo pau ke ke faʻa akonakiʻaki ia* ki ho ngaahi fohá+ pea leaʻaki ia ʻi hoʻo tangutu ʻi ho falé pea ʻi hoʻo lue ʻi he halá pea ʻi hoʻo tokoto hifó pea ʻi hoʻo tuʻu haké.+ 8 Haʻi ia ko ha meʻa fakamanatu ʻi ho nimá, pea kuo pau ke hangē ia ko ha meʻa-haʻi ʻi ho laʻé.*+ 9 Tohi ia ʻi he ngaahi kaumatapā ʻo ho falé pea ʻi he ngaahi matapā ʻo ho koló.

10 “ʻI he taimi ʻe ʻomi ai koe ʻe Sihova ko ho ʻOtuá ki he fonua naʻá ne fuakavaʻaki ki hoʻo fanga kui ko ʻĒpalahame, ʻAisake, mo Sēkope ke foaki atu kiate koé+—ko e ngaahi kolo lalahi mo lelei naʻe ʻikai te ke langa,+ 11 ko e ngaahi fale ʻoku fonu ʻi he ngaahi meʻa lelei kehekehe kotoa naʻe ʻikai te ke ngāueʻi, ko e ngaahi lepa kuo foa naʻe ʻikai te ke keli, mo e ngaahi ngoue kālepi mo e ʻulu ʻōlive naʻe ʻikai te ke tō—pea kuó ke kai ʻo mākona+ ai, 12 tokanga ke ʻoua naʻa ngalo ʻa Sihova,+ ʻa ia naʻá ne ʻomi koe mei he fonua ko ʻIsipité, mei he fale fakapōpulá. 13 Ko Sihova ko ho ʻOtuá ʻoku totonu ke ke manavahē+ ki aí, pea ko ia ʻoku totonu ke ke tauhí,+ pea ko hono huafá ʻoku totonu ke ke fuakava+ aí. 14 Kuo pau ke ʻoua naʻa mou muimui ʻi ha ngaahi ʻotua kehe, ʻi ha ngaahi ʻotua pē ʻo e ngaahi kakai ʻoku takatakai ʻiate kimoutolú,+ 15 he ko Sihova ko ho ʻOtuá ʻa ia ʻoku ʻi ho lotolotongá ko ha ʻOtua ia ʻokú ne fiemaʻu ʻa e anga-līʻoa maʻataʻatā.+ He ka ʻikai, ko e houhau ʻa Sihova ko ho ʻOtuá ʻe kakaha kiate koe+ pea te ne fakaʻauha ʻosi koe mei he funga ʻo māmaní.+

16 “Kuo pau ke ʻoua naʻa mou ʻahiʻahiʻi+ ʻa Sihova ko homou ʻOtuá ʻo hangē ko hoʻomou ʻahiʻahiʻi ia ʻi Masá.+ 17 ʻOku totonu ke mou tauhi tōtōivi ʻa e ngaahi fekau ʻa Sihova ko homou ʻOtuá mo ʻene ngaahi fakamanatú mo ʻene ngaahi tuʻutuʻuni ʻa ia kuó ne fekau atu ke ke tauhí. 18 Kuo pau ke ke fai ʻa e meʻa ʻoku totonu mo lelei ʻi he vakai ʻa Sihová, koeʻuhí ke ke lakalakaimonū ai pea ke ke hū ai ʻo maʻu ʻa e fonua lelei ʻa ia kuo fuakava ʻa Sihova fekauʻaki mo ia ki hoʻo fanga kuí,+ 19 ʻaki hono kapusi ho ngaahi filí kotoa mei ho ʻaó, ʻo hangē tofu pē ko ia kuo talaʻofaʻaki+ ʻe Sihová.

20 “ʻI he kahaʻú, ʻi hano ʻeke atu kiate koe ʻe ho fohá, ‘Ko e hā ʻa e ʻuhinga ʻo e ngaahi fakamanatu, ko e ngaahi lao, mo e ngaahi tuʻutuʻuni fakaefakamaau kuo fekauʻi atu ʻe Sihova ko hotau ʻOtuá kiate kimoutolú?’ 21 Te ke pehē ange leva ki ho fohá, ‘Naʻa mau hoko ko e kau pōpula kia Felo ʻi ʻIsipite, ka naʻe ʻomi kimautolu ʻe Sihova mei ʻIsipite ʻaki ha nima mālohi. 22 Ko ia naʻe hanganaki ʻoatu ʻe Sihova ʻa e ngaahi fakaʻilonga mo e ngaahi mana ʻi homau ʻaó, naʻe lahi mo fakatupu ʻauha ki ʻIsipite,+ kia Felo, pea ki hono fāmilí kotoa.+ 23 Pea naʻá ne ʻomi kimautolu mei ai koeʻuhí ke ʻomi kimautolu ki heni ke foaki mai kiate kimautolu ʻa e fonua ʻa ia naʻá ne fuakava fekauʻaki mo ia ki heʻetau fanga kuí.+ 24 Naʻe fekauʻi mai leva ʻe Sihova ke mau fakahoko ʻa e ngaahi lao kotoa ko ení pea ke manavahē kia Sihova ko hotau ʻOtuá ki haʻamau lelei tuʻuloa,+ kae lava ke mau kei moʻui+ ai, ʻo hangē ko ia ʻoku mau ʻi ai he ʻaho ní. 25 Pea ʻe lau ai ʻoku tau māʻoniʻoni kapau ʻoku tau tokanga ke tauhi ʻa e ngaahi fekau kotoa ko ení ʻi he talangofua kia* Sihova ko hotau ʻOtuá, ʻo hangē tofu pē ko ia kuó ne fekauʻi mai kiate kitautolú.’+

7 “ʻI he taimi ʻe ʻomi ai koe ʻe Sihova ko ho ʻOtuá ki he fonua ʻoku teu ke ke hū ki ai ʻo maʻú,+ te ne toʻo atu foki mei ho ʻaó+ ha ngaahi puleʻanga tokolahi: Ko e kau Hetí, ko e kau Keakasá, ko e kau ʻĀmolí,+ ko e kau Kēnaní, ko e kau Pēlisí, ko e kau Heví, pea mo e kau Siepusí,+ ko e ngaahi puleʻanga ʻe fitu ʻoku nau tokolahi ange mo mālohi ange ʻiate koe.+ 2 Ko Sihova ko ho ʻOtuá te ne tuku atu kinautolu kiate koe, pea te ke ikunaʻi kinautolu.+ ʻOku totonu ke ke mātuʻaki tuku atu kinautolu ki he fakaʻauha.+ Kuo pau ke ʻoua naʻá ke teitei fai ha fuakava mo kinautolu pe teitei fakahaaʻi ha leleiʻia+ ʻiate kinautolu. 3 Kuo pau ke ʻoua naʻá ke teitei fai ha ngaahi aleapau fakaemali* mo kinautolu. ʻOua naʻá ke ʻoatu ho ngaahi ʻofefiné maʻa honau ngaahi fohá pe toʻo honau ngaahi ʻofefiné maʻa ho ngaahi fohá.+ 4 He te nau fakatafoki ho ngaahi fohá mei he muimui kiate aú ke tauhi ʻa e ngaahi ʻotua kehé;+ ʻe kakaha leva ai ʻa e houhau ʻa Sihová kiate kimoutolu, pea ʻe vave ai ʻene fakaʻauha ʻosi koé.+

5 “ʻI hono kehé, ko e meʻa eni ʻoku totonu ke mou fai kiate kinautolú: Holoki hifo honau ngaahi ʻōlitá, maumauʻi ʻenau ngaahi pou maka toputapú,+ tā hifo ʻenau ngaahi pou ʻakau toputapú,*+ pea tutu ʻenau ngaahi ʻīmisi kuo tongí.+ 6 He ko ha kakai māʻoniʻoni koe kia Sihova ko ho ʻOtuá, pea kuo fili koe ʻe Sihova ko ho ʻOtuá ke ke hoko ko ʻene kakai, ko ʻene koloa makehe* ʻi he ngaahi kakai kotoa pē ʻoku ʻi he funga ʻo māmaní.+

7 “Naʻe ʻikai koeʻuhí ko kimoutolu naʻe tokolahi taha ʻi he ngaahi kakai kotoa pē naʻe fakahāhaaʻi atu ai ʻe Sihova ʻa e ʻofá kiate kimoutolú mo fili kimoutolú,+ he ko kimoutolu naʻe tokosiʻi taha ʻi he ngaahi kakai kotoa pē.+ 8 Ka koeʻuhí ko e ʻofa ʻa Sihova ʻiate kimoutolú pea koeʻuhí ko ʻene tauhi ʻa e fuakava naʻá ne fakapapauʻaki ki hoʻomou fanga kuí+ naʻe ʻomi ai ʻe Sihova kimoutolu ʻaki ha nima mālohi, ke huhuʻi koe mei he fale fakapōpulá,+ mei he mālohi* ʻo Felo ko e tuʻi ʻo ʻIsipité. 9 ʻOkú ke ʻiloʻi lelei ko Sihova ko ho ʻOtuá ʻa e ʻOtua moʻoní, ko e ʻOtua faitōnunga, ʻokú ne tauhi ʻene fuakavá mo ʻene ʻofa mateakí ʻo aʻu ki he afeʻi toʻutangata ʻo e faʻahinga ko ia ʻoku ʻofa kiate ia mo tauhi ʻene ngaahi fekaú.+ 10 Ka ko e faʻahinga ʻoku fehiʻa kiate iá te ne totongi kiate kinautolu* ʻaki ʻa e ʻauha.+ ʻE ʻikai te ne faituai ʻi heʻene fakafeangai ki he faʻahinga ʻoku fehiʻa kiate iá; te ne totongi kiate kinautolu.* 11 Ko ia ai, tokanga ke tauhi ʻa e ngaahi fekau mo e ngaahi lao mo e ngaahi tuʻutuʻuni fakaefakamaau ʻoku ou fekauʻi atu kiate koe he ʻaho ní, ʻaki ʻa e fai ki ai.

12 “Kapau ʻe hokohoko atu hoʻomou fanongo ki he ngaahi tuʻutuʻuni fakaefakamaau ko ení pea mou tauhi ia mo fai ki ai, ko Sihova ko ho ʻOtuá te ne tauhi ʻa e fuakava mo e ʻofa mateaki ʻa ia naʻá ne fuakava fekauʻaki mo ia ki hoʻo fanga kuí. 13 Te ne ʻofa kiate koe mo tāpuakiʻi koe mo fakatokolahi koe. ʻIo, te ne tāpuakiʻi koe ʻaki ha fānau tokolahi*+ pea mo e fua ʻo ho kelekelé, ko hoʻo uité, mo hoʻo uaine foʻoú, ko hoʻo loló,+ ko e fanga kiʻi ʻuhikiʻi pulu mo e fanga lami ʻo hoʻo ngaahi tākangá, ʻi he fonua naʻá ne fuakava ki hoʻo fanga kuí ke foaki kiate koé.+ 14 Te ke hoko ko e faitāpuekina taha ʻi he ngaahi kakai kotoa pē;+ ʻe ʻikai ha tangata pe fefine ʻi ho lotolotongá ʻe taʻeʻiai haʻane fānau, pe ko hoʻo fanga manú ʻe taʻeʻiai hano ʻuhiki.+ 15 ʻE toʻo ʻe Sihova meiate koe ʻa e mahamahaki kotoa pē, pea ʻe ʻikai te ne ʻomi kiate koe ha taha ʻo e ngaahi mahaki fakamanavahē kuó ke ʻilo ki ai ʻi ʻIsipité.+ ʻI hono kehé, te ne ʻomi ia ki he faʻahinga kotoa pē ʻoku fehiʻa kiate koé. 16 Te ke fakaʻauha* ʻa e ngaahi kakai kotoa pē ʻa ia ʻoku tuku atu ʻe Sihova ko ho ʻOtuá kiate koé.+ Kuo pau ke ʻoua naʻá ke ongoʻi fakaʻofaʻia ʻiate kinautolu,+ pea kuo pau ke ʻoua naʻá ke tauhi honau ngaahi ʻotuá,+ koeʻuhí he ʻe hoko ia ko ha tauhele kiate koe.+

17 “Kapau te ke pehē ʻi ho lotó, ‘Ko e ngaahi puleʻangá ni ʻoku nau tokolahi ange ʻiate kimautolu. ʻE lava fēfē ke u kapusi kinautolu?’+ 18 Kuo pau ke ʻoua naʻá ke ilifia ʻiate kinautolu.+ ʻOku totonu ke ke manatu ki he meʻa naʻe fai ʻe Sihova ko ho ʻOtuá kia Felo mo e kotoa ʻo ʻIsipité,+ 19 ʻa e ngaahi fuʻu fakamaau* naʻe mamata ki ai ho matá mo e ngaahi fakaʻilongá mo e ngaahi maná+ mo e nima mālohi pea mo e nima kuo mafao atu ʻa ia naʻe ʻomi ʻaki koe+ ʻe Sihova ko ho ʻOtuá. Ko e meʻa ia ʻe fai ʻe Sihova ko ho ʻOtuá ki he ngaahi kakai kotoa pē ʻokú ke manavahē+ ki aí. 20 Ko Sihova ko ho ʻOtuá te ne tuku atu kiate kinautolu ʻa e ongoʻi loto-foʻí,* kae ʻoua ke ʻauha ʻa e faʻahinga naʻe toé+ mo e faʻahinga naʻa nau toitoi mei ho ʻaó. 21 ʻOua ʻe manavahē koeʻuhi ko kinautolu, he ko Sihova ko ho ʻOtuá ʻoku ʻiate koe,+ ko ha ʻOtua lahi mo fakamanavahē.+

22 “Ko Sihova ko ho ʻOtuá ko e moʻoni te ne kapusi māmālie atu+ ʻa e ngaahi puleʻangá ni mei ho ʻaó. ʻE ʻikai tuku atu koe ke ke fakangata vave kinautolu, koeʻuhí ke ʻoua naʻa hoko ai ʻo tokolahi ʻa e fanga manu kaivaó ʻiate koe. 23 Ko Sihova ko ho ʻOtuá te ne tuku atu kinautolu kiate koe pea ikunaʻi fakaʻaufuli kinautolu kae ʻoua kuo nau ʻauha ʻosi.+ 24 Te ne tuku atu ʻa honau ngaahi tuʻí ki ho nimá,+ pea te ke tafiʻi atu ʻa honau hingoá mei he lalo langí.+ ʻE ʻikai ha taha ʻe tuʻu hake kiate koe,+ kae ʻoua kuó ke fakaʻauhamālie kinautolu.+ 25 ʻOku totonu ke mou tutu ʻa e ngaahi ʻīmisi kuo tongi ʻo honau ngaahi ʻotuá ʻi he afí.+ ʻOua naʻá ke fakaʻamua ʻa e siliva mo e koula ʻoku ʻiate kinautolú pe toʻo ia maʻau,+ koeʻuhí ke ʻoua naʻa fakataueleʻi koe ʻe he meʻa ko iá, he ko e meʻa fakalielia ia kia Sihova ko ho ʻOtuá.+ 26 Kuo pau ke ʻoua naʻá ke ʻomi ha meʻa fakalielia ki ho falé peá ke hoko ai ko ha meʻa ʻoku tuku atu ki he fakaʻauhá ʻo hangē ko iá. ʻOku totonu ke ke mātuʻaki fakaliliʻa ki ai mo fakalieliaʻia fakaʻaufuli ai, koeʻuhí ko ha meʻa ia kuo tuku atu ki he fakaʻauhá.

8 “ʻOku totonu ke mou tokanga ke tauhi ʻa e tuʻutuʻuni kotoa pē ʻoku ou ʻoatu kiate kimoutolu he ʻaho ní, koeʻuhí ke hokohoko atu hoʻomou moʻuí+ mo mou fakatokolahi pea mou hū atu ʻo maʻu ʻa e fonua naʻe fuakava ʻa Sihova fekauʻaki mo ia ki hoʻomou fanga kuí.+ 2 Manatuʻi ʻa e hala lōloa naʻe ʻai ʻe Sihova ko ho ʻOtuá ke ke ʻalu ai ʻi he taʻu ʻe 40 ko eni ʻi he toafá,+ ke fakavaivaiʻi koe pea ke siviʻi+ ai koe koeʻuhí ke ʻilo ʻa e meʻa naʻe ʻi ho lotó,+ pe te ke tauhi ʻene ngaahi tuʻutuʻuní pe ʻikai. 3 Ko ia naʻá ne fakavaivaiʻi koe pea tuku koe ke ke ʻalu fiekaia+ pea fafanga koe ʻaki ʻa e maná,+ ʻa ia naʻe ʻikai te ke mātā pe mātā ʻe hoʻo ngaahi tamaí, koeʻuhi ke ʻai koe ke ke ʻilo ʻoku ʻikai ke moʻui ʻa e tangatá ʻi he maá pē ka ʻoku moʻui ʻa e tangatá ʻi he meʻa kotoa pē ʻoku ʻalu atu mei he fofonga* ʻo Sihová.+ 4 Ko e vala naʻá ke tuí naʻe ʻikai ke popo, pe hoko ho vaʻé ʻo fefulofulai ʻi he taʻu ʻe 40+ ko ení. 5 ʻOkú ke ʻiloʻi lelei ʻi ho lotó, ʻi he hangē ko hono fakatonutonu ʻe ha tangata ʻa hono fohá, naʻe pehē pē hono fakatonutonu koe+ ʻe Sihova ko ho ʻOtuá.

6 “Ko ia kuo pau ke ke tauhi ʻa e ngaahi tuʻutuʻuni ʻa Sihova ko ho ʻOtuá ʻaki ʻa e ʻaʻeva ʻi heʻene ngaahi foungá pea ʻi he manavahē kiate ia. 7 He ko Sihova ko ho ʻOtuá ʻokú ne ʻomi koe ki ha fonua lelei,+ ko ha fonua ʻo e ngaahi vaitafe,* ngaahi vai mo e ngaahi matavai* ʻoku tafe ʻi he teleʻa lautoká pea ʻi he feituʻu moʻungaʻiá, 8 ko ha fonua ʻo e uite mo e paʻale, ʻo e kālepi, ʻulu fiki, mo e pomikānite,+ ko ha fonua ʻo e lolo ʻōlive mo e hone,+ 9 ko ha fonua ʻe ʻikai ke siʻisiʻi ai ʻa e meʻakaí pea ʻe ʻikai te ke masiva ai ʻi ha meʻa, ko ha fonua ʻa ia ko e maká ʻoku ʻi ai ʻa e ʻaione pea te ke keli kopa mei hono ngaahi moʻungá.

10 “ʻI he hili hoʻo kai ʻo mākoná, kuo pau ke ke fakahīkihikiʻi ʻa Sihova ko ho ʻOtuá koeʻuhi ko e fonua lelei kuó ne foaki atu kiate koé.+ 11 Tokanga ke ʻoua naʻa ngalo ʻa Sihova ko ho ʻOtuá ʻaki ʻa e ʻikai te ke tauhi ʻa ʻene ngaahi fekaú, ko ʻene ngaahi tuʻutuʻuni fakaefakamāú, mo ʻene ngaahi lao ko ia ʻoku ou fekauʻi atu kiate koe ʻi he ʻaho ní. 12 ʻI he taimi te ke kai ai ʻo ke mākoná peá ke langa ha ngaahi fale lelei pea nofo aí,+ 13 ʻi he taimi ʻe tokolahi ai ʻa hoʻo fanga pulú mo hoʻo fanga sipí pea tupulaki ʻa hoʻo silivá mo e koulá peá ke maʻu ʻo hulu fau ʻa e meʻa kotoa peé, 14 ʻoua naʻa tuku ke hoko ʻo hīkisia+ ho lotó pea fakatupunga ai ke ngalo ʻiate koe ʻa Sihova ko ho ʻOtuá, ʻa ia naʻá ne ʻomi koe mei he fonua ko ʻIsipité, mei he fale fakapōpulá,+ 15 ʻa ia naʻá ne ʻai koe ke ke fononga ʻi he toafa lahi mo fakamanavaheé,+ ʻa ia naʻe ʻi ai ʻa e fanga ngata kona mo e fanga sikopio pea mo e kelekele pakukā naʻe ʻikai ha vai ai. Naʻá ne ʻai ke tafe mai ha vai mei he maka fefeká+ 16 pea fafanga koe ʻaki ʻa e mana+ ʻi he toafá, ʻa ia naʻe ʻikai ʻilo ki ai ʻa hoʻo ngaahi tamaí, koeʻuhí ke fakavaivaiʻi koe+ pea ke siviʻi koe ke ke maʻu ai ha lelei ʻi he kahaʻú.+ 17 Kapau te ke pehē ʻi ho lotó, ‘Ko hoku mafaí tonu pea mo e mālohi ʻo hoku nimá tonu kuó na fakatupu ʻa e koloá ni kiate aú,’+ 18 manatuʻi ko Sihova ko ho ʻOtuá ia ʻokú ne ʻoatu ʻa e mālohi kiate koe ke ke fakatupu koloá,+ koeʻuhí ke fakahoko ʻene fuakava naʻá ne fakapapauʻaki ki hoʻo fanga kuí, ʻo hangē ko ia ʻi he ʻaho ní.+

19 “Ka faifai ange pea ngalo ʻa Sihova ko ho ʻOtuá ʻiate koe peá ke muimui ʻi ha ngaahi ʻotua kehe ʻo tauhi kiate kinautolu pea punou hifo kiate kinautolu, ʻoku ou fakamoʻoni kiate kimoutolu ʻi he ʻahó ni te mou mātuʻaki ʻauha.+ 20 ʻI he hangē ko e ngaahi puleʻanga ko ia ʻoku fakaʻauha ʻe Sihova ʻi homou ʻaó, ʻe pehē pē hoʻomou ʻauhá, koeʻuhí ʻe ʻikai te mou fanongo ki he leʻo ʻo Sihova ko homou ʻOtuá.+

9 “Fanongo mai, ʻe ʻIsileli, ʻi he ʻahó ni te ke kolosi atu ai ʻi Sioatani+ ke hū ʻo ikunaʻi ʻa e ngaahi puleʻanga ʻoku lalahi ange mo mālohi ange ʻiate koe,+ ko e ngaahi kolo lalahi mo fakakolotau ʻo aʻu ki he langí,*+ 2 ko ha kakai lalahi mo lōloa, ko e matakali ʻo e kau ʻĀnakí,+ ʻa ia ʻokú ke ʻilo fekauʻaki mo kinautolu mo fanongo ai ʻi he pehē, ‘Ko hai ia ʻe tuʻu hake ki he matakali ʻo ʻĀnakí?’ 3 Ko ia ai, ʻoku totonu ke ke ʻilo he ʻahó ni ko Sihova ko ho ʻOtuá te ne kolosi atu ʻo muʻomuʻa ʻiate koe.+ Ko ha afi faifakaʻauha+ ia, pea te ne fakaʻauha ʻosi kinautolu. Te ne fakavaivaiʻi kinautolu ʻi ho ʻaó koeʻuhí ke vave ai hoʻo kapusi* kinautolu mo fakaʻauha kinautolu, ʻo hangē tofu pē ko e talaʻofa ʻa Sihova kiate koé.+

4 “ʻOua te ke pehē ʻi ho lotó ʻi he taimi ʻe kapusi ai kinautolu ʻe Sihova ko ho ʻOtuá mei ho ʻaó, ‘Koeʻuhi ko ʻeku māʻoniʻoní tonu naʻe ʻomi ai au ʻe Sihova ke u maʻu ʻa e fonuá ni.’+ Ka koeʻuhí ko e fulikivanu ʻa e ngaahi puleʻangá ni+ ʻoku kapusi ai kinautolu ʻe Sihova mei ho ʻaó. 5 ʻOku ʻikai koeʻuhí ko hoʻo māʻoniʻoní pe ko e faitotonu ʻo ho lotó ʻokú ke hū atu ai ke maʻu ʻa honau fonuá. Ka koeʻuhí ko e fulikivanu ʻa e ngaahi puleʻangá ni ʻoku kapusi ai kinautolu ʻe Sihova ko ho ʻOtuá mei ho ʻaó,+ pea koeʻuhí ke fakahoko ʻa e folofola naʻe fuakavaʻaki ʻe Sihova ki hoʻo fanga kuí, kia ʻĒpalahame,+ ʻAisake,+ mo Sēkopé.+ 6 Ko ia, ke ke ʻilo ʻoku ʻikai koeʻuhí ko hoʻo māʻoniʻoní ʻoku foaki atu ai ʻe Sihova ko ho ʻOtuá ʻa e fonua lelei ko ení kiate koe ke ke maʻú, koeʻuhí ko ha kakai loto-fefeka*+ koe.

7 “Manatuʻi—ʻoua ʻaupito naʻa ngalo—ʻa e anga hoʻo fakatupu houhau kia Sihova ko ho ʻOtuá ʻi he toafá.+ Mei he ʻaho naʻá ke mavahe mai ai mei he fonua ko ʻIsipité ʻo aʻu ki hoʻomou aʻu mai ki he feituʻú ni kuo mou angatuʻu ai kia Sihova.+ 8 Hangē pē ko ia ʻi Hōlepí naʻa mou fakatupu houhau ai kia Sihova, pea naʻe houhau lahi ʻa Sihova ʻiate kimoutolu ʻo ne mateuteu ai ke fakaʻauha ʻosi kimoutolu.+ 9 ʻI heʻeku ʻalu hake ki he moʻungá ke maʻu mai ʻa e ongo lauʻimaká,+ ʻa e ongo lauʻimaka ʻo e fuakava naʻe fai ʻe Sihova mo kimoutolú,+ naʻá ku nofo ai ʻi he moʻungá ʻi he ʻaho ʻe 40 mo e pō ʻe 40,+ ʻo ʻikai te u kai ha meʻakai mo inu ha vai. 10 Naʻe ʻomai leva ʻe Sihova kiate au ʻa e ongo lauʻimaka kuo tohi ʻe he louhiʻinima ʻo e ʻOtuá, pea naʻe ʻi ai ʻa e ngaahi folofola kotoa pē naʻe folofolaʻaki ʻe Sihova kiate kimoutolu mei he loto afí ʻi he moʻungá ʻi he ʻaho ʻo e fuʻu fakatahá.+ 11 ʻI he hili ʻa e ʻaho ʻe 40 mo e pō ʻe 40, naʻe ʻomai ai ʻe Sihova kiate au ʻa e ongo lauʻimaká, ʻa e ongo lauʻimaka ʻo e fuakavá, 12 pea naʻe folofola mai ʻa Sihova kiate au, ‘Tuʻu hake, hifo ke vave mei heni, koeʻuhí ko ho kakai ʻa ia naʻá ke ʻomi mei ʻIsipité kuo nau fai ʻa e tōʻonga te nau ʻauha ai.+ Kuo vave ʻenau tafoki mei he hala naʻá ku tuʻutuʻuni ke nau muimui aí. Kuo nau ngaohi maʻanautolu ha ʻīmisi mētale.’*+ 13 Naʻe folofola mai leva ʻa Sihova kiate au, ‘Kuó u mamata ki he kakaí ni, pea vakai, ko ha kakai loto-fefeka*+ kinautolu. 14 Tuku ange muʻa au, pea te u fakaʻauha ʻosi kinautolu pea tafiʻi atu honau hingoá mei he lalo langí, pea tuku ke u ngaohi koe ko ha puleʻanga mālohi ange mo tokolahi ange ʻiate kinautolu.’+

15 “Naʻá ku tafoki leva ʻo ʻalu hifo mei he moʻungá lolotonga ia ʻa e ulo ʻa e moʻungá ʻi he afi,+ pea ko e ongo lauʻimaka ʻo e fuakavá naʻe ʻi hoku ongo nimá fakatouʻosi.+ 16 Pea naʻá ku sio atu ʻo u vakai kuo mou faiangahala kia Sihova ko homou ʻOtuá! Kuo mou ngaohi maʻamoutolu ha ʻuhikiʻi pulu ʻo e mētale.* Kuo vave hoʻomou tafoki mei he ʻalunga naʻe tuʻutuʻuni atu ʻe Sihova ke mou muimui+ aí. 17 Ko ia naʻá ku toʻo ʻa e ongo lauʻimaká ʻo u tolongi ia ki lalo ʻaki hoku ongo nimá fakatouʻosi ʻo na movete ʻi homou ʻaó.+ 18 Naʻá ku fakatōmapeʻe leva ʻi he ʻao ʻo Sihová, ʻo hangē ko ia ʻi he ʻuluaki taimí, ʻi he ʻaho ʻe 40 mo e pō ʻe 40. Naʻe ʻikai te u kai ha meʻakai pe inu ha vai,+ koeʻuhi ko e ngaahi angahala kotoa naʻa mou fakahoko ʻi hoʻomou fai ʻa e meʻa naʻe kovi ʻi he ʻao ʻo Sihová mo fakalotomamahiʻi iá. 19 He naʻá ku manavahē koeʻuhí ko e houhau lahi ʻa Sihova ʻiate kimoutolú,+ ko ia naʻá ne mateuteu ai ke fakaʻauha ʻosi kimoutolú. Kae kehe, naʻe toe fanongo mai foki ʻa Sihova kiate au ʻi he taimi ko iá.+

20 “Naʻe houhau lahi ʻa Sihova ʻia ʻĒlone ʻo ne mateuteu ai ke fakaʻauha ʻosi ia,+ ka naʻá ku fai foki ha hū tōtōaki maʻa ʻĒlone ʻi he taimi ko iá. 21 Naʻá ku toʻo leva ʻa e meʻa naʻa mou ngaohi ʻo mou angahala aí, ʻa e ʻuhikiʻi pulú,+ peá u tutu ia ʻi he afí; naʻá ku laiki ia mo momosi kotoa ia kae ʻoua kuo momo iiki ʻo hangē ko e efuefú, pea naʻá ku laku ʻa e efuefú ki he vaitafe ʻoku tafe hifo mei he moʻungá.+

22 “ʻIkai ko ia pē, ʻi Tapela,+ ʻi Masa,+ pea ʻi Kipeloti-hataava+ naʻa mou fakatupu houhau foki ai kia Sihova. 23 ʻI he taimi naʻe fekauʻi atu ai kimoutolu ʻe Sihova mei Kētesi-pāneá+ peá ne folofola, ‘ʻAlu hake ʻo maʻu ʻa e fonua ʻa ia ko e moʻoni te u foaki atu kiate kimoutolú!’ Naʻa mou toe angatuʻu foki ki he tuʻutuʻuni ʻa Sihova ko homou ʻOtuá,+ pea naʻe ʻikai te mou ngāueʻi ʻa e tui+ kiate iá pea naʻe ʻikai te mou talangofua kiate ia. 24 Kuo mou angatuʻu kia Sihova talu pē mei heʻeku ʻiloʻi kimoutolú.

25 “Ko ia naʻá ku toutou fakatōmapeʻe ai ʻi he ʻao ʻo Sihová ʻi he ʻaho ʻe 40 mo e pō ʻe 40,+ he naʻá ku fakatōmapeʻe peheé koeʻuhi naʻe folofola ʻa Sihova te ne fakaʻauha ʻosi kimoutolu. 26 Naʻe kamata ke u hū tōtōaki kia Sihova peá u pehē, ‘ʻE ʻEiki Hau Sihova, ʻoua te ke fakaʻauha ho kakaí. Ko hoʻo meʻa*+ tonu kinautolu, ʻa ia naʻá ke huhuʻi fakafou ʻi ho lahí pea ʻomi kinautolu mei ʻIsipite ʻaki ha nima mālohi.+ 27 Manatuʻi hoʻo kau sevāniti ko ʻĒpalahame, ʻAisake mo Sēkopé.+ ʻOua te ke tokanga ki he loto-fefeka ʻa e kakaí ni, ʻa ʻenau fulikivanú pea mo ʻenau angahalá.+ 28 He ka pehē, ko e kakai ʻo e fonua naʻá ke ʻomi kimautolu mei aí te nau pehē: “Naʻe ʻikai lava ʻe Sihova ke ʻave kinautolu ki he fonua naʻá ne talaʻofaʻaki kiate kinautolú, pea koeʻuhi naʻá ne fehiʻa ʻiate kinautolu, naʻá ne ʻave ai kinautolu ke tāmateʻi ʻi he toafá.”+ 29 He ko ho kakai kinautolu pea mo hoʻo meʻa*+ tonu ʻa ia naʻá ke ʻomi ʻaki ho fuʻu ivi mālohí mo ho nima kuo mafao atú.’+

10 “ʻI he taimi ko iá naʻe folofola mai ai ʻa Sihova kiate au, ‘Tongi maʻau ha ongo lauʻimaka ʻo hangē ko e ʻuluaki ongo lauʻimaká,+ peá ke ʻalu hake kiate au ki he moʻungá; pehē foki kuo pau ke ke ngaohi maʻau ha ʻaʻake* mei he ʻakaú. 2 Pea te u tohi ʻi he ongo lauʻimaká ʻa e ngaahi lea naʻe hā ʻi he ongo ʻuluaki lauʻimaká, ʻa ē naʻá ke haʻaki ʻo moveté, pea te ke tuku ia ʻi he ʻaʻaké.’ 3 Ko ia naʻá ku ngaohi ai ha ʻaʻake mei he papa sitimí pea tongi ha ongo lauʻimaka ʻo hangē ko e ʻuluaki ongo lauʻimaká peá u ʻalu hake ki he moʻungá mo e ongo lauʻimaká ʻi hoku nimá.+ 4 Naʻá ne tohi leva ʻi he ongo lauʻimaká ʻa e ngaahi lea naʻá ne tohi ki muʻá,+ ʻa e Fekau ʻe Hongofulú,*+ ʻa ia naʻe folofolaʻaki ʻe Sihova kiate kimoutolu mei he loto afí+ ʻi he moʻungá ʻi he ʻaho ʻo e fuʻu fakatahá;+ pea naʻe ʻomai ia ʻe Sihova kiate au. 5 Naʻá ku tafoki leva ʻo ʻalu hifo mei he moʻungá+ pea tuku ʻa e ongo lauʻimaká ʻi he ʻaʻake naʻá ku ngaohí, ʻa ia ʻokú na kei ʻi ai, ʻo hangē tofu pē ko e tuʻutuʻuni ʻa Sihova kiate aú.

6 “Naʻe mavahe leva ʻa e kau ʻIsilelí mei Pieloti Peni-siakani ki Mōsela. Naʻe mate ai ʻa ʻĒlone pea naʻe tanu+ ai, pea ko hono foha ko ʻEliesá naʻe kamata ke ne ngāue ko e taulaʻeikí ʻo fetongi ia.+ 7 Naʻa nau mavahe mei ai ki Kutukota, pea mei Kutukota ki Siotipata,+ ko ha fonua ʻoku lahi ai ʻa e ngaahi vaitafé.*

8 “ʻI he taimi ko iá naʻe fakamavaheʻi ai ʻe Sihova ʻa e matakali ʻo Līvaí+ ke nau fua ʻa e ʻaʻake ʻo e fuakava ʻa Sihová,+ ke nau tuʻu ʻi he ʻao ʻo Sihová koeʻuhi ke nau fakahoko fatongia kiate ia, pea nau fai ha tāpuaki ʻi hono huafá,+ ʻo hangē ko ia ʻoku nau fai ʻo aʻu mai ki he ʻaho ní. 9 Ko e ʻuhinga ia kuo ‘ikai ai ke foaki ha ‘inasi pe ha tofi‘a kia Līvai fakataha mo hono fanga tokouá. Ko Sihova ʻa hono tofiʻá, ʻo hangē tofu pē ko e folofola ʻa Sihova ko ho ʻOtuá kiate iá.+ 10 Ko au tonu naʻá ku nofo ʻi he moʻungá ʻo hangē ko ia naʻá ku fai ʻi he ʻuluaki taimí, ʻo ʻaho 40 mo pō 40,+ pea naʻe fanongo mai ʻa Sihova kiate au ʻi he taimi foki ko iá.+ Naʻe ʻikai finangalo ʻa Sihova ke fakaʻauha koe. 11 Naʻe folofola mai leva ʻa Sihova kiate au, ‘ʻAlu muʻomuʻa ʻi he kakaí, pea teuteu ke mavahe, koeʻuhí ke nau hū atu ʻo maʻu ʻa e fonua kuó u fuakavaʻaki ki heʻenau fanga kuí ke foaki kiate kinautolú.’+

12 “Ko eni ʻe ʻIsileli, ko e hā ʻoku fiemaʻu ʻe Sihova ko ho ʻOtuá meiate koé?+ Ko eni pē: Ke manavahē kia Sihova ko ho ʻOtuá,+ ke ʻaʻeva ʻi he kotoa ʻene ngaahi foungá,+ ke ʻofa kiate ia, ke tauhi kia Sihova ko ho ʻOtuá ʻaki ho lotó kotoa mo hoʻo moʻuí+ kotoa, 13 pea ke tauhi ʻa e ngaahi fekau mo e ngaahi tuʻutuʻuni ʻa Sihova ʻoku ou fekauʻi atu kiate koe he ʻaho ní ki ha lelei pē maʻau.+ 14 Vakai, ʻoku ʻa Sihova ko ho ʻOtuá ʻa e langí, naʻa mo e langi ʻo e ngaahi langí,* mo e māmaní pea mo e meʻa kotoa ʻoku ʻi aí.+ 15 Ka ko hoʻo fanga kuí pē naʻe ʻunuʻunu ofi ʻa Sihova ʻo fakahāhā kiate kinautolu ʻa ʻene ʻofá, pea kuó ne fili kimoutolu, ʻa honau hakó,+ mei he ngaahi kakai kotoa pē, ʻo hangē ko ia ʻoku mou ʻi ai he ʻaho ní. 16 Kuo pau leva he taimí ni ke mou fakamaʻa* homou lotó+ pea tuku ʻa e fuʻu loto-fefeká.*+ 17 He ko Sihova ko homou ʻOtuá ko e ʻOtua ʻo e ngaahi ʻotua+ pea ko e ʻEiki ʻo e ngaahi ʻeiki, ko e ʻOtua lahi, mālohi, mo fakamanavahē, ʻa ia ʻoku ʻikai te ne fai filifilimānako+ ki ha taha pea ʻoku ʻikai te ne tali ha totongi fufū. 18 ʻOkú ne fakahoko ʻa e fakamaau totonu maʻá e tama ʻoku tamai-maté* mo e uitoú+ pea ʻofa ʻi he mulí,+ ʻo ʻoange kiate ia ʻa e meʻakai pea mo e vala. 19 Ko kimoutolu foki kuo pau ke mou ʻofa ʻi he mulí, he naʻa mou hoko ko e kau muli ʻi he fonua ko ʻIsipité.+

20 “Ko Sihova ko ho ʻOtuá ʻoku totonu ke ke manavahē ki aí, ko ia ʻoku totonu ke ke tauhí,+ ko ia ʻoku totonu ke ke pīkitai ki aí, pea ko hono huafá ʻoku totonu ke ke fuakava aí. 21 Ko ia ʻa e Tokotaha ke ke fakahīkihikiʻí.+ Ko ia ho ʻOtua, ʻa ia kuó ne fai maʻau ʻa e ngaahi meʻa lahi mo fakamanavahē kotoa ko ení ʻa ia kuo mātā ʻe ho matá tonu.+ 22 Naʻe ʻalu hifo hoʻo fanga kuí ki ʻIsipite+ mo e toko 70, pea ko eni kuo ngaohi koe ʻe Sihova ko ho ʻOtuá ke hangē ho tokolahí ko e ngaahi fetuʻu ʻo e langí.+

11 “Kuo pau ke ke ʻofa kia Sihova ko ho ʻOtuá+ pea tauhi maʻu pē ho fatongia kiate iá mo ʻene ngaahi laó, mo ʻene ngaahi tuʻutuʻuni fakaefakamāú, pea mo ʻene ngaahi fekaú. 2 ʻOku mou ʻilo ko e ʻahó ni ʻoku ou lea atu ai kiate kimoutolú, ʻo ʻikai ki homou ngaahi fohá ʻa ia kuo ʻikai te nau ʻiloʻi pe mamata ki he akonaki meia Sihova ko homou ʻOtuá,+ ko hono lahí,+ ko hono nima mālohí+ pea mo hono nima kuo mafao atú. 3 Naʻe ʻikai te nau mamata ki heʻene ngaahi mana mo ʻene ngaahi ngāue naʻá ne fai ʻi ʻIsipite kia Felo ko e tuʻi ʻo ʻIsipité pea ki he kotoa ʻo hono fonuá;+ 4 pe ko e meʻa naʻá ne fai ki he kau tau ʻa ʻIsipité, ki he fanga hoosi mo e ngaahi saliote tau ʻa Feló, ʻa ia naʻe lōmekina ʻe he ngaahi vai ʻo e Tahi Kulokulá ʻi he taimi naʻa nau tulimui atu ai ʻiate kimoutolu, pea fakaʻauha ai kinautolu ʻe Sihova ʻo tā-tuʻo-taha.*+ 5 Naʻe ʻikai te nau mamata ki he meʻa kuó ne fai maʻamoutolu ʻi he toafá ʻo aʻu ki hoʻomou aʻu mai ki he feituʻu ko ení, 6 pe ko e meʻa naʻá ne fai kia Tētani mo ʻApilami, ko e ongo foha ʻo ʻEliapi ko e hako ʻo Lūpení, ʻi he taimi naʻe fakamanga hake ai ʻa e kelekelé ʻo folo kinaua, fakataha mo hona ongo fāmilí mo honau ngaahi tēnití mo e meʻamoʻui kotoa pē naʻe muimui ʻiate kinauá, ʻi he ʻao ʻo ʻIsilelí kotoa.+ 7 Ko homou matá tonu naʻe mamata ki he ngaahi fuʻu ngāue kotoa naʻe fai ʻe Sihová.

8 “Kuo pau ke mou tauhi ʻa e fekau kotoa ʻoku ou ʻoatu kiate koe he ʻaho ní, koeʻuhí ke mou hoko ai ʻo mālohi pea kolosi atu ki he fonuá ʻo maʻu ia, 9 pea koeʻuhi ke mou moʻui fuoloa+ ai ʻi he fonua naʻe fuakava ʻa Sihova ke foaki ki hoʻomou fanga kuí mo honau hakó,+ ko ha fonua ʻoku mahutafea ʻi he huʻakau mo e hone.+

10 “Ko e fonua ʻokú ke ʻalu atu ke maʻú ʻoku ʻikai ke hangē ia ko e fonua ko ʻIsipité, ʻa ia naʻa mou haʻu mei aí, ʻa ia naʻá ke faʻa tūtuuʻi ai hoʻo tengá pea fakatafe vai ki ai ʻaki ho vaʻé,* ʻo hangē ha ngoue vesitapoló. 11 Ka ko e fonua ʻoku teu ke mou kolosi ki ai ʻo maʻú ko ha fonua ia ʻo e ngaahi moʻunga mo e ngaahi teleʻa lautoka.+ ʻOkú ne inumia ʻa e vai ʻoku tō hifo mei he langí;+ 12 ko ha fonua ia ʻoku tokangaʻi ʻe Sihova ko ho ʻOtuá. ʻOku ʻi ai maʻu pē ʻa e fofonga ʻo Sihova ko ho ʻOtuá, mei he kamataʻanga ʻo e taʻú ki he ngataʻanga ʻo e taʻú.

13 “Pea kapau te mou tōtōivi ʻi hoʻomou talangofua ki heʻeku ngaahi fekau ʻoku ou fekauʻi atu kiate kimoutolu he ʻaho ní pea ʻofa kia Sihova ko homou ʻOtuá ʻo tauhi kiate ia ʻaki homou lotó kotoa mo hoʻomou moʻuí+ kotoa, 14 te u ʻoatu foki ai ʻa e ʻuha ki homou fonuá ʻi hono taimi kotofá, ko e ʻuha ʻi he faʻahitaʻu fakatōlaú mo e ʻuha ʻi he faʻahitaʻu failaú, pea te ke tānaki hoʻo uité mo hoʻo uaine foʻoú pea mo hoʻo loló.+ 15 Pea te u ʻai ke tupu ha mohuku ʻi hoʻo ngaahi ngoué maʻa hoʻo fanga manú, pea te ke kai ʻo mākona.+ 16 Tokanga ke ʻoua naʻa tuku ke fakataueleʻi homou lotó ke mou afe ʻo lotu ki he ngaahi ʻotua kehé pea punou hifo kiate kinautolu.+ 17 He ka pehē, ʻe kakaha hifo kiate kimoutolu ʻa e houhau ʻa Sihová, pea te ne tāpuni ʻa e langí koeʻuhi ke ʻoua naʻa ʻuha+ pea ʻe ʻikai tuku mai ʻe he kelekelé hono fuá pea te mou ʻauha vave ai mei he fonua lelei ʻoku foaki atu ʻe Sihova kiate kimoutolú.+

18 “Kuo pau ke mou ʻai ke maongo ʻa e ngaahi lea ko eni ʻaʻakú ki homou lotó mo hoʻomou moʻuí pea haʻi ia ko ha meʻa fakamanatu ʻi homou nimá, pea ʻoku totonu ke hangē ia ko ha meʻa-haʻi ʻi homou laʻé.*+ 19 Mou akoʻi ia ki hoʻomou fānaú, ʻo lea fekauʻaki mo ia ʻi hoʻo tangutu ʻi ho falé pea ʻi hoʻo lue ʻi he halá pea ʻi hoʻo tokoto hifó pea ʻi hoʻo tuʻu haké.+ 20 Tohi ia ʻi he ngaahi kaumatapā ʻo ho falé pea ʻi he ngaahi matapā ʻo ho koló, 21 koeʻuhi ke mou moʻui fuoloa+ ai mo homou ngaahi fohá ʻi he fonua naʻe fuakava ʻa Sihova ke foaki ki hoʻomou fanga kuí,+ ʻo hangē pē ko e fuoloa ʻo e ʻi ʻolunga ʻa e langí ʻi he māmaní.

22 “Kapau te mou mātuʻaki tauhi ʻa e fekau ko eni ʻoku ou ʻoatu kiate kimoutolú pea fakahoko ia, ke ʻofa kia Sihova ko homou ʻOtuá,+ ke ʻaʻeva ʻi he kotoa ʻene ngaahi foungá pea ke pīkitai kiate ia,+ 23 ʻe kapusi ʻe Sihova ʻa e ngaahi puleʻanga kotoa ko ení mei homou ʻaó,+ pea te mou ikunaʻi ʻa e ngaahi puleʻanga ʻoku lalahi ange mo tokolahi ange ʻiate kimoutolú.+ 24 Ko e feituʻu kotoa pē ʻe tuʻu ai homou vaʻé ʻe ʻamoutolu ia.+ Mei he toafá ʻo aʻu ki Lepanoni, mei he Vaitafé, ʻa e vaitafe ʻIufaletesí, ki he tahi ʻi he hihifó,* ʻe hoko ia ko homou kauʻā.+ 25 ʻE ʻikai tuʻu hake ha taha kiate kimoutolu.+ Ko Sihova ko homou ʻOtuá te ne ʻai ke mafola atu ʻi he fonua kotoa ʻa ia te mou laka atu+ aí ʻa e tailiili mo e manavahē kiate kimoutolu, ʻo hangē tofu pē ko ʻene talaʻofa kiate kimoutolú.

26 “Vakai, ʻoku ou tuku atu ʻi homou ʻaó he ʻahó ni ha tāpuaki mo ha mala:+ 27 Ko e tāpuaki kapau te mou talangofua ki he ngaahi fekau ʻa Sihova ko homou ʻOtuá ʻa ia ʻoku ou fekauʻi atu kiate kimoutolu he ʻaho ní,+ 28 pea ko e mala kapau ʻe ʻikai te mou talangofua ki he ngaahi fekau ʻa Sihova ko homou ʻOtuá+ ʻo mou afe mei he hala ʻoku ou fekau atu ke mou muimui ki ai he ʻaho ní pea mou muimui ʻi he ngaahi ʻotua ʻa ia kuo ʻikai te mou ʻiloʻi.

29 “ʻI he taimi ʻe ʻomi ai koe ʻe Sihova ko ho ʻOtuá ki he fonua te ke maʻú, kuo pau ke ke fanongonongo* ʻa e tāpuakí ki Moʻunga Kelisimi pea ko e malá ki Moʻunga ʻĪpale.+ 30 ʻIkai ʻokú na ʻi he tafaʻaki ʻe taha ʻo Sioataní ki he hihifó,* ʻi he fonua ʻo e kau Kēnaní ʻa ia ʻoku nau nofo ʻi he ʻAlapá, ʻo hanga ki Kilikali, ʻi he veʻe ʻuluʻakau lalahi ʻo Molé?+ 31 He ʻoku mou kolosi ʻi Sioatani ke hū atu ʻo maʻu ʻa e fonua ʻoku foaki atu kiate kimoutolu+ ʻe Sihova ko homou ʻOtuá. ʻI he taimi te mou maʻu ai ia pea nofo aí, 32 kuo pau ke mou tokanga ke fakahoko ʻa e kotoa ʻo e ngaahi lao mo e ngaahi tuʻutuʻuni fakaefakamaau ʻoku ou tuku atu ʻi homou ʻaó he ʻaho ní.+

12 “Ko e ngaahi lao mo e ngaahi tuʻutuʻuni fakaefakamaau eni ʻoku totonu ke mou tokanga ke fakahoko ʻi he ngaahi ʻaho kotoa te mou moʻui ai ʻi he fonua ʻe hanga ʻe Sihova ko e ʻOtua ʻo hoʻo fanga kuí ʻo foaki atu kiate koe ke ke maʻú. 2 Te mou fakaʻauha ʻosiʻosingamālie ʻa e ngaahi feituʻu kotoa ʻa ia kuo tauhi ai ʻa e ngaahi puleʻanga te mou ikunaʻí ki honau ngaahi ʻotuá,+ pe ʻi he ngaahi moʻunga māʻolungá pe ʻi he ngaahi foʻi māʻolungá pe ʻi ha faʻahinga lalo ʻakau tupu ʻāfaʻafa pē. 3 ʻOku totonu ke mou holoki honau ngaahi ʻōlitá, laiki ʻenau ngaahi pou maka toputapú,+ tutu ʻi he afí ʻenau ngaahi pou ʻakau toputapú,* pea tā hifo ʻa e ngaahi ʻīmisi kuo tongi ʻo honau ngaahi ʻotuá,+ ʻo tāmateʻi ʻa honau hingoá tonu mei he feituʻu ko iá.+

4 “Kuo pau ke ʻoua naʻa mou lotu kia Sihova ko homou ʻOtuá ʻi he founga ko iá.+ 5 Ka mou kumi kia Sihova ko homou ʻOtuá ʻi ha feituʻu pē ʻokú ne fili ke fokotuʻu ai hono huafá mo hono nofoʻangá ʻi he lotolotonga ʻo homou ngaahi matakalí kotoa, pea ʻalu ki ai.+ 6 Ko e feituʻu ia te mou ʻomi ki ai hoʻomou ngaahi feilaulau tutú,+ ko hoʻomou ngaahi feilaulaú, ko hoʻomou ngaahi vahe hongofulú,+ ko e meʻaʻofa mei homou nimá,+ ko hoʻomou ngaahi feilaulau fuakavá, ko hoʻomou ngaahi feilaulau loto-tauʻatāiná,+ pea mo e ʻuluaki ʻuhiki tangata ʻo hoʻomou fanga pulú mo e fanga sipí.+ 7 Ko kimoutolu mo homou ngaahi fāmilí kuo pau ke mou kai ai ʻi he ʻao ʻo Sihova ko homou ʻOtuá+ pea fiefia ʻi hoʻomou ngaahi ngāué kotoa,+ koeʻuhí ko Sihova ko ho ʻOtuá kuó ne tāpuakiʻi koe.

8 “Kuo pau ke ʻoua naʻa hangē hoʻomou tōʻongafaí ko e meʻa ʻoku tau fai heni he ʻaho ní, ʻo fai ʻe he tokotaha kotoa ha meʻa pē ʻoku totonu ʻi heʻene vakai ʻaʻaná,* 9 koeʻuhí kuo teʻeki ai ke mou hū ki he mālōlōʻanga+ mo e tofiʻa ʻoku foaki ʻe Sihova ko ho ʻOtuá kiate koé. 10 ʻI hoʻomou kolosi atu ʻi Sioatani+ ʻo nofo ʻi he fonua ʻoku foaki atu ʻe Sihova ko homou ʻOtuá ke mou maʻú, ko e moʻoni te ne tuku atu ke mou mālōlō mei homou ngaahi fili kotoa ʻoku takatakai ʻiate kimoutolú, pea te mou nofo malu+ ai. 11 Te mou ʻomi ʻa e meʻa kotoa pē ʻoku ou tuʻutuʻuni kiate kimoutolú ki he feituʻu ʻoku fili ʻe Sihova ko homou ʻOtuá ke ʻi ai ʻa hono huafá+—ʻa hoʻomou ngaahi feilaulau tutú, ko hoʻomou ngaahi feilaulaú, ko hoʻomou ngaahi vahe hongofulú,+ ko e meʻaʻofa mei homou nimá, mo e feilaulau fuakava kotoa pē ʻoku mou fuakavaʻaki kia Sihová. 12 Te mou fiefia ʻi he ʻao ʻo Sihova ko homou ʻOtuá,+ ʻa kimoutolu mo homou ngaahi fohá, mo homou ngaahi ʻofefiné, mo hoʻomou kau tamaioʻeikí mo e kau kaunangá, pea mo e Līvai ʻi homou ngaahi koló,* he kuo ‘ikai ke foaki kiate ia hano ‘inasi pe ha tofiʻa fakataha mo kimoutolu.+ 13 Tokanga ke ʻoua naʻá ke ʻohake hoʻo ngaahi feilaulau tutú ʻi ha toe feituʻu kehe pē te ke sio ki ai.+ 14 ʻOku totonu ke ke ʻohake hoʻo ngaahi feilaulau tutú ʻi he feituʻu pē ʻa ia ʻoku fili ʻe Sihova ʻi he taha ʻo ho ngaahi feituʻu fakamatakalí, pea te ke fai ai ʻa e meʻa kotoa pē ʻoku ou tuʻutuʻuni atu kiate koé.+

15 “Ka te ke tāmateʻi ʻo kai ha kakanoʻi-manu+ ʻi ha taimi pē te ke fiemaʻu ai, ʻo fakatatau ki he tāpuaki kuo fai ʻe Sihova ko ho ʻOtuá kiate koe ʻi he kotoa ho ngaahi koló.* ʻE kai ia ʻe he tokotaha taʻemaʻá mo e tokotaha maʻá, ʻo hangē pē ko haʻo kai ha kāseli pe ko ha tiá. 16 Ka kuo pau ke ʻoua naʻa mou kai ʻa e totó;+ ʻoku totonu ke ke lilingi ia ki he kelekelé ʻo hangē ko e vaí.+ 17 ʻE ʻikai ngofua ke ke kai ʻi ho ngaahi koló* ʻa e vahe hongofulu ʻe taha ʻo hoʻo uité, ʻo hoʻo uaine foʻoú, mo hoʻo loló. Pehē foki ki he ʻuluaki ʻuhiki tangata ʻo hoʻo fanga pulú mo e fanga sipí,+ ko ha taha pē ʻo hoʻo ngaahi feilaulau fuakava ʻokú ke fuakavaʻakí, ko hoʻo ngaahi feilaulau loto-tauʻatāiná, pe ko e meʻaʻofa mei ho nimá. 18 Te ke kai ʻa e ngaahi meʻá ni ʻi he ʻao ʻo Sihova ko ho ʻOtuá ʻi he feituʻu ʻe fili+ ʻe Sihova ko ho ʻOtuá—ʻa koe mo ho fohá, ko ho ʻofefiné, ko hoʻo tamaioʻeikí mo e kaunangá, pea mo e Līvai ʻi ho ngaahi koló;* pea te ke fiefia ʻi he ʻao ʻo Sihova ko ho ʻOtuá ʻi hoʻo ngaahi ngāué kotoa. 19 Tokanga ke ʻoua naʻá ke liʻaki ʻa e Līvaí+ ʻi he lolotonga hoʻo nofo ʻi ho fonuá.

20 “ʻI he taimi ʻe fakalahi ai ʻe Sihova ko ho ʻOtuá ho feituʻú,+ ʻo hangē pē ko ia kuó ne talaʻofaʻaki kiate koé,+ peá ke pehē, ‘ʻOku ou fie kai kakanoʻi-manu,’ koeʻuhí ko hoʻo fie kai kakanoʻi-manú, te ke kai kakanoʻi-manu ʻi ha taimi pē te ke fiemaʻu ai.+ 21 Kapau ko e feituʻu ʻoku fili ʻe Sihova ko ho ʻOtuá ke ʻai ki ai hono huafá+ ʻoku mamaʻo ia meiate koe, ʻoku totonu leva ke ke tāmateʻi ha pulu pe ko ha sipi ʻa ia kuo foaki atu ʻe Sihová, ʻo hangē tofu pē ko ʻeku tuʻutuʻuni kiate koé, pea ʻoku totonu ke ke kai ia ʻi ho ngaahi koló* ʻi ha taimi pē ʻokú ke fiemaʻu ai ia. 22 Te ke kai ia ʻo hangē pē ko haʻo kai ʻa e kāselí mo e tiá;+ ʻe kai ia fakatouʻosi ʻe he tokotaha taʻemaʻá mo e tokotaha maʻá. 23 Ke ke mātuʻaki fakapapauʻi pē ke ʻoua ʻe kai ʻa e totó,+ koeʻuhí ko e totó ko e moʻuí+ ia, pea kuo pau ke ʻoua naʻá ke kai ʻa e moʻuí fakataha mo e kakanó. 24 Kuo pau ke ʻoua naʻá ke kai ia. ʻOku totonu ke ke lilingi ia ki he kelekelé ʻo hangē ko e vaí.+ 25 Kuo pau ke ʻoua naʻá ke kai ia, koeʻuhí ka ke lakalakaimonū ai mo hoʻo fānau ʻi he hili koé, he ʻokú ke fai ʻa e meʻa ʻoku totonu ʻi he vakai ʻa Sihová. 26 ʻOku totonu ke ke toʻo ʻa e ngaahi meʻa toputapu pē ʻoku ʻaʻaú mo hoʻo ngaahi feilaulau fuakavá ʻi hoʻo ʻalu ki he feituʻu ko ia ʻe fili ʻe Sihová. 27 Te ke ʻohake ai hoʻo ngaahi feilaulau tutú, ʻa e kakanó mo e totó,+ ʻi he funga ʻōlita ʻo Sihova ko ho ʻOtuá, pea ko e toto ʻo hoʻo ngaahi feilaulaú ʻoku totonu ke ke lilingi ia ʻi he veʻe ʻōlita+ ʻo Sihova ko ho ʻOtuá, ka ko e kakanó te ke kai ia.

28 “Tokanga ke talangofua ki he ngaahi lea kotoa ko eni ʻoku ou tuʻutuʻuni atu kiate koé, koeʻuhí ke ke lakalakaimonū maʻu ai pē mo ho ngaahi foha ʻi he hili koé, he ʻokú ke fai ʻa e meʻa ʻoku lelei mo totonu ʻi he vakai ʻa Sihova ko ho ʻOtuá.

29 “ʻI he taimi ʻe fakaʻauha ʻosi ai ʻe Sihova ko ho ʻOtuá ʻa e ngaahi puleʻanga te ke ikunaʻí,+ peá ke nofo ʻi honau fonuá, 30 tokanga ke ʻoua naʻa fakataueleʻi koe hili ia hono fakaʻauha ʻosi kinautolu mei ho ʻaó. ʻOua naʻá ke ʻeke ʻo fekauʻaki mo honau ngaahi ʻotuá, ʻo pehē, ‘Naʻe anga-fēfē ʻa e faʻa tauhi ʻa e ngaahi puleʻangá ni ki honau ngaahi ʻotuá? Ko au foki te u fai ʻa e meʻa tatau.’+ 31 Kuo pau ke ʻoua naʻá ke fai eni kia Sihova ko ho ʻOtuá, koeʻuhí he ʻoku nau fai ki honau ngaahi ʻotuá ʻa e meʻa fakalielia kotoa pē ʻoku fehiʻa ai ʻa Sihová, naʻa mo hono tutu ʻi he afí ʻa honau ngaahi fohá mo honau ngaahi ʻofefiné ki honau ngaahi ʻotuá.+ 32 Ko e lea kotoa pē ʻoku ou tuʻutuʻuni atu kiate kimoutolú ko e meʻa ia ʻoku totonu ke mou tokanga ke faí.+ Kuo pau ke ʻoua naʻa mou fakalahi ha meʻa ki ai pe toʻo ha meʻa mei ai.+

13 “Ka tupu hake ʻi ho lotolotongá ha palōfita pe ko ha taha ʻokú ne tomuʻa tala ha meʻa fakafou ʻi ha ngaahi misi peá ne fakahaaʻi atu kiate koe ha fakaʻilonga pe ko ha meʻa fakaofo ki he kahaʻú, 2 pea ko e fakaʻilonga pe meʻa fakaofo ki he kahaʻú ʻa ia naʻá ne leaʻaki kiate koé ʻoku hoko moʻoni lolotonga ia ʻokú ne pehē, ‘Tau muimui ʻi he ngaahi ʻotua kehé,’ ʻa e ngaahi ʻotua kuo ʻikai te ke ʻiloʻi, ‘pea tau tauhi kinautolu,’ 3 kuo pau ke ʻoua naʻá ke fanongo ki he lea ʻa e palōfita ko iá pe ko e tokotaha misi+ ko iá, he ko Sihova ko homou ʻOtuá ʻokú ne siviʻi kimoutolu+ ke ʻilo pe ʻoku mou ʻofa kia Sihova ko homou ʻOtuá ʻaki homou lotó kotoa mo hoʻomou moʻuí+ kotoa. 4 Ko Sihova ko homou ʻOtuá ke mou muimui ki aí, ko ia ke mou manavahē ki aí, ko ʻene ngaahi tuʻutuʻuní ke mou tauhí, ko hono leʻó ke mou fanongo ki aí; ko ia ʻa e tokotaha ke mou tauhi ki aí, pea ko ia ke mou piki maʻu ki aí.+ 5 Ka ko e palōfita ko iá pe ko e tokotaha misi ko iá ʻoku totonu ke tāmateʻi,+ koeʻuhí he naʻá ne fakaʻaiʻai ʻa e angatuʻu kia Sihova ko homou ʻOtuá—ʻa ia naʻá ne ʻomi kimoutolu mei he fonua ko ʻIsipité peá ne huhuʻi koe mei he fale fakapōpulá—ke fakatafoki koe mei he hala ʻa ia kuo tuʻutuʻuni ʻe Sihova ko ho ʻOtuá ke ke fou aí. Pea kuo pau ke ke toʻo ʻa e koví mei ho lotolotongá.+

6 “Kapau ʻe feinga ho tokouá, ʻa e tama ʻa hoʻo faʻeé, pe ko ho fohá pe ko ho ʻofefiné pe ko ho uaifi ʻofeiná pe ko ho kaumeʻa ofi tahá ke fakataueleʻi fakafufū koe, heʻene pehē, ‘Tau ō ʻo tauhi ʻa e ngaahi ʻotua kehé,’+ ʻa e ngaahi ʻotua kuo ʻikai te ke ʻiloʻi ʻe koe pe ko hoʻo fanga kuí, 7 ko e ngaahi ʻotua mei he ngaahi kakai takatakai ʻiate kimoutolú, pe ʻoku nau ofi atu kiate koe pe ʻoku nau mamaʻo meiate koe, mei he ngataʻanga ʻe taha ʻo e fonuá ki he ngataʻanga ʻe taha ʻo e fonuá, 8 kuo pau ke ʻoua naʻá ke fakamoʻulaloa kiate ia pe fanongo kiate ia,+ pea ʻoku ʻikai totonu ke ke fakaʻofaʻia pe ongoʻi manavaʻofa ʻiate ia pe maluʻi ia; 9 ʻi hono kehé, kuo pau ke ke tāmateʻi ia.+ Ko ho nimá ʻoku totonu ke muʻaki ala kiate ia ʻo tāmateʻi iá, pea toki ala leva ki ai ʻa e nima ʻo e kakaí kotoa.+ 10 Pea kuo pau ke ke tolomakaʻi ia ke ne mate,+ koeʻuhí kuó ne feinga ke fakatafokiʻi koe meia Sihova ko ho ʻOtuá, ʻa ia kuó ne ʻomi koe mei he fonua ko ʻIsipité, mei he fale fakapōpulá. 11 Pea ʻe fanongo leva ki ai ʻa ʻIsileli kātoa ʻo nau ilifia, pea ʻe ʻikai ʻaupito te nau toe fai ha meʻa ʻoku kovi hangē ko ení ʻi ho lotolotongá.+

12 “Kapau te ke fanongo ʻoku leaʻaki ʻi ha taha ʻo ho ngaahi kolo ʻoku foaki atu ʻe Sihova ko ho ʻOtuá ke ke nofo aí, 13 ‘Kuo ʻalu atu ha kau tangata ko e koto taʻeʻaonga mei ho lotolotongá ke fakatafokiʻi ʻa e faʻahinga ʻoku nofo ʻi honau koló, ʻi heʻenau pehē: “Tau ō ʻo tauhi ʻa e ngaahi ʻotua kehé,” ʻa e ngaahi ʻotua kuo ʻikai te mou ʻiloʻí,’ 14 ʻoku totonu ke ke vakaiʻi ʻa e meʻá ni, ʻo ke fakatotoloʻi fakaʻāuliliki mo ʻeke;+ pea kapau kuo fakamoʻoniʻi ʻoku moʻoni ko e meʻa fakalieliá ni kuo fai ʻi ho lotolotongá, 15 kuo pau ke ke taaʻi ʻa e faʻahinga ʻoku nofo ʻi he kolo ko iá ʻaki ʻa e heletaá.+ Tuku atu ʻa e koló mo e meʻa kotoa ʻoku ʻi aí, ʻo kau ai ʻene fanga manú, ke fakaʻauha+ ʻaki ʻa e heletaá. 16 Ko e kotoa leva ʻa hono koloa veté te ke tānaki leva ia ki hono loto malaʻe fakakoló* pea tutu ʻa e koló ʻaki ʻa e afi, pea ko hono koloa veté ʻe hoko ia ko ha feilaulau kakato kia Sihova ko ho ʻOtuá. ʻE hoko tuʻuloa ia ko ha fokotuʻunga maumau. ʻOku ʻikai ʻaupito totonu ke toe langa ia. 17 ʻOku ʻikai totonu ke toʻo ʻe ho nimá ha meʻa ʻe taha naʻe fakamavaheʻi ki he fakaʻauhá,*+ koeʻuhí ke tafoki ai ʻa Sihova mei heʻene houhau kakahá peá ne fakahaaʻi atu kiate koe ʻa e mēsí mo e manavaʻofá peá ne fakatokolahi koe, ʻo hangē tofu pē ko ʻene fuakava ki hoʻo fanga kuí.+ 18 He ʻoku totonu ke ke talangofua kia* Sihova ko ho ʻOtuá ʻaki hono tauhi ʻene ngaahi tuʻutuʻuni kotoa ʻoku ou tuʻutuʻuni atu kiate koe he ʻaho ní, ʻo ke fai ai ʻa e meʻa ʻoku totonu ʻi he vakai ʻa Sihova ko ho ʻOtuá.+

14 “Ko e ngaahi foha kimoutolu ʻo Sihova ko homou ʻOtuá. ʻOua naʻa tafatafaʻi kimoutolu+ pe tele maʻa homou kemó* koeʻuhi ko ha taha ʻoku mate.+ 2 He ko ha kakai māʻoniʻoni+ koe kia Sihova ko ho ʻOtuá, pea kuo fili koe ʻe Sihova ke ke hoko ko ʻene kakai, ko ʻene koloa makehe* ʻi he ngaahi kakai kotoa pē ʻoku ʻi he funga ʻo māmaní.+

3 “Kuo pau ke ʻoua naʻá ke kai ha meʻa pē ʻoku fakalielia.+ 4 Ko e fanga manu eni te mou kaí:+ Ko e pulu, ko e sipi, ko e kosi, 5 ko e tia, ko e kāseli, ko e faʻahinga ʻe taha ʻo e tiá, ko e kosi kaivao, ko e ʻanitelope, ko e sipi kaivao, pea mo e sipi ʻo e moʻungá. 6 Te mou kai ha manu pē ʻoku mavaeua hono topuvaʻé ʻo konga ua pea ʻoku kai fakahake. 7 Kae kehe, kuo pau ke ʻoua naʻa mou kai ʻa e fanga manu ko eni ʻoku kai fakahake pe ʻoku mavaeua ʻa honau topuvaʻé:* Ko e kāmelí, ko e heá, pea mo e safaná,* koeʻuhí ʻoku nau kai fakahake ka ʻoku ʻikai ke mavaeua honau topuvaʻé. ʻOku nau taʻemaʻa kiate kimoutolu.+ 8 Pehē foki ki he puaká koeʻuhí ʻoku mavaeua ʻa hono pesipesí ka ʻoku ʻikai ke kai fakahake. ʻOku taʻemaʻa ia kiate kimoutolu. Kuo pau ke ʻoua naʻa mou kai honau kakanó pe ala ki honau ngaahi ʻangaʻangá.

9 “Mei he meʻa kotoa pē ʻoku moʻui ʻi he ngaahi vaí, te mou kai ʻa e ngaahi meʻá ni: Ko ha meʻa pē ʻoku kaponga mo ʻuno, te mou kai+ ia. 10 Ka kuo pau ke ʻoua naʻa mou kai ha meʻa pē ʻoku ʻikai hano kaponga mo hano ʻuno. ʻOku taʻemaʻa ia kiate kimoutolu.

11 “Te mou kai ha faʻahinga manupuna maʻa pē. 12 Ka kuo pau ke ʻoua naʻa mou kai ʻa e ngaahi meʻá ni: Ko e ʻīkalé, ko e hoke tahí, ko e vulitua ʻuliʻulí,+ 13 ko e lofa kulokulá, ko e lofa ʻuliʻulí, ko e faʻahinga kotoa pē ʻo e ngaahi lofa kehé, 14 faʻahinga kotoa pē ʻo e lēvení, 15 ko e ʻositalesí, ko e lulú, ko e talá, ko e faʻahinga kotoa pē ʻo e hoké, 16 ko e lulu īkí, ko e lulu telinga lōloá, ko e suaní, 17 ko e pelikaní, ko e vulituá, ko e komolaní,* 18 ko e sitoaké, ko e faʻahinga kotoa pē ʻo e motukú, ko e hupó, pea mo e peká. 19 Ko e fanga kiʻi meʻamoʻui iiki kapakau kotoa pē ʻoku fakapupungá* ʻoku taʻemaʻa foki ia kiate kimoutolu. ʻOku ʻikai totonu ke kai ia. 20 Ko ha faʻahinga meʻamoʻui maʻa pē ʻoku puna te mou kai ia.

21 “Kuo pau ke ʻoua naʻa mou kai ha manu pē naʻe maʻu kuo mate.+ Te ke ʻoange ia ki he muli ʻoku ʻi ho ngaahi koló,* pea ʻe lava ke ne kai ia, pe ʻe fakatau atu nai ia ki ha muli. He ko ha kakai māʻoniʻoni koe kia Sihova ko ho ʻOtuá.

“Kuo pau ke ʻoua naʻá ke haka ha kiʻi kosi ʻi he huʻahuhu ʻo ʻene faʻeé.+

22 “Kuo pau ke ke mātuʻaki fakapapauʻi ke foaki ha vahe hongofulu ʻo e meʻa kotoa pē ʻoku tupu mei hoʻo tengaʻi ʻakau ʻi he ngoué ʻi he taʻu ki he taʻu.+ 23 Te ke kai ʻa e vahe hongofulu ʻe taha ʻo hoʻo uité, ko hoʻo uaine foʻoú, ko hoʻo loló, pea mo e ʻuluaki ʻuhiki tangata ʻo hoʻo fanga pulú mo hoʻo fanga sipí ʻi he ʻao ʻo Sihova ko ho ʻOtuá ʻi he feituʻu ʻokú ne fili ke ʻi ai ʻa hono huafá,+ koeʻuhí ke ke ako ai ke manavahē maʻu pē+ kia Sihova ko ho ʻOtuá.

24 “Ka ʻo kapau ʻe fuʻu lōloa kiate koe ʻa e fonongá pea ʻoku ʻikai lava ke ke fetuku ia ki he feituʻu ʻoku fili ʻe Sihova ko ho ʻOtuá ko e feituʻu ia maʻa hono huafá+ he ʻoku fuʻu mamaʻo ia meiate koe (koeʻuhí ʻe tāpuakiʻi koe ʻe Sihova ko ho ʻOtuá), 25 te ke fetongi paʻanga leva ia, peá ke fononga fakataha mo hoʻo paʻangá ʻi ho nimá ki he feituʻu ʻe fili ʻe Sihova ko ho ʻOtuá. 26 Te ke ngāueʻaki leva ʻa e paʻangá ki ha meʻa pē ʻokú ke fiemaʻú—ki ha pulu, sipi, kosi, uaine mo ha ngaahi inu ʻolokaholo kehe, pea mo ha meʻa pē ʻokú ke loto ki ai; pea te ke kai ai ʻi he ʻao ʻo Sihova ko ho ʻOtuá peá ke fiefia, ʻa koe pea mo ho fāmilí.+ 27 Pea ʻoua naʻa liʻaki ʻa e Līvai ʻoku ʻi ho ngaahi koló,+ he kuo ‘ikai ke foaki kiate ia hano ‘inasi pe ha tofiʻa fakataha mo koe.+

28 “ʻI he ngataʻanga ʻo e taʻu ʻe tolu kotoa pē, ʻoku totonu ke ke ʻomi ʻa e kotoa ʻo e vahe hongofulu ʻe taha ʻo hoʻo fua ki he taʻu ko iá pea tuku ia ʻi ho ngaahi koló.+ 29 Ko e Līvaí leva, ʻa ia kuo ‘ikai ke foaki kiate ia hano ‘inasi pe ha tofiʻa fakataha mo koé, ko e mulí, ko e tamai-maté,* mo e uitou ʻa ia ʻoku nau ʻi ho ngaahi koló te nau haʻu ʻo kai ke nau mākona,+ koeʻuhí ke tāpuakiʻi koe ʻe Sihova ko ho ʻOtuá ʻi he meʻa kotoa ʻokú ke faí.+

15 “ʻI he ngataʻanga ʻo e taʻu ʻe fitu kotoa pē, te ke fanongonongo ai ha fakaʻatā+ mei he ngaahi moʻuá. 2 Ko e founga eni ʻo e fakaʻataá: Ko e tokotaha kotoa pē ʻoku fai ha moʻua ki ai te ne fakaʻatā ʻa hono kaungāʻapí mei he fakamoʻua naʻá ne faí. ʻOku ʻikai totonu ke ne kounaʻi ha totongi mei hono kaungāʻapí pe ko hono tokouá, koeʻuhí ʻe fanongonongo ia ko ha fakaʻatā ʻoku fakalāngilangiʻi ai ʻa Sihova.+ 3 Te ke kounaʻi ʻa e totongí mei he mulí,+ ka te ke fakaʻatā ʻo ʻikai te ke ʻeke ha meʻa pē ʻoku moʻuaʻaki kiate koe ʻe ho tokouá. 4 Kae kehe, ʻoku ʻikai totonu ke hoko ha taha ʻi ho lotolotongá ʻo masiva, koeʻuhí ʻe tāpuakiʻi moʻoni koe+ ʻe Sihova ʻi he fonua ʻoku foaki atu ʻe Sihova ko ho ʻOtuá ke ke maʻu ko ha tofiʻá, 5 ʻo kapau pē te ke mātuʻaki talangofua ki he leʻo ʻo Sihova ko ho ʻOtuá pea tokanga ʻo tauhi ʻa e kotoa ʻo e tuʻutuʻuni ko eni ʻoku ou ʻoatu kiate koe he ʻaho ní.+ 6 He ko Sihova ko ho ʻOtuá te ne tāpuakiʻi koe ʻo hangē pē ko ia kuó ne talaʻofa kiate koé, pea te ke tali nō* ki he ngaahi puleʻanga lahi, ka heʻikai fiemaʻu ia ke ke nō;+ pea te ke pule ki he ngaahi puleʻanga lahi, ka heʻikai te nau pule kiate koe.+

7 “Kapau ʻe hoko ha taha ʻo ho fanga tokouá ʻo masiva ʻi ho lotolotongá ʻi he taha ʻo ho ngaahi kolo ʻi he fonua ʻoku foaki atu ʻe Sihova ko ho ʻOtuá kiate koé, ʻoua naʻa fakafefeka ho lotó pe te ke nima-maʻu ki ho tokoua masivá.+ 8 He ʻoku totonu ke ke nima-homo kiate ia+ pea tali loto-lelei ha nō* ki ha meʻa pē ʻokú ne fiemaʻu pe masiva ai. 9 Tokanga ke ʻoua naʻá ke tukulotoa ʻa e fakakaukau koví ni, ‘Ko e taʻu hono fitú, ʻa e taʻu ʻo e fakaʻataá, kuo tuʻunuku mai,’+ peá ke taʻofi hoʻo nima-homo ki ho tokoua masivá ʻo ʻikai ʻoange kiate ia ha meʻa. Kapau te ne tangi kia Sihova koeʻuhi ko koe, ʻe hoko ko ha angahala ia kiate koe.+ 10 ʻOku totonu ke ke foaki nima-homo kiate ia,+ pea ʻoku totonu ke ʻoua naʻá ke foaki taʻefiefoaki kiate ia, he ko e ʻuhinga ia ʻe tāpuakiʻi ai ʻe Sihova ko ho ʻOtuá hoʻo ngāue mo e feinga kotoa pē.+ 11 He ʻe ʻi ai maʻu pē ʻa e kakai masiva ʻi he fonuá.+ Ko e ʻuhinga ia ʻoku ou tuʻutuʻuni atu ai kiate koe, ‘ʻOku totonu ke ke nima-homo ki ho tokoua ʻoku faingataʻaʻia mo masiva ʻi ho fonuá.’+

12 “Kapau ʻe fakatau atu kiate koe ha taha ʻo ho fanga tokouá, ko ha tangata pe fefine Hepelū, pea kuó ne ngāue kiate koe ʻi he taʻu ʻe ono, ʻi he taʻu leva hono fitú te ke fakatauʻatāinaʻi+ ai ia. 13 Pea kapau te ke fakatauʻatāinaʻi ia, ʻoua naʻa tuku atu ia ke ne ʻalu mola pē. 14 ʻOku totonu ke ke tokonaki nima-homo kiate ia ʻaki ha meʻa mei hoʻo tākangá, ko hoʻo ʻauʻauʻanga uité, mo hoʻo tataʻoʻanga loló mo e uainé. Hangē tofu pē ko hono tāpuakiʻi koe ʻe Sihova ko ho ʻOtuá, ʻoku totonu ke pehē hoʻo foaki kiate iá. 15 Manatuʻi naʻá ke hoko ko ha pōpula ʻi he fonua ko ʻIsipité pea naʻe huhuʻi koe ʻe Sihova ko ho ʻOtuá. Ko e ʻuhinga ia ʻoku ou tuʻutuʻuni atu ai kiate koe ke ke fai ʻa e meʻá ni he ʻaho ní.

16 “Ka ʻo kapau te ne pehē atu kiate koe, ‘ʻE ʻikai te u mavahe mei he feohi mo koé,’ koeʻuhí ʻokú ne ʻofa ʻiate koe mo ho fāmilí, he naʻá ne fiefia lolotonga ʻene ʻiate koé,+ 17 ʻoku totonu leva ke ke toʻo ha meʻa-fakaava, pea ʻai ia ke ne ʻai hono telingá ki he matapaá pea tui hono telingá, pea te ne hoko ai ko hoʻo tamaioʻeiki ʻo tuʻuloa. ʻOku totonu ke ke fai ʻa e meʻa tatau ki hoʻo kaunangá. 18 ʻOua ʻe vakai ko ha meʻa faingataʻa ʻa hoʻo fakatauʻatāinaʻi ia peá ne mavahe meiate koé, koeʻuhi ko ʻene ngāue kiate koe ʻi he taʻu ʻe onó naʻe liunga ua hono lahí ʻi he ngāue ʻa ha tokotaha ngāue totongi, pea kuo tāpuakiʻi koe ʻe Sihova ko ho ʻOtuá ʻi he meʻa kotoa pē.

19 “ʻOku totonu ke ke fakatapui ʻa e ʻuluaki ʻuhiki tangata kotoa pē ʻo hoʻo fanga pulú mo hoʻo fanga sipí kia Sihova ko ho ʻOtuá.+ Kuo pau ke ʻoua naʻá ke fai ha faʻahinga ngāue pē ʻaki ʻa e ʻuluaki ʻuhiki tangata ʻo hoʻo fanga pulú pe kosi ʻa e ʻuluaki ʻuhiki tangata ʻo hoʻo fanga sipí. 20 Ko koe mo ho fāmilí ʻoku totonu ke mou kai ia ʻi he ʻao ʻo Sihova ko ho ʻOtuá ʻi he taʻu ki he taʻu ʻi he feituʻu ʻa ia ʻe fili+ ʻe Sihová. 21 Ka ʻo kapau ʻoku ʻi ai hano mele—ʻoku heke, kui, pe ko ha mele mafatukituki kehe—kuo pau ke ʻoua naʻá ke feilaulauʻaki ia kia Sihova ko ho ʻOtuá.+ 22 ʻOku totonu ke ke kai ia ʻi ho ngaahi koló,* fakataha ʻa e tokotaha taʻemaʻá mo e tokotaha maʻá, ʻo hangē ko ha kāseli ia pe ko ha tiá.+ 23 Ka kuo pau ke ʻoua naʻá ke kai ʻa hono totó;+ ʻoku totonu ke ke lilingi ia ki he kelekelé ʻo hangē ko e vaí.+

16 “Tauhi ʻa e māhina ko ʻĀpipí,* pea kātoangaʻi ʻa e Pāsová* kia Sihova ko ho ʻOtuá,+ he ʻi he māhina ko ʻĀpipí, naʻe ʻomi ai koe ʻe Sihova ko ho ʻOtuá mei ʻIsipite ʻi he poʻulí.+ 2 Pea te ke tāmateʻi ʻa e monumanu ʻo e feilaulau Pāsová kia Sihova ko ho ʻOtuá,+ mei he fanga sipí mo e fanga pulú,+ ʻi he feituʻu ʻa ia ʻe fili ʻe Sihova ke ʻi ai ʻa hono huafá.+ 3 Kuo pau ke ʻoua naʻá ke kai fakataha mo ia+ ha meʻa pē ʻoku lēvani; ʻi he ʻaho ʻe fitu te ke kai ai ʻa e mā taʻelēvani, ʻa e mā ʻo e mamahí, koeʻuhí he naʻá ke haʻu fakavave mei he fonua ko ʻIsipité.+ Fai ʻa e meʻá ni koeʻuhí ke ke manatuʻi ai ʻa e ʻaho naʻá ke haʻu ai mei he fonua ko ʻIsipité lolotonga ʻa e ngaahi ʻaho kotoa ʻo hoʻo moʻuí.+ 4 ʻE ʻikai ʻilo ʻiate koe ʻi he kotoa ho feituʻú ha takaonga ʻoku fakalēvani ʻi he ʻaho ʻe fitu,+ pea ʻe ʻikai ha meʻa pē mei he kakanoʻi-manu ʻa ia te ke feilaulauʻi ʻi he efiafí he ʻuluaki ʻahó ʻe fakatoe ʻi he pō kotoa ko iá ki he pongipongi ʻe tahá.+ 5 ʻE ʻikai ngofua ke ke tāmateʻi ʻa e monumanu ʻo e feilaulau Pāsová ʻi ha faʻahinga feituʻu pē ʻi he ngaahi kolo ʻoku foaki kiate koe ʻe Sihova ko ho ʻOtuá. 6 Ka ʻoku totonu ke fai ia ʻi he feituʻu ʻa ia ʻe fili ʻe Sihova ko ho ʻOtuá ke ʻi ai ʻa hono huafá. Te ke tāmateʻi ʻa e monumanu ʻo e feilaulau Pāsová ʻi he efiafí ʻi he tō pē ʻa e laʻaá,+ ʻi he taimi kotofa naʻá ke haʻu ai mei ʻIsipité. 7 Kuo pau ke ke ngaohi pea kai ia+ ʻi he feituʻu ʻe fili ʻe Sihova ko ho ʻOtuá,+ pea ʻi he pongipongí te ke foki ai ki ho ngaahi tēniti ʻoʻoú. 8 ʻI he ʻaho ʻe ono te ke kai mā taʻelēvani ai, pea ʻi he ʻaho hono fitú ʻe ʻi ai ha fuʻu fakataha makehe kia Sihova ko ho ʻOtuá. Kuo pau ke ʻoua naʻá ke fai ai ha ngāue.+

9 “Te ke lau ʻa e uike ʻe fitu. Te ke kamata lau ʻa e uike ʻe fitú mei he taimi te ke ʻuluaki ʻai ai ʻa e hele tuʻusí ki he uite ʻoku teʻeki tuʻusí.+ 10 Pea te ke fai leva ʻa e Kātoanga ʻo e Ngaahi Uiké kia Sihova ko ho ʻOtuá+ ʻaki ʻa e feilaulau loto-tauʻatāina mei ho nimá, kuo foaki ʻo fakatatau ki hono tāpuakiʻi koe ʻe Sihova ko ho ʻOtuá.+ 11 Pea te ke fiefia ʻi he ʻao ʻo Sihova ko ho ʻOtuá, ʻa koe mo ho fohá, ko ho ʻofefiné, ko hoʻo tamaioʻeikí, ko hoʻo kaunangá, ko e Līvai ʻoku ʻi ho ngaahi koló,* ko e mulí, ko e tamai-maté,* pea mo e uitoú, ʻa ia ʻoku nau ʻi ho lotolotongá, ʻi he feituʻu ʻa ia ʻe fili ʻe Sihova ko ho ʻOtuá ke ʻi ai ʻa hono huafá.+ 12 Manatuʻi naʻá ke hoko ko ha pōpula ʻi ʻIsipite,+ peá ke tauhi mo fakahoko ʻa e ngaahi tuʻutuʻuni ko ení.

13 “Te ke fai ʻa e Kātoanga ʻo e Falelouʻakaú*+ ʻi he ʻaho ʻe fitu ʻi he taimi te ke fai ai ha tānaki mei hoʻo ʻauʻauʻanga uité pea mei hoʻo tataʻoʻanga loló mo e uainé. 14 Ke ke fiefia lolotonga hoʻo kātoangá,+ ʻa koe mo ho fohá, ko ho ʻofefiné, ko hoʻo tamaioʻeikí, ko hoʻo kaunangá, ko e Līvaí, ko e mulí, ko e tamai-maté, pea mo e uitoú, ʻa ia ʻoku nau ʻi ho ngaahi koló. 15 Ko e ʻaho ʻe fitu te ke fai ai ʻa e kātoangá+ kia Sihova ko ho ʻOtuá ʻi he feituʻu ʻa ia ʻe fili ʻe Sihová, koeʻuhí ʻe tāpuakiʻi ʻe Sihova ko ho ʻOtuá ʻa hoʻo fua kotoa pē mo e meʻa kotoa pē ʻokú ke faí,+ pea te ke fiefia pē.+

16 “Tuʻo tolu ʻi he taʻu, ʻe hā ai ʻa e kotoa ʻo hoʻo kakai tangatá ʻi he ʻao ʻo Sihova ko ho ʻOtuá ʻi he feituʻu ʻa ia te ne filí: ʻI he Kātoanga ʻo e Mā Taʻelēvaní,+ ko e Kātoanga ʻo e Ngaahi Uiké,+ pea mo e Kātoanga ʻo e Falelouʻakaú,*+ pea ʻe ʻikai ha taha ʻo kinautolu ʻe hā mola pē ʻi he ʻao ʻo Sihová. 17 Ko e meʻaʻofa ʻe ʻomi ʻe he tokotaha taki taha ʻoku totonu ke fakatatau ia ki he tāpuaki kuo foaki kiate koe+ ʻe Sihova ko ho ʻOtuá.

18 “ʻOku totonu ke ke fakanofo ha kau fakamaau+ mo ha kau ʻōfisa ki he matakali taki taha ʻi he ngaahi kolo kotoa* ʻoku foaki kiate koe ʻe Sihova ko ho ʻOtuá, pea kuo pau ke nau fakamāuʻi ʻa e kakaí ʻaki ʻa e fakamaau māʻoniʻoni. 19 Kuo pau ke ʻoua naʻá ke pikoʻi ʻa e fakamaau totonú,+ pe fakahaaʻi ʻa e filifilimānako,+ pe tali ha totongi fufū, he ko e totongi fufuú ʻokú ne fakakuihi ʻa e mata ʻo e potó+ mo mioʻi ʻa e ngaahi lea ʻa e māʻoniʻoní. 20 Fakamaau totonu—ko e fakamaau totonú ʻoku totonu ke ke tuli ki aí,+ koeʻuhí ka ke moʻui ai pē pea maʻu ʻa e fonua ʻoku foaki ʻe Sihova ko ho ʻOtuá kiate koé.

21 “ʻOku ʻikai totonu ke ke tō ha faʻahinga ʻakau pē ke hoko ko ha pou ʻakau toputapu*+ ʻo ofi ki he ʻōlita ʻo Sihova ko ho ʻOtuá ʻa ia ʻokú ke ngaohi maʻaú.

22 “Pea ʻoku ʻikai totonu ke ke fokotuʻu maʻau ha pou maka toputapu,+ ko ha meʻa ʻoku fehiʻa ai ʻa Sihova ko ho ʻOtuá.

17 “Kuo pau ke ʻoua naʻá ke feilaulauʻaki kia Sihova ko ho ʻOtuá ha pulu pe ko ha sipi ʻa ia ʻoku ʻi ai hano mele pe ko ha faʻahinga meʻa pē ʻoku hoko ki ai, koeʻuhí ʻe fakalielia ia kia Sihova ko ho ʻOtuá.+

2 “Tau pehē pē ʻoku ʻilo ha tangata pe ko ha fefine ʻi ho lotolotongá, ʻi ha taha pē ho ngaahi kolo ʻoku foaki atu ʻe Sihova ko ho ʻOtuá kiate koé, ʻokú ne fai ʻa e meʻa ʻoku kovi ʻi he vakai mai ʻa Sihova ko ho ʻOtuá peá ne maumauʻi ʻa ʻene fuakavá,+ 3 ʻo ne afe ʻo lotu ki he ngaahi ʻotua kehe peá ne punou hifo kiate kinautolu pe ki he laʻaá pe ko e māhiná pe ko e kongakau kotoa ʻo e langí,+ ko ha meʻa ʻa ia kuo ʻikai te u tuʻutuʻuni atu.+ 4 ʻI hano tala atu ia kiate koe pe te ke fanongo fekauʻaki mo ia, ʻoku totonu leva ke ke fakatotoloʻi fakaʻāuliliki ʻa e meʻá ni. Kapau ʻoku fakamoʻoniʻi ko e moʻoni+ kuo fai ʻa e meʻa fakalieliá ni ʻi ʻIsileli, 5 kuo pau ke ke ʻomi ʻa e tangata pe ko e fefine kuó ne fai ʻa e meʻa kovi ko ení ki he ngaahi matapā ʻo e koló, pea ko e tangatá pe ko e fefiné kuo pau ke tolomakaʻi ia ke ne mate.+ 6 ʻOku totonu ke tāmateʻi ʻa e tokotaha ʻe maté ʻi he fakamoʻoni ʻa ha* ongo fakamoʻoni ʻe toko ua pe toko tolu.+ Kuo pau ke ʻoua naʻa tāmateʻi ia ʻi he fakamoʻoni ʻa ha toko taha.+ 7 Ko e nima ʻo e kau fakamoʻoní ʻoku totonu ke nau ʻuluaki ala kiate ia ʻo tāmateʻí, pea ʻi he hili iá ko e nima ʻo e kakaí kotoa. Kuo pau ke ke toʻo ʻa e koví mei ho lotolotongá.+

8 “Kapau ʻe malanga hake ha meʻa ʻi he taha ho ngaahi koló ʻa ia ʻoku fuʻu faingataʻa kiate koe ke ke fakamāuʻi, pe ko ha meʻa fekauʻaki mo ha lingitoto+ pe ko ha fakaʻilo kuo fai pe ko ha ngāue fakamālohi kuo fai pe ko ha fakakikihi ʻi ha ngaahi meʻa kehe, ʻoku totonu ke ke tuʻu hake ʻo ʻalu ki he feituʻu ʻa ia ʻe fili ʻe Sihova ko ho ʻOtuá.+ 9 ʻAlu ki he kau taulaʻeiki Līvaí pea ki he fakamaau+ ʻoku ngāue ʻi he ngaahi ʻaho ko iá ʻo fai haʻo fakaʻeke, pea te nau ʻoatu ʻa e tuʻutuʻuní kiate koe.+ 10 Kuo pau ke ke ngāue leva ʻo fakatatau ki he tuʻutuʻuni ʻoku nau ʻoatu kiate koe mei he feituʻu ko ia ʻoku fili ʻe Sihová. Tokanga ke ke fai ʻo fakatatau ki he meʻa kotoa ʻoku nau fakahinohino atu kiate koé. 11 Kuo pau ke ke fai ʻo fakatatau ki he lao ʻoku nau fakahaaʻi atu kiate koé pea fakatatau ki he tuʻutuʻuni ʻoku nau talaki atu kiate koé.+ ʻOua naʻá ke afe mei he tuʻutuʻuni te nau ʻoatu kiate koé, ki he toʻomataʻú pe ki he toʻohemá.+ 12 Ko e tangata ʻoku ʻafungi ʻo ʻikai te ne fanongo ki he taulaʻeiki ʻa ia ʻoku fakahoko fatongia kia Sihova ko ho ʻOtuá pe ki he fakamāú kuo pau ke ne mate.+ Kuo pau ke ke toʻo ʻa e koví mei ʻIsileli.+ 13 ʻE fanongo leva ai ʻa e kakaí kotoa pea nau hoko ʻo ilifia, pea ʻe ʻikai te nau toe ʻafungi.+

14 “ʻI hoʻo hū ki he fonua ʻoku foaki kiate koe ʻe Sihova ko ho ʻOtuá pea kuó ke maʻu ia ʻo ke nofo aí, peá ke pehē, ‘Tuku ke u fakanofo maʻaku ha tuʻi ʻo hangē ko e ngaahi puleʻanga kotoa ʻoku takatakai ʻiate aú,’+ 15 ʻi he meʻa ko iá, ʻoku mātuʻaki totonu ke ke fakanofo ha tuʻi ʻa ia ʻe fili ʻe Sihova ko ho ʻOtuá.+ ʻOku totonu ke ke fakanofo ha tuʻi mei he lotolotonga ho fanga tokouá. ʻE tapu ke ke fakanofo ke pule kiate koe ha muli ʻa ia ʻoku ʻikai ko hao tokoua. 16 Kae kehe, ʻoku ʻikai totonu ke ne maʻu maʻana ha fanga hoosi tokolahi+ pe ʻai ʻa e kakaí ke nau foki ki ʻIsipite koeʻuhí ke maʻu mai ha fanga hoosi tokolahi ange,+ he kuo tala atu ʻe Sihova kiate kimoutolu, ‘Kuo pau ke ʻoua ʻaupito naʻa mou toe foki.’ 17 Pea ʻoku ʻikai totonu ke ne maʻu maʻana ha ngaahi uaifi tokolahi, koeʻuhí ke ʻoua naʻa afe ʻa hono lotó;+ pea ʻoku ʻikai totonu ke ne maʻu maʻana ha siliva mo ha koula lahi ʻaupito.+ 18 ʻI he taimi te ne ʻafio ai ʻi he taloni ʻo hono puleʻangá, kuo pau ke ne hiki maʻana ʻi ha tohi* ha tatau ʻo e Laó ni, kuo toʻo mei he tatau naʻe tauhi ʻe he kau taulaʻeiki Līvaí.+

19 “ʻE ʻiate ia maʻu pē ia, pea kuo pau ke ne lau mei ai ʻi he ngaahi ʻaho kotoa ʻo ʻene moʻuí,+ koeʻuhí ke ne ako ai ke manavahē kia Sihova ko hono ʻOtuá pea tauhi ʻa e ngaahi lea kotoa ʻo e Laó ni mo e ngaahi tuʻutuʻuni ko ení ʻaki hono fakahoko ia.+ 20 Ko ia ʻe ʻikai mahiki ai hono lotó ʻo māʻolunga ia ʻi hono fanga tokouá, pea ʻe ʻikai te ne afe mei he tuʻutuʻuní, ki he toʻomataʻú pe ki he toʻohemá, koeʻuhi ka ne nofo ai pē ʻo fuoloa ʻi hono puleʻangá, ʻa ia mo hono ngaahi fohá ʻi he lotolotonga ʻo ʻIsilelí.

18 “Ko e kau taulaʻeiki Līvaí, ʻio, ʻa e matakali fakakātoa ʻo Līvaí, ʻe ʻikai ke foaki ange hanau ‘inasi pe ha tofiʻa fakataha mo ʻIsileli. Te nau kai mei he ngaahi feilaulau ʻoku fai ʻaki ʻa e afi kia Sihová, ʻa ia ko hono ʻinasí.+ 2 Ko ia ʻe ʻikai totonu ke nau maʻu ha tofiʻa ʻi he lotolotonga honau fanga tokouá. Ko Sihova ʻa honau tofiʻá, ʻo hangē tofu pē ko ia kuó ne folofolaʻaki kiate kinautolú.

3 “Pea ko e totonu eni ʻoku tonu ke maʻu ʻe he kau taulaʻeikí mei he kakaí: ʻIlonga ʻa ia te ne fai ha feilaulau, tatau ai pē pe ko ha pulu pe ko ha sipi, te ne foaki ʻa e alanga muʻá, ko e ongo kaungaó, pea mo e keté ki he taulaʻeikí. 4 Ko e ʻuluaki fua ʻo hoʻo uité, mo hoʻo uaine foʻoú, mo hoʻo loló, pea mo e ʻuluaki fulufuluʻisipi kuo kosi mei hoʻo tākangá ʻoku totonu ke ke foaki ia kiate ia.+ 5 Ko Sihova ko ho ʻOtuá kuó ne fili ia mo hono ngaahi fohá mei ho ngaahi matakalí kotoa ke nau fakahoko fatongia ʻi he huafa ʻo Sihová maʻu ai pē.+

6 “Ka ʻo kapau ʻe mavahe ha Līvai mei he taha ʻo ho ngaahi kolo ʻi ʻIsileli ʻa ia naʻá ne nofo aí+ pea ʻokú ne holi ke ʻalu ki he feituʻu ʻoku fili ʻe Sihová,*+ 7 te ne fakahoko fatongia ai ʻi he huafa ʻo Sihova ko hono ʻOtuá ʻo tatau mo hono fanga tokouá kotoa, ʻa e kau Līvaí, ʻa ia ʻoku nau ngāue ai ʻi he ʻao ʻo Sihová.+ 8 Te ne maʻu ha ʻinasi tatau ʻo e meʻakaí fakataha mo kinautolu,+ ʻo tānaki atu ki he meʻa ʻokú ne maʻu mei hono fakatau atu ʻa ʻene ngaahi koloa tukufakaholó.

9 “ʻI hoʻo hū ki he fonua ʻoku foaki atu ʻe Sihova ko ho ʻOtuá kiate koé, kuo pau ke ʻoua naʻá ke ako ke faʻifaʻitaki ki he ngaahi tōʻonga fakalielia ʻa e ngaahi puleʻanga ko iá.+ 10 ʻOku ʻikai totonu ke ʻilo ʻiate koe ha taha ʻokú ne ʻai hono fohá pe ko hono ʻofefiné ke ne fou atu ʻi he afí,*+ ha taha ʻokú ne fai ha vavalo,+ ha taha ʻoku faimana,+ ha taha ʻoku kumi ki ha ngaahi fakaʻilonga,+ ko ha tokotaha faifakalouʻakau,+ 11 ha taha ʻokú ne faimana ʻo talatukiʻi ʻa e niʻihi kehé, ha taha ʻoku kumi faleʻi ki ha taula faʻahikehe+ pe ko ha tokotaha ʻoku tala meʻa ki he kahaʻú,+ pe ko ha taha ʻoku kumi ki he kau maté.+ 12 He ʻilonga ʻa ia ʻokú ne fai ʻa e ngaahi meʻá ni ʻoku fakalielia ia kia Sihova, pea koeʻuhi ko e ngaahi tōʻonga fakalieliá ni ʻoku kapusi ai kinautolu mei ho ʻaó ʻe Sihova ko ho ʻOtuá. 13 ʻOku totonu ke ke fakamoʻoniʻi ʻokú ke taʻemele ʻi he ʻao ʻo Sihova ko ho ʻOtuá.+

14 “He ko e ngaahi puleʻanga ko eni ʻokú ke ikunaʻí naʻa nau faʻa fanongo ki he faʻahinga ko ia ʻoku faimana+ mo vavaló,+ ka kuo ʻikai fakaʻatā koe ʻe Sihova ko ho ʻOtuá ke ke fai ha meʻa hangē ko ení. 15 Ko Sihova ko ho ʻOtuá te ne fokotuʻu maʻau mei he lotolotonga ho fanga tokouá ha palōfita hangē ko aú. Kuo pau ke mou fanongo kiate ia.+ 16 Ko e tali eni ki he meʻa naʻá ke kole meia Sihova ko ho ʻOtuá ʻi Hōlepi ʻi he ʻaho ʻo e fuʻu fakatahá+ ʻi hoʻo pehē, ‘ʻOua naʻa tuku ke u fanongo ki he leʻo ʻo Sihova ko hoku ʻOtuá pe toe sio ki he fuʻu afí ni telia naʻá ku mate.’+ 17 Naʻe folofola mai leva ʻa Sihova kiate au, ‘Ko e meʻa kuo nau leaʻakí ʻoku lelei. 18 Te u fokotuʻu maʻanautolu mei he lotolotonga honau fanga tokouá ha palōfita hangē ko koé,+ pea te u ʻai ʻeku leá ki hono ngutú,+ pea te ne leaʻaki kiate kinautolu ʻa e meʻa kotoa ʻoku ou tuʻutuʻuni kiate iá.+ 19 Ko e moʻoni, te u ʻeke ha fakamatala mei he tangata ʻe ʻikai te ne fanongo ki heʻeku lea ʻa ia te ne leaʻaki ʻi hoku hingoá.+

20 “‘Kapau ʻe ʻafungi ha palōfita ʻo leaʻaki ha meʻa ʻi hoku hingoá ʻa ia naʻe ʻikai te u tuʻutuʻuni ke ne leaʻaki pe lea ʻi he hingoa ʻo e ngaahi ʻotua kehé, ko e palōfita ko iá kuo pau ke ne mate.+ 21 Kae kehe, te ke pehē nai ʻi ho lotó: “Te mau ʻilo fēfē kuo ʻikai ke folofolaʻaki ʻe Sihova ʻa e lea ko iá?” 22 ʻI he lea ʻa e palōfitá ʻi he huafa ʻo Sihová pea ʻikai ke fakahoko ʻa e leá pe ʻikai ke hoko moʻoni iá, tā naʻe ʻikai leva ke folofolaʻaki ʻe Sihova ʻa e lea ko iá. Naʻe leaʻaki ia ʻe he palōfitá ʻi he ʻafungi. ʻOku ʻikai totonu ke ke manavahē ʻiate ia.’

19 “ʻI he fakaʻauha ʻe Sihova ko ho ʻOtuá ʻa e ngaahi puleʻanga ʻa ia ko honau fonuá ē ʻoku foaki atu kiate koe ʻe Sihova ko ho ʻOtuá pea kuó ke ikunaʻi kinautolu ʻo ke nofo ʻi honau ngaahi koló mo honau ngaahi falé,+ 2 ʻoku totonu ke ke fakamavaheʻi ʻa e kolo ʻe tolu ʻi he lotolotonga ho fonua ʻe foaki atu ʻe Sihova ko ho ʻOtuá ke ke maʻú.+ 3 Te ke vahevahe ʻa e feituʻu ʻo e fonua kuo foaki atu ʻe Sihova ko ho ʻOtuá ke ke maʻú ki he konga ʻe tolu, pea teuteu ʻa e ngaahi halá koeʻuhí ke lava ʻo hola ai ha tokotaha tāmate tangata pē ki ha taha ʻo e ngaahi kolo ko iá.

4 “Ko e meʻa leva eni ʻe fai ʻi he fekauʻaki mo e tokotaha tāmate tangata ko ia ʻe hola ki ai ke ne moʻuí: ʻI heʻene taaʻi fāinoa ha taha kehe pea naʻe ʻikai te ne tomuʻa fehiʻa ʻiate ia;+ 5 ʻi haʻane ʻalu mo ha taha kehe ki he vaó ke tā fefie peá ne hiki hake hono nimá ke tā ʻa e fuʻu ʻakaú ʻaki ʻa e tokí, ka ʻoku homo atu ʻa e mataʻi-tokí ia mei hono ʻesiá ʻo tau ʻi he tokotaha ʻe tahá ʻo ne mate, ʻoku totonu ke hola ʻa e tokotaha tāmate tangatá ki he taha ʻo e ngaahi koló ni ke ne moʻui.+ 6 He ka ʻikai, ko e tokotaha faisāuni ʻo e totó,+ ʻi he kakaha ʻene ʻitá,* te ne tulimui atu ʻi he tokotaha tāmate tangatá ʻo ne maʻu ia, peá ne tāmateʻi ia koeʻuhí he naʻe fuʻu mamaʻo ʻaupito ʻa e vahaʻa mei ai ki he koló. Kae kehe, naʻe ʻikai taau ia ke ne mate, he naʻe ʻikai te ne tomuʻa fehiʻa ki he tokotaha ʻe tahá.+ 7 Ko e ʻuhinga ia ʻoku ou tuʻutuʻuni atu ai kiate koe: ‘Ke ke fakamavahevaheʻi ʻa e kolo ʻe tolú.’

8 “Kapau ʻe fakalahi ʻe Sihova ko ho ʻOtuá ho feituʻú ʻo hangē ko ʻene fuakava ki hoʻo fanga kuí+ pea kuó ne foaki atu ʻa e fonua kotoa naʻá ne talaʻofa ke foaki ki hoʻo fanga kuí+ 9 —ʻo kapau pē te ke tauhi faitōnunga ʻa e tuʻutuʻuni kotoa ko eni ʻoku ou ʻoatu he ʻaho ní, ke ʻofa kia Sihova ko ho ʻOtuá pea ʻaʻeva maʻu ai pē ʻi heʻene ngaahi foungá+—te ke tānaki atu leva ʻa e kolo kehe ʻe tolu ki he kolo ʻe tolu ko ení.+ 10 ʻI he meʻá ni ʻe ʻikai ai lilingi ha toto taʻehalaia+ ʻi ho fonua ʻoku foaki atu ʻe Sihova ko ho ʻOtuá ko hao tofiʻá, pea ʻe ʻikai hoko kiate koe ha halaia ʻi he toto.+

11 “Ka ʻo kapau ʻe fehiʻa ha tangata ki ha taha kehe+ pea naʻá ne taliʻi ke ʻohofi ia peá ne fakalaveaʻi ia ʻo ne mate, pea kuo hola ʻa e tangatá ki he taha ʻo e ngaahi koló ni, 12 ko e kau mātuʻa ʻo hono koló te nau ui mai leva ia mei ai pea tuku atu ia ki he nima ʻo e tokotaha faisāuni ʻo e totó, pea kuo pau ke ne mate.+ 13 ʻE ʻikai te ke ongoʻi fakaʻofaʻia ʻiate ia, pea kuo pau ke ke toʻo ʻa e halaia ʻi he toto taʻehalaiá mei ʻIsileli,+ koeʻuhí ka ke lakalakaimonū ai.

14 “ʻI hoʻo maʻu ho tofiʻa ʻi he fonua ʻe foaki atu ʻe Sihova ko ho ʻOtuá ke ke maʻú, kuo pau ke ʻoua naʻá ke ʻunuaki ʻa e fakaʻilonga ʻo e kauʻā+ ʻo ho kaungāʻapí mei he feituʻu naʻe fokotuʻu ai ʻe he fanga kuí ʻa e ngaahi kauʻaá.

15 “Heʻikai fakahalaiaʻi ʻe ha fakamoʻoni ʻa ha toko taha ha taha kehe ʻi ha faihala pē pe ko ha angahala pē nai naʻá ne fakahoko.+ ʻOku totonu ke fakapapauʻi ʻa e meʻá ʻi he fakamoʻoni ʻa e* toko ua pe ʻi he fakamoʻoni ʻa e toko tolu.+ 16 Kapau ʻe fakamoʻoni ha tokotaha fakamoʻoni fakalotokovi ki ha tangata ʻo ne tukuakiʻi ia ki ha laka hala,+ 17 ko e ongo tangata kuó na fakakikihí te na tuʻu ʻi he ʻao ʻo Sihová, ʻi he ʻao ʻo e kau taulaʻeikí pea mo e kau fakamaau ʻe faifatongia ʻi he ngaahi ʻaho ko iá.+ 18 Ko e kau fakamāú te nau fakatotoloʻi fakaʻāuliliki,+ pea kapau ko e tangata naʻe fakamoʻoní ko ha tokotaha fakamoʻoni loi pea kuó ne tukuakiʻi loi ʻa hono tokouá, 19 te mou fai kiate ia ʻo hangē pē ko e meʻa kuó ne faʻufaʻu ke fai ki hono tokouá,+ pea kuo pau ke ke toʻo ʻa e koví mei ho lotolotongá.+ 20 Ko kinautolu ʻoku toé te nau fanongo ai pea nau ilifia, pea ʻe ʻikai ʻaupito te nau toe fai ha meʻa pē ʻoku kovi ʻo hangē ko ení ʻi ho lotolotongá.+ 21 ʻE ʻikai te ke ongoʻi fakaʻofaʻia:+ Ko e moʻui ki he moʻui, mata ki he mata, nifo ki he nifo, nima ki he nima, mo e vaʻe ki he vaʻe.+

20 “Kapau te ke ʻalu atu ke tau mo ho ngaahi filí peá ke sio ai ko ʻenau fanga hōsí mo e ngaahi salioté mo e ngaahi kongakaú ʻoku tokolahi ange ia ʻi haʻaú, ʻoua naʻá ke ilifia ʻiate kinautolu, he ko Sihova ko ho ʻOtuá ʻa ia naʻá ne ʻomi koe mei he fonua ko ʻIsipité ʻokú ne ʻiate koe.+ 2 ʻI he teu ke mou ʻalu atu ki he taú, ʻoku totonu ke fakaofiofi ʻa e taulaʻeikí ʻo lea ki he kakaí.+ 3 Te ne tala kiate kinautolu, ‘Fanongo mai, ʻe ʻIsileli, ʻoku teu ke mou faitau mo homou ngaahi filí. ʻOua ʻe loto-siʻi. ʻOua ʻe ilifia pe manavahē pe tete koeʻuhi ko kinautolu, 4 he ko Sihova ko homou ʻOtuá ʻokú ne laka fakataha mo kimoutolu ke faitau mo homou ngaahi filí maʻamoutolu, pea ke fakahaofi kimoutolu.’+

5 “Ko e kau ʻōfisá foki ʻoku totonu ke nau tala ki he kakaí, ‘Ko hai ia kuó ne langa ha fale foʻou pea kuo ʻikai te ne huufi ia? Tuku ke ne foki ki hono falé. He ka ʻikai, te ne mate nai ʻi he taú pea ʻe huufi ia ʻe ha tangata kehe. 6 Pea ko hai ia kuó ne tō ha ngoue kālepi pea ʻikai ke ne kamata fakaʻaongaʻi ia? Tuku ke ne ʻalu peá ne foki ki hono falé. He ka ʻikai, te ne mate nai ʻi he taú pea ʻe kamata ke fakaʻaongaʻi ia ʻe ha tangata kehe. 7 Pea ko hai ia kuó ne fakamaʻu mo ha fefine pea kuo ʻikai te ne mali mo ia? Tuku ke ne ʻalu peá ne foki ki hono falé.+ He ka ʻikai, te ne mate nai ʻi he taú pea ʻe mali mo ia ha tangata kehe.’ 8 ʻOku totonu foki ke ʻeke ʻe he kau ʻōfisá ki he kakaí, ‘Ko hai ia ʻoku manavahē mo loto-siʻí?+ ʻOku totonu ke ne foki ki hono falé, koeʻuhí ke ʻoua te ne ʻai ke vaivai ʻa e loto ʻo hono fanga tokouá ʻo hangē pē ko iá.’*+ 9 ʻI he ʻosi ʻa e lea ʻa e kau ʻōfisá ki he kakaí, ʻoku totonu ke nau fakanofo ha ngaahi ʻeikitau ki he kau taú ke nau taki ʻa e kakaí.

10 “Kapau ʻokú ke fakaofiofi atu ki ha kolo ke tau mo ia, ʻoku totonu foki ke ke fanongonongo ki ai ha alea melino.+ 11 Kapau te ne ʻomai ha tali melino kiate koe pea fakaava mai hono matapaá kiate koe, ko e kakai kotoa ʻe maʻu aí te nau hoko ko hoʻo kakai ki he ngāue fakapōpula, pea te nau tauhi kiate koe.+ 12 Ka ʻo kapau te ne fakafisi ke fakamelino kiate koe pea ʻi hono kehé ʻokú ne faitau mo koe, ʻoku totonu ke ke ʻākoloʻi ia, 13 pea ko Sihova ko ho ʻOtuá te ne foaki moʻoni atu ia ki ho nimá, pea kuo pau ke ke taaʻi ʻa e tangata kotoa pē ʻoku ʻi aí ʻaki ʻa e heletā. 14 Kae kehe, ko e kakai fefiné, ko e fānaú, ko e fanga manú, mo e meʻa kotoa pē ʻoku ʻi he koló, ʻa e kotoa ʻo hono koloa veté, te ke faʻao ia maʻau,+ pea te ke kai ʻa e koloa vete ʻa ho ngaahi filí, ʻa ia kuo foaki atu kiate koe+ ʻe Sihova ko ho ʻOtuá.

15 “Ko e meʻa ia te ke fai ki he kolo kotoa ʻoku mamaʻo ʻaupito meiate koe ʻa ia ʻoku ʻikai kau ʻi he ngaahi kolo ʻo e ngaahi puleʻanga ofi mai ko ení. 16 Ka ʻi he ngaahi kolo ʻo e ngaahi kakai ko ení, ʻa ia ʻoku foaki atu ʻe Sihova ko ho ʻOtuá ko hao tofiʻá, kuo pau ke ʻoua naʻá ke tuku ke moʻui ai ha meʻa pē ʻoku mānava.+ 17 ʻI hono kehé, ʻoku totonu ke ke tuku kotoa atu kinautolu ki he fakaʻauhá, ʻa e kau Hetí, ko e kau ʻĀmolí, ko e kau Kēnaní, ko e kau Pēlisí, ko e kau Heví, mo e kau Siepusí,+ ʻo hangē tofu pē ko e tuʻutuʻuni ʻa Sihova ko ho ʻOtuá kiate koé; 18 koeʻuhi ke ʻoua naʻa nau akoʻi kimoutolu ke muimui ki he kotoa ʻo ʻenau ngaahi tōʻonga fakalielia ʻa ia kuo nau fai ki honau ngaahi ʻotuá, ʻo fakatupunga ai koe ke ke faiangahala kia Sihova ko homou ʻOtuá.+

19 “Kapau te ke ʻākoloʻi ha kolo ke hamu ia pea kuó ke faitau mo ia ʻi he ngaahi ʻaho lahi, ʻoku ʻikai totonu ke ke fakaʻauha ʻa hono ʻuluʻakaú ʻaki hono tā ʻaki ha toki. Te ke kai nai mei ai, ka ʻoku ʻikai totonu ke ke tā hifo ia.+ He te ke ʻākoloʻi koā ha fuʻu ʻakau ʻo e ngoué ʻo hangē ko haʻo fai ki ha tangatá? 20 Te ke fakaʻauha pē ha fuʻu ʻakau ʻokú ke ʻiloʻi ʻoku ʻikai fakaʻaongaʻi ko ha meʻakai. Te ke tā hifo ia pea ʻākoloʻi fakakolotau ʻaki ʻa e kolo ko ia ʻoku faitau mo koé, kae ʻoua kuó ne tō.

21 “Kapau ʻoku maʻu ha taha kuo tāmateʻi ʻi ha kelekele ʻo e fonua ʻoku foaki atu ʻe Sihova ko ho ʻOtuá ke ke maʻú pea ʻoku ʻikai ke ʻiloʻi pe ko hai naʻá ne tāmateʻi iá, 2 ko hoʻo kau mātuʻá mo e kau fakamāú+ te nau ʻalu atu ʻo fua ʻa e mamaʻo mei he sino kuo maté ki he ngaahi kolo ʻoku takatakai aí. 3 Ko e kau mātuʻa leva ʻo e kolo ʻoku ofi taha ki he sinó te nau toʻo mei he tākangá ha pulu mui ʻa ia kuo teʻeki ai ke fakangāueʻi, ʻa ia kuo teʻeki ai ke toho ʻi ha ʻioke, 4 pea ko e kau mātuʻa ʻo e kolo ko iá te nau taki hifo ʻa e pulu muí ki ha teleʻa* ʻoku tafe ai ʻa e vaí ʻa ia kuo teʻeki fai ai ha ngoue pe ko hono tūtuuʻi ʻo ha tenga, pea te nau motuhi ai ʻa e kia ʻo e pulu muí ʻi he teleʻá.+

5 “Pea ko e kau taulaʻeikí, ʻa e kau Līvaí, te nau fakaofiofi mai koeʻuhí ko Sihova ko ho ʻOtuá kuó ne fili kinautolu ke nau fakahoko fatongia kiate ia,+ ke nau fanongonongo ʻa e ngaahi tāpuaki ʻi he huafa ʻo Sihová.+ Te nau talaki ʻa e founga ʻe fakaleleiʻiʻaki ʻa e fakakikihi kotoa pē ʻoku kau ki ai ʻa e fakamālohí.+ 6 Ko e kau mātuʻa kotoa leva ʻo e kolo ʻoku ofi taha ki he sino kuo maté te nau fanofano honau nimá+ ʻi ʻolunga ʻi he pulu mui ʻa ia naʻe motuhi hono kiá ʻi he teleʻá, 7 pea te nau talaki, ‘Ko homau nimá naʻe ʻikai te ne lilingi ʻa e toto ko ení, pea naʻe ʻikai foki ke sio homau matá ki hono lilingi iá. 8 ʻOua naʻa lau mai ʻa e meʻá ni ki ho kakai ko ʻIsilelí, ʻa ia naʻá ke huhuʻí,+ ʻe Sihova, pea ʻoua naʻa tuku ʻa e halaia ʻi he toto taʻehalaiá ke nofo ʻi he lotolotonga ho kakai ko ʻIsilelí.’+ Pea ʻe ʻikai leva ke lau ʻa e halaia ʻi he totó kiate kinautolu. 9 ʻI he meʻá ni te ke toʻo ai ʻa e halaia ʻi he toto taʻehalaiá mei ho lotolotongá ʻaki hono fai ʻa e meʻa ʻoku totonú ʻi he vakai mai ʻa Sihová.

10 “Kapau te ke ʻalu atu ke tau mo ho ngaahi filí pea ikunaʻi kinautolu ʻe Sihova ko ho ʻOtuá maʻau peá ke taki pōpula kinautolu,+ 11 peá ke sio ai ʻi he lotolotonga ʻo e kau pōpulá ki ha fefine hoihoifua peá ke manako ʻiate ia ʻo ke loto ke ʻave ia ke ne hoko ko hao uaifi, 12 te ke ʻomi ia ki ho falé. Pea te ne tele leva hono ʻulú, ngaahi hono ngeʻesi-nimá, 13 pea huʻi hono teunga pōpulá, peá ne nofo ʻi ho falé. Te ne tengihia ʻa ʻene tamaí mo ʻene faʻeé ʻi ha māhina kakato,+ pea ʻi he hili iá te ke toki mohe* leva mo ia; te ke hoko ai ko hono husepāniti pea te ne hoko ko ho uaifi. 14 Ka ʻo kapau ʻoku ʻikai te ke leleiʻia ʻiate ia, te ke tuku atu leva ia ke ne ʻalu+ ki ha feituʻu pē ʻokú ne loto ki ai. Ka heʻikai te ke fakatau atu ia ki ha paʻanga pe tōʻongafai anga-fefeka kiate ia, koeʻuhí kuó ke fakamaaʻi ia.

15 “Kapau ʻoku maʻu ʻe ha tangata ha uaifi ʻe toko ua peá ne ʻofa he toko taha ʻo lahi hake ia he tokotaha ʻe tahá* peá na fakatou fanauʻi kiate ia ha ngaahi foha pea ko e ʻuluaki foha naʻe fāʻeleʻí ʻoku ʻa e tokotaha ia ʻoku ʻikai ʻofaʻí,+ 16 ʻi he ʻaho ko ia te ne foaki ai hono tofiʻá ki hono ngaahi fohá, ʻe ʻikai ngofua ke ne tōʻongafai ki he foha ʻo e tokotaha ʻoku ʻofaʻí ko hono ʻuluaki fohá ia kae ʻikai ko e foha ʻo e tokotaha ʻoku ʻikai ʻofaʻí, ʻa e ʻuluaki fohá. 17 ʻOku totonu ke ne fakahaaʻi ko e ʻuluaki fohá ʻa e foha ʻo e tokotaha ʻoku ʻikai ʻofaʻí ʻaki hono ʻoange kiate ia ʻa e ʻinasi ʻoku liunga ua ʻo e meʻa kotoa pē ʻokú ne maʻú, he ko e tokotaha ko iá ʻa e kamataʻanga ʻo hono ivi fakafanaú. Ko e totonu ki he tuʻunga ʻo e ʻuluaki fohá ʻoku ʻaʻana ia.+

18 “Kapau ʻoku ʻi ai ha tangata ʻa ia ko hono fohá ʻoku anga-fefeka mo angatuʻu pea ʻoku ʻikai te ne talangofua ki heʻene tamaí pe ko ʻene faʻeé,+ pea kuó na feinga ke fakatonutonu ia ka ʻokú ne fakafisi ke fanongo kiate kinaua,+ 19 ʻe puke ia ʻe heʻene tamaí mo ʻene faʻeé pea ʻave ia ki he kau mātuʻá ʻi he matapā ʻo hono koló 20 pea te na pehē ki he kau mātuʻa ʻo hono koló, ‘Ko homa foha ko ení ʻoku anga-fefeka mo angatuʻu, pea ʻokú ne fakafisi ke talangofua kiate kimaua. Ko ha tokotaha kai fakaputa*+ ia mo faʻa konā.’+ 21 Ko e kau tangata kotoa leva ʻo hono koló kuo pau ke nau tolomakaʻi ia ke ne mate. Ko ia kuo pau ke ke toʻo ʻa e koví mei ho lotolotongá, pea ʻe fanongo ai ʻa ʻIsileli kotoa pea nau hoko ʻo ilifia.+

22 “Kapau ʻe fai ʻe ha tangata ha angahala ʻoku tuha mo e tautea maté pea kuo tāmateʻi+ ia pea kuó ke tautau ia ʻi ha ʻakau,+ 23 ko hono sino kuo maté ʻe ʻikai ke kei ʻi he ʻakaú+ ia he pō kotoa ko iá. ʻI hono kehé, te ke fakapapauʻi ke tanu ia ʻi he ʻaho pē ko iá, koeʻuhí ko e tokotaha ʻoku tautaú ko ha meʻa ia kuo fakamalaʻiaʻi ʻe he ʻOtuá,+ pea ʻoku ʻikai totonu ke ke ʻuliʻi ho fonua ʻa ia ʻoku foaki atu ʻe Sihova ko ho ʻOtuá ko ho tofiʻá.+

22 “Kapau te ke sio ʻoku hē ʻa e pulu ʻa ho tokouá pe ko ʻene sipí, ʻoua naʻá ke tukunoaʻi ʻiloʻilo pau ia.+ ʻOku mātuʻaki totonu ke ke taki ia ʻo fakafoki ki ho tokouá. 2 Ka ʻo kapau ko ho tokouá ʻoku ʻikai ke nofo ofi atu kiate koe pe ʻoku ʻikai te ke ʻiloʻi ia, te ke ʻomi ʻa e monumanú ki ho falé, pea ʻe ʻiate koe ai pē ia kae ʻoua kuo kumi ki ai ʻa ho tokouá. Pea te ke toki fakafoki leva ia kiate ia.+ 3 Ko e meʻa ia te ke fai ki heʻene ʻasí, ko hono valá, pea ki ha meʻa pē ʻa ho tokouá kuo mole ka kuó ke ʻilo. Kuo pau ke ʻoua naʻá ke tukunoaʻi ia.

4 “Kapau te ke sio ki he ʻasi ʻa ho tokouá pe ko ʻene pulú ʻoku tō ʻi he halá, kuo pau ke ʻoua naʻá ke tukunoaʻi ʻiloʻilo pau ia. ʻOku mātuʻaki totonu ke ke tokoni kiate ia ke fokotuʻu hake ʻa e monumanú.+

5 “Kuo pau ke ʻoua naʻa tui ʻe ha fefine ʻa e vala ʻo ha tangata, pea ʻe ʻikai tui ʻe ha tangata ʻa e vala ʻo ha fefine. He ko ha taha pē ʻoku fai pehē ʻoku fakalielia ia kia Sihova ko ho ʻOtuá.

6 “Kapau te ke ʻilo ha pununga manupuna ʻi he veʻehalá ʻoku ʻi ai ha ʻuhiki pe fua, pe ʻoku ʻi ha fuʻu ʻakau ia pe ʻi he kelekelé, pea ʻoku ʻōʻōfaki ʻe he faʻeé ʻa e ʻuhikí pe ko e fuá, kuo pau ke ʻoua naʻá ke ʻave ʻa e faʻeé fakataha mo hono ʻuhikí.+ 7 Fakapapauʻi ke tuku ange ʻa e faʻeé, ka te ke toʻo maʻau ʻa e ʻuhikí. Fai ʻa e meʻá ni ka ke lakalakaimonū ai pea ke ke moʻui fuoloa.

8 “Kapau te ke langa ha fale foʻou, kuo pau ke ke ngaahi foki ha ʻā ʻi ho funga falé,*+ koeʻuhí ke ʻoua naʻá ke ʻomi ha halaia ʻi he toto ki ho falé koeʻuhí ko e tō ha taha mei ai.

9 “Kuo pau ke ʻoua naʻá ke tūtuuʻi ʻi hoʻo ngoue kālepí ha faʻahinga tenga kehekehe ʻe ua.+ He ka pehē, ko e meʻa kotoa pē ʻe tupu mai mei he tenga ʻokú ke tūtūʻí pea pehē ki he fua ʻo e ngoue kālepí ʻe tuku atu ia ki he feituʻu toputapú.

10 “Kuo pau ke ʻoua naʻá ke fai ha palau ʻo fakatahaʻi ha pulu mo ha ʻasi.+

11 “Kuo pau ke ʻoua naʻá ke tui ha vala kuo ngaohi fakatahaʻi+ ʻaki ʻa e fulufuluʻisipí mo e līnení.

12 “Te ke ngaohi ha kiʻi meʻa-teuteu ʻi he tuliki ʻe fā ʻo e vala ʻokú ke tuí.+

13 “Kapau ʻe maʻu uaifi ha tangata peá ne mohe* mo ia ka ki mui ai ʻokú ne hoko ʻo fehiʻa ʻiate ia* 14 peá ne tukuakiʻi ia ki he ʻulungaanga taʻetaau ʻo ne fakaongoongokoviʻi ʻa hono hingoá ʻi heʻene pehē: ‘Kuó u mali mo e fefiné ni, ka ʻi heʻeku mohe mo iá, naʻe ʻikai te u fakamoʻoniʻi naʻá ne kei nofo anga-maʻa,’ 15 ko e tamai mo e faʻē ʻa e taʻahiné te na ʻoatu ʻa e fakamoʻoni ʻo e kei nofo anga-maʻa ʻa e taʻahiné ki he kau mātuʻá ʻi he matapā ʻo e koló. 16 Kuo pau ke pehē ʻe he tamai ʻa e taʻahiné ki he kau mātuʻá, ‘Naʻá ku foaki ʻa hoku ʻofefiné ki he tangatá ni ke hoko ko hano uaifi, ka ʻokú ne fehiʻa ʻiate ia* 17 peá ne tukuakiʻi ia ki he ʻulungaanga taʻetaau ʻi heʻene pehē: “Kuó u toki ʻiloʻi ʻoku ʻikai ha fakamoʻoni ki he kei nofo anga-maʻa ʻa ho ʻofefiné.” Ko eni, ko e fakamoʻoni eni ki he kei nofo anga-maʻa ʻa hoku ʻofefiné.’ Te na folahi atu leva ʻa e tupenú ʻi he ʻao ʻo e kau mātuʻa ʻo e koló. 18 ʻE ʻave leva ʻe he kau mātuʻa ʻo e koló+ ʻa e tangatá ʻo akonakiʻi ia.+ 19 Te nau tautea ia ki he sikeli* siliva ʻe 100 pea ʻoange ia ki he tamai ʻa e taʻahiné, koeʻuhí naʻe fakaongoongokoviʻi ʻe he tangatá ha taʻahine kei nofo anga-maʻa ʻo ʻIsileli,+ pea te ne kei hoko ai pē ko hono uaifi. ʻE ʻikai ngofua ke ne veteʻi ʻa e taʻahiné ʻi he kotoa ʻene moʻuí.

20 “Ka ʻo kapau ʻoku moʻoni ʻa e tukuakiʻí, pea ʻoku ʻikai ha fakamoʻoni naʻe kei nofo anga-maʻa ʻa e taʻahiné, 21 te nau ʻave ʻa e taʻahiné ki he hūʻanga ʻo e fale ʻo ʻene tamaí, pea ko e kau tangata ʻi hono koló te nau tolomakaʻi ia ke ne mate, koeʻuhí kuó ne fai ha tōʻonga fakamā+ ʻi ʻIsileli ʻaki ʻene fai ʻa e fehokotaki fakasino taʻetaau* ʻi he fale ʻo ʻene tamaí.+ Ko ia kuo pau ke ke toʻo ʻa e koví mei ho lotolotongá.+

22 “Kapau ʻe maʻu atu ha tangata ʻokú ne mohe mo ha fefine ʻa ia ko e uaifi ia ʻo ha tangata kehe, ko kinauá kuo pau ke na mate fakatouʻosi, ʻa e tangata naʻe mohe mo e fefiné pea pehē ki he fefiné.+ Ko ia kuo pau ke ke toʻo ʻa e koví mei ʻIsileli.

23 “Kapau ʻe fakamaʻu ha taʻahine kei nofo anga-maʻa mo ha tangata, pea hokonoa ha fetaulaki mo ia ʻi he koló ha tangata kehe ʻo ne mohe mo ia, 24 ʻoku totonu ke mou ʻave kinaua fakatouʻosi ki he matapā ʻo e kolo ko iá pea tolomakaʻi kinaua ke na mate, ko e taʻahiné koeʻuhí naʻe ʻikai te ne kaikaila ʻi he koló pea ko e tangatá koeʻuhí naʻá ne fakamaaʻi ʻa e uaifi ʻo e tangata ʻe tahá.+ Ko ia kuo pau ke ke toʻo ʻa e koví mei ho lotolotongá.

25 “Kae kehe, kapau naʻe hokonoa ʻa e fetaulaki ʻa e tangatá mo e taʻahine kuo fakamaʻú ʻi he vaó pea fakamālohiʻi ia ʻe he tangatá ʻo ne mohe mo ia, ko e tangata naʻe mohe mo iá ko ia pē ʻe maté, 26 pea kuo pau ke ʻoua naʻá ke fai ha meʻa ki he taʻahiné. Kuo ʻikai fai ʻe he taʻahiné ha angahala ʻoku tuha mo e maté. Ko e meʻá ni ʻoku tatau pē ia mo hano ʻohofi ʻe ha tangata ha taha kehe ʻo ne fakapoongi ia.+ 27 He naʻe hokonoa ʻene fetaulaki mo ia ʻi he vaó, pea naʻe kaikaila ʻa e taʻahine kuo fakamaʻú, ka naʻe ʻikai ha taha ke ne fakahaofi ia.

28 “Kapau ʻe hokonoa ha fetaulaki ʻa ha tangata mo ha taʻahine kei nofo anga-maʻa ʻa ia ʻoku ʻikai ke fakamaʻu peá ne puke ia ʻo ne mohe mo ia pea ʻilo atu kinaua,+ 29 ko e tangata naʻe mohe mo iá kuo pau ke ne ʻoange ki he tamai ʻa e taʻahiné ʻa e sikeli siliva ʻe 50, pea te ne hoko ai ko hono uaifi.+ Koeʻuhi ko ʻene fakamaaʻi iá, ʻe ʻikai ngofua ke ne veteʻi ia ʻi he kotoa ʻene moʻuí.

30 “ʻE ʻikai ha tangata te ne mali mo e uaifi ʻo ʻene tamaí, koeʻuhí ke ʻoua te ne taʻefakaʻapaʻapaʻi ai ʻa ʻene tamaí.*+

23 “ʻE ʻikai hū ki he fakatahaʻanga ʻa Sihová+ ha tangata kuo maumauʻi ʻa hono tengá pe tuʻusi hono fakatangatá.

2 “ʻE ʻikai ha foha tuʻutāmaki ʻe hū ki he fakatahaʻanga ʻa Sihová.+ ʻIo, ʻo aʻu ki he toʻutangata hono hongofulú, ʻe ʻikai hū ha taha ʻo hono hakó ki he fakatahaʻanga ʻa Sihová.

3 “ʻE ʻikai hū ha taha ʻĀmoni pe Mōape ki he fakatahaʻanga ʻa Sihová.+ ʻIo, ʻo aʻu ki he toʻutangata hono hongofulú, ʻe ʻikai teitei hū ha taha ʻi hona hakó ki he fakatahaʻanga ʻa Sihová, 4 koeʻuhí naʻe ʻikai te nau tokoni kiate kimoutolu ʻaki ha meʻakai mo ha vai ʻi hoʻomou ʻalu atu mei ʻIsipité,+ pea koeʻuhí naʻa nau totongiʻi ʻa Pēlami ko e foha ʻo Pioa mei Pētola ʻo Mesopotēmiá ke ne talatukiʻi koe.+ 5 Ka ko Sihova ko ho ʻOtuá naʻá ne fakafisi ke fanongo kia Pēlami.+ ʻI hono kehé, naʻe liliu ʻe Sihova ko ho ʻOtuá ʻa e talatukí ko ha tāpuaki maʻau,+ he naʻe ʻofa ʻa Sihova ko ho ʻOtuá ʻiate koe.+ 6 ʻE ʻikai ʻaupito te ke feinga ke maʻu haʻanau lelei pe ko haʻanau lakalakaimonū ʻi he kotoa ho ngaahi ʻahó.+

7 “Kuo pau ke ʻoua naʻá ke fehiʻa ʻi ha ʻĪtomi, he ko ho tokoua ia.+

“Kuo pau ke ʻoua naʻá ke fehiʻa ʻi ha ʻIsipite, he naʻá ke hoko ko ha muli ʻi hono fonuá.+ 8 Ko e toʻutangata hono tolu ʻo e fānau ʻe fanauʻi kiate kinautolú te nau hū ki he fakatahaʻanga ʻa Sihová.

9 “ʻI hoʻo ʻapitanga ke faitau mo ho ngaahi filí, te ke fakaʻehiʻehi mei ha meʻa pē ʻoku kovi.*+ 10 Kapau ʻe hoko ha tangata ʻo taʻemaʻa koeʻuhí ko ha mahua mai meiate ia ha huhuʻa ʻi he poʻulí,+ ʻoku totonu ke ne hū ki tuʻa mei he ʻapitangá pea ʻe ʻikai te ne toe hū mai ki he ʻapitangá. 11 ʻI heʻene efiafí, te ne kaukau ʻi he vaí pea te ne toki foki leva ki he ʻapitangá ʻi he tō ʻa e laʻaá.+ 12 ʻE fakaʻilongaʻi ha potu mavahe* ke ngāueʻaki ʻi he tuʻa ʻapitangá, pea ko e feituʻu ia te ke ʻalu ki aí. 13 ʻE kau ʻi hoʻo naunaú ha vaʻakau keli. ʻI haʻo tuʻusike ʻi tuʻa, ʻoku totonu ke ke keli ʻaki ia ha luo peá ke toki tanu leva ʻa hoʻo tuʻumamaʻó. 14 He ʻoku hāʻele holo ʻa Sihova ko ho ʻOtuá ʻi ho ʻapitangá+ ke fakahaofi koe pea ke tuku atu ho ngaahi filí kiate koe, pea ko ho ʻapitangá kuo pau ke toputapu,+ ke ʻoua naʻá ne vakai ki ha meʻa taʻetaau ʻiate koe peá ne tafoki ai ʻo ʻikai te ne ʻiate koe.

15 “ʻE ʻikai te ke tuku atu ha tamaioʻeiki ki hono ʻeikí ʻi haʻane hola mei hono ʻeikí ʻo ne ʻalu atu kiate koe. 16 Te ne nofo ʻi ho lotolotongá ʻi ha feituʻu pē te ne fili ʻi he taha ho ngaahi koló, ʻi ha feituʻu pē te ne saiʻia aí. Kuo pau ke ʻoua naʻá ke ngaohikoviʻi ia.+

17 “ʻE ʻikai ha taha ʻo e ngaahi ʻofefine ʻo ʻIsilelí te ne hoko ko ha tokotaha feʻauaki ʻo e temipalé,+ pe ko ha taha pē ʻi he ngaahi foha ʻo ʻIsilelí te ne hoko ko ha tokotaha feʻauaki ʻo e temipalé.+ 18 Kuo pau ke ʻoua naʻá ke ʻomi ʻa e totongi kuo ʻoange ki ha fefine feʻauaki pe ko e totongi kuo ʻoange ki ha* tangata feʻauaki* ki he fale ʻo Sihova ko ho ʻOtuá ke fakahokoʻaki ha fuakava, he ko e meʻa fakalielia ia kia Sihova ko ho ʻOtuá.

19 “Kuo pau ke ʻoua naʻá ke ʻai ke totongi tupu+ ho tokouá, pe ko e totongi tupu ʻi ha paʻanga, ʻi ha meʻakai, pe ʻi ha meʻa pē ʻe ala hilifaki ki ai ha totongi tupu. 20 Te ke ʻai ke totongi tupu+ ha muli, ka kuo pau ke ʻoua naʻá ke ʻai ke totongi tupu+ ho tokouá, koeʻuhí ke tāpuakiʻi koe ʻe Sihova ko ho ʻOtuá ʻi he ngāue kotoa pē te ke fai ʻi he fonua ʻokú ke ʻalu atu ke maʻú.+

21 “Kapau te ke fai ha fuakava kia Sihova ko ho ʻOtuá,+ ʻoua naʻá ke fakatuotuai ke fakahoko ia.+ He ko Sihova ko ho ʻOtuá ko e moʻoni te ne fiemaʻu ia meiate koe; he ka ʻikai, ʻe hoko ia ko ha angahala kiate koe.+ 22 Ka ʻo kapau te ke fakaʻehiʻehi mei hono fai ha fuakava, ʻe ʻikai te ke halaia ai ʻi ha angahala.+ 23 Ko e lea ʻa ho loungutú ʻoku totonu ke ke fai ki ai,+ pea kuo pau ke ke fakahoko ʻa e meʻa naʻe fuakavaʻaki ʻe ho ngutú tonu ko ha feilaulau loto-tauʻatāina kia Sihova ko ho ʻOtuá.+

24 “Kapau te ke hū ki he ngoue kālepi ʻa ho kaungāʻapí, ʻe lava ke ke kai pē ʻa e kālepi feʻunga ke fakafiemālieʻi ai ʻa hoʻo ʻuakaí, ka heʻikai te ke faʻo ha meʻa ki hoʻo kató.+

25 “Kapau te ke ʻalu ki he ngoue uite ʻa ho kaungāʻapí ʻa ia ʻoku teʻeki tuʻusí, te ke toli ʻa e uite kuo motuʻá ʻaki ho nimá, ka heʻikai te ke ʻai ha hele tuʻusi ki he uite+ ʻa ho kaungāʻapí.

24 “Kapau ʻe mali ha tangata mo ha fefine ka ʻoku ʻikai te ne leleiʻia ʻi he fefiné koeʻuhi naʻá ne ʻilo ha meʻa taʻetaau fekauʻaki mo ia, kuo pau ke ne hiki maʻá e fefiné ha tohi vete,+ ʻo ne ʻoange kiate ia, pea tuku ange ia mei hono falé.+ 2 Hili ʻene mavahe mei hono falé, ʻe lava ke ne ʻalu ʻo hoko ko ha uaifi ʻo ha tangata kehe.+ 3 Kapau ʻe fehiʻa ʻiate ia ʻa e* tangata hono uá peá ne hiki maʻá e fefiné ha tohi vete, ʻo ne ʻoange kiate ia, pea tuku ange ia mei hono falé pe kapau ʻe mate ʻa e tangata hono ua naʻe mali mo iá, 4 ko hono ʻuluaki husepāniti ʻa ia naʻá ne tuku ange iá ʻe ʻikai ngofua ke ne toe fakafoki mai ia ke hoko ko hono uaifi hili hono ʻuliʻi iá, he ko e meʻa fakalielia ia kia Sihova. Kuo pau ke ʻoua naʻá ke ʻomi ha angahala ki he fonua ʻoku foaki atu ʻe Sihova ko ho ʻOtuá kiate koe ke hoko ko ho tofiʻá.

5 “ʻI he taimi ʻoku mali foʻou ai ha tangata, ʻe ʻikai te ne kau ʻi he kau taú pe ʻoange kiate ia ha toe ngaahi fatongia kehe. ʻE fakaʻatā ai pē ia ʻi he taʻu ʻe taha pea te ne nofo ʻi ʻapi ʻo ʻai ke fiefia ʻa hono uaifí.+

6 “ʻE ʻikai ke faʻao ʻe ha taha ha maka momosi-nima pe ko hono maka momosi tokaʻolungá ke hoko ko ha maluʻi ki ha nō,*+ he ko hono toʻo ia ʻa e maʻuʻanga moʻui ʻa ha taha ke hoko ko ha maluʻi.

7 “Kapau ʻoku maʻu ha taha kuó ne puke fakamālohi ha taha ʻo hono fanga tokoua ʻIsilelí pea kuó ne ngaohikoviʻi ia pea fakatau atu ia,+ ko e tokotaha kuó ne fai ʻa e puke fakamālohí kuo pau ke ne mate.+ Te ke toʻo ʻa e koví mei ho lotolotongá.+

8 “ʻI he taimi ʻe ʻasi mai ai ha kilia,* tokanga ʻaupito ke fai ʻo fakatatau ki he meʻa kotoa ʻe fakahinohino atu ʻe he kau taulaʻeiki Līvaí kiate kimoutolú.+ Tokanga ke fai ʻa e meʻa tofu pē ko ia kuó u tuʻutuʻuni kiate kinautolú. 9 Manatuʻi ʻa e meʻa naʻe fai ʻe Sihova ko ho ʻOtuá kia Meliame ʻi he taimi naʻa mou fononga mai ai mei ʻIsipité.+

10 “Kapau te ke tali ha faʻahinga nō ʻa ho kaungāʻapí,+ kuo pau ke ʻoua naʻá ke hū ki hono falé ke faʻao meiate ia ʻa e meʻa kuó ne fakahaaʻi ko e maluʻí. 11 Te ke tuʻu ʻi tuʻa, pea ko e tangata naʻe noó te ne ʻomi ki tuʻa kiate koe ʻa e meʻa ʻokú ne foaki ko e maluʻí. 12 Pea kapau ko e tangatá ʻoku fusimoʻomo, kuo pau ke ʻoua naʻá ke mohe lolotonga ʻoku kei ʻiate koe ʻa e meʻa naʻá ne ʻoatu ko e maluʻí.+ 13 Te ke mātuʻaki fakafoki kiate ia ʻa e meʻa kuó ne ʻoatu ko e maluʻí ʻi he tō pē ʻa e laʻaá, pea te ne mohe mo hono kofú,+ pea te ne tāpuakiʻi koe; pea ʻe lau ai ʻokú ke māʻoniʻoni ʻi he ʻao ʻo Sihova ko ho ʻOtuá.

14 “Kuo pau ke ʻoua naʻá ke kākaaʻi ha tokotaha ngāue totongi ʻa ia ʻoku fusimoʻomo mo masiva, pe ko e taha ʻo ho fanga tokouá pe ko ha muli ʻi ho fonuá, ʻi ho ngaahi koló.*+ 15 Te ke ʻoange kiate ia ʻene vahé ʻi he ʻaho tofu pē ko iá,+ ki muʻa ʻi he tō ʻa e laʻaá, koeʻuhí he ʻokú ne fusimoʻomo pea ʻoku fakatuʻunga ʻa ʻene moʻuí ʻi heʻene vahé. He ka ʻikai, te ne tangi kia Sihova koeʻuhi ko koe, pea te ke halaia ai ʻi he angahala.+

16 “ʻE ʻikai ke mate ʻa e ngaahi tamaí koeʻuhi ko e meʻa ʻoku fai ʻe heʻenau fānaú, pea ʻe ʻikai ke mate ʻa e fānaú koeʻuhi ko e meʻa ʻoku fai ʻe heʻenau ngaahi tamaí.+ ʻE mate ha taha ʻi heʻene angahala pē ʻaʻaná.+

17 “Kuo pau ke ʻoua naʻá ke pikoʻi ʻa e fakamaau ʻo e mulí pe ko e tamai-maté,*+ pea kuo pau ke ʻoua naʻá ke faʻao ʻa e kofu ʻo ha uitou ko ha maluʻi ki ha nō.*+ 18 Manatuʻi naʻá ke hoko ko ha pōpula ʻi ʻIsipite, pea naʻe huhuʻi koe ʻe Sihova ko ho ʻOtuá mei ai.+ Ko e ʻuhinga ia ʻoku ou tuʻutuʻuni atu ai ke ke fai ení.

19 “ʻI hoʻo fai ʻa e tuʻusi mei he utu-taʻu ʻo hoʻo ngoué pea kuo ngalo ʻiate koe ha haʻinga ʻi he ngoué, ʻoua naʻá ke foki ke maʻu ia. ʻE tuku ia maʻá e mulí, ko e tamai-maté, pea mo e uitoú,+ koeʻuhi ke tāpuakiʻi koe ʻe Sihova ko ho ʻOtuá ʻi he meʻa kotoa ʻokú ke faí.+

20 “ʻI hoʻo tā hifo ʻa e fua ʻo ho fuʻu ʻōlivé, ʻe ʻikai te ke toe fai ʻa e meʻa tatau ki hono ngaahi vaʻá. Ko e meʻa ʻe toé ʻe tuku ai pē ia maʻá e mulí, ko e tamai-maté, pea mo e uitoú.+

21 “ʻI hoʻo toli ʻa hoʻo ngoue kālepí, kuo pau ke ʻoua naʻá ke toe foki ke tānaki ʻa e meʻa ʻoku toé. ʻE tuku ia maʻá e mulí, ko e tamai-maté, pea mo e uitoú. 22 Manatuʻi naʻá ke hoko ko ha pōpula ʻi he fonua ko ʻIsipité. Ko e ʻuhinga ia ʻoku ou tuʻutuʻuni atu ai ke ke fai ení.

25 “ʻI he malanga hake ha fakakikihi ʻi he vahaʻa ʻo ha ongo tangata, te na hā leva ʻi he ʻao ʻo e kau fakamāú,+ pea te nau fakamāuʻi kinaua pea fakahaaʻi ʻoku tonuhia ʻa e tokotaha māʻoniʻoní pea halaia+ ʻa e tokotaha fulikivanú. 2 Kapau ko e tokotaha fulikivanú ʻoku tuha mo hano tā,+ ʻe ʻai ia ʻe he fakamāú ke ne tokoto foʻohifo, pea ʻe tā ia ʻi hono ʻaó. Ko e lahi ʻo e taá ʻe fakatatau ia ki he fulikivanu ʻo ʻene ngāué. 3 Te ne tā ia ʻo aʻu ki he foʻi tā ʻe 40,+ ka ʻe ʻikai ke toe laka hake ai. Kapau ʻe hokohoko atu pē ʻene tā iá ʻo laka hake ʻa e taá ʻi he meʻá ni, ʻe fakamaaʻi ai ho tokouá ʻi ho ʻaó.

4 “Kuo pau ke ʻoua naʻá ke haʻi ʻa e ngutu ʻo ha pulu ʻi heʻene ʻauʻau* ʻa e uité.+

5 “Kapau ʻe nofo fakataha ha kau tautehina pea mate ha taha ʻia kinautolu ʻo ʻikai hano foha, ko e uaifi ʻo e pekiá ʻe ʻikai te ne mali mo ha taha ʻi tuʻa mei he fāmilí. Ko e tokoua ʻo hono malí te ne ʻalu kiate ia, ʻo ne ʻave ia ke hoko ko hono uaifi, pea fakahoko mo ia ʻa e mali mo e tokoua ʻo e husepānití.+ 6 Ko e ʻuluaki foha te ne fanauʻí ʻe fakamoʻui ai ʻa e hingoa ʻo e pekiá,+ koeʻuhí ke ʻoua naʻa mole ʻosi ʻa hono hingoá mei ʻIsileli.+

7 “Kapau leva ʻoku ʻikai fie mali ʻa e tangatá ia mo e uaifi ʻo hono tokouá, ko e uaifi ʻo hono tokouá te ne ʻalu leva ki he kau mātuʻa ʻi he matapā ʻo e koló peá ne pehē, ‘Ko e tokoua ʻo hoku husepānití kuo ʻikai te ne fie fakatolonga ʻa e hingoa ʻo hono tokouá ʻi ʻIsileli. Kuo ʻikai te ne loto ke fakahoko mo au ʻa e mali mo e tokoua ʻo e husepānití.’ 8 Kuo pau ke ui ia ʻe he kau mātuʻa ʻi hono koló ʻo nau lea kiate ia. Kapau te ne kei vilitaki pē ʻo pehē, ‘ʻOku ʻikai te u fie mali mo ia,’ 9 ko e uaifi leva ʻo hono tokouá te ne ʻunuʻunu atu kiate ia ʻi he ʻao ʻo e kau mātuʻá ʻo vete hono senitoló mei hono vaʻé+ peá ne ʻanuhi hono matá, ʻo ne pehē, ‘Ko e meʻa eni ʻe fai ki he tangata ʻe ʻikai te ne langa hake ʻa e fāmili ʻa hono tokouá.’ 10 ʻI he hili iá ʻe ʻiloa ʻa hono hingoa fakafāmilí* ʻi ʻIsileli, ‘Ko e fale ʻo e tokotaha naʻe vete hono senitoló.’

11 “Kapau ʻe fuhu ha ongo tangata pea kau mai ʻa e uaifi ʻo e toko taha ke maluʻi hono husepānití mei he tokotaha ʻokú ne tuki iá peá ne ala atu ʻo ne puke ʻa hono fakatangatá, 12 kuo pau ke ke tuʻusi ʻa hono nimá. ʻE ʻikai totonu ke ke ongoʻi fakaʻofaʻia ʻiate ia.

13 “Kuo pau ke ʻoua naʻa ʻi hoʻo kató ha ongo maka fua mamafa kehekehe ʻe ua,+ ko ha maka fōlahi mo ha maka fōsiʻi. 14 Kuo pau ke ʻoua naʻa ʻi ho falé ha ongo meʻafua kehekehe ʻe ua,*+ ko ha meʻafua lahi mo ha meʻafua siʻisiʻi. 15 Te ke tauhi ha meʻa fakamamafa ʻoku tonu mo faitotonu pea mo ha fua ʻoku tonu mo faitotonu, koeʻuhí ke ke moʻui fuoloa ai ʻi he fonua ʻoku foaki ʻe Sihova ko ho ʻOtuá kiate koé.+ 16 He ko e tokotaha taʻefaitotonu kotoa pē ʻokú ne fai ʻa e ngaahi meʻa peheé ʻoku fakalielia ia kia Sihova ko ho ʻOtuá.+

17 “Manatuʻi ʻa e meʻa naʻe fai ʻe ʻAmaleki kiate koe ʻi he halá ʻi hoʻomou haʻu mei ʻIsipité,+ 18 ʻa ʻene fakafetaulaki kiate koe ʻi he halá ʻo ne ʻohofi ʻa e faʻahinga kotoa naʻe haʻu movetevete ʻi mui ʻiate koe ʻi hoʻo helaʻia mo ongosiá. Naʻe ʻikai te ne manavahē ki he ʻOtuá. 19 ʻI hono ʻoatu ʻe Sihova ko ho ʻOtuá kiate koe ha mālōlō mei he kotoa ho ngaahi fili takatakai ʻiate koé ʻi he fonua ʻoku foaki atu ʻe Sihova ko ho ʻOtuá ko hao tofiʻa ke ke maʻú,+ te ke tafiʻi ʻa ʻAmaleki ke ʻoua ʻaupito naʻa toe manatua ʻi he lalo langí.+ Kuo pau ke ʻoua naʻa ngalo ia ʻiate koe.

26 “ʻI he faifai peá ke hū ki he fonua ʻoku foaki atu ʻe Sihova ko ho ʻOtuá kiate koe ko hao tofiʻá pea kuó ke maʻu ia ʻo ke nofo ai, 2 te ke toʻo ha konga ʻo e ʻuluaki fua mei he fua kotoa pē ʻo e kelekelé, ʻa ia te ke tānaki mei ho fonua ʻoku foaki atu ʻe Sihova ko ho ʻOtuá kiate koé, peá ke faʻo ia ʻi ha kato peá ke ʻalu ki he feituʻu ʻoku fili ʻe Sihova ko ho ʻOtuá ke ʻi ai ʻa hono huafá.+ 3 Kuo pau ke ke ʻalu ki he taulaʻeiki ʻa ia ʻe faifatongia ʻi he ngaahi ʻaho ko iá ʻo ke pehē kiate ia, ‘ʻI he ʻahó ni ʻoku ou fakahaaʻi ai kia Sihova ko ho ʻOtuá kuó u haʻu ki he fonua naʻe fuakavaʻaki ʻe Sihova ki heʻetau fanga kuí ke foaki mai kiate kitautolú.’+

4 “Ko e taulaʻeikí leva te ne toʻo ʻa e kató mei ho nimá ʻo tuku ia ʻi muʻa ʻi he ʻōlita ʻo Sihova ko ho ʻOtuá. 5 Te ke talaki leva ʻi he ʻao ʻo Sihova ko ho ʻOtuá, ‘Ko ʻeku tamaí ko ha Alamea*+ hikihiki holo ia;* pea naʻá ne ʻalu hifo ki ʻIsipite+ ʻo ne nofo ai ko ha muli, pea naʻe tokosiʻi ʻa hono fāmilí.+ Ka naʻá ne hoko ai ko ha puleʻanga lahi, mo mālohi pea mo tokolahi.+ 6 Pea naʻe ngaohikoviʻi mo lōmekina kimautolu ʻe he kau ʻIsipité pea fakangāueʻi pōpula anga-kakaha kimautolu.+ 7 Ko ia naʻe kamata ke mau tangi ai kia Sihova, ko e ʻOtua ʻo ʻemau fanga kuí, pea naʻe fanongo mai ʻa Sihova ki homau leʻó pea hāngaifofonga mai ki heʻemau mamahí mo ʻemau faingataʻaʻiá pea mo homau lōmekiná.+ 8 Faifai atu pē naʻe ʻomi kimautolu ʻe Sihova mei ʻIsipite ʻaki ha nima mālohi mo ha nima kuo mafao atu+ pea ʻi he ngaahi ngāue fakamanavahē, fakataha mo e ngaahi fakaʻilonga mo e ngaahi mana.+ 9 Naʻá ne ʻomi leva kimautolu ki he feituʻu ko ení pea foaki mai kiate kimautolu ʻa e fonuá ni, ko ha fonua ʻoku mahutafea ʻi he huʻakau mo e hone.+ 10 Ko eni kuó u ʻomai ʻa e ʻuluaki fua mei he fua ʻo e kelekele kuo foaki mai ʻe Sihova kiate aú.’+

“Kuo pau ke ke tuku ia ʻi he ʻao ʻo Sihova ko ho ʻOtuá pea punou hifo ʻi he ʻao ʻo Sihova ko ho ʻOtuá. 11 Te ke toki fiefia leva ai ʻi he ngaahi lelei kotoa kuo foaki atu ʻe Sihova ko ho ʻOtuá kiate koe mo ho fāmilí, ʻa koe mo e Līvai pea mo e muli ʻa ia ʻoku ʻi ho lotolotongá.+

12 “ʻI he ʻosi hoʻo vaheʻi ʻa e vahe hongofulu+ fakakātoa ʻo hoʻo fuá ʻi he taʻu hono tolú, ʻa e taʻu ʻo e vahe hongofulú, te ke foaki ia ki he Līvaí, ko e mulí, ko e tamai-maté,* pea mo e uitoú, pea te nau kai ʻo nau mākona ʻi ho ngaahi koló.*+ 13 Te ke toki pehē leva ʻi he ʻao ʻo Sihova ko ho ʻOtuá, ‘Kuó u fetuku ʻa e ʻinasi toputapú mei hoku falé pea foaki ia ki he Līvaí, ko e mulí, ko e tamai-maté, pea mo e uitoú,+ ʻo hangē tofu pē ko ia kuó ke tuʻutuʻuni mai kiate aú. Kuo ʻikai te u maumauʻi pe liʻaki hoʻo ngaahi tuʻutuʻuní. 14 Kuo ʻikai te u kai mei ai lolotonga ʻeku mamahí pe toʻo hano konga lolotonga ia ʻoku ou taʻemaʻa pe foaki hano konga maʻá e kau maté. Kuó u talangofua ki he leʻo ʻo Sihova ko hoku ʻOtuá pea kuó u fai ʻa e meʻa kotoa kuó ke tuʻutuʻuni mai kiate aú. 15 Ko eni ke ke hāngaifofonga hifo mei ho ʻafioʻanga māʻoniʻoní, ʻa e langí, pea tāpuakiʻi ho kakaí, ʻa ʻIsileli mo e fonua kuó ke foaki mai kiate kimautolú,+ ʻo hangē tofu pē ko hoʻo fuakava ki heʻemau fanga kuí,+ ko e fonua ʻoku mahutafea ʻi he huʻakau mo e hone.’+

16 “ʻI he ʻahó ni ʻoku tuʻutuʻuni atu ai ʻe Sihova ko ho ʻOtuá ke ke fakahoko ʻa e ngaahi lao mo e ngaahi tuʻutuʻuni fakaefakamaau ko ení. Kuo pau ke ke tauhi mo fakahoko ia ʻaki ho lotó kotoa+ mo hoʻo moʻuí kotoa. 17 ʻI he ʻahó ni kuó ke maʻu ai ʻa hono talaki ʻe Sihova te ne hoko ko ho ʻOtua ʻi hoʻo ʻaʻeva ʻi heʻene ngaahi foungá pea tauhi ʻene ngaahi laó,+ ʻa ʻene ngaahi fekaú,+ mo ʻene ngaahi tuʻutuʻuni fakaefakamāú,+ pea ʻi hoʻo fanongo ki hono leʻó. 18 Pea ʻi he ʻahó ni kuo maʻu ai ʻe Sihova ʻa hoʻo talaki te ke hoko ko hono kakai, ko ʻene koloa makehe,*+ ʻo hangē tofu pē ko ʻene talaʻofa kiate koé, pea te ke tauhi ʻa e kotoa ʻo ʻene ngaahi tuʻutuʻuní 19 pea te ne hakeakiʻi koe ke ke māʻolunga ʻi he ngaahi puleʻanga kehe kotoa pē kuó ne ngaohí,+ ʻo ʻoatu ai kiate koe ʻa e fakahīkihiki mo e ongoongoa mo e lāngilangi ʻi hoʻo fakamoʻoniʻi koe ko ha kakai māʻoniʻoni kia Sihova ko ho ʻOtuá,+ ʻo hangē tofu pē ko ʻene talaʻofá.”

27 Naʻe tuʻutuʻuni leva ʻa Mōsese mo e kau mātuʻa ʻo ʻIsilelí ki he kakaí, ʻo pehē: “Mou tauhi ʻa e tuʻutuʻuni kotoa ʻoku ou ʻoatu kiate kimoutolu he ʻaho ní. 2 Pea ʻi he ʻaho ʻa ia te mou kolosi atu ai ʻi Sioatani ki he fonua ʻoku foaki atu ʻe Sihova ko ho ʻOtuá kiate koé, te ke fokotuʻu ha ngaahi fuʻu maka lalahi pea palasitaaʻi*+ ia. 3 Pea tohi leva ai ʻa e ngaahi lea kotoa ʻo e Laó ni ʻi he hili hoʻo kolosi atú, koeʻuhi ke ke hū ai ki he fonua ʻoku foaki atu ʻe Sihova ko ho ʻOtuá kiate koé, ko ha fonua ʻoku mahutafea ʻi he huʻakau mo e hone, ʻo hangē tofu pē ko e talaʻofa ʻa Sihova, ko e ʻOtua ʻo hoʻo fanga kuí, kiate koé.+ 4 ʻI he hili hoʻomou kolosi atu ʻi Sioataní, te mou fokotuʻu ʻa e ngaahi maká ni ʻi Moʻunga ʻĪpale+ pea palasitaaʻi* ia, ʻo hangē tofu pē ko ʻeku tuʻutuʻuni atu kiate kimoutolu he ʻaho ní. 5 Te ke toe langa foki ai ha ʻōlita kia Sihova ko ho ʻOtuá, ko ha ʻōlita maka. ʻE ʻikai te ke ngāueʻaki ki ai ha ngaahi meʻangāue ukamea.+ 6 Te ke langa ʻa e ʻōlita ʻo Sihova ko ho ʻOtuá ʻaki ʻa e ngaahi fuʻu maka kuo ʻikai tā pea fai ai ha ngaahi feilaulau tutu kia Sihova ko ho ʻOtuá. 7 Te ke fai ha ngaahi feilaulau feʻinasiʻaki+ pea kai ia ai,+ pea te ke fiefia ʻi he ʻao ʻo Sihova ko ho ʻOtuá.+ 8 Pea tohi ke mahino ʻi he ngaahi maká ʻa e ngaahi lea kotoa ʻo e Laó ni.”+

9 Naʻe lea leva ʻa Mōsese mo e kau taulaʻeiki Līvaí ki ʻIsileli kotoa, ʻo pehē: “Hanganaki fakalongolongo pea fanongo, ʻe ʻIsileli. ʻI he ʻahó ni kuó ke hoko ai ko e kakai ʻa Sihova ko ho ʻOtuá.+ 10 Kuo pau ke ke fanongo ki he leʻo ʻo Sihova ko ho ʻOtuá pea fakahoko ʻene ngaahi tuʻutuʻuní+ mo ʻene ngaahi laó, ʻa ia ʻoku ou tuʻutuʻuni atu kiate koe he ʻaho ní.”

11 ʻI he ʻaho ko iá naʻe tuʻutuʻuni ai ʻa Mōsese ki he kakaí, ʻo pehē: 12 “Ko e ngaahi matakali eni te nau tuʻu ʻi Moʻunga Kelisimi+ ke tāpuakiʻi ʻa e kakaí ʻi he hili hoʻomou kolosi atu ʻi Sioataní: Ko Simione, Līvai, Siuta, ʻĪsaka, Siosifa, pea mo Penisimaní. 13 Pea ko kinautolu eni te nau tuʻu ʻi Moʻunga ʻĪpale+ ke fanongonongo ʻa e malá: Ko Lūpeni, Kata, ʻĀseli, Sepuloni, Tani, pea mo Nafitalaí. 14 Pea ko e kau Līvaí te nau tali leʻo-lahi+ atu ki he tangata kotoa pē ʻo ʻIsilelí:

15 “‘Malaʻia ē ko e tangata ʻokú ne ngaohi ha ʻīmisi kuo tongi+ pe ko ha ʻīmisi mētale,*+ ko ha meʻa fakalielia ia kia Sihova,+ ko e ngāue ʻa e nima ʻo ha tangata nima-meaʻa,* pea kuó ne fufū ia.’ (Pea ko e kakaí kotoa te nau tali, ʻo pehē, ‘ʻĒmeni!’*)

16 “‘Malaʻia ē ko e tokotaha ʻokú ne taʻetokaʻi+ ʻa ʻene tamaí pe ko ʻene faʻeé.’ (Pea ko e kakaí kotoa te nau pehē, ‘ʻĒmeni!’)

17 “‘Malaʻia ē ko e tokotaha ʻokú ne ʻunuaki ʻa e fakaʻilonga ʻo e kauʻā+ ʻa hono kaungāʻapí.’ (Pea ko e kakaí kotoa te nau pehē, ‘ʻĒmeni!’)

18 “‘Malaʻia ē ko e tokotaha ʻokú ne fakaheeʻi ha tokotaha kui ʻi he halá.’+ (Pea ko e kakaí kotoa te nau pehē, ‘ʻĒmeni!’)

19 “‘Malaʻia ē ko e tokotaha ʻokú ne pikoʻi ʻa hono fakamāuʻi+ ʻo ha muli, ko ha tamai-mate,* pe ko ha uitou.’+ (Pea ko e kakaí kotoa te nau pehē, ‘ʻĒmeni!’)

20 “‘Malaʻia ē ko e tokotaha ʻoku mohe* mo e uaifi ʻo ʻene tamaí, he kuó ne taʻefakaʻapaʻapaʻi ai ʻa ʻene tamaí.’*+ (Pea ko e kakaí kotoa te nau pehē, ‘ʻĒmeni!’)

21 “‘Malaʻia ē ko e tokotaha ʻoku mohe mo ha faʻahinga monumanu pē.’+ (Pea ko e kakaí kotoa te nau pehē, ‘ʻĒmeni!’)

22 “‘Malaʻia ē ko e tokotaha ʻoku mohe mo hono tuofefiné, ʻa e ʻofefine ʻo ʻene tamaí pe ko e tama ʻa ʻene faʻeé.’+ (Pea ko e kakaí kotoa te nau pehē, ‘ʻĒmeni!’)

23 “‘Malaʻia ē ko e tokotaha ʻoku mohe mo e faʻē ʻa hono malí.’+ (Pea ko e kakaí kotoa te nau pehē, ‘ʻĒmeni!’)

24 “‘Malaʻia ē ko e tokotaha ʻokú ne lamasi ʻo tāmateʻi ʻa hono kaungāʻapí.’+ (Pea ko e kakaí kotoa te nau pehē, ‘ʻĒmeni!’)

25 “‘Malaʻia ē ko e tokotaha ʻokú ne tali ha totongi fufū ke tāmateʻi* ha tokotaha taʻehalaia.’+ (Pea ko e kakaí kotoa te nau pehē, ‘ʻĒmeni!’)

26 “‘Malaʻia ē ko e tokotaha ʻa ia ʻe ʻikai te ne pouaki ʻa e ngaahi lea ʻo e Laó ni ʻaki hono fakahoko ia.’+ (Pea ko e kakaí kotoa te nau pehē, ‘ʻĒmeni!’)

28 “Pea kapau moʻoni te ke fanongo ki he leʻo ʻo Sihova ko ho ʻOtuá ʻaki hoʻo tokanga ke fai ʻa ʻene ngaahi tuʻutuʻuni kotoa ʻoku ou tuʻutuʻuni atu kiate koe he ʻaho ní, ko e moʻoni ʻe hakeakiʻi koe ʻe Sihova ko ho ʻOtuá ke ke māʻolunga ʻi he ngaahi puleʻanga kehe kotoa pē ʻo e māmaní.+ 2 Ko e ngaahi tāpuakí ni kotoa ʻe hoko mai ia kiate koe ʻo ne maʻu koe,+ koeʻuhí ko hoʻo hanganaki fanongo ki he leʻo ʻo Sihova ko ho ʻOtuá:

3 “ʻE tāpuekina koe ʻi he koló, pea ʻe tāpuekina koe ʻi he vaó.+

4 “ʻE tāpuekina ʻa hoʻo fānaú*+ mo e fua ʻo ho kelekelé mo e ʻuhiki ʻo hoʻo fanga manú, ʻa hoʻo ʻuhikiʻi pulú mo e sipí.+

5 “ʻE tāpuekina ʻa hoʻo kató+ mo hoʻo poulu natuʻanga maá.+

6 “ʻE tāpuekina koe ʻi hoʻo hū maí, pea ʻe tāpuekina koe ʻi hoʻo hū atú.

7 “ʻE ʻai ʻe Sihova ho ngaahi fili ʻoku tuʻu kiate koé ke ikunaʻi kinautolu ʻi ho ʻaó.+ Te nau ʻohofi koe mei he tafaʻaki ʻe taha, ka te nau hola meiate koe ʻi he tafaʻaki kehekehe ʻe fitu.+ 8 ʻE tuʻutuʻuni ʻe Sihova maʻau ha tāpuaki ki ho ngaahi feleokó+ mo hoʻo ngaahi ngāue kotoa pē, pea te ne tāpuakiʻi moʻoni koe ʻi he fonua ʻoku foaki atu ʻe Sihova ko ho ʻOtuá kiate koé. 9 ʻE fokotuʻu koe ʻe Sihova ko ha kakai māʻoniʻoni kiate ia,+ ʻo hangē tofu pē ko ʻene fuakava kiate koé,+ koeʻuhí ko hoʻo hokohoko atu ʻa e tauhi ki he ngaahi tuʻutuʻuni ʻa Sihova ko ho ʻOtuá mo ʻaʻeva ʻi heʻene ngaahi foungá. 10 Ko e ngaahi kakai kotoa pē ʻo e māmaní te nau vakai kuo uiʻaki koe ʻa e huafa ʻo Sihová,+ pea te nau ilifia ʻiate koe.+

11 “ʻE ʻai ʻe Sihova ke hulu atu ʻa e tokolahi ʻo hoʻo fānaú mo e tokolahi hoʻo fanga manú pea mo e fua ʻo ho kelekelé+ ʻi he fonua naʻe fuakava ʻe Sihova ki hoʻo fanga kuí ke foaki kiate koé.+ 12 ʻE fakaava ʻe Sihova kiate koe ʻa ʻene tukuʻanga koloa leleí, ʻa e langí, ke tuku atu ki ho fonuá ʻa e ʻuha ʻi hono faʻahitaʻú+ pea ke tāpuakiʻi ʻa e meʻa kotoa pē ʻokú ke faí. Te ke tali nō ki he ngaahi puleʻanga lahi, lolotonga ia ko koe tonu ʻe ʻikai fiemaʻu ia ke ke nō.+ 13 ʻE fokotuʻu koe ʻe Sihova ke ke ʻulu, kae ʻikai ke ke hiku; pea te ke ʻi ʻolunga,+ kae ʻikai ʻi lalo, kapau te ke hanganaki talangofua ki he ngaahi tuʻutuʻuni ʻa Sihova ko ho ʻOtuá ʻa ia ʻoku ou tuʻutuʻuni atu he ʻahó ni kiate koe ke ke tauhi peá ke faí. 14 Kuo pau ke ʻoua naʻá ke afe mei he ngaahi lea kotoa pē ʻoku ou tuʻutuʻuni atu kiate kimoutolu he ʻaho ní, ki he toʻomataʻú pe ki he toʻohemá,+ ke muimui ʻi he ngaahi ʻotua kehé ʻo tauhi kiate kinautolu.+

15 “Ka ʻo kapau ʻe ʻikai te ke fanongo ki he leʻo ʻo Sihova ko ho ʻOtuá ʻaki hoʻo tokanga ke fai ʻa ʻene ngaahi fekau mo ʻene ngaahi tuʻutuʻuni kotoa ʻoku ou tuʻutuʻuni atu he ʻaho ní, ko e ngaahi mala kotoa eni ʻe hoko mai kiate koe ʻo ne maʻu koé:+

16 “Te ke malaʻia ʻi he koló, pea te ke malaʻia ʻi he vaó.+

17 “ʻE malaʻia hoʻo kató+ mo hoʻo poulu natuʻanga maá.+

18 “ʻE malaʻia hoʻo fānaú*+ mo e fua ʻo ho kelekelé pea mo hoʻo ʻuhikiʻi pulú mo e sipí.+

19 “Te ke malaʻia ʻi hoʻo hū maí, pea te ke malaʻia ʻi hoʻo hū atú.

20 “ʻE fekauʻi atu ʻe Sihova kiate koe ʻa e mala, puputuʻu mo e tautea ʻi hoʻo ngāue kotoa pē kae ʻoua kuó ke ʻauha ʻosi mo ke ʻauha vave, koeʻuhí ko hoʻo ngaahi tōʻonga koví mo hoʻo liʻaki aú.+ 21 ʻE ʻai ʻe Sihova ʻa e mahakí ke pīkitai kiate koe kae ʻoua kuó ne fakaʻauhamālie koe mei he fonua ʻokú ke ʻalu atu ke maʻú.+ 22 ʻE taaʻi koe ʻe Sihova ʻaki ʻa e mahaki-fatafata, mofi lahi,+ fefulofulai, vevela hangē ko e mofí, ko e heletā,+ mahunu mo mahakiʻia ʻa e ʻakaú;+ pea te nau tulimui ʻiate koe kae ʻoua kuó ke ʻauha. 23 Ko e langi ʻi ʻolunga ho ʻulú ʻe hoko ko e kopa, pea ko e māmani ʻiate koe ʻi lalo ní ʻe hoko ko e ukamea.+ 24 ʻE ʻai ʻe Sihova ʻa e ʻuha ʻi ho fonuá ke hoko ko e efuefu mo e efu ʻa ia ʻe ʻalu hifo kiate koe mei he langí kae ʻoua kuó ke ʻauha ʻosi. 25 ʻE ʻai ʻe Sihova ke ikunaʻi koe ʻi he ʻao ho ngaahi filí.+ Te ke ʻohofi kinautolu mei he tafaʻaki ʻe taha, ka te ke hola meiate kinautolu ʻi he tafaʻaki kehekehe ʻe fitu; pea te ke hoko ko ha meʻa ke fakalilifuʻia ai ʻa e ngaahi puleʻanga kotoa pē ʻo e māmaní.+ 26 Pea ko ho ʻangaʻangá ʻe hoko ko e meʻakai ki he manupuna kotoa pē ʻo e ʻataá mo e monumanu ʻo e kelekelé, pea ʻe ʻikai ha taha te ne seʻe kinautolu.+

27 “ʻE taaʻi koe ʻe Sihova ʻaki ʻa e hangatāmaki ʻo ʻIsipité, ko e kahi, veli, mo e mahaki kili, ʻa ia ʻe ʻikai lava ke faitoʻo koe mei ai. 28 ʻE taaʻi koe ʻe Sihova ʻaki ʻa e sesele mo e kui+ pea mo e puputuʻu.* 29 Te ke taufā holo ʻi he hoʻatā mālié, ʻo hangē pē ko e taufā holo ʻa ha tangata kui ʻi he fakapoʻulí,+ pea ʻe ʻikai te ke lavameʻa ʻi ha meʻa pē te ke fai; pea ʻe faʻa kākaaʻi mo kaihaʻasia koe, ʻo ʻikai ha taha ke ne fakahaofi koe.+ 30 Te ke fakamaʻu mo ha fefine, ka ʻe tohotohoʻi ia ʻe ha tangata kehe. Te ke langa ha fale, ka ʻe ʻikai te ke nofo ai.+ Te ke tō ha ngoue kālepi, ka ʻe ʻikai te ke kamata fakaʻaongaʻi ia.+ 31 Ko hoʻo pulú ʻe tāmateʻi ʻo ke mamata tonu ki ai, ka ʻe ʻikai te ke kai ha meʻa mei ai. Ko hoʻo ʻasí ʻe kaihaʻasi ʻi ho ʻaó tonu, ka ʻe ʻikai ke toe fakafoki atu ia kiate koe. Ko hoʻo sipí ʻe foaki ki ho ngaahi filí, ka ʻe ʻikai hao faifakahaofi. 32 Ko ho ngaahi fohá mo ho ngaahi ʻofefiné ʻe foaki ki ha kakai kehe+ ka ke siosio atu pē, pea te ke fakaʻamu maʻu pē ke sio kiate kinautolu, ka heʻikai lava ke ke fai ha meʻa. 33 Ko e fua ʻo ho kelekelé mo e fua kotoa ʻo hoʻo ngāué ʻe kai ʻe ha kakai ʻa ia kuo ʻikai te ke ʻiloʻi,+ pea ʻe kākaaʻi mo lōmekina maʻu pē koe. 34 ʻE ʻai koe ke ke sesele ʻi he meʻa ʻokú ke sio ki aí.

35 “ʻE taaʻi koe ʻe Sihova ʻaki ʻa e ngaahi hangatāmaki langa lahi mo ʻikai lava ke faitoʻo ʻi ho ongo tuí mo e ongo vaʻé, mei ho ʻaofivaʻé ki ho tumuʻakí. 36 ʻE taki koe ʻe Sihova pea mo e tuʻi ʻa ia naʻá ke fokotuʻu ke pule kiate koé ki ha puleʻanga kuo ʻikai te ke ʻiloʻi+ mo hoʻo fanga kuí, pea te ke tauhi ai ki he ngaahi ʻotua kehe, ko e ngaahi ʻotua ʻakau mo e maka.+ 37 Pea te ke hoko ko ha meʻa ke fai ha fakalilifuʻia ai mo ha lumaʻanga,* pea mo ha manukiaʻanga ʻi he lotolotonga ʻo e ngaahi kakai kotoa ʻoku taki koe ʻe Sihova ki aí.+

38 “Te ke ʻave ʻa e tengaʻi ʻakau lahi ki he ngoué, ka te ke tānaki ʻa e meʻa siʻi,+ koeʻuhí ʻe keina ia ʻe he heʻé. 39 Te ke tō mo tauhi ʻa e ngaahi ngoue kālepi, ka ʻe ʻikai te ke inu ha uaine mo toli ai ha meʻa,+ koeʻuhí ʻe kai ia ʻe he ʻunufé. 40 ʻE ʻi ai ho ʻulu ʻōlive ʻi he kotoa ho feituʻú, ka ʻe ʻikai te ke milimili ha lolo, koeʻuhí ʻe ngangana ʻosi ʻa e fua hoʻo ʻōlivé. 41 Te ke fanauʻi ʻa e ngaahi foha mo e ngaahi ʻofefine, ka ʻe ʻikai kei ʻaʻau ia, koeʻuhí he ʻe taki pōpula+ kinautolu. 42 ʻE kāpui ʻe ha pupunga ʻinisēkite* ʻa e kotoa ho ʻuluʻakaú pea mo e fua ʻo ho kelekelé. 43 Ko e muli ʻoku ʻi ho lotolotongá ʻe fakaʻaʻau ai pē ki ʻolunga ʻo māʻolunga ange ia ʻiate koe, lolotonga ia ko koé te ke fakaʻaʻau hifo ai pē ʻo māʻulalo ange. 44 Te ne tali nō kiate koe, ka ʻe ʻikai te ke tali nō kiate ia.+ Te ne hoko ko e ʻulu, lolotonga iá te ke hoko koe ko e hiku.+

45 “ʻE hoko moʻoni atu ʻa e ngaahi malá ni+ kotoa kiate koe peá ne tulimui ʻiate koe ʻo ne maʻu koe kae ʻoua kuó ke ʻauha ʻosi,+ koeʻuhí naʻe ʻikai te ke fanongo ki he leʻo ʻo Sihova ko ho ʻOtuá ʻaki hono tauhi ʻa ʻene ngaahi fekau mo ʻene ngaahi tuʻutuʻuni naʻá ne fekauʻi atu kiate koé.+ 46 Pea te nau hoko mai kiate koe mo hoʻo fānaú ko ha fakaʻilonga mo ha fakatokanga tuʻuloa,+ 47 koeʻuhí naʻe ʻikai te ke tauhi ʻa Sihova ko ho ʻOtuá ʻi he nēkeneka mo e loto-fiefia ʻi he taimi naʻá ke mahu ai ʻi he meʻa kotoa pē.+ 48 ʻE fekauʻi atu ʻe Sihova ho ngaahi filí kiate koe, pea te ke ngāue kiate kinautolu+ lolotonga ia ʻokú ke fiekaia+ mo fieinua mo vala mahaehae mo ke masiva ʻi he meʻa kotoa pē. Te ne ʻai ha ʻioke ukamea ki ho kiá kae ʻoua kuó ne fakaʻauha ʻosi koe.

49 “ʻE ʻomi ʻe Sihova kiate koe ha puleʻanga mamaʻo,+ mei he ngataʻanga ʻo e māmaní; te ne ʻoho atu ʻo hangē ha ʻīkalé,+ ko ha puleʻanga ʻa ia ko ʻene leá ʻe ʻikai te ke mahinoʻi,+ 50 ko ha puleʻanga ʻoku hā fītaʻa ʻa ia ʻe ʻikai te ne tokaʻi ʻa e taʻumotuʻá pe ʻofa ʻi he fānaú.+ 51 Te nau kai ʻa e ʻuhiki ʻo hoʻo fanga manú mo e fua ʻo ho kelekelé kae ʻoua kuó ke ʻauha ʻosi. ʻE ʻikai te nau fakatoe maʻau ha uite, uaine foʻou pe lolo, ʻuhikiʻi pulu pe sipi kae ʻoua kuo nau fakaʻauha koe.+ 52 Te nau ʻākoloʻi koe, ʻo tāpuni koe ʻi loto ʻi he kotoa ho ngaahi kolo* ʻi ho fonuá kotoa kae ʻoua ke holo ho ngaahi ʻā māʻolunga mo fakakolotau ʻokú ke falala ki aí. ʻIo, te nau mātuʻaki ʻākoloʻi koe ʻi he kotoa ho ngaahi kolo ʻi ho fonua kotoa ʻa ia kuo foaki atu ʻe Sihova ko ho ʻOtuá.+ 53 Te ke kai leva ai hoʻo fānaú tonu,* ʻa e kakano ʻo ho ngaahi fohá mo ho ngaahi ʻofefine+ ʻa ia kuo foaki atu ʻe Sihova ko ho ʻOtuá kiate koé, koeʻuhí ko e mamafa ʻa e ʻākoló pea mo e mamahi kuo taaʻi ʻaki koe ʻe ho filí.

54 “Naʻa mo e tangata moʻui fakapelepele mo ongongofua taha ʻi ho lotolotongá ʻe ʻikai te ne fakaʻofaʻia ʻi hono tokouá pe ko hono uaifi ʻofaʻangá pe ko hono ngaahi foha ʻoku toé, 55 pea ʻe ʻikai te ne vahevahe kiate kinautolu ha meʻa mei he kakano ʻo hono ngaahi fohá ʻa ia te ne kaí, koeʻuhí ko e ʻikai haʻane toe meʻa ʻe taha tupu mei he mamafa ʻa e ʻākoló pea mo e mamahi ʻe taaʻi ʻaki ʻe ho filí ho ngaahi koló.+ 56 Pea ko e fefine moʻui fakapelepele mo ongongofua ʻi ho lotolotongá ʻa ia ʻe ʻikai haʻane teitei fakakaukau ke tuʻu hono ʻaofivaʻé ʻi he kelekelé koeʻuhí ko ʻene moʻui mātuʻaki fakapelepelé+ ʻe ʻikai te ne fakahāhā ha fakaʻofaʻia ʻi hono husepāniti ʻofaʻangá pe ko ʻene tamasiʻí pe ko ʻene taʻahiné, 57 ʻo aʻu ki he meʻa kotoa pē ʻoku haʻu ki tuʻa mei hono sinó ʻi he hili ʻa e fāʻelé pea mo e tamaiki tangata ʻokú ne fanauʻí, he te ne kai fakafufū kinautolu koeʻuhí ko e mamafa ʻa e ʻākoló pea mo e mamahi ʻe taaʻi ʻaki ʻe ho filí ho ngaahi koló.

58 “Kapau ʻe ʻikai te ke tokanga ke tauhi ʻa e ngaahi lea kotoa ʻo e Laó ni ʻa ia ʻoku hiki ʻi he tohi ko ení+ pea ʻikai te ke manavahē ki he huafa lāngilangiʻia mo fakamanavahē ko ení,+ ʻa e huafa ʻo Sihova+ ko ho ʻOtuá, 59 ʻe taaʻi ʻaki koe mo hoʻo fānaú ʻe Sihova ʻa e ngaahi mala mātuʻaki mafatukituki, ko e ngaahi mala lahi mo tolonga,+ pea mo e ngaahi mahaki fakamamahi mo tolonga. 60 Te ne fakafoki mai kiate koe ʻa e ngaahi mahaki kotoa ʻo ʻIsipite ʻa ia naʻá ke faʻa manavahē ki aí, pea te nau mātuʻaki pīkitai kiate koe. 61 ʻIkai ko ia pē, ʻe aʻu ʻo ʻomi ʻe Sihova kiate koe ʻa e mahaki pe mala kotoa pē kuo ʻikai hiki ʻi he tohi ʻo e Laó ni kae ʻoua kuó ke ʻauha ʻosi. 62 Neongo kuo mou hoko ʻo tokolahi ʻo hangē ko e ngaahi fetuʻu ʻo e langí,+ ko e tokosiʻi ʻaupito mei homou tokolahí ʻe toé,+ koeʻuhí naʻe ʻikai te ke fanongo ki he leʻo ʻo Sihova ko ho ʻOtuá.

63 “Pea ʻi he hangē pē ko e fiefia ʻa Sihova ʻi ha taimi ke ʻai kimoutolu ke mou lakalakaimonū mo fakatokolahi kimoutolú, ʻe pehē pē ʻa e fiefia ʻa Sihova ke fakaʻauha kimoutolu pea ke fakaʻauha ʻosi kimoutolú; pea ʻe taʻaki kimoutolu mei he fonua ʻoku teu ke ke maʻú.

64 “ʻE fakamovetevete koe ʻe Sihova ki he lotolotonga ʻo e ngaahi puleʻanga kotoa pē, mei he ngataʻanga ʻe taha ʻo e māmaní ki he ngataʻanga ʻe taha ʻo e māmaní,+ pea te ke tauhi ai ʻa e ngaahi ʻotua ʻakau mo e maka, ʻa ia kuo ʻikai te ke ʻiloʻi mo hoʻo fanga kuí.+ 65 ʻE ʻikai te ke maʻu ha melino ʻi he lotolotonga ʻo e ngaahi puleʻanga+ ko iá pe ko ha feituʻu mālōlōʻanga ki ho ʻaofivaʻé. Ka ʻe ʻoatu ai ʻe Sihova kiate koe ha loto-hohaʻa+ mo e kovi ʻa e sió mo ha ongoʻi siva ʻa e ʻamanakí.+ 66 Ko hoʻo moʻuí ʻe ʻi he tuʻunga fakatuʻutāmaki lahi, pea te ke ongoʻi tailiili ʻi he poʻulí mo e ʻahó; pea ʻe ʻikai te ke fakapapauʻi pe te ke hao. 67 ʻI he pongipongí te ke pehē ai, ‘Taumaiā naʻe efiafi!’ Pea ʻi he efiafí te ke pehē ai, ‘Taumaiā naʻe pongipongi,’ koeʻuhi ko e tailiili te ke ongoʻi ʻi ho lotó pea koeʻuhi ko e meʻa ʻe sio ki ai ho matá. 68 Pea ko e moʻoni ʻe fakafoki vaka koe ʻe Sihova ki ʻIsipite, ʻa e feituʻu naʻá ku tala atu kiate koe, ‘ʻE ʻikai ʻaupito te ke toe sio aí,’ pea te mou fakatau atu ai kimoutolu ki ho ngaahi filí ko e kau tamaioʻeiki mo e kau kaunanga, ka ʻe ʻikai ha tokotaha-fakatau ia.”

29 Ko e ngaahi lea eni ʻo e fuakava naʻe tuʻutuʻuni ʻe Sihova kia Mōsese ke ne fai mo e kakai ʻo ʻIsilelí ʻi he fonua ko Mōapé, ʻo tānaki atu ki he fuakava naʻá ne fai mo kinautolu ʻi Hōlepí.+

2 Naʻe ui fakataha mai leva ʻe Mōsese ʻa ʻIsileli kotoa ʻo ne pehē kiate kinautolu: “Kuo mou mamata ki he meʻa kotoa naʻe fai ʻe Sihova ʻi homou ʻaó ʻi he fonua ko ʻIsipité kia Felo mo e kotoa ʻo ʻene kau sevānití mo e kotoa ʻo hono fonuá,+ 3 ʻa e ngaahi fuʻu fakamaau* naʻá ke mamata ki aí, ʻa e ngaahi fuʻu fakaʻilonga mo e ngaahi mana+ ko iá. 4 Ka kuo ʻikai ʻoatu ʻe Sihova kiate kimoutolu ha loto ke mou maʻu ai ha mahino mo ha mata ke sio mo ha telinga ke fanongo ʻo aʻu mai ki he ʻahó ni.+ 5 ‘Lolotonga naʻá ku hanganaki tataki kimoutolu ʻi he taʻu ʻe 40 ʻi he toafá,+ ko homou kofú naʻe ʻikai ke popo pea ko homou senitoló naʻe ʻikai ke ʻosiʻosi ʻi homou vaʻé.+ 6 Naʻe ʻikai te mou kai mā, pea naʻe ʻikai te mou inu uaine pe ko ha meʻa pē ʻoku ʻi ai ha ʻolokaholo, koeʻuhí ke mou ʻilo ai ko au Sihova ko homou ʻOtuá.’ 7 Naʻe faifai atu pē ʻo mou aʻu mai ki he feituʻú ni, pea ko Sīhoni ko e tuʻi ʻo Hesiponí+ mo ʻOki ko e tuʻi ʻo Pēsaní+ naʻá na haʻu ke fakafetaulaki mai ke tau mo kitautolu, ka naʻa tau ikunaʻi kinaua.+ 8 ʻI he hili iá, naʻa tau toʻo hona fonuá ʻo foaki ia ko ha tofiʻa ki he haʻa Lūpení, ko e haʻa Katá, mo e vaeua ʻo e matakali ʻo e haʻa Manasé.+ 9 Ko ia ai, tauhi ʻa e ngaahi lea ʻo e fuakavá ni pea talangofua ki ai, koeʻuhi ke iku lelei ai ʻa e meʻa kotoa pē te mou faí.+

10 “Ko kimoutolu kotoa ʻoku mou tuʻu he ʻahó ni ʻi he ʻao ʻo Sihova ko homou ʻOtuá, ʻa e ngaahi ʻulumotuʻa ʻo homou ngaahi matakalí, ko hoʻomou kau mātuʻá, ko hoʻomou kau ʻōfisá, ʻa e tangata kotoa pē ʻi ʻIsileli, 11 ko hoʻomou fānaú, ko homou ngaahi uaifí,+ mo hoʻo muli+ ʻa ia ʻoku ʻi he lotolotonga ʻo ho ʻapitangá, mei he tokotaha ʻokú ne tā hoʻo fefié ki he tokotaha ʻokú ne ʻutu hoʻo vaí. 12 Kuó ke ʻi hení koeʻuhí ke ke hū ki he fuakava ʻa Sihova ko ho ʻOtuá mo ʻene fakapapaú, ʻa ē ʻoku fai ʻe Sihova ko ho ʻOtuá mo koe ʻi he ʻaho ní+ 13 koeʻuhí ke ne fokotuʻu koe he ʻahó ni ko ʻene kakai+ pea ke ne hoko ai ko ho ʻOtua,+ ʻo hangē tofu pē ko ʻene talaʻofa kiate koé pea hangē tofu pē ko ʻene fuakava ki hoʻo fanga kuí, kia ʻĒpalahame,+ ʻAisake,+ pea mo Sēkopé.+

14 “Ko eni ʻoku ʻikai ko kimoutolu pē taha ʻoku ou fai mo ia ʻa e fuakavá ni mo e fakapapaú ni, 15 ka ʻoku ou fai ia mo kinautolu ko ia ʻoku tuʻu heni mo kitautolu he ʻahó ni ʻi he ʻao ʻo Sihova ko hotau ʻOtuá pea mo kinautolu ko ia ʻoku ʻikai te nau ʻi heni mo kitautolu he ʻaho ní. 16 (He naʻa mou ʻiloʻi lelei ʻa e anga ʻo ʻetau nofo ʻi he fonua ko ʻIsipité pea mo ʻetau fou mai ʻi he lotolotonga ʻo e ngaahi puleʻanga kehekehe ʻi heʻetau fonongá.+ 17 Pea naʻa mou faʻa mamata ki heʻenau ngaahi meʻa fakalieliá mo ʻenau ngaahi ʻaitoli fakalielia*+ ʻo e ʻakau mo e maka, siliva mo e koula, ʻa ia naʻe ʻi honau lotolotongá.) 18 Tokanga ke ʻoua naʻa ʻi ai ha tangata pe ko ha fefine, ko ha fāmili pe ko ha matakali ʻi homou lotolotongá he ʻahó ni ʻa ia ʻoku tafoki hono lotó meia Sihova ko hotau ʻOtuá ke ʻalu ʻo tauhi ʻa e ngaahi ʻotua ʻo e ngaahi puleʻanga ko iá,+ ke ʻoua naʻa ʻi ai ha aka ʻi homou lotolotongá te ne fakatupu mai ha fua kona mo ha ʻakau ifo kona.+

19 “Ka ʻo kapau ʻe fanongo ha taha ki he ngaahi lea ʻo e fuakavá ni peá ne pōlepole ʻi hono lotó, ʻo ne pehē, ‘Te u maʻu ʻa e melinó, neongo ʻeku kīvoi ʻi he ʻaʻeva ʻi he ngaahi ʻalunga ʻo hoku loto ʻoʻokú,’ ʻo maumau ai ʻa e meʻa kotoa pē ʻi hono ʻalungá, 20 ʻe ʻikai ke finangalo lelei ʻa Sihova ke fakamolemoleʻi ia.+ ʻI hono kehé, ʻe kakaha hifo ʻa e houhau lahi ʻo Sihová ki he tangata ko iá, pea ko e mala kotoa kuo hiki ʻi he tohí ni ʻe hoko moʻoni mai kiate ia,+ pea ko e moʻoni ʻe tāmateʻi ʻe Sihova ʻa hono hingoá mei he lalo langí. 21 ʻE fakamavaheʻi leva ia ʻe Sihova mei he ngaahi matakali kotoa ʻo ʻIsilelí ki he mala ʻo fakatatau ki he mala kotoa ʻo e fuakava ʻa ia ʻoku hiki ʻi he tohi Laó ni.

22 “ʻI he taimi ʻe sio ai ʻa e toʻutangata ʻo homou ngaahi foha ʻi he kahaʻú pea mo e muli mei ha fonua mamaʻo ki he ngaahi mala ʻi he fonuá, ʻa e ngaahi faingataʻa kuo ʻomi ki ai ʻe Sihová— 23 ʻa e sūlifa mo e māsima mo e vela, ke ʻoua naʻa fai ha tūtuuʻi pe huli hake ha meʻa ʻi hono fonuá kotoa, pea ʻe ʻikai tupu hake ai ha mohuku, ʻo hangē ko hono fakaʻauha ʻo Sōtoma mo Komolá,+ ʻĀtima mo Sipoimi,+ ʻa ia naʻe fakaʻauha ʻe Sihova ʻi heʻene tuputāmakí pea ʻi heʻene houhaú— 24 te nau pehē ai mo e ngaahi puleʻangá kotoa, ‘Ko e hā hono ʻuhinga naʻe fai ai ʻe Sihova ʻa e meʻá ni ki he fonua ko ení?+ Ko e hā naʻá ne fakatupunga ʻa e houhau lahi mo kakaha ko ení?’ 25 Te nau pehē leva, ‘Koeʻuhí he naʻa nau liʻaki ʻa e fuakava ʻa Sihova,+ ko e ʻOtua ʻo ʻenau fanga kuí, ʻa ia naʻá ne fai mo kinautolu ʻi heʻene ʻomi kinautolu mei he fonua ko ʻIsipité.+ 26 Ka naʻa nau ʻalu ʻo tauhi ki he ngaahi ʻotua kehe pea punou hifo kiate kinautolu, ko e ngaahi ʻotua naʻe ʻikai te nau ʻiloʻi pea naʻe ʻikai te ne fakangofua kinautolu ke nau lotu ki ai.*+ 27 Naʻe hoko mai leva ʻa e houhau kakaha ʻa Sihová ki he fonua ko iá ʻaki ʻene ʻomi ki ai ʻa e mala kotoa kuo hiki ʻi he tohí ni.+ 28 Ko ia ai, naʻe taʻaki kinautolu ʻe Sihova mei honau kelekelé ʻi heʻene tuputāmakí+ mo ʻene lilí mo ʻene houhau lahí pea kapusi kinautolu ki ha fonua ʻe taha, ʻa ē ʻoku nau ʻi ai ʻi he ʻaho ní.’+

29 “Ko e ngaahi meʻa fufuú ʻoku ʻa Sihova ko hotau ʻOtuá+ ia, ka ko e ngaahi meʻa kuo fakaeʻá ʻoku ʻatautolu ia mo hotau hakó ʻo taʻengata, koeʻuhí ke tau fakahoko ai ʻa e ngaahi lea kotoa ʻo e Laó ni.+

30 “ʻI he hoko mai kiate koe ʻa e ngaahi lea kotoa ko ení, ʻa e tāpuaki mo e mala kuó u fokotuʻu ʻi ho ʻaó,+ peá ke manatuʻi ia*+ ʻi he ngaahi puleʻanga kotoa ʻa ia kuo fakamovete koe+ ki ai ʻe Sihova ko ho ʻOtuá, 2 peá ke foki kia Sihova ko ho ʻOtuá+ ʻaki ho lotó kotoa mo hoʻo moʻuí kotoa+ pea fanongo ki hono leʻó ʻo fakatatau ki he meʻa kotoa ʻoku ou tuʻutuʻuni atu kiate koe he ʻaho ní, ʻa koe mo ho ngaahi fohá, 3 ʻe fakafoki mai leva ʻe Sihova ko ho ʻOtuá ʻa hoʻo kau pōpulá+ pea fakahaaʻi atu kiate koe ʻa e meesi+ pea toe tānaki mai koe mei he ngaahi kakai kotoa ʻa ia kuo fakamovete koe+ ki ai ʻe Sihova ko ho ʻOtuá. 4 Neongo kapau ʻoku movete ho kakaí ki he ngatangataʻanga ʻo e langí, ʻe tānaki mai koe mei ai ʻe Sihova ko ho ʻOtuá pea fakafoki mai koe.+ 5 Ko Sihova ko ho ʻOtuá te ne ʻomi koe ki he fonua naʻe maʻu ʻe hoʻo ngaahi tamaí, pea te ke maʻu ia; pea te ne ʻai koe ke ke lakalakaimonū pea fakatokolahi koe ke ke tokolahi ange ʻi hoʻo ngaahi tamaí.+ 6 Ko Sihova ko ho ʻOtuá te ne fakamaʻa* ho lotó mo e loto ʻo hoʻo fānaú,+ koeʻuhi ke ke ʻofa kia Sihova ko ho ʻOtuá ʻaki ho lotó kotoa mo hoʻo moʻuí kotoa ka ke moʻui.+ 7 ʻE ʻomi leva ʻe Sihova ko ho ʻOtuá ʻa e ngaahi mala kotoa ko ení ki ho ngaahi fili ko ē naʻa nau fehiʻanekinaʻi mo fakatangaʻi koé.+

8 “Te ke foki leva ai ʻo fanongo ki he leʻo ʻo Sihová pea tauhi ʻene ngaahi tuʻutuʻuni kotoa ʻoku ou tuʻutuʻuni atu kiate koe he ʻaho ní. 9 Ko Sihova ko ho ʻOtuá te ne ʻai koe ke ke lakalakaimonū lahi ʻi he ngāue kotoa ʻo ho nimá,+ ʻo fakatokolahi hoʻo fānaú mo hoʻo monumanú mo e fua ʻo ho kelekelé, he ʻe toe fiefia ʻa Sihova ke ʻai koe ke ke lakalakaimonū, ʻo hangē tofu pē ko ʻene fiefia ʻi hoʻo fanga kuí.+ 10 He te ke toki fanongo leva ki he leʻo ʻo Sihova ko ho ʻOtuá pea tauhi ʻene ngaahi fekau mo ʻene ngaahi tuʻutuʻuni kuo hiki ʻi he tohi Laó ni, pea te ke foki kia Sihova ko ho ʻOtuá ʻaki ho lotó kotoa mo hoʻo moʻuí kotoa.+

11 “Pea ko e fekau ko eni ʻoku ou fekauʻi atu kiate koe he ʻaho ní ʻoku ʻikai ke fuʻu faingataʻa kiate koe, pe ʻikai lava ke ke aʻu ki ai.*+ 12 ʻOku ʻikai ke ʻi he langí ia, koeʻuhi ke ke pehē, ‘Ko hai ia ʻe ʻalu hake ki he langí ʻo ʻomi ia kiate kitautolu, koeʻuhi ke tau fanongo ki ai pea tauhi ki ai?’+ 13 Pea ʻoku ʻikai ke ʻi he tafaʻaki ia ʻe taha ʻo e tahí, koeʻuhi ke ke pehē, ‘Ko hai ia ʻe kolosi ki he tafaʻaki ʻe taha ʻo e tahí ʻo ʻomi ia kiate kitautolu, koeʻuhi ke tau fanongo ki ai pea tauhi ki ai?’ 14 He ko e leá ni ʻoku ofi ʻaupito ia kiate koe, ʻoku ʻi ho ngutú tonu pea ʻi ho lotó tonu,+ koeʻuhí ke ke fai ia.+

15 “Vakai, ʻoku ou fokotuʻu ʻi ho ʻaó he ʻahó ni ʻa e moʻui mo e lelei, ʻa e mate mo e kovi.+ 16 Kapau te ke fanongo ki he ngaahi fekau ʻa Sihova ko ho ʻOtuá ʻa ia ʻoku ou fekauʻi atu kiate koe he ʻaho ní, ʻaki hoʻo ʻofa kia Sihova ko ho ʻOtuá,+ ʻaki hoʻo ʻaʻeva ʻi heʻene ngaahi foungá, pea ʻaki hoʻo tauhi ʻene ngaahi fekaú mo ʻene ngaahi laó mo ʻene ngaahi tuʻutuʻuni fakaefakamāú, te ke moʻui+ leva mo tupu ʻo tokolahi, pea ko Sihova ko ho ʻOtuá te ne tāpuakiʻi koe ʻi he fonua ʻokú ke ʻalu atu ke maʻú.+

17 “Ka ʻo kapau ʻe tafoki ho lotó+ ʻo ʻikai te ke fanongo pea ʻoku fakataueleʻi koe ʻo ke punou hifo ki he ngaahi ʻotua kehé pea tauhi kiate kinautolu,+ 18 ʻoku ou tala atu kiate kimoutolu he ʻahó ni ko e moʻoni te mou ʻauha.+ Heʻikai te mou moʻui fuoloa ʻi he fonua ʻokú ke kolosi atu ʻi Sioatani ke maʻú. 19 ʻOku ou ui ki he langí mo e māmaní ke na hoko ko e ongo fakamoʻoni maʻaku kiate kimoutolu ʻi he ʻahó ni, kuó u fokotuʻu ʻa e moʻui mo e mate ʻi ho ʻaó, ko e tāpuaki mo e mala;+ pea kuo pau ke ke fili ʻa e moʻuí koeʻuhi ka ke moʻui,+ ʻa koe mo ho hakó,+ 20 ʻaki hoʻo ʻofa kia Sihova ko ho ʻOtuá,+ ʻaki hoʻo fanongo ki hono leʻó, pea ʻaki hoʻo pīkitai kiate ia,+ he ko ia ho moʻuiʻangá pea koeʻuhi ko ia te ke moʻui fuoloa ai ʻi he fonua naʻe fuakava ʻa Sihova ke foaki ki hoʻo fanga kuí, kia ʻĒpalahame, ʻAisake, pea mo Sēkope.”+

31 Naʻe ʻalu atu leva ʻa Mōsese ʻo ne leaʻaki ʻa e ngaahi leá ni ki ʻIsileli kotoa, 2 ʻo ne pehē kiate kinautolu: “ʻOku ou taʻu 120 he ʻahó ni.+ Heʻikai kei lava ke u taki koe,* he kuo folofola mai ʻa Sihova kiate au, ‘ʻE ʻikai te ke kolosi ʻi heni ʻi Sioatani.’+ 3 Ko Sihova ko ho ʻOtuá ʻa e tokotaha ʻe kolosi muʻomuʻa ʻiate koé, pea ko ia tonu te ne fakaʻauha ʻosi ʻa e ngaahi puleʻangá ni ʻi ho ʻaó, pea te ke kapusi kinautolu.+ Ko Siosiua ʻa e tokotaha te ne taki koe ki he tafaʻaki ʻe tahá,+ ʻo hangē tofu pē ko e folofola ʻa Sihová. 4 ʻE fai ʻe Sihova kiate kinautolu ʻo hangē tofu pē ko e meʻa naʻá ne fai kia Sīhoni+ pea kia ʻOki,+ ko e ongo tuʻi ʻo e kau ʻĀmolí, pea ki hona fonuá ʻi heʻene fakaʻauha ʻosi kinautolú.+ 5 ʻE ikunaʻi kinautolu ʻe Sihova maʻamoutolu, pea te mou fai kiate kinautolu ʻo fakatatau ki he tuʻutuʻuni kotoa kuó u ʻoatu kiate kimoutolú.+ 6 Ke mou loto-toʻa pea mou tuʻu mālohi.+ ʻOua ʻe ilifia pe manavahē ʻi honau ʻaó,+ he ko Sihova ko ho ʻOtuá ʻa e tokotaha ʻoku laka atu mo koé. ʻE ʻikai te ne liʻaki koe pe siʻaki koe.”+

7 Naʻe ui mai leva ʻe Mōsese ʻa Siosiua ʻo ne lea kiate ia ʻi he ʻao ʻo ʻIsilelí kotoa: “Ke ke loto-toʻa peá ke tuʻu mālohi,+ he ko koe ʻa e tokotaha te ke ʻave ʻa e kakaí ni ki he fonua naʻe fuakava ʻa Sihova ki heʻenau fanga kuí ke foaki kiate kinautolú, pea te ke foaki ia kiate kinautolu ko hanau tofiʻa.+ 8 Ko Sihova ʻa e tokotaha ʻoku laka muʻomuʻa atu ʻiate koé, pea ʻe hokohoko atu ʻene ʻiate koé.+ ʻE ʻikai te ne liʻaki koe pe siʻaki koe. ʻOua ʻe ilifia pe manavahē.”+

9 Naʻe hiki leva ʻe Mōsese ʻa e Laó ni+ ʻo ne ʻoange ia ki he kau taulaʻeikí, ʻa e kau Līvaí, ʻa ia ʻoku nau fua ʻa e ʻaʻake ʻo e fuakava ʻa Sihová, pea ki he kau mātuʻa kotoa ʻo ʻIsilelí. 10 Naʻe tuʻutuʻuni ʻe Mōsese kiate kinautolu ʻo pehē: “ʻI he ngataʻanga ʻo e taʻu ʻe fitu kotoa pē, ʻi he taimi kuo kotofá ʻi he taʻu ʻo e fakaʻataá,+ lolotonga ʻa e Kātoanga ʻo e Falelouʻakaú,*+ 11 ʻi he taimi ʻe hā ai ʻa ʻIsileli kotoa ʻi he ʻao ʻo Sihova+ ko ho ʻOtuá ʻi he feituʻu te ne filí, te ke lau ai ʻa e Laó ni ki ʻIsileli kotoa ke nau fanongo ki ai.+ 12 Fakatahatahaʻi mai ʻa e kakaí,+ ʻa e kakai tangata, kakai fefine, mo e fānau,* mo hoʻo muli ʻoku ʻi ho ngaahi koló,* koeʻuhí ke nau fanongo mo ako pea mo manavahē kia Sihova ko homou ʻOtuá pea tokanga ke fakahoko ʻa e ngaahi lea kotoa ʻo e Laó ni. 13 Ko honau ngaahi foha leva kuo ʻikai te nau ʻilo ʻa e Laó ni te nau fanongo+ mo ako ke manavahē kia Sihova ko homou ʻOtuá ʻi he ngaahi ʻaho kotoa te mou nofo ai ʻi he fonua ʻoku mou kolosi atu ʻi Sioatani ke maʻú.”+

14 Naʻe folofola leva ʻa Sihova kia Mōsese: “Vakai! Kuo fakaofi mai ʻa e taimi ke ke mate aí.+ Ui ʻa Siosiua, pea ʻai ke mo hā* ʻi he tēniti feʻiloakiʻangá koeʻuhí ke u fakanofo ia.”+ Ko ia naʻe ʻalu atu ʻa Mōsese mo Siosiua ʻo na hā ʻi he tēniti feʻiloakiʻangá. 15 Naʻe hā leva ʻa Sihova ʻi he tēnití ʻi he pou ʻaó, pea naʻe tuʻu ʻa e pou ʻaó ʻi he veʻe hūʻanga ʻo e tēnití.+

16 Naʻe folofola leva ʻa Sihova kia Mōsese: “Vakai! Ko eni kuó ke tei mate,* pea ʻe kamata ʻa e kakaí ni ke nau faifeʻauaki fakalaumālie mo e ngaahi ʻotua muli ʻoku takatakai kiate kinautolu ʻi he fonua ʻoku nau ʻalu atu ki aí.+ Te nau liʻaki au+ mo maumauʻi ʻa ʻeku fuakava kuó u fai mo kinautolú.+ 17 ʻI he taimi ko iá ʻe kakaha ʻeku ʻitá kiate kinautolu,+ pea te u liʻaki kinautolu+ peá u fufū hoku matá meiate kinautolu+ kae ʻoua kuo keina kinautolu. Pea ʻi he hili leva ʻa e hoko kiate kinautolu+ ha ngaahi mamahi mo ha ngaahi faingataʻaʻia lahi, te nau pehē, ‘ʻIkai ʻoku hoko mai kiate kitautolu+ ʻa e ngaahi mamahí ni koeʻuhí ko hotau ʻOtuá ʻoku ʻikai ʻi hotau lotolotongá?’ 18 Ka te u hanganaki fufū hoku matá ʻi he ʻaho ko iá koeʻuhí ko e fulikivanu kotoa kuo nau fai ʻi heʻenau tafoki ki he ngaahi ʻotua kehé.+

19 “Hiki leva ʻa e hivá ni maʻamoua+ pea akoʻi ia ki he kau ʻIsilelí.+ ʻAi ke nau ako ia* koeʻuhí ke hoko ʻa e hivá ni ko e fakamoʻoni maʻaku ki he kakai ʻo ʻIsilelí.+ 20 ʻI heʻeku ʻomi kinautolu ki he fonua kuó u fuakava fekauʻaki mo ia ki heʻenau fanga kuí+—ko e fonua ʻoku mahutafea ʻi he huʻakau mo e hone+—pea nau kai ʻo nau mākona mo nau lakalakaimonuú,*+ te nau tafoki ki he ngaahi ʻotua kehé ʻo nau tauhi kiate kinautolu pea nau taʻefakaʻapaʻapa kiate au mo maumauʻi ʻeku fuakavá.+ 21 ʻI he hoko kiate kinautolu+ ʻa e ngaahi mamahi mo e ngaahi faingataʻaʻia lahí, ʻe hoko ʻa e hivá ni ko ha fakamoʻoni ia kiate kinautolu (he ʻoku ʻikai totonu ke ngalo ia ʻi honau hakó), he ʻoku ou ʻosi ʻiloʻi ʻa e hehema kuo nau maʻú+ naʻa mo e ki muʻa ke u ʻomi kinautolu ki he fonua ʻa ē kuó u fuakava fekauʻaki mo iá.”

22 Ko ia naʻe hiki ʻe Mōsese ʻa e hivá ni ʻi he ʻaho ko iá peá ne akoʻi ia ki he kau ʻIsilelí.

23 Naʻá ne* fakanofo leva ʻa Siosiua+ ko e foha ʻo Nuní peá ne folofola: “Ke ke loto-toʻa peá ke tuʻu mālohi,+ he ko koe ʻa e tokotaha te ke ʻave ʻa e kau ʻIsilelí ki he fonua ʻa ia kuó u fuakava fekauʻaki mo ia kiate kinautolú,+ pea ʻe hokohoko atu ʻeku ʻiate koé.”

24 ʻI he ʻosi pē ko ia hono hiki kakato ʻe Mōsese ʻa e ngaahi lea+ ʻo e Laó ni ʻi ha tohí, 25 naʻe tuʻutuʻuni ʻa Mōsese ki he kau Līvaí ʻa ia ʻoku nau fua ʻa e ʻaʻake ʻo e fuakava ʻa Sihová, ʻo pehē: 26 “Toʻo ʻa e tohi Laó ni+ pea tuku ia ʻi he tafaʻaki ʻo e ʻaʻake+ ʻo e fuakava ʻa Sihova ko homou ʻOtuá pea ʻe hoko ia ai ko ha fakamoʻoni kiate koe. 27 He ko au tonu ʻoku ou ʻiloʻi lelei ʻa hoʻo angatuʻú+ mo hoʻo loto-fefeká.*+ Kapau kuo mou mātuʻaki angatuʻu kia Sihova lolotonga ʻeku kei moʻui ʻo ʻiate kimoutolú, pea huanoa ange ai haʻamou fai pehē ʻi he hili ʻeku maté! 28 Fakatahatahaʻi mai kiate au ʻa e kau mātuʻa kotoa ʻo homou ngaahi matakalí mo hoʻomou kau ʻōfisá, pea tuku ke u leaʻaki ʻa e ngaahi leá ni ke nau fanongo ki ai, pea tuku ke u ui ki he langí mo e māmaní ke na hoko ko e ongo fakamoʻoni kiate kinautolu.+ 29 He ʻoku ou ʻiloʻi lelei ʻi he hili ʻeku maté ko e moʻoni ʻe fulikivanu hoʻomou tōʻongá+ pea mou afe mei he hala ʻa ia kuó u tuʻutuʻuni kiate kimoutolú. Pea ʻe tō moʻoni mai kiate kimoutolu+ ha mamahi ʻi he fakaʻosi ʻo e ngaahi ʻahó, koeʻuhí he te mou fai ʻa e meʻa ʻoku kovi ʻi he vakai mai ʻa Sihová pea te mou fakalotomamahiʻi ia ʻaki ʻa e ngaahi ngāue ʻa homou nimá.”

30 ʻI he fanongo leva ʻa e fakatahaʻanga fakakātoa ʻo ʻIsilelí, naʻe lau atu ʻe Mōsese ʻa e ngaahi lea ʻo e hivá ni mei heʻene kamatá ki heʻene ʻosi:+

 3 He te u talaki ʻa e huafa ʻo Sihová.+

ʻO tala ʻa e lahi ʻa hotau ʻOtuá!+

 5 Ko kinautolu ia kuo faikākaá.+

ʻOku ʻikai ko ʻene fānau, ko e melé ko honau foʻui pē ia.+

Ko ha toʻutangata+ pikopiko mo mioʻi ʻa kinautolú na!

15 ʻI he sino leva ʻa Sesuluní,* naʻá ne ʻakafute angatuʻu mai.

Kuó ke sino leva, kuó ke hoko ʻo kaukaua, kuó ke hoko ʻo fatufāʻia.+

29 Taumaiā naʻa nau poto!+ Te nau fai ki he meʻá ni+ ha fakalaulauloto.

Te nau fakakaukau ki honau ikuʻanga ʻe hoko.+

Tuku ke nau tuʻu hake ʻo tokoni atu.

Tuku ke nau hoko ko e hūfangaʻanga kiate kimoutolu.

ʻOku ou ʻai ke mate, pea ʻoku ou ʻai ke moʻui.+

44 Ko ia naʻe haʻu ʻa Mōsese ʻo ne lau ʻa e ngaahi lea kotoa ʻo e hivá ni ʻo fanongo ki ai ʻa e kakaí,+ ʻa ia mo Hōsia*+ ko e foha ʻo Nuní. 45 ʻI he ʻosi hono leaʻaki ʻe Mōsese ʻa e ngaahi leá ni kotoa ki he kotoa ʻo ʻIsilelí, 46 naʻá ne pehē kiate kinautolu: “ʻAi ki homou lotó ʻa e ngaahi lea kotoa ʻo ʻeku fakatokanga kiate kimoutolu he ʻaho ní,+ koeʻuhí ke mou tuʻutuʻuni ki homou ngaahi fohá ke nau tokanga ke fai ki he ngaahi lea kotoa ʻo e Laó ni.+ 47 He ʻoku ʻikai ko ha lea taʻemahuʻinga eni kiate kimoutolu, ka ko hoʻomou moʻuiʻangá+ ia, pea fakafou ʻi he leá ni te mou moʻui fuoloa ai ʻi he fonua ʻoku mou kolosi atu ʻi Sioatani ke maʻú.”

48 Naʻe folofola ʻa Sihova kia Mōsese ʻi he ʻaho tatau ko ení, ʻo pehē: 49 “ʻAlu hake ki he moʻunga ko eni ʻo ʻApalemí,+ ʻa Moʻunga Nipo,+ ʻa ia ʻoku ʻi he fonua ko Mōapé, ʻa ē ʻoku hanga atu ki Sielikoó, pea vakai atu ai ki he fonua ko Kēnaní, ʻa ia ʻoku ou foaki ki he kau ʻIsilelí ke nau maʻú.+ 50 Te ke mate leva ʻi he moʻunga ʻoku teu ke ke kaka hake aí, pea ʻe fakatahaʻi koe ki ho kakaí,* ʻo hangē tofu pē ko e mate ho tokoua ko ʻĒloné ʻi Moʻunga Hoa+ pea fakatahaʻi ki hono kakaí, 51 koeʻuhí he ko kimoua fakatouʻosi naʻá mo taʻefaitōnunga kiate au ʻi he lotolotonga ʻo e kau ʻIsilelí ʻi he vai ʻo Mēlipá+ ʻi Kētesi ʻi he toafa Siniá, koeʻuhí naʻe ʻikai te mo fakamāʻoniʻoniʻi au ʻi he ʻao ʻo e kakai ʻo ʻIsilelí.+ 52 Te ke sio ki he fonuá mei he mamaʻó, ka ʻe ʻikai te ke hū ki he fonua ʻoku ou foaki ki he kakai ʻo ʻIsilelí.”+

33 Pea ko e tāpuaki eni naʻe fanongonongo ʻe Mōsese ko e tangata ʻa e ʻOtua moʻoní ki he kau ʻIsilelí ki muʻa ʻi heʻene maté.+ 2 Naʻá ne pehē:

 7 Pea naʻá ne fanongonongo ʻa e tāpuakí ni kia Siuta:+

 8 ʻI he fekauʻaki mo Līvaí naʻá ne pehē:+

12 ʻI he fekauʻaki mo Penisimaní naʻá ne pehē:+

13 ʻI he fekauʻaki mo Siosifá naʻá ne pehē:+

18 ʻI he fekauʻaki mo Sepuloní naʻá ne pehē:+

19 Te na ui ʻa e ngaahi kakaí ki he moʻungá.

Te na ʻoatu ai ʻa e ngaahi feilaulau ʻo e māʻoniʻoni.

20 ʻI he fekauʻaki mo Katá naʻá ne pehē:+

“Ke faitāpuekina ʻa e tokotaha ʻokú ne fakalahi ʻa e ngaahi kauʻā ʻo Katá.+

Ko e ngaahi ʻulu ʻo e kakaí te nau fakatahataha fakataha.

22 ʻI he fekauʻaki mo Taní naʻá ne pehē:+

“Ko Taní ko ha ʻuhikiʻi laione.+

Te ne puna hake mei Pēsani.”+

23 ʻI he fekauʻaki mo Nafitalaí naʻá ne pehē:+

ʻO ne maʻu ʻa e hihifó mo e tongá.”

24 ʻI he fekauʻaki mo ʻĀselí naʻá ne pehē:+

“ʻE faitāpuekina ʻa ʻĀseli ʻaki ha ngaahi foha.

29 Fiefia ē ko koe, ʻe ʻIsileli!+

34 Naʻe ʻalu hake leva ʻa Mōsese mei he toafa ʻo Mōapé ki Moʻunga Nipo,+ ki he tumutumu ʻo Pisikaá,+ ʻa ia ʻoku hanga atu ki Sielikoó.+ Pea naʻe fakahaaʻi ange ʻe Sihova kiate ia ʻa e fonuá kotoa, mei Kiliati ki Tani,+ 2 pea mo Nafitalai kātoa mo e fonua ʻo ʻIfalemi mo Manasé, mo e fonua kātoa ʻo Siutá ʻo aʻu ki he tahi fakahihifó,*+ 3 mo e feituʻu Nīkepí+ pea mo e Vahefonua ʻo Sioataní,+ mo e teleʻa lautoka ʻo Sielikoó, ʻa ia ko e kolo ʻo e ʻulu pāmé ʻo aʻu ki Soa.+

4 Naʻe folofola leva ʻa Sihova kiate ia: “Ko e fonua eni kuó u fai ha fuakava fekauʻaki mo ia kia ʻĒpalahame, ʻAisake, mo Sēkope ʻo pehē, ‘Te u foaki ia+ ki ho hakó.’ Kuó u tuku ke ke sio tonu ki ai, ka ʻe ʻikai te ke kolosi atu ki ai.”+

5 ʻI he hili iá, naʻe mate ai ʻa Mōsese ko e sevāniti ʻa Sihová ʻi he fonua ko Mōapé ʻo hangē pē ko e folofola ʻa Sihová.+ 6 Naʻá ne tanu ia ʻi he teleʻa ʻi he fonua ko Mōapé, ʻo hanga ki Pete-peoli, pea ʻoku ʻikai ha taha te ne ʻilo ʻa e feituʻu ʻoku ʻi ai hono faʻitoká ʻo aʻu mai ki he ʻahó ni.+ 7 Naʻe taʻu 120 ʻa Mōsese ʻi heʻene maté.+ Naʻe ʻikai nenefu ʻa ʻene sió, pea naʻe ʻikai ke mole ʻa hono mālohí. 8 Naʻe tengihia ʻe he kakai ʻo ʻIsilelí ʻa Mōsese ʻi he toafa ʻo Mōapé ʻi he ʻaho ʻe 30.+ Pea naʻe kakato ʻa e ngaahi ʻaho ʻo e tengihia mo e fakamamahi koeʻuhi ko Mōsesé.

9 Ko Siosiua ko e foha ʻo Nuní naʻá ne fonu ʻi he laumālie ʻo e potó, he naʻe hilifaki nima ia+ ʻe Mōsese; pea naʻe kamata ke fanongo ʻa e kau ʻIsilelí kiate ia ʻo nau fai ʻa e meʻa tofu pē naʻe tuʻutuʻuni ʻe Sihova kia Mōsesé.+ 10 Ka kuo teʻeki ai ʻaupito ke toe hoko mai ha palōfita ʻi ʻIsileli naʻe hangē ko Mōsesé,+ ʻa ia naʻe ʻafioʻi ʻe Sihova mata ki he mata.+ 11 Naʻá ne fakahoko kia Felo ʻa e ngaahi fakaʻilonga mo e ngaahi mana kotoa naʻe fekauʻi ia ʻe Sihova ke ne fai ʻi he fonua ko ʻIsipité pea ki heʻene kau sevānití kotoa pea mo hono fonuá kotoa,+ 12 ʻaki ʻa e nima mālohi mo e mafai fakaofo naʻe fakahāhā ʻe Mōsese ʻo mamata ki ai ʻa e kotoa ʻo ʻIsilelí.+