UA TUʻI

1 ʻI he hili ʻa e mate ʻa ʻĒhapí, naʻe angatuʻu ʻa Mōape+ ki ʻIsileli.

2 Pea naʻe tō hifo ʻa ʻAhasaia ʻi ha foʻi ava naʻe tāpuni ʻaki ʻa e meʻa vangavanga ʻi hono lokí ʻi he funga falé ʻi Samēlia, peá ne lavea ai. Ko ia naʻá ne fekauʻi atu ai ha kau talafekau ʻo ne pehē kiate kinautolu: “Mou ō ʻo fehuʻi kia Pēali-sepupe ko e ʻotua ʻo ʻEkiloní+ ke ʻiloʻi pe te u toe fakaakeake mei he lavea ko ení.”+ 3 Ka naʻe pehē ange ʻe he ʻāngelo ʻa Sihová kia ʻIlaisiā*+ ko e tangata Tīsipí: “Tuʻu hake, pea ʻalu atu ke fakafetaulaki ki he kau talafekau ʻa e tuʻi ʻo Samēliá peá ke pehē kiate kinautolu, ‘ʻOku hala koā ha ʻOtua ia ʻi ʻIsileli ʻoku mou ō ai kimoutolu ke fehuʻi kia Pēali-sepupe ko e ʻotua ʻo ʻEkiloní?+ 4 Ko ia ai, ko e meʻa eni ʻoku folofolaʻaki ʻe Sihová: “ʻE ʻikai te ke mavahe mei he mohenga ʻa ia ʻokú ke tokoto aí, he ko e moʻoni te ke mate.”’” Pea naʻe ʻalu leva ʻa ʻIlaisiā.

5 ʻI he foki mai ʻa e kau talafekaú kiate iá, naʻá ne pehē ange ʻi he taimi pē ko iá kiate kinautolu: “Ko e hā kuo mou foki mai aí?” 6 Naʻa nau tali ange kiate ia: “Naʻe ʻi ai ha tangata naʻe haʻu ke fakafetaulaki mai kiate kimautolu, pea naʻá ne pehē mai, ‘Mou ō ʻo foki ki he tuʻí ʻa ia naʻá ne fekauʻi kimoutolú pea tala kiate ia, “Ko e meʻa eni ʻoku folofolaʻaki ʻe Sihová: ‘ʻOku hala koā ha ʻOtua ia ʻi ʻIsileli ʻokú ke fai ai ʻa e fekau ke fehuʻi kia Pēali-sepupe ko e ʻotua ʻo ʻEkiloní? Ko ia ai, ʻe ʻikai te ke mavahe mei he mohenga ʻa ia ʻokú ke tokoto aí, he ko e moʻoni te ke mate.’”’”+ 7 ʻI he meʻá ni naʻá ne ʻeke ange kiate kinautolu: “Naʻe fōtunga fēfē ʻa e tangata naʻe fakafetaulaki atu kiate kimoutolu ʻo ne leaʻaki ʻa e ngaahi leá ni kiate kimoutolú?” 8 Ko ia naʻa nau pehē ange kiate ia: “Ko ha tangata ia naʻe kofu fulufuluʻimanu+ pea leta kiliʻimanu ʻi hono kongalotó.”+ Naʻá ne pehē ange ʻi he taimi pē ko iá: “Ko ʻIlaisiā ia ko e tangata Tīsipí.”

9 Naʻe fekauʻi atu leva ʻe he tuʻí kiate ia ha ʻeiki ʻo e toko 50 mo ʻene kau tangata ʻe toko 50. ʻI heʻene ʻalu hake kiate iá, naʻá ne tangutu mai ʻi he funga moʻungá. Naʻá ne pehē ange kiate ia: “Tangata ʻa e ʻOtua moʻoní,+ ʻoku folofola mai ʻa e tuʻí, ‘ʻAlu hifo ki lalo.’” 10 Ka naʻe tali ange ʻe ʻIlaisiā ki he ʻeiki ʻo e toko 50: “Ko eni, kapau ko ha tangata au ʻa e ʻOtuá, tuku ke ʻalu hifo ha afi mei he langí+ ʻo keina koe mo hoʻo kau tangata ʻe toko 50.” Pea naʻe ʻalu hifo ʻa e afi mei he langí ʻo keina ia mo ʻene kau tangata ʻe toko 50.

11 Ko ia naʻe toe fekauʻi atu ai ʻe he tuʻí ha toe ʻeiki ʻo e toko 50 mo ʻene kau tangata ʻe toko 50. Naʻá ne ʻalu atu ʻo pehē kiate ia: “Tangata ʻa e ʻOtua moʻoní, ko e meʻa eni ʻoku folofolaʻaki ʻe he tuʻí, ‘ʻAlu hifo ke vave.’” 12 Ka naʻe tali ange ʻe ʻIlaisiā kiate kinautolu: “Kapau ko ha tangata au ʻa e ʻOtua moʻoní, tuku ke ʻalu hifo ha afi mei he langí ʻo keina koe mo hoʻo kau tangata ʻe toko 50.” Pea naʻe ʻalu hifo ʻa e afi ʻa e ʻOtuá mei he langí ʻo keina ia mo ʻene kau tangata ʻe toko 50.

13 Pea naʻe toe fekauʻi atu ai ʻe he tuʻí ha ʻeiki hono tolu ʻo e toko 50 mo ʻene kau tangata ʻe toko 50. Ka ko e ʻeiki hono tolu ʻo e toko 50 naʻá ne ʻalu hake ʻo ne punou ʻo tūʻulutui ʻi muʻa ʻia ʻIlaisiā pea kamata ke ne kōlenga ki haʻane leleiʻia ange ʻo pehē kiate ia: “Tangata ʻa e ʻOtua moʻoní, tuku muʻa ke hoko ʻa ʻeku moʻuí mo e moʻui ʻa e kau sevāniti ʻe toko 50 ko eni ʻaʻaú ʻo mahuʻinga ki hoʻo vakaí. 14 Kuo ʻosi ʻalu hifo ʻa e afi mei he langí ʻo keina ʻa e ongo ʻeiki ki muʻa ʻo e toko 50 mo ʻena ongo kulupu ʻo e toko 50, ka ko eni, tuku muʻa ke mahuʻinga ʻa ʻeku moʻuí ki hoʻo vakaí.”

15 Ko ia naʻe tala ange ai ʻe he ʻāngelo ʻa Sihová kia ʻIlaisiā: “ʻAlu hifo mo ia. ʻOua ʻe ilifia kiate ia.” Ko ia naʻá ne tuʻu hake ʻo ne ʻalu hifo mo ia ki he tuʻí. 16 Pea naʻe pehē ange ʻe ʻIlaisiā ki he tuʻí, “Ko e meʻa eni ʻoku folofolaʻaki ʻe Sihová: ‘Naʻá ke fekauʻi ʻa e kau talafekau ke fai ha fehuʻi kia Pēali-sepupe ko e ʻotua ʻo ʻEkiloní.+ ʻOku hala koā ha ʻOtua ia ʻi ʻIsileli?+ Ko e hā naʻe ʻikai te ke kumi faleʻi ai ki heʻene folofolá? Ko ia ai, ʻe ʻikai te ke mavahe mei he mohenga ʻa ia ʻokú ke tokoto aí, he ko e moʻoni te ke mate.’” 17 Ko ia naʻá ne mate, ʻo fakatatau ki he folofola ʻa Sihova naʻe leaʻaki ʻe ʻIlaisiaá; pea koeʻuhí naʻe ʻikai hano foha, naʻe hoko ai ʻa Siholame*+ ko e tuʻi ʻo fetongi ia, ʻi he taʻu hono ua ʻo e pule ʻa Siholame+ ko e foha ʻo Sihosafate ko e tuʻi ʻo Siutá.

18 Ko e meʻa ki he toenga ʻo e hisitōlia ʻo ʻAhasaiá,+ mo e meʻa naʻá ne faí, ʻikai kuo hiki ia ʻi he tohi ʻo e hisitōlia ʻo e taimi ʻo e ngaahi tuʻi ʻo ʻIsilelí?

2 ʻI he taimi naʻe teu ke ʻohake ai ʻe Sihova ʻa ʻIlaisiā+ ki he langí* ʻi ha fuʻu matangí,+ naʻe ʻalu atu ʻa ʻIlaisiā mo ʻIlaisa+ mei Kilikali.+ 2 Naʻe pehē ange ʻe ʻIlaisiā kia ʻIlaisa: “Nofo muʻa ʻi heni, koeʻuhí kuo fekauʻi au ʻe Sihova ki Pēteli.” Ka naʻe pehē ange ʻe ʻIlaisa: “ʻOku ou fuakava ʻia Sihova ko e ʻOtua moʻuí pea ʻiate koe, heʻikai te u mavahe meiate koe.” Ko ia naʻá na ʻalu hifo ai ki Pēteli.+ 3 Pea naʻe haʻu ʻa e ngaahi foha ʻo e kau palōfita* ʻi Pētelí kia ʻIlaisa ʻo nau pehē kiate ia: “ʻOkú ke ʻiloʻi koā ʻe ʻave ʻe Sihova ho ʻeikí he ʻahó ni mei heʻene hoko ko e pule kiate koé?”+ ʻI he meʻá ni naʻá ne pehē ange: “ʻOku ou ʻosi ʻilo ia ʻe au. Mou fakalongolongo.”

4 Naʻe pehē ange leva ʻe ʻIlaisiā kiate ia: “ʻIlaisa, nofo muʻa ʻi heni, koeʻuhí kuo fekauʻi au ʻe Sihova ki Sielikō.”+ Ka naʻá ne pehē ange: “ʻOku ou fuakava ʻia Sihova ko e ʻOtua moʻuí pea ʻiate koe, heʻikai te u mavahe meiate koe.” Ko ia naʻá na ʻalu atu ki Sielikō. 5 Pea ko e ngaahi foha ʻo e kau palōfitá ʻa ia naʻa nau ʻi Sielikoó naʻa nau fakaofiofi mai kia ʻIlaisa ʻo nau pehē ange kiate ia: “ʻOkú ke ʻiloʻi koā ʻe ʻave ʻe Sihova ho ʻeikí he ʻahó ni mei heʻene hoko ko e pule kiate koé?” ʻI he meʻá ni naʻá ne pehē ange: “ʻOku ou ʻosi ʻilo ia ʻe au. Mou fakalongolongo.”

6 Pea naʻe pehē ange ʻe ʻIlaisiā kiate ia: “Nofo muʻa ʻi heni, koeʻuhí kuo fekauʻi au ʻe Sihova ki Sioatani.” Ka naʻá ne pehē ange: “ʻOku ou fuakava ʻia Sihova ko e ʻOtua moʻuí pea ʻiate koe, heʻikai te u mavahe meiate koe.” Ko ia naʻá na fakatou ʻalu atu. 7 Pea ko e toko 50 ʻo e ngaahi foha ʻo e kau palōfitá naʻa nau ʻalu atu foki mo kinautolu ʻo tuʻu mei he mamaʻó ʻo sio atu lolotonga ia ʻena tuʻu ʻi he veʻe Sioataní. 8 Pea naʻe toʻo ʻe ʻIlaisiā ʻa hono kofu fakapalōfitá+ ʻo takatakaiʻi ia peá ne taaʻi ʻaki ʻa e vaí, pea naʻe mavaeua ia ki he toʻohemá pea ki he toʻomataʻú, ko ia naʻá na fakatou kolosi atu ai ʻi he kelekele mōmoá.+

9 ʻI heʻena kolosi atu pē ki he tafaʻaki ʻe tahá, naʻe pehē ange ʻe ʻIlaisiā kia ʻIlaisa: “Kole mai pe ko e hā ʻa e meʻa ʻokú ke loto ke u fai maʻau ki muʻa ke ʻave au meiate koé.” Ko ia naʻe pehē ange ʻe ʻIlaisa: “Kātaki, ʻe lava ke u maʻu ha ʻinasi lōua*+ mei ho laumālié?”*+ 10 Naʻá ne tali ange: “Kuó ke kole ha meʻa faingataʻa. Kapau te ke sio kiate au ʻi he taimi ʻe ʻave ai au meiate koé, ʻe hoko atu kiate koe ʻa hoʻo kolé; ka ʻo kapau ʻe ʻikai te ke sio kiate au, ʻe ʻikai ke hoko ia.”

11 ʻI heʻena fononga atu mo talatalanoá, fakafokifā pē naʻe fakamavaeuaʻi kinaua ʻe ha saliote afi mo ha fanga hoosi afi,+ pea naʻe ʻohake ʻa ʻIlaisiā ki he langí* ʻi he fuʻu matangí.+ 12 ʻI he kei sio ʻa ʻIlaisá, naʻá ne kalanga: “ʻA ʻeku tamai, ʻa ʻeku tamai! Ko e saliote ʻa ʻIsilelí mo ʻene kau tangata heka hōsí!”+ ʻI he ʻikai kei lava ke ne sio kiate iá, naʻá ne ala ki hono ngaahi kofú ʻo ne hae ia ʻo konga ua.+ 13 ʻI he hili iá, naʻá ne toʻo hake ʻa e kofu fakapalōfita+ ʻo ʻIlaisiaá ʻa ia naʻe tō hifo meiate iá peá ne foki ʻo tuʻu ʻi he veʻe Sioataní. 14 Naʻá ne toʻo leva ʻa e kofu fakapalōfita ʻo ʻIlaisiaá ʻa ia naʻe tō hifo meiate iá ʻo ne taaʻi ʻaki ʻa e vaí peá ne pehē: “Ko fē ʻa Sihova, ko e ʻOtua ʻo ʻIlaisiaá?” ʻI heʻene taaʻi ʻa e vaí, naʻe mavaeua ia ki he toʻohemá pea ki he toʻomataʻú, ko ia naʻe kolosi atu ʻa ʻIlaisa ki he tafaʻaki ʻe tahá.+

15 ʻI he sio atu kiate ia mei he mamaʻó ʻa e ngaahi foha ʻo e kau palōfita naʻa nau ʻi Sielikoó, naʻa nau pehē: “Kuo ʻia ʻIlaisa+ ʻa e laumālie ʻo ʻIlaisiaá.” Ko ia naʻa nau ʻalu atu ke fakafetaulaki kiate ia ʻo nau punou ki he kelekelé ʻi muʻa ʻiate ia. 16 Naʻa nau pehē kiate ia: “Ko e kau tangata lavameʻa eni ʻe toko 50 ʻoku ʻi hoʻo kau sevānití. Tuku muʻa ke nau ʻalu ʻo kumi ho ʻeikí. Naʻa kuo ʻohake ia ʻe he laumālie* ʻo Sihová pea lī ia ki he taha ʻo e ngaahi moʻungá pe ki he taha ʻo e ngaahi teleʻá.”+ Ka naʻá ne pehē ange: “ʻOua te mou fekau kinautolú.” 17 Kae kehe, naʻa nau hanganaki tenge ia ʻo aʻu ki heʻene mā, ko ia naʻá ne pehē ange: “Fekau atu ke nau ō.” Naʻa nau fekauʻi atu ʻa e kau tangata ʻe toko 50, ʻa ia naʻa nau hokohoko atu ke kumi ʻi he ʻaho ʻe tolu ka naʻe ʻikai te nau ʻilo ia. 18 ʻI heʻenau foki atu kiate iá, naʻá ne kei nofo pē ʻi Sielikō.+ Naʻá ne pehē ange leva kiate kinautolu: “ʻIkai naʻá ku tala atu ke ʻoua te mou ō?”

19 Naʻe faai atu ʻo pehē ʻe he kau tangata ʻo e koló kia ʻIlaisa: “ʻOku lava ke sio homau ʻeikí ʻoku lelei ʻa e tuʻuʻanga+ ʻo e koló; ka ko e vaí ʻoku kovi, pea ko e kelekelé ʻoku kakā.”* 20 Ko ia naʻá ne pehē ange: “ʻOmi kiate au ha kiʻi foʻi poulu foʻou pea ʻai ki ai ha māsima.” Ko ia naʻa nau ʻoatu ia kiate ia. 21 Naʻá ne ʻalu atu leva ki he vaí ʻo ne laku ha māsima ki ai+ peá ne pehē: “Ko e folofola eni ʻa Sihová, ‘Kuó u ʻai ke maʻa ʻa e vai ko ení. ʻE ʻikai te ne toe fakatupunga ha mate pe kakā.’”* 22 Pea naʻe maʻa ʻa e vaí ʻo aʻu mai ki he ʻahó ni, ʻo fakatatau ki he lea naʻe fai ʻe ʻIlaisá.

23 Naʻá ne ʻalu hake mei ai ki Pēteli. ʻI heʻene fononga atu ʻi he halá, naʻe hū ki tuʻa mei he koló ha fanga kiʻi tamaiki tangata ʻo kamata ke nau kape kiate ia,+ pea naʻa nau toutou pehē atu kiate ia: “ʻAlu hake, ʻa koe ʻulu tula! ʻAlu hake, ʻa koe ʻulu tula!” 24 Naʻe faifai pē ʻo ne tafoki hake ʻo hanga atu kiate kinautolu peá ne talatukiʻi kinautolu ʻi he huafa ʻo Sihová. Pea naʻe hū mai ha ongo pea fefine+ mei he vaotaá ʻo na haehae ha toko 42 ʻi he fānaú.+ 25 Naʻe hokohoko atu ʻene fonongá mei ai ki Moʻunga Kāmeli,+ pea naʻá ne foki mei ai ki Samēlia.

3 Ko Siholame+ ko e foha ʻo ʻĒhapí naʻá ne hoko ko e tuʻi ki ʻIsileli ʻi Samēlia ʻi he taʻu hono 18 ʻo e pule ʻa Tuʻi Sihosafate ʻo Siutá, pea naʻá ne pule ʻi he taʻu ʻe 12. 2 Naʻá ne hanganaki fai ʻa e meʻa naʻe kovi ʻi he vakai ʻa Sihová, ka naʻe ʻikai aʻu ia ki he kovi ʻa ʻene tamaí pe ko ʻene faʻeé, he naʻá ne holoki ʻa e pou maka toputapu ʻo Pēalí ʻa ia naʻe ngaohi ʻe heʻene tamaí.+ 3 Kae kehe, naʻá ne pīkitai ki he ngaahi angahala naʻe fakatupunga ʻe Selopoame ko e foha ʻo Nīpatí ke fai ʻe ʻIsilelí.+ Naʻe ʻikai te ne mavahe mei ai.

4 Pea ko Mesa ko e tuʻi ʻo Mōapé ko ha tokotaha tauhi-sipi, pea naʻá ne faʻa ʻoatu ʻa e lami ʻe 100,000 mo e sipi tangata teʻeki kosi ʻe 100,000 ko ha tukuhau ki he tuʻi ʻo ʻIsilelí. 5 ʻI he mate pē ʻa ʻĒhapí,+ naʻe angatuʻu ʻa e tuʻi ʻo Mōapé ki he tuʻi ʻo ʻIsilelí.+ 6 Ko ia naʻe ʻalu atu ʻa Tuʻi Siholame ʻi he ʻaho ko iá mei Samēlia ʻo ne ui ke fakatahataha mai ʻa ʻIsileli kotoa. 7 Naʻá ne toe ʻoatu ha fekau kia Tuʻi Sihosafate ʻo Siutá, ʻo pehē: “Kuo angatuʻu kiate au ʻa e tuʻi ʻo Mōapé. Te ke ʻalu mo au ʻo tauʻi ʻa Mōape?” ʻI he meʻá ni naʻá ne pehē ange: “Te u ʻalu.+ Ko koe mo aú ʻokú ta taha. Ko ho kakaí mo hoku kakaí ʻoku nau taha foki, ʻo kau ai ʻa hoʻo fanga hōsí mo ʻeku fanga hōsí.”+ 8 Naʻá ne ʻeke ange leva: “Ko e hala fē te ta ʻalu hake aí?” Naʻá ne tali ange: “ʻI he hala ʻo e toafa ʻo ʻĪtomí.”

9 Naʻe ʻalu atu leva ʻa e tuʻi ʻo ʻIsilelí mo e tuʻi ʻo Siutá pea mo e tuʻi ʻo ʻĪtomí.+ ʻI he hili ʻenau fononga ʻo takai ʻi he ʻaho ʻe fitu, naʻe ʻikai ha vai maʻá e kau taú mo e fanga manu lalata naʻe muimui atu ʻiate kinautolú. 10 Naʻe pehē ʻe he tuʻi ʻo ʻIsilelí: “He meʻa fakamamahi moʻoni! Kuo ui ʻe Sihova ʻa e tuʻi ʻe toko tolu ko ení, koeʻuhí pē ke tuku atu kinautolu ki he nima ʻo Mōapé!” 11 Ko ia naʻe pehē ai ʻe Sihosafate: “ʻOku hala koā ha palōfita ia ʻa Sihova ʻi heni ʻe lava ke tau fai ai ha fehuʻi kia Sihova+ fakafou ʻiate ia?” Ko ia naʻe tali atu ʻe he taha ʻo e kau sevāniti ʻa e tuʻi ʻo ʻIsilelí: “ʻOku ʻi heni ʻa ʻIlaisa+ ko e foha ʻo Safatí, ʻa ia naʻá ne faʻa lingi ʻa e vaí ki he nima ʻo ʻIlaisiaá.”*+ 12 Naʻe pehē ange leva ʻe Sihosafate: “ʻOku ʻiate ia ʻa e folofola ʻa Sihová.” Ko ia naʻe ʻalu hifo ʻa e tuʻi ʻo ʻIsilelí mo Sihosafate pea mo e tuʻi ʻo ʻĪtomí kiate ia.

13 Naʻe pehē ange ʻe ʻIlaisa ki he tuʻi ʻo ʻIsilelí: “Ko e hā ʻeku kaunga kiate koé?*+ ʻAlu ki he kau palōfita ʻa hoʻo tamaí pea ki he kau palōfita ʻa hoʻo faʻeé.”+ Ka naʻe pehē ange ʻe he tuʻi ʻo ʻIsilelí kiate ia: “ʻIkai, he ko Sihova ia kuó ne ui ʻa e tuʻi ʻe toko tolu ko ení ke tuku atu kinautolu ki he nima ʻo Mōapé.” 14 ʻI he meʻá ni naʻe pehē ange ʻe ʻIlaisa: “ʻOku ou fuakava ʻia Sihova ʻo e ngaahi kau tau ʻa ia ʻoku ou tauhi ki aí,* kapau naʻe ʻikai te u tokaʻi ʻa Tuʻi Sihosafate+ ʻo Siutá, ʻe ʻikai te u sio atu kiate koe pe tokanga atu kiate koe.+ 15 Pea ko eni, ʻomi kiate au ha tokotaha tā haʻape.”*+ ʻI he kamata pē ke tā ʻe he tokotaha tā haʻapé ʻa e haʻapé, naʻe hoko hifo kia ʻIlaisa+ ʻa e nima ʻo Sihová. 16 Naʻá ne pehē ange, “Ko e folofola eni ʻa Sihová: ‘Keli ha ngaahi luo ʻi he teleʻá ni,* 17 he ko e folofola eni ʻa Sihová: “ʻE ʻikai te mou sio ʻoku havili, pea ʻe ʻikai te mou sio ki ha ʻuha; ka neongo ia ʻe fakafonu vai+ ʻa e teleʻá ni,* pea te mou inu mei ai, ʻa kimoutolu mo hoʻomou fanga manú, pea mo hoʻomou fanga manu kehé.”’ 18 Ka ko ha meʻa siʻi pē eni ia ʻi he vakai ʻa Sihová,+ he te ne tuku atu foki ʻa Mōape ki homou nimá.+ 19 Kuo pau ke mou holoki ʻa e kolo fakakolotau+ kotoa pē mo e kolo lelei taha kotoa pē, te mou tā hifo ʻa e ʻakau lelei kotoa pē, te mou tanu ʻa e ngaahi matavai kotoa pē, pea te mou maumauʻi ʻa e konga kelekele lelei kotoa pē ʻaki ʻa e ngaahi maka.”+

20 Pea ʻi he pongipongí, ʻi he taimi ʻo e feilaulau meʻakai*+ pongipongí, fakafokifā naʻe haʻu ha vai mei he feituʻu ʻo ʻĪtomí, pea naʻe hoko ʻo fonu ʻa e fonuá ʻi he vaí.

21 Naʻe fanongo ʻa e kau Mōapé kotoa kuo ʻalu hake ʻa e ngaahi tuʻí ke faitau mo kinautolu, ko ia naʻa nau ui ai ke fakatahataha mai ʻa e kau tangata kotoa pē naʻe lava ke toʻo meʻataú,* pea nau ō atu ʻo tuʻu ʻi he kauʻāfonuá. 22 ʻI heʻenau tuʻu pongipongia haké, naʻe ulo mai ʻa e laʻaá ki he vaí, pea naʻe hā kulokula ʻa e vaí ia ʻo hangē ha totó ki he kau Mōapé ʻi he tafaʻaki ʻe tahá. 23 Naʻa nau pehē: “Ko e toto eni! Kuo pau pē naʻe fetāmateʻaki ʻa e ngaahi tuʻí ʻaki ʻa e heletaá. Ko ia, tau ō atu leva ki he koloa veté,*+ ʻe Mōape!” 24 ʻI heʻenau aʻu atu ki he ʻapitanga ʻo ʻIsilelí, naʻe tuʻu hake ʻa e kau ʻIsilelí pea kamata ke nau taaʻi ʻa e kau Mōapé, pea naʻa nau hola meiate kinautolu.+ Naʻa nau hoko atu ai pē ki Mōape, ʻo taaʻi ai pē ʻa e kau Mōapé mo nau ʻalu atu. 25 Naʻa nau holoki ʻa e ngaahi koló, pea naʻe laku ʻe he tangata taki taha ha maka ki he konga kelekele lelei kotoa pē, ʻo fakafonu maka ia; naʻa nau tanu ʻa e matavai kotoa pē,+ pea naʻa nau tā hifo ʻa e ʻakau lelei kotoa pē.+ Pea ko e ngaahi ʻā maka pē ʻo Kili-halesetí+ naʻe kei tuʻú, pea naʻe ʻātakaiʻi ia ʻe he kau makataá ʻo nau holoki ia.

26 ʻI he sio ʻa e tuʻi ʻo Mōapé naʻe foʻi ʻa e taú, naʻá ne ʻalu mo ha kau tangata toʻo heletā ʻe toko 700 ke nau hū atu ki he tuʻi ʻo ʻĪtomí;+ ka naʻe ʻikai te nau lava. 27 Ko ia naʻá ne toʻo hono ʻuluaki fohá ʻa ia naʻe teu ke pule ʻo fetongi iá ʻo ne ʻoatu ia ko ha feilaulau tutu+ ʻi he funga ʻaá. Pea naʻe hoko ai ha fuʻu ʻita lahi ki ʻIsileli, ko ia naʻe mavahe ai ʻa ʻIsileli meiate ia ʻo nau foki ki honau fonuá.

4 Pea ko e taha ʻi he ngaahi uaifi ʻo e ngaahi foha ʻo e kau palōfitá+ naʻá ne kaila atu kia ʻIlaisa, ʻo ne pehē: “Kuo mate ʻa hoʻo sevāniti ko hoku husepānití, pea ʻokú ke ʻiloʻi lelei naʻe manavahē maʻu pē ʻa hoʻo sevānití kia Sihova.+ Pea ko eni kuo haʻu ha tokotaha naʻe ʻi ai homa moʻua ki ai ke ʻave ʻa ʻeku ongo tamaikí fakatouʻosi ke hoko ko ʻene ongo tamaioʻeiki.” 2 ʻI he meʻá ni naʻe pehē ange ʻe ʻIlaisa kiate ia: “Ko e hā ʻe lava ke u fai maʻaú? Tala mai angé, ko e hā ha meʻa ʻokú ke maʻu ʻi ho falé?” Naʻá ne tali ange: “ʻOku halaʻatā ha meʻa ʻa hoʻo sevānití ʻi he falé ka ko ha siā+ lolo pē.” 3 Naʻá ne pehē ange leva: “Hū ki tuʻa ʻo kole ha ngaahi ʻaiʻanga meʻa mei ho ngaahi kaungāʻapí kotoa, ha ngaahi ngeʻesi ʻaiʻanga meʻa. ʻOua naʻá ke ʻomi fakasiʻisiʻi ia. 4 Peá ke hū leva ki fale ʻo ke tāpuniʻi atu ʻa e matapaá ʻokú ke ʻi loto ai mo hoʻo ongo tamá. Fakafonu ʻa e ngaahi ʻaiʻanga meʻa kotoa ko ení, peá ke tuku ki he tafaʻakí ʻa e ngaahi ʻaiʻanga meʻa kuo fonú.” 5 Ko ia naʻe mavahe ʻa e fefiné meiate ia.

ʻI heʻene tāpuniʻi atu ʻa e matapaá ʻokú ne ʻi loto ai mo ʻene ongo tamá, naʻá na fetuku ange ʻa e ngaahi ʻaiʻanga meʻá kiate ia, pea naʻá ne hanganaki ʻutu ia.+ 6 ʻI he fonu ʻa e ngaahi ʻaiʻanga meʻá, naʻá ne pehē ange ki he taha ʻo ʻene ongo tamá: “Toe ʻomi ha ʻaiʻanga meʻa ʻe taha kiate au.”+ Ka naʻá ne pehē ange kiate ia: “ʻOku ʻikai ke toe ʻi ai ha ʻaiʻanga meʻa.” Ko ia naʻe tuʻu ai ʻa e haʻu ʻa e loló.+ 7 Naʻá ne ʻalu atu ai ʻo tala ki he tangata ʻa e ʻOtua moʻoní, pea naʻá ne pehē ange: “ʻAlu ʻo fakatau atu ʻa e loló pea totongi ho moʻuá, pea ʻe lava ke ke moʻui mo hoʻo ongo tamá mei he meʻa ʻoku toé.”

8 ʻI he ʻaho ʻe taha naʻe ʻalu ai ʻa ʻIlaisa ki Sūnemi,+ ʻa ia naʻe ʻi he feituʻú ni ha fefine naʻe fakaʻapaʻapaʻi, pea naʻe vilitaki ange ʻa e fefiné ke ne maʻu meʻatokoni ʻi ai.+ ʻI heʻene faʻa fou atu aí, naʻá ne faʻa afe ai ʻo kai. 9 Ko ia naʻe pehē ange ʻe he fefiné ki hono husepānití: “ʻOku ou ʻiloʻi ko ha tangata māʻoniʻoni eni ʻa e ʻOtuá ʻoku faʻa fou mai hení. 10 Tuku muʻa ke ta ngaohi ha kiʻi loki ʻi he funga falé+ pea tuku ki ai hano mohenga, mo ha tēpile, mo ha sea pea mo haʻane tuʻunga-maama. Pea ʻi ha taimi pē ʻe haʻu ai kiate kitauá, ʻe lava ke ne nofo ai.”+

11 ʻI he ʻaho ʻe taha naʻá ne ʻalu atu ki ai, pea naʻá ne ʻalu hake ki he loki ʻi he funga falé ʻo ne tokoto ai. 12 Naʻá ne pehē ange leva kia Kēhesi+ ko hono tauhí: “Ui mai ʻa e fefine Sūnemi+ ko ená.” Ko ia naʻá ne ui mai ia, pea naʻá ne tuʻu ʻi muʻa ʻiate ia. 13 Pea naʻá ne pehē ange kia Kēhesi: “Tala ange muʻa kiate ia, ‘Ko eni kuó ke helaʻia ʻi hono fai ʻa e fuʻu meʻá ni kotoa maʻamaua.+ Ko e hā ʻe lava ke fai maʻaú?+ Te u lea maʻau ki he tuʻí+ pe ki he ʻeikitaú?’” Ka ko ʻene talí eni: “ʻOku ou nofo pē au ʻi he lotolotonga ʻo hoku kakaí tonu.” 14 Ko ia naʻe pehē ange ʻe ʻIlaisa: “Pea ko e hā ʻe lava ke fai maʻaná?” Naʻe pehē ange leva ʻe Kēhesi: “Ko eni, ʻoku ʻikai haʻane tama,+ pea kuo motuʻa ʻa hono husepānití.” 15 Naʻá ne pehē ange ʻi he taimi pē ko iá: “Ui mai ia.” Ko ia naʻá ne ui mai ia, pea naʻá ne tuʻu ʻi he hūʻangá. 16 Naʻá ne pehē ange leva: “ʻI he taimi ko ení ʻi he taʻu kahaʻú, te ke maʻu ai ha tama.”+ Ka naʻá ne pehē ange: “ʻIkai, ʻe hoku ʻeiki, tangata ʻa e ʻOtua moʻoní! ʻOua te ke loi ki hoʻo sevānití.”

17 Kae kehe, naʻe feitama ʻa e fefiné peá ne fāʻeleʻi ha tamasiʻi ʻi he taimi tatau pē ʻi he taʻu hono hokó, ʻo hangē tofu pē ko e meʻa naʻe tala ange ʻe ʻIlaisa kiate iá. 18 Naʻe tupu hake ʻa e kiʻi tamá, pea ʻi he ʻaho ʻe taha naʻá ne ʻalu atu ai ki heʻene tamaí, ʻa ia naʻá ne ʻi he kau tuʻusí. 19 Naʻá ne toutou pehē ki heʻene tamaí: “Hoku ʻulú, ʻoiauē hoku foʻi ʻulú!” Naʻe pehē ange leva ʻe heʻene tamaí ki he tamaioʻeikí: “Fua ia ʻo ʻave ki heʻene faʻeé.” 20 Ko ia naʻá ne fua ia ʻo fakafoki ki heʻene faʻeé, pea naʻá ne huki ʻi hono fungá ʻo aʻu ki heʻene hoʻatā, peá ne toki mate.+ 21 Naʻá ne ʻalu hake leva ʻo fakatokoto ia ʻi he mohenga ʻo e tangata ʻa e ʻOtua moʻoní,+ peá ne tāpuniʻi mai ʻa e matapaá peá ne mavahe. 22 Pea naʻá ne ui ʻa hono husepānití ʻo ne pehē: “Fekauʻi mai muʻa kiate au ha taha ʻo e kau tamaioʻeikí pea mo ha ʻasi ʻe taha, pea tuku ke u ʻalu fakavave ki he tangata ʻa e ʻOtua moʻoní peá u toki foki mai.” 23 Ka naʻá ne pehē: “Ko e hā ʻokú ke ʻalu ai he ʻahó ni ke sio kiate iá? ʻOku ʻikai ko ha māhina foʻou+ eni pe ko ha Sāpate.”* Kae kehe, naʻá ne pehē ange: “ʻOku lelei pē ʻa e meʻa kotoa.” 24 Ko ia naʻá ne teuteu ʻa e ʻasí peá ne pehē ki heʻene tamaioʻeikí: “ʻAlu atu ke vave. ʻOua te ke fakamāmālie koeʻuhi ko au, tuku kehe pē kapau te u toki tala atu.”

25 Ko ia naʻá ne ʻalu ki he tangata ʻa e ʻOtua moʻoní ki Moʻunga Kāmeli. ʻI he sio atu pē ʻa e tangata ʻa e ʻOtua moʻoní kiate ia mei he mamaʻó, naʻá ne pehē ange kia Kēhesi ko hono tauhí: “Sio atu! Ko e fefine Sūnemí ena. 26 Lele muʻa ʻo fakafetaulaki kiate ia peá ke ʻeke ange, ‘ʻOkú ke sai pē? ʻOku sai pē ho husepānití? ʻOku sai pē ʻa hoʻo tamá?’” ʻI he meʻá ni naʻá ne pehē mai: “ʻOku sai pē ʻa e meʻa kotoa.” 27 ʻI he aʻu atu ʻa e fefiné ki he tangata ʻa e ʻOtua moʻoní ʻi he moʻungá, naʻá ne puke ʻi he taimi pē ko iá ʻa e vaʻe+ ʻo ʻIlaisá. ʻI he meʻá ni naʻe fakaofi atu ʻa Kēhesi ke tekeʻi mamaʻo ia, ka naʻe pehē ange ʻe he tangata ʻa e ʻOtua moʻoní: “Tuku ai pē ia, he ʻokú ne loto-mamahi lahi, pea kuo fufū ia ʻe Sihova meiate au ʻo ʻikai te ne fakahā kiate au.” 28 Naʻá ne pehē ange leva: “Naʻá ku kole koā ki hoku ʻeikí ha tama? ʻIkai naʻá ku pehē atu, ‘Kuo pau ke ʻoua naʻá ke fakafehālaakiʻi ʻa ʻeku ʻamanakí’?”+

29 Naʻá ne pehē ange ʻi he taimi pē ko iá kia Kēhesi: “Takaiʻi ho ngaahi kofú ʻi ho kongalotó+ peá ke toʻo hoku tokotokó ʻi ho nimá peá ke ʻalu. Kapau te ke fetaulaki mo ha taha pē, ʻoua naʻá ke lea fakafeʻiloaki kiate ia; pea kapau ʻe lea fakafeʻiloaki kiate koe ha taha pē, ʻoua ʻe fai ha tali kiate ia. ʻAlu ʻo hili hoku tokotokó ʻi he mata ʻo e tamasiʻí.” 30 ʻI he meʻá ni naʻe pehē ange ʻe he faʻē ʻa e tamasiʻí: “ʻOku ou fuakava ʻia Sihova ko e ʻOtua moʻuí pea ʻoku ou fakapapau atu kiate koe, ʻe ʻikai te u mavahe meiate koe.”+ Ko ia naʻe tuʻu hake ʻa ʻIlaisa ʻo ʻalu mo ia. 31 Naʻe muʻomuʻa atu ʻa Kēhesi ʻiate kinaua ʻo ne hili ʻa e tokotokó ʻi he mata ʻo e tamasiʻí, ka naʻe ʻikai ongo mai ha leʻo pe ko haʻane ngaue.+ Naʻá ne foki atu ke fakafetaulaki kia ʻIlaisa ʻo ne pehē kiate ia: “Naʻe ʻikai ke ʻā hake ʻa e tamasiʻí ia.”

32 ʻI he aʻu atu ʻa ʻIlaisa ki he falé, naʻe tokoto mai ʻa e tamasiʻí ʻi hono mohengá+ kuó ne mate. 33 Naʻá ne hū ki loto ʻo ne tāpuniʻi atu ʻa e matapaá pea naʻe kamata ke ne lotu kia Sihova.+ 34 Naʻá ne ʻalu hake leva ki he funga mohengá ʻo ne tokoto hifo ʻi he kiʻi tamá peá ne ʻai hono ngutú ki he ngutu ʻo e tamasiʻí, mo hono matá ki hono matá, pea mo hono ʻaofinimá ki hono ʻaofinimá peá ne hanganaki punou hifo ʻiate ia, pea naʻe kamata ke māfana+ ʻa e sino ʻo e kiʻi tamá. 35 Naʻá ne felueʻaki ʻi he falé, peá ne ʻalu hake ki he funga mohengá ʻo ne toe punou hifo ʻiate ia. Naʻe mafatua tuʻo fitu ʻa e tamasiʻí, pea ʻi he hili iá naʻá ne ʻāʻā hake.+ 36 Naʻe ui leva ʻe ʻIlaisa ʻa Kēhesi peá ne pehē: “Ui mai ʻa e fefine Sūnemí.” Ko ia naʻá ne ui ia peá ne hū mai kiate ia. Naʻá ne pehē ange leva: “Fua hake hoʻo tamá.”+ 37 Pea naʻá ne hū atu ʻo ne tō ʻi hono veʻe vaʻé ʻo ne punou hifo ki he kelekelé ʻi muʻa ʻiate ia, pea ʻi he hili iá naʻá ne fua hake ʻene tamá ʻo ne hū ki tuʻa.

38 ʻI he foki ʻa ʻIlaisa ki Kilikalí, naʻe hoko ha honge ʻi he fonuá.+ Ko e ngaahi foha ʻo e kau palōfitá+ naʻa nau tangutu ʻi hono ʻaó, pea naʻá ne pehē ki hono tauhí:+ “Tuʻu atu ʻa e kulo lahí pea ngaohi ha supo maʻá e ngaahi foha ʻo e kau palōfitá.” 39 Ko ia naʻe ʻalu atu hanau toko taha ki he vaó ke paki mai ha fanga kiʻi lauʻiʻakau fakanamulelei, peá ne ʻilo ai ha ʻakau vao ʻo ne toli ʻa hono fuá, peá ne faʻo ʻo fonu ʻa hono kofú. Naʻá ne foki leva ʻo ne hifi ia ki he kulo supó, pea naʻe ʻikai te ne ʻilo pe ko e hā ia. 40 Ki mui ai, naʻa nau ʻoatu ia ki he kau tangatá ke nau kai, ka ʻi heʻenau kai pē ʻa e supó, naʻa nau kaila: “ʻOku ʻi ai ha meʻa fakatupu mate ʻi he kuló, ʻe tangata ʻa e ʻOtua moʻoní.” Pea naʻe ʻikai kei lava ke nau kai ia. 41 Ko ia naʻá ne pehē ange: “ʻOmi ha meʻi mahoaʻa.” ʻI he hili ʻene laku ia ki he kuló, naʻá ne pehē: “ʻOatu ia ki he kakaí.” Pea naʻe ʻikai ha toe meʻa fakatupu mate ʻi he kuló.+

42 Naʻe haʻu ha tangata mei Pēali-salisa,+ peá ne ʻomi ki he tangata ʻa e ʻOtua moʻoní ha foʻi mā paʻale+ ʻe 20 naʻe ngaohi mei he ʻuluaki fua ʻo e paʻale kuo motuʻá, pea pehē ki ha tangai ʻoku ʻi ai ʻa e uite foʻou.+ Naʻe pehē ange leva ʻe ʻIlaisa: “ʻOatu ia ki he kakaí ke nau kai.” 43 Kae kehe, naʻe pehē ange ʻe hono tauhí: “ʻE lava fēfē ke u ʻoatu eni ki ha kau tangata+ ʻe toko 100?” ʻI he meʻá ni naʻá ne pehē ange: “ʻOatu ia ki he kakaí ke nau kai, he ko e folofola eni ʻa Sihová, ‘Te nau kai pea ʻe toe mei ai ha meʻa.’”+ 44 Ko ia naʻá ne tuku atu ia ʻi muʻa ʻiate kinautolu, pea nau kai pea naʻe toe mei ai ha meʻa,+ ʻo fakatatau ki he folofola ʻa Sihová.

5 Pea ko Neamani ko e ʻeikitau ʻa e tuʻi ʻo Sīliá ko ha tangata tuʻu-ki-muʻa ia ʻa ia naʻe tokaʻi lahi ʻe hono ʻeikí, koeʻuhí naʻe ʻoange ʻe Sihova fakafou ʻiate ia ha ikuna* ki Sīlia. Ko ha tangata toʻa ia ʻi he taú, neongo naʻá ne kilia.* 2 ʻI he taha ʻo e ngaahi ʻohofi naʻe fai ʻe he kau Sīliá, naʻa nau ʻave pōpula ai mei he fonua ʻo ʻIsilelí ha kiʻi taʻahine ʻa ia naʻá ne hoko ko ha sevāniti ʻa e uaifi ʻo Neamaní. 3 Naʻá ne pehē ange ki hono pulé: “Pehē ange mai naʻe ʻaʻahi ʻa hoku ʻeikí ki he palōfita+ ʻi Samēliá! Te ne fakamoʻui leva ia mei hono kiliá.”+ 4 Ko ia naʻá ne* ʻalu ʻo ne fakahā ia ki hono ʻeikí, ʻo ne tala ange kiate ia ʻa e meʻa naʻe leaʻaki ʻe he kiʻi taʻahine mei ʻIsilelí.

5 Naʻe pehē ange leva ʻe he tuʻi ʻo Sīliá: “ʻAlu leva he taimí ni! Pea te u ʻave ai ha tohi ki he tuʻi ʻo ʻIsilelí.” Ko ia naʻá ne ʻalu, ʻo ne ʻave ha talēniti* siliva ʻe hongofulu, ngaahi konga koula ʻe 6,000, pea mo ha teunga ʻe hongofulu. 6 Naʻá ne ʻave ki he tuʻi ʻo ʻIsilelí ʻa e tohí, ʻa ia naʻe pehē ai: “ʻOku ou fekauʻi atu ʻa ʻeku sevāniti ko Neamaní fakataha mo e tohi ko eni ʻoku ʻoatu kiate koé, koeʻuhí ke ke fakamoʻui ia mei hono kiliá.” 7 ʻI hono lau pē ʻe he tuʻi ʻo ʻIsilelí ʻa e tohí, naʻá ne hae hono ngaahi kofú peá ne pehē: “Ko ha ʻOtua koā au ke u fai hano tāmateʻi pea ke u fai hano fakamoʻui?+ He kuó ne fekauʻi mai ʻa e tangatá ni kiate au, ʻo tala mai ke u fakamoʻui ia mei hono kiliá! ʻOku lava ke mou sio tonu ʻokú ne feinga maí ke ma kē.”

8 Ka ʻi he fanongo ʻa ʻIlaisa ko e tangata ʻa e ʻOtua moʻoní ki he hae ʻe he tuʻi ʻo ʻIsilelí ʻa hono ngaahi kofú, naʻá ne fai atu ha fekau ʻi he taimi pē ko iá ki he tuʻí: “Ko e hā naʻá ke hae ai ho ngaahi kofú? Tuku muʻa ke ne haʻu kiate au koeʻuhí ke ne ʻilo ʻoku ʻi ai ha palōfita ʻi ʻIsileli.”+ 9 Ko ia naʻe ʻalu atu ʻa Neamani mo ʻene fanga hōsí mo ʻene ngaahi saliote taú ʻo tuʻu ʻi he hūʻanga ki he fale ʻo ʻIlaisá. 10 Kae kehe, naʻe fekau atu ʻe ʻIlaisa ha talafekau ke tala kiate ia: “ʻAlu ʻo kaukau tuʻo fitu+ ʻi Sioatani,+ pea ʻe foki mai ho kakanó, pea te ke maʻa.” 11 ʻI he meʻá ni naʻe ʻita ʻa Neamani pea kamata ke ne mavahe, ʻo ne pehē: “Ko eni naʻá ku pehē ʻe aú, ‘Te ne hū mai ki tuʻa kiate au ʻo ne tuʻu heni pea tautapa ʻi he huafa ʻo Sihova ko hono ʻOtuá, ʻo ne ueʻi hono nimá ki tafaʻaki mo tafaʻaki ʻi he kiliá ke fakamoʻui ia.’ 12 ʻIkai ʻoku lelei ange ʻa ʻApana pea mo Papa, ʻa e ongo vaitafe ʻo Tāmasikusí+ ʻi he ngaahi vai kotoa ʻo ʻIsilelí? ʻIkai ʻe lava ke u kaukau ai peá u hoko ʻo maʻa?” Ko ia naʻá ne tafoki ʻo ne ʻalu kuó ne tōlili.

13 Naʻe fakaofi atu leva ʻene kau sevānití kiate ia ʻo pehē: “ʻA ʻeku tamai, kapau naʻe tala atu ʻe he palōfitá ke ke fai ha meʻa lahi fau, ʻikai nai naʻá ke mei fai ia? Pea huanoa ai ʻa ʻene pehē atu pē kiate koe, ‘Kaukau pea te ke maʻá’?” 14 Ko ia naʻá ne ʻalu hifo ʻo ne uku tuʻo fitu ʻi Sioatani, ʻo fakatatau ki he lea ʻa e tangata ʻa e ʻOtua moʻoní.+ Pea naʻe foki mai ʻa hono kakanó ʻo hangē ko e kakano ʻo ha kiʻi tamasiʻi,+ pea naʻá ne maʻa.+

15 ʻI he hili iá, naʻá ne foki ki he tangata ʻa e ʻOtua moʻoní,+ ʻa ia mo e kotoa ʻo ʻene kau fakafeʻaó,* peá ne tuʻu ʻi hono ʻaó ʻo ne pehē: “ʻOku ou ʻilo eni ʻoku ʻikai ha ʻOtua ʻi ha toe feituʻu kehe ʻi he māmaní kotoa ka ʻi ʻIsileli pē.+ Ko eni ke ke tali muʻa ha meʻaʻofa* mei hoʻo sevānití.” 16 Kae kehe, naʻe pehē ange ʻe ʻIlaisa: “ʻOku ou fuakava ʻia Sihova ko e ʻOtua moʻui ʻa ia ʻoku ou tauhí,* ʻe ʻikai te u tali ia.”+ Naʻá ne vilitaki ange ke ne tali ia, ka naʻá ne hanganaki fakafisi. 17 Naʻe faifai pē ʻo pehē ʻe Neamani: “Kapau ʻoku ʻikai, tuku muʻa ke ʻomi ki hoʻo sevāniti ko aú ha uta kelekele mei he fonuá ni ʻi ha ongo miuli, koeʻuhí ʻe ʻikai toe fai ʻe hoʻo sevānití ha feilaulau tutu pe ko ha feilaulau ki ha toe ngaahi ʻotua kehe ka ko Sihova pē. 18 Kae ʻofa ke fakamolemoleʻi ʻe Sihova ʻa hoʻo sevānití ʻi he meʻa ko ení ʻe taha: ʻI he hū ʻa hoku ʻeikí ki he fale* ʻo Līmoní ke punou hifo aí, ʻokú ne piki mai ki hoku nimá, ko ia ʻe pau ai ke u punou hifo ʻi he fale ʻo Līmoní. ʻI he taimi te u punou hifo ai ʻi he fale ʻo Līmoní, ʻofa muʻa ke fakamolemoleʻi ʻe Sihova ʻa hoʻo sevānití ʻi he meʻá ni.” 19 ʻI he meʻá ni naʻá ne pehē ange: “ʻAlu ʻi he fiemālie.” ʻI he hili ʻene mavahe meiate ia peá ne fononga ʻo kiʻi mamaʻo atú, 20 naʻe pehē loto pē ʻe Kēhesi+ ko e tauhi ʻo ʻIlaisa ko e tangata ʻa e ʻOtua moʻoní:+ ‘Ko ē kuo tuku ʻe hoku ʻeikí ke ʻalu ʻa e Sīlia ko eni ko Neamaní+ ʻi he ʻikai te ne tali meiate ia ʻa e meʻa naʻá ne ʻomí. ʻOku ou fuakava ʻia Sihova ko e ʻOtua moʻuí, te u lele mui ʻiate ia ʻo maʻu ha meʻa meiate ia.’ 21 Ko ia naʻe tulimui atu ʻa Kēhesi ʻia Neamani. ʻI he sio mai ʻa Neamani ʻoku lele mui ange ha tokotaha ʻiate iá, naʻá ne hifo mei heʻene salioté ke fakafetaulaki kiate ia ʻo ne pehē: “ʻOku sai pē ʻa e meʻa kotoa?” 22 ʻI he meʻá ni naʻá ne pehē: “ʻOku lelei ʻa e meʻa kotoa. Kuo fekauʻi mai au ʻe hoku ʻeikí, ʻo ne pehē, ‘Vakai! Naʻe toki aʻú ni mai kiate au ha ongo talavou mei he feituʻu moʻungaʻia ʻo ʻIfalemí mei he ngaahi foha ʻo e kau palōfitá. ʻOmai muʻa maʻanaua ha talēniti siliva pea mo ha teunga+ ʻe ua.’” 23 Naʻe pehē ange ʻe Neamani: “Ke ke fai pehē, toʻo ha talēniti ʻe ua.” Naʻá ne toutou vilitaki ange,+ peá ne kofukofuʻi ʻa e ongo talēniti silivá ʻi ha ongo tangai, fakataha mo e ongo teunga ʻe uá, peá ne ʻoange ia ki ha toko ua ʻo ʻene kau tamaioʻeikí, ʻa ia naʻá na fua ia ʻo muʻomuʻa atu ʻiate ia.

24 ʻI heʻene aʻu ki ʻŌfilí,* naʻá ne toʻo ia mei hona nimá ʻo ne fakahū ia ki fale pea fekau ʻa e ongo tangatá ke na ʻalu. ʻI he hili ʻena mavahé, 25 naʻá ne hū atu ʻo tuʻu ʻi he tafaʻaki ʻo hono ʻeikí. Pea naʻe pehē ange ʻe ʻIlaisa kiate ia: “Naʻá ke haʻú mei fē, Kēhesi?” Ka naʻá ne pehē ange: “Naʻe ʻikai ke ʻalu ʻa hoʻo sevānití ki ha feituʻu.”+ 26 Naʻe pehē ange ʻe ʻIlaisa kiate ia: “ʻIkai naʻe ʻi ai ʻa hoku lotó mo koe ʻi he taimi naʻe hifo mai ai ʻa e tangatá mei heʻene salioté ke fakafetaulaki atu kiate koé? Ko ha taimi eni ke tali ai ha siliva pe tali ai ha ngaahi teunga pe ngaahi ngoue ʻōlive pe ngaahi ngoue kālepi pe fanga sipi pe fanga pulu pe kau tamaioʻeiki pe ko ha kau kaunanga?+ 27 Ko eni ʻe piki ʻa e kilia ʻo Neamaní+ kiate koe mo ho hakó ʻo taʻengata.” Naʻá ne ʻalu atu ʻi he taimi pē ko iá mei hono ʻaó kuó ne kilia, ʻo hinehina hangē ko e sinoú.+

6 Naʻe pehē ange ʻe he ngaahi foha ʻo e kau palōfitá+ kia ʻIlaisa: “Vakai! Ko e feituʻu ʻoku mau nofo ai mo koé ʻoku fuʻu ʻefiʻefi ia kiate kitautolu. 2 Tuku muʻa ke mau ō ki Sioatani. Tuku ke mau taki taha ʻave mei ai ha kupuʻi ʻakau pea ngaohi ai ha feituʻu ʻa ia ʻe lava ke mau nofo ai.” Naʻá ne pehē ange: “Mou ō.” 3 Naʻe pehē ange ʻe ha taha ʻo kinautolu: “Kātaki muʻa ʻe lava ke ke haʻu fakataha mo hoʻo kau sevānití?” Ko ia naʻá ne pehē ange: “Te u ʻalu atu.” 4 Ko ia naʻá ne ʻalu mo kinautolu, pea naʻa nau aʻu ki Sioatani ʻo kamata tā hifo ʻa e ʻuluʻakaú. 5 ʻI hono tā hifo ʻe ha toko taha ʻo kinautolu ha fuʻu ʻakau, naʻe tō ʻa e mataʻi-tokí ki he vaí, pea naʻá ne kalanga: “ʻOiauē, ʻe hoku ʻeiki, ko ha mataʻi-toki kole ia!” 6 Naʻe pehē ange ʻe he tangata ʻa e ʻOtua moʻoní: “Naʻe tō ia ʻi fē?” Ko ia naʻá ne fakahā ange kiate ia ʻa e feituʻú. Naʻá ne tuʻusi leva ha vaʻakau ʻo ne lī ia ki ai pea naʻe tētē hake leva ʻa e mataʻi-tokí. 7 Naʻá ne pehē ange: “Toʻo hake ia.” Ko ia naʻá ne kakapa atu ʻo toʻo mai ia.

8 Pea ko e tuʻi ʻo Sīliá naʻá ne ʻalu ke tauʻi ʻa ʻIsileli.+ Naʻá ne talatalanoa mo ʻene kau sevānití peá ne pehē: “Te u ʻapitanga ʻi he feituʻu ko ē mo ē fakataha mo kimoutolu.” 9 Pea naʻe ʻoatu ha fekau ʻe he tangata ʻa e ʻOtua moʻoní+ ki he tuʻi ʻo ʻIsilelí, ʻo pehē: “Tokanga ʻi he fou mai ʻi he feituʻu ko ení, koeʻuhí ko e feituʻu ia ʻoku ʻalu hifo ai ʻa e kau Sīliá.” 10 Ko ia naʻe ʻoatu ai ha fekau ʻa e tuʻi ʻo ʻIsilelí ki he feituʻu naʻe fakatokanga ange fekauʻaki mo ia ʻa e tangata ʻa e ʻOtua moʻoní. Naʻá ne hanganaki fakatokanga kiate ia, pea naʻá ne fakamamaʻo mei ai ʻi ha ngaahi taimi.*+

11 Naʻe fakaʻitaʻi ʻe he meʻá ni ʻa e tuʻi* ʻo Sīliá, ko ia naʻá ne ui mai ʻene kau sevānití peá ne pehē ange kiate kinautolu: “Tala mai angé kiate aú! Ko hai ʻi hotau lotolotongá ʻoku kau mo e tuʻi ʻo ʻIsilelí?” 12 Naʻe pehē ange leva ʻe he taha ʻo ʻene kau sevānití: “ʻOku ʻikai ha taha ʻiate kimautolu, ʻe hoku ʻeiki ko e tuʻí! Ko ʻIlaisa ko e palōfita ʻi ʻIsilelí ʻokú ne tala ki he tuʻi ʻo ʻIsilelí ʻa e ngaahi meʻa ʻa ia ʻokú ke leaʻaki ʻi ho loki mohé tonu.”+ 13 Naʻá ne pehē ange: “Mou ō ʻo kumi ʻa e feituʻu ʻokú ne ʻi aí, koeʻuhí ke u fekauʻi atu ha kau tangata ke nau puke ia.” Ki mui ai, naʻe ʻomai ha fakamatala kiate ia: “ʻOkú ne ʻi Tōtani.”+ 14 Naʻá ne fekauʻi atu ki ai he taimi pē ko iá ʻa e fanga hoosi mo e ngaahi saliote tau, pea pehē ki ha fuʻu kau tau; naʻa nau ʻalu atu poʻuli ʻo takatakaiʻi ʻa e koló.

15 ʻI he tuʻu pongipongia hake ʻa e tauhi ʻo e* tangata ʻa e ʻOtua moʻoní ʻo ne hū atu ki tuʻá, naʻá ne sio atu kuo takatakaiʻi ʻa e koló ʻe ha kau tau mo e fanga hoosi mo e ngaahi saliote tau. Tuai-e-kemo naʻe pehē ange ʻe hono tauhí kiate ia: “ʻOiauē, ʻe hoku ʻeiki! Ko e hā ʻa e meʻa te ta faí?” 16 Ka naʻá ne pehē ange: “ʻOua naʻá ke ilifia!+ He ʻoku tokolahi ange ʻa e faʻahinga ʻoku kau mo kitauá ʻi he faʻahinga ʻoku kau mo kinautolú.”+ 17 Naʻe kamata leva ke lotu ʻa ʻIlaisa ʻo ne pehē: “ʻE Sihova, fakaʻā ange muʻa hono matá ke ne lava ʻo sio.”+ Naʻe fakaʻā ʻe Sihova ʻi he taimi pē ko iá ʻa e mata ʻa hono tauhí pea naʻá ne sio, pea vakai, ko e feituʻu moʻungaʻiá naʻe fonu ʻi he fanga hoosi mo e ngaahi saliote afi+ ki he taú, naʻe takatakai kia ʻIlaisa.+

18 ʻI he ʻalu hifo ʻa e kau Sīliá kiate iá, naʻe lotu ʻa ʻIlaisa kia Sihova ʻo pehē: “Taaʻi ange muʻa ʻa e kakaí ni* ʻaki ʻa e kuí.”+ Ko ia naʻá ne taaʻi ʻaki kinautolu ʻa e kuí, ʻo hangē pē ko e kole ʻa ʻIlaisá. 19 Naʻe pehē ange leva ʻe ʻIlaisa kiate kinautolu: “ʻOku ʻikai ko e halá eni, pea ʻoku ʻikai ko e koló eni. Muimui mai ʻiate au, pea tuku ke u taki kimoutolu ki he tangata ʻoku mou kumí.” Kae kehe, naʻá ne taki kinautolu ki Samēlia.+

20 ʻI heʻenau aʻu ki Samēliá, naʻe pehē ʻe ʻIlaisa: “ʻE Sihova, fakaʻā honau matá koeʻuhí ke nau lava ʻo sio.” Ko ia naʻe fakaʻā ʻe Sihova ʻa honau matá, pea naʻa nau sio ʻoku nau ʻi loto Samēlia. 21 ʻI he sio kiate kinautolu ʻa e tuʻi ʻo ʻIsilelí, naʻá ne pehē ange kia ʻIlaisa: “ʻA ʻeku tamai, ʻoku totonu ke u taaʻi kinautolu, ʻoku totonu ke u taaʻi kinautolu?” 22 Ka naʻá ne pehē ange: “Kuo pau ke ʻoua naʻá ke taaʻi kinautolu. Te ke taaʻi koā ʻa e faʻahinga ko ia ʻokú ke ʻave pōpulá ʻaki hoʻo heletaá mo hoʻo kaufaná? ʻOange kiate kinautolu ha mā mo ha vai koeʻuhí ke nau kai mo inu+ pea ke nau foki ki honau ʻeikí.” 23 Ko ia naʻá ne teuteu ha fuʻu kātoanga kai kiate kinautolu, pea naʻa nau kai mo inu, ʻi he hili iá, naʻá ne fekauʻi kinautolu ke nau foki ki honau ʻeikí. Pea naʻe ʻikai toe haʻu ʻa e kau kaihaʻa fakamālohi ʻa e kau Sīliá+ ki he fonua ko ʻIsilelí.

24 ʻI he hili iá, naʻe fakatahatahaʻi mai ʻe Peni-hētati ko e tuʻi ʻo Sīliá ʻa ʻene kau taú* kotoa pea nau ʻalu hake ke ʻākoloʻi ʻa Samēlia.+ 25 Ko ia naʻe ʻi ai ha fuʻu honge lahi+ ʻi Samēlia, pea naʻa nau ʻākoloʻi ia kae ʻoua kuo aʻu ʻa e mahuʻinga ʻo e foʻi ʻulu ʻo ha ʻasi+ ki he konga siliva ʻe 80, pea naʻe aʻu ʻa e mahuʻinga ʻo e vahe fā ʻe taha ʻo ha fua kapa* ʻo e kinohaʻa mei he lupé ki he konga siliva ʻe 5. 26 ʻI he ʻalu hake ʻa e tuʻi ʻo ʻIsilelí ʻi he funga ʻaá, naʻe kalanga atu ha fefine kiate ia: “Tokoni mai kiate kimautolu, ʻe hoku ʻeiki ko e tuʻí!” 27 ʻI he meʻá ni naʻá ne pehē ange: “Kapau ʻoku ʻikai ke tokoniʻi koe ʻe Sihova, ʻe lava ke u maʻu mei fē ha tokoni maʻau? Mei he ʻauʻauʻanga uité? Pe mei he tataʻoʻanga uainé pe loló?” 28 Naʻe ʻeke ange ʻe he tuʻí kiate ia: “Ko e hā ʻa e meʻa ʻoku hoko kiate koé?” Naʻá ne tali ange: “Ko e fefine ko ení naʻá ne pehē mai kiate au, ‘ʻOmai hoʻo tamasiʻí, pea te ta kai ia he ʻahó ni, peá ta toki kai ʻa ʻeku tamasiʻí ʻapongipongi.’+ 29 Ko ia naʻá ma haka ai ʻa ʻeku tamasiʻí ʻo kai ia.+ ʻI he ʻaho hono hokó naʻá ku pehē ange ai kiate ia, ‘ʻOmai hoʻo tamasiʻí koeʻuhí ke ta kai ia.’ Ka naʻá ne fūfuuʻi ʻa ʻene tamasiʻí.”

30 ʻI he fanongo pē ʻa e tuʻí ki he lea ʻa e fefiné, naʻá ne hae ʻa hono ngaahi kofú.+ ʻI heʻene ʻalu hake ʻi he funga ʻaá, naʻe sio atu ʻa e kakaí naʻá ne tui tauangaʻa ʻi loto ʻi hono ngaahi kofú.* 31 Naʻá ne pehē leva: “ʻOfa ke fai pehē ʻa e ʻOtuá kiate au pea hulu atu ai kapau ʻe kei ʻia ʻIlaisa ko e foha ʻo Safatí ʻa hono foʻi ʻulú ʻi he ʻahó ni!”+

32 Naʻe tangutu ʻa ʻIlaisa ʻi hono falé, pea naʻe tangutu mo ia ʻa e kau mātuʻá. Naʻe fekauʻi ʻe he tuʻí ha tangata ke muʻomuʻa atu ʻiate ia, ka ki muʻa ke aʻu atu ʻa e talafekaú, naʻe pehē ange ʻe ʻIlaisa ki he kau mātuʻá: “Kuo mou sio ki he fekau ʻe he foha ko eni ʻo ha tokotaha fakapoó+ ke tuʻusi ʻa hoku ʻulú? Mou siofi ʻa e taimi ʻe aʻu mai ai ʻa e talafekaú, tāpuniʻi ʻa e matapaá, pea puke maʻu ʻa e matapaá ʻo taʻofi atu ʻaki ia. ʻIkai ʻoku ongo mai ʻa e taulaka ʻa hono ʻeikí ʻi mui ʻiate ia?” 33 Lolotonga ʻene kei lea kiate kinautolú, naʻe aʻu mai ʻa e talafekaú kiate ia, pea naʻe pehē ʻe he tuʻí: “Ko e mala ko ení ʻoku meia Sihova. Ko e hā ke u kei tatali ai kia Sihová?”

7 Pea naʻe pehē ʻe ʻIlaisa, “Fanongo mai ki he folofola ʻa Sihová. Ko e meʻa eni ʻoku folofolaʻaki ʻe Sihová: ‘ʻI he taimi nai ko ení ʻapongipongi ʻi he matapā* ʻo Samēliá, ko ha fua sia* ʻo e mahoaʻa leleí ʻe feʻunga ʻa hono mahuʻingá mo ha sikeli,* pea ko e fua sia paʻale ʻe uá ʻe feʻunga ʻa hono mahuʻingá mo ha sikeli.’”+ 2 Ko ia naʻe pehē ai ʻe he ʻōfisa fakakautau ʻa ia naʻe falala ki ai ʻa e tuʻí ki he tangata ʻa e ʻOtua moʻoní: “Neongo kapau ʻe fakaava ʻe Sihova ʻa e ngaahi matapā ʻo e langí, ʻe lava nai ke hoko ʻa e meʻá ni?”*+ Naʻá ne pehē ange ai: “Te ke sio tonu+ ki ai, ka heʻikai te ke kai mei ai.”+

3 Naʻe ʻi ai ha kau kilia ʻe toko fā ʻi he hūʻanga ʻo e matapā ʻo e koló,+ pea naʻa nau fepehēʻaki: “Ko e hā ʻoku tau tangutu ai ʻi heni kae ʻoua ke tau maté? 4 Ka tau ka pehē, ‘Tau hū ki he koló,’ lolotonga ʻoku honge ʻa e koló,+ te tau mate ʻi ai. Pea kapau te tau tangutu ʻi heni, te tau kei mate ai pē. Ko ia tau ʻalu kitautolu ki he ʻapitanga ʻo e kau Sīliá. Kapau te nau fakahaofi kitautolu, te tau moʻui, ka ʻo kapau te nau tāmateʻi kitautolu, pea tā te tau mate.” 5 Naʻa nau tuʻu hake leva ʻi he mamalu ʻa e poʻulí ʻo hū ki he ʻapitanga ʻo e kau Sīliá. ʻI heʻenau aʻu atu ki he tuʻa ʻapitanga ʻo e kau Sīliá, naʻe ʻikai ha taha ia ʻi ai.

6 He naʻe ʻai ʻe Sihova ke fanongo ʻa e ʻapitanga ʻo e kau Sīliá ki he ongo mai ʻa e ngaahi saliote tau mo e fanga hoosi, ko e ongo ʻo ha fuʻu kau tau tokolahi.+ Ko ia naʻa nau fepehēʻaki ai: “Vakai! Kuo totongiʻi ʻe he tuʻi ʻo ʻIsilelí ʻa e ngaahi tuʻi ʻo e kau Hetí mo e ngaahi tuʻi ʻo ʻIsipité ke nau haʻu ʻo tauʻi kitautolu!” 7 Naʻa nau tuʻu hake ʻi he taimi pē ko iá ʻo hola ʻi he mamalu ʻa e poʻulí, ʻo liʻaki ʻa ʻenau ngaahi tēnití, fanga hōsí, fanga ʻasí, pea mo e ʻapitangá kotoa pea tuku liʻaki ai pē, pea naʻa nau hola telia ʻa ʻenau moʻuí.

8 ʻI he aʻu atu ʻa e kau kiliá ni ki he tuʻa ʻapitangá, naʻa nau hū ki he taha ʻo e ngaahi tēnití pea kamata ke nau kai mo inu. Naʻa nau ʻave mei ai ʻa e siliva, koula mo e ngaahi kofu pea nau ʻalu ʻo fufū ia. Pea naʻa nau foki mai ʻo hū ki ha tēniti ʻe taha ʻo ʻave ha ngaahi meʻa mei ai pea nau ʻalu ʻo fufū mo ia.

9 Naʻe faifai pē pea nau fepehēʻaki: “Ko e meʻa ʻoku tau faí ʻoku ʻikai totonu. Ko e ʻaho ní ko ha ʻaho ia ʻo e ongoongo lelei! Kapau te tau toumoua pea tatali kae ʻoua kuo maʻa ʻa e ʻahó, te tau tuha ai mo e tautea. Tau ʻalu he taimí ni ʻo fakahā ʻa e meʻá ni ki he fale ʻo e tuʻí.” 10 Ko ia naʻa nau ʻalu ʻo ui atu ki he kau leʻo matapā ʻo e koló ʻo fakahā kiate kinautolu: “Naʻa mau hū ki he ʻapitanga ʻo e kau Sīliá, ka naʻe ʻikai ha taha ʻi ai—naʻe ʻikai ʻaupito ke mau fanongo ai ki ha taha. Ko e fanga hoosi pē mo e fanga ʻasi naʻe haʻi mai aí pea naʻe tuku liʻaki ai pē ʻa e ngaahi tēnití.” 11 ʻI he taimi pē ko iá naʻe kaila atu ʻa e kau leʻo matapaá, pea naʻe fakahā ia ki he loto fale ʻo e tuʻí.

12 ʻI he taimi pē ko iá, naʻe tuʻu poʻuli hake ʻa e tuʻí ʻo ne pehē ki heʻene kau sevānití: “Tuku muʻa ke u tala atu kiate kimoutolu ʻa e meʻa kuo fai ʻe he kau Sīliá kiate kitautolú. ʻOku nau ʻilo ʻoku tau fiekaia,+ ko ia kuo nau liʻaki ai ʻa e ʻapitangá ʻo nau toi ʻi he vaó, ʻo nau pehē, ‘Te nau hū mai ki tuʻa mei he koló, pea te tau puke moʻui kinautolu pea hū ki he koló.’”+ 13 Pea naʻe pehē ange ʻe he taha ʻo ʻene kau sevānití: “Tuku muʻa ke ʻave ʻe ha kau tangata ʻa e hoosi ʻe nima ʻoku toé ʻa ia ʻoku ʻi he koló. Vakai! Te nau iku pē ʻo tatau mo e fuʻu kau ʻIsileli kotoa ʻoku toe ʻi hení. Vakai! Te nau iku pē ʻo tatau mo e fuʻu kau ʻIsileli kotoa naʻe ʻauhá. Ko ia tuku ke tau fekauʻi atu kinautolu pea tau sio ai.” 14 Ko ia naʻa nau ʻave ʻa e saliote ʻe ua mo e fanga hoosi, pea naʻe tuku atu kinautolu ʻe he tuʻí ki he ʻapitanga ʻo e kau Sīliá, ʻo pehē: “Mou ō ʻo vakai.” 15 Naʻa nau muimui atu ʻiate kinautolu ʻo aʻu ki Sioatani, pea ko e halá kotoa naʻe fonu ʻi he ngaahi kofu mo e naunau ngaohi-kai naʻe laku ai ʻe he kau Sīliá ʻi heʻenau hola ilifiá. Naʻe foki atu ʻa e kau talafekaú ʻo fakahā ia ki he tuʻí.

16 Naʻe ʻalu atu leva ʻa e kakaí ʻo nau ʻave ʻa e koloa ʻi he ʻapitanga ʻo e kau Sīliá, ko ia naʻe hoko ai ʻo feʻunga ʻa e mahuʻinga ʻo e fua sia mahoaʻa lelei ʻe tahá mo ha sikeli, pea ko e fua sia paʻale ʻe uá naʻe feʻunga hono mahuʻingá mo ha sikeli, ʻo fakatatau ki he folofola ʻa Sihová.+ 17 Naʻe fakanofo ʻe he tuʻí ʻa e ʻōfisa fakakautau ʻa ia naʻe tuku ki ai ʻene falalá ke ne tokangaʻi ʻa e matapā ʻo e koló, ka naʻe tāmalaki ia ʻe he kakaí ʻo ne mate ʻi he matapā ʻo e koló, ʻo hangē tofu pē ko e meʻa naʻe tala ʻe he tangata ʻa e ʻOtua moʻoní ki he tuʻí ʻi heʻene ʻalu hifo kiate iá. 18 Naʻe hoko ia ʻo hangē tofu pē ko e meʻa naʻe tala ʻe he tangata ʻa e ʻOtua moʻoní ki he tuʻí: “Ko e fua sia paʻale ʻe uá ʻe feʻunga hono mahuʻingá mo ha sikeli, pea ko e fua sia mahoaʻa lelei ʻe tahá ʻe feʻunga hono mahuʻingá mo ha sikeli ʻi he taimi ko ení ʻapongipongi ʻi he matapā ʻo Samēliá.”+ 19 Ka naʻe pehē ʻe he ʻōfisa fakakautaú ki he tangata ʻa e ʻOtua moʻoní: “Neongo kapau ʻe fakaava ʻe Sihova ʻa e ngaahi matapā ʻo e langí, ʻe lava nai ke hoko ha meʻa pehē?”* ʻI he meʻá ni naʻe pehē ange ʻe ʻIlaisa: “Te ke sio tonu ki ai, ka heʻikai te ke kai mei ai.” 20 Ko e meʻa tofu pē ia naʻe hoko kiate iá, koeʻuhí he naʻe tāmalaki ia ʻe he kakaí ʻo ne mate ʻi he matapā ʻo e koló.

8 Naʻe pehē ʻe ʻIlaisa ki he fefine ʻa ia ko ʻene tamá ē naʻá ne fakamoʻuí:*+ “Tuʻu hake peá ke ʻalu, ʻa koe mo ho fāmilí, peá ke ʻāunofo ʻi ha feituʻu pē ʻe lava ke ke nofo aí, he kuo fakahā ʻe Sihova ha honge,+ pea ʻe hoko ia ki he fonuá ʻi he taʻu ʻe fitu.” 2 Ko ia naʻe tuʻu hake ʻa e fefiné ʻo ne fai ʻa e meʻa naʻe leaʻaki ʻe he tangata ʻa e ʻOtua moʻoní. Naʻá ne ʻalu mo hono fāmilí ʻo nofo ʻi he fonua ʻo e kau Filisitiá+ ʻi he taʻu ʻe fitu.

3 ʻI he ʻosi ʻa e taʻu ʻe fitú, naʻe foki ʻa e fefiné mei he fonua ʻo e kau Filisitiá peá ne ʻalu ke fai ha tangi ki he tuʻí koeʻuhi ko hono falé mo hono kelekelé. 4 Pea naʻe lea ʻa e tuʻí kia Kēhesi ko e tauhi ʻo e tangata ʻa e ʻOtua moʻoní, ʻo ne pehē: “Fakamatala mai muʻa kiate au ʻa e ngaahi fuʻu meʻa fakaofo kotoa kuo fai ʻe ʻIlaisá.”+ 5 ʻI heʻene kei fakamatala pē ki he tuʻí ʻa ʻene fakamoʻui ʻa e tama naʻe maté,+ naʻe haʻu ki he tuʻí ʻa e fefine ko ia ko ʻene tamá ē naʻá ne fakamoʻuí, ʻo fai ha tangi koeʻuhi ko hono falé mo hono kelekelé.+ Naʻe pehē ange leva ʻe Kēhesi: “ʻE hoku ʻeiki ko e tuʻi, ko e fefiné eni, pea ko ʻene tamá eni ʻa ia naʻe fakamoʻui ʻe ʻIlaisá.” 6 Ko ia naʻe ʻeke ʻe he tuʻí ki he fefiné pea naʻá ne talanoa ange kiate ia ʻa e meʻa naʻe hokó. Naʻe vaheʻi ange leva ʻe he tuʻí kiate ia ha ʻōfisa ʻi he lotoʻaá, ʻo ne tala ange: “Fakafoki ki he fefiné ʻa e meʻa kotoa ʻoku ʻaʻaná pea mo e fua kotoa ʻo hono kelekelé mei he ʻaho naʻá ne mavahe ai mei he fonuá ʻo aʻu mai ki he taimí ni.”

7 Naʻe aʻu ʻa ʻIlaisa ki Tāmasikusi+ ʻi he taimi naʻe puke ai ʻa Peni-hētati+ ko e tuʻi ʻo Sīliá. Ko ia naʻe fai ʻa e fakamatala kiate ia ʻo pehē: “Kuo haʻu ki heni ʻa e tangata ʻa e ʻOtua moʻoní.”+ 8 Ko ia naʻe pehē ʻe he tuʻí kia Hesaeli:+ “Toʻo ha meʻaʻofa peá ke ʻalu mo ia ʻo fakafetaulaki ki he tangata ʻa e ʻOtua moʻoní.+ Fai ha fehuʻi kia Sihova fakafou ʻiate ia, pea ʻeke, ‘Te u toe fakaakeake koā mei he puke ko ení?’” 9 Naʻe ʻalu atu ʻa Hesaeli ke fakafetaulaki kiate ia pea naʻá ne ʻalu mo ha meʻaʻofa, ko e faʻahinga meʻa lelei kotoa pē ʻo Tāmasikusí, feʻunga mo e uta ʻa e kāmeli ʻe 40. Naʻá ne aʻu atu ʻo ne tuʻu ʻi hono ʻaó peá ne pehē: “Ko ho fohá, ʻa Peni-hētati ko e tuʻi ʻo Sīliá, kuó ne fekauʻi mai au kiate koe ke ʻeke atu, ‘Te u toe fakaakeake koā mei he puke ko ení?’” 10 Naʻe tali ange ʻe ʻIlaisa kiate ia: “ʻAlu ʻo tala ange kiate ia, ‘Ko e moʻoni te ke toe fakaakeake,’ ka kuo fakahā mai ʻe Sihova ia kiate au ko e moʻoni te ne mate.”+ 11 Pea naʻá ne hanganaki sio fakamamaʻu kiate ia ʻo aʻu ki heʻene mā. Naʻe kamata leva ke tangi ʻa e tangata ʻa e ʻOtua moʻoní. 12 Naʻe ʻeke ange ʻe Hesaeli: “Ko e hā ʻoku tangi ai ʻa hoku ʻeikí?” Naʻá ne tali ange: “Koeʻuhí ʻoku ou ʻiloʻi ʻa e maumau te ke fai ki he kakai ʻo ʻIsilelí.+ Ko honau ngaahi feituʻu kuo fakakolotauʻí te ke tutu ʻaki ʻa e afi, ko ʻenau kau tangata tuʻu-ki-muʻá te ke tāmateʻi ʻaki ʻa e heletā, ko ʻenau fānaú te ke laiki ke kongokonga, pea ko ʻenau kau fefine feitamá te ke fahi ua.”+ 13 Naʻe pehē ange ʻe Hesaeli: “ʻE lava fēfē ʻa hoʻo sevānití, ʻa ia ko ha kulī pē, ke ne fai ha fuʻu ngāue pehē?” Ka naʻe pehē ange ʻe ʻIlaisa: “Kuo fakahā mai ʻe Sihova kiate au te ke hoko ko e tuʻi ki Sīlia.”+

14 Naʻá ne mavahe leva meia ʻIlaisa peá ne foki ki hono ʻeikí, ʻa ia naʻá ne pehē ange kiate ia: “Ko e hā naʻe leaʻaki ʻe ʻIlaisa kiate koé?” Naʻá ne tali ange: “Naʻá ne tala mai kiate au ko e moʻoni te ke toe fakaakeake.”+ 15 Ka ʻi he ʻaho hono hokó, naʻe toʻo ʻe Hesaeli ha meʻa ʻufiʻufi-mohenga ʻo unu ia ʻi he vaí ʻo ne pukeʻi* hifo ia ʻi hono matá ʻo fakafulutāmakiaʻi ia ʻo ne mate.+ Pea naʻe hoko ʻa Hesaeli ko e tuʻi ʻo fetongi ia.+

16 ʻI he taʻu hono nima ʻo e pule ʻa Siholame+ ko e foha ʻo ʻĒhapi ko e tuʻi ʻo ʻIsilelí, lolotonga ia ʻa e tuʻi ʻa Sihosafate ki Siutá, naʻe hoko ai ko e tuʻi ʻa Siholame+ ko e foha ʻo Tuʻi Sihosafate ʻo Siutá. 17 Naʻá ne taʻu 32 ʻi heʻene hoko ko e tuʻí, pea naʻá ne pule ʻi he taʻu ʻe valu ʻi Selusalema. 18 Naʻá ne ʻaʻeva ʻi he ʻalunga ʻo e ngaahi tuʻi ʻo ʻIsilelí,+ ʻo hangē tofu pē ko ia naʻe fai ʻe he faʻahinga ʻo e fale ʻo ʻĒhapí,+ he naʻe hoko ʻa e ʻofefine ʻo ʻĒhapí ko hono uaifi;+ pea naʻá ne hanganaki fai ʻa e meʻa naʻe kovi ʻi he vakai mai ʻa Sihová.+ 19 Ka naʻe ʻikai ke finangalo ʻa Sihova ke fakaʻauha ʻa Siuta koeʻuhi ko ʻene sevāniti ko Tēvitá,+ he naʻá ne talaʻofa kiate ia te ne ʻoange ha maama* kiate ia+ pea mo hono ngaahi fohá maʻu ai pē.

20 ʻI hono ngaahi ʻahó naʻe angatuʻu ai ʻa ʻĪtomi ki Siuta+ pea naʻá ne fokotuʻu hano tuʻi pē ʻoʻona.+ 21 Ko ia naʻe kolosi atu ʻa Siholame ki Saia fakataha mo ʻene ngaahi salioté kotoa, pea naʻá ne tuʻu poʻuli hake ʻo ne ʻohofi ʻo ikunaʻi ʻa e kau ʻĪtomi naʻa nau takatakai kiate iá pea mo e kau ʻeikitau ʻi he tau salioté; pea naʻe hola ʻa e kau taú ki honau ngaahi tēnití. 22 Ka naʻe hoko atu ai pē ʻa e angatuʻu ʻa ʻĪtomi ki Siutá ʻo aʻu mai ki he ʻahó ni. Naʻe angatuʻu foki mo Līpina+ ʻi he taimi ko iá.

23 Pea ko e toenga ʻo e hisitōlia ʻo Siholamé, mo e meʻa kotoa naʻá ne faí, ʻikai kuo hiki ia ʻi he tohi ʻo e hisitōlia ʻo e taimi ʻo e ngaahi tuʻi ʻo Siutá? 24 Pea naʻe toka ʻa Siholame ʻo mālōlō fakataha mo ʻene fanga kuí pea naʻe tanu ia fakataha mo ʻene fanga kuí ʻi he Kolo-ʻo-Tēvitá.+ Pea naʻe hoko ʻa hono foha ko ʻAhasaiá+ ko e tuʻi ʻo fetongi ia.

25 ʻI he taʻu hono 12 ʻo e pule ʻa Siholame ko e foha ʻo ʻĒhapi ko e tuʻi ʻo ʻIsilelí, naʻe hoko ai ko e tuʻi+ ʻa ʻAhasaia ko e foha ʻo Tuʻi Siholame ʻo Siutá. 26 Naʻe taʻu 22 ʻa ʻAhasaia ʻi he taimi naʻá ne hoko ai ko e tuʻí, pea naʻá ne pule ʻi he taʻu ʻe taha ʻi Selusalema. Ko e hingoa ʻo ʻene faʻeé ko ʻAtalaia+ ko e mokopuna* ʻo Tuʻi ʻOmilai+ ʻo ʻIsilelí. 27 Naʻá ne ʻaʻeva ʻi he ʻalunga ʻo e fale ʻo ʻĒhapí+ peá ne hanganaki fai ʻa e meʻa naʻe kovi ʻi he vakai mai ʻa Sihová, ʻo hangē ko e fale ʻo ʻĒhapí, he naʻá ne kāinga ʻi he mali mo e fale ʻo ʻĒhapí.+ 28 Ko ia naʻá ne ʻalu mo Siholame ko e foha ʻo ʻĒhapí ke tauʻi ʻa Tuʻi Hesaeli ʻo Sīliá ʻi Lēmoti-kiliati,+ ka naʻe fakalaveaʻi ʻe he kau Sīliá ʻa Siholame.+ 29 Ko ia naʻe foki ʻa Tuʻi Siholame ki Sisilili+ ke ne fakaakeake mei he ngaahi fakalavea naʻe fai kiate ia ʻe he kau Sīliá ʻi Lama ʻi heʻene tauʻi ʻa Tuʻi Hesaeli ʻo Sīliá.+ Naʻe ʻalu hifo ʻa ʻAhasaia ko e foha ʻo Siholame ko e tuʻi ʻo Siutá ki Sisilili ke sio kia Siholame ko e foha ʻo ʻĒhapí, koeʻuhí he naʻá ne lavea.*

9 Pea naʻe ui ʻe ʻIlaisa ko e palōfitá ha taha ʻo e ngaahi foha ʻo e kau palōfitá peá ne pehē kiate ia: “Takaiʻi ho ngaahi kofú ʻi ho kongalotó, peá ke fakavave ʻo toʻo ʻa e hina lolo ko ení peá ke ʻalu ki Lēmoti-kiliati.+ 2 ʻI hoʻo aʻu ki aí, fakasio ʻa Sehu+ ko e foha ʻo Sihosafate ko e foha ʻo Nimisí; hū atu pea fekau ke ne tuʻu hake mei he lotolotonga ʻo hono fanga tokouá peá ke ʻave ia ki he loki taupotu taha ki lotó. 3 Pea te ke toʻo ʻa e hina loló ʻo lilingi ia ʻi hono ʻulú peá ke pehē, ‘Ko e folofola eni ʻa Sihová: “ʻOku ou pani koe ke ke hoko ko e tuʻi ki ʻIsileli.”’+ Pea te ke fakaava leva ʻa e matapaá ʻo ke hola ʻo ʻoua ʻe toe tatali.”

4 Ko ia naʻe ʻalu atu ʻa e tamaioʻeiki ʻa e palōfitá ki Lēmoti-kiliati. 5 ʻI heʻene aʻu atú, naʻe tangutu mai ai ʻa e kau ʻeikitaú. Naʻá ne pehē atu: “ʻOku ʻi ai ha fekau ʻoku ou haʻu mo ia kiate koe, ʻe ʻeiki.” Naʻe ʻeke ange ʻe Sehu: “Kia hai ʻiate kimautolú?” Naʻá ne pehē ange: “Kiate koe, ʻe ʻeiki.” 6 Ko ia naʻe tuʻu hake ʻa Sehu ʻo ne hū ki fale; naʻe lilingi ʻe he tamaioʻeikí ʻa e loló ʻi hono ʻulú peá ne pehē ange kiate ia, “Ko e folofola eni ʻa Sihova ko e ʻOtua ʻo ʻIsilelí: ‘ʻOku ou pani koe ke ke hoko ko e tuʻi ki he kakai ʻa Sihová, ki ʻIsileli.+ 7 Kuo pau ke ke taaʻi ʻa e fale ʻo ʻĒhapi ko ho ʻeikí, pea te u sāuni ʻa e toto ʻo ʻeku kau sevāniti ko e kau palōfitá pea mo e toto ʻo e kau sevāniti kotoa ʻa Sihova naʻa nau mate ʻi he nima ʻo Sisipelí.+ 8 Pea ʻe ʻauha ʻa e fale kotoa ʻo ʻĒhapí; pea te u fakaʻauha ʻosi meia ʻĒhapi ʻa e tangata kotoa pē,* ʻo kau ai ʻa e tokotaha ʻoku ʻikai hano tokoní mo e vaivai ʻi ʻIsilelí.+ 9 Pea te u ʻai ʻa e fale ʻo ʻĒhapí ke hangē ko e fale ʻo Selopoame+ ko e foha ʻo Nīpatí pea ke hangē ko e fale ʻo Paasa+ ko e foha ʻo ʻĀhisá. 10 Ko e meʻa kia Sisipelí, ʻe kai ia ʻe he fanga kulií ʻi he konga kelekele ʻi Sisililí,+ pea ʻe ʻikai ke tanu ia ʻe ha taha.’” Ko ia naʻá ne fakaava ʻa e matapaá ʻo ne hola.+

11 ʻI he foki atu ʻa Sehu ki he kau sevāniti ʻa hono ʻeikí, naʻa nau ʻeke ange kiate ia: “ʻOku sai pē ʻa e meʻa kotoa? Ko e hā naʻe haʻu ai kiate koe ʻa e tangata fakasesele ko ení?” Naʻá ne tali ange kiate kinautolu: “ʻOku mou ʻiloʻi ai pē ʻa e faʻahinga tangata ko iá pea mo ʻene faʻahinga talanoá.” 12 Ka naʻa nau pehē ange: “ʻOku ʻikai ke moʻoni ia! Tala mai muʻa kiate kimautolu.” Naʻá ne pehē ange leva: “Ko e meʻa eni naʻá ne tala mai kiate aú, peá ne toe hoko atu, ‘Ko e folofola eni ʻa Sihová: “ʻOku ou pani koe ke ke hoko ko e tuʻi ki ʻIsileli.”’”+ 13 ʻI he meʻá ni naʻa nau taki taha toʻo fakavave hono kofu ʻo nau folahi ia ʻi lalo ʻi he sitepú+ kiate ia, pea nau ifi ʻa e meʻaifí mo nau pehē: “Kuo hoko ʻa Sehu ko e tuʻi!”+ 14 Pea naʻe faʻufaʻu ha kovi ʻe Sehu+ ko e foha ʻo Sihosafate ko e foha ʻo Nimisí kia Siholame.

Ko Siholamé naʻá ne leʻo ʻi Lēmoti-kiliati,+ ʻa ia mo e kotoa ʻo ʻIsilelí, koeʻuhí ko Tuʻi Hesaeli+ ʻo Sīliá. 15 Naʻe foki ki mui ai ʻa Tuʻi Siholame ki Sisilili+ ke fakaakeake mei he ngaahi lavea naʻe hoko kiate ia tupu mei he kau Sīliá ʻi heʻene faitau mo Tuʻi Hesaeli ʻo Sīliá.+

Pea naʻe pehē ange ʻe Sehu: “Kapau ʻoku mou loto ki ai, ʻoua naʻa tuku ha taha ke hola mei he koló pea ʻalu ʻo fakahā ʻa e meʻá ni ʻi Sisilili.” 16 Pea naʻe heka ʻa Sehu ki heʻene salioté ʻo ne ʻalu ki Sisilili, he naʻe tokoto ai ʻa Siholame kuó ne lavea, pea ko Tuʻi ʻAhasaia ʻo Siutá naʻá ne ʻalu hifo ke vakai ʻa Siholame. 17 ʻI he tuʻu ʻa e tangata leʻó ʻi he taua ʻi Sisililí, naʻá ne sio atu ki he fakaofiofi mai ʻa e fuʻu fononga ʻo e kau tangata ʻa Sehú. Naʻá ne pehē ʻi he taimi pē ko iá: “ʻOku ou sio ki ha fuʻu fononga ʻo e kau tangata.” Naʻe pehē ange ʻe Siholame: “ʻAve ha tangata heka hoosi pea fekauʻi atu ia ke ʻalu ʻo fakafetaulaki kiate kinautolu, pea ke ne pehē, ‘ʻOku mou haʻu melino pē?’” 18 Ko ia naʻe ʻalu atu ha tangata heka hoosi ke fakafetaulaki kiate ia ʻo ne pehē: “Ko e folofola eni ʻa e tuʻí, ‘ʻOku mou haʻu melino pē?’” Ka naʻe pehē ange ʻe Sehu: “Ko e hā hoʻo kaunga ki he ‘melinó’? Tafoki ʻo muimui mai ʻiate au!”

Pea naʻe fakahā ʻe he tangata leʻó: “Kuo aʻu atu ʻa e talafekaú kiate kinautolu, ka kuo ʻikai ke ne foki mai.” 19 Ko ia naʻá ne fekau atu ha tangata heka hoosi ko hono uá ia, ʻa ia naʻá ne pehē ange ʻi heʻene aʻu atu kiate kinautolú: “Ko e folofola eni ʻa e tuʻí, ‘ʻOku mou haʻu melino pē?’” Ka naʻe pehē ange ʻe Sehu: “Ko e hā hoʻo kaunga ki he ‘melinó’? Tafoki ʻo muimui mai ʻiate au!”

20 Naʻe fakahaaʻi ange leva ʻe he tangata leʻó: “Kuó ne aʻu atu kiate kinautolu, ka kuo ʻikai ke ne foki mai, pea ko e angí ʻoku hangē ia ko e angi saliote ʻa Sehu ko e mokopuna* ʻo Nimisí, he ʻoku hangē ʻene angí ha tangata seselé.” 21 Naʻe pehē ange ʻe Siholame: “Teuteu!” Ko ia naʻe teuteuʻi ʻene saliote taú pea naʻe ʻalu atu taki taha ʻa Tuʻi Siholame ʻo ʻIsilelí mo Tuʻi ʻAhasaia+ ʻo Siutá ʻi heʻene saliote tau ʻaʻana ke fakafetaulaki kia Sehu. Naʻá na fetaulaki mo ia ʻi he konga kelekele ʻo Nēpote+ ko e tangata Sisililí.

22 ʻI he sio pē ʻa Siholame kia Sehú, naʻá ne pehē ange: “ʻOkú ke haʻu melino pē, Sehu?” Ka naʻá ne pehē ange: “ʻE lava fēfē ke ʻi ai ha melino lolotonga ʻoku kei feʻauaki ʻa Sisipeli+ ko hoʻo faʻeé pea lahi mo e ngaahi faimana ʻokú ne faí?”+ 23 ʻI he taimi pē ko iá naʻe afeʻi ʻe Siholame ʻene salioté ke ne hola, peá ne pehē kia ʻAhasaia: “Kuo kākaaʻi kitaua, ʻAhasaia!” 24 Naʻe toʻo ʻe Sehu ʻene kaufaná ʻo ne fanaʻi ʻa Siholame ʻi he vahaʻa ʻo hono ongo umá, pea naʻe ʻasi ki tuʻa ʻa e foʻi ngahaú ʻi hono mafú, pea naʻá ne tō hifo ʻi heʻene saliote taú. 25 Naʻá ne pehē ange leva kia Pitikali ko ʻene ʻōfisa fakakautaú: “Hiki ia ʻo lī ki he ngoue ʻa Nēpote ko e tangata Sisililí.+ Manatuʻi naʻá ta heka fakataha, ʻa koe mo au, ʻo muimui ʻia ʻĒhapi ko ʻene tamaí ʻi he taimi naʻe fai ai ʻe Sihova ʻa e fanongonongo ko ení ʻo kau kiate iá:+ 26 ‘“Hangē ko ia ko ʻeku mātā tonu ʻaneafi ʻa e toto ʻo Nēpote+ pea mo e toto ʻo hono ngaahi fohá,” ko e fakahaaʻi ia ʻe Sihová, “te u totongi+ kiate koe ʻi he konga kelekelé ni tonu,” ko e fakahaaʻi ia ʻe Sihová.’ Ko ia hiki ia ʻo lī ki he konga kelekelé, ʻo fakatatau ki he folofola ʻa Sihová.”+

27 ʻI he sio ʻa Tuʻi ʻAhasaia+ ʻo Siutá ki he meʻa naʻe hokó, naʻá ne hola ʻi he hala ʻo e fale ngoué. (Ki mui ai, naʻe tulimui ʻa Sehu kiate ia ʻo ne pehē: “Taaʻi mo ia foki!” Ko ia naʻa nau taaʻi ia ʻi he salioté ʻi heʻene ʻalu hake ki Kulí, ʻa ia ʻoku ofi atu ki ʻIpileamí.+ Ka naʻe hoko atu ʻene holá ki Mekito peá ne mate ai. 28 Pea naʻe ʻave ia ʻe heʻene kau sevānití ʻi ha saliote ki Selusalema, pea naʻa nau tanu ia ʻi hono faʻitoká fakataha mo ʻene fanga kuí ʻi he Kolo-ʻo-Tēvitá.+ 29 Ko e taʻu hono 11 ʻo e pule ʻa Siholame ko e foha ʻo ʻĒhapí naʻe hoko ai ʻa ʻAhasaia+ ko e tuʻi ki Siutá.)

30 ʻI he aʻu atu ʻa Sehu ki Sisililí,+ naʻe fanongo ai ʻa Sisipeli.+ Ko ia naʻá ne vali hono matá ʻaki ha meʻa-vali* ʻuliʻuli pea ʻai ha teuteu ki hono ʻulú peá ne fakasio hifo ʻi he matapā-teké. 31 ʻI he hū mai ʻa Sehu ʻi he matapā ʻo e koló, naʻe pehē ange ʻe Sisipeli: “Naʻe hoko koā ha lelei kia Similai, ʻa e tokotaha naʻá ne tāmateʻi ʻa hono ʻeikí?”+ 32 ʻI heʻene sio hake ki he matapā-teké, naʻá ne pehē: “Ko hai ʻoku kau mo aú? Ko hai?”+ Naʻe sio hifo kiate ia ʻi he taimi pē ko iá ha ʻōfisa ʻi he lotoʻaá ʻe toko ua pe toko tolu. 33 Naʻá ne pehē atu: “Lī hifo ia!” Ko ia naʻa nau lī hifo ia, pea naʻe pihi atu ha konga ʻo hono totó ki he holisí pea ki he fanga hōsí, pea naʻe tāmalaki ia ʻe heʻene fanga hōsí. 34 ʻI he hili iá, naʻá ne hū atu ʻo ne kai mo inu. Naʻá ne pehē ange leva: “Fai muʻa ha tokanga ki he fefine malaʻiá ni ʻo tanu ia. He ko e ʻofefine ia ʻo ha tuʻi.”+ 35 Ka ʻi heʻenau ʻalu atu ke tanu iá, naʻe ʻikai te nau toe maʻu ha meʻa ka ko hono ngeʻesi-ʻulú pē mo hono vaʻé pea mo hono ʻaofinimá.+ 36 ʻI heʻenau foki atu ʻo tala kiate iá, naʻá ne pehē ange: “ʻOku fakahoko ai heni ʻa e folofola ʻa Sihova+ naʻá ne fai fakafou ʻi heʻene sevāniti ko ʻIlaisiā ko e tangata Tīsipí, ʻo pehē, ‘ʻI he konga kelekele ʻo Sisililí, ʻe kai ai ʻe he fanga kulií ʻa e kakano ʻo Sisipelí.+ 37 Pea ko e ʻangaʻanga ʻo Sisipelí ʻe hoko ko e kinohaʻa ʻi he ngoue ʻi he konga kelekele ʻo Sisililí, ke ʻoua ai naʻa nau pehē: “Ko Sisipeli eni.”’”

10 Pea naʻe ʻi ai ha ngaahi foha ʻe toko 70 ʻo ʻĒhapi+ ʻi Samēlia. Ko ia naʻe fai ʻe Sehu ha ngaahi tohi ʻo ʻave ia ki Samēlia, ki he kau māʻolunga ʻo Sisililí, mo e kau mātuʻá,+ pea mo e kau tauhi ʻo e fānau ʻa ʻĒhapí,* ʻo pehē: 2 “Ko eni ʻi he taimi ʻe aʻu atu ai ʻa e tohi ko ení kiate kimoutolú, ʻe ʻiate kimoutolu ʻa e ngaahi foha ʻo homou ʻeikí, pea pehē ki he ngaahi saliote taú, ko e fanga hōsí, ko ha kolo fakakolotau, pea mo e ngaahi meʻatau. 3 Fili ʻa e lelei taha mo feʻungamālie* taha ʻi he ngaahi foha ʻo homou ʻeikí pea fakanofo ia ki he taloni ʻo ʻene tamaí. Pea mou tau leva maʻá e fale ʻo homou ʻeikí.”

4 Ka naʻa nau mātuʻaki manavahē pea nau pehē: “Vakai! Kapau naʻe ʻikai lava ʻa e tuʻi ʻe toko ua ke tuʻu ʻi hono ʻaó,+ ʻe lava fēfē ke tau tuʻu kitautolu?” 5 Ko ia ko e tokotaha naʻá ne tokangaʻi ʻa e palasí,* mo e kōvana ʻo e koló, mo e kau mātuʻá, pea mo e kau tauhí naʻa nau ʻave ʻa e fekaú ni kia Sehu: “Ko kimautolú ko hoʻo kau sevāniti, pea te mau fai ʻa e meʻa kotoa pē ʻokú ke tala mai kiate kimautolú. ʻE ʻikai te mau fakanofo ha taha ke tuʻi. Fai ha meʻa pē ʻe hā lelei ki hoʻo vakaí.”

6 Pea naʻá ne fai kiate kinautolu ha tohi hono ua, ʻo pehē ai: “Kapau ʻoku mou kau mo au pea loto-lelei ke talangofua kiate au, ʻomi ʻa e ngaahi foʻi ʻulu ʻo e ngaahi foha ʻo homou ʻeikí pea mou omi kiate au ʻapongipongi ʻi he taimi ko ení ki Sisilili.”

Pea ko e ngaahi foha ʻe toko 70 ʻo e tuʻí naʻa nau nofo ʻi he kau tangata tuʻu-ki-muʻa ʻo e koló ʻa ia naʻa nau tauhi hake kinautolú. 7 ʻI he aʻu atu pē ʻa e tohí kiate kinautolú, naʻa nau ʻave ʻa e ngaahi foha ʻo e tuʻí ʻo tāmateʻi kinautolu, ko e kau tangata ʻe toko 70,+ pea naʻa nau faʻo honau ʻulú ʻi ha ngaahi kato pea ʻave ia kiate ia ki Sisilili. 8 Naʻe hū atu ʻa e talafekaú ʻo tala ange kiate ia: “Kuo nau ʻomi ʻa e ʻulu ʻo e ngaahi foha ʻo e tuʻí.” Ko ia naʻá ne pehē ange: “Fokotuʻu ia ʻi ha tuʻunga ʻe ua ʻi he hūʻanga ʻo e matapā ʻo e koló kae ʻoua ke pongipongi hake.” 9 ʻI heʻene hū atu ki tuʻa ʻi he pongipongí, naʻá ne tuʻu ʻi he ʻao ʻo e kakaí kotoa peá ne pehē: “ʻOku mou tonuhia* kimoutolu. ʻIo, naʻá ku faʻufaʻu ha kovi ki hoku ʻeikí, pea naʻá ku tāmateʻi ia,+ ka ko hai naʻá ne taaʻi ʻa e faʻahinga kotoa ko ení? 10 Ke mou ʻiloʻi leva, ʻe ʻikai ha momoʻi folofola ʻe taha ʻa Sihova ʻa ia kuo folofolaʻaki ʻe Sihova ki he fale ʻo ʻĒhapí ʻe taʻefakahoko,*+ pea kuo fai ʻe Sihova ʻa e meʻa naʻá ne folofolaʻaki fakafou ʻi heʻene sevāniti ko ʻIlaisiaá.”+ 11 ʻIkai ngata aí, naʻe taaʻi ʻe Sehu ʻa e faʻahinga kotoa naʻe toe ʻi he fale ʻo ʻĒhapi ʻi Sisililí, pea pehē ki heʻene kau tangata tuʻu-ki-muʻá kotoa, ko hono ngaahi mahení, pea mo ʻene kau taulaʻeikí,+ kae ʻoua kuo ʻikai ha taha ʻe hao.+

12 Naʻá ne tuʻu hake leva ʻo hoko atu ʻene fonongá ki Samēlia. Naʻe ʻi he hala ko iá ʻa e fale kosi* ʻo e kau tauhi-sipí. 13 Naʻe fetaulaki ai ʻa Sehu mo e fanga tokoua ʻo Tuʻi ʻAhasaia+ ʻo Siutá, pea naʻá ne pehē ange, “Ko hai kimoutolu?” Naʻa nau pehē: “Ko e fanga tokoua kimautolu ʻo ʻAhasaia, pea ko ʻemau ʻalu hifó ke ʻeke pe ʻoku lelei pē ʻa e ngaahi foha ʻo e tuʻí mo e fānau ʻa e kuini fehuhú.” 14 Naʻá ne pehē ange ʻi he taimi pē ko iá: “Puke moʻui kinautolu!” Ko ia naʻa nau puke moʻui kinautolu pea tāmateʻi kinautolu ʻi he lepa ʻo e fale kosí, ko e kau tangata ʻe toko 42. Naʻe ʻikai te ne tuku ke hao ha foʻi toko taha ʻiate kinautolu.+

15 ʻI heʻene ʻalu atu mei aí, naʻá ne fetaulaki mo Sionatapi+ ko e foha ʻo Lēkapí,+ ʻa ia naʻe haʻu ke fakafetaulaki mai kiate ia. ʻI heʻene lea fakafeʻiloaki kiate* iá, naʻá ne pehē kiate ia: “ʻOku kau kakato ho lotó mo* au, ʻo hangē pē ko e kau ʻa hoku lotó mo ho lotó?”

Naʻe tali ange ʻe Sionatapi: “Ko ia.”

“Kapau ko ia, ʻai mai ho nimá.”

Ko ia naʻá ne ʻai ange hono nimá, pea naʻe fusi hake ia ʻe Sehu ki he salioté kiate ia. 16 Naʻá ne pehē ange leva: “Haʻu mo au, pea te ke sio ki he ʻikai te u makātakiʻi hano fakauouaʻi* ʻa Sihová.”+ Ko ia naʻe fakaheka hake ʻa Sionatapi ki heʻene saliote taú. 17 Pea naʻá ne aʻu ki Samēlia, ʻo ne taaʻi ʻa e faʻahinga kotoa naʻe toe ʻi he fale ʻo ʻĒhapi ʻi Samēliá kae ʻoua kuó ne fakaʻauha ʻosi kinautolu,+ ʻo fakatatau ki he folofola ʻa Sihova naʻá ne folofolaʻaki kia ʻIlaisiaá.+

18 ʻIkai ko ia pē, naʻe tānaki fakataha mai ʻe Sehu ʻa e kakaí kotoa peá ne pehē kiate kinautolu: “Naʻe siʻisiʻi pē ʻa e lotu ia ʻa ʻĒhapi kia Pēalí,+ ka ko Sehú ʻe lahi ange ʻene lotu kiate iá. 19 Ko ia ui mai ʻa e kau palōfita kotoa ʻa Pēalí,+ ʻa ʻene kau lotú kotoa, mo ʻene kau taulaʻeikí kotoa+ kiate au. ʻOua naʻa tuku ke liʻaki ha foʻi toko taha, koeʻuhí ʻoku ʻi ai ʻeku fuʻu feilaulau ke fai kia Pēali. Ko ha taha pē ʻe liʻaki ʻe ʻikai te ne moʻui.” Ka naʻe faikākā ʻa Sehu koeʻuhí ke fakaʻauha ʻa e kau lotu kia Pēalí.

20 Naʻe hoko atu ʻa Sehu: “Talaki* ha fuʻu fakataha makehe kia Pēali.” Ko ia naʻa nau fanongonongo ia. 21 ʻI he hili iá, naʻe ʻave ʻe Sehu ha fekau ki ʻIsileli kotoa, pea naʻe haʻu ʻa e kotoa ʻo e kau lotu kia Pēalí. Naʻe ʻikai ha foʻi toko taha ne nofo ʻo ʻikai te ne haʻu. Naʻa nau hū ki he fale* ʻo Pēalí,+ pea naʻe fonu ʻa e fale ʻo Pēalí mei he ngataʻanga ʻe tahá ki he ngataʻanga ʻe tahá. 22 Naʻá ne pehē ange ki he tokotaha naʻá ne tokangaʻi ʻa e tukuʻanga valá: “ʻOmai ha ngaahi kofu ki he kotoa ʻo e kau lotu kia Pēalí.” Ko ia naʻá ne ʻomai ʻa e valá kiate kinautolu. 23 Naʻe hū leva ʻa Sehu mo Sionatapi+ ko e foha ʻo Lēkapí ki he fale ʻo Pēalí. Pea naʻá ne pehē ki he kau lotu kia Pēalí: “Fakasio fakalelei pea vakai ke ʻoua naʻa ʻi heni ha kau lotu kia Sihova, ka ko e kau lotu pē kia Pēalí.” 24 Naʻe faifai pē pea nau hū atu ke ʻohake ʻa e ngaahi feilaulau pea mo e ngaahi feilaulau tutu. Naʻe fokotuʻu ʻe Sehu ʻi tuʻa ʻa e toko 80 ʻo ʻene kau tangatá peá ne pehē ange: “Kapau ʻe hola ha taha ʻo e kau tangata ʻoku ou tuku atu ki homou nimá, ʻe fetongiʻaki hoʻo moʻuí ʻa ʻene moʻuí.”

25 ʻI he ʻosi pē ʻene ʻohake ʻa e feilaulau tutú, naʻe pehē ʻe Sehu ki he kau kaʻaté* pea mo e kau ʻōfisa fakakautaú: “Mou hū mai ʻo taaʻi kinautolu! ʻOua naʻa tuku ke hola ha foʻi toko taha!”+ Ko ia naʻe taaʻi kinautolu ʻe he kau kaʻaté mo e kau ʻōfisa fakakautaú ʻaki ʻa e heletaá pea laku kinautolu ki tuʻa, pea nau ʻalu atu ai pē ʻo aʻu ki he feituʻu toputapu ʻi loto* ʻi he fale ʻo Pēalí. 26 Naʻa nau ʻave leva ki tuʻa ʻa e ngaahi pou maka toputapu+ ʻo e fale ʻo Pēalí pea tutu ʻa e pou taki taha.+ 27 Naʻa nau holoki hifo ʻa e pou maka toputapu+ ʻo Pēalí, pea naʻa nau hae hifo ʻa e fale ʻo Pēalí+ pea ngaohi ai ha ngaahi fale mālōlō, ʻo hangē ko ia ʻoku ʻi ai ʻo aʻu mai ki he ʻaho ní.

28 Pea naʻe fakaʻauha ʻosi ai ʻe Sehu ʻa e lotu Pēalí mei ʻIsileli. 29 Kae kehe, naʻe ʻikai ke tafoki ʻa Sehu mei he ngaahi angahala naʻe fakatupunga ʻe Selopoame ko e foha ʻo Nīpatí ke fai ʻe ʻIsileli ʻi he fekauʻaki mo e ongo kiʻi pulu koula naʻe ʻi Pēteli pea mo Taní.+ 30 Ko ia naʻe folofola ai ʻa Sihova kia Sehu: “Koeʻuhí naʻá ke failelei pea naʻá ke fai ʻa e meʻa ʻoku totonu ʻi heʻeku vakaí ʻaki hono fakahoko ʻa e meʻa kotoa naʻe ʻi hoku lotó ke fai ki he fale ʻo ʻĒhapí,+ ko e toʻutangata ʻe fā ʻo ho ngaahi fohá te nau nofo ʻi he taloni ʻo ʻIsilelí.”+ 31 Ka naʻe ʻikai ke tokanga ʻa Sehu ke ʻaʻeva ʻi he Lao ʻa Sihova ko e ʻOtua ʻo ʻIsilelí ʻaki ʻa hono lotó kotoa.+ Naʻe ʻikai te ne tafoki mei he ngaahi angahala naʻe fakatupunga ʻe Selopoame ke fai ʻe ʻIsilelí.+

32 ʻI he ngaahi ʻaho ko iá naʻe kamata ai ke tuʻusi* fakakongokonga ʻe Sihova ʻa ʻIsileli. Naʻe hanganaki ʻohofi kinautolu ʻe Hesaeli ʻi he vahefonua kotoa ʻo ʻIsilelí,+ 33 mei Sioatani ʻo faai ai ki he hahaké, ko e fonua kotoa ko Kiliatí—ʻo e haʻa Katá, ko e haʻa Lūpení, pea mo e haʻa Manasé+—mei ʻAloeli, ʻa ia ʻoku ʻi he veʻe Teleʻa* ʻAlanoní, ki Kiliati pea mo Pēsani.+

34 Pea ko e toenga ʻo e hisitōlia ʻo Sehú, mo e meʻa kotoa naʻá ne faí mo e kotoa ʻo hono fuʻu mālohí, ʻikai kuo hiki ia ʻi he tohi ʻo e hisitōlia ʻo e taimi ʻo e ngaahi tuʻi ʻo ʻIsilelí? 35 Pea naʻe toka ʻa Sehu ʻo mālōlō fakataha mo ʻene fanga kuí, pea naʻa nau tanu ia ʻi Samēlia; pea naʻe hoko ʻa hono foha ko Sihoaasí+ ko e tuʻi ʻo fetongi ia. 36 Ko e lōloa* ʻo e pule ʻa Sehu ki ʻIsilelí ko e taʻu ʻe 28 ʻi Samēlia.

11 ʻI he taimi leva naʻe sio ai ʻa ʻAtalaia+ ko e faʻē ʻa ʻAhasaiá kuo mate ʻa ʻene tamá,+ naʻá ne tuʻu hake ʻo fakaʻauha kātoa ʻa e laine fakatuʻí.*+ 2 Kae kehe, ko Siosepa ko e ʻofefine ʻo Tuʻi Siholamé, ʻa e tuofefine ʻo ʻAhasaiá, naʻá ne ʻave ʻa Sihoasi+ ko e foha ʻo ʻAhasaiá ʻo ne holatakiʻi ia mei he lotolotonga ʻo e ngaahi foha ʻo e tuʻí ʻa ia naʻe teu ke tāmateʻí, ʻo tuku ia mo hono tauhí ʻi ha loki mohe ʻi loto. Naʻe lava ke nau tauhi ia ʻo fufū meia ʻAtalaia, ko ia naʻe ʻikai ke tāmateʻi ai ia. 3 Naʻe hokohoko atu ai pē ʻa ʻene ʻi he fefine tauhí ʻi he taʻu ʻe ono, ʻo ne toi ʻi he fale ʻo Sihová, lolotonga ia ʻa e pule ʻa ʻAtalaia ʻi he fonuá.

4 ʻI he taʻu hono fitú, naʻe ʻave ʻe Sihoiata ha fekau ki he ngaahi ʻeiki ʻo e ngaahi toko teau ʻo e kau kaʻate Kelianí pea mo e kau pule ʻo e kau kaʻate ʻo e palasí*+ ke nau haʻu kiate ia ki he fale ʻo Sihová. Naʻá ne fai ha aleapau* mo kinautolu pea ʻai kinautolu ke nau fai ha fakapapau ki ai ʻi he fale ʻo Sihová, peá ne tuku leva ke nau mamata ki he foha ʻo e tuʻí.+ 5 Naʻá ne tuʻutuʻuni kiate kinautolu: “Ko e meʻa eni te mou faí: Ko homou vahe tolu ʻe taha te mou ngāue ʻi he Sāpaté pea mātuʻaki leʻohi ʻa e fale*+ ʻo e tuʻí, 6 ko ha vahe tolu ʻe taha te nau ʻi he Matapā ʻo e Makatuʻungá, pea ko e vahe tolu ʻe taha te nau ʻi he matapā ʻi mui ʻi he kau kaʻate ʻo e palasí. Te mou taufetongi ʻi hono leʻohi ʻa e falé. 7 Ko homou kongakau ʻe ua ʻa ia ʻe ʻikai te nau ngāue ʻi he Sāpaté kuo pau ke nau mātuʻaki leʻohi ʻa e fale ʻo Sihová ke maluʻi ʻa e tuʻí. 8 Kuo pau ke mou takatakaiʻi ʻa e tuʻí ʻi he tafaʻaki kotoa pē, ʻo taki taha toʻo ʻene meʻatau. Ko ha taha pē ʻe hū ki loto ʻi he ngaahi ʻotú ʻe tāmateʻi. Te mou ʻi he tuʻí ʻi ha feituʻu pē te ne ʻalu ki ai.”*

9 Ko e ngaahi ʻeiki ʻo e ngaahi toko teaú+ naʻa nau fai ʻa e meʻa tofu pē ko ia naʻe fekauʻi ange ʻe Sihoiata ko e taulaʻeikí. Ko ia naʻe ʻave ʻe he tokotaha taki taha ʻene kau tangata ʻa ia naʻe ngāue ʻi he Sāpaté, fakataha mo kinautolu ko ia naʻe ʻikai ke ngāue ʻi he Sāpaté, pea nau hū atu kia Sihoiata ko e taulaʻeikí.+ 10 Naʻe ʻoange leva ʻe he taulaʻeikí ki he ngaahi ʻeiki ʻo e ngaahi toko teaú ʻa e ngaahi tao mo e ngaahi pā fuopotopoto ʻa Tuʻi Tēvitá, ʻa ia naʻe ʻi he fale ʻo Sihová. 11 Pea ko e kau kaʻate ʻo e palasí+ naʻa nau tuʻu ʻi honau tuʻuʻangá, ʻo taki taha toʻo ʻene meʻatau, mei he tafaʻaki toʻomataʻu ʻo e falé ki he tafaʻaki toʻohema ʻo e falé, ʻi he veʻe ʻōlitá+ pea ʻi he veʻe falé, ʻo takatakai kotoa ki he tuʻí. 12 Naʻe ʻomi leva ʻe Sihoiata ʻa e foha ʻo e tuʻí+ ki tuʻa pea ʻai kiate ia ʻa e kalauní pea mo e Fakamoʻoní,*+ pea naʻa nau fakanofo ia ko e tuʻi pea pani ia. Naʻe kamata ke nau pasipasi mo nau pehē: “Ke lākoifie ʻa e ʻAfioná!”+

13 ʻI he fanongo ʻa ʻAtalaia ki he ongo mai ʻa e lele ʻa e kakaí, naʻá ne ʻalu atu ʻi he taimi pē ko iá ki he kakaí ki he fale ʻo Sihová.+ 14 Pea naʻá ne sio atu ki he tuʻí ʻokú ne tuʻu mai ai ʻi he veʻe fuʻu poú ʻo fakatatau ki he meʻa naʻe angaʻakí.+ Ko e ngaahi ʻeikí mo e kau ifi talupité+ naʻa nau ʻi he tuʻí, pea ko e kakai kotoa ʻo e fonuá naʻa nau fiefia mo ifi ʻa e ngaahi talupité. ʻI he meʻá ni naʻe hae ai ʻe ʻAtalaia ʻa hono ngaahi kofú peá ne kalanga: “Ko e faʻufaʻufono! Ko e faʻufaʻufono!” 15 Ka naʻe ʻoatu ha fekau ʻe Sihoiata ko e taulaʻeikí ki he ngaahi ʻeiki ʻo e ngaahi toko teaú,+ ʻa e faʻahinga naʻe fakanofo ke nau tokangaʻi ʻa e kau taú, ʻo ne pehē kiate kinautolu: “ʻAve ia mei he lotolotonga ʻo e ngaahi ʻotú, pea kapau ʻe muimui ha taha ʻiate ia, tāmateʻi ia ʻaki ʻa e heletaá!” He naʻe pehē ʻe he taulaʻeikí: “ʻOua naʻa tāmateʻi ia ʻi he fale ʻo Sihová.” 16 Ko ia naʻa nau puke ia, pea ʻi heʻene aʻu ki he feituʻu ʻoku hū ai ʻa e fanga hōsí ki he fale*+ ʻo e tuʻí, naʻe tāmateʻi ia ʻi ai.

17 Naʻe fai leva ʻe Sihoiata ha fuakava ʻi he vahaʻa ʻo Sihova mo e tuʻí pea mo e kakaí,+ te nau kei hoko ai pē ko e kakai ʻa Sihova, pea naʻá ne toe fai foki ha fuakava ʻi he vahaʻa ʻo e tuʻí pea mo e kakaí.+ 18 ʻI he hili iá, naʻe ʻalu atu ʻa e kakai kotoa ʻo e fonuá ki he fale* ʻo Pēalí ʻo holoki hifo ʻa hono ngaahi ʻōlitá,+ pea laiki fakaʻaufuli ʻa hono ngaahi ʻīmisí,+ pea tāmateʻi ʻa Mātani ko e taulaʻeiki ʻa Pēalí+ ʻi muʻa ʻi he ngaahi ʻōlitá.

Pea naʻe fakanofo leva ʻe he taulaʻeikí ʻa e faʻahinga ke nau tokangaʻi ʻa e fale ʻo Sihová.+ 19 ʻIkai ko ia pē, naʻá ne ʻave ʻa e ngaahi ʻeiki ʻo e ngaahi toko teaú,+ mo e kau kaʻate Kelianí, mo e kau kaʻate ʻo e palasí,+ pea mo e kakai kotoa ʻo e fonuá ke fakafeʻao hifo ʻa e tuʻí mei he fale ʻo Sihová, pea naʻa nau ʻalu ki he fale* ʻo e tuʻí ʻo fou atu ʻi he matapā ʻo e kaʻate ʻo e palasí. Naʻá ne nofo hifo leva ʻi he taloni ʻo e ngaahi tuʻí.+ 20 Ko ia naʻe fiefia ʻa e kakai kotoa ʻo e fonuá pea naʻe nonga ʻa e koló, he kuo nau tāmateʻi ʻa ʻAtalaia ʻaki ʻa e heletā ʻi he fale ʻo e tuʻí.

21 Naʻe taʻu fitu ʻa Sihoasi+ ʻi heʻene hoko ko e tuʻí.+

12 ʻI he taʻu hono fitu ʻo e pule ʻa Sehú,+ naʻe hoko ai ʻa Sihoasi+ ko e tuʻi, pea naʻá ne pule ʻi he taʻu ʻe 40 ʻi Selusalema. Ko e hingoa ʻo ʻene faʻeé ko Sipeia mei Pea-sipa.+ 2 Naʻe hokohoko atu hono fai ʻe Sihoasi ʻa e meʻa naʻe totonu ʻi he vakai ʻa Sihová ʻi he ngaahi ʻaho kotoa naʻe fakahinohinoʻi ai ia ʻe Sihoiata ko e taulaʻeikí. 3 Kae kehe, naʻe ʻikai ke toʻo ʻa e ngaahi potu māʻolungá+ ia, pea naʻe kei faifeilaulau pē ʻa e kakaí mo fai ʻa e feilaulau fakakohu ʻi he ngaahi potu māʻolungá.

4 Naʻe pehē ʻe Sihoasi ki he kau taulaʻeikí: “Toʻo ʻa e paʻanga kotoa kuo ʻomai ki he fale ʻo Sihová ki he ngaahi foaki toputapú,+ ʻa e paʻanga naʻe tuʻutuʻuni ke totongi ʻe he tokotaha taki taha,+ mo e paʻanga kuo foaki ko ha mahuʻinga ia ʻo ha taha kuo fakamahuʻingaʻi, pea mo e paʻanga kotoa kuo ueʻi ʻe he loto ʻo e tokotaha taki taha ke ne ʻomai ki he fale ʻo Sihová.+ 5 ʻE toʻo taki taha ia ʻe he kau taulaʻeikí mei he faʻahinga naʻa nau fai ʻa e foakí* pea ngāueʻaki ia ke fakaleleiʻiʻaki ʻa e falé, ʻi ha feituʻu pē naʻe ʻilo ʻoku maumau.”*+

6 Ka ʻi he taʻu hono 23 ʻo e pule ʻa Tuʻi Sihoasí, naʻe teʻeki ai ke fakaleleiʻi ʻe he kau taulaʻeikí ia ʻa e maumau naʻe hoko ki he falé.+ 7 Ko ia naʻe ui ʻe Tuʻi Sihoasi ʻa Sihoiata+ ko e taulaʻeikí pea mo e kau taulaʻeiki kehé peá ne pehē ange kiate kinautolu: “Ko e hā ʻoku ʻikai te mou fakaleleiʻi ai ʻa e maumau kuo hoko ki he falé? Ko ia ai, ʻoua naʻa toe toʻo ha paʻanga mei he faʻahinga ʻoku nau fai ʻa e foakí kae ʻoua kuo ngāueʻaki ia ke fakaleleiʻiʻaki ʻa e falé.”+ 8 ʻI heʻene peheé leva naʻe loto ai ʻa e kau taulaʻeikí ke ʻoua naʻa toe toʻo ha paʻanga mei he kakaí pea heʻikai ai ke nau moʻuaʻaki ke fakaleleiʻi ʻa e falé.

9 Naʻe toʻo leva ʻe Sihoiata ko e taulaʻeikí ha puha+ ʻo ne vili ha foʻi ava ʻi hono tāpuní pea tuku ia ʻi he veʻe ʻōlitá ʻi he toʻomataʻú ʻi heʻete hū atu ki he fale ʻo Sihová. Ko e feituʻu ia naʻe hanga ʻe he kau taulaʻeiki ko ia naʻa nau ngāue ko e kau leʻo matapaá ʻo tuku ki ai ʻa e paʻanga kotoa naʻe ʻomai ki he fale ʻo Sihová.+ 10 ʻI he taimi pē naʻa nau sio ai naʻe lahi ʻaupito ʻa e paʻangá ʻi he puhá, naʻe haʻu leva ʻa e sekelitali ʻa e tuʻí pea mo e taulaʻeiki lahí ʻo tānaki* mo lau ʻa e paʻanga ko ia naʻe ʻomai ki he fale ʻo Sihová.+ 11 Naʻa nau ʻave leva ʻa e paʻanga naʻe laú ki he faʻahinga ko ia naʻe fakanofo ke tokangaʻi ʻa e ngāue naʻe lolotonga fai ʻi he fale ʻo Sihová. Ko ia naʻa nau totongiʻaki ia ʻa e kau ngāue fakatufungá pea mo e kau langa ko ē naʻa nau ngāue ʻi he fale ʻo Sihová,+ 12 pea pehē ki he kau tufunga maká mo e kau tā maká. Naʻa nau toe fakatau mai foki ʻa e papa mo e ngaahi maka kuo taá ki hono fakaleleiʻi ʻa e maumau kuo hoko ki he fale ʻo Sihová pea ngāueʻaki ʻa e paʻangá ki he ngaahi fakamole kehe kotoa ʻi hono fakaleleiʻi ʻa e falé.

13 Kae kehe, naʻe ʻikai ha paʻanga naʻe ʻomai ki he fale ʻo Sihová naʻe ngāueʻaki ki hano ngaohi ha ngaahi pēsoni siliva, ngaahi helekosi, ngaahi poulu, ngaahi talupite,+ pe ko ha faʻahinga naunau koula pe siliva pē ki he fale ʻo Sihová.+ 14 Naʻa nau ʻoange ia ki he faʻahinga pē ko ia naʻa nau fai ʻa e ngāué, pea naʻa nau ngāueʻaki ia ki hono fakaleleiʻi ʻa e fale ʻo Sihová. 15 Naʻe ʻikai te nau ʻeke ha fakamatala mei he kau tangata ko ia naʻa nau ʻoange ki ai ʻa e paʻangá ke nau ʻoatu ki he kau ngāué, he ko ha kau tangata falalaʻanga+ kinautolu. 16 Kae kehe, ko e paʻanga ko ia ki he ngaahi feilaulau halaiá+ pea mo e paʻanga ki he ngaahi feilaulau angahalá naʻe ʻikai ke ʻomai ia ki he fale ʻo Sihová; ko e meʻa ia ʻa e kau taulaʻeikí.+

17 ʻI he taimi ko iá naʻe ʻalu hake ai ʻa Hesaeli+ ko e tuʻi ʻo Sīliá ke tauʻi ʻa Kati,+ pea naʻá ne hamu ia, ʻi he hili iá naʻá ne fakapapauʻi ai ke ne ʻohofi* ʻa Selusalema.+ 18 ʻI he meʻa ko iá naʻe toʻo ai ʻe Tuʻi Sihoasi ʻo Siutá ʻa e ngaahi foaki toputapu kotoa pē naʻe hanga ʻe heʻene fanga kui ko Sihosafate, Siholame, mo ʻAhasaia ko e ngaahi tuʻi ʻo Siutá ʻo fakatoputapuʻí, pea pehē foki ki heʻene ngaahi feilaulau toputapu pē ʻaʻaná pea mo e kotoa ʻo e koula naʻe maʻu ʻi he ngaahi tukuʻanga koloa ʻo e fale ʻo Sihová pea mo e fale* ʻo e tuʻí, pea ʻave ia kia Hesaeli ko e tuʻi ʻo Sīliá.+ Ko ia naʻá ne holomui ai mei Selusalema.

19 Ko e meʻa ki he toenga ʻo e hisitōlia ʻo Sihoasí, mo e meʻa kotoa naʻá ne faí, ʻikai kuo hiki ia ʻi he tohi ʻo e hisitōlia ʻo e taimi ʻo e ngaahi tuʻi ʻo Siutá? 20 Kae kehe, naʻe kau ʻa ʻene kau sevānití ʻi ha faʻufaʻufono fekauʻaki mo ia+ pea nau taaʻi ʻa Sihoasi ʻi he fale ʻi he foʻi māʻolungá,*+ ʻi he hala ʻoku ʻalu hifo ki Sileá. 21 Ko ʻene ongo sevāniti ko Siosakali ko e tama ʻa Simatí mo Sihosapati ko e foha ʻo Sōmelí naʻá na taaʻi ia ʻo ne mate.+ Naʻa nau tanu ia fakataha mo ʻene fanga kuí ʻi he Kolo-ʻo-Tēvitá, pea naʻe hoko ʻa hono foha ko ʻAmasaiá ko e tuʻi ʻo fetongi ia.+

13 ʻI he taʻu hono 23 ʻo e pule ʻa Sihoasi+ ko e foha ʻo ʻAhasaia+ ko e tuʻi ʻo Siutá, naʻe hoko ʻa Sihoaasi ko e foha ʻo Sehú+ ko e tuʻi ki ʻIsileli ʻi Samēlia, pea naʻá ne pule ʻi he taʻu ʻe 17. 2 Naʻe hokohoko atu ʻene fai ʻa e meʻa naʻe kovi ʻi he vakai ʻa Sihová, pea naʻá ne kīvoi ʻi he angahala naʻe fakatupunga ʻe Selopoame ko e foha ʻo Nīpatí ke fai ʻe ʻIsilelí.+ Naʻe ʻikai te ne tafoki mei ai. 3 Ko ia naʻe kakaha ʻa e houhau ʻa Sihová+ ki ʻIsileli,+ peá ne tuku kinautolu ki he nima ʻo Tuʻi Hesaeli+ ʻo Sīliá pea ki he nima ʻo Peni-hētati+ ko e foha ʻo Hesaelí ʻi he kotoa honau ngaahi ʻahó.

4 Pea naʻe faifai ʻo kōlenga ʻa Sihoaasi ki he hōifua ʻa* Sihová, pea naʻe fanongo ʻa Sihova kiate ia, he naʻá ne mamata ki he ngaohikovia naʻe fai ʻe he tuʻi ʻo Sīliá ki ʻIsilelí.+ 5 Ko ia naʻe tokonaki ʻe Sihova ki ʻIsileli ha faifakahaofi+ ke ne fakatauʻatāinaʻi kinautolu mei he nima ʻo Sīliá, pea naʻe malava ʻa e kau ʻIsilelí ke nofo ʻi honau ngaahi ʻapí ʻo hangē pē ko ia ki muʻá.* 6 (Kae kehe, naʻe ʻikai te nau mavahe mei he angahala ʻo e fale ʻo Selopoamé ʻa ia naʻá ne fakatupunga ke fai ʻe ʻIsilelí.+ Naʻa nau hokohoko atu pē ʻi he angahala ko ení,* pea naʻe kei tuʻu ai pē ʻa e pou ʻakau toputapú*+ ʻi Samēlia.) 7 Naʻe toe ha kau tau ko e kau tangata heka hoosi pē ʻe toko 50 ʻa Sihoaasi, saliote ʻe 10, pea mo e kau sōtia ʻalu lalo ʻe toko 10,000, koeʻuhí he naʻe fakaʻauha kinautolu+ ʻe he tuʻi ʻo Sīliá, ʻo tāmalaki kinautolu ke nau hangē ko e efu ʻi he taimi ʻo e ʻauʻau uité.+

8 Ko e meʻa ki he toenga ʻo e hisitōlia ʻo Sihoaasí, mo e meʻa kotoa naʻá ne faí mo hono fuʻu mālohí, ʻikai kuo hiki ia ʻi he tohi ʻo e hisitōlia ʻo e taimi ʻo e ngaahi tuʻi ʻo ʻIsilelí? 9 Pea naʻe toka ʻa Sihoaasi ʻo mālōlō fakataha mo ʻene fanga kuí, pea naʻa nau tanu ia ʻi Samēlia;+ pea naʻe hoko ʻa hono foha ko Sihoasí ko e tuʻi ʻo fetongi ia.

10 ʻI he taʻu hono 37 ʻo e pule ʻa Tuʻi Sihoasi ʻo Siutá, naʻe hoko ʻa Sihoasi+ ko e foha ʻo Sihoaasí ko e tuʻi ki ʻIsileli ʻi Samēlia, pea naʻá ne pule ʻi he taʻu ʻe 16. 11 Naʻe hokohoko atu ʻene fai ʻa e meʻa naʻe kovi ʻi he vakai ʻa Sihová, ʻo ʻikai te ne mavahe mei he ngaahi angahala kotoa naʻe fakatupunga ʻe Selopoame ko e foha ʻo Nīpatí ke fai ʻe ʻIsilelí.+ Naʻá ne hokohoko atu pē* ʻi he ngaahi angahalá ni.

12 Ko e meʻa ki he toenga ʻo e hisitōlia ʻo Sihoasí, mo e meʻa kotoa naʻá ne faí mo hono fuʻu mālohí pea mo ʻene faitau mo Tuʻi ʻAmasaia ʻo Siutá,+ ʻikai kuo hiki ia ʻi he tohi ʻo e hisitōlia ʻo e taimi ʻo e ngaahi tuʻi ʻo ʻIsilelí? 13 Pea naʻe toka ʻa Sihoasi ʻo mālōlō fakataha mo ʻene fanga kuí, pea naʻe nofo ʻa Selopoame*+ ʻi hono taloní. Pea naʻe tanu ʻa Sihoasi ʻi Samēlia fakataha mo e ngaahi tuʻi ʻo ʻIsilelí.+

14 Pea ʻi he hoko ʻa ʻIlaisa+ ʻo puke ʻi ha mahaki ʻa ia naʻe faai atu pē ʻo ne mate aí, naʻe ʻalu hifo ai ʻa Sihoasi ko e tuʻi ʻo ʻIsilelí kiate ia ʻo ne tangi ʻiate ia, ʻo pehē: “ʻA ʻeku tamai, ʻa ʻeku tamai! Ko e saliote ʻa ʻIsilelí mo ʻene kau tangata heka hōsí!”+ 15 Naʻe pehē ange leva ʻe ʻIlaisa kiate ia: “Toʻo ha kaufana mo ha ngaahi foʻi ngahau.” Ko ia naʻá ne toʻo ai ha kaufana mo ha ngaahi foʻi ngahau. 16 Pea naʻá ne pehē ange ki he tuʻi ʻo ʻIsilelí: “ʻAi ho nimá ki he kaufaná.” Ko ia naʻá ne ʻai hono nimá ki ai, ʻi he hili iá naʻe hili atu ʻe ʻIlaisa ʻa hono nimá ʻi he nima ʻo e tuʻí. 17 Naʻá ne pehē ange leva: “Fakaava ʻa e matapā-teke ki he hahaké.” Ko ia naʻá ne fakaava ia. Naʻe pehē ange ʻe ʻIlaisa: “Fana!” Ko ia naʻá ne fana leva. Naʻá ne pehē ange leva: “Ko e ngahau ʻo e ikuna* ʻa Sihová, ko e ngahau ʻo hono ikunaʻi ʻa* Sīliá! Te ke taaʻi* ʻa Sīlia ʻi ʻĒfeki+ kae ʻoua kuó ke fakaʻauha ʻosi ia.”

18 Naʻá ne hoko atu: “Toʻo ʻa e ngaahi foʻi ngahaú,” peá ne toʻo ia. Naʻá ne pehē ange leva ki he tuʻi ʻo ʻIsilelí: “Taaʻi ʻa e kelekelé.” Ko ia naʻá ne taaʻi tuʻo tolu ʻa e kelekelé pea tuku. 19 ʻI he meʻa ko iá, naʻe ʻita ʻa e tangata ʻa e ʻOtua moʻoní kiate ia peá ne pehē: “Naʻe totonu ke ke taaʻi tuʻo nima pe tuʻo ono ʻa e kelekelé! Pea naʻe mei peheni haʻo taaʻi ʻa Sīlia kae ʻoua kuó ke fakaʻauha ʻosi ia, ka ko eni te ke taaʻi tuʻo tolu+ pē ʻa Sīlia.”

20 ʻI he hili iá, naʻe mate ʻa ʻIlaisa pea naʻe tanu ia. Naʻe ʻi ai ha kau Mōape kaihaʻa fakamālohi+ naʻa nau faʻa hū ki he fonuá ʻi he kamataʻanga ʻo e taʻú.* 21 ʻI hono tanu ʻe ha kau tangata ha tangata ʻe taha, naʻa nau sio atu ki he kau kaihaʻa fakamālohí, ko ia naʻa nau lī fakavave ai ʻa e tangatá ki he tanuʻanga ʻo ʻIlaisá ka nau lele. ʻI he lave ʻa e tangatá ki he ngaahi hui ʻo ʻIlaisá, naʻá ne toe moʻui+ peá ne tuʻu hake.

22 Pea ko Tuʻi Hesaeli+ ʻo Sīliá naʻá ne fakafeʻātungiaʻi ʻa ʻIsileli+ ʻi he ngaahi ʻaho kotoa ʻo Sihoaasí. 23 Kae kehe, naʻe fakaaʻu atu ʻe Sihova ʻa e hōifua mo e meesi kiate kinautolu+ pea fakahaaʻi ʻene tokanga kiate kinautolu koeʻuhí ko ʻene fuakava mo ʻĒpalahame,+ ʻAisake,+ pea mo Sēkopé.+ Naʻe ʻikai te ne loto ke fakaʻauha kinautolu, pea kuo ʻikai te ne kapusi kinautolu mei hono ʻaó ʻo aʻu mai ki he ʻahó ni. 24 ʻI he mate ʻa Tuʻi Hesaeli ʻo Sīliá, naʻe hoko ʻa hono foha ko Peni-hētatí ko e tuʻi ʻo fetongi ia. 25 Naʻe fakafoki mai leva ʻe Sihoasi ko e foha ʻo Sihoaasí meia Peni-hētati ko e foha ʻo Hesaelí ʻa e ngaahi kolo ʻa ia naʻá ne ʻave ʻi he taú meia Sihoaasi ko ʻene tamaí. Naʻe tuʻo tolu ʻa hono taaʻi*+ ia ʻe Sihoasí, pea naʻá ne toe maʻu mai ʻa e ngaahi kolo ʻo ʻIsilelí.

14 ʻI he taʻu hono ua ʻo e pule ʻa Sihoasi+ ko e foha ʻo Sihoaasi ko e tuʻi ʻo ʻIsilelí, naʻe hoko ai ʻa ʻAmasaia ko e foha ʻo Tuʻi Sihoasi ʻo Siutá ko e tuʻi. 2 Naʻá ne taʻu 25 ʻi heʻene hoko ko e tuʻí, pea naʻá ne pule ʻi he taʻu ʻe 29 ʻi Selusalema. Ko e hingoa ʻo ʻene faʻeé ko Sioatini ʻo Selusalemá.+ 3 Naʻe hokohoko atu ʻene fai ʻa e meʻa naʻe totonu ʻi he vakai mai ʻa Sihová, ka naʻe ʻikai ke hangē ko Tēvita+ ko ʻene kuí. Naʻá ne fai ʻa e meʻa kotoa pē ʻo hangē ko ia naʻe fai ʻe Sihoasi ko ʻene tamaí.+ 4 Kae kehe, naʻe ʻikai ke toʻo+ ʻa e ngaahi potu māʻolungá, pea naʻe kei faifeilaulau pē ʻa e kakaí mo fai ʻa e feilaulau fakakohu ʻi he ngaahi potu māʻolungá.+ 5 ʻI he taimi pē naʻá ne fokotuʻu maʻu ai ʻa e puleʻangá ʻi hono mafaí, naʻá ne taaʻi ʻa ʻene kau sevāniti ʻa ia naʻa nau taaʻi ʻa ʻene tamai ko e tuʻí.+ 6 Ka naʻe ʻikai te ne tāmateʻi ʻa e ngaahi foha ʻo e kau fakapoó, ʻo fehoanaki mo e fekau ʻa Sihova naʻe hiki ʻi he tohi Lao ʻa Mōsesé: “ʻE ʻikai ke tāmateʻi ʻa e ngaahi tamaí koeʻuhí ko honau ngaahi fohá, pea ʻe ʻikai ke tāmateʻi ʻa e ngaahi fohá koeʻuhí ko ʻenau ngaahi tamaí; ka ʻe tāmateʻi ʻa e tokotaha taki taha ʻi heʻene angahala pē ʻaʻana.”+ 7 Naʻá ne taaʻi ʻa e kau ʻĪtomí+ ʻi he Teleʻa Māsimá,+ ko e kau tangata ʻe toko 10,000, pea naʻá ne hamu ʻa Saila ʻi he taú,+ pea naʻe ui ai ʻa hono hingoá ko Siokitili ʻo aʻu mai ki he ʻahó ni.

8 Naʻe fekauʻi atu leva ʻe ʻAmasaia ha kau talafekau kia Sihoasi ko e foha ʻo Sihoaasi ko e foha ʻo Sehu ko e tuʻi ʻo ʻIsilelí, ʻo pehē: “Haʻu, ke ta fehangahangai* ʻi he taú.”+ 9 Naʻe ʻoatu ʻe Tuʻi Sihoasi ʻo ʻIsilelí ʻa e pōpoaki ko ení kia Tuʻi ʻAmasaia ʻo Siutá: “Ko e ʻakau talatala ʻi Lepanoní naʻá ne ʻoatu ha pōpoaki ki he sita ʻi Lepanoní, ‘ʻOmai ho ʻofefiné ki hoku fohá ke ne hoko ko hono uaifi.’ Kae kehe, naʻe ʻalu atu ha manu fekai ʻo Lepanoni peá ne tāmalaki ʻa e ʻakau talatalá. 10 Ko e moʻoni, kuó ke taaʻi ʻa ʻĪtomi,+ ko ia kuo hoko ʻo mahiki ai ho lotó. Fiefia ʻi ho lāngilangí, ka te ke nofo pē ʻi ho falé.* Ko e hā ke ke fakatupunga ai ha fakatamaki mo ha hinga, pea tuku hifo ai ʻa Siuta fakataha mo koé?” 11 Ka naʻe ʻikai ke fanongo ʻa ʻAmasaia.+

Ko ia naʻe ʻalu hake ai ʻa Tuʻi Sihoasi ʻo ʻIsilelí, pea ko ia mo Tuʻi ʻAmasaia ʻo Siutá naʻá na fehangahangai ʻi he taú ʻi Pete-semesi,+ ʻa ia ʻoku ʻo Siutá.+ 12 Naʻe ikunaʻi ʻe ʻIsileli ʻa Siuta, ko ia naʻe hola ai ʻa e tokotaha taki taha ki hono ʻapi.* 13 Naʻe puke ʻe Tuʻi Sihoasi ʻo ʻIsilelí ʻa Tuʻi ʻAmasaia ʻo Siutá ko e foha ʻo Sihoasi ko e foha ʻo ʻAhasaiá, ʻi Pete-semesi. Naʻá na ʻalu leva ki Selusalema, pea naʻá ne avangi ʻa e ʻā ʻo Selusalemá ko e kiupite ʻe 400,* mei he Matapā ʻo ʻIfalemí+ ki he Matapā Tulikí.+ 14 Naʻá ne ʻave ʻa e koula mo e siliva kotoa pea mo e koloa kotoa naʻe maʻu ʻi he fale ʻo Sihová pea ʻi he ngaahi tukuʻanga koloa ʻo e fale* ʻo e tuʻí, pea pehē ki he faʻahinga naʻe taki pōpulá. Pea naʻá ne foki ki Samēlia.

15 Ko e meʻa ki he toenga ʻo e hisitōlia ʻo Sihoasí, ʻa e meʻa naʻá ne faí mo hono fuʻu mālohí pea mo ʻene faitau mo Tuʻi ʻAmasaia ʻo Siutá, ʻikai kuo hiki ia ʻi he tohi ʻo e hisitōlia ʻo e taimi ʻo e ngaahi tuʻi ʻo ʻIsilelí? 16 Pea naʻe toka ʻa Sihoasi ʻo mālōlō fakataha mo ʻene fanga kuí pea naʻe tanu ia ʻi Samēlia+ fakataha mo e ngaahi tuʻi ʻo ʻIsilelí; pea naʻe hoko ʻa hono foha ko Selopoamé*+ ko e tuʻi ʻo fetongi ia.

17 Naʻe moʻui atu ʻa ʻAmasaia+ ko e foha ʻo Sihoasi ko e tuʻi ʻo Siutá ʻi he taʻu ʻe 15 hili ʻa e mate ʻa Sihoasi+ ko e foha ʻo Sihoaasi ko e tuʻi ʻo ʻIsilelí.+ 18 Ko e meʻa ki he toenga ʻo e hisitōlia ʻo ʻAmasaiá, ʻikai kuo hiki ia ʻi he tohi ʻo e hisitōlia ʻo e taimi ʻo e ngaahi tuʻi ʻo Siutá? 19 Ki mui ai, naʻe fai ha faʻufaʻufono kiate ia+ ʻi Selusalema, pea naʻá ne hola ki Lākisi, ka naʻa nau fekauʻi atu ha kau tangata ke nau tulimui ʻiate ia ki Lākisi pea tāmateʻi ia ʻi ai. 20 Ko ia naʻa nau fakafoki ia ʻi ha fanga hoosi, pea naʻe tanu ia ʻi Selusalema fakataha mo ʻene fanga kuí ʻi he Kolo-ʻo-Tēvitá.+ 21 Pea ko e kakai kotoa ʻo Siutá naʻa nau ʻave ʻa ʻAsalaia,*+ ʻa ia naʻe taʻu 16,+ pea nau fakanofo ia ko e tuʻi ʻo fetongi ʻa ʻene tamai ko ʻAmasaiá.+ 22 Naʻá ne toe langa ʻa ʻEliati+ pea fakafoki ia ki Siuta ʻi he hili ʻa e toka ʻa e tuʻí* ʻo mālōlō fakataha mo ʻene fanga kuí.+

23 ʻI he taʻu hono 15 ʻo e pule ʻa ʻAmasaia ko e foha ʻo Sihoasi ko e tuʻi ʻo Siutá, naʻe hoko ʻa Selopoame+ ko e foha ʻo Tuʻi Sihoasi ʻo ʻIsilelí ko e tuʻi ʻi Samēlia, pea naʻá ne pule ʻi he taʻu ʻe 41. 24 Naʻe hokohoko atu ʻene fai ʻa e meʻa naʻe kovi ʻi he vakai ʻa Sihová. Naʻe ʻikai te ne mavahe mei he angahala kotoa naʻe fakatupunga ʻe Selopoame ko e foha ʻo Nīpatí ke fai ʻe ʻIsilelí.+ 25 Naʻá ne fakafoki mai ʻa e kauʻāfonua ʻo ʻIsilelí mei Lipo-hēmati*+ ʻo aʻu atu ai pē ki he Tahi ʻo e ʻAlapá,*+ ʻo fakatatau ki he folofola naʻe folofolaʻaki ʻe Sihova ko e ʻOtua ʻo ʻIsilelí fakafou ʻi heʻene sevāniti ko Siona+ ko e foha ʻo ʻAmitai, ko e palōfita mei Kati-hefeli.+ 26 He naʻe mamata ʻa Sihova ki he mātuʻaki faingataʻaʻia lahi ʻa ʻIsilelí.+ Naʻe ʻikai toe ha taha ke ne tokoniʻi ʻa ʻIsileli, naʻa mo e tokotaha ʻoku ʻikai hano tokoní pe ko e vaivaí. 27 Ka naʻe talaʻofa ʻa Sihova ʻe ʻikai ke tafiʻi ʻosi ʻa e hingoa ʻo ʻIsilelí mei he lalo langí.+ Ko ia naʻá ne fakahaofi ai kinautolu fakafou ʻi he nima ʻo Selopoame ko e foha ʻo Sihoasí.+

28 Ko e meʻa ki he toenga ʻo e hisitōlia ʻo Selopoamé, mo e meʻa kotoa naʻá ne faí mo hono fuʻu mālohí, mo ʻene faitaú pea mo ʻene fakafoki mai ʻa Tāmasikusi+ mo Hēmati+ ki Siuta ʻi ʻIsilelí, ʻikai kuo hiki ia ʻi he tohi ʻo e hisitōlia ʻo e taimi ʻo e ngaahi tuʻi ʻo ʻIsilelí? 29 Pea naʻe toka ʻa Selopoame ʻo mālōlō fakataha mo ʻene fanga kuí, fakataha mo e ngaahi tuʻi ʻo ʻIsilelí; pea naʻe hoko ʻa hono foha ko Sākalaiá+ ko e tuʻi ʻo fetongi ia.

15 ʻI he taʻu hono 27 ʻo e pule ʻa Tuʻi Selopoame* ʻo ʻIsilelí, naʻe hoko ai ʻa ʻAsalaia*+ ko e foha ʻo Tuʻi ʻAmasaia+ ʻo Siutá ko e tuʻi.+ 2 Naʻá ne taʻu 16 ʻi heʻene hoko ko e tuʻí, pea naʻá ne pule ʻi he taʻu ʻe 52 ʻi Selusalema. Ko e hingoa ʻo ʻene faʻeé ko Sēkolaia ʻo Selusalemá. 3 Naʻe hokohoko atu ʻene fai ʻa e meʻa naʻe totonu ʻi he vakai mai ʻa Sihová, ʻo hangē tofu pē ko e meʻa naʻe fai ʻe heʻene tamai ko ʻAmasaiá.+ 4 Kae kehe, naʻe ʻikai ke toʻo+ ʻa e ngaahi potu māʻolungá, pea naʻe kei faifeilaulau pē ʻa e kakaí mo fai ʻa e feilaulau fakakohu ʻi he ngaahi potu māʻolungá.+ 5 Naʻe taaʻi ʻe Sihova ʻa e tuʻí, pea naʻá ne hoko ai pē ko ha kilia+ ʻo aʻu ki he ʻaho ʻo ʻene maté; pea naʻá ne nofo ʻi ha fale mavahe,+ lolotonga ia ko Siotame ko e foha ʻo e tuʻí+ naʻá ne tokangaʻi ʻa e falé,* ʻo faifakamaau ki he kakai ʻo e fonuá.+ 6 Ko e meʻa ki he toenga ʻo e hisitōlia ʻo ʻAsalaiá,+ mo e meʻa kotoa naʻá ne faí, ʻikai kuo hiki ia ʻi he tohi ʻo e hisitōlia ʻo e taimi ʻo e ngaahi tuʻi ʻo Siutá? 7 Pea naʻe toka ʻa ʻAsalaia ʻo mālōlō fakataha mo ʻene fanga kuí+ pea naʻa nau tanu ia fakataha mo ʻene fanga kuí ʻi he Kolo-ʻo-Tēvitá; pea naʻe hoko ʻa hono foha ko Siotamé ko e tuʻi ʻo fetongi ia.

8 ʻI he taʻu hono 38 ʻo e pule ʻa Tuʻi ʻAsalaia+ ʻo Siutá, naʻe hoko ai ʻa Sākalaia+ ko e foha ʻo Selopoamé ko e tuʻi ki ʻIsileli ʻi Samēlia, pea naʻá ne pule ʻi he māhina ʻe ono. 9 Naʻá ne fai ʻa e meʻa naʻe kovi ʻi he vakai mai ʻa Sihová, ʻo hangē tofu pē ko e meʻa naʻe fai ʻe heʻene fanga kuí. Naʻe ʻikai te ne mavahe mei he ngaahi angahala naʻe fakatupunga ʻe Selopoame ko e foha ʻo Nīpatí ke fai ʻe ʻIsilelí.+ 10 Pea ko Salumi ko e foha ʻo Siepesí naʻá ne faʻufaʻu ha kovi kiate ia peá ne taaʻi+ ia ʻi ʻIpileami.+ ʻI he hili ʻene tāmateʻi iá, naʻá ne hoko ko e tuʻi ʻo fetongi ia. 11 Ko e meʻa ki he toenga ʻo e hisitōlia ʻo Sākalaiá, kuo hiki ia ʻi he tohi ʻo e hisitōlia ʻo e taimi ʻo e ngaahi tuʻi ʻo ʻIsilelí. 12 Naʻe fakahoko ai ʻa e folofola naʻe folofolaʻaki ʻe Sihova kia Sehú: “Ko e toʻutangata ʻe fā ʻo ho ngaahi fohá+ te nau nofo ʻi he taloni ʻo ʻIsilelí.”+ Pea naʻe pehē ʻa ʻene hokó.

13 Ko Salumi ko e foha ʻo Siepesí naʻá ne hoko ko e tuʻi ʻi he taʻu hono 39 ʻo e pule ʻa Tuʻi ʻŪsaia+ ʻo Siutá, pea naʻá ne pule ʻi ha māhina kakato ʻi Samēlia. 14 Pea ko Menahemi ko e foha ʻo Kataí naʻá ne ʻalu hake mei Tilisa+ ki Samēlia ʻo ne taaʻi ʻa Salumi+ ko e foha ʻo Siepesí ʻi Samēlia. ʻI he hili ʻene tāmateʻi iá, naʻá ne hoko ko e tuʻi ʻo fetongi ia. 15 Ko e meʻa ki he toenga ʻo e hisitōlia ʻo Salumí pea mo e faʻufaʻufono naʻá ne faí, kuo hiki ia ʻi he tohi ʻo e hisitōlia ʻo e taimi ʻo e ngaahi tuʻi ʻo ʻIsilelí. 16 Ko e taimi ia naʻe haʻu ai ʻa Menahemi mei Tilisa ʻo taaʻi ʻa Tifisa mo e faʻahinga kotoa naʻe ʻi aí pea mo hono vahefonuá, koeʻuhí naʻe ʻikai te ne fakaava ange ʻa hono ngaahi matapaá kiate ia. Naʻá ne taaʻi ia pea fahi ua ʻa ʻene kau fefine feitamá.

17 ʻI he taʻu hono 39 ʻo e pule ʻa Tuʻi ʻAsalaia ʻo Siutá, naʻe hoko ai ʻa Menahemi ko e foha ʻo Kataí ko e tuʻi ki ʻIsileli, pea naʻá ne pule ʻi he taʻu ʻe hongofulu ʻi Samēlia. 18 Naʻe hokohoko atu ʻene fai ʻa e meʻa naʻe kovi ʻi he vakai mai ʻa Sihová. Naʻe ʻikai te ne mavahe mei he angahala kotoa naʻe fakatupunga ʻe Selopoame ko e foha ʻo Nīpatí ke fai ʻe ʻIsileli,+ ʻi he kotoa ʻo hono ngaahi ʻahó. 19 Naʻe haʻu ʻa Tuʻi Puli+ ʻo ʻAsīliá ki he fonuá, pea naʻe ʻoange ʻe Menahemi kia Puli ʻa e talēniti* siliva ʻe 1,000 ko e totongi fakafoki ki heʻene tokoni ʻi hono ʻai ke mālohi ʻa ʻene pule ʻi he puleʻangá.+ 20 Ko ia naʻe tānaki ʻe Menahemi ʻa e silivá mei ʻIsileli ʻaki hono kounaʻi ia mei he kau tangata tuʻu-ki-muʻa mo tuʻumālié.+ Naʻá ne ʻoange ki he tuʻi ʻo ʻAsīliá ʻa e sikeli* siliva ʻe 50 maʻá e tangata taki taha. Pea naʻe foki ai ʻa e tuʻi ʻo ʻAsīliá ʻo ʻikai te ne nofo ʻi he fonuá. 21 Ko e meʻa ki he toenga ʻo e hisitōlia ʻo Menahemí,+ mo e meʻa kotoa naʻá ne faí, ʻikai kuo hiki ia ʻi he tohi ʻo e hisitōlia ʻo e taimi ʻo e ngaahi tuʻi ʻo ʻIsilelí? 22 Pea naʻe toka ʻa Menahemi ʻo mālōlō fakataha mo ʻene fanga kuí; pea naʻe hoko ʻa hono foha ko Pekaiá ko e tuʻi ʻo fetongi ia.

23 ʻI he taʻu hono 50 ʻo e pule ʻa Tuʻi ʻAsalaia ʻo Siutá, naʻe hoko ai ʻa Pekaia ko e foha ʻo Menahemí ko e tuʻi ki ʻIsileli ʻi Samēlia, pea naʻá ne pule ʻi he taʻu ʻe ua. 24 Naʻe hokohoko atu ʻene fai ʻa e meʻa naʻe kovi ʻi he vakai mai ʻa Sihová. Naʻe ʻikai te ne mavahe mei he ngaahi angahala naʻe fakatupunga ʻe Selopoame ko e foha ʻo Nīpatí ke fai ʻe ʻIsilelí.+ 25 Pea ko ʻene ʻōfisa fakakautau ko Peka+ ko e foha ʻo Lemalaiá naʻá ne faʻufaʻu ha kovi kiate ia peá ne taaʻi ia ʻi Samēlia ʻi he taua fakakolotau ʻo e fale* ʻo e tuʻí fakataha mo ʻĀkopa pea mo ʻĀlie. Naʻe ʻiate ia ha kau tangata Kiliati ʻe toko 50; pea ʻi he hili ʻene tāmateʻi iá, naʻá ne hoko ko e tuʻi ʻo fetongi ia. 26 Ko e meʻa ki he toenga ʻo e hisitōlia ʻo Pekaiá, mo e meʻa kotoa naʻá ne faí, kuo hiki ia ʻi he tohi ʻo e hisitōlia ʻo e taimi ʻo e ngaahi tuʻi ʻo ʻIsilelí.

27 ʻI he taʻu hono 52 ʻo e pule ʻa Tuʻi ʻAsalaia ʻo Siutá, naʻe hoko ai ʻa Peka+ ko e foha ʻo Lemalaiá ko e tuʻi ki ʻIsileli ʻi Samēlia, pea naʻá ne pule ʻi he taʻu ʻe 20. 28 Naʻe hokohoko atu ʻene fai ʻa e meʻa naʻe kovi ʻi he vakai mai ʻa Sihová, pea naʻe ʻikai te ne mavahe mei he ngaahi angahala naʻe fakatupunga ʻe Selopoame ko e foha ʻo Nīpatí ke fai ʻe ʻIsilelí.+ 29 ʻI he ngaahi ʻaho ʻo Tuʻi Peka ʻo ʻIsilelí, naʻe ʻohofi ai ʻe Tuʻi Tikilati-pilesa+ ʻo ʻAsīliá ʻo ne hamu ʻa ʻĪsoni, ʻĒpeli-pete-maaka,+ Sanoa, Kētesi,+ Hāsoa, Kiliati,+ pea mo Kāleli, ʻa e fonua kotoa ʻo Nafitalaí,+ pea naʻá ne ʻave fakamālohi ʻa e kakaí ki ʻAsīlia.+ 30 Pea ko Hōsia+ ko e foha ʻo ʻElá naʻá ne faʻufaʻu ha kovi kia Peka ko e foha ʻo Lemalaiá, pea naʻá ne taaʻi ia ʻo ne tāmateʻi ia; pea naʻá ne hoko ko e tuʻi ʻo fetongi ia ʻi he taʻu hono 20 ʻo e pule ʻa Siotame+ ko e foha ʻo ʻŪsaiá. 31 Ko e meʻa ki he toenga ʻo e hisitōlia ʻo Peká, mo e meʻa kotoa naʻá ne faí, kuo hiki ia ʻi he tohi ʻo e hisitōlia ʻo e taimi ʻo e ngaahi tuʻi ʻo ʻIsilelí.

32 ʻI he taʻu hono ua ʻo e pule ʻa Peka ko e foha ʻo Lemalaia ko e tuʻi ʻo ʻIsilelí, naʻe hoko ai ko e tuʻi ʻa Siotame+ ko e foha ʻo Tuʻi ʻŪsaia+ ʻo Siutá. 33 Naʻá ne taʻu 25 ʻi heʻene hoko ko e tuʻí, pea naʻá ne pule ʻi he taʻu ʻe 16 ʻi Selusalema. Ko e hingoa ʻo ʻene faʻeé ko Selusa ko e ʻofefine ʻo Sātoki.+ 34 Naʻá ne hanganaki fai ʻa e meʻa naʻe totonú ʻi he vakai mai ʻa Sihová, ʻo hangē tofu pē ko ia naʻe fai ʻe heʻene tamai ko ʻŪsaiá.+ 35 Kae kehe, naʻe ʻikai ke toʻo ʻa e ngaahi potu māʻolungá, pea naʻe kei faifeilaulau pē ʻa e kakaí mo fai ʻa e feilaulau fakakohu ʻi he ngaahi potu māʻolungá.+ Ko ia ʻa e tokotaha naʻá ne langa ʻa e matapā ʻolunga ʻo e fale ʻo Sihová.+ 36 Ko e meʻa ki he toenga ʻo e hisitōlia ʻo Siotamé, mo e meʻa naʻá ne faí, ʻikai kuo hiki ia ʻi he tohi ʻo e hisitōlia ʻo e taimi ʻo e ngaahi tuʻi ʻo Siutá? 37 ʻI he ngaahi ʻaho ko iá naʻe kamata ke tuku atu ai ʻe Sihova ʻa Lesini ko e tuʻi ʻo Sīliá pea mo Peka+ ko e foha ʻo Lemalaiá ke na tauʻi ʻa Siuta.+ 38 Pea naʻe toka ʻa Siotame ʻo mālōlō fakataha mo ʻene fanga kuí pea naʻe tanu ia fakataha mo ʻene fanga kuí ʻi he Kolo-ʻo-Tēvita ko ʻene kuí. Pea naʻe hoko ʻa hono foha ko ʻĀhasí ko e tuʻi ʻo fetongi ia.

16 ʻI he taʻu hono 17 ʻo e pule ʻa Peka ko e foha ʻo Lemalaiá, naʻe hoko ai ko e tuʻi ʻa ʻĀhasi+ ko e foha ʻo Tuʻi Siotame ʻo Siutá. 2 Naʻe taʻu 20 ʻa ʻĀhasi ʻi heʻene hoko ko e tuʻí, pea naʻá ne pule ʻi he taʻu ʻe 16 ʻi Selusalema. Naʻe ʻikai te ne fai ʻa e meʻa naʻe totonu ʻi he vakai mai ʻa Sihova ko hono ʻOtuá ʻo hangē ko ia naʻe fai ʻe Tēvita ko ʻene kuí.+ 3 Ka naʻá ne ʻaʻeva ʻi he ʻalunga ʻo e ngaahi tuʻi ʻo ʻIsilelí,+ pea naʻe aʻu ʻo ne ʻai ʻa hono fohá tonu ke ne fou atu ʻi he afí,*+ ʻo muimui ʻi he ngaahi tōʻonga fakalielia ʻa e ngaahi puleʻanga+ naʻe kapusi ʻe Sihova mei he ʻao ʻo e kau ʻIsilelí. 4 Naʻá ne hanganaki faifeilaulau foki mo fai ha feilaulau fakakohu ʻi he ngaahi potu māʻolungá,+ ʻi he ngaahi foʻi māʻolungá, pea ʻi he lalo ʻakau tupu ʻāfaʻafá kotoa.+

5 Ko e taimi ia naʻe ʻalu hake ai ʻa Tuʻi Lesini ʻo Sīliá mo Peka ko e foha ʻo Lemalaia ko e tuʻi ʻo ʻIsilelí ke tauʻi ʻa Selusalemá.+ Naʻa nau ʻākoloʻi ʻa e kolo ʻa ia naʻe ʻi ai ʻa ʻĀhasí ka naʻe ʻikai ke nau lava ʻo hamu ʻa e koló. 6 ʻI he taimi ko iá naʻe fakafoki mai ai ʻe Tuʻi Lesini ʻo Sīliá ʻa ʻEliati+ ki ʻĪtomi, ʻi he hili iá, naʻá ne kapusi ʻa e kau Siú* mei ʻEliati. Pea naʻe hū atu ʻa e kau ʻĪtomí ki ʻEliati, pea kuo nau nofoʻi ia ʻo aʻu mai ki he ʻahó ni. 7 Ko ia naʻe fekau atu ʻe ʻĀhasi ha kau talafekau kia Tuʻi Tikilati-pilesa+ ʻo ʻAsīliá, ʻo pehē: “Ko aú ko hoʻo sevāniti pea ko ho foha. Haʻu ʻo fakahaofi au mei he nima ʻo e tuʻi ʻo Sīliá, pea mo e nima ʻo e tuʻi ʻo ʻIsilelí, ʻa ia ʻokú na ʻohofi aú.” 8 Pea naʻe ʻave ʻe ʻĀhasi ʻa e siliva pea mo e koula naʻe maʻu ʻi he fale ʻo Sihová pea ʻi he ngaahi tukuʻanga koloa ʻo e fale* ʻo e tuʻí peá ne ʻave ia ko ha totongi fufū+ ki he tuʻi ʻo ʻAsīliá. 9 Naʻe tali ʻe he tuʻi ʻo ʻAsīliá ʻa ʻene kolé, pea naʻá ne ʻalu hake ki Tāmasikusi ʻo hamu ia pea ʻave fakamālohi ʻa hono kakaí ki Kili,+ peá ne tāmateʻi ʻa Lesini.+

10 Pea naʻe ʻalu ʻa Tuʻi ʻĀhasi ke fetaulaki mo Tuʻi Tikilati-pilesa ʻo ʻAsīliá ʻi Tāmasikusi. ʻI heʻene sio ki he ʻōlita naʻe ʻi Tāmasikusí, naʻe ʻave ʻe Tuʻi ʻĀhasi kia ʻUlisa ko e taulaʻeikí ha palani ʻo e ʻōlitá, ʻo fakahaaʻi ai ʻa hono sīpingá pea mo e anga ʻo hono ngaohí.+ 11 Naʻe fokotuʻu ʻe ʻUlisa+ ko e taulaʻeikí ha ʻōlita+ ʻo fakatatau ki he ngaahi fakahinohino kotoa naʻe ʻomai ʻe Tuʻi ʻĀhasi mei Tāmasikusí. Naʻe fakaʻosi hono fokotuʻu ia ʻe ʻUlisa ko e taulaʻeikí ki muʻa ke foki mai ʻa Tuʻi ʻĀhasi mei Tāmasikusí. 12 ʻI he foki mai ʻa e tuʻí mei Tāmasikusi ʻo ne sio ki he ʻōlitá, naʻá ne fakaofiofi atu ki he ʻōlitá ʻo fai ai ha ngaahi feilaulau.+ 13 Pea naʻá ne hokohoko atu ʻa hono tutu ke kohu ʻene ngaahi feilaulau tutú mo ʻene ngaahi feilaulau meʻakaí ʻi he ʻōlita ko iá; naʻá ne lilingi foki ʻi ai ʻa ʻene ngaahi feilaulau inú mo afuhi ai ʻa e toto ʻo ʻene ngaahi feilaulau feʻinasiʻakí. 14 Pea naʻá ne hiki ʻa e ʻōlita kopa+ naʻe ʻi he ʻao ʻo Sihová mei hono tuʻuʻanga ʻi muʻa ʻi he falé, mei he vahaʻa ʻo ʻene ʻōlita ʻaʻaná pea mo e fale ʻo Sihová, pea naʻá ne tuku ia ʻi he tafaʻaki fakatokelau ʻo ʻene ʻōlita ʻaʻaná. 15 Naʻe fekauʻi ʻe Tuʻi ʻĀhasi ʻa ʻUlisa+ ko e taulaʻeikí: “Tutu ke kohu ʻa e feilaulau tutu ʻi he pongipongí ʻi he ʻōlita lahí,+ pehē foki ki he feilaulau meʻakai+ ʻi he efiafí, mo e feilaulau tutu ʻa e tuʻí, mo ʻene feilaulau meʻakaí, pea pehē ki he ngaahi feilaulau tutu, ko e ngaahi feilaulau meʻakai, pea mo e ngaahi feilaulau inu ʻa e kakaí kotoa. Te ke toe afuhi ai ʻa e toto kotoa ʻo e ngaahi feilaulau tutú pea mo e toto kotoa ʻo e ngaahi feilaulau kehé. Ko e meʻa ki he ʻōlita kopá, tuku ke u fakakaukauʻi ʻe au ʻa e meʻa ke fai ki aí.” 16 Pea naʻe fai ʻe ʻUlisa ko e taulaʻeikí ʻa e meʻa kotoa pē naʻe fekauʻi ange+ ʻe Tuʻi ʻĀhasí.

17 ʻIkai ko ia pē, naʻe tuʻutuʻu kongokonga ʻe Tuʻi ʻĀhasi ʻa e ngaahi pāneli he tafaʻaki ʻo e ngaahi salioté+ pea toʻo mei ai ʻa e ngaahi pēsoní,+ pea naʻá ne toʻo ʻa e fuʻu ʻaiʻanga vaí mei he fanga pulu kopa+ naʻa nau puke iá ʻo tuku ia ʻi ha hala faliki maka.+ 18 Pea ko e feituʻu fakapalepale ki he Sāpaté ʻa ia naʻe langa ʻi he falé pea mo e hūʻanga ʻi tuʻa ʻo e tuʻí naʻá ne hiki ia mei he fale ʻo Sihová; naʻá ne fai peheé koeʻuhi ko e tuʻi ʻo ʻAsīliá.

19 Ko e meʻa ki he toenga ʻo e hisitōlia ʻo ʻĀhasí, mo e meʻa naʻá ne faí, ʻikai kuo hiki ia ʻi he tohi ʻo e hisitōlia ʻo e taimi ʻo e ngaahi tuʻi ʻo Siutá?+ 20 Pea naʻe toka ʻa ʻĀhasi ʻo mālōlō fakataha mo ʻene fanga kuí pea naʻe tanu ia fakataha mo ʻene fanga kuí ʻi he Kolo-ʻo-Tēvitá; pea naʻe hoko ʻa hono foha ko Hesekaiá*+ ko e tuʻi ʻo fetongi ia.

17 ʻI he taʻu hono 12 ʻo e pule ʻa Tuʻi ʻĀhasi ʻo Siutá, naʻe hoko ai ʻa Hōsia+ ko e foha ʻo ʻElá ko e tuʻi ki ʻIsileli ʻi Samēlia; naʻá ne pule ʻi he taʻu ʻe hiva. 2 Naʻe hokohoko atu ʻene fai ʻa e meʻa naʻe kovi ʻi he vakai mai ʻa Sihová, ko e meʻá pē he naʻe ʻikai ke aʻu ia ki he kovi naʻe fai ʻe he ngaahi tuʻi ʻo ʻIsileli ʻi muʻa ʻiate iá. 3 Naʻe ʻalu hake ʻa Tuʻi Salimanesa ʻo ʻAsīliá ke tauʻi ia,+ pea naʻe hoko ʻa Hōsia ko ʻene sevāniti pea naʻe kamata ke ne totongi tukuhau kiate ia.+ 4 Kae kehe, naʻe ʻilo ʻe he tuʻi ʻo ʻAsīliá naʻe kau ʻa Hōsia ʻi ha faʻufaʻufono, he naʻá ne fekauʻi atu ha kau talafekau kia Tuʻi Sō ʻo ʻIsipité+ pea ʻikai te ne ʻoange ʻa e tukuhaú ki he tuʻi ʻo ʻAsīliá ʻo hangē pē ko ia ʻi he ngaahi taʻu ki muʻá. Ko ia naʻe hanga ai ʻe he tuʻi ʻo ʻAsīliá ʻo tauhi pōpula pea haʻi ia ʻi he pilīsoné.

5 Naʻe ʻohofi ʻe he tuʻi ʻo ʻAsīliá ʻa e fonuá kotoa, peá ne ʻalu atu ki Samēlia ʻo ne ʻākoloʻi ia ʻi he taʻu ʻe tolu. 6 ʻI he taʻu hono hiva ʻo e pule ʻa Hōsiá, naʻe hamu ai ʻe he tuʻi ʻo ʻAsīliá ʻa Samēlia.+ Naʻá ne ʻave fakamālohi+ leva ʻa e kakai ʻo ʻIsilelí ki ʻAsīlia pea tuku ke nau nofo ʻi Hala mo Hapoa ʻi he veʻe vaitafe Kōsaní+ pea ʻi he ngaahi kolo ʻo e kau Mītiá.+

7 Naʻe hoko ʻa e meʻá ni koeʻuhí naʻe faiangahala ʻa e kakai ʻo ʻIsilelí kia Sihova ko honau ʻOtuá, ʻa ia naʻá ne ʻomi kinautolu mei he fonua ko ʻIsipité mei he malumalu ʻo e pule ʻa Felo ko e tuʻi ʻo ʻIsipité.+ Naʻa nau lotu* ki he ngaahi ʻotua kehé,+ 8 naʻa nau muimui ki he ngaahi tōʻonga ʻa e ngaahi puleʻanga naʻe kapusi ʻe Sihova mei he ʻao ʻo e kau ʻIsilelí, pea naʻa nau muimui ʻi he ngaahi tōʻonga naʻe fokotuʻu ʻe he ngaahi tuʻi ʻo ʻIsilelí.

9 Naʻe tuli ʻa e kau ʻIsilelí ki he ngaahi meʻa naʻe ʻikai totonu kia Sihova ko honau ʻOtuá. Naʻa nau hanganaki fokotuʻu ʻa e ngaahi potu māʻolungá ʻi he kotoa honau ngaahi koló,+ mei he taua leʻó ki he kolo fakakolotaú.* 10 Naʻa nau hanganaki fokotuʻu maʻanautolu ʻa e ngaahi pou maka toputapu mo e ngaahi pou ʻakau toputapu*+ ʻi he foʻi māʻolunga kotoa pē pea ʻi he lalo ʻakau tupu ʻāfaʻafa kotoa pē;+ 11 pea ʻi he ngaahi potu māʻolunga kotoa pē naʻa nau faʻa fai ai ʻa e feilaulau fakakohu ʻo hangē tofu pē ko e meʻa naʻe fai ʻe he ngaahi puleʻanga naʻe ʻave fakamālohi ʻe Sihova mei honau ʻaó.+ Naʻa nau hanganaki fai ʻa e ngaahi meʻa fulikivanu ʻo fakalotomamahiʻi ai ʻa Sihova.

12 Naʻe hokohoko atu ʻenau tauhi ki he ngaahi ʻaitoli fakalieliá,*+ ʻa ia naʻe tala ʻe Sihova kiate kinautolu: “Kuo pau ke ʻoua naʻa mou fai ʻa e meʻá ni!”+ 13 Naʻe toutou fakatokanga ʻa Sihova ki ʻIsileli mo Siuta fakafou ʻi heʻene kau palōfitá kotoa mo e tokotaha-vīsone kotoa,+ ʻo pehē: “Tafoki mei homou ngaahi ʻalunga fulikivanú!+ Tauhi ʻa ʻeku ngaahi fekaú mo ʻeku ngaahi tuʻutuʻuní ʻo fakatatau ki he lao kotoa pē naʻá ku fekauʻi ki hoʻomou fanga kuí pea naʻá ku tuku atu kiate kimoutolu fakafou ʻi heʻeku kau sevāniti ko e kau palōfitá.” 14 Ka naʻe ʻikai te nau fanongo, pea naʻa nau kei loto-fefeka ai pē ʻo hangē tofu pē ko* ʻenau fanga kui naʻe ʻikai te nau fakahāhā ʻa e tui kia Sihova ko honau ʻOtuá.+ 15 Naʻe hokohoko atu ʻenau siʻaki ʻa ʻene ngaahi tuʻutuʻuní mo ʻene fuakava+ naʻá ne fai mo ʻenau fanga kuí pea mo ʻene ngaahi fakamanatu naʻá ne ʻoange ko e fakatokanga kiate kinautolú,+ pea naʻa nau hanganaki muimui ki he ngaahi ʻaitoli taʻeʻaongá+ pea nau hoko ai ko e kau koto taʻeʻaonga,+ ʻo nau faʻifaʻitaki ai ki he ngaahi puleʻanga takatakai ʻiate kinautolu ʻa ia naʻe fekauʻi ʻe Sihova ke ʻoua te nau faʻifaʻitaki ki aí.+

16 Naʻa nau toutou liʻaki ʻa e ngaahi fekau kotoa ʻa Sihova ko honau ʻOtuá, pea naʻa nau ngaohi ʻa e ʻīmisi mētale* ʻa ia ko e ongo kiʻi pulu ʻe ua+ pea mo ha pou ʻakau toputapu,*+ pea nau punou ki he kongakau kotoa ʻo e langí+ mo tauhi kia Pēali.+ 17 Naʻa nau ʻai foki honau ngaahi fohá mo honau ngaahi ʻofefiné ke nau fou atu ʻi he afi,*+ naʻa nau fai ʻa e vavalo+ mo kumi ki ha ngaahi fakaʻilonga, pea nau hanganaki līʻoa* atu kinautolu ke fai ʻa e meʻa naʻe kovi ʻi he vakai mai ʻa Sihová, ke fakalotomamahiʻi ai ia.

18 Ko ia naʻe mātuʻaki houhau ʻa Sihova ʻi ʻIsileli ʻo ne toʻo ai kinautolu mei hono ʻaó.+ Naʻe ʻikai te ne fakatoe ha taha ka ko e matakali pē ʻo Siutá.

19 Naʻa mo Siuta naʻe ʻikai te nau tauhi ʻa e ngaahi fekau ʻa Sihova ko honau ʻOtuá;+ naʻa nau ʻaʻeva foki ʻi he ngaahi tōʻonga naʻe muimui ai ʻa ʻIsilelí.+ 20 Naʻe siʻaki ʻe Sihova ʻa e hako kotoa ʻo ʻIsilelí pea fakamoʻulaloaʻi kinautolu pea tuku kinautolu ki he nima ʻo e kau puke fakamālohí, ʻo aʻu ai ki heʻene kapusi kinautolu mei hono ʻaó. 21 Naʻá ne hae ʻa ʻIsileli mei he fale ʻo Tēvitá, pea naʻa nau fakanofo ʻa Selopoame ko e foha ʻo Nīpatí ke hoko ko e tuʻi.+ Ka naʻe fakatupunga ʻe Selopoame ʻa ʻIsileli ke ne afe mei he muimui kia Sihová, pea naʻá ne fakatupunga kinautolu ke nau fai ha fuʻu angahala. 22 Pea naʻe hanganaki ʻaʻeva ʻa e kakai ʻo ʻIsilelí ʻi he ngaahi angahala kotoa naʻe fai ʻe Selopoamé.+ Naʻe ʻikai te nau mavahe mei ai 23 ʻo aʻu ki hono toʻo ʻe Sihova ʻa ʻIsileli mei hono ʻaó, ʻo hangē tofu pē ko ʻene talaki fakafou ʻi he kotoa ʻo ʻene kau sevāniti ko e kau palōfitá.+ Ko ia naʻe ʻave fakamālohi ʻa ʻIsileli mei hono fonuá ki ʻAsīlia,+ ʻa ia ʻoku nau ʻi ai ʻo aʻu mai ki he ʻahó ni.

24 Naʻe ʻomi leva ʻe he tuʻi ʻo ʻAsīliá ha kakai mei Pāpilone, Kuta, ʻAva, Hēmati, pea mo Sipalavaimi+ pea fakanofonofo kinautolu ʻi he ngaahi kolo ʻo Samēliá ʻo fetongi ʻa e kau ʻIsilelí; naʻa nau maʻu ʻa Samēlia pea nofoʻi ʻa hono ngaahi koló. 25 ʻI he ʻuluaki kamata ke nau nofo aí, naʻe ʻikai te nau manavahē* kia Sihova. Ko ia naʻe tuku mai ai ʻe Sihova ha fanga laione ki honau lotolotongá,+ pea naʻa nau tāmateʻi ha niʻihi ʻo e kakaí. 26 Naʻe fakahā ki he tuʻi ʻo ʻAsīliá: “Ko e ngaahi puleʻanga kuó ke ʻave fakamālohi pea fakanofonofo ʻi he ngaahi kolo ʻo Samēliá ʻoku ʻikai te nau ʻilo ʻa e lotu* ʻa e ʻOtua ʻo e fonuá. Ko ia ʻokú ne toutou tuku mai ai ʻa e fanga laione ki honau lotolotongá, ʻa ia ʻoku nau tāmateʻi kinautolu, he ʻoku ʻikai hanau tokotaha te ne ʻilo ʻa e lotu ʻa e ʻOtua ʻo e fonuá.”

27 Ko ia naʻe tuʻutuʻuni ai ʻa e tuʻi ʻo ʻAsīliá: “Fekau ha taha ʻo e kau taulaʻeiki ʻa ia naʻa mou ʻave fakamālohi mei aí ke foki ʻo nofo ai pea ke ne akoʻi kinautolu ki he lotu ʻa e ʻOtua ʻo e fonuá.” 28 Ko ia naʻe foki atu ai ha taha ʻo e kau taulaʻeiki naʻa nau ʻave fakamālohi mei Samēliá ʻo nofo ʻi Pēteli,+ pea naʻe kamata ke ne akoʻi kinautolu ki he founga ke nau manavahē* ai kia Sihová.+

29 Kae kehe, naʻe taki taha ngaohi ʻe he puleʻanga kehekehe ʻa honau ʻotua* pē ʻonautolu, ʻa ia naʻa nau tuku ia ʻi he ngaahi fale faiʻanga lotu ʻi he ngaahi potu māʻolunga naʻe fokotuʻu ʻe he kau Samēliá; naʻe taki taha fai pehē ʻa e puleʻanga kehekehe ʻi he ngaahi kolo naʻa nau nofo aí. 30 Ko ia ko e kau tangata ʻo Pāpiloné naʻa nau ngaohi ʻa e ʻīmisi ʻo Sūkote-penoti, ko e kau tangata ʻo Kutá naʻa nau ngaohi ʻa e ʻīmisi ʻo Nelikala, ko e kau tangata ʻo Hēmatí+ naʻa nau ngaohi ʻa e ʻīmisi ʻo ʻĀsima, 31 pea ko e kau ʻAvá naʻa nau ngaohi ʻa e ʻīmisi ʻo Nipasi mo Talitaki. Ko e kau Sipalavaimí naʻa nau tutu honau ngaahi fohá ʻi he afi kia ʻAtalameleki mo ʻAnameleki, ko e ongo ʻotua ʻo Sipalavaimí.+ 32 Neongo naʻa nau manavahē kia Sihova, naʻa nau fakanofo ha kau taulaʻeiki ki he ngaahi potu māʻolungá mei he kakaí fakalūkufua, pea naʻe faifatongia ʻa e faʻahingá ni maʻanautolu ʻi he ngaahi fale faiʻanga lotu ʻi he ngaahi potu māʻolungá.+ 33 Ko ia, naʻa nau manavahē kia Sihova, ka naʻa nau lotu pē ki honau ngaahi ʻotua ʻo kinautolú ʻo fakatatau ki he lotu* ʻa e ngaahi puleʻanga ʻa ia naʻe kapusi kinautolu mei aí.+

34 ʻOku aʻu mai ki he ʻahó ni ʻa ʻenau muimui ki heʻenau ngaahi lotu* ki muʻá. ʻOku ʻikai hanau tokotaha ʻe lotu* kia Sihova, pea ʻoku ʻikai ha taha ʻe muimui ki heʻene ngaahi tuʻutuʻuní, mo ʻene ngaahi fakamāú, ko e Laó, pea mo e fekau naʻe ʻoange ʻe Sihova ki he ngaahi foha ʻo Sēkopé, ʻa ia naʻá ne liliu ʻa hono hingoá ko ʻIsilelí.+ 35 ʻI hono fai ʻe Sihova ha fuakava mo kinautolú,+ naʻá ne fekau kiate kinautolu: “Kuo pau ke ʻoua naʻa mou manavahē ki he ngaahi ʻotua kehé, pea kuo pau ke ʻoua naʻa mou punou kiate kinautolu pe tauhi kiate kinautolu pe feilaulau kiate kinautolu.+ 36 Ka ko Sihova, ʻa ia naʻá ne ʻomi kimoutolu mei he fonua ko ʻIsipité ʻaki ha fuʻu ivi mālohi pea mo ha nima kuo mafao atú,+ ʻa e Tokotaha ʻoku totonu ke mou manavahē+ ki aí, pea ko ia ʻoku totonu ke mou punou ki aí, pea ko ia ʻoku totonu ke mou feilaulau ki aí. 37 Pea ko e ngaahi tuʻutuʻuni, mo e ngaahi fakamaau, ko e Lao, pea mo e fekau naʻá ne hiki maʻamoutolú,+ ʻoku totonu ke mou mātuʻaki muimui maʻu pē ki ai, pea kuo pau ke ʻoua naʻa mou manavahē ki he ngaahi ʻotua kehé. 38 Pea kuo pau ke ʻoua naʻa ngalo ʻiate kimoutolu ʻa e fuakava naʻá ku fai mo kimoutolú,+ pea kuo pau ke ʻoua naʻa mou manavahē ki he ngaahi ʻotua kehé. 39 Ka ko Sihova ko homou ʻOtuá ʻoku totonu ke mou manavahē ki aí, he ko ia ʻa e tokotaha te ne fakahaofi kimoutolu mei he nima ʻo homou ngaahi filí kotoa.”

40 Ka naʻe ʻikai te nau talangofua ki ai, pea naʻa nau muimui ki heʻenau lotu* ki muʻá.+ 41 Ko ia naʻe hoko ai ʻo manavahē ʻa e ngaahi puleʻangá ni kia Sihova,+ ka naʻa nau toe tauhi foki ki heʻenau ngaahi ʻīmisi kuo tongí. Naʻe fakatou fai ʻe honau ngaahi fohá mo honau fanga makapuná ʻa e meʻa tofu pē naʻe fai ʻe heʻenau fanga kuí, ʻo aʻu mai ki he ʻahó ni.

18 ʻI he taʻu hono tolu ʻo e pule ʻa Hōsia+ ko e foha ʻo ʻEla ko e tuʻi ʻo ʻIsilelí, naʻe hoko ai ko e tuʻi ʻa Hesekaia+ ko e foha ʻo Tuʻi ʻĀhasi+ ʻo Siutá. 2 Naʻá ne taʻu 25 ʻi heʻene hoko ko e tuʻí, pea naʻá ne pule ʻi he taʻu ʻe 29 ʻi Selusalema. Ko e hingoa ʻo ʻene faʻeé ko ʻApi* ko e ʻofefine ʻo Sākalaia.+ 3 Naʻá ne hanganaki fai ʻa e meʻa naʻe totonú ʻi he vakai mai ʻa Sihová,+ ʻo hangē tofu pē ko ia naʻe fai ʻe heʻene kui ko Tēvitá.+ 4 Ko ia ʻa e tokotaha naʻá ne toʻo ʻa e ngaahi potu māʻolungá,+ mo haveki ʻa e ngaahi pou maka toputapú, pea mo tā hifo ʻa e pou ʻakau toputapú.*+ Naʻá ne laiki foki ʻa e ngata kopa naʻe faʻu ʻe Mōsesé;+ he ʻi he aʻu mai ki he taimi ko iá naʻe fai ki ai ʻe he kakai ʻo ʻIsilelí ha feilaulau fakakohu pea naʻe faʻa ui ia ko e ngata kopa ʻaitolí.* 5 Naʻe tuku ʻene falalá kia Sihova+ ko e ʻOtua ʻo ʻIsilelí; naʻe ʻikai ha taha ʻe tatau mo ia ʻi he ngaahi tuʻi kotoa ʻo Siuta ki mui aí pea ʻi he faʻahinga ko ia ʻi muʻa ʻiate iá. 6 Naʻá ne pīkitai kia Sihova.+ Naʻe ʻikai te ne tafoki mei he muimui kiate iá; naʻe hokohoko atu ʻene tauhi ʻa e ngaahi fekau naʻe ʻoange ʻe Sihova kia Mōsesé. 7 Pea naʻe ʻiate ia ʻa Sihova. Ko ha feituʻu pē naʻe ʻalu ki ai, naʻá ne fai fakapotopoto ai. Naʻá ne angatuʻu ki he tuʻi ʻo ʻAsīliá pea fakafisi ke tauhi kiate ia.+ 8 Naʻá ne ikunaʻi foki ʻa e kau Filisitiá+ ʻo aʻu atu ki Kesa mo hono ngaahi vahefonuá, mei he taua leʻó ki he kolo fakakolotaú.*

9 ʻI he taʻu hono fā ʻo e pule ʻa Tuʻi Hesekaiá, ʻa ia, ko e taʻu hono fitu ia ʻo e pule ʻa Hōsia+ ko e foha ʻo ʻEla ko e tuʻi ʻo ʻIsilelí, naʻe ʻalu hake ai ʻa Tuʻi Salimanesa ʻo ʻAsīliá ke tauʻi ʻa Samēlia pea kamata ke ne ʻākoloʻi ia.+ 10 Naʻa nau hamu ia+ ʻi he ngataʻanga ʻa e taʻu ʻe tolú; ʻi he taʻu hono ono ʻo e pule ʻa Hesekaiá, ʻa ia ko e taʻu hono hiva ia ʻo e pule ʻa Tuʻi Hōsia ʻo ʻIsilelí, naʻe hamu ai ʻa Samēliá. 11 Pea naʻe ʻave fakamālohi+ ʻe he tuʻi ʻo ʻAsīliá ʻa ʻIsileli ki ʻAsīlia pea fakanofonofo kinautolu ʻi Hala mo Hapoa ʻi he veʻe vaitafe Kōsaní pea ʻi he ngaahi kolo ʻo e kau Mītiá.+ 12 Naʻe hoko ení koeʻuhí naʻe ʻikai te nau fanongo ki he leʻo ʻo Sihova ko honau ʻOtuá ka naʻa nau hanganaki maumauʻi ʻene fuakavá, ʻa e meʻa kotoa naʻe fekauʻi ʻe Mōsese ko e sevāniti ʻa Sihová.+ Naʻe ʻikai te nau fanongo pe talangofua ki ai.

13 ʻI he taʻu hono 14 ʻo e pule ʻa Tuʻi Hesekaiá, naʻe ʻalu hake ai ʻa Senakalipe ko e tuʻi ʻo ʻAsīliá+ ke tauʻi ʻa e ngaahi kolo fakakolotau kotoa pē ʻo Siutá pea hamu ia.+ 14 Ko ia naʻe ʻoatu ai ʻe Tuʻi Hesekaia ʻo Siutá ha fekau ki he tuʻi ʻo ʻAsīliá ki Lākisi: “ʻOku ou halaia. Ke ke holomui mei hoʻo tauʻi aú, pea te u ʻoatu ha meʻa pē te ke kounaʻi meiate aú.” Naʻe kounaʻi ʻe he tuʻi ʻo ʻAsīliá ʻa Tuʻi Hesekaia ʻo Siutá ke ne totongi ange ha talēniti* siliva ʻe 300 mo ha talēniti koula ʻe 30. 15 Ko ia naʻe ʻoange ʻe Hesekaia ʻa e siliva kotoa pē naʻe malava ke maʻu ʻi he fale ʻo Sihová pea ʻi he ngaahi tukuʻanga koloa ʻo e fale*+ ʻo e tuʻí. 16 ʻI he taimi ko iá, naʻe toʻo* ai ʻe Hesekaia ʻa e ngaahi matapā ʻo e temipale+ ʻo Sihová pea mo e ngaahi pou matapā naʻe kofu*+ ʻe Tuʻi Hesekaia ʻo Siutá tonu, peá ne ʻoange ia ki he tuʻi ʻo ʻAsīliá.

17 Naʻe fekauʻi atu leva ʻe he tuʻi ʻo ʻAsīliá ʻa e Tātaní,* mo e Lapisalisí,* pea mo e Lapisaké* fakataha mo ha fuʻu kau tau mei Lākisi+ ki Selusalema+ kia Tuʻi Hesekaia. Naʻa nau ʻalu hake ki Selusalema ʻo nau tuʻu ʻi he veʻe fakatafenga vai ʻo e kiʻi vai ʻi ʻolungá, ʻa ia ʻoku ʻi he hala lahi ʻo e konga kelekele ʻo e tangata foó.+ 18 ʻI heʻenau ui ke hū mai ki tuʻa ʻa e tuʻí, ko ʻIlaiakimi+ ko e foha ʻo Hilikaiá, ʻa ia naʻá ne tokangaʻi ʻa e falé,* mo Sepinā+ ko e sekelitalí, pea mo Sioa ko e foha ʻo ʻĒsafe ko e tokotaha hiki fakamatalá naʻa nau ʻalu atu kiate kinautolu.

19 Ko ia naʻe pehē ange ʻe he Lapisaké kiate kinautolu: “Kātaki ʻo tala kia Hesekaia, ‘Ko eni ʻa e folofola ʻa e tuʻi lahí, ʻa e tuʻi ʻo ʻAsīliá: “ʻOku makatuʻunga ʻi he hā ʻa hoʻo falalá?+ 20 ʻOkú ke pehē, ‘ʻOku ou maʻu ʻa e poto mo e mālohi ke faitau,’ ka ko e ngaahi lea launoa ia. Ko hai ʻokú ke falala ki aí, ʻo ke fakatoʻotoʻa ai ke angatuʻu mai kiate aú?+ 21 Vakai! ʻOkú ke falala ki he tokoni ʻa e kaho kuo laiki ko ena ko ʻIsipité,+ ʻa ia ka faʻaki atu ki ai ha tangata ʻe matuʻu ia ʻi hono lauʻinimá ʻo ne lavea ai. ʻOku pehē pē ʻa Felo ko e tuʻi ʻo ʻIsipité ki he faʻahinga kotoa ʻoku falala kiate iá. 22 Pea kapau te mou pehē mai kiate au, ‘ʻOku mau falala kia Sihova ko homau ʻOtuá,’+ ʻikai ko e tokotaha ia ʻa ia ko hono ngaahi potu māʻolungá ē mo e ngaahi ʻōlitá kuo toʻo+ ʻe Hesekaiá, lolotonga ia ʻokú ne pehē ki Siuta mo Selusalema, ‘ʻOku totonu ke mou punou ʻi he ʻao ʻo e ʻōlita ko eni ʻi Selusalemá’?”’+ 23 Ko ia ke ke fai muʻa ʻa e aleapau ko ení mo hoku ʻeiki ko e tuʻi ʻo ʻAsīliá: Te u ʻoatu kiate koe ʻa e hoosi ʻe 2,000 kapau ʻe lava ke ke maʻu ha faʻahinga ʻoku tokolahi feʻunga ke nau heka ai.+ 24 ʻE lava fēfē leva ke ke talitekeʻi naʻa mo ha kōvana ʻe taha ko e siʻi taha ia ʻi he kau sevāniti ʻa hoku ʻeikí, lolotonga ia ʻokú ke fakafalala ki ʻIsipite ki ha ngaahi saliote pea mo ha kau tangata heka hōsí? 25 Pea naʻe ʻikai koā ke fakamafaiʻi ʻe Sihova ʻa ʻeku ʻalu hake ki he feituʻú ni ke fakaʻauha iá? Naʻe folofola tonu mai ʻa Sihova kiate au, ‘ʻAlu hake ki he fonuá ni ʻo fakaʻauha ia.’”

26 ʻI he meʻá ni naʻe pehē ange ʻe ʻIlaiakimi ko e foha ʻo Hilikaiá, mo Sepinā,+ pea mo Sioa ki he Lapisaké:+ “Lea mai muʻa ki hoʻo kau sevānití ʻi he lea faka-Alameá,*+ he ʻoku lava ke mau mahinoʻi ia; ʻoua te ke lea mai kiate kimautolu ʻi he lea ʻa e kau Siú ke fanongo ki ai ʻa e kakai ʻoku ʻi he ʻaá.”+ 27 Ka naʻe pehē ange ʻe he Lapisaké kiate kinautolu: “Ko ho ʻeikí pē koā pea mo koe naʻe fekauʻi mai au ʻe hoku ʻeikí ke u leaʻaki ki ai ʻa e ngaahi leá ni? ʻIkai ʻoku toe kau foki ki ai mo e kau tangata ʻoku nau tangutu ʻi he ʻaá, ʻa e faʻahinga te nau kai honau kinohaʻa ʻonautolú mo inu ʻenau tuʻuofi ʻanautolú fakataha mo kimoutolú?”

28 Pea naʻe tuʻu ʻa e Lapisaké ʻo ne kalanga leʻo-lahi atu ʻi he lea ʻa e kau Siú, ʻo pehē: “Fanongo ki he folofola ʻa e tuʻi lahí, ʻa e tuʻi ʻo ʻAsīliá.+ 29 Ko eni ʻa e folofola ʻa e tuʻí, ‘ʻOua naʻa tuku ʻa Hesekaia ke ne kākaaʻi kimoutolu, he ʻoku ʻikai malava ke ne fakahaofi kimoutolu mei hoku nimá.+ 30 Pea ʻoua naʻa tuku ʻa Hesekaia ke ne ʻai kimoutolu ke mou falala kia Sihova ʻi heʻene pehē: “ʻE fakahaofi moʻoni kitautolu ʻe Sihova, pea ko e koló ni ʻe ʻikai tuku ia ki he nima ʻo e tuʻi ʻo ʻAsīliá.”+ 31 ʻOua ʻe fanongo kia Hesekaia, he ko eni ʻa e folofola ʻa e tuʻi ʻo ʻAsīliá: “Fai ha fakamelino mo au pea tukulolo, pea ko e tokotaha taki taha ʻo kimoutolu te ne kai mei hono fuʻu kālepi pē ʻoʻona pea mei hono fuʻu fiki pē ʻoʻona pea te ne inu ʻa e vai mei hono lepa pē ʻoʻona, 32 kae ʻoua ke u ʻalu atu ʻo ʻave kimoutolu ki ha fonua ʻoku hangē ko homou fonuá tonu,+ ko ha fonua ʻo e uite mo e uaine foʻou, ko ha fonua ʻo e mā mo e ngaahi ngoue kālepi, ko ha fonua ʻo e ʻulu ʻōlive mo e hone. Pea te mou toki moʻui ai ʻo ʻikai mate. ʻOua ʻe fanongo kia Hesekaia, he ʻokú ne takihalaʻi kimoutolu ʻi heʻene pehē, ‘ʻE fakahaofi kitautolu ʻe Sihova.’ 33 Kuo fakahaofi koā ʻe ha taha ʻo e ngaahi ʻotua ʻo e ngaahi puleʻangá honau fonuá mei he nima ʻo e tuʻi ʻo ʻAsīliá? 34 Ko fē ʻa e ngaahi ʻotua ʻo Hēmati+ mo ʻĀpatí? Ko fē ʻa e ngaahi ʻotua ʻo Sipalavaimi,+ Hena, mo ʻIvá? Kuo nau fakahaofi koā ʻa Samēlia mei hoku nimá?+ 35 Ko hai ʻi he ngaahi ʻotua kotoa ʻo e ngaahi fonuá kuó ne fakahaofi honau fonuá mei hoku nimá, ke pehē ai ʻe fakahaofi ʻe Sihova ʻa Selusalema mei hoku nimá?”’”+

36 Ka naʻe hanganaki fakalongolongo pē ʻa e kakaí pea ʻikai te nau puʻaki ha foʻi lea ʻe taha ʻo fai ha tali kiate ia, he naʻe tuʻutuʻuni ʻe he tuʻí, “Kuo pau ke ʻoua naʻa mou fai ha tali kiate ia.”+ 37 Ka naʻe haʻu kia Hesekaia ʻa ʻIlaiakimi ko e foha ʻo Hilikaiá, ʻa ia naʻá ne tokangaʻi ʻa e falé,* mo Sepinā ko e sekelitalí, pea mo Sioa ko e foha ʻo ʻĒsafe ko e tokotaha hiki fakamatalá kuo hae honau ngaahi kofú pea nau fakahā kiate ia ʻa e ngaahi lea ʻa e Lapