SIOSIUA

1 ʻI he hili ʻa e mate ʻa Mōsese ko e sevāniti ʻa Sihová, naʻe folofola ʻa Sihova kia Siosiua*+ ko e foha ʻo Nuní, ʻa e sevāniti+ ʻa Mōsesé ʻo ne pehē: 2 “Ko Mōsese ko ʻeku sevānití kuo mate.+ Ko eni ke ke tuʻu hake ʻo kolosi ʻi Sioatani, ʻa koe mo e kakai kotoa ko ení, pea hū atu ki he fonua ʻoku ou foaki kiate kinautolú, ki he kakai ʻo ʻIsilelí.+ 3 Te u foaki atu kiate kimoutolu ʻa e feituʻu kotoa pē ʻe tuʻu ai homou vaʻé, ʻo hangē tofu pē ko ia naʻá ku talaʻofa kia Mōsesé.+ 4 Ko homou feituʻú ʻe lele ia mei he toafá ʻo aʻu ki Lepanoni pea ki he vaitafe lahí, ʻa ʻIufaletesi—ʻa e fonua kotoa ʻo e kau Hetí+—pea ki he Tahi Lahí* ʻi he hihifó.*+ 5 ʻE ʻikai ha taha ʻe lava ke ne talitekeʻi koe lolotonga hoʻo moʻuí.+ Hangē tofu pē ko ʻeku ʻia Mōsesé, ʻe pehē pē ʻa ʻeku ʻiate koé.+ ʻE ʻikai te u liʻaki koe pe siʻaki koe.+ 6 Ke ke loto-toʻa peá ke tuʻu mālohi,+ he ko koe ʻa e tokotaha te ke ʻai ʻa e kakaí ni ke nau maʻu ʻa e fonua naʻá ku fuakava ki heʻenau fanga kuí te u foaki kiate kinautolú.+

7 “Kehe pē ke ke loto-toʻa peá ke mātuʻaki tuʻu mālohi pea tokanga ke tauhi ʻa e Lao kotoa naʻe tuʻutuʻuni ʻe Mōsese ko ʻeku sevānití kiate koé. ʻOua naʻá ke afe mei ai ki he toʻomataʻú pe ki he toʻohemá,+ koeʻuhí ka ke fai fakapotopoto ai ʻi ha feituʻu pē te ke ʻalu ki ai.+ 8 Ko e tohi ko eni ʻo e Laó ʻe ʻikai mavahe ia mei ho ngutú,+ pea kuo pau ke ke lau leʻo-siʻi ia* ʻi he ʻaho mo e pō, koeʻuhí ke ke tokanga ke tauhi ʻa e meʻa kotoa pē ʻoku hiki ʻi aí;+ he ʻe toki lavameʻa ai ho halá pea te ke toki fai fakapotopoto ai.+ 9 ʻIkai kuó u tuʻutuʻuni kiate koe? Ke ke loto-toʻa peá ke tuʻu mālohi. ʻOua naʻá ke manavahē pe ilifia, he ko Sihova ko ho ʻOtuá ʻe ʻiate koe ʻi ha feituʻu pē te ke ʻalu ki ai.”+

10 Naʻe tuʻutuʻuni leva ʻa Siosiua ki he kau ʻōfisa ʻo e kakaí: 11 “Laka atu ʻi he ʻapitangá pea fai ʻa e tuʻutuʻuni ko ení ki he kakaí, ‘Teu haʻamou meʻakai, koeʻuhí ʻi he ʻaho ʻe tolu mei heni te mou kolosi ai ʻi Sioatani ke mou hū ʻo maʻu ʻa e fonua ʻoku foaki atu ʻe Sihova ko homou ʻOtuá ke mou maʻú.’”+

12 Pea ki he haʻa Lūpení, ko e haʻa Katá, pea mo e vaeua ʻo e matakali ʻo Manasé, naʻe pehē ʻe Siosiua: 13 “Manatuʻi ʻa e meʻa naʻe tuʻutuʻuni ʻe Mōsese ko e sevāniti ʻa Sihová kiate kimoutolú:+ ‘Ko Sihova ko homou ʻOtuá ʻokú ne ʻoatu kiate kimoutolu ha mālōlō pea kuó ne foaki atu ʻa e fonuá ni kiate kimoutolu. 14 Ko homou ngaahi uaifí, ko hoʻomou fānaú, pea mo hoʻomou fanga manú te nau nofo ʻi he fonua kuo foaki atu ʻe Mōsese kiate kimoutolu ʻi he tafaʻaki ko eni* ʻo Sioataní,+ ka ko e kotoa ʻo kimoutolu kau tangata toʻa ʻi he taú+ te mou kolosi atu kuo mou teuteu ki he tau ʻo muʻomuʻa ʻi homou fanga tokouá.+ Kuo pau ke mou tokoni kiate kinautolu 15 kae ʻoua kuo ʻoange ʻe Sihova ha mālōlō ki homou fanga tokouá, ʻo hangē tofu pē ko ʻene fai kiate kimoutolú, pea nau maʻu foki ʻa e fonua ʻoku foaki ʻe Sihova ko homou ʻOtuá kiate kinautolú. Hili iá, te mou foki ki he fonua naʻe foaki atu ke mou nofo ai mo maʻú, ʻa e fonua naʻe foaki atu ʻe Mōsese ko e sevāniti ʻa Sihová kiate kimoutolu ʻi he tafaʻaki fakahahake ʻo Sioataní.’”+

16 Naʻa nau tali ange kia Siosiua: “Te mau fai ʻa e meʻa kotoa pē kuó ke tuʻutuʻuní, pea te mau ʻalu ki ha feituʻu pē te ke fekau kimautolu ki ai.+ 17 Hangē pē ko ʻemau fanongo ki he meʻa kotoa pē naʻe leaʻaki ʻe Mōsesé, ʻe pehē ʻemau fanongo kiate koé. Hiliō ai, ʻofa ke ʻiate koe ʻa Sihova ko ho ʻOtuá ʻo hangē tofu pē ko ʻene ʻia Mōsesé.+ 18 ʻIlonga ha tangata ʻe angatuʻu ki hoʻo fekaú pea ʻikai talangofua ki he tuʻutuʻuni kotoa pē te ke ʻoange kiate iá ʻe tāmateʻi.+ Kehe pē ke ke loto-toʻa peá ke tuʻu mālohi.”+

2 Naʻe fekauʻi fakafufū atu leva ʻe Siosiua ko e foha ʻo Nuní ha ongo tangata mei Sitimi+ ko e ongo asiasi. Naʻá ne tala ange kiate kinaua: “Mo ō ʻo vakaiʻi ʻa e fonuá, tautefito ki Sielikō.” Ko ia naʻá na ō ʻo na aʻu ki he fale ʻo ha fefine feʻauaki ko hono hingoá ko Lēhapi,+ peá na nofo ai. 2 Naʻe fakahā ki he tuʻi ʻo Sielikoó: “Vakai! Kuo haʻu ha ongo tangata ʻIsileli ki heni he poó ni ke asiasi ʻa e fonuá.” 3 Ko ia ko e tuʻi ʻo Sielikoó naʻá ne ʻoatu ʻa e fekau kia Lēhapi: “ʻOmi ki tuʻa ʻa e ongo tangata naʻá na haʻu pea ʻokú na nofo ʻi ho falé, he kuó na haʻú ke asiasi ʻa e fonuá kotoa.”

4 Ka naʻe ʻave ʻe he fefiné ʻa e ongo tangatá ʻo fufū kinaua. Naʻá ne pehē ange leva: “ʻIo, naʻe omi ʻa e ongo tangatá kiate au, ka naʻe ʻikai te u ʻiloʻi pe ko ʻena haʻú mei fē. 5 Pea ʻi heʻene poʻulí ʻi he taimi naʻe teu ke tāpuni ai ʻa e matapā ʻo e koló, naʻe hū ki tuʻa ʻa e ongo tangatá. ʻOku ʻikai te u ʻiloʻi pe naʻe ʻalu ʻa e ongo tangatá ki fē, ka ʻo kapau te mou tuli fakavave atu kiate kinaua, te mou maʻu kinaua.” 6 (Kae kehe, naʻá ne ʻave kinaua ki he funga falé ʻo fufū ʻi he ngaahi vaʻa falakesi naʻe fokotuʻutuʻu fakaʻotu ʻi he funga falé.) 7 Ko ia naʻe tuli atu ʻa e kau tangatá kiate kinaua ʻo huʻu ki Sioatani ki he ʻāhangá,+ pea naʻe tāpuni ʻa e matapā ʻo e koló ʻi he hū atu pē ki tuʻa ʻa e kau tulí.

8 Ki muʻa ke tokoto hifo ʻa e ongo tangatá ke na mohé, naʻá ne ʻalu hake kiate kinaua ki he funga falé. 9 Naʻá ne pehē atu ki he ongo tangatá: “ʻOku ou ʻiloʻi ʻe foaki atu ʻe Sihova kiate kimoutolu ʻa e fonuá+ pea ko e manavahē kiate kimoutolú kuo tō mai ia kiate kimautolu.+ Ko e kau nofo kotoa ʻi he fonuá ʻoku nau loto-siʻi koeʻuhí ko kimoutolu,+ 10 he kuo mau fanongo ki hono fakamātuʻu ʻe Sihova ʻa e vai ʻo e Tahi Kulokulá ʻi homou ʻaó ʻi hoʻomou mavahe mei ʻIsipité+ mo e meʻa naʻa mou fai ki he ongo tuʻi ʻo e kau ʻĀmolí, ʻa Sīhoni+ mo ʻOki,+ ʻa ia naʻa mou tuku atu ki he fakaʻauha ʻi he tafaʻaki ʻe taha* ʻo Sioataní. 11 ʻI heʻemau fanongo fekauʻaki mo iá, naʻe vaivai homau lotó,* pea naʻe ʻikai ha taha ʻe teitei loto-toʻa koeʻuhi ko kimoutolu, he ko Sihova ko homou ʻOtuá ʻa e ʻOtua ʻi he langí ʻi ʻolunga pea ʻi he māmaní ʻi laló ni.+ 12 Ko eni, mo fai mai muʻa ha fakapapau kiate au ʻia Sihova, koeʻuhi ko ʻeku fakahaaʻi ʻa e ʻofa mateaki kiate kimouá, te mo toe fakahaaʻi mai foki ʻa e ʻofa mateaki ki he fale ʻo ʻeku tamaí; pea kuo pau ke mo ʻomai kiate au ha fakaʻilonga te mo fai ki hoʻomo leá.* 13 Kuo pau ke mou fakahaofi ʻa e moʻui ʻa ʻeku tamaí mo ʻeku faʻeé, ko hoku fanga tuongaʻané mo hoku fanga tokouá, mo kinautolu kotoa ʻoku ʻanautolú, pea kuo pau ke mou fakahaofi kimautolu mei he maté.”+

14 Ko ia naʻe pehē ange ai ʻe he ongo tangatá kiate ia: “Te ma ʻoatu ʻema moʻuí ke fetongiʻaki hoʻomou moʻuí! Kapau heʻikai te mou tala ʻema ngāué, te ma fakahāhā atu leva ʻa e ʻofa mateaki mo e faitōnunga kiate koe, ʻi he taimi ʻe foaki mai ai ʻe Sihova kiate kimautolu ʻa e fonuá.” 15 ʻI he hili iá, naʻá ne tukutuku hifo kinaua ki lalo ʻi he matapā-teké ʻi ha maea, he ko hono falé naʻe ʻi ha tafaʻaki ʻo e ʻā ʻo e koló. Ko hono moʻoní, naʻá ne nofo ʻi he ʻaá.+ 16 Naʻá ne pehē ange leva kiate kinaua: “Mo ō ki he feituʻu moʻungaʻiá ʻo toitoi ai ʻi he ʻaho ʻe tolu, koeʻuhi ke ʻoua naʻa maʻu kimoua ʻe he faʻahinga ʻoku tuli atú. Pea ʻi he hili ʻa e foki mai ʻa e faʻahinga ʻoku nau tuli kimouá, ʻe lava ke hoko atu leva hoʻomo fonongá.”

17 Naʻe pehē ange ʻe he ongo tangatá kiate ia: “Te ma ʻatā mei he halaia ʻi he fekauʻaki mo e fuakava ko eni naʻá ke ʻai ke ma fai ha fakapapau ki aí+ 18 ʻo kapau ʻe ʻikai te ke haʻi ʻa e afo filo kula ʻahoʻaho ko ení ʻi he matapā-teke ʻa ia ʻokú ke tukutuku hifo ai kimauá, ʻi he taimi te mau haʻu ai ki he fonuá. ʻOku totonu ke ke fakatahatahaʻi mai hoʻo tamaí, ko hoʻo faʻeé, ko ho fanga tuongaʻané, mo e kotoa ʻo e fale ʻo hoʻo tamaí kiate koe ki ho falé.+ 19 Kapau leva ʻe hū ki tuʻa ha taha mei he ngaahi matapā ho falé, ko hono totó ʻe ʻi hono tumuʻaki pē ʻoʻoná, pea te ma ʻatā ai mei he halaiá. Ka ʻo kapau ʻe hoko ha kovi* ki ha taha pē ʻoku nofo mo koe ʻi ho falé, ko hono totó ʻe ʻi homa tumuʻakí. 20 Ka ʻo kapau te ke tala ʻema ngāué,+ te ma ʻatā ai mei he halaia fekauʻaki mo hoʻo fuakava naʻá ke ʻai ke ma fai ha fakapapau ki aí.” 21 Naʻá ne tali ange: “Tuku ke hoko ʻo hangē ko hoʻomo leá.”

Ko ia naʻá ne tuku atu kinaua ke na ō, pea naʻá na hoko atu ʻi heʻena fonongá. ʻI he hili iá, naʻá ne haʻi ʻa e afo kula ʻahoʻahó ʻi he matapā-teké. 22 Ko ia naʻá na mavahe ʻo na ʻalu ki he feituʻu moʻungaʻiá ʻo nofo ai ʻi he ʻaho ʻe tolu, kae ʻoua kuo foki ʻa e kau tulí. Naʻe kumi kinaua ʻe he kau tulí ʻi he hala kotoa pē ka naʻe ʻikai maʻu kinaua. 23 Naʻe hifo leva ʻa e ongo tangatá mei he feituʻu moʻungaʻiá ʻo kolosi ʻi he vaitafé peá na ʻalu kia Siosiua ko e foha ʻo Nuní. Naʻá na fakamatala kiate ia ʻa e ngaahi meʻa kotoa pē naʻe hoko kiate kinauá. 24 Pea naʻá na pehē ange leva kia Siosiua: “Kuo tuku mai ʻe Sihova ʻa e fonuá kotoa kiate kitautolu.+ Ko hono moʻoní, ko e kau nofo kotoa ʻi he fonuá ʻoku nau loto-siʻi koeʻuhí ko kitautolu.”+

3 Naʻe tuʻu pongipongia hake leva ʻa Siosiua, pea ko ia mo e kau ʻIsilelí* kotoa naʻa nau mavahe mei Sitimi+ pea naʻa nau aʻu ki Sioatani. Naʻa nau nofo ai ʻi he pō ko iá ki muʻa ke nau kolosí.

2 ʻI he hili ʻa e ʻaho ʻe tolu, naʻe ʻalu atu ai ʻa e kau ʻōfisá+ ʻi he ʻapitangá kotoa 3 ʻo nau tuʻutuʻuni ki he kakaí: “ʻI hoʻomou sio pē ʻoku fua ʻe he kau taulaʻeiki Līvaí+ ʻa e ʻaʻake ʻo e fuakava ʻa Sihova ko homou ʻOtuá, te mou mavahe leva mei homou feituʻú pea muimui ai. 4 Ka te mou mamaʻo ʻaki mei ai ʻa e kiupite nai ʻe 2,000;* ʻoua ʻe haʻu ʻo toe ofi ange ki ai, koeʻuhí ke mou ʻiloʻi ʻa e hala ke ʻalu aí, he kuo teʻeki ai te mou fononga ʻi he halá ni ki muʻa.”

5 Pea naʻe pehē ʻe Siosiua ki he kakaí: “Fakamāʻoniʻoniʻi kimoutolu,+ he ko ʻapongipongí ʻe fai ai ʻe Sihova ʻa e ngaahi meʻa fakaofo ʻi homou lotolotongá.”+

6 Naʻe pehē ange leva ʻe Siosiua ki he kau taulaʻeikí: “Hiki hake ʻa e ʻaʻake+ ʻo e fuakavá pea ʻalu muʻomuʻa atu ʻi he kakaí.” Ko ia naʻa nau hiki hake ai ʻa e ʻaʻake ʻo e fuakavá pea ʻalu muʻomuʻa atu ʻi he kakaí.

7 Naʻe folofola leva ʻa Sihova kia Siosiua: “ʻI he ʻahó ni te u kamata hakeakiʻi ai koe ʻi he ʻao ʻo ʻIsilelí kotoa,+ koeʻuhí ke nau ʻiloʻi ai te u ʻiate koe+ ʻo hangē tofu pē ko ʻeku ʻia Mōsesé.+ 8 Te ke fai ʻa e tuʻutuʻuni ko ení ki he kau taulaʻeiki ʻoku nau fua ʻa e ʻaʻake ʻo e fuakavá: ‘ʻI hoʻomou aʻu pē ki he vai ʻo Sioataní, te mou tuʻu maʻu ʻi Sioatani.’”+

9 Pea naʻe pehē ange ʻe Siosiua ki he kau ʻIsilelí: “Mou omi ki heni ʻo fanongo ki he folofola ʻa Sihova ko homou ʻOtuá.” 10 Naʻe pehē ange leva ʻe Siosiua: “ʻI he meʻá ni te mou ʻilo ai ʻoku ʻi homou lotolotongá+ ha ʻOtua moʻui, pea te ne mātuʻaki kapusi mei homou ʻaó ʻa e kau Kēnaní, ko e kau Hetí, ko e kau Heví, ko e kau Pēlisí, ko e kau Keakasá, ko e kau ʻĀmolí, pea mo e kau Siepusí.+ 11 Vakai! Ko e ʻaʻake ʻo e fuakava ʻa e ʻEiki ʻo e māmaní kotoa ʻoku muʻomuʻa ia ʻiate kimoutolu ki Sioatani. 12 Ko eni mou ʻave ha kau tangata ʻe toko 12 mei he ngaahi matakali ʻo ʻIsilelí, ko e tangata ʻe taha ki he matakali taki taha,+ 13 pea ʻi he pā* pē ʻa e ʻaofivaʻe ʻo e kau taulaʻeiki ʻoku nau fua ʻa e ʻAʻake ʻa Sihová, ʻa e ʻEiki ʻo e māmaní kotoa, ki he vai ʻo Sioataní, ko e vai ko ia ʻo Sioatani ʻoku tafe mei he matavaí ʻe tuʻu, pea ʻe tuʻu maʻu ia ʻo hangē ko ha holisi taʻofiʻanga vaí.”*+

14 Ko ia ʻi he mavahe ʻa e kakaí mei honau tēnití ki muʻa pē ke nau kolosi atu ʻi Sioataní, ko e kau taulaʻeiki ʻoku nau fua ʻa e ʻaʻake+ ʻo e fuakavá naʻa nau ʻalu muʻomuʻa ʻi he kakaí. 15 ʻI he aʻu atu pē ʻa e faʻahinga ʻoku nau fua ʻa e ʻAʻaké ki Sioataní pea tuʻu ʻa e vaʻe ʻo e kau taulaʻeiki ʻoku nau fua ʻa e ʻAʻaké ʻi he vaí (pea ʻoku fonu hake ʻa e ngaahi vai ʻo Sioataní+ ʻi he ngaahi ʻaho kotoa ʻo e utu-taʻú), 16 naʻe tuʻu maʻu ʻa e vai ʻoku tafe mei he matavaí. Naʻe ʻalu hake ia ki ʻolunga ʻo hangē ha holisi taʻofiʻanga vaí* ʻo mamaʻo ʻaupito ia ʻi ʻĀtama, ʻa e kolo ofi ki Saletaní, lolotonga iá naʻe maha atu ʻa e vai ʻoku ʻalu hifo ki he Tahi ʻo e ʻAlapá, ʻa e Tahi Māsimá.* Naʻe tuʻu ʻa e vaí, pea naʻe kolosi atu ʻa e kakaí ʻo hanga ki Sielikō. 17 Lolotonga ʻa e tuʻu ai pē ʻa e kau taulaʻeiki ʻoku nau fua ʻa e ʻaʻake ʻo e fuakava ʻa Sihová ʻi he kelekele mōmoá+ ʻi loto Sioataní, naʻe kolosi atu ʻa ʻIsileli kotoa ʻi he kelekele mōmoá+ kae ʻoua kuo ʻosi ʻa e puleʻangá kotoa he kolosi atu ʻi Sioatani.

4 ʻI he hili pē ʻa e kolosi ʻa e puleʻangá fakakātoa ʻi Sioataní, naʻe folofola ʻa Sihova kia Siosiua: 2 “ʻAve ʻa e kau tangata ʻe toko 12 mei he kakaí, ko e tangata ʻe taha mei he matakali taki taha,+ 3 pea fai kiate kinautolu ʻa e tuʻutuʻuni ko ení: ‘Toʻo ʻa e maka ʻe 12 mei loto Sioatani, mei he feituʻu ʻoku tuʻu maʻu ai ʻa e vaʻe+ ʻo e kau taulaʻeikí, pea mou ʻave ia ʻo fokotuʻu ʻi he feituʻu ʻa ia te mou mohe aí.’”+

4 Ko ia naʻe ui mai ʻe Siosiua ʻa e kau tangata ʻe toko 12 ʻa ia naʻá ne fakanofo mei he kau ʻIsilelí, ko e tangata ʻe toko taha mei he matakali taki taha, 5 pea naʻe pehē ange ʻe Siosiua kiate kinautolu: “ʻAlu atu ʻi muʻa ʻi he ʻAʻake ʻo Sihova ko homou ʻOtuá ki loto Sioatani, pea ko e tokotaha taki taha ʻo kimoutolu te ne hiki hake ha maka ʻo ʻai ki hono umá, ʻo fakatatau ki he tokolahi ʻo e ngaahi matakali ʻo e kau ʻIsilelí, 6 ke hoko ia ko ha fakaʻilonga ʻi homou lotolotongá. Kapau ʻe ʻeke atu ʻamui ʻe hoʻomou fānaú* kiate kimoutolu, ‘Ko e hā ʻa e ʻuhinga ʻo e ʻi heni ʻa e ngaahi maka+ ko ení?’ 7 Kuo pau ke mou tala kiate kinautolu: ‘Koeʻuhi naʻe tuʻu ʻa e vai ʻo Sioataní ʻo ʻikai aʻu ki he ʻaʻake+ ʻo e fuakava ʻa Sihová. ʻI he taimi naʻe kolosi ai ia ʻi Sioataní, naʻe tuʻu ʻa e vai ʻo Sioataní. Ko e ngaahi maká ni ʻe hoko ia ko ha fakamanatu tuʻuloa ki he kakai ʻo ʻIsilelí.’”+

8 Ko ia naʻe fai ʻe he kau ʻIsilelí ʻo hangē tofu pē ko e meʻa naʻe tuʻutuʻuni ʻe Siosiuá. Naʻa nau toʻo ʻa e maka ʻe 12 mei loto Sioatani, ʻo hangē tofu pē ko e fakahinohino ʻa Sihova kia Siosiuá, ke fehoanaki mo e tokolahi ʻo e ngaahi matakali ʻo e kau ʻIsilelí. Naʻa nau ʻave ia ki he feituʻu ʻa ia te nau mohe aí pea fokotuʻu ia ai.

9 Naʻe toe fokotuʻu ʻe Siosiua ʻa e maka ʻe 12 ʻi loto Sioatani ʻi he feituʻu naʻe tuʻu+ ai ʻa e vaʻe ʻo e kau taulaʻeiki naʻa nau fua ʻa e ʻaʻake ʻo e fuakavá, pea ʻoku ʻi ai ʻa e ngaahi maká ʻo aʻu mai ki he ʻahó ni.

10 Ko e kau taulaʻeiki naʻa nau fua ʻa e ʻAʻaké naʻa nau tuʻu ai pē ʻi loto Sioatani kae ʻoua kuo kakato ʻa e meʻa kotoa pē naʻe tuʻutuʻuni ʻe Sihova kia Siosiua ke ne tala ki he kakaí ke nau faí, ʻo fehoanaki mo e meʻa kotoa pē naʻe tuʻutuʻuni ʻe Mōsese kia Siosiuá. ʻI he lolotonga iá, naʻe fakavave ʻa e kakaí ki he tafaʻaki ʻe tahá. 11 ʻI he hili pē ʻa e kolosi atu ʻa e kakaí kotoa, naʻe kolosi atu ʻa e kau taulaʻeikí mo e ʻAʻake ʻa Sihová ʻi he ʻao ʻo e kakaí.+ 12 Pea ko e haʻa Lūpení, ko e haʻa Katá, mo e vaeua ʻo e matakali ʻo Manasé naʻa nau kolosi atu kuo nau teuteu ki he tau+ ʻo muʻomuʻa ʻi he kau ʻIsileli kehé, ʻo hangē tofu pē ko e meʻa naʻe fakahinohino ʻe Mōsese kiate kinautolú.+ 13 Ko e kau sōtia ʻe toko 40,000 nai kuo nau teu ki he taú naʻa nau kolosi atu ʻi he ʻao ʻo Sihová ki he toafa ʻo Sielikoó.

14 ʻI he ʻaho ko iá naʻe hakeakiʻi ai ʻe Sihova ʻa Siosiua ʻi he ʻao ʻo ʻIsilelí kotoa,+ pea naʻa nau fakaʻapaʻapaʻi lahi* ia ʻi he ngaahi ʻaho kotoa ʻo ʻene moʻuí, ʻo hangē tofu pē ko ʻenau fakaʻapaʻapaʻi lahi ʻa Mōsesé.+

15 Naʻe folofola leva ʻa Sihova kia Siosiua: 16 “Fekau ki he kau taulaʻeiki ʻoku nau fua ʻa e ʻaʻake+ ʻo e Fakamoʻoní* ke nau ʻalu hake mei Sioatani.” 17 Ko ia naʻe tuʻutuʻuni ʻa Siosiua ki he kau taulaʻeikí: “Mou ʻalu hake mei Sioatani.” 18 ʻI he ʻalu hake ʻa e kau taulaʻeiki naʻa nau fua ʻa e ʻaʻake+ ʻo e fuakava ʻa Sihová mei loto Sioataní pea tuʻu ʻa e ʻaofivaʻe ʻo e kau taulaʻeikí ʻi he kelekele mōmoá, naʻe toe foki ʻa e vai ʻo Sioataní ki honau halangá pea naʻe fonu hake+ ʻo hangē pē ko ia naʻe ʻi ai ki muʻá.

19 Naʻe ʻalu hake ʻa e kakaí mei Sioatani ʻi he ʻaho hono hongofulu ʻo e ʻuluaki māhiná ʻo ʻapitanga ʻi Kilikali+ ʻi he kauʻāfonua fakahahake ʻo Sielikoó.

20 ʻI he fekauʻaki mo e maka ʻe 12 naʻa nau toʻo mei Sioataní, naʻe fokotuʻu eni ʻe Siosiua ʻi Kilikali.+ 21 Naʻá ne pehē ange leva ki he kau ʻIsilelí: “ʻI he kahaʻú ʻi hano ʻeke ʻe hoʻomou fānaú ki heʻenau ngaahi tamaí, ‘Ko e hā ʻa e ʻuhinga ʻo e ngaahi maka+ ko ení?’ 22 Kuo pau ke mou fakamatala ki hoʻomou fānaú: ‘Naʻe kolosi ʻa ʻIsileli ʻi Sioatani ʻi he kelekele mōmoá+ 23 ʻi hono fakamātuʻu ʻe Sihova ko homou ʻOtuá ʻa e vai ʻo Sioataní ʻi honau ʻaó kae ʻoua kuo nau kolosi aí, ʻo hangē tofu pē ko e meʻa naʻe fai ʻe Sihova ko homou ʻOtuá ki he Tahi Kulokulá ʻi heʻene fakamātuʻu ia ʻi homau ʻaó kae ʻoua kuo mau kolosi aí.+ 24 Naʻá ne fai ení koeʻuhi ke ʻiloʻi ʻe he ngaahi kakai kotoa ʻo e māmaní ʻa e mālohi ʻo e nima ʻo Sihová+ pea koeʻuhi ke mou manavahē maʻu pē kia Sihova ko homou ʻOtuá.’”

5 ʻI he fanongo pē ʻa e ngaahi tuʻi kotoa ʻo e kau ʻĀmolí+ ʻa ia naʻa nau ʻi he tafaʻaki fakahihifo* ʻo Sioataní pea mo e ngaahi tuʻi kotoa ʻo e kau Kēnaní+ ʻa ia naʻa nau ʻi he veʻe matātahí kuo fakamātuʻu ʻe Sihova ʻa e vai ʻo Sioataní ʻi he ʻao ʻo e kau ʻIsilelí kae ʻoua kuo nau kolosi atú, naʻe vaivai honau lotó,*+ pea naʻe mole ʻosi ʻenau loto-toʻá koeʻuhí ko e kau ʻIsilelí.+

2 ʻI he taimi ko iá, naʻe folofola ʻa Sihova kia Siosiua: “Ngaohi maʻau ha ngaahi hele maka pea toe kamu+ ʻa e kakai tangata ʻo ʻIsilelí, ko hano tuʻo ua ia.” 3 Ko ia naʻe ngaohi ʻe Siosiua ha ngaahi hele maka ʻo ne kamu ʻa e kakai tangata ʻo ʻIsilelí ʻi Kipa-halaloti.*+ 4 Ko e ʻuhinga eni naʻe kamu ai kinautolu ʻe Siosiuá: Ko e kakai tangata kotoa pē ʻi he kakaí naʻa nau mavahe mei ʻIsipité, ʻa e kau tangata tau kotoa pē,* naʻa nau mate ʻi he toafá ʻi he fonongá hili ʻenau mavahe mei ʻIsipité.+ 5 Ko e kakai kotoa pē naʻa nau mavahe mei ʻIsipité naʻe ʻosi kamu kinautolu, ka ko e kakai kotoa pē naʻe fanauʻi ʻi he toafá ʻi he fonongá hili ʻenau mavahe mei ʻIsipité naʻe ʻikai ke kamu kinautolu. 6 Naʻe ʻaʻeva ʻa e kau ʻIsilelí ʻi he toafá ʻi he taʻu ʻe 40+ kae ʻoua kuo ʻosi he mate ʻa e puleʻangá kotoa, ʻa ia, ko e kau tangata tau ko ē naʻa nau mavahe mei ʻIsipite pea naʻe ʻikai te nau talangofua ki he leʻo ʻo Sihová.+ Naʻe fuakava ʻa Sihova kiate kinautolu ʻe ʻikai ʻaupito te ne tuku ke nau sio ʻi he fonua+ naʻe fuakava ʻa Sihova ki heʻenau fanga kuí ke foaki kiate kitautolú,+ ko ha fonua ʻoku mahutafea ʻi he huʻakau mo e hone.+ 7 Ko ia naʻá ne ʻohake honau ngaahi fohá ke fetongi kinautolu.+ Ko e faʻahingá ni naʻe kamu ʻe Siosiuá; naʻa nau taʻekamú koeʻuhí naʻe teʻeki ai ke kamu kinautolu lolotonga ʻa e fonongá.

8 ʻI he ʻosi hono kamu ʻa e puleʻangá kotoa, naʻa nau nofo ai pē ʻi he feituʻu naʻa nau ʻi ai ʻi he ʻapitangá kae ʻoua kuo nau sai.

9 Naʻe folofola leva ʻa Sihova kia Siosiua: “ʻI he ʻahó ni kuó u tekaʻi mamaʻo ai meiate kimoutolu ʻa e luma ʻa ʻIsipité.” Ko ia kuo ui ai ʻa e feituʻu ko iá ko Kilikali*+ ʻo aʻu mai ki he ʻahó ni.

10 Naʻe hoko atu ai pē ʻa e ʻapitanga ʻa e kau ʻIsilelí ʻi Kilikalí, pea naʻa nau kātoangaʻi ʻa e Pāsová* ʻi he ʻaho hono 14 ʻo e māhiná,+ ʻi he efiafí, ʻi he toafa ʻo Sielikoó. 11 Pea naʻe kamata ke nau kai ʻa e fua ʻo e fonuá ʻi he ʻaho hili ʻa e Pāsová, ko e mā taʻelēvani+ mo e uite tunu, ʻi he ʻaho tatau ko ení. 12 Pea na‘e ‘ikai ke toe hā ʻa e maná ʻi he ʻaho hono hokó ʻi he hili ʻenau kai ha meʻa mei he fua ʻo e fonuá; naʻe ʻikai ke kei ʻi ai ha mana maʻá e kau ʻIsilelí,+ ka naʻe kamata ke nau kai ʻa e fua ʻo e fonua ko Kēnaní ʻi he taʻu ko iá.+

13 ʻI he ofi atu ʻa Siosiua ki Sielikoó, naʻá ne hanga hake ʻo ne vakai ki ha tangata+ ʻoku tuʻu ʻi muʻa ʻiate ia ʻokú ne toʻo ha heletā kuo unuhi.+ Naʻe lue atu ʻa Siosiua kiate ia ʻo ne ʻeke ange: “ʻOkú ke kau mo kimautolu pe ko homau ngaahi filí?” 14 Naʻá ne pehē ange leva: “ʻOku ʻikai, ka kuó u haʻu aú ko e ʻeiki ʻo e kau tau ʻa Sihová.”+ Ko ia naʻe tō foʻohifo ʻa Siosiua ʻo ne fakatōmapeʻe peá ne pehē atu kiate ia: “Ko e hā ʻe leaʻaki ʻe hoku ʻeikí ki heʻene sevānití?” 15 Naʻe tali ange ʻe he ʻeiki ʻo e kau tau ʻa Sihová kia Siosiua: “Vete ho senitoló mei ho vaʻé, koeʻuhi ko e potu ʻa ia ʻokú ke tuʻu aí ʻoku toputapu.” Naʻe fai leva ia ʻe Siosiua.+

6 Pea ko eni naʻe tāpuni malu ʻa Sielikō koeʻuhi ko e kau ʻIsilelí; naʻe ʻikai ha taha ʻe mavahe mei ai pea naʻe ʻikai ha taha ʻe hū ki ai.+

2 Naʻe folofola leva ʻa Sihova kia Siosiua: “Vakai, kuó u tuku atu kiate koe ʻa Sielikō mo hono tuʻí mo hono kau tangata toʻa ʻi he taú.+ 3 Ko kimoutolu ʻa e kau tangata taú kotoa te mou laka takai ʻi he koló, ʻo takai tuʻo taha ʻi he koló. Ko e meʻa ia te ke faí ʻi he ʻaho ʻe ono. 4 ʻAi ha kau taulaʻeiki ʻe toko fitu ke nau toʻo ha meʻaifi* ʻe fitu ʻo muʻomuʻa ʻi he ʻAʻaké. Ka ʻi he ʻaho hono fitú, te mou laka takai ai ʻi he koló ʻo tuʻo fitu pea ko e kau taulaʻeikí te nau ifi ʻa e ngaahi meʻaifí.+ 5 ʻI hono fakaongo atu ʻa e meʻaifí—ʻi hoʻomou fanongo pē ki he leʻo ʻo e* meʻaifí—ko e kau taú kotoa te nau kailaʻaki ha fuʻu kaila ʻo e tau. Ko e ʻā leva ʻo e koló ʻe holofa,+ pea kuo pau ke ʻalu atu ʻa e kau taú, ʻo ʻalu hangatonu atu ʻa e tokotaha taki taha.”

6 Ko ia naʻe ui mai ʻe Siosiua ko e foha ʻo Nuní ʻa e kau taulaʻeikí ke nau fakataha mai ʻo ne tala kiate kinautolu: “Hiki hake ʻa e ʻaʻake ʻo e fuakavá, pea ke toʻo ʻe ha kau taulaʻeiki ʻe toko fitu ha meʻaifi ʻe fitu ʻo muʻomuʻa ʻi he ʻAʻake ʻa Sihová.”+ 7 Naʻá ne tala leva ki he kau taú: “Mou ʻalu atu ʻo laka takai ʻi he koló, pea ko e kau tau toʻo meʻataú+ te nau ʻalu muʻomuʻa ʻi he ʻAʻake ʻa Sihová.” 8 Pea hangē tofu pē ko e lea ʻa Siosiua ki he kau taú, naʻe ʻalu atu ki muʻa ʻa e kau taulaʻeiki ʻe toko fitu naʻa nau toʻo ʻa e meʻaifi ʻe fitu ʻi he ʻao ʻo Sihová ʻo ifi ʻa e ngaahi meʻaifí, pea naʻe hoko atu ʻi mui ʻiate kinautolu ʻa e ʻaʻake ʻo e fuakava ʻa Sihová. 9 Pea ko e kau tau toʻo meʻataú naʻa nau ʻalu muʻomuʻa ʻi he kau taulaʻeiki ʻa ia naʻa nau ifi ʻa e ngaahi meʻaifí, pea ko e kau tau maluʻi mei muí naʻa nau muimui atu ʻi he ʻAʻaké lolotonga ia hono ifi hokohoko ʻa e ngaahi meʻaifí.

10 Pea naʻe tuʻutuʻuni ʻa Siosiua ki he kau taú: “ʻOua naʻa mou kaila pe tuku ke ongona homou leʻó. ʻE ʻikai haʻu ha lea mei homou ngutú kae ʻoua ke aʻu ki he ʻaho te u pehē atu ai kiate kimoutolu, ‘Kaila!’ Pea te mou kaila leva.” 11 Naʻá ne ʻai ke nau ʻalu takai ʻi he koló mo e ʻAʻake ʻa Sihová, ʻo ʻalu takai tuʻo taha ai, ʻi he hili iá naʻa nau foki ki he ʻapitangá ʻo mohe ai.

12 ʻI he pongipongi hono hokó naʻe tuʻu pongipongia hake ai ʻa Siosiua, pea naʻe hiki hake ʻe he kau taulaʻeikí ʻa e ʻAʻake+ ʻa Sihová, 13 pea ko e kau taulaʻeiki ʻe toko fitu naʻa nau toʻo ʻa e meʻaifi ʻe fitú naʻa nau ʻalu muʻomuʻa ʻi he ʻAʻake ʻa Sihová, ʻo ifi hokohoko ʻa e ngaahi meʻaifí. Naʻe ʻalu muʻomuʻa ʻa e kau tau toʻo meʻataú ʻiate kinautolu lolotonga ia naʻe muimui atu ʻa e kau tau maluʻi mei muí ʻi he ʻAʻake ʻa Sihová lolotonga ia hono ifi hokohoko ʻa e ngaahi meʻaifí. 14 Naʻa nau laka takai tuʻo taha ʻi he koló ʻi he ʻaho hono uá, ʻi he hili iá, naʻa nau foki ki he ʻapitangá. Ko e meʻa ia naʻa nau faí ʻi he ʻaho ʻe ono.+

15 ʻI he ʻaho hono fitú naʻa nau tuʻu pongipongia hake ai, ʻi he mafoa hake pē ʻa e atá, pea naʻa nau laka takai ʻi he koló ʻi he founga tatau ʻo tuʻo fitu. Ko e ʻaho pē ko iá naʻa nau laka takai tuʻo fitu ai ʻi he koló.+ 16 Pea ʻi hono tuʻo fitú, naʻe ifi ai ʻe he kau taulaʻeikí ʻa e ngaahi meʻaifí, pea naʻe tala ʻe Siosiua ki he kau taú: “Mou kaila,+ he kuo foaki atu ʻe Sihova kiate kimoutolu ʻa e koló! 17 Ko e koló mo e meʻa kotoa pē ʻoku ʻi aí ʻe tuku atu ia ki he fakaʻauhá;+ ko e meʻa kotoa ia ʻa Sihova. Ko Lēhapi+ pē ko e feʻauakí ʻe kei moʻuí, ʻa ia mo kinautolu kotoa ʻoku ʻiate ia ʻi hono falé, koeʻuhí he naʻá ne fufū ʻa e ongo talafekau naʻa tau fekauʻi atú.+ 18 Kae fakamamaʻo mei he meʻa ʻoku tuku atu ki he fakaʻauhá,+ koeʻuhi ke ʻoua naʻa mou holi ki ha meʻa ʻoku tuku atu ki he fakaʻauhá pea mou toʻo ia,+ ʻo ʻai ai ʻa e ʻapitanga ʻo ʻIsilelí ko ha meʻa ʻoku tuku atu ki he fakaʻauhá ʻaki hano ʻomai ki ai ha fakatamaki.*+ 19 Ka ko e kotoa ʻo e silivá mo e koulá mo e ngaahi meʻa kopá mo e ukameá ʻoku toputapu ia kia Sihova.+ ʻOku totonu ke fakahū ia ki he tukuʻanga koloa ʻa Sihová.”+

20 Naʻe kaila leva ʻa e kau taú ʻi he taimi naʻe ifi ai ʻa e ngaahi meʻaifí.+ ʻI he fanongo pē ʻa e kau taú ki he leʻo ʻo e meʻaifí pea nau kailaʻaki ha fuʻu kaila ʻo e taú, naʻe holofa+ ʻa e ʻaá. ʻI he hili iá, naʻe ʻalu hake ʻa e kau taú ki he koló, ʻo ʻalu hangatonu atu ʻa e tokotaha taki taha, pea naʻa nau hamu ʻa e koló. 21 Naʻa nau tuku atu ʻa e meʻa kotoa naʻe ʻi he koló ke fakaʻauha ʻaki ʻa e heletaá, ʻa e tangata mo e fefine, iiki mo e lalahi, pulu, sipi, pea mo e ʻasi.+

22 Naʻe pehē ange ʻe Siosiua ki he ongo tangata naʻá na asiasi ʻa e fonuá: “Mo hū ki he fale ʻo e feʻauakí pea ʻomi ki tuʻa ʻa e fefiné mo kinautolu kotoa ʻoku ʻaʻaná, ʻo hangē tofu pē ko hoʻomo fakapapau kiate iá.”+ 23 Ko ia naʻe hū atu ʻa e ongo talavou asiasí ʻo ʻomi ki tuʻa ʻa Lēhapi, fakataha mo ʻene tamaí, ko ʻene faʻeé, ko hono fanga tuongaʻané, mo kinautolu kotoa naʻe ʻaʻaná; ʻio, naʻá na ʻomi ki tuʻa ʻa hono fāmilí kotoa,+ pea naʻá na ʻomi kinautolu ʻi ha tuʻunga malu ki ha feituʻu ʻi tuʻa ʻi he ʻapitanga ʻo ʻIsilelí.

24 Naʻa nau tutu leva ʻa e koló mo e meʻa kotoa naʻe ʻi aí ʻaki ʻa e afi. Ka ko e silivá, ko e koulá, mo e ngaahi meʻa kopá mo e ukameá, naʻa nau ʻave ia ki he tukuʻanga koloa ʻo e fale ʻo Sihová.+ 25 Ko Lēhapi pē ko e feʻauakí mo e fale ʻo ʻene tamaí mo kinautolu kotoa naʻe ʻaʻaná naʻe fakahaofi ʻe Siosiuá;+ pea ʻokú ne nofo ʻi ʻIsileli ʻo aʻu mai ki he ʻahó ni,+ koeʻuhí he naʻá ne fufū ʻa e ongo talafekau naʻe fekauʻi atu ʻe Siosiua ke na asiasi ʻa Sielikoó.+

26 ʻI he taimi ko iá naʻe fakahaaʻi ai ʻe Siosiua ʻa e fuakava ko ení:* “Ke malaʻia ʻa e tangata ʻi he ʻao ʻo Sihová ʻokú ne feinga ke toe langa ʻa e kolo ko eni ko Sielikoó. ʻE mate ʻa hono ʻuluaki fohá ʻi heʻene fakatoka ʻa hono fakavaʻé, pea ʻe mate ʻa hono foha siʻisiʻi tahá ʻi heʻene fokotuʻu ʻa hono ngaahi matapaá.”+

27 Ko ia naʻe kau ʻa Sihova mo Siosiua,+ pea ko hono ongoongó naʻe mafola atu ia ʻi he māmaní kotoa.+

7 Ka naʻe taʻefaitōnunga ʻa e kau ʻIsilelí ʻi he fekauʻaki mo e meʻa naʻe tuku atu ki he fakaʻauhá, he ko ʻĀkani+ ko e foha ʻo Kalimi, foha ʻo Sapiti, foha ʻo Sala, ʻo e matakali ʻo Siutá, naʻá ne toʻo ha konga ʻo e meʻa naʻe tuku atu ki he fakaʻauhá.+ ʻI he meʻá ni naʻe kakaha ai ʻa e houhau ʻa Sihová ki he kau ʻIsilelí.+

2 Naʻe fekauʻi atu leva ʻe Siosiua ha kau tangata mei Sielikō ki ʻAi,+ ʻa ia ʻoku tuʻu ʻo ofi ki Pete-ʻaveni pea ki he tafaʻaki fakahahake ʻo Pētelí,+ ʻo ne tala kiate kinautolu: “Mou ʻalu hake ʻo asiasi ʻa e fonuá.” Ko ia naʻe ʻalu hake ai ʻa e kau tangatá ʻo fai hano asiasi ʻo ʻAi. 3 ʻI heʻenau foki mai kia Siosiuá, naʻa nau tala ange kiate ia: “ʻOku ʻikai fiemaʻu ia ke ʻalu hake ʻa e kakaí kotoa. Ko e kau tangata pē nai ʻe toko 2,000 pe 3,000 ʻoku feʻunga ke nau ikunaʻi ʻa ʻAí. ʻOua ʻe fakaongosiaʻi ʻa e kakaí kotoa ʻaki hano ʻai kinautolu ke nau ō, he ko kinautolú ʻoku nau tokosiʻi pē.”

4 Ko ia ko e kau tangata ʻe toko 3,000 nai naʻa nau ʻalu hake ki aí, ka naʻe pau ke nau hola mei he kau tangata ʻo ʻAí.+ 5 Ko e kau tangata ʻo ʻAí naʻa nau taaʻi ʻa e kau tangata ʻe toko 36, pea naʻa nau tuli kinautolu mei tuʻa mei he matapā ʻo e koló ʻo aʻu ki Sepalimi,* pea naʻe hokohoko atu ʻenau taaʻi kinautolú ʻo faai hifo ʻi he tahifó. Ko ia naʻe vai ʻa e loto ʻo e kakaí pea mole ʻenau loto-toʻá.*

6 ʻI he meʻá ni naʻe hae ai ʻe Siosiua ʻa hono ngaahi kofú peá ne tō foʻohifo ʻi muʻa ʻi he ʻAʻake ʻa Sihová ʻo aʻu ki he efiafí, ko ia mo e kau mātuʻa ʻo ʻIsilelí, pea naʻa nau hanganaki laku ʻa e efú ki honau ʻulú. 7 Naʻe pehē ʻe Siosiua: “ʻOiauē, ʻEiki Hau Sihova, ko e hā naʻá ke ʻomi ai ʻa e kakaí ni ʻo faai mai ē ki he tafaʻaki ʻe taha ʻo Sioataní koeʻuhí pē ke tuku atu kimautolu ki he kau ʻĀmolí ke nau fakaʻauha? Kapau pē ā naʻa mau fiemālie ke nofo ai pē ʻi he tafaʻaki ʻe taha* ʻo Sioataní! 8 Kātaki fakamolemole ʻe Sihova, ko e hā ʻe lava ke u leaʻakí he ko ʻIsileli eni kuo holomui* mei he ʻao ʻo hono ngaahi filí? 9 ʻI he taimi ʻe fanongo ai fekauʻaki mo ia ʻa e kau Kēnaní mo e kau nofo kotoa ʻi he fonuá, te nau takatakaiʻi kimautolu pea tafiʻi atu homau hingoá tonu mei he māmaní, pea ko e hā te ke fai ʻo fekauʻaki mo ho huafa lahí?”+

10 Naʻe tali ange ʻe Sihova kia Siosiua: “Tuʻu hake! Ko e hā ʻokú ke foʻohifo pehē aí? 11 Kuo faiangahala ʻa ʻIsileli. Kuo nau maumauʻi ʻeku fuakava+ ʻa ia naʻá ku fekau kiate kinautolu ke nau tauhí. Naʻa nau toʻo ʻa e konga ʻo e meʻa naʻe tuku atu ki he fakaʻauhá,+ ʻi hono kaihaʻasi+ pea fūfuuʻi ia ʻi heʻenau koloa ʻanautolú.+ 12 Ko ia ai, ʻe ʻikai lava ʻa e kau ʻIsilelí ke nau tuʻu ki honau ngaahi filí. Te nau sītuʻa pea hola mei honau ngaahi filí, koeʻuhí kuo nau hoko ko ha meʻa kuo tuku atu ki he fakaʻauhá. ʻE ʻikai te u toe kau mo kimoutolu kae ʻoua kuo mou fakaʻauha ʻosi mei homou lotolotongá ʻa e meʻa naʻe tuku atu ki he fakaʻauhá.+ 13 Tuʻu hake pea fakamāʻoniʻoniʻi ʻa e kakaí!+ Tala kiate kinautolu, ‘Mou fakamāʻoniʻoniʻi kimoutolu ki ʻapongipongi, he ko e meʻa eni ʻoku folofolaʻaki ʻe Sihova ko e ʻOtua ʻo ʻIsilelí: “Ko e meʻa ʻoku tuku atu ki he fakaʻauhá ʻoku ʻi ho lotolotongá, ʻe ʻIsileli. ʻE ʻikai te ke lava ke tuʻu ki ho ngaahi filí kae ʻoua kuo mou toʻo mei homou lotolotongá ʻa e meʻa kuo tuku atu ki he fakaʻauhá. 14 Te mou fakatahataha mai ʻi he pongipongí ʻo fakamatakali, pea ko e matakali ʻe fili+ ʻe Sihová te nau ʻunuʻunu ofi mai ʻo fakafāmili, pea ko e fāmili ʻe fili ʻe Sihová te nau ʻunuʻunu ofi mai ʻo fakafale, pea ko e fale ʻe fili ʻe Sihová ʻe ʻunuʻunu ofi mai ʻo fakafoʻitangata. 15 Pea ko e tokotaha ʻa ia ʻe maʻu ki ai ʻa e meʻa kuo tuku atu ki he fakaʻauhá ʻe tutuʻaki ia ʻa e afí,+ ʻa ia mo e meʻa kotoa ʻoku ʻaʻaná, koeʻuhí kuó ne maumauʻi ʻa e fuakava+ ʻa Sihová pea koeʻuhí kuó ne fai ha tōʻonga fakamā ʻi ʻIsileli.”’”

16 Ko ia naʻe tuʻu pongipongia hake ʻa Siosiua ʻi he pongipongi hono hokó ʻo ʻai ke ʻunuʻunu ofi mai ʻa ʻIsileli ʻo fakamatakali, pea ko e matakali ʻo Siutá naʻe filí. 17 Naʻá ne ʻai ʻa e ngaahi fāmili ʻo Siutá ke nau ʻunuʻunu ofi mai, pea ko e fāmili ʻo e haʻa Salá+ naʻe filí, ʻi he hili iá, naʻá ne ʻai ʻa e fāmili ʻo e haʻa Salá ke nau ʻunuʻunu ofi mai ʻo fakafoʻitangata, pea ko Sapiti naʻe filí. 18 Fakaʻosí naʻá ne ʻai ʻa e fale ʻo Sapití ke nau ʻunuʻunu ofi mai ʻo fakafoʻitangata, pea ko ʻĀkani ko e foha ʻo Kalimi, foha ʻo Sapiti, foha ʻo Sala, ʻo e matakali ʻo Siutá, naʻe filí.+ 19 Naʻe pehē ange leva ʻe Siosiua kia ʻĀkani: “ʻE hoku foha, fakalāngilangiʻi ange muʻa ʻa Sihova ko e ʻOtua ʻo ʻIsilelí pea fai ha vetehia kiate ia. Tala mai muʻa kiate au ʻa e meʻa kuó ke faí. ʻOua naʻá ke fufū ia meiate au.”

20 Naʻe tali ange ʻe ʻĀkani kia Siosiua: “Ko hono moʻoní ko au ʻa e tokotaha kuo faiangahala kia Sihova ko e ʻOtua ʻo ʻIsilelí, pea ko e meʻa eni kuó u faí. 21 ʻI he taimi naʻá ku sio ai ʻi he lotolotonga ʻo e koloa veté* ki ha kofu makehe fakaʻofoʻofa mei Saina+ mo e sikeli* siliva ʻe 200 mo e pā koula ʻe taha ko hono mamafá ko e sikeli ʻe 50, naʻá ku holi ki ai, ko ia naʻá ku toʻo ai ia. ʻOku fufū ia he taimí ni ʻi he kelekelé ʻi hoku loto tēnití, ʻo ʻi lalo ai ʻa e silivá mo e koulá.”

22 Naʻe fekauʻi atu ʻi he taimi pē ko iá ʻe Siosiua ʻa e kau talafekau, pea naʻa nau lele ki he tēnití, pea ko e kofú ena naʻe fufū ʻi hono tēnití, ʻo ʻi lalo ai ʻa e silivá mo e koulá. 23 Ko ia naʻa nau toʻo mai ʻa e ʻū meʻá ki tuʻa mei he tēnití ʻo ʻomi kia Siosiua mo e kau ʻIsilelí kotoa pea tuku ia ʻi he ʻao ʻo Sihová. 24 Ko Siosiua mo ʻIsileli kātoa ʻa ia naʻe ʻiate iá naʻa nau ʻave leva ʻa ʻĀkani+ ko e foha ʻo Salá, mo e silivá, mo e kofu makehé, mo e pā koulá,+ fakataha mo hono ngaahi fohá, ko hono ngaahi ʻofefiné, ko ʻene pulú, ko ʻene ʻasí, ko ʻene tākangá, ko hono tēnití, mo e meʻa kotoa naʻe ʻaʻaná, pea naʻa nau ʻave ia ki he Teleʻa* ko ʻĀkolí.+ 25 Naʻe pehē ange ʻe Siosiua: “Ko e hā kuó ke ʻomi ai ha fakatamaki kiate* kimautolú?+ ʻE ʻomi ʻe Sihova ha fakatamaki kiate koe ʻi he ʻahó ni.” Ko ia naʻe tolomakaʻi ai ia+ ʻe ʻIsileli kotoa, ʻi he hili iá, naʻa nau tutu kinautolu ʻaki ʻa e afí.+ Ko ia naʻa nau tolomakaʻi kinautolu kotoa. 26 Pea naʻa nau fokotuʻu ha fuʻu fokotuʻunga maka ʻiate ia ʻa ia ʻoku ʻi ai ʻo aʻu mai ki he ʻahó ni. ʻI he meʻá ni naʻe lolou ai ʻa e houhau kakaha ʻa Sihová.+ Ko e ʻuhinga ia ʻoku ui ai ʻa e feituʻu ko iá ko e Teleʻa ko ʻĀkolí* ʻo aʻu mai ki he ʻahó ni.

8 Naʻe folofola leva ʻa Sihova kia Siosiua: “ʻOua ʻe ilifia pe manavahē.+ ʻAve ʻa e kau tangata taú kotoa pea mou ʻalu hake ki ʻAi. Vakai, kuó u tuku atu kiate koe ʻa e tuʻi ʻo ʻAí, ko hono kakaí, ko hono koló, pea mo hono fonuá.+ 2 Fai ki ʻAi mo hono tuʻí ʻo hangē tofu pē ko ia naʻá ke fai ki Sielikō pea mo hono tuʻí,+ ka te mou faʻao maʻamoutolu ʻa hono koloa veté mo ʻene fanga manú. Fakatoka ha malumu mei mui ʻi he koló.”

3 Ko ia naʻe ʻalu hake ʻa Siosiua mo e kau tangata taú kotoa ki ʻAi. Naʻe fili ʻe Siosiua ʻa e toko 30,000 ʻo e kau tangata toʻa ʻi he taú peá ne fekauʻi poʻuli atu kinautolu. 4 Naʻá ne fai ʻa e tuʻutuʻuni ko ení kiate kinautolu: “Vakai, te mou toi ʻo malumu mei mui ʻi he koló. ʻOua naʻa mou ʻalu ʻo fuʻu mamaʻo mei he koló, pea ko kimoutolu kotoa ke mou mateuteu. 5 Ko au mo e kakai kotoa ʻoku ʻiate aú te mau fakaofiofi atu ki he koló, pea ʻi he taimi te nau hū mai ai ki tuʻa kiate kimautolu ʻo hangē pē ko ia naʻe hoko ki muʻá,+ te mau holomui leva meiate kinautolu. 6 ʻI heʻenau hū mai ki tuʻa ke tuli kimautolú, te mau tohoakiʻi kinautolu ke nau mamaʻo mei he koló, he te nau pehē, ‘ʻOku nau holomui meiate kitautolu ʻo hangē pē ko ia naʻe hoko ki muʻá.’+ Pea te mau holomui meiate kinautolu. 7 Te mou mālanga hake leva mei he malumú ʻo hamu ʻa e koló; ʻe tuku atu ia ʻe Sihova ko homou ʻOtuá kiate kimoutolu. 8 ʻI hoʻomou puke pē ʻa e koló, te mou tutu ia.+ Te mou fai ʻo fakatatau ki he folofola ʻa Sihová. Vakai, ko e tuʻutuʻuni ia kuó u ʻoatu kiate kimoutolú.”

9 Naʻe fekauʻi atu leva ʻe Siosiua kinautolu, pea naʻa nau laka atu ki he feituʻu ʻo e malumú; naʻa nau nofo ʻi he vahaʻa ʻo Pēteli mo ʻAí, ki he tafaʻaki fakahihifo ʻo ʻAí, lolotonga ia naʻe nofo ʻa Siosiua ʻi he pō ko iá mo e kakaí.

10 ʻI he hili ʻa e mālanga pongipongia hake ʻa Siosiua ʻo ne fakatahatahaʻi ʻa e kau taú, ko ia mo e kau mātuʻa ʻo ʻIsilelí naʻa nau taki atu kinautolu ki ʻAi. 11 Ko e kau tangata tau kotoa+ naʻe ʻiate iá naʻa nau laka atu ʻo nau ʻalu ki he matanikoló. Naʻa nau ʻapitanga ʻi he fakatokelau ʻo ʻAí, ʻo ʻi honau vahaʻa mo ʻAí ʻa e teleʻá. 12 ʻI he taimi tatau, naʻá ne ʻave ʻa e kau tangata ʻe toko 5,000 nai ʻo ne ʻai kinautolu ke nau malumu+ mei he vahaʻa ʻo Pēteli+ mo ʻAí, ʻi he fakahihifo ʻo e koló. 13 Ko ia naʻe fokotuʻu ʻe he kakaí ʻa e konga tefito ʻo e kau taú ki he fakatokelau ʻo e koló+ pea ko e kau tau malumú ʻi he fakahihifo ʻo e koló,+ pea naʻe ʻalu ʻa Siosiua ʻi he pō ko iá ki he loto teleʻá.*

14 Pea ʻi he sio pē ʻa e tuʻi ʻo ʻAí ki he meʻá ni, naʻá ne fakavave pongipongia atu mo e kau tangata ʻo e koló ki tuʻa ke fakafetaulaki atu ke tau mo ʻIsileli ʻi ha feituʻu naʻe hanga atu ki he toafa tokaleleí. Ka naʻe ʻikai te ne ʻilo naʻe ʻi ai ha malumu naʻe fakatoka atu kiate ia mei mui ʻi he koló. 15 ʻI hono ʻohofi ʻe he kau tangata ʻo ʻAí, naʻe hola ʻa Siosiua mo ʻIsileli kātoa ʻi he halá ʻo huʻu ki he toafá.+ 16 Pea ko e kakai tangata kotoa naʻe ʻi he koló naʻe uki mai kinautolu ke tuli atu kiate kinautolu; pea ʻi heʻenau tuli atu kia Siosiuá naʻe tohoakiʻi ai kinautolu ʻo mamaʻo mei he koló. 17 Naʻe ʻikai toe ha tangata ʻi ʻAi mo Pēteli ʻa ia naʻe ʻikai tuli atu ki ʻIsileli. Naʻa nau tuku ʻatāloa atu pē ʻa e koló pea nau tuli atu ki ʻIsileli.

18 Naʻe folofola ange leva ʻa Sihova kia Siosiua: “Mafao atu ʻa e tao ʻoku ʻi ho nimá ki ʻAi,+ he te u tuku atu ia ki ho nimá.”+ Ko ia naʻe mafao atu ʻe Siosiua ʻa e tao naʻe ʻi hono nimá ki he koló. 19 ʻI he mōmeniti pē naʻá ne mafao atu ai hono nimá, naʻe mālanga fakavave hake ʻa e kau malumú mei he feituʻu naʻa nau ʻi aí ʻo nau lele ki he koló pea nau hamu ia. Naʻa nau tutu+ leva ʻa e koló ʻi he taimi pē ko iá.

20 ʻI he tafoki hake ʻa e kau tangata ʻo ʻAí, naʻa nau sio atu ki he kohu ʻa e koló ʻo ʻalu hake ki he langí, pea naʻe ʻikai hanau ivi ke hola ki ha toe tafaʻaki. Naʻe hanga hake leva ʻa e kakai naʻe hola ki he toafá ki he faʻahinga naʻa nau tuli kinautolú. 21 ʻI he sio ʻa Siosiua mo ʻIsileli kātoa kuo hanga ʻe he kau malumú ʻo hamu ʻa e koló pea sio ki he kohu hake ʻa e koló, naʻa nau tafoki hake ʻo ʻohofi ʻa e kau tangata ʻo ʻAí. 22 Pea naʻe hū mai ki tuʻa ʻa e niʻihi ko ē mei he koló ke fakafetaulaki kiate kinautolu, ko ia ko e kau tangata ʻo ʻAí naʻa nau fihia ʻi loto, ʻo ʻi he tafaʻaki ʻe taha ha niʻihi ʻo e kau ʻIsilelí pea ko e niʻihi ʻi he tafaʻaki ʻe tahá, pea naʻa nau taaʻi kinautolu kae ʻoua kuo ʻikai ha foʻi toko taha ne hao pe hola.+ 23 Ka naʻa nau puke moʻui ʻa e tuʻi ʻo ʻAí+ pea ʻomi ia ki he ʻao ʻo Siosiuá.

24 ʻI he hili hono tāmateʻi ʻe ʻIsileli ʻa e kakai kotoa ʻo ʻAí ʻi he toafa ʻa ia naʻa nau tuli atu ai kiate kinautolú, pea kuo tō ʻa e tokotaha taki taha ʻo kinautolu ʻi he heletaá, naʻe foki kotoa leva ʻa ʻIsileli ki ʻAi ʻo nau taaʻi ia ʻaki ʻa e heletaá. 25 Ko e faʻahinga kotoa naʻe tō ʻi he ʻaho ko iá, mei he tangata ki he fefine, naʻe feʻunga mo e toko 12,000, ko e kakai kotoa ia ʻo ʻAí. 26 Naʻe ʻikai ke fakafoki mai ʻe Siosiua hono nima naʻe mafao atu mo e taó+ kae ʻoua kuó ne tuku atu ʻa e kakai kotoa ʻo ʻAí ki he fakaʻauha.+ 27 Kae kehe, naʻe toʻo ʻe ʻIsileli ʻa e fanga manu mo e koloa vete ʻo e kolo ko iá maʻanautolu, ʻo fakatatau ki he ngaahi tuʻutuʻuni naʻe ʻoange ʻe Sihova kia Siosiuá.+

28 Naʻe tutu leva ʻe Siosiua ʻa ʻAi ʻo ne ʻai ia ke hoko ko ha fokotuʻunga maumau+ tuʻuloa, ʻo hangē ko ia ʻoku ʻi ai ʻo aʻu mai ki he ʻaho ní. 29 Naʻá ne tautau ʻa e tuʻi ʻo ʻAí ʻi ha ʻakau* ʻo aʻu ki he efiafí, pea ʻi he tāitō ʻa e laʻaá, naʻe ʻoatu ai ʻe Siosiua ʻa e tuʻutuʻuni ke ʻohifo hono ʻangaʻangá mei he ʻakaú.+ Naʻa nau lī leva ia ki he hūʻanga ʻo e matapā ʻo e koló pea fokotuʻu ha fuʻu fokotuʻunga maka ʻiate ia, ʻa ia ʻoku ʻi ai ʻo aʻu mai ki he ʻahó ni.

30 ʻI he taimi ko iá naʻe fokotuʻu ai ʻe Siosiua ha ʻōlita ʻi Moʻunga ʻĪpale+ kia Sihova ko e ʻOtua ʻo ʻIsilelí, 31 ʻo hangē tofu pē ko e tuʻutuʻuni ʻa Mōsese ko e sevāniti ʻa Sihová ki he kau ʻIsilelí pea hangē ko ia kuo hiki ʻi he tohi ʻo e Lao+ ʻa Mōsesé: “Ko ha ʻōlita ʻo e ngaahi fuʻu maka kuo ʻikai tā ʻa ia kuo ʻikai ngāueʻaki ki ai ha meʻangāue ukamea.”+ Naʻa nau ʻohake leva ʻi ai ha ngaahi feilaulau tutu kia Sihova pea pehē ki ha ngaahi feilaulau feʻinasiʻaki.+

32 Naʻá ne hiki leva ai ʻi he funga maká ha tatau ʻo e Lao+ naʻe hiki ʻe Mōsese ʻi he ʻao ʻo e kau ʻIsilelí.+ 33 Ko ʻIsileli kātoa, ko ʻenau kau mātuʻá, ko e kau ʻōfisá, mo ʻenau kau fakamāú naʻa nau tuʻu ʻi he ongo tafaʻaki fakatouʻosi ʻo e ʻAʻaké ʻi muʻa ʻi he kau taulaʻeiki Līvai naʻa nau fua ʻa e ʻaʻake ʻo e fuakava ʻa Sihová. Naʻe ʻi ai foki ʻa e mulí pea pehē ki he tupuʻi fonuá.+ Ko e vaeua ʻo kinautolu naʻa nau tuʻu ʻi muʻa ʻi Moʻunga Kelisimi, pea ko e vaeua ko eé ʻi muʻa ʻi Moʻunga ʻĪpale+ (ʻo hangē tofu pē ko e tuʻutuʻuni+ ki muʻa ʻa Mōsese ko e sevāniti ʻa Sihová), ke tāpuakiʻi ʻa e kakai ʻo ʻIsilelí. 34 ʻI he hili ʻa e meʻá ni naʻá ne lau leʻo-lahi ʻa e ngaahi lea kotoa ʻo e Laó,+ ʻa e ngaahi tāpuakí+ mo e ngaahi malá,+ ʻo fakatatau ki he meʻa kotoa kuo hiki ʻi he tohi Laó. 35 Naʻe ʻikai ha foʻi lea ʻi he ngaahi lea kotoa naʻe tuʻutuʻuni ʻe Mōsesé naʻe taʻelau leʻo-lahi ʻe Siosiua ʻi muʻa ʻi he fakatahaʻanga kotoa ʻo ʻIsilelí,+ ʻo kau ai ʻa e kakai fefine mo e fānau pea mo e muli+ ʻa ia naʻe nofo* ʻi honau lotolotongá.+

9 ʻI he fanongo ʻa e ngaahi tuʻi kotoa ʻa ia naʻa nau ʻi he tafaʻaki fakahihifo ʻo Sioataní+ ʻi he meʻa naʻe hokó, ʻa e faʻahinga ʻi he feituʻu moʻungaʻiá, mo e Sefelaʻá,* mo e matāfanga fakakātoa ʻo e Tahi Lahí,*+ pea ʻi muʻa ʻi Lepanoní—ʻa e kau Hetí, ʻa e kau ʻĀmolí, ʻa e kau Kēnaní, ʻa e kau Pēlisí, ʻa e kau Heví, pea mo e kau Siepusí+— 2 naʻa nau fokotuʻu ha faʻahi ke nau tauʻi ʻa Siosiua pea mo ʻIsileli.+

3 Naʻe fanongo foki mo e kakai ʻo Kipioné+ ʻi he meʻa naʻe fai ʻe Siosiua ki Sielikō+ mo ʻAí.+ 4 Ko ia naʻa nau fai fakapotopoto ʻo nau faʻo ha ʻoho ʻi ha ngaahi tangai mahaehae ʻo fakaheka ki heʻenau fanga ʻasí, pea mo e ngaahi hina kiliʻimanu motuʻa naʻe mahae pea kuo monosi; 5 naʻa nau tui foki ʻi honau vaʻé ha ngaahi senitolo motuʻa kuo monomono, pea naʻa nau tui mo ha ngaahi kofu mahaehae. Ko e mā kotoa naʻe ʻave ko honau ʻohó naʻe pakupaku mo momomomo. 6 Naʻa nau ʻalu leva kia Siosiua ki he ʻapitanga ʻi Kilikalí+ pea nau pehē kiate ia pea mo e kau tangata ʻo ʻIsilelí: “Kuo mau haʻu mei ha fonua mamaʻo. Pea ko eni ke mou fai muʻa ha fuakava mo kimautolu.” 7 Ka naʻe pehē ʻe he kau tangata ʻo ʻIsilelí ki he kau Heví:+ “Naʻa ʻokú ke nofo ofi mai pē kiate kimautolu. Ko ia ʻe lava fēfē ke mau fai ha fuakava mo koe?”+ 8 Naʻa nau tali ange kia Siosiua: “Ko kimautolú ko hoʻo kau sevāniti.”*

Naʻe pehē ange leva ʻe Siosiua: “Ko hai kimoutolu, pea ko hoʻomou haʻú mei fē?” 9 ʻI he meʻá ni naʻa nau pehē ange ai kiate ia: “Kuo haʻu ʻa hoʻo kau sevānití ni mei ha fonua mamaʻo ʻaupito+ ko hono ʻuhingá ko e huafa ʻo Sihova ko ho ʻOtuá, he kuo mau fanongo ʻi hono ongoongó pea mo e meʻa kotoa naʻá ne fai ʻi ʻIsipité+ 10 pea mo e meʻa kotoa naʻá ne fai ki he ongo tuʻi ʻo e kau ʻĀmolí ʻa ia naʻá na ʻi he tafaʻaki ʻe taha* ʻo Sioataní, ʻa Tuʻi Sīhoni+ ʻo Hesiponí mo Tuʻi ʻOki+ ʻo Pēsaní, ʻa ia naʻe ʻi ʻAsitelotí. 11 Ko ia naʻe tala mai ʻe heʻemau kau mātuʻá mo e kakai kotoa ʻo homau fonuá kiate kimautolu, ‘ʻAve hamou ʻoho ki he fonongá pea mou ō atu ʻo feʻiloaki mo kinautolu. Tala kiate kinautolu: “Te mau hoko ko hoʻomou kau sevāniti;+ pea fai muʻa ha fuakava mo kimautolu.”’+ 12 Ko e mā ko eni naʻa mau ʻomi ko homau ʻohó naʻe kei vela pē ia ʻi he ʻaho naʻa mau mavahe ai mei homau ngaahi falé ke omi ki heni kiate kimoutolú. Pea ko eni ʻoku lava ke mou vakai mai ki ai kuo pakupaku pea momomomo.+ 13 Pea ko e ngaahi hina kiliʻimanu ko ení naʻe foʻou ia ʻi he taimi naʻa mau fakafonu aí, ka ko eni kuo mahae.+ Pea ko homau kofú mo homau senitoló kuo motuʻa koeʻuhí ko e lōloa fau ʻa e fonongá.”

14 Ko ia naʻe toʻo* ʻe he kau tangata ʻo ʻIsilelí ha meʻa mei honau ʻohó, ka naʻe ʻikai te nau kumi ki ha tataki meia Sihova.+ 15 Ko ia naʻe alea melino ʻa Siosiua mo kinautolu+ peá ne fai ha fuakava mo kinautolu ke tuku ke nau moʻui, pea ko e meʻa ia naʻe fakapapauʻaki ʻe he ngaahi ʻeiki ʻo e fuʻu fakatahá kia kinautolu ʻi ha fuakavá.+

16 ʻI he ʻosi ʻa e ʻaho ʻe tolu, ʻi he hili ʻenau fai ha fuakava mo kinautolú, naʻa nau toki fanongo ai tā ʻoku nau nofo ofi mai pē, ʻi honau feituʻú. 17 Ko ia naʻe ʻalu atu ʻa e kau ʻIsilelí pea naʻa nau aʻu ki honau ngaahi koló ʻi he ʻaho hono tolú; ko honau ngaahi koló ko Kipione,+ Kefila, Pieloti, mo Kiliate-sialimi.+ 18 Ka naʻe ʻikai ʻohofi ʻe he kau ʻIsilelí kinautolu, koeʻuhí ko e ngaahi ʻeiki ʻo e fuʻu fakatahá naʻa nau fakapapauʻaki ha fuakava kiate kinautolu ʻia Sihova+ ko e ʻOtua ʻo ʻIsilelí. Ko ia naʻe kamata ke lāunga ʻa e fuʻu fakatahá kotoa ki he ngaahi ʻeikí. 19 ʻI he meʻá ni naʻe pehē ange ai ʻe he kotoa ʻo e ngaahi ʻeikí ki he fuʻu fakatahá fakakātoa: “Koeʻuhí naʻa mau fakapapauʻaki ha fuakava kiate kinautolu ʻia Sihova ko e ʻOtua ʻo ʻIsilelí, ʻoku ʻikai te tau ʻatā ai ke fai ha kovi kiate kinautolu. 20 Ko e meʻa eni te tau faí: Te tau tuku pē ke nau moʻui, ke ʻoua naʻa hoko ai ha houhau kiate kitautolu koeʻuhí ko e fuakava naʻa mau fakapapauʻaki kiate kinautolú.”+ 21 Pea naʻe toe pehē ʻe he ngaahi ʻeikí: “Tuku pē ke nau moʻui, kae tuku ke nau hoko ko e kau tā fefie mo e kau ʻutu vai ki he fuʻu fakatahá kotoa.” Ko e meʻa eni naʻe talaʻofa ange ʻe he ngaahi ʻeikí kiate kinautolú.

22 Naʻe ui mai leva ʻe Siosiua kinautolu ʻo ne pehē ange: “Ko e hā naʻa mou kākaaʻi ai kimautolu ʻi hoʻomou pehē, ‘Ko ʻemau haʻú mei ha feituʻu mamaʻo ʻaupito meiate kimoutolu,’ ka ko hono moʻoní ʻoku mou nofo ofi ʻaupito mai pē kiate kimautolu?+ 23 Kuo mou malaʻia+ mei he taimí ni ʻo faai atu, pea te mou ʻi he tuʻunga tamaioʻeiki maʻu ai pē ʻi hoʻomou hoko ko e kau tā fefie mo e kau ʻutu vai ki he fale ʻo hoku ʻOtuá.” 24 Naʻa nau tali ange kia Siosiua: “Koeʻuhí he naʻe fakamatala mahino ki hoʻo kau sevānití, ko Sihova ko ho ʻOtuá naʻá ne tuʻutuʻuni kia Mōsese ko ʻene sevānití ke foaki kiate kimoutolu ʻa e kotoa ʻo e fonuá ni pea ke fakaʻauha ʻosi ʻa hono kakaí kotoa mei homou ʻaó.+ Ko ia naʻa mau ilifia koeʻuhí ko kimoutolu+ telia ʻemau moʻuí, pea ko e ʻuhinga ia naʻa mau fai ai ʻa e meʻá ni.+ 25 Pea ko eni ʻoku mau ʻi hoʻo mēsí.* Fai mai kiate kimautolu ha meʻa pē ʻokú ke fakakaukau ʻoku lelei mo totonú.” 26 Pea ko e meʻa ia naʻá ne fai kiate kinautolú; naʻá ne fakahaofi kinautolu mei he nima ʻo e kau ʻIsilelí, pea naʻe ʻikai te nau tāmateʻi kinautolu. 27 Ka ʻi he ʻaho ko iá naʻe ʻai ʻe Siosiua ke nau hoko ko e kau tā fefie mo e kau ʻutu vai ki he fuʻu fakatahá+ pea ki he ʻōlita ʻo Sihová ʻi he feituʻu te Ne filí,+ pea ʻoku nau kei fai pehē ai pē ʻo aʻu mai ki he ʻahó ni.+

10 ʻI he fanongo pē ʻa Tuʻi ʻĀtoni-seteki ʻo Selusalemá kuo hamu ʻe Siosiua ʻa ʻAi pea tuku atu ia ki he fakaʻauhá, ʻi heʻene fai ki ʻAi mo hono tuʻí+ ʻo hangē tofu pē ko e meʻa naʻá ne fai ki Sielikō mo hono tuʻí,+ pea mo e alea melino+ ʻa e kakai ʻo Kipioné mo ʻIsileli pea nofo ʻi honau lotolotongá, 2 naʻá ne ilifia lahi,+ koeʻuhí ko Kipioné ko ha kolo lahi, ʻo hangē ko e taha ʻo e ngaahi kolo fakatuʻí. Naʻe lahi ange ia ʻi ʻAi,+ pea ko e kotoa ʻo hono kau tangatá ko e kau tangata tau. 3 Ko ia ko ʻĀtoni-seteki ko e tuʻi ʻo Selusalemá naʻá ne ʻoatu ʻa e pōpoaki ko ení kia Hohami ko e tuʻi ʻo Hepeloní,+ kia Pilami ko e tuʻi ʻo Siamutí, kia Safia ko e tuʻi ʻo Lākisí, pea kia Tepili ko e tuʻi ʻo ʻEkeloní:+ 4 “Mou omi ʻo tokoniʻi au pea ke tau ʻohofi ʻa Kipione, he kuó ne alea melino mo Siosiua pea mo e kau ʻIsilelí.”+ 5 ʻI he meʻá ni, ko e tuʻi ʻe toko nima ʻo e kau ʻĀmolí+—ko e tuʻi ʻo Selusalemá, ko e tuʻi ʻo Hepeloní, ko e tuʻi ʻo Siamutí, ko e tuʻi ʻo Lākisí pea mo e tuʻi ʻo ʻEkeloní—naʻa nau fakatahataha mo ʻenau ngaahi kongakaú, pea naʻa nau laka atu ʻo nau ʻapitanga ofi ki Kipione ke faitau mo ia.

6 Ko e kau tangata leva ʻo Kipioné naʻa nau ʻoatu ʻa e tala kia Siosiua ʻi he ʻapitanga ʻi Kilikalí:+ “ʻOua naʻá ke liʻaki hoʻo kau tamaioʻeikí.+ Haʻu ke vave! Fakahaofi kimautolu pea tokoniʻi kimautolu! Ko e ngaahi tuʻi kotoa ʻo e kau ʻĀmolí mei he feituʻu moʻungaʻiá kuo nau fakatahataha ke tauʻi kimautolu.” 7 Ko ia naʻe ʻalu hake ai ʻa Siosiua mei Kilikali mo e kotoa ʻo e kau tangata taú pea mo e kau tangata toʻa ʻi he taú.+

8 Naʻe folofola leva ʻa Sihova kia Siosiua: “ʻOua naʻá ke ilifia ʻiate kinautolu,+ he kuó u tuku atu kinautolu kiate koe.+ ʻE ʻikai ha taha ʻo kinautolu ʻe lava ke ne tuʻu kiate koe.”+ 9 Naʻe aʻu fakafokifā atu ʻa Siosiua kiate kinautolu hili ia ʻene laka mai ʻi he poó kotoa mei Kilikali. 10 Naʻe fakapuputuʻuʻi kinautolu ʻe Sihova ʻi he ʻao ʻo ʻIsilelí,+ pea ko e fuʻu tāmate lahi naʻa nau fai kiate kinautolu ʻi Kipioné, ʻi hono tuli kinautolu ʻi he hala ʻoku ʻalu hake ki Pete-holoní pea taaʻi kinautolu ʻo aʻu ki ʻĀseka mo Maketa. 11 Lolotonga ʻenau hola mei ʻIsileli pea nau ʻi he tahifo ʻo Pete-holoní, naʻe ʻai ʻe Sihova ke tō hifo ha fuʻu ʻuha-ʻaisi* mei he langí kiate kinautolu ʻo aʻu ki ʻĀseka, pea naʻa nau ʻauha ai. Ko hono moʻoní, naʻe tokolahi ange ʻa e mate ʻi he ʻuha-ʻaisí ʻi he mate tupu mei he heletā ʻa e kau ʻIsilelí.

12 Ko e taimi ko iá, ʻi he ʻaho naʻe fakakaʻanga ai ʻe Sihova ʻa e kau ʻĀmolí ʻi he ʻao ʻo e kau ʻIsilelí, naʻe pehē ai ʻe Siosiua kia Sihova ʻi he ʻao ʻo ʻIsilelí:

13 Ko ia naʻe tuʻu maʻu ʻa e laʻaá pea naʻe ʻikai ke ngaue ʻa e māhiná kae ʻoua kuo lava ʻa e puleʻangá ʻo faisāuni ki hono ngaahi filí. ʻIkai kuo hiki ia ʻi he tohi Saisá?+ Naʻe tuʻu maʻu ʻa e laʻaá ʻi he loto langí pea naʻe ʻikai vave ʻene toó ʻi ha ʻaho kakato nai. 14 Kuo ʻikai ʻaupito ke ʻi ai ha ʻaho ʻe hangē ko e ʻaho ko iá, ʻo tatau ai pē ki muʻa pe ki mui ai, ʻa ia naʻe fanongo ai ʻa Sihova ki he leʻo ʻo ha tangata+ ʻi he founga ko iá, he naʻe tau ʻa Sihova maʻa ʻIsileli.+

15 ʻI he hili iá, ko Siosiua mo ʻIsileli kotoa naʻa nau foki ki he ʻapitangá ʻi Kilikali.+

16 Lolotonga iá, naʻe hola ʻa e ngaahi tuʻi ʻe toko nimá ʻo toi ʻi he ʻana ʻi Maketá.+ 17 Naʻe fakahaaʻi leva kia Siosiua ʻo pehē: “Ko e ngaahi tuʻi ʻe toko nimá kuo ʻilo ʻoku nau toi ʻi he ʻana ʻi Maketá.”+ 18 Ko ia naʻe pehē ʻe Siosiua: “Tekaʻi ha ngaahi fuʻu maka ki he ngutu ʻo e ʻaná pea vaheʻi ha kau tangata ke leʻohi kinautolu. 19 Ka ko e toenga ʻo kimoutolú ʻe ʻikai te mou tuʻu. Mou tuli homou ngaahi filí pea taaʻi kinautolu mei mui.+ ʻOua ʻe tuku ke nau hū ki honau ngaahi koló, he ko Sihova ko homou ʻOtuá kuó ne tuku atu kinautolu ki homou nimá.”

20 Hili ʻa e fuʻu tāmate lahi ʻaupito naʻe fai ʻe Siosiua mo e kau ʻIsilelí kiate kinautolú, ʻo aʻu ki hono tafiʻi ʻosi atu kinautolu tuku kehe pē ha niʻihi naʻe hao ʻa ia naʻa nau hola ʻo hū ki he ngaahi kolo fakakolotaú, 21 naʻe foki hao ʻa e kakaí kotoa kia Siosiua ki he ʻapitanga ʻi Maketá. Naʻe ʻikai ha tangata ʻe fakatoʻotoʻa ke ne puʻaki ha foʻi lea ʻe taha* ki he kau ʻIsilelí. 22 Naʻe pehē ange leva ʻe Siosiua: “Fakaava ʻa e ngutu ʻo e ʻaná pea ʻomi ki tuʻa mei he ʻaná ʻa e tuʻi ʻe toko nimá kiate au.” 23 Ko ia naʻa nau ʻomi kiate ia ʻa e tuʻi ko eni ʻe toko nimá mei he ʻaná: Ko e tuʻi ʻo Selusalemá, ko e tuʻi ʻo Hepeloní, ko e tuʻi ʻo Siamutí, ko e tuʻi ʻo Lākisí, pea mo e tuʻi ʻo ʻEkeloní.+ 24 ʻI heʻenau ʻomi ʻa e ngaahi tuʻi ko ení kia Siosiuá, naʻá ne ui ʻa e kau tangata kotoa ʻo ʻIsilelí peá ne pehē ki he ngaahi ʻeikitau ʻo e kau tangata tau naʻa nau ō mo iá: “Mou haʻu ki muʻa. ʻAi homou vaʻé ki he tuʻakia ʻo e ngaahi tuʻí ni.” Ko ia naʻa nau haʻu ki muʻa pea ʻai honau vaʻé ki honau tuʻakiá.+ 25 Naʻe pehē ange leva ʻe Siosiua kiate kinautolu: “ʻOua naʻa mou ilifia pe manavahē.+ Mou loto-toʻa pea tuʻu mālohi, he ko e meʻa eni ʻe fai ʻe Sihova ki he kotoa homou ngaahi fili ʻa ia ʻoku mou tau mo iá.”+

26 Naʻe taaʻi leva kinautolu ʻe Siosiua pea tāmateʻi kinautolu ʻo tautau ʻi ha ʻakau* ʻe nima, pea naʻe tautau ai pē kinautolu ʻi he ʻakaú ʻo aʻu ki he efiafí. 27 ʻI he tō ʻa e laʻaá naʻe tuʻutuʻuni ai ʻe Siosiua ke ʻohifo kinautolu mei he ʻakaú+ pea lī ki he ʻana ʻa ia naʻa nau toitoi aí. Naʻe fokotuʻu leva ha ngaahi fuʻu maka ʻi he ngutu ʻo e ʻaná, pea ʻoku ʻi ai ia ʻo aʻu mai ai pē ki he ʻahó ni.

28 Naʻe hamu ʻe Siosiua ʻa Maketa+ ʻi he ʻaho ko iá pea taaʻi ia ʻaki ʻa e heletaá. Naʻá ne tuku atu ʻa hono tuʻí mo e tokotaha kotoa ʻi aí ki he fakaʻauha, ʻo ʻikai tuku ke hao ha taha.+ Naʻá ne fai ki he tuʻi ʻo Maketá+ ʻo hangē tofu pē ko e meʻa naʻá ne fai ki he tuʻi ʻo Sielikoó.

29 Ko Siosiua leva mo ʻIsileli kotoa naʻa nau ʻalu mei Maketa ki Līpina ʻo tauʻi ʻa Līpina.+ 30 Naʻe tuku foki ia ʻe Sihova pea mo hono tuʻí+ ki he nima ʻo ʻIsilelí, pea naʻa nau taaʻi ia mo e tokotaha kotoa ʻi aí ʻaki ʻa e heletaá, ʻo ʻikai tuku ke hao ai ha taha. Ko ia naʻa nau fai ki hono tuʻí ʻo hangē tofu pē ko e meʻa naʻa nau fai ki he tuʻi ʻo Sielikoó.+

31 Ko hono hokó ko Siosiua mo ʻIsileli kotoa naʻa nau ʻalu mei Līpina ki Lākisi+ ʻo ʻapitanga ai pea nau tauʻi ia. 32 Naʻe tuku ʻe Sihova ʻa Lākisi ki he nima ʻo ʻIsilelí, pea naʻa nau hamu ia ʻi he ʻaho hono uá. Naʻa nau taaʻi ia mo e tokotaha kotoa ʻi aí ʻaki ʻa e heletaá,+ ʻo hangē tofu pē ko e meʻa naʻa nau fai ki Līpiná.

33 Ko Hōlami leva ko e tuʻi ʻo Kēselí+ naʻá ne ʻalu hake ke tokoni ki Lākisi, ka naʻe taaʻi ia mo hono kakaí ʻe Siosiua kae ʻoua kuo ʻikai hao ai ha foʻi toko taha.

34 Ko Siosiua leva mo ʻIsileli kotoa naʻa nau ʻalu mei Lākisi ki ʻEkeloni+ ʻo ʻapitanga ai pea nau tauʻi ia. 35 Naʻa nau hamu ia ʻi he ʻaho ko iá pea taaʻi ia ʻaki ʻa e heletaá. Naʻa nau tuku atu ʻa e tokotaha kotoa ʻi aí ki he fakaʻauha ʻi he ʻaho ko iá, ʻo hangē tofu pē ko e meʻa naʻa nau fai ki Lākisí.+

36 Ko Siosiua leva mo ʻIsileli kotoa naʻa nau ʻalu hake mei ʻEkeloni ki Hepeloni+ pea nau tauʻi ia. 37 Naʻa nau hamu ia pea taaʻi ia, ko hono tuʻí, ko hono ngaahi koló, mo e tokotaha kotoa ʻi aí ʻaki ʻa e heletaá, ʻo ʻikai tuku ke hao ai ha taha. Naʻá ne tuku atu ia mo e tokotaha kotoa ʻi aí ki he fakaʻauha ʻo hangē tofu pē ko e meʻa naʻá ne fai ki ʻEkeloní.

38 Fakaʻosí ko Siosiua mo ʻIsileli kotoa naʻa nau hanga hake ki Tepili+ pea nau tauʻi ia. 39 Naʻá ne hamu ia, ko hono tuʻí, mo e kotoa hono ngaahi koló, pea naʻa nau taaʻi kinautolu ʻaki ʻa e heletaá, ʻo tuku atu ʻa e tokotaha kotoa ʻi aí ki he fakaʻauha,+ ʻo ʻikai tuku ke hao ai ha taha.+ Naʻá ne fai ki Tepili mo hono tuʻí ʻo hangē tofu pē ko e meʻa naʻá ne fai ki Hepeloni pea ki Līpina mo hono tuʻí.

40 Naʻe ikunaʻi ʻe Siosiua ʻa e fonua kotoa pē ʻo e feituʻu moʻungaʻiá, ko e feituʻu Nīkepí, ko e Sefelaʻá,*+ mo e ngaahi tahifó, pea mo e kotoa honau ngaahi tuʻí, ʻo ʻikai tuku ke hao ai ha taha; naʻá ne tuku atu ʻa kinautolu kotoa pē naʻe mānavá ki he fakaʻauha,+ ʻo hangē tofu pē ko e tuʻutuʻuni+ ʻa Sihova ko e ʻOtua ʻo ʻIsilelí. 41 Naʻe ikunaʻi kinautolu ʻe Siosiua mei Kētesi-pānea+ ki Kesa+ pea mo e fonua kotoa ko Kōsení+ ʻo aʻu ki Kipione.+ 42 Ko e ngaahi tuʻi kotoa ko ení mo honau fonuá, naʻe hamu kotoa ia ʻe Siosiua ʻi he feingatau pē ʻe taha, koeʻuhí he ko Sihova ko e ʻOtua ʻo ʻIsilelí naʻe tau maʻa ʻIsileli.+ 43 Naʻe foki leva ʻa Siosiua mo ʻIsileli kotoa ki he ʻapitangá ʻi Kilikali.+

11 ʻI he fanongo pē ai ʻa Siapini ko e tuʻi ʻo Hāsoá, naʻá ne ʻoatu ha tala kia Siopapi ko e tuʻi ʻo Matoní,+ pea ki he tuʻi ʻo Similoní, mo e tuʻi ʻo ʻAkisafí,+ 2 mo e ngaahi tuʻi naʻe ʻi he feituʻu moʻungaʻia ʻo e tokelaú, mo e faʻahinga ʻi he toafá* ʻi he fakatonga ʻo Kineletí, mo e faʻahinga ʻi he Sefelaʻá* pea ʻi he ngaahi tahifo ʻo Toʻá+ ki he hihifó, 3 mo e kau Kēnaní+ ʻi he hahaké mo e hihifó, ko e kau ʻĀmolí,+ ko e kau Hetí, ko e kau Pēlisí, ko e kau Siepusí ʻi he feituʻu moʻungaʻiá, pea mo e kau Heví+ ʻi he veʻe Moʻunga Heamoní+ ʻi he feituʻu ko Misipaá. 4 Ko ia naʻa nau haʻu mo ʻenau ngaahi kongakaú kotoa, ko ha fuʻu tokolahi naʻe hangē honau tokolahí ko e ʻoneʻone ʻi he matātahí, fakataha mo ha fanga hoosi tokolahi ʻaupito mo ha ngaahi saliote tau. 5 Naʻe loto-taha ʻa e ngaahi tuʻí ni kotoa ke nau fakatahataha, pea naʻa nau omi ʻo nau ʻapitanga fakataha ʻi he vai ʻo Melomí ke faitau mo ʻIsileli.

6 Ko ia naʻe folofola ʻa Sihova kia Siosiua: “ʻOua naʻá ke ilifia koeʻuhi ko kinautolu,+ he ʻi he taimi nai ko ení ʻapongipongi, te u tuku atu ai ʻa kinautolu kotoa ki ʻIsileli ke tāmateʻi. Kuo pau ke ke tuʻusi ʻa e uoua ʻi he vaʻe ʻo ʻenau fanga hōsí,+ pea kuo pau ke ke tutu ʻi he afí ʻa ʻenau ngaahi salioté.” 7 Ko Siosiua mo e kau tangata taú kotoa naʻa nau kamata ʻohofi fakafokifā leva kinautolu ʻi he veʻe vai ʻo Melomí. 8 Naʻe tuku kinautolu ʻe Sihova ki he nima ʻo ʻIsilelí,+ pea naʻa nau ikunaʻi kinautolu pea tuli kinautolu ʻo aʻu ki Fuʻu Saitoni+ mo Misilefoti-maimi+ pea mo e Teleʻa ʻo Misipaá ki he hahaké, pea naʻa nau taaʻi kinautolu kae ʻoua kuo ʻikai ha niʻihi ʻe hao.+ 9 Naʻe fai leva ʻe Siosiua kiate kinautolu ʻo hangē tofu pē ko e folofola ʻa Sihova kiate iá; naʻá ne tuʻusi ʻa e uoua ʻo e vaʻe ʻo ʻenau fanga hōsí pea tutu ʻenau ngaahi salioté ʻi he afí.+

10 ʻIkai ko ia pē, naʻe foki leva ʻa Siosiua ʻo ne hamu ʻa Hāsoa pea taaʻi ʻa hono tuʻí ʻaki ʻa e heletaá,+ he ko Hāsoa ko e ʻulu ia ki muʻa ʻo e ngaahi puleʻanga ko ení kotoa. 11 Naʻa nau taaʻi ʻa e tokotaha kotoa ʻi aí ʻaki ʻa e heletaá, ʻo tuku atu kinautolu ki he fakaʻauha.+ Naʻe ʻikai ha meʻa naʻe mānava ʻe toe.+ Naʻá ne tutu leva ʻa Hāsoa ʻi he afí. 12 Naʻe hamu ʻe Siosiua ʻa e ngaahi kolo kotoa ʻo e ngaahi tuʻí ni pea ikunaʻi ʻa honau ngaahi tuʻí kotoa ʻaki ʻa e heletaá.+ Naʻá ne tuku atu kinautolu ki he fakaʻauha,+ ʻo hangē tofu pē ko e tuʻutuʻuni ʻa Mōsese ko e sevāniti ʻa Sihová. 13 Kae kehe, naʻe ʻikai ke tutu ʻe ʻIsileli ha taha ʻo e ngaahi kolo naʻe tuʻu ʻi he ngaahi tafungofungá tuku kehe pē ʻa Hāsoa; ko e kolo pē ia ʻe taha naʻe tutu ʻe Siosiuá. 14 Ko e koloa vete kotoa ʻo e ngaahi koló ni pea mo e fanga manú, naʻe faʻao ia ʻe he kau ʻIsilelí maʻanautolu.+ Ka naʻa nau taaʻi ʻa e tangata kotoa pē ʻaki ʻa e heletaá kae ʻoua kuo nau fakaʻauha ʻosi ʻa e tokotaha taki taha.+ Naʻe ʻikai te nau tuku ai ke toe ha taha naʻe mānava.+ 15 Hangē tofu pē ko e tuʻutuʻuni ʻa Sihova kia Mōsese ko ʻene sevānití, naʻe pehē ʻa e tuʻutuʻuni ʻa Mōsese kia Siosiuá,+ pea naʻe pehē ʻa e meʻa naʻe fai ʻe Siosiuá. Naʻe ʻikai te ne tuku taʻefakahoko ha meʻa ʻe taha ʻi he meʻa kotoa naʻe tuʻutuʻuni ʻe Sihova kia Mōsesé.+

16 Naʻe ikunaʻi ʻe Siosiua ʻa e fonuá ni kotoa, mo e feituʻu moʻungaʻiá, mo e feituʻu Nīkepí+ kotoa, mo e vahefonua Kōsení kotoa, mo e Sefelaʻá,+ mo e ʻAlapá,+ mo e feituʻu moʻungaʻia ʻo ʻIsilelí pea mo e talalo ʻo e feituʻu moʻungaʻiá, 17 mei Moʻunga Halaki, ʻa ia ʻoku hanga atu ki Seiá, pea aʻu atu ai ki Pēali-kata+ ʻi he Teleʻa ʻo Lepanoní ʻi he veʻe Moʻunga Heamoní,+ pea naʻá ne hamu honau ngaahi tuʻí kotoa pea ikunaʻi kinautolu, ʻo tāmateʻi kinautolu. 18 Naʻe tau ʻa Siosiua mo e ngaahi tuʻí ni kotoa ʻi ha vahaʻa taimi lahi. 19 Naʻe ʻikai ha kolo ʻe taha naʻe alea melino mo e kau ʻIsilelí tuku kehe pē ʻa e kau Hevi naʻa nau nofoʻi ʻa Kipioné.+ Naʻa nau ikunaʻi ʻa e ngaahi feituʻu kehé kotoa ʻi he taú.+ 20 Ko Sihova naʻá ne tuku ke nau hoko ʻo loto-fefeká+ ʻo nau faitau ai ki ʻIsilelí, koeʻuhí ke ne tuku atu ai kinautolu ki he fakaʻauhá ʻo ʻikai fai ha meesi ki ai.+ Naʻe pau ke fakaʻauha ʻosi kinautolu, ʻo hangē tofu pē ko e tuʻutuʻuni ʻa Sihova kia Mōsesé.+

21 ʻI he taimi ko iá naʻe tafiʻi ʻe Siosiua ʻa e kau ʻĀnakí+ mei he feituʻu moʻungaʻiá, mei Hepeloni, Tepili, ʻĀnapi, mo e feituʻu moʻungaʻia kotoa ʻo Siutá pea mo e feituʻu moʻungaʻia kotoa ʻo ʻIsilelí. Naʻe tuku atu kinautolu mo honau ngaahi koló ʻe Siosiua ki he fakaʻauha.+ 22 Naʻe ʻikai ke toe ha kau ʻĀnaki ʻi he fonua ʻo e kau ʻIsilelí; ko Kesa+ pē, mo Kati,+ pea mo ʻAsitoti+ naʻa nau toe aí.+ 23 Ko ia naʻe puleʻi ʻe Siosiua ʻa e fonuá kotoa, ʻo hangē tofu pē ko e talaʻofa ʻa Sihova kia Mōsesé,+ pea naʻe ʻoange leva ia ʻe Siosiua ko ha tofiʻa ki ʻIsileli ʻo fakatatau ki honau ʻinasí ke vahevahe ia ki honau ngaahi matakalí.+ Pea naʻe nonga ʻa e fonuá mei he taú.+

12 Pea ko e ongo tuʻi eni ʻo e fonua ʻa ia naʻe ikunaʻi ʻe he kau ʻIsilelí, ʻa ia ko hona fonuá ē naʻa nau maʻu ʻi he tafaʻaki fakahahake ʻo Sioataní, mei he Teleʻa*+ ʻAlanoní ʻo aʻu ki Moʻunga Heamoni+ pea mo e ʻAlapá kotoa ʻa e tafaʻaki fakahahaké:+ 2 Ko Tuʻi Sīhoni+ ʻo e kau ʻĀmolí, ʻa ia naʻe nofo ʻi Hesiponi pea naʻe pule mei ʻAloeli,+ ʻa ia naʻe ʻi he veʻe Teleʻa* ʻAlanoní.+ Ko hono fonuá naʻe kamata mei he loto teleʻá. Naʻá ne puleʻi ʻa e vaeua ʻo Kiliati ʻo aʻu ki he Teleʻa* Siapokí, ʻa e kauʻāfonua ʻo e kau ʻĀmoní. 3 Naʻá ne pule foki ki he tafaʻaki fakahahake ʻo e ʻAlapá ʻo aʻu ki he Tahi Kineletí*+ pea aʻu ki he Tahi ʻo e ʻAlapá, ʻa e Tahi Māsimá,* ʻa hono tafaʻaki fakahahaké ʻo huʻu ki Pete-sisimoti, pea ki he tongá ʻi lalo ʻi he ngaahi tahifo ʻo Pisikaá.+

4 Pehē foki ki he feituʻu ʻo Tuʻi ʻOki+ ʻo Pēsaní, ʻa ia ko e taha ia ʻi he faʻahinga fakamuimui taha ʻo e kau Lifaimí+ pea naʻá ne nofo ʻi ʻAsiteloti mo ʻEtilei 5 peá ne pule ʻi Moʻunga Heamoni, ʻi Salika, pea ʻi Pēsani+ kotoa, ʻo aʻu ki he kauʻāfonua ʻo e kau Kēsulí mo e kau Māká,+ mo e vaeua ʻo Kiliati, ki he feituʻu ʻo Tuʻi Sīhoni ʻo Hesiponí.+

6 Ko Mōsese ko e sevāniti ʻa Sihová pea mo e kau ʻIsilelí naʻa nau ikunaʻi kinaua,+ ʻi he hili iá naʻe foaki ʻe Mōsese ko e sevāniti ʻa Sihová honau fonuá ko ha tofiʻa ki he haʻa Lūpení, mo e haʻa Katá, pea mo e vaeua ʻo e matakali ʻo Manasé.+

7 Ko e ngaahi tuʻi eni ʻo e fonua ʻa ia naʻe ikunaʻi ʻe Siosiua mo e kau ʻIsilelí ʻi he tafaʻaki fakahihifo ʻo Sioataní, mei Pēali-kata+ ʻi he Teleʻa ʻo Lepanoní+ ʻo aʻu ki Moʻunga Halaki,+ ʻa ia ʻoku hanga atu ki Seiá,+ pea ʻi he hili iá naʻe foaki ʻe Siosiua honau fonuá ki he ngaahi matakali ʻo ʻIsilelí ko hanau tofiʻa ʻo fakatatau ki honau ʻinasí,+ 8 ʻi he feituʻu moʻungaʻiá, ʻi he Sefelaʻá,* ʻi he ʻAlapá, ʻi he ngaahi tahifó, ʻi he toafá, pea ʻi he feituʻu Nīkepí+—ʻa e fonua ʻo e kau Hetí, ko e kau ʻĀmolí,+ ko e kau Kēnaní, ko e kau Pēlisí, ko e kau Heví, pea mo e kau Siepusí:+

13 Pea kuo motuʻa ʻa Siosiua pea aʻuaʻu hono taʻú.+ Ko ia naʻe folofola ʻa Sihova kiate ia: “Kuó ke motuʻa pea kuo aʻuaʻu ho taʻú; ka ko e konga lahi ʻo e fonuá ʻoku kei toe ke maʻu* mai ia. 2 Ko e fonua eni ʻoku toé:+ Ko e vahefonua kotoa ʻo e kau Filisitiá mo e kau Kēsulí+ kotoa 3 (mei he mangaʻi vai ʻo Nailá* ʻa ia ʻoku ʻi he hahake ʻo* ʻIsipité ʻo aʻu ki he kauʻāfonua ʻo ʻEkiloní ki he tokelaú, ʻa ia naʻe faʻa vakai ki ai ko e feituʻu ʻo e kau Kēnaní)+ ʻo kau ai ʻa e feituʻu ʻo e ngaahi ʻeiki ʻe toko nima ʻo e kau Filisitiá+—ʻa e kau Kesá, ko e kau ʻAsitotí,+ ko e kau ʻAsikeloní,+ ko e kau Katí,+ mo e kau ʻEkiloní;+ mo e feituʻu ʻo e kau ʻAví+ 4 ki he tongá; mo e fonua kotoa ʻo e kau Kēnaní; mo Meala, ʻa ia ʻoku ʻa e kau Saitoní,+ ʻo aʻu ki ʻĒfeki, pea aʻu ki he kauʻāfonua ʻo e kau ʻĀmolí; 5 mo e fonua ʻo e kau Kipelí+ mo e kotoa ʻo Lepanoní, ʻa e tafaʻaki fakahahaké, mei Pēali-kata ʻi he veʻe Moʻunga Heamoní ki Lipo-hēmati;*+ 6 ko e fonua ʻo e kau Saitoni+ kotoa ʻa ia ʻoku nau nofoʻi ʻa e feituʻu moʻungaʻiá, mei Lepanoni+ ki Misilefoti-maimi.+ Te u kapusi* kinautolu ʻi he ʻao ʻo e kau ʻIsilelí.+ Ko e meʻa pē ʻoku toé ke ke vaheʻi ia ki ʻIsileli ko hanau tofiʻa, ʻo hangē tofu pē ko ʻeku tuʻutuʻuni kiate koé.+ 7 Pea kuo pau ke ke vahe ʻa e fonuá ni ko ha tofiʻa ki he matakali ʻe hivá mo e vaeua ʻo e matakali ʻo Manasé.”+

8 Ko e vaeua ko ē ʻe taha ʻo e matakali ko iá, mo e haʻa Lūpení mo e haʻa Katá naʻa nau maʻu honau tofiʻa naʻe foaki ange ʻe Mōsese ʻi he tafaʻaki fakahahake ʻo Sioataní, ʻo hangē tofu pē ko hono foaki ange kiate kinautolu ʻe Mōsese ko e sevāniti ʻa Sihová:+ 9 Mei ʻAloeli,+ ʻa ia ʻoku ʻi he veʻe Teleʻa* ʻAlanoní,+ mo e kolo ʻa ia ʻoku ʻi he loto teleʻá, mo e fonua tokalelei mo māʻolunga* kotoa ʻo Metepá ʻo aʻu ki Tīponi; 10 mo e ngaahi kolo kotoa ʻo Tuʻi Sīhoni ʻo e kau ʻĀmolí, ʻa ia naʻe pule ʻi Hesiponí, ʻo aʻu ki he kauʻāfonua ʻo e kau ʻĀmoní;+ 11 pehē foki ki Kiliati mo e feituʻu ʻo e kau Kēsulí mo e kau Māká+ mo e kotoa ʻo e Moʻunga Heamoní pea mo Pēsani+ kotoa ʻo aʻu ki Salika;+ 12 ko e puleʻanga fakatuʻi kotoa ʻo ʻOki ʻi Pēsaní, ʻa ia naʻe pule ʻi ʻAsiteloti pea ʻi ʻEtileí. (Ko e taha ia ʻi he faʻahinga fakamuimui taha ʻo e kau Lifaimí.)+ Naʻe ikunaʻi kinautolu ʻe Mōsese pea kapusi+ kinautolu. 13 Ka ko e kau ʻIsilelí naʻe ʻikai te nau kapusi*+ ʻa e kau Kēsulí mo e kau Māká, he ʻoku nofo ʻa e kakai ʻo Kēsuli mo Māká ʻi he lotolotonga ʻo ʻIsilelí ʻo aʻu mai ki he ʻahó ni.

14 Ko e matakali pē ʻo e kau Līvaí naʻe ʻikai te ne foaki ki ai ha tofiʻá.+ Ko e ngaahi feilaulau ʻoku fai ʻaki ʻa e afi kia Sihova ko e ʻOtua ʻo ʻIsilelí ʻa honau tofiʻá,+ ʻo hangē tofu pē ko ʻene talaʻofa kiate kinautolú.+

15 Ki mui ai, naʻe foaki leva ʻe Mōsese ha tofiʻa ki he matakali ʻo e haʻa Lūpení ʻo fakatatau ki honau ngaahi fāmilí, 16 pea ko honau feituʻú naʻe mei ʻAloeli, ʻa ia ʻoku ʻi he veʻe Teleʻa* ʻAlanoní, mo e kolo ʻi he loto teleʻá, pea mo e fonua tokalelei mo māʻolungá kotoa ofi ki Metepa; 17 ko Hesiponi mo hono ngaahi kolo+ kotoa ʻi he fonua tokalelei mo māʻolungá, ko Tīponi, Pāmoti-pēali, Pete-pēali-meoni,+ 18 Siahasa,+ Ketemoti,+ Mefati,+ 19 Kiliataimi, Sipima,+ mo Sileti-sahali ʻi he moʻunga ʻo e teleʻá,* 20 Pete-peoli, ko e ngaahi tahifo ʻo Pisikaá,+ Pete-sisimoti,+ 21 mo e ngaahi kolo kotoa ʻo e fonua tokalelei mo māʻolungá, pea mo e puleʻanga fakatuʻi kotoa ʻo Tuʻi Sīhoni ʻo e kau ʻĀmolí, ʻa ia naʻe pule ʻi Hesiponí.+ Naʻe ikunaʻi ia+ ʻe Mōsese pea pehē mo e ngaahi ʻeiki ʻo Mitianí, ʻa ʻEvi, Lēkemi, Siuli, Hua, mo Lepa,+ ʻa e ngaahi tuʻi naʻe fakamoʻulaloa kia Sīhoní, ʻa ia naʻa nau nofo ʻi he fonuá. 22 Ko Pēlami+ ko e foha ʻo Pioá,+ ʻa e tokotaha vavaló, naʻe tāmateʻi fakataha ia mo e faʻahinga ʻa ia naʻe tāmateʻi ʻe he kau ʻIsilelí ʻaki ʻa e heletaá. 23 Ko e ngataʻanga ʻo e fonua ʻo e haʻa Lūpení ko Sioatani; pea ko e feituʻu ko ení ʻa e tofiʻa ʻo e haʻa Lūpení ʻo fakatatau ki honau ngaahi fāmilí, fakataha mo e ngaahi koló mo honau ngaahi nofoʻangá.

24 ʻIkai ko ia pē, naʻe foaki ʻe Mōsese ha tofiʻa ki he matakali ʻo Katá, ʻa e haʻa Katá ʻo fakatatau ki honau ngaahi fāmilí, 25 pea ko honau feituʻú naʻe kau ki ai ʻa Siasea+ mo e ngaahi kolo kotoa ʻo Kiliatí mo e vaeua ʻo e fonua ʻo e kau ʻĀmoní+ ʻo aʻu ki ʻAloeli, ʻa ia ʻoku hanga ki Lapá;+ 26 pea mei Hesiponi+ ki Lama-misipa mo Petonimi, pea mei Mehanemi+ ki he kauʻāfonua ʻo Tepilí; 27 pea ʻi he teleʻá,* ko Pete-hālami, Pete-nimila,+ Sūkote,+ mo Safoni, ʻa e toenga ʻo e puleʻanga fakatuʻi ʻo Tuʻi Sīhoni ʻo Hesiponí,+ pea ko Sioatani ʻa hono kauʻāfonuá, ʻa e tafaʻaki fakahahake ʻo Sioataní mei he ngataʻanga fakatonga ʻo e Tahi Kineletí.*+ 28 Ko e tofiʻa eni ʻo e haʻa Katá ʻo fakatatau ki honau ngaahi fāmilí, fakataha mo e ngaahi koló mo honau ngaahi nofoʻangá.

29 ʻIkai ko ia pē, naʻe foaki ʻe Mōsese ha tofiʻa ki he vaeua ʻo e matakali ʻo Manasé, ki he vaeua ʻo e matakali ʻo Manasé ʻo fakatatau ki honau ngaahi fāmilí.+ 30 Pea ko honau feituʻú naʻe lele ia mei Mehanemi+ ʻo ne maʻu ʻa Pēsani kotoa, ʻa e puleʻanga fakatuʻi kotoa ʻo Tuʻi ʻOki ʻo Pēsaní, mo e fanga kiʻi kolo iiki kotoa ʻo Saili+ ʻi Pēsaní, ko e kolo ʻe 60. 31 Pea ko e vaeua ʻo Kiliatí, pea mo ʻAsiteloti mo ʻEtilei,+ ʻa e ongo kolo ʻo e puleʻanga fakatuʻi ʻo ʻOki ʻi Pēsaní, naʻe foaki ia ki he ngaahi foha ʻo Mākili+ ko e foha ʻo Manasé, ʻa ia, ki he vaeua ʻo e ngaahi foha ʻo Mākilí ʻo fakatatau ki honau ngaahi fāmilí.

32 Ko e ngaahi tofiʻa eni naʻe foaki ʻe Mōsese kiate kinautolu ʻi he toafa ʻo Mōapé ʻi tuʻa Sioatani, ʻi he tafaʻaki fakahahake ʻo Sielikoó.+

33 Ka ki he matakali ʻo e kau Līvaí, naʻe ʻikai ke foaki ki ai ʻe Mōsese ha tofiʻa.+ Ko Sihova ko e ʻOtua ʻo ʻIsilelí ʻa honau tofiʻá, ʻo hangē tofu pē ko ʻene talaʻofa kiate kinautolú.+

14 Pea ko e tofiʻa eni naʻe maʻu ʻe he kau ʻIsilelí ʻi he fonua ko Kēnaní, ʻa ia naʻe foaki ange kiate kinautolu+ ʻe ʻEliesa ko e taulaʻeikí mo Siosiua ko e foha ʻo Nuní pea mo e ngaahi ʻulumotuʻa ʻo e ngaahi fale ʻo e ngaahi tamai ʻa e ngaahi matakali ʻo ʻIsilelí. 2 Ko honau tofiʻá naʻe fai ha lulu+ ki ai, ʻo hangē tofu pē ko e tuʻutuʻuni ʻa Sihova fakafou ʻia Mōsese ki he matakali ʻe hiva mo e kongá.+ 3 Naʻe ʻosi foaki ange ʻe Mōsese ia ki he matakali ʻe ua mo e konga ko eé ʻa honau tofiʻá ʻi he tafaʻaki ʻe taha* ʻo Sioataní,+ pea ki he kau Līvaí naʻe ʻikai te ne foaki ange hanau tofiʻa+ ʻi he lotolotonga ʻo e ngaahi matakali kehé. 4 Ko e hako ʻo Siosifá naʻe vakai ki ai ko e matakali ia ʻe ua,+ ko Manase mo ʻIfalemi;+ pea naʻe ʻikai te nau foaki ange ha ʻinasi ʻi he fonuá ki he kau Līvaí, tuku kehe pē ʻa e ngaahi kolo+ ke nau nofo aí, mo hono ngaahi kaikaiʻanga maʻa ʻenau fanga manú mo ha feituʻu ki heʻenau koloá.+ 5 Ko ia naʻe vahe ʻe he kau ʻIsilelí ʻa e fonuá ʻo hangē tofu pē ko e tuʻutuʻuni ʻa Sihova kia Mōsesé.

6 Naʻe fakaofiofi atu leva ʻa e kau tangata ʻo Siutá kia Siosiua ʻi Kilikali,+ pea ko Kēlepi+ ko e foha ʻo Sīfune ko e Kenisaí naʻá ne pehē ange kiate ia: “ʻOkú ke ʻiloʻi lelei ʻa e meʻa naʻe folofolaʻaki+ ʻe Sihova kia Mōsese ko e tangata ʻa e ʻOtua moʻoní+ ʻo fekauʻaki mo koe pea mo au ʻi Kētesi-pāneá.+ 7 Naʻá ku taʻu 40 ʻi he taimi naʻe fekauʻi atu ai au ʻe Mōsese ko e sevāniti ʻa Sihová mei Kētesi-pānea ke asiasi ʻa e fonuá,+ pea naʻá ku foki mai mo ha fakamatala totonu.*+ 8 Neongo ko hoku fanga tokoua naʻa mau ʻalú naʻa nau ʻai ke vaivai ʻa e loto ʻo e kakaí,* naʻá ku muimui ʻaufuatō*+ au kia Sihova ko hoku ʻOtuá. 9 Naʻe fai ʻe Mōsese ha fakapapau ʻi he ʻaho ko iá, ʻo ne pehē: ‘Ko e fonua naʻe tuʻu ai ho vaʻé ʻe hoko ia ko hao tofiʻa tuʻuloa mo ho ngaahi fohá, he kuó ke muimui ʻaufuatō+ kia Sihova ko hoku ʻOtuá.’ 10 Pea ʻi he hangē pē ko ʻene talaʻofá,+ kuo tauhi ʻe Sihova ʻeku moʻuí+ ʻi he taʻu eni ʻe 45 talu mei hono fai ʻe Sihova ʻa e talaʻofá ni kia Mōsese ʻi he taimi naʻe ʻaʻeva ai ʻa ʻIsileli ʻi he toafá;+ ʻoku ou kei ʻi heni he ʻahó ni, ko hoku taʻu 85 eni. 11 Pea ʻi he ʻahó ni ʻoku kei hangē pē hoku mālohí ko ia ʻi he ʻaho naʻe fekauʻi atu ai au ʻe Mōsesé. ʻOku kei tatau pē he taimí ni hoku iví mo e taimi ko iá, ki he taú pea mo e ngaahi ngāue kehé. 12 Ko ia ai, ke ke foaki mai moʻoku ʻa e feituʻu moʻungaʻia ko eni naʻe talaʻofaʻaki ʻe Sihova ʻi he ʻaho ko iá. Neongo naʻá ke fanongo ʻi he ʻaho ko iá naʻe ʻi ai ha kau ʻĀnaki+ fakataha mo ha ngaahi fuʻu kolo fakakolotau,+ ʻoku pau pē* ʻe kau ʻa Sihova mo au,+ pea te u kapusi* kinautolu, ʻo hangē tofu pē ko e talaʻofa+ ʻa Sihová.”

13 Ko ia naʻe tāpuakiʻi ia ʻe Siosiua peá ne ʻoange ʻa Hepeloni kia Kēlepi ko e foha ʻo Sīfuné ko hano tofiʻa.+ 14 Ko e ʻuhinga ia ʻoku hoko ai ʻa Hepeloni ko e tofiʻa ʻo Kēlepi ko e foha ʻo Sīfune ko e Kenisaí ʻo aʻu mai ki he ʻaho ní, he naʻá ne muimui ʻaufuatō+ kia Sihova ko e ʻOtua ʻo ʻIsilelí. 15 Ko e hingoa ki muʻa ʻo Hepeloní ko Kiliate-ʻaapa+ (ko ʻAapá naʻe hoko ko e tangata lahi ia ʻi he lotolotonga ʻo e kau ʻĀnakí). Pea naʻe nonga ʻa e fonuá mei he taú.+

15 Ko e fonua naʻe vahe*+ ki he matakali ʻo Siutá maʻa honau ngaahi fāmilí naʻe aʻu atu ia ki he kauʻāfonua ʻo ʻĪtomí,+ ki he toafa Siniá, ki he feituʻu Nīkepí ʻi hono ngataʻanga fakatongá. 2 Ko honau kauʻāfonua fakatongá naʻe lele ia mei he ngataʻanga ʻo e Tahi Māsimá,*+ mei he foʻi fanga ʻa ia ʻoku hanga ki he tafaʻaki fakatongá. 3 Pea naʻe lele fakatonga ia ki he tahake ʻo ʻAkelapimí,+ ʻo ʻalu atu ai ki Sinia, pea ʻalu hake mei he tongá ki Kētesi-pānea,+ pea ki Hesiloni, ʻo ʻalu hake ai ki ʻAtali, pea ʻalu takai hake ai ki Kalika. 4 Pea naʻe hoko atu ai ki ʻAsimona+ pea lele ai ki he Teleʻa* ʻo ʻIsipité,+ pea naʻe ngata ʻa e kauʻāfonuá ʻi he Tahí.* Ko honau kauʻāfonua fakatongá eni.

5 Ko e kauʻāfonua fakahahaké ko e Tahi Māsimá* ʻo aʻu ki he ngataʻanga ʻo Sioataní, pea ko e kauʻāfonua ʻi he tuliki fakatokelaú naʻe kamata ia mei he foʻi fanga ʻo e tahí, ʻi he ngataʻanga ʻo Sioataní.+ 6 Naʻe ʻalu hake ʻa e kauʻāfonuá ki Pete-hokela+ pea fou atu ai ʻi he tokelau ʻo Pete-ʻalapá,+ pea naʻe ʻalu hake ai ki he maka ʻo Pōhani+ ko e foha ʻo Lūpení. 7 Pea naʻe ʻalu hake ʻa e kauʻāfonuá ki Tepili ʻi he Teleʻa* ko ʻĀkolí+ pea afe fakatokelau ki Kilikali,+ ʻa ia ʻoku ʻi muʻa ʻi he tahake ʻo ʻAtumimá ʻa ē ʻoku ʻi he tafaʻaki fakatonga ʻo e teleʻá, pea naʻe hoko atu ʻa e kauʻāfonuá ki he vai ko ʻEni-semesí+ pea ngata ʻi ʻEni-lokeli.+ 8 Naʻe ʻalu hake ʻa e kauʻāfonuá ki he Teleʻa ʻo e Foha ʻo Hīnomí+ ki he tahifo ʻo e kau Siepusí+ ʻi he tongá, ʻa ia ko Selusalema+ ia, pea naʻe ʻalu hake ʻa e kauʻāfonuá ki he tumutumu ʻo e moʻunga ʻa ia ʻoku hanga atu ki he tafaʻaki fakahihifo ʻo e Teleʻa ʻo Hīnomí, pea ʻoku ʻi he ngataʻanga fakatokelau ʻo e Teleʻa* ʻo Lifaimí. 9 Pea naʻe lele ʻa e kauʻāfonuá mei he tumutumu ʻo e moʻungá ki he matavai ʻo e vai Nefitoá,+ pea lele ai ki he ngaahi kolo ʻi he veʻe Moʻunga ʻEfiloní; pea naʻe lele ʻa e kauʻāfonuá ki Paʻala, ʻa ia ko Kiliate-sialimi+ ia. 10 Naʻe ʻalu takai fakahihifo ʻa e kauʻāfonuá mei Paʻala ki Moʻunga Seia pea hoko atu ai ki he tahifo fakatokelau ʻo Moʻunga Sialimí, ʻa ia ko Kesaloni ia, pea naʻe ʻalu hifo ia ki Pete-semesi+ pea hoko atu ai ki Timinā.+ 11 Pea naʻe lele ʻa e kauʻāfonuá ki he tahifo fakatokelau ʻo ʻEkiloní,+ pea naʻe lele ʻa e kauʻāfonuá ki Sikeloni pea hoko atu ai ki Moʻunga Paʻala pea lele ai ki Siapinili, pea naʻe ngata ʻa e kauʻāfonuá ʻi he tahí.

12 Ko e kauʻāfonua fakahihifó ʻa e Tahi Lahí*+ mo hono matāfonuá. Ko e kauʻāfonua eni ʻo e hako ʻo Siutá, ʻa hono ngaahi tafaʻakí kotoa ʻo fakatatau ki honau ngaahi fāmilí.

13 Pea naʻá ne foaki kia Kēlepi+ ko e foha ʻo Sīfuné ha ʻinasi ʻi he lotolotonga ʻo e hako ʻo Siutá ʻi he tuʻutuʻuni ʻa Sihova kia Siosiuá, ʻa ia ko Kiliate-ʻaapa (ko ʻAapá ko e tamai ia ʻa ʻĀnakí), ʻa ia ko Hepeloni+ ia. 14 Ko ia naʻe kapusi mei ai ʻe Kēlepi ʻa e foha ʻe toko tolu ʻo ʻĀnakí:+ Ko Sēsai, ʻAhimani, pea mo Talimai,+ ʻa e fānau ʻa ʻĀnakí. 15 Naʻá ne ʻalu hake leva mei ai ʻo ne tauʻi ʻa e kakai ʻo Tepilí.+ (Ko e hingoa ki muʻa ʻo Tepilí ko Kiliate-sefa.) 16 Naʻe pehē leva ʻe Kēlepi: “Ko e tangata ko ē te ne taaʻi ʻa Kiliate-sefa pea hamu iá te u foaki ki ai ʻa hoku ʻofefine ko ʻĀkesá ke hoko ko hono uaifi.” 17 Pea ko ʻOtenili+ ko e foha ʻo Kēnasi+ ko e tokoua ʻo Kēlepí, naʻá ne hamu ia. Ko ia naʻá ne foaki ange leva kiate ia ʻa hono ʻofefine ko ʻĀkesá+ ke hoko ko hono uaifi. 18 Lolotonga ʻene ʻalu ki he ʻapi ʻo hono husepānití, naʻá ne fakaʻaiʻai hono husepānití ke ne kole ha konga ʻapi mei heʻene tamaí. Pea naʻe hifo leva ʻa ʻĀkesa mei heʻene ʻasí.* Naʻe ʻeke ange ʻe Kēlepi kiate ia: “Ko e hā ʻa e meʻa ʻokú ke fiemaʻú?”+ 19 Naʻá ne pehē ange: “Tuku mai muʻa kiate au ha tāpuaki, he kuó ke foaki mai kiate au ha konga kelekele ʻi he tongá;* foaki mai foki mo Kuloti-meimi.”* Ko ia naʻá ne foaki ange kiate ia ʻa e tafaʻaki ki ʻolunga ʻo Kulotí mo e tafaʻaki ki lalo ʻo Kulotí.

20 Ko e tofiʻa eni ʻo e matakali ʻo Siutá ʻo fakatatau ki honau ngaahi fāmilí.

21 Ko e ngaahi kolo ʻi he ngataʻanga ʻo e matakali ʻo Siutá ki he kauʻāfonua ʻo ʻĪtomí+ ʻi he tongá: Ko Kapesili, ʻEta, Siakuli, 22 Kina, Timona, ʻAtiata, 23 Kētesi, Hāsoa, ʻItinani, 24 Sifia, Telemi, Pealoti, 25 Hāsoa-hatata, mo Kilioti-hesiloni, ʻa ia ko Hāsoa ia, 26 ko ʻĀmami, Semā, Molata,+ 27 Hasa-kata, Hesimoni, Pete-paleti,+ 28 Hasa-suali, Pea-sipa,+ Pesiotia, 29 Paʻala, ʻImi, ʻEsemi, 30 ʻElitolati, Kesili, Hoama,+ 31 Sikilaki,+ Matimana, Sanisana, 32 Lepaoti, Silimi, ʻEni, mo Līmoni+—ko ha kolo fakakātoa ia ʻe 29 fakataha mo honau ngaahi nofoʻangá.

33 ʻI he Sefelaʻá,*+ naʻe ʻi ai ʻa ʻEsitaoli, Sola,+ ʻĀsina, 34 Sanoha, ʻEni-kanimi, Tapua, ʻEnami, 35 Siamuti, ʻAtulami,+ Soko, ʻĀseka,+ 36 Sālaimi,+ ʻAtitaimi, mo Ketela mo Ketelotaimi*—ko e kolo ia ʻe 14 mo honau ngaahi nofoʻangá.

37 Ko Sinani, Hetasa, Mikitali-kati, 38 Tilani, Misipā, Siokitili, 39 Lākisi,+ Posikata, ʻEkeloni, 40 Kaponi, Lamami, Kitelisi, 41 Keteloti, Pete-takoni, Naama, mo Maketa+—ko e kolo ia ʻe 16 mo honau ngaahi nofoʻangá.

42 Ko Līpina,+ ʻĒteli, ʻAsani,+ 43 ʻIfeta, ʻĀsina, Nesipi, 44 Kiʻila, ʻAkesipi, mo Mālesa—ko e kolo ia ʻe hiva mo honau ngaahi nofoʻangá.

45 Ko ʻEkiloni mo hono ngaahi kolo takatakaí* mo hono ngaahi nofoʻangá; 46 mei ʻEkiloni ʻo ʻalu fakahihifo, ʻa e feituʻu kotoa ʻa ia ʻoku ʻi he tafaʻaki ʻo ʻAsitotí mo honau ngaahi nofoʻangá.

47 Ko ʻAsitoti,+ ko hono ngaahi kolo takatakaí* mo hono ngaahi nofoʻangá; ko Kesa,+ ko hono ngaahi kolo takatakaí mo hono ngaahi nofoʻangá, ʻo ʻalu hifo ki he Teleʻa ʻo ʻIsipité, ko e Tahi Lahí,* mo e feituʻu ofi ki aí.+

48 Pea ʻi he feituʻu moʻungaʻiá, ko Samili, Satili,+ Soko, 49 Tana, Kiliate-sana, ʻa ia ko Tepili ia, 50 ʻĀnapi, ʻEsitemo,+ ʻĀnimi, 51 Kōseni,+ Holoni, mo Kilo+—ko e kolo ia ʻe 11 mo honau ngaahi nofoʻangá.

52 Ko ʻAlepea, Tuma, ʻEsani, 53 Sanimi, Pete-tapua, ʻĒfeka, 54 Humeta, Kiliate-ʻaapa, ʻa ia ko Hepeloni+ ia, mo Siolo—ko e kolo ia ʻe hiva mo honau ngaahi nofoʻangá.

55 Ko Māoni,+ Kāmeli, Sifia,+ Suta, 56 Sisilili, Sioketeami, Sanoha, 57 Kēnai, Kīpea, mo Timinā+—ko e kolo ia ʻe hongofulu mo honau ngaahi nofoʻangá.

58 Ko Halihuli, Pete-sua, Ketoa, 59 Mealati, Pete-ʻanoti, mo ʻEletekoni—ko e kolo ia ʻe ono mo honau ngaahi nofoʻangá.

60 Ko Kiliate-pēali, ʻa ia ko Kiliate-sialimi+ ia, mo Lapa—ko e kolo ia ʻe ua mo hona ngaahi nofoʻangá.

61 ʻI he toafá, ko Pete-ʻalapa,+ Mitini, Sekaka, 62 Nipisani, ko e Kolo Māsimá, mo ʻEni-keti+—ko e kolo ia ʻe ono mo honau ngaahi nofoʻangá.

63 Ka ki he kau Siepusí+ ʻa ia naʻa nau nofo ʻi Selusalemá,+ naʻe ʻikai lava ke kapusi+ kinautolu ʻe he kau tangata ʻo Siutá, ko ia ʻoku hokohoko atu ai ʻa e nofo ʻa e kau Siepusí fakataha mo e kakai ʻo Siutá ʻi Selusalema ʻo aʻu mai ki he ʻahó ni.

16 Pea ko e fonua naʻe fai ha lulu+ ki ai ʻo tō* ki he hako ʻo Siosifá+ naʻe mei Sioatani ia ofi ki Sielikō ʻo aʻu ki he vai ʻi he hahake ʻo Sielikoó, pea fou atu ʻi he toafa ʻoku ʻalu hake mei Sielikoó ki he feituʻu moʻungaʻia ʻo Pētelí.+ 2 Naʻe lele ia mei Pēteli ʻo Lusá pea faai atu ai pē ki he kauʻāfonua ʻo e haʻa ʻĀlekí ʻi ʻAtaloti, 3 pea naʻe ʻalu hifo fakahihifo leva ki he kauʻāfonua ʻo e kau Siafeletí ʻo aʻu ki he kauʻāfonua ʻo e tafaʻaki ki lalo ʻo Pete-holoní+ pea mo Kēseli,+ pea naʻe ngata ia ʻi he tahí.

4 Ko ia ko e hako ʻo Siosifá,+ ʻa Manase mo ʻIfalemi, naʻá na maʻu ʻa hona fonuá.+ 5 Ko e kauʻāfonua eni ʻo e hako ʻo ʻIfalemí fakatatau ki honau ngaahi fāmilí: Ko e kauʻāfonua ʻo honau tofiʻá ki he hahaké ko ʻAtaloti-ʻatali,+ ʻo aʻu ki he tafaʻaki ki ʻolunga ʻo Pete-holoní,+ 6 pea naʻe lele ʻa e kauʻāfonuá ʻo aʻu ki he tahí. Ko Mikimetata+ naʻe ʻi he tokelaú ia, pea naʻe ʻalu takai ʻa e kauʻāfonuá ki he hahaké ki Tānata-sailo, pea fou atu ʻi he hahaké ki Sanoa. 7 Naʻe ʻalu hifo leva mei Sanoa ki ʻAtaloti mo Nala pea aʻu atu ki Sielikō+ ʻo lele ai ki Sioatani. 8 Naʻe faai atu fakahihifo ʻa e kauʻāfonuá mei Tapua+ ki he Teleʻa* ʻo Kaná, pea naʻe ngata ia ʻi he tahí.+ Ko e tofiʻa eni ʻo e matakali ʻo ʻIfalemí fakatatau ki honau ngaahi fāmilí; 9 naʻe maʻu foki ʻe he hako ʻo ʻIfalemí ha ngaahi kolo mavahe ʻi he lotolotonga ʻo e tofiʻa ʻo Manasé,+ ʻa e ngaahi koló kotoa mo honau ngaahi nofoʻangá.

10 Ka naʻe ʻikai te nau kapusi ʻa e kau Kēnani ʻa ia naʻa nau nofo ʻi Kēselí,+ pea ʻoku hokohoko atu ʻa e nofo ʻa e kau Kēnaní ʻi he lotolotonga ʻo ʻIfalemí ʻo aʻu mai ki he ʻahó ni+ pea naʻe fakamoʻulaloaʻi kinautolu ki he ngāue fakapōpula.+

17 Naʻe tō leva ʻa e lulú+ ki he matakali ʻo Manasé,+ he ko e ʻuluaki foha+ ia ʻo Siosifá. Koeʻuhí ko e ʻuluaki foha ʻo Manasé ʻa Mākili,+ ko e tamai ʻa Kiliatí, ko ha tangata tau ia, naʻá ne maʻu ai ʻa Kiliati mo Pēsani.+ 2 Pea naʻe tō ʻa e lulú ki he toenga ʻo e hako ʻo Manasé ʻo fakatatau ki honau ngaahi fāmilí, ki he ngaahi foha ʻo ʻApiesá,+ mo e ngaahi foha ʻo Heleká, mo e ngaahi foha ʻo ʻAselielí, mo e ngaahi foha ʻo Sīkemí, mo e ngaahi foha ʻo Hēfelí, pea mo e ngaahi foha ʻo Semitá. Ko e hako eni ʻo Manase ko e foha ʻo Siosifá, ʻa e kakai tangatá ʻo fakatatau ki honau ngaahi fāmilí.+ 3 Ka ko Silofehati+ ko e foha ʻo Hēfeli, ko e foha ʻo Kiliati, ko e foha ʻo Mākili, ko e foha ʻo Manasé, naʻe ʻikai hano ngaahi foha, ko e ngaahi ʻofefine pē, pea ko e hingoa eni ʻo hono ngaahi ʻofefiné: Ko Mahala, Noa, Hokela, Milika, pea mo Tilisa. 4 Ko ia naʻa nau hā ʻi he ʻao ʻo ʻEliesa+ ko e taulaʻeikí, mo Siosiua ko e foha ʻo Nuní, pea mo e ngaahi ʻeikí, ʻo nau pehē: “Naʻe tuʻutuʻuni ʻa Sihova kia Mōsese ke foaki mai hamau tofiʻa ʻi he lotolotonga ʻo e kakai tangata+ ʻi homau matakalí.” Ko ia ʻi he tuʻutuʻuni ʻa Sihová, naʻá ne foaki ange ai kiate kinautolu ha tofiʻa ʻi he lotolotonga ʻo e kakai tangata ʻi he matakali ʻo ʻenau tamaí.+

5 Naʻe ʻi ai foki mo e tofiʻa ʻe hongofulu naʻe tō kia Manase tuku kehe ʻa e fonua ko Kiliati mo Pēsaní, ʻa ia naʻe ʻi he tafaʻaki ʻe taha* ʻo Sioataní,+ 6 he ko e kakai fefine ʻo e matakali ʻo Manasé naʻa nau maʻu tofiʻa fakataha mo hono ngaahi fohá, pea naʻe hoko ʻa e fonua ko Kiliatí ko e tofiʻa ia ʻo e toenga ʻo e hako ʻo Manasé.

7 Pea ko e kauʻāfonua ʻo Manasé naʻe mei he kauʻāfonua ʻo ʻĀselí ki Mikimetata,+ ʻa ia ʻoku hanga ki Sīkemí,+ pea naʻe faai atu ai pē ʻa e kauʻāfonuá ki he tongá* ki he fonua ʻo e kakai ʻo ʻEni-Tapuá. 8 Ko e fonua ko Tapuá+ naʻe maʻu ia ʻe Manase, ka ko e kolo ʻo Tapua ʻi he kauʻāfonua ʻo Manasé naʻe maʻu ia ʻe he hako ʻo ʻIfalemí. 9 Pea naʻe ʻalu hifo ʻa e kauʻāfonuá ki he Teleʻa* ʻo Kaná, ʻa ia ʻoku ʻi he fakatonga ʻo e teleʻá. Naʻe ʻi ai ʻa e ngaahi kolo ʻo ʻIfalemi ʻi he lotolotonga ʻo e ngaahi kolo ʻo Manasé,+ pea ko e kauʻāfonua ʻo Manasé naʻe ʻi he tokelau ʻo e teleʻá, pea naʻe ngata ia ʻi he tahí.+ 10 Ko e tafaʻaki fakatongá naʻe maʻu ia ʻe ʻIfalemi pea ko e tafaʻaki fakatokelaú naʻe maʻu ia ʻe Manase, pea ko e tahí ʻa hono kauʻāfonuá,+ pea ʻi he tokelaú naʻa nau* aʻu ki he vahefonua ʻo ʻĀselí, pea ʻi he hahaké ki he vahefonua ʻo ʻĪsaká.

11 ʻI he ngaahi feituʻu ʻo ʻĪsaka mo ʻĀselí, naʻe foaki ai kia Manase ʻa Pete-seani mo hono ngaahi kolo takatakaí,* mo ʻIpileami+ mo hono ngaahi kolo takatakaí, ko e kakai ʻo Toʻá+ mo hono ngaahi kolo takatakaí, ko e kakai ʻo ʻEni-toá+ mo hono ngaahi kolo takatakaí, ko e kakai ʻo Tanaká+ mo hono ngaahi kolo takatakaí, pea mo e kakai ʻo Mekitó mo hono ngaahi kolo takatakaí, ʻa e tolu ʻi he ngaahi feituʻu māʻolungá.

12 Ka ko e hako ʻo Manasé naʻe ʻikai lava ke nau maʻu ʻa e ngaahi kolo ko iá; naʻe tuʻukāivi ʻa e kau Kēnaní ke nau nofo ai pē ʻi he fonuá ni.+ 13 ʻI he hoko ʻo mālohi ʻa e kau ʻIsilelí, naʻa nau fakamoʻulaloaʻi ai ʻa e kau Kēnaní ki he ngāue fakapōpula,+ ka naʻe ʻikai te nau kapusi* ʻosi kinautolu.+

14 Naʻe pehē ange ʻe he hako ʻo Siosifá kia Siosiua: “Ko e hā kuó ke foaki mai ai kiate kimautolu* ko ha tofiʻa ha konga pē ʻe taha naʻe vaheʻi ʻi he lulú+ pea mo ha ʻinasi pē ʻe tahá? Ko ha kakai tokolahi kimautolu, he kuo tāpuakiʻi kimautolu ʻe Sihova ʻo aʻu mai ki he taimí ni.”+ 15 Naʻe tali ange ʻe Siosiua kiate kinautolu: “Kapau ko ha fuʻu kakai tokolahi koe, ʻalu hake ki he vaotaá ʻo fakaʻataʻatā ai ha feituʻu moʻou ʻi he fonua ʻo e kau Pēlisí+ mo e kau Lifaimí,+ he ko e feituʻu moʻungaʻia ʻo ʻIfalemí+ ʻoku fuʻu ʻefiʻefi ia kiate koe.” 16 Naʻe pehē ange leva ʻe he hako ʻo Siosifá: “ʻOku ʻikai feʻunga ʻa e feituʻu moʻungaʻiá kiate kimautolu, pea ko e kau Kēnani kotoa ʻoku nau nofo ʻi he fonua ʻo e teleʻá* ʻoku ʻi ai ʻenau ngaahi saliote tau+ mataʻi-hele ukamea,* fakatouʻosi ʻa e faʻahinga ʻi Pete-seaní+ mo hono ngaahi kolo takatakaí* pea mo e faʻahinga ko ia ʻi he Teleʻa* ʻo Sisililí.”+ 17 Ko ia ko e meʻa eni naʻe leaʻaki ʻe Siosiua ki he fale ʻo Siosifá, kia ʻIfalemi mo Manase: “Ko ha kakai tokolahi koe, pea ʻokú ke mālohi lahi. ʻE ʻikai ke ke maʻu ʻa e tofiʻa pē ʻe taha,+ 18 ka te ke maʻu+ foki mo e feituʻu moʻungaʻiá. Neongo ko ha vaotā ia, te ke fakaʻataʻatā ia, pea ʻe hoko ia ko e ngataʻanga ʻo ho feituʻú. He te ke kapusi ʻa e kau Kēnaní, neongo ʻoku nau mālohi pea ʻi ai mo ʻenau ngaahi saliote tau mataʻi-hele ukamea.”*+

18 Naʻe fakatahataha leva ʻa e fuʻu fakataha kotoa ʻo e kau ʻIsilelí ʻi Sailo,+ pea naʻa nau fokotuʻu ai ʻa e tēniti feʻiloakiʻangá,+ he naʻe fakavaivaiʻi ʻa e fonuá he taimi ko ení ʻi honau ʻaó.+ 2 Ka naʻe kei toe ʻa e matakali ʻe fitu ʻo e kau ʻIsilelí ʻa ia naʻe teʻeki ai ke vahe honau tofiʻá. 3 Ko ia naʻe pehē ange ai ʻe Siosiua ki he kau ʻIsilelí: “Ko e hā hono fuoloa hoʻomou tautoloi ʻo ʻikai te mou ʻalu atu ʻo maʻu ʻa e fonua ʻa ia kuo foaki atu kiate kimoutolu ʻe Sihova ko e ʻOtua ʻo hoʻomou fanga kuí?+ 4 ʻOmai kiate au ha kau tangata ʻe toko tolu mei he matakali taki taha ke u fekauʻi atu; te nau ō atu pea ʻalu holo ʻi he fonuá kotoa ʻo saveaʻi mo hiki ha fakamatala ki ai ʻo fakatatau ki honau tofiʻá. Pea te nau toki foki mai leva kiate au. 5 Kuo pau ke nau vahe ia ki he ʻinasi ʻe fitu+ ʻi honau lotolotongá. ʻE nofo ai pē ʻa Siuta ʻi hono feituʻú ʻi he tongá,+ pea ʻe nofo ai pē ʻa e fale ʻo Siosifá ʻi honau feituʻú ʻi he tokelaú.+ 6 Ka kiate kimoutolu, saveaʻi ʻa e fonuá mo hiki ha fakamatala ki ai ʻo vahe ki he ʻinasi ʻe fitu, pea ʻomai ia ki heni kiate au, pea te u fai ha lulu+ ki ai maʻamoutolu ʻi heni ʻi he ʻao ʻo Sihova ko hotau ʻOtuá. 7 Ka ko e kau Līvaí ʻe ‘ikai foaki ange hanau ʻinasi ʻi homou lotolotongá,+ koeʻuhí ko honau tofiʻá+ ʻa e ngāue fakataulaʻeiki kia Sihová; pea ko Kata, Lūpeni, mo e vaeua ʻo e matakali ʻo Manasé+ kuo nau ʻosi maʻu honau tofiʻa ʻa ia naʻe foaki ange ʻe Mōsese ko e sevāniti ʻa Sihová ʻi he tafaʻaki fakahahake ʻo Sioataní.”

8 Naʻe teuteu ʻa e kau tangatá ke nau ʻalu, pea naʻe tuʻutuʻuni ʻa Siosiua ki he faʻahinga ko ia te nau saveaʻi mo hiki ha fakamatala ki he fonuá: “Mou ō ʻo ʻalu holo he fonuá kotoa pea saveaʻi mo hiki ha fakamatala ki ai pea foki mai kiate au, pea te u fai ha lulu ki ai maʻamoutolu ʻi heni ʻi he ʻao ʻo Sihová ʻi Sailo.”+ 9 Ko ia naʻe ʻalu atu ʻa e kau tangatá ʻo nau fāifononga ʻi he fonuá kotoa pea saveaʻi ia ʻo vahe ki he konga ʻe fitu ʻo fakafoʻikolo, pea lēkooti ia ʻi ha tohi. ʻI he hili iá, naʻa nau foki kia Siosiua ki he ʻapitanga ʻi Sailó. 10 Pea naʻe fai leva ʻe Siosiua ha lulu ki ai maʻanautolu ʻi Sailo ʻi he ʻao ʻo Sihová.+ Naʻe vahe ai ʻe Siosiua ʻa e fonuá ki he kau ʻIsilelí ʻo fakatatau ki honau ngaahi ʻinasí.+

11 Ko e lulú naʻe ʻalu ia ki he matakali ʻo Penisimaní ʻo fakatatau ki honau ngaahi fāmilí, pea ko honau feituʻu naʻe vaheʻi mai ʻi he lulú naʻe ʻi he vahaʻa ia ʻo e kakai ʻo Siutá+ mo e hako ʻo Siosifá.+ 12 ʻI he tafaʻaki tokelaú, naʻe kamata honau kauʻāfonuá ʻi Sioatani, pea naʻe ʻalu hake ʻa e kauʻāfonuá ki he tahake ʻo Sielikoó+ ʻi he tokelaú pea ʻalu hake fakahihifo ʻi he moʻungá, ʻo lele ai ki he toafa ofi ki Pete-ʻavení.+ 13 Pea naʻe faai atu ʻa e kauʻāfonuá mei ai ki Lusa, ʻi he tahifo fakatonga ʻo Lusá, ʻa ia ko Pēteli+ ia; naʻe ʻalu hifo ʻa e kauʻāfonuá ki ʻAtaloti-ʻatali+ ʻi he moʻunga ʻa ia ʻoku ʻi he fakatonga ʻo e tafaʻaki ki lalo ʻo Pete-holoní.+ 14 Pea naʻe lele ʻa e kauʻāfonuá ʻi he tafaʻaki fakahihifó pea ʻalu takai ki he tongá mei he moʻunga ʻoku hanga atu ki he tafaʻaki fakatonga ʻo Pete-holoní; naʻe ngata ia ʻi Kiliate-pēali, ʻa ia ko Kiliate-sialimi+ ia, ko ha kolo ʻo Siuta. Ko e tafaʻaki fakahihifó eni.

15 Ko e tafaʻaki fakatongá naʻe mei he ngataʻanga ia ʻo Kiliate-sialimí, pea naʻe lele fakahihifo ʻa e kauʻāfonuá; naʻe ʻalu atu ai ki he matavai ʻo e vai Nefitoá.+ 16 Naʻe ʻalu hifo ʻa e kauʻāfonuá ki he ngataʻanga ʻo e moʻunga ʻoku hanga ki he Teleʻa ʻo e Foha ʻo Hīnomí,+ ʻa ia ʻoku ʻi he tafaʻaki fakatokelau ʻo e Teleʻa* ʻo Lifaimí,+ pea naʻe ʻalu hifo ai ki he Teleʻa ʻo Hīnomí, ki he tahifo ʻo e tafaʻaki fakatonga ʻo e kau Siepusí,+ pea ʻalu hifo ai ki ʻEni-lokeli.+ 17 Pea naʻe lele fakatokelau ia ʻo lele ai pē ki ʻEni-semesi pea ʻalu atu leva mei ai ki Keliloti, ʻa ia ʻoku ʻi muʻa ʻi he tahake ʻo ʻAtumimá,+ pea naʻe ʻalu hifo ai ki he maka+ ʻo Pōhani+ ko e foha ʻo Lūpení. 18 Pea naʻe faai atu ai ki he tahifo fakatokelau ʻi muʻa ʻi he ʻAlapá pea ʻalu hifo ai pē ki he ʻAlapá. 19 Pea naʻe faai atu ai ʻa e kauʻāfonuá ki he tahifo fakatokelau ʻo Pete-hokelá,+ pea ngata ʻa e kauʻāfonuá ʻi he foʻi fanga ʻi he tokelau ʻo e Tahi Māsimá*+ ʻi he ngataʻanga fakatonga ʻo Sioataní. Ko e kauʻāfonua fakatongá eni. 20 Pea naʻe hoko ʻa Sioatani ko hono kauʻāfonua ia ʻi he tafaʻaki fakahahaké. Ko e tofiʻa eni ʻo e hako ʻo Penisimaní ʻo fakatatau ki honau ngaahi fāmilí, pea fakatatau ki hono ngaahi kauʻāfonuá ʻi he ngaahi tafaʻakí kotoa.

21 Pea ko e ngaahi kolo ʻo e matakali ʻo Penisimaní ʻo fakatatau ki honau ngaahi fāmilí: Ko Sielikō, Pete-hokela, ʻEmeki-kesisi, 22 Pete-ʻalapa,+ Simalaimi, Pēteli,+ 23 ʻAvi, Palā, ʻŌfila, 24 Kefale-ʻāmoni, ʻŌfeni, mo Kepā+—ko e kolo ia ʻe 12 mo honau ngaahi nofoʻangá.

25 Ko Kipione,+ Lama, Pieloti, 26 Misipā, Kefila, Mosia, 27 Lēkemi, ʻIlipili, Talala, 28 Selaha,+ Hā-ʻelefi, Siepusi, ʻa ia ko Selusalema+ ia, Kīpea,+ pea mo Kiliate—ko e kolo ia ʻe 14 mo honau ngaahi nofoʻangá.

Ko e tofiʻa eni ʻo e hako ʻo Penisimaní ʻo fakatatau ki honau ngaahi fāmilí.

19 Ko e lulu leva hono uá+ naʻe ʻalu ia kia Simione, ki he matakali ʻo Simioné+ ʻo fakatatau ki honau ngaahi fāmilí. Pea ko honau tofiʻá naʻe ʻi he tofiʻa ia ʻo Siutá.+ 2 Ko honau tofiʻá ko Pea-sipa+ mo Sipa, Molata,+ 3 Hasa-suali,+ Pala, ʻEsemi,+ 4 ʻElitolati,+ Petuli, Hoama, 5 Sikilaki,+ Pete-makapoti, Hasa-susa, 6 Pete-lepaoti,+ pea mo Saluheni—ko e kolo ia ʻe 13 mo honau ngaahi nofoʻangá; 7 ko ʻEni, Līmoni, ʻĒteli, pea mo ʻAsani+—ko e kolo ia ʻe fā mo honau ngaahi nofoʻangá; 8 mo e ngaahi nofoʻanga kotoa naʻe takatakai ʻi he ngaahi kolo ko ení ʻo aʻu ki Pealati-pea, ʻa ia ko Lama ia ʻi he tongá. Ko e tofiʻa eni ʻo e matakali ʻo Simioné ʻo fakatatau ki honau ngaahi fāmilí. 9 Ko e tofiʻa ʻo e hako ʻo Simioné naʻe toʻo ia mei he tofiʻa ʻo Siutá, koeʻuhi ko e ʻinasi ʻo Siutá naʻe fuʻu lahi ia kiate kinautolu. Ko ia ko e hako ʻo Simioné naʻa nau maʻu ha kelekele mei honau tofiʻá.+

10 Ko hono hokó, ko e lulu hono tolú+ naʻe ʻalu ia ki he hako ʻo Sepuloní+ ʻo fakatatau ki honau ngaahi fāmilí, pea ko e kauʻāfonua ʻo honau tofiʻá naʻe ʻalu ia ʻo aʻu ki Saliti. 11 Ko honau kauʻāfonuá naʻe ʻalu hake fakahihifo ia ki Malela ʻo aʻu ki Tapeseti pea hoko atu ai ki he teleʻa* ʻi muʻa ʻi Siokenamí. 12 Pea naʻe ʻalu fakahahake ia mei Saliti ki he hopoʻanga laʻaá, ki he kauʻāfonua ʻo Kisiloti-tepoá ʻo ʻalu ai ki Tapelati+ pea ʻalu hake leva ai ki Safia. 13 Pea mei ai naʻe faai fakahahake atu ai pē ki he hopoʻanga laʻaá ki Kati-hefeli,+ ki ʻEti-kasini, ʻo ʻalu atu ai ki Līmoni pea lele ai ki Nea. 14 Pea naʻe ʻalu takai ʻi ai ʻa e kauʻāfonuá ʻi he tokelaú ki Henatoni, pea naʻe ngata ia ʻi he Teleʻa ko ʻIfita-elí, 15 mo Katati, Nahalali, Similoni,+ ʻĪtala, mo Pētelihema+—ko e kolo ia ʻe 12 mo honau ngaahi nofoʻangá. 16 Ko e tofiʻa eni ʻo e hako ʻo Sepuloní ʻo fakatatau ki honau ngaahi fāmilí.+ Ko e ngaahi koló ia mo honau ngaahi nofoʻangá.

17 Ko e lulu hono faá+ naʻe ʻalu ia kia ʻĪsaka,+ ki he hako ʻo ʻĪsaká ʻo fakatatau ki honau ngaahi fāmilí. 18 Pea ko honau kauʻāfonuá naʻe ʻalu ia ki Sisilili,+ Kesuloti, Sūnemi,+ 19 Hafalaimi, Sioni, ʻAnahalati, 20 Lapiti, Kisioni, ʻEpesi, 21 Lemeti, ʻEni-kanimi,+ ʻEni-hata, pea mo Pete-pasesi. 22 Pea naʻe aʻu ʻa e kauʻāfonuá ki Tēpoa+ mo Sahasuma mo Pete-semesi, pea naʻe ngata ʻa honau kauʻāfonuá mei Sioatani—ko e kolo ia ʻe 16 mo honau ngaahi nofoʻangá. 23 Ko e tofiʻa ia ʻo e matakali ʻo ʻĪsaká ʻo fakatatau ki honau ngaahi fāmilí,+ mo e ngaahi koló mo honau ngaahi nofoʻangá.

24 Ko e lulu leva hono nimá+ naʻe ʻalu ia ki he matakali ʻo ʻĀselí+ ʻo fakatatau ki honau ngaahi fāmilí. 25 Pea ko honau kauʻāfonuá ko Helekati,+ Hali, Peteni, ʻAkisafi, 26 ʻAlameleki, ʻĀmati, pea mo Misali. Naʻe aʻu fakahihifo ia ki Kāmeli,+ pea ki Sehoa-lipinati, 27 pea naʻe foki ia ki he hahaké ki Pete-takoni pea aʻu ai ki Sepuloni mo e tafaʻaki fakatokelau ʻo e Teleʻa ko ʻIfita-elí, ki Pete-ʻemeki mo Neieli, pea naʻe lele ia ki Kapuli ʻi he toʻohemá, 28 pea ki ʻEpeloni, Lehopi, Hāmoni, mo Kana ʻo aʻu ki Fuʻu Saitoni.+ 29 Pea naʻe foki ʻa e kauʻāfonuá ki Lama pea aʻu ai ki he kolo fakakolotau ko Tāiá.+ Naʻe foki leva ʻa e kauʻāfonuá ki Hosa, pea naʻe ngata ia ʻi he tahí ʻi he vahefonua ʻo ʻAkesipi, 30 ʻUma, ʻĒfeki,+ pea mo Pete-lehopí+—ko e kolo ia ʻe 22 mo honau ngaahi nofoʻangá. 31 Ko e tofiʻa eni ʻo e matakali ʻo ʻĀselí ʻo fakatatau ki honau ngaahi fāmilí.+ Ko e ngaahi koló ia mo honau ngaahi nofoʻangá.

32 Ko e lulu hono onó+ naʻe ʻalu ia ki he hako ʻo Nafitalaí, ki he hako ʻo Nafitalaí ʻo fakatatau ki honau ngaahi fāmilí. 33 Ko honau kauʻāfonuá naʻe mei Hēlefi, mei he fuʻu ʻakau ʻi Sananimí,+ mo ʻAtami-nekepi mo Siapinili ʻo aʻu ki Lakumi; pea naʻe ngata ia ʻi Sioatani. 34 Naʻe foki fakahihifo ʻa e kauʻāfonuá ki ʻAsenoti-tepoa pea lele mei ai ki Hūkoki ʻo aʻu ki Sepuloni ʻi he tongá pea ki ʻĀseli ʻi he hihifó pea ki Siuta ʻi Sioatani ki he hahaké. 35 Pea ko e ngaahi kolo fakakolotaú ko Sitime, Sea, Hamati,+ Lakati, Kineleti, 36 ʻAtama, Lama, Hāsoa,+ 37 Kētesi,+ ʻEtilei, ʻEni-hasoa, 38 ʻIloni, Mikitali-ela, Hōlemi, Pete-ʻanati, pea mo Pete-semesi+—ko e kolo ia ʻe 19 mo honau ngaahi nofoʻangá. 39 Ko e tofiʻa ia ʻo e matakali ʻo Nafitalaí ʻo fakatatau ki honau ngaahi fāmilí,+ mo e ngaahi koló mo honau ngaahi nofoʻangá.

40 Ko e lulu hono fitú+ naʻe ʻalu ia ki he matakali ʻo Taní+ ʻo fakatatau ki honau ngaahi fāmilí. 41 Pea ko e kauʻāfonua ʻo honau tofiʻá ko Sola,+ ʻEsitaoli, ʻIli-semesi, 42 Salapini,+ ʻAsaloni,+ ʻĪtela, 43 ʻĒloni, Timinā,+ ʻEkiloni,+ 44 ʻEliteke, Kipetoni,+ Pealati, 45 Sihuti, Pene-pelaka, Kati-limoni,+ 46 Mē-siakoni, pea mo Lakoni, ʻo hanga atu ʻa e kauʻāfonuá ki Siopa.+ 47 Ka ko e feituʻu ʻo Taní naʻe fuʻu ʻefiʻefi ia kiate kinautolu.+ Ko ia naʻa nau ʻalu hake ai ʻo tauʻi ʻa Lesemi+ pea hamu ia ʻo taaʻi ʻaki ia ʻa e heletaá. Naʻa nau maʻu leva ia ʻo nofo ai, pea naʻa nau liliu ʻa e hingoa Lesemí ko Tani, ʻo tauhingoa kia Tani ko ʻenau kuí.+ 48 Ko e tofiʻa eni ʻo e matakali ʻo Taní ʻo fakatatau ki honau ngaahi fāmilí. Ko e ngaahi koló ia mo honau ngaahi nofoʻangá.

49 Ko ia naʻe ʻosi ai ʻenau vahevahe tofiʻa ʻa e fonuá ʻo fakatatau ki hono ngaahi feituʻú. Naʻe foaki leva ʻe he kau ʻIsilelí kia Siosiua ko e foha ʻo Nuní ha tofiʻa ʻi honau lotolotongá. 50 ʻI he tuʻutuʻuni ʻa Sihová naʻa nau foaki ange ai kiate ia ʻa e kolo naʻá ne kolé, ʻa Timinati-sela,+ ʻi he feituʻu moʻungaʻia ʻo ʻIfalemí, pea naʻá ne langa ʻa e koló ʻo nofo ai.

51 Ko e ngaahi tofiʻa eni naʻe vahe ʻe ʻEliesa ko e taulaʻeikí, Siosiua ko e foha ʻo Nuní, mo e ngaahi ʻulumotuʻa ʻo e ngaahi fale ʻo e ngaahi tamai ʻa e ngaahi matakali ʻo ʻIsilelí+ ʻi hono fai ha lulu ki ai ʻi Sailo+ ʻi he ʻao ʻo Sihová, ʻi he hūʻanga ʻo e tēniti feʻiloakiʻangá.+ Ko ia naʻe ʻosi ai ʻenau vahe ʻa e fonuá.

20 Pea naʻe folofola ʻa Sihova kia Siosiua: 2 “Tala ki he kau ʻIsilelí, ‘Fili maʻamoutolu ʻa e ngaahi kolo hūfanga+ ʻa ia naʻá ku leaʻaki kiate kimoutolu fakafou ʻia Mōsesé, 3 koeʻuhí ke hola ki ai ʻa e tokotaha tāmate tangata ʻa ia te ne tāmateʻi fāinoa pe ʻi he taʻeʻilo ha taha. Pea te nau hoko ko ha hūfangaʻanga maʻamoutolu mei he tokotaha faisāuni ʻo e totó.+ 4 Kuo pau ke ne hola ki ha taha ʻo e ngaahi koló ni+ pea tuʻu ʻi he hūʻanga ʻo e matapā ʻo e koló+ pea fakamatalaʻi ʻa hono tuʻungá ke fanongo ki ai ʻa e kau mātuʻa ʻo e kolo ko iá. Pea kuo pau leva ke nau tali ia ki he koló pea foaki kiate ia ha nofoʻanga pea te ne nofo mo kinautolu. 5 Kapau ʻe tulimui kiate ia ʻa e tokotaha faisāuni ʻo e totó, ʻe ʻikai te nau tuku atu ʻa e tokotaha tāmate tangatá ki hono nimá, he naʻá ne tāmateʻi ʻi he taʻeʻilo ʻa e tangata ʻe tahá pea naʻe ʻikai te ne fehiʻa ʻiate ia+ ki muʻa. 6 Kuo pau ke ne nofo ʻi he kolo ko iá kae ʻoua ke ne tuʻu ʻi he ʻao ʻo e fuʻu fakatahá+ ke fakamāuʻi pea te ne nofo ai ʻo aʻu ki he mate ʻa e taulaʻeiki lahi+ ʻoku ngāue fakataulaʻeiki ʻi he taimi ko iá. Pea ʻe toki foki leva ʻa e tokotaha tāmate tangatá ki he kolo naʻá ne hola mei aí, pea ʻe lava ke ne hū ki hono koló pea ki hono falé.’”+

7 Ko ia naʻa nau fakatoputapuʻi* ʻa Kētesi+ ʻi Kālelí ʻi he feituʻu moʻungaʻia ʻo Nafitalaí, ko Sīkemi+ ʻi he feituʻu moʻungaʻia ʻo ʻIfalemí, mo Kiliate-ʻaapa,+ ʻa ia ko Hepeloni ia, ʻi he feituʻu moʻungaʻia ʻo Siutá. 8 ʻI he feituʻu Sioataní, ʻi he hahake ʻo Sielikoó, naʻa nau fili mei he matakali ʻo Lūpení ʻa Pēseli+ ʻi he toafa ko ia ʻi he fonua tokalelei mo māʻolungá,* ko Lēmoti+ ʻi Kiliatí mei he matakali ʻo Katá, pea mo Kōlani+ ʻi Pēsaní mei he matakali ʻo Manasé.+

9 Naʻe hoko eni ko e ngaahi kolo naʻe fili maʻá e kotoa ʻo e kau ʻIsilelí pea mo e kau muli ʻoku nofo ʻi honau lotolotongá, koeʻuhí ke lava ha taha pē naʻá ne tāmateʻi fāinoa ha taha ʻo hola ki ai+ ʻo ʻikai te ne mate ʻi he nima ʻo e tokotaha faisāuni ʻo e totó ki muʻa ke ne tuʻu ʻi he ʻao ʻo e fuʻu fakatahá ke fakamāuʻi.+

21 Ko e ngaahi ʻulumotuʻa ʻo e ngaahi fale ʻo e ngaahi tamai ʻa e kau Līvaí naʻa nau fakaofiofi mai leva kia ʻEliesa+ ko e taulaʻeikí, Siosiua ko e foha ʻo Nuní, pea mo e ngaahi ʻulumotuʻa ʻo e ngaahi fale ʻo e ngaahi tamai ʻa e ngaahi matakali ʻo ʻIsilelí, 2 pea nau lea kiate kinautolu ʻi Sailo+ ʻi he fonua ko Kēnaní, ʻo pehē: “Naʻe tuʻutuʻuni ʻe Sihova fakafou ʻia Mōsese ke foaki mai kiate kimautolu ʻa e ngaahi kolo ke mau nofo ai, fakataha mo honau ngaahi kaikaiʻanga ki heʻemau fanga manú.”+ 3 Ko ia ʻi he tuʻutuʻuni ʻa Sihová, naʻe foaki ai ʻe he kau ʻIsilelí ki he kau Līvaí ʻa e ngaahi koló ni+ mo honau ngaahi kaikaiʻangá mei honau tofiʻá tonu.+

4 Naʻe ʻalu ʻa e lulú ki he ngaahi fāmili ʻo e haʻa Kōhaté,+ pea ko e kau Līvai ʻa ia ko e hako ʻo ʻĒlone ko e taulaʻeikí naʻe foaki fakafou ʻi ha lulu* kiate kinautolu ʻa e kolo ʻe 13 mei he matakali ʻo Siutá,+ mo e matakali ʻo Simioné,+ pea mo e matakali ʻo Penisimaní.+

5 Pea ki he toenga ʻo e haʻa Kōhaté, naʻe vahe* kiate kinautolu ha kolo ʻe hongofulu mei he ngaahi fāmili ʻo e matakali ʻo ʻIfalemí,+ mo e matakali ʻo Taní, pea mo e vaeua ʻo e matakali ʻo Manasé.+

6 Pea ki he haʻa Kēsoní,+ naʻe vahe kiate kinautolu ha kolo ʻe 13 mei he ngaahi fāmili ʻo e matakali ʻo ʻĪsaká, mo e matakali ʻo ʻĀselí, mo e matakali ʻo Nafitalaí, pea mo e vaeua ʻo e matakali ʻo Manase ʻi Pēsaní.+

7 Pea ki he haʻa Mēlalí+ ʻo fakatatau ki honau ngaahi fāmilí, ko e kolo ʻe 12 mei he matakali ʻo Lūpení, mo e matakali ʻo Katá, pea mo e matakali ʻo Sepuloní.+

8 Ko ia naʻe foaki ʻe he kau ʻIsilelí ki he kau Līvaí ʻa e ngaahi koló ni mo honau ngaahi kaikaiʻangá fakafou ʻi ha lulu, ʻo hangē tofu pē ko ia naʻe tuʻutuʻuni ʻe Sihova fakafou ʻia Mōsesé.+

9 Ko e hingoa+ eni ʻo e ngaahi kolo ʻa ia naʻa nau foaki mei he matakali ʻo Siutá pea mo e matakali ʻo Simioné, 10 pea naʻe foaki kinautolu ki he hako ʻo ʻĒloné ʻa ia ko e ngaahi fāmili ʻo e haʻa Kōhaté ʻi he kau Līvaí, koeʻuhí naʻa nau maʻu ʻa e ʻuluaki lulú. 11 Naʻa nau foaki kiate kinautolu ʻa Kiliate-ʻaapa+ (ko ʻAapá ko e tamai ia ʻa ʻĀnakí), ʻa ia ko Hepeloni+ ia; ʻi he feituʻu moʻungaʻia ʻo Siutá, mo hono ngaahi kaikaiʻanga takatakaí. 12 Ka ko e kelekele ʻo e koló mo hono ngaahi nofoʻangá naʻa nau foaki ia kia Kēlepi ko e foha ʻo Sīfuné ko hono tofiʻa.+

13 Pea ki he hako ʻo ʻĒlone ko e taulaʻeikí, naʻa nau foaki kiate kinautolu ʻa e kolo hūfanga ki he tokotaha tāmate tangatá,+ ʻa ia ko Hepeloni+ mo hono ngaahi kaikaiʻangá, pehē foki ki Līpina+ mo hono ngaahi kaikaiʻangá, 14 Satili+ mo hono ngaahi kaikaiʻangá, ʻEsitimoa+ mo hono ngaahi kaikaiʻangá, 15 Holoni+ mo hono ngaahi kaikaiʻangá, Tepili+ mo hono ngaahi kaikaiʻangá, 16 ʻEni+ mo hono ngaahi kaikaiʻangá, Suta+ mo hono ngaahi kaikaiʻangá, pea mo Pete-semesi mo hono ngaahi kaikaiʻangá—ko e kolo ia ʻe hiva mei he ongo matakali ko ʻení.

17 Pea mei he matakali ʻo Penisimaní: Ko Kipione+ mo hono ngaahi kaikaiʻangá, Kepā mo hono ngaahi kaikaiʻangá,+ 18 ʻAnatoti+ mo hono ngaahi kaikaiʻangá, pea mo ʻAlimoni mo hono ngaahi kaikaiʻangá—ko e kolo ia ʻe fā.

19 Ko e ngaahi kolo kotoa naʻe foaki ki he hako ʻo ʻĒloné, ʻa e kau taulaʻeikí, ko e kolo ʻe 13 mo honau ngaahi kaikaiʻangá.+

20 Pea ko e toenga ʻo e ngaahi fāmili ʻo e haʻa Kōhaté ʻi he lotolotonga ʻo e kau Līvaí naʻe foaki kiate kinautolu fakafou ʻi ha lulu ʻa e ngaahi kolo mei he matakali ʻo ʻIfalemí. 21 Naʻa nau foaki kiate kinautolu ʻa e kolo hūfanga ki he tokotaha tāmate tangatá,+ ʻa ia ko Sīkemi+ mo hono ngaahi kaikaiʻanga ʻi he feituʻu moʻungaʻia ʻo ʻIfalemí, Kēseli+ mo hono ngaahi kaikaiʻangá, 22 Kipisaimi mo hono ngaahi kaikaiʻangá, pea mo Pete-holoni+ mo hono ngaahi kaikaiʻangá—ko e kolo ia ʻe fā.

23 Pea mei he matakali ʻo Taní: Ko ʻEliteke mo hono ngaahi kaikaiʻangá, Kipetoni mo hono ngaahi kaikaiʻangá, 24 ʻAsaloni+ mo hono ngaahi kaikaiʻangá, Kati-limoni mo hono ngaahi kaikaiʻangá—ko e kolo ia ʻe fā.

25 Pea mei he vaeua ʻo e matakali ʻo Manasé: Ko Tanaka+ mo hono ngaahi kaikaiʻangá pea mo Kati-limoni mo hono ngaahi kaikaiʻangá—ko e kolo ia ʻe ua.

26 Ko e kotoa ʻo e ngaahi kolo mo honau ngaahi kaikaiʻanga naʻe maʻu ʻe he toenga ʻo e ngaahi fāmili ʻo e haʻa Kōhaté naʻe hongofulu.

27 Pea ko e haʻa Kēsoni+ ʻo e ngaahi fāmili ʻo e kau Līvaí naʻa nau maʻu mei he vaeua ʻo e matakali ʻo Manasé ʻa e kolo hūfanga ki he tokotaha tāmate tangatá, ʻa ia ko Kōlani+ ʻi Pēsaní mo hono ngaahi kaikaiʻangá pea mo Peʻesitela mo hono ngaahi kaikaiʻangá—ko e kolo ia ʻe ua.

28 Pea mei he matakali ʻo ʻĪsaká:+ Ko Kisioni mo hono ngaahi kaikaiʻangá, Tapelati+ mo hono ngaahi kaikaiʻangá, 29 Siamuti mo hono ngaahi kaikaiʻangá, pea mo ʻEni-kanimi mo hono ngaahi kaikaiʻangá—ko e kolo ia ʻe fā.

30 Pea mei he matakali ʻo ʻĀselí:+ Ko Misali mo hono ngaahi kaikaiʻangá, ʻApitoni mo hono ngaahi kaikaiʻangá, 31 Helekati+ mo hono ngaahi kaikaiʻangá, pea mo Lehopi+ mo hono ngaahi kaikaiʻangá—ko e kolo ia ʻe fā.

32 Pea mei he matakali ʻo Nafitalaí: Ko e kolo hūfanga+ ki he tokotaha tāmate tangatá, ʻa ia ko Kētesi+ ʻi Kālelí mo hono ngaahi kaikaiʻangá, Hāmoti-toa mo hono ngaahi kaikaiʻangá, pea mo Kaletani mo hono ngaahi kaikaiʻangá—ko e kolo ia ʻe tolu.

33 Ko e kotoa ʻo e ngaahi kolo ʻo e haʻa Kēsoní ʻo fakatatau ki honau ngaahi fāmilí ko e kolo ʻe 13 mo honau ngaahi kaikaiʻangá.

34 Pea ko e ngaahi fāmili ʻo e haʻa Mēlalí,+ ʻa e toenga ʻo e kau Līvaí, naʻa nau maʻu mei he matakali ʻo Sepuloní+ ʻa Siokenami+ mo hono ngaahi kaikaiʻangá, Kaleta mo hono ngaahi kaikaiʻangá, 35 Timena mo hono ngaahi kaikaiʻangá, pea mo Nahalali+ mo hono ngaahi kaikaiʻangá—ko e kolo ia ʻe fā.

36 Pea mei he matakali ʻo Lūpení: Ko Pēseli+ mo hono ngaahi kaikaiʻangá, Siahasa mo hono ngaahi kaikaiʻangá,+ 37 Ketemoti mo hono ngaahi kaikaiʻangá, pea mo Mefati mo hono ngaahi kaikaiʻangá—ko e kolo ia ʻe fā.

38 Pea mei he matakali ʻo Katá:+ Ko e kolo hūfanga ki he tokotaha tāmate tangatá, ʻa ia ko Lēmoti ʻi Kiliatí+ mo hono ngaahi kaikaiʻangá, Mehanemi+ mo hono ngaahi kaikaiʻangá, 39 Hesiponi+ mo hono ngaahi kaikaiʻangá, pea mo Siasea+ mo hono ngaahi kaikaiʻangá—ko ha kolo fakakātoa ia ʻe fā.

40 Ko e kotoa ʻo e ngaahi kolo naʻe vahe ki he haʻa Mēlalí ʻo fakatatau ki honau ngaahi fāmilí, ʻa e toenga ʻo e ngaahi fāmili ʻo e kau Līvaí, ko e kolo ʻe 12.

41 Ko e kotoa ʻo e ngaahi kolo ʻo e kau Līvaí mei he tofiʻa ʻo e kau ʻIsilelí ko e kolo ʻe 48 mo honau ngaahi kaikaiʻangá.+ 42 Ko e kolo taki taha ʻi he ngaahi koló ni naʻe ʻi ai hono ngaahi kaikaiʻanga takatakai—naʻe peheni kotoa ʻa e ngaahi koló ni.

43 Ko ia naʻe foaki ʻe Sihova ki ʻIsileli ʻa e fonua kotoa naʻá ne fuakava ke foaki ki heʻenau fanga kuí,+ pea naʻa nau maʻu ia ʻo nofo ai.+ 44 ʻIkai ngata aí, naʻe foaki ʻe Sihova kiate kinautolu ha mālōlō ʻi he feituʻu kotoa pē, ʻo hangē tofu pē ko ia naʻá ne fuakavaʻaki ki heʻenau fanga kuí,+ pea naʻe ʻikai ha taha ʻi he kotoa ʻo honau ngaahi filí naʻe malava ke tuʻu atu kiate kinautolu.+ Naʻe tuku ʻe Sihova honau filí kotoa ki honau nimá.+ 45 Naʻe ʻikai taʻefakahoko ha talaʻofa* ʻi he ngaahi talaʻofa lelei kotoa ʻa ia naʻe fai ʻe Sihova ki he fale ʻo ʻIsilelí; naʻe hoko hono kotoa.+

22 Naʻe ui mai leva ʻe Siosiua ʻa e haʻa Lūpení, mo e haʻa Katá, pea mo e vaeua ʻo e matakali ʻo Manasé 2 ʻo ne pehē kiate kinautolu: “Kuo mou fai ʻa e meʻa kotoa naʻe tuʻutuʻuni ʻe Mōsese ko e sevāniti ʻa Sihová kiate kimoutolú,+ pea kuo mou talangofua ki hoku leʻó ʻi he meʻa kotoa kuó u tuʻutuʻuni atu kiate kimoutolú.+ 3 Kuo ʻikai te mou liʻaki homou fanga tokouá ʻi he taimi kotoa ko ení ʻo aʻu mai ki he ʻahó ni;+ pea kuo mou tauhi ʻa e fekau ʻa Sihova ko homou ʻOtuá.+ 4 Pea ko eni kuo tuku ʻe Sihova ko homou ʻOtuá ʻa homou fanga tokouá ke nau mālōlō, ʻo hangē tofu pē ko ʻene talaʻofa kiate kinautolú.+ Ko ia ke mou foki ā he taimí ni ki homou ngaahi tēnití ʻi he fonua naʻe foaki atu ʻe Mōsese ko e sevāniti ʻa Sihová ke mou maʻu ʻi he tafaʻaki ʻe taha* ʻo Sioataní.+ 5 Ko e meʻá pē ke mou mātuʻaki tokanga ke fakahoko ʻa e tuʻutuʻuni mo e Lao naʻe foaki atu ʻe Mōsese ko e sevāniti ʻa Sihová kiate kimoutolú+ ʻaki ʻa e ʻofa kia Sihova ko homou ʻOtuá,+ ʻaki ʻa e ʻaʻeva ʻi he kotoa ʻo ʻene ngaahi foungá,+ ʻaki ʻa e tauhi ʻene ngaahi tuʻutuʻuní,+ ʻaki ʻa e pīkitai kiate ia,+ pea ʻaki ʻa e tauhi kiate ia+ ʻaki homou lotó kotoa mo hoʻomou moʻuí+ kotoa.”

6 Naʻe tāpuakiʻi leva ʻe Siosiua kinautolu peá ne fekau atu ke nau ō, pea naʻa nau ō ki honau ngaahi tēnití. 7 Pea ko e vaeua ʻo e matakali ʻo Manasé, naʻe foaki ʻe Mōsese kiate kinautolu ha tofiʻa ʻi Pēsani,+ pea ko e vaeua ʻe taha ko ē ʻo e matakalí, naʻe foaki ʻe Siosiua kiate kinautolu ha fonua ʻi he tafaʻaki fakahihifo ʻo Sioataní,+ ke nau nofo fakataha ai mo honau fanga tokouá. ʻIkai ngata aí, ʻi he taimi naʻe fekau atu ai ʻe Siosiua ke nau ō ki honau ngaahi tēnití, naʻá ne tāpuakiʻi kinautolu 8 peá ne pehē kiate kinautolu: “Mou foki ki homou ngaahi tēnití mo e koloa lahi, mo e fanga manu tokolahi ʻaupito, mo e siliva mo e koula, kopa mo e ukamea, pea mo e ngaahi kofu lahi fau.+ Toʻo ʻa e koloa vete+ ʻo homou ngaahi filí pea vahevahe ia mo homou fanga tokouá.”

9 ʻI he hili iá, naʻe mavahe ʻa e haʻa Lūpení, mo e haʻa Katá, pea mo e vaeua ʻo e matakali ʻo Manasé mei he kau ʻIsileli ko eé, mei Sailo ʻi he fonua ko Kēnaní, ʻo nau foki ki he fonua ko Kiliatí,+ ʻa e fonua ʻa ia ko honau tofiʻa naʻa nau nofo aí ʻi he tuʻutuʻuni ʻa Sihova fakafou ʻia Mōsesé.+ 10 ʻI heʻenau aʻu mai ki he vahefonua ʻo Sioatani ʻi he fonua ko Kēnaní, naʻe fokotuʻu ai ʻe he haʻa Lūpení, mo e haʻa Katá, pea mo e vaeua ʻo e matakali ʻo Manasé ha ʻōlita ʻi veʻe Sioatani, ko ha fuʻu ʻōlita lahi moʻoni. 11 Ki mui ai, naʻe fanongo ʻa e kau ʻIsileli ko eé ʻi hono leaʻaki ʻo pehē:+ “Vakai! Kuo fokotuʻu ʻe he haʻa Lūpení, mo e haʻa Katá, pea mo e vaeua ʻo e matakali ʻo Manasé ha ʻōlita ʻi he kauʻā ʻo e fonua ko Kēnaní, ʻi he vahefonua ʻo Sioatani ʻi he tafaʻaki ko ia ʻoku maʻu ʻe he kau ʻIsilelí.” 12 ʻI he fanongo ʻa e kau ʻIsilelí fekauʻaki mo iá, naʻe fakatahataha ai ʻa e fuʻu fakataha fakakātoa ʻo e kau ʻIsilelí ʻi Sailo+ ke nau ʻalu atu ʻo faitau mo kinautolu.

13 Naʻe fekauʻi atu leva ʻe he kau ʻIsilelí ʻa Fineasi+ ko e foha ʻo ʻEliesa ko e taulaʻeikí ki he haʻa Lūpení, mo e haʻa Katá, pea mo e vaeua ʻo e matakali ʻo Manasé ʻi he fonua ko Kiliatí, 14 pea naʻe ʻiate ia ha ʻeiki ʻe toko hongofulu, ko e ʻeiki ʻe taha mei he fale taki taha ʻo ʻene ngaahi tamai ʻi he ngaahi matakali kotoa ʻo ʻIsilelí, ʻa ia ko e tokotaha taki taha ko ha ʻulumotuʻa ia ʻo e fale ʻo ʻene ngaahi tamaí ʻi he lotolotonga ʻo e laui afe* ʻo ʻIsilelí.+ 15 ʻI heʻenau aʻu ki he haʻa Lūpení, mo e haʻa Katá, pea mo e vaeua ʻo e matakali ʻo Manasé ʻi he fonua ko Kiliatí, naʻa nau pehē kiate kinautolu:

16 “Ko e lea eni ʻa e fuʻu fakataha kotoa ʻa Sihová: ‘Ko e hā ʻa e taʻefaitōnunga+ ko eni kuo mou fai ki he ʻOtua ʻo ʻIsilelí? Kuo mou tafoki he ʻahó ni mei he muimui kia Sihová ʻi hoʻomou langa maʻamoutolu ha ʻōlita pea mou angatuʻu ai kia Sihova.+ 17 Naʻe ʻikai koā ke feʻunga ʻa e faihala ʻi Peolí kiate kitautolu? Kuo teʻeki ai ke tau fakamaʻa kitautolu mei ai ʻo aʻu mai ki he ʻahó ni, neongo naʻe tō mai ha mala ki he fuʻu fakataha ʻa Sihová.+ 18 Pea te mou tafoki he ʻahó ni mei he muimui kia Sihová! Kapau te mou angatuʻu he ʻahó ni kia Sihova, ʻe tō mai leva ʻapongipongi ʻene houhaú ki he fuʻu fakataha fakakātoa ʻo ʻIsilelí.+ 19 Pea kapau leva koeʻuhí ko e fonua ʻa ia ko homou tofiʻá ʻoku taʻemaʻa, mou omi ki he fonua ko e tofiʻa ʻo Sihová+ ʻa ia ʻoku ʻi ai ʻa e tāpanekale ʻo Sihová pea nofo+ ʻi homau lotolotongá, kae ʻoua ʻe angatuʻu kia Sihova, pea ʻoua ʻe ʻai kimautolu ko e kau angatuʻu ʻi hoʻomou langa maʻamoutolu ha ʻōlita ʻo tānaki atu ki he ʻōlita ʻo Sihova ko hotau ʻOtuá.+ 20 ʻI he taimi naʻe fai ai ʻe ʻĀkani+ ko e foha ʻo Salá ha taʻefaitōnunga ʻi he fekauʻaki mo e meʻa naʻe tuku atu ki he fakaʻauhá, ʻikai naʻe tō mai ʻa e houhaú ki he fuʻu fakataha kotoa ʻo ʻIsilelí?+ Pea naʻe ʻikai mate toko taha pē ʻa e tangata ko iá ʻi heʻene faihalá.’”+

21 Naʻe tali ai ʻe he haʻa Lūpení, mo e haʻa Katá, pea mo e vaeua ʻo e matakali ʻo Manasé ʻo pehē ki he ngaahi ʻulumotuʻa ʻo e laui afe* ʻo ʻIsilelí:+ 22 “Ko e ʻOtua ʻo e ngaahi ʻotuá, ʻa Sihova!* Ko e ʻOtua ʻo e ngaahi ʻotuá, ʻa Sihova!+ ʻOkú ne ʻafioʻi, pea ʻe ʻilo foki ʻe ʻIsileli. Kapau ko ʻemau angatuʻu mo ʻemau taʻefaitōnunga kia Sihova, ʻoua naʻa fakahaofi kimautolu he ʻahó ni. 23 Kapau naʻa mau langa maʻamautolu ha ʻōlita ke mau tafoki ai mei he muimui kia Sihová pea ke fai ai ha ngaahi feilaulau tutu, mo ha ngaahi feilaulau meʻakai,* mo ha ngaahi feilaulau feʻinasiʻaki, ʻe fakahoko mai ʻe Sihova ʻa e tauteá.+ 24 Naʻe ʻikai ko ia, ko ha ʻuhinga kehe ia naʻa mau fai ai ʻa e meʻá ni, he naʻa mau pehē, ‘ʻI he kahaʻú, ʻe pehē mai ai ʻe homou ngaahi fohá ki homau ngaahi fohá: “Ko e hā haʻamou kaunga kia Sihova ko e ʻOtua ʻo ʻIsilelí? 25 Kuo ʻai ʻe Sihova ʻa Sioatani ko ha kauʻāfonua ia ʻi homau vahaʻa mo kimoutolu, ʻa e haʻa Lūpení, mo e haʻa Katá. ʻOku ʻikai haʻamou kaunga kia Sihova.” Pea ʻe taʻofi ai ʻe homou ngaahi fohá homau ngaahi fohá mei he lotu* kia Sihová.’

26 “Ko ia naʻa mau pehē ai, ‘Tau mātuʻaki fai ha meʻa ʻaki hano langa ha ʻōlita, ʻo ʻikai ki ha ngaahi feilaulau tutu pe ngaahi feilaulau, 27 ka ke hoko ko ha fakamoʻoni ʻi he vahaʻa ʻo kimoutolu mo kimautolú+ pea mo hotau hako* ʻi he hili kitautolú koeʻuhí ke mau fakahoko ʻemau ngāue kia Sihová ʻi hono ʻaó ʻaki ʻemau ngaahi feilaulau tutú mo ʻemau ngaahi feilaulaú pea mo ʻemau ngaahi feilaulau feʻinasiʻakí,+ ke ʻoua naʻa pehē mai ai ʻe homou ngaahi fohá ki homau ngaahi fohá ʻi he kahaʻú: “ʻOku ʻikai haʻamou kaunga kia Sihova.”’ 28 Ko ia naʻa mau pehē ai, ‘Kapau te nau lea pehē mai kiate kitautolu pea ki hotau hakó* ʻi he kahaʻú, te tau pehē atu leva: “Sio ki he tatau ʻo e ʻōlita ʻo Sihová ʻa ia naʻe ngaohi ʻe heʻemau fanga kuí, ʻo ʻikai ki ha ngaahi feilaulau tutu pe ki ha ngaahi feilaulau, ka ke hoko ko ha fakamoʻoni ʻi he vahaʻa ʻo kimoutolu mo kimautolú.”’ 29 Mole ke mamaʻo haʻamau fakakaukau ke mau angatuʻu kia Sihova pea ke tafoki he ʻahó ni mei he muimui kia Sihová+ ʻaki hono langa ha ʻōlita ki he ngaahi feilaulau tutú, ngaahi feilaulau meʻakaí, mo e ngaahi feilaulaú, ʻo kehe ia mei he ʻōlita ʻo Sihova ko hotau ʻOtuá ʻa ia ʻoku ʻi he ʻao ʻo hono tāpanekalé!”+

30 ʻI he fanongo ʻa Fineasi ko e taulaʻeikí, mo e ngaahi ʻeiki ʻo e fuʻu fakatahá, pea mo e ngaahi ʻulumotuʻa ʻo e laui afe* ʻo ʻIsilelí ʻa ia naʻe ʻiate iá ki he lea naʻe fai ʻe he hako ʻo Lūpení, Katá, mo Manasé, naʻa nau fiemālie.+ 31 Ko ia naʻe pehē ʻe Fineasi ko e foha ʻo ʻEliesa ko e taulaʻeikí ki he hako ʻo Lūpení, Katá, mo Manasé: “ʻI he ʻahó ni ʻoku mau ʻiloʻi ai ʻoku ʻiate kitautolu ʻa Sihova, he kuo ʻikai te mou fai ʻa e taʻefaitōnunga ko ení kia Sihova. Ko eni kuo mou fakahaofi ʻa e kau ʻIsilelí mei he nima ʻo Sihová.”

32 Naʻe foki mai leva ʻa Fineasi ko e foha ʻo ʻEliesa ko e taulaʻeikí mo e ngaahi ʻeikí mei he haʻa Lūpení mo e haʻa Katá ʻi he fonua ko Kiliatí ki he fonua ko Kēnaní, pea naʻa nau omi mo ha fakamatala ki he kau ʻIsileli kehé. 33 Pea naʻe fiemālie ʻa e kau ʻIsilelí ʻi he fakamatalá ni. Naʻe fakahīkihikiʻi leva ʻe he kau ʻIsilelí ʻa e ʻOtuá, pea naʻe ʻikai haʻanau toe lea fekauʻaki mo ha ʻalu ʻo faitau mo e haʻa Lūpení mo e haʻa Katá ke fakaʻauha ʻa e fonua naʻa nau nofo aí.

34 Ko ia naʻe fakahingoa ai ʻe he haʻa Lūpení mo e haʻa Katá ʻa e ʻōlitá,* koeʻuhi “ko ha fakamoʻoni ia ʻi hotau vahaʻá ko Sihova ʻa e ʻOtua moʻoní.”

23 ʻI he ngaahi ʻaho lahi hili hono foaki ʻe Sihova ki ʻIsileli ʻa e mālōlō+ mei he kotoa ʻo hono ngaahi fili takatakaí, pea kuo motuʻa ʻa Siosiua mo aʻuaʻu hono taʻú,+ 2 naʻe ui mai ʻe Siosiua ʻa ʻIsileli kotoa,+ ko hono kau mātuʻá, ko hono ngaahi ʻulumotuʻá, ko hono kau fakamāú, mo hono kau ʻōfisá,+ peá ne pehē kiate kinautolu: “Kuó u motuʻa; kuo aʻuaʻu ʻa hoku taʻú. 3 Pea kuo mou mamata tonu ki he meʻa kotoa naʻe fai maʻamoutolu ʻe Sihova ko homou ʻOtuá ki he ngaahi puleʻanga kotoa ko ení koeʻuhi ko Sihova ko homou ʻOtuá ʻa e tokotaha naʻe tau maʻamoutolú.+ 4 Vakai, kuó u vaheʻi kiate kimoutolu fakafou ʻi he lulu*+ ʻa e fonua ʻo e ngaahi puleʻanga ʻoku toe ke ikunaʻí ko ha tofiʻa maʻa homou ngaahi matakalí,+ pea pehē ki he fonua ʻo e ngaahi puleʻanga kotoa naʻá ku fakaʻauhá,+ mei Sioatani ki he Tahi Lahí* ʻi he hihifó.* 5 Pea ko Sihova ko homou ʻOtuá ʻa e tokotaha naʻá ne hanganaki tekeʻi kinautolu mei homou ʻaó,+ pea naʻá ne kapusi* kinautolu koeʻuhi ko kimoutolu, pea naʻa mou maʻu honau fonuá, ʻo hangē tofu pē ko e talaʻofa ʻa Sihova ko homou ʻOtuá kiate kimoutolú.+

6 “Ko eni kuo pau ke mou mātuʻaki loto-toʻa ke tauhi mo fakahoko ʻa e meʻa kotoa ʻa ia ʻoku hiki ʻi he tohi ʻo e Lao+ ʻa Mōsesé ʻaki ʻa e ʻikai ʻaupito ke mou afe mei ai ki he toʻomataʻú pe ki he toʻohemá,+ 7 ʻaki ʻa e ʻikai ʻaupito ke feohi mo e ngaahi puleʻanga+ ko eni ʻoku kei toe ʻiate kimoutolú. Kuo pau ke ʻoua naʻa mou teitei lave ki he hingoa ʻo honau ngaahi ʻotuá+ pe fai ha fakapapau ʻiate kinautolu, pea kuo pau ke ʻoua ʻaupito naʻa mou tauhi kiate kinautolu pe punou hifo kiate kinautolu.+ 8 Ka kuo pau ke mou pīkitai kia Sihova ko homou ʻOtuá,+ ʻo hangē tofu pē ko ia kuo mou fai ʻo aʻu mai ki he ʻaho ní. 9 ʻE kapusi ʻe Sihova ʻa e ngaahi puleʻanga lalahi mo mālohí mei homou ʻaó,+ he kuo ʻikai ha tangata ʻe malava ke ne tuʻu ʻi homou ʻaó ʻo aʻu mai ki he ʻahó ni.+ 10 ʻE tuli ʻe he tangata pē ʻe toko taha ʻo kimoutolu ha toko afe,+ koeʻuhí ko Sihova ko homou ʻOtuá ʻoku tau maʻamoutolu,+ ʻo hangē tofu pē ko ʻene talaʻofa kiate kimoutolú.+ 11 Ko ia ke mou tokanga maʻu ai pē+ ʻaki hoʻomou ʻofa kia Sihova ko homou ʻOtuá.+

12 “Ka ʻo kapau ʻe faifai ange pea mou tafoki ʻo pīkitai ki he faʻahinga ʻoku toe ʻi he ngaahi puleʻanga ko eni ʻoku kei ʻiate kimoutolú+ pea mou fai ha ngaahi aleapau fakaemali*+ mo kinautolu pea feohi mo kinautolu pea nau feohi mo kimoutolu, 13 te mou ʻiloʻi fakapapau ai ko Sihova ko homou ʻOtuá ʻe ʻikai ke hokohoko atu ʻene kapusi* ʻa e ngaahi puleʻangá ni koeʻuhi ko kimoutolú.+ Te nau hoko ko ha tauhele mo ha mounu pea mo ha uipi ki homou tuʻá+ mo e talatala ki homou matá kae ʻoua kuo mou ʻauha ʻosi mei he fonua lelei ko eni kuo foaki atu ʻe Sihova ko homou ʻOtuá kiate kimoutolú.

14 “Pea vakai, ko au eni kuó u mei mate,* pea ʻoku mou ʻiloʻi lelei ʻi homou lotó kotoa mo hoʻomou moʻuí kotoa kuo ʻikai taʻefakahoko ha foʻi lea ʻe taha ʻi he ngaahi talaʻofa lelei kotoa kuo folofolaʻaki ʻe Sihova ko homou ʻOtuá kiate kimoutolú. Kuo hoko kotoa ia kiate kimoutolu. Kuo ʻikai taʻefakahoko ai ha foʻi lea ʻe taha.+ 15 Kae hangē tofu pē ko e hoko kiate kimoutolu ʻa e ngaahi talaʻofa lelei kotoa kuo folofolaʻaki ʻe Sihova ko homou ʻOtuá kiate kimoutolú,+ ʻe pehē hono ʻomi kiate kimoutolu ʻe Sihova ʻa e mala kotoa naʻá ne palōmesiʻakí pea fakaʻauha ʻosi kimoutolu mei he fonua lelei ko eni kuo foaki atu ʻe Sihova ko homou ʻOtuá kiate kimoutolú.+ 16 Kapau te mou maumauʻi ʻa e fuakava ʻa Sihova ko homou ʻOtuá ʻa ia naʻá ne tuʻutuʻuni atu ke mou tauhí pea kapau te mou ō ʻo tauhi ki he ngaahi ʻotua kehé pea punou hifo kiate kinautolu, ʻe kakaha leva ai ʻa e houhau ʻa Sihová kiate kimoutolu+ pea te mou ʻauha vave ai mei he fonua lelei kuó ne foaki atu kiate kimoutolú.”+

24 Naʻe fakatahatahaʻi leva ʻe Siosiua ʻa e ngaahi matakali kotoa ʻo ʻIsilelí ʻi Sīkemi pea ui mai ʻa e kau mātuʻa ʻo ʻIsilelí, ko hono ngaahi ʻulumotuʻá, ko hono kau fakamāú, mo hono kau ʻōfisá,+ pea naʻa nau tuʻu ʻi he ʻao ʻo e ʻOtua moʻoní. 2 Naʻe pehē leva ʻe Siosiua ki he kakaí kotoa: “Ko e meʻa eni ʻoku folofolaʻaki ʻe Sihova ko e ʻOtua ʻo ʻIsilelí, ‘Ko e tafaʻaki ʻe taha ʻo e Vaitafé* naʻe nofo fuoloa+ ai he kuohilí ʻa hoʻomou fanga kuí+—ʻa Tela ko e tamai ʻa ʻĒpalahamé mo e tamai ʻa Nēhoá—pea naʻa nau faʻa tauhi ki he ngaahi ʻotua kehé.+

3 “‘ʻI he faai mai ʻa e taimí naʻá ku ʻave ai ʻa hoʻomou kui ko ʻĒpalahamé+ mei he tafaʻaki ʻe taha ʻo e Vaitafé* ʻo ʻai ia ke ne fāifononga holo ʻi he fonua kotoa ko Kēnaní pea fakatokolahi+ ʻa hono hakó. Naʻá ku foaki kiate ia ʻa ʻAisake;+ 4 naʻá ku foaki leva kia ʻAisake ʻa Sēkope mo ʻĪsoa.+ Ki mui ai, naʻá ku foaki kia ʻĪsoa ʻa Moʻunga Seia ko hono tofiʻa;+ pea ko Sēkope mo hono ngaahi fohá naʻa nau ʻalu hifo ki ʻIsipite.+ 5 Ki mui ai, naʻá ku fekauʻi atu ʻa Mōsese mo ʻĒlone,+ pea naʻá ku taaʻi ʻa ʻIsipite ʻaki ʻa e meʻa naʻá ku fai ʻi honau lotolotongá,+ pea ʻi he hili iá, naʻá ku ʻomi kimoutolu mei ai. 6 ʻI he taimi naʻá ku ʻomi ai hoʻomou ngaahi tamaí mei ʻIsipite+ pea mou aʻu ki he tahí, naʻe tulimui mai ʻa e kau ʻIsipité ki hoʻomou ngaahi tamaí ʻaki ʻa e ngaahi saliote tau mo e kau tangata heka hoosi ʻo aʻu ki he Tahi Kulokulá.+ 7 Naʻe kamata ke nau tangi kia Sihova,+ ko ia naʻá ne fokotuʻu ha fakapoʻulituʻu ʻi homou vahaʻa mo e kau ʻIsipité pea ʻomi ʻa e tahí ʻo ne ʻufiʻufi kinautolu,+ pea naʻe sio tonu homou matá ki he meʻa naʻá ku fai ʻi ʻIsipité.+ Pea naʻa mou nofo leva ʻi he toafá ʻi he ngaahi taʻu* lahi.+

8 “‘Pea naʻá ku ʻomi kimoutolu ki he fonua ʻo e kau ʻĀmolí ʻa ia naʻa nau nofo ʻi he tafaʻaki ʻe taha* ʻo Sioataní, pea naʻa nau tauʻi kimoutolu.+ Ka naʻá ku tuku kinautolu ki homou nimá koeʻuhi ke lava ʻo mou maʻu ʻa honau fonuá, pea naʻá ku fakaʻauha ʻosi kinautolu mei homou ʻaó.+ 9 Ko Pēlaki leva ko e foha ʻo Sīpoá, ʻa e tuʻi ʻo Mōapé, naʻá ne tuʻu hake ʻo ne tauʻi ʻa ʻIsileli. Ko ia naʻá ne ui mai ʻa Pēlami ko e foha ʻo Pioá ke ne talatukiʻi kimoutolu.+ 10 Ka naʻe ʻikai te u fanongo kia Pēlami.+ Ko ia naʻá ne toutou tāpuakiʻi+ kimoutolu, pea naʻá ku fakahaofi kimoutolu mei hono nimá.+

11 “‘Naʻa mou kolosi leva ʻi Sioatani+ ʻo mou aʻu ki Sielikō.+ Pea ko e kau taki* ʻo Sielikoó, mo e kau ʻĀmolí, ko e kau Pēlisí, ko e kau Kēnaní, ko e kau Hetí, ko e kau Keakasá, ko e kau Heví, pea mo e kau Siepusí naʻa nau tauʻi kimoutolu, ka naʻá ku tuku kinautolu ki homou nimá.+ 12 Ko ia naʻá ku tuku atu ʻa e ongoʻi ʻo e loto-foʻí* ke muʻomuʻa ʻiate kimoutolu, pea naʻá ne kapusi kinautolu mei homou ʻaó+—pehē foki ki he ongo tuʻi ʻo e kau ʻĀmolí. Naʻe ʻikai faiʻaki hoʻo heletaá pea ʻikai faiʻaki hoʻo kaufaná.+ 13 Ko ia naʻá ku foaki atu kiate kimoutolu ha fonua ʻa ia naʻe ʻikai te mou fakaongosia ai mo e ngaahi kolo naʻe ʻikai te mou langa,+ pea naʻa mou nofo ai. ʻOku mou kai mei he ngaahi ngoue kālepi mo e ngaahi ngoue ʻōlive naʻe ʻikai te mou tō.’+

14 “Ko ia ai, mou manavahē kia Sihova pea tauhi kiate ia ʻaki ʻa e anga-tonu* mo e faitōnunga,*+ pea toʻo ʻa e ngaahi ʻotua naʻe tauhi ki ai hoʻomou fanga kuí ʻi he tafaʻaki ʻe taha ʻo e Vaitafé* pea ʻi ʻIsipité,+ pea mou tauhi kia Sihova. 15 Pea kapau ʻoku hā kovi kiate kimoutolu ke tauhi kia Sihova, mou fili maʻamoutolu he ʻahó ni pe ko hai te mou tauhí,+ pe ko e ngaahi ʻotua naʻe tauhi ki ai hoʻomou fanga kuí ʻi he tafaʻaki ʻe taha ʻo e Vaitafé*+ pe ko e ngaahi ʻotua ʻo e kau ʻĀmolí ʻa ia ko honau fonuá ē ʻoku mou nofo aí.+ Ka kiate au mo hoku falé, te mau tauhi kia Sihova.”

16 Ko ia naʻe tali ange ʻe he kakaí: “Mole ke mamaʻo haʻamau fakakaukau ke liʻaki ʻa Sihova pea tauhi ki he ngaahi ʻotua kehé. 17 Ko Sihova ko hotau ʻOtuá naʻá ne ʻomi kitautolu mo ʻetau ngaahi tamaí mei he fonua ko ʻIsipité,+ mei he fale fakapōpulá,+ pea naʻá ne fakahoko ʻa e ngaahi fuʻu fakaʻilonga ko ení ʻi hotau ʻaó+ peá ne hanganaki maluʻi kitautolu ʻi he hala kotoa ʻa ia naʻa tau ʻaʻeva aí pea ʻi he lotolotonga ʻo e ngaahi kakai kotoa ʻa ia naʻa tau fou mai aí.+ 18 Naʻe kapusi ʻe Sihova ʻa e ngaahi kakai kotoa, ʻo kau ai ʻa e kau ʻĀmolí, ʻa ia naʻa nau nofo ʻi he fonuá ki muʻa ʻiate kitautolú. Ko ia ai, ko kimautolu foki te mau tauhi kia Sihova, he ko ia ʻa homau ʻOtuá.”

19 Naʻe pehē ange leva ʻe Siosiua ki he kakaí: “Heʻikai malava ke mou tauhi kia Sihova, he ko ha ʻOtua māʻoniʻoni+ ia; ko ha ʻOtua ia ʻokú ne fiemaʻu ʻa e anga-līʻoa maʻataʻatā.+ ʻE ʻikai te ne fakamolemoleʻi hoʻomou ngaahi laka halá* mo hoʻomou ngaahi angahalá.+ 20 Kapau te mou liʻaki ʻa Sihova pea tauhi ki he ngaahi ʻotua mulí, te ne toe tafoki hake ai ʻo fakafepakiʻi kimoutolu pea fakaʻauhamālie kimoutolu hili ia ʻene failelei kiate kimoutolú.”+

21 Ka naʻe pehē ange ʻe he kakaí kia Siosiua: “ʻE ʻikai, ka te mau tauhi kia Sihova!”+ 22 Ko ia naʻe pehē ange ʻe Siosiua ki he kakaí: “Ko e kau fakamoʻoni kimoutolu kiate kimoutolu kuo mou fili ʻi he loto pē ʻomoutolú ke tauhi kia Sihova.”+ Ko ia naʻa nau pehē ange ai: “Ko e kau fakamoʻoni kimautolu.”

23 “Ko ia ai, toʻo ʻa e ngaahi ʻotua muli ʻoku ʻi homou lotolotongá, pea ofeʻi homou lotó kia Sihova ko e ʻOtua ʻo ʻIsilelí.” 24 Naʻe pehē ange ʻe he kakaí kia Siosiua: “Te mau tauhi kia Sihova ko hotau ʻOtuá, pea te mau talangofua ki hono leʻó!”

25 Ko ia naʻe fai ai ʻe Siosiua ha fuakava mo e kakaí ʻi he ʻaho ko iá pea fokotuʻu ha tuʻutuʻuni mo ha lao kiate kinautolu ʻi Sīkemi. 26 Naʻe hiki leva ʻe Siosiua ʻa e ngaahi leá ni ʻi he tohi ʻo e Lao+ ʻa e ʻOtuá peá ne toʻo ha fuʻu maka+ ʻo fokotuʻu ia ʻi lalo ʻi he fuʻu ʻakau ʻa ia ʻoku ofi ki he feituʻu toputapu ʻo Sihová.

27 Naʻe hoko atu ʻa Siosiua ʻo ne lea ki he kakaí kotoa: “Vakai! ʻE hoko ʻa e maká ni ko ha fakamoʻoni ia kiate kitautolu,+ koeʻuhí kuó ne fanongoa ʻa e meʻa kotoa naʻe folofolaʻaki ʻe Sihova kiate kitautolú, pea ʻe hoko ia ko ha fakamoʻoni kiate kimoutolu, ke ʻoua te mou fakaʻikaiʻi ʻa homou ʻOtuá.” 28 Ko ia naʻe fekauʻi ai ʻe Siosiua ʻa e kakaí ke nau ʻalu, ʻa e tokotaha taki taha ki hono tofiʻa.+

29 Hili ʻa e ngaahi meʻá ni, ko Siosiua ko e foha ʻo Nuní, ʻa e sevāniti ʻa Sihová, naʻá ne mate ʻi hono taʻu 110.+ 30 Ko ia naʻa nau tanu ia ʻi he feituʻu ʻo hono tofiʻá ʻi Timinati-sela,+ ʻa ia ʻoku ʻi he feituʻu moʻungaʻia ʻo ʻIfalemí, ʻi he tokelau ʻo Moʻunga Kāsí. 31 Naʻe hokohoko atu ʻa e tauhi ʻa ʻIsileli kia Sihová ʻi he ngaahi ʻaho kotoa ʻo Siosiuá mo e ngaahi ʻaho kotoa ʻo e kau mātuʻa naʻa nau moʻui fuoloa ange ʻia Siosiuá pea naʻa nau ʻiloʻi ʻa e ngaahi ngāue kotoa ʻa Sihova maʻa ʻIsilelí.+

32 Ko e ngaahi hui ʻo Siosifá,+ ʻa ia naʻe ʻomai ʻe he kau ʻIsilelí mei ʻIsipité, naʻe tanu ia ʻi Sīkemi ʻi he konga kelekele ʻa ia naʻe maʻu ʻe Sēkope mei he ngaahi foha ʻo Hēmoa,+ ko e tamai ʻa Sīkemí, ʻaki ʻa e konga siliva ʻe 100;+ pea naʻe hoko ia ko e tofiʻa ʻo e ngaahi foha ʻo Siosifá.+

33 Pehē foki, naʻe mate+ ʻa ʻEliesa ko e foha ʻo ʻĒloné. Ko ia naʻa nau tanu ia ʻi he foʻi māʻolunga naʻe foaki kia Fineasi ko hono fohá,+ ʻa ia naʻe ʻoange kiate ia ʻi he feituʻu moʻungaʻia ʻo ʻIfalemí.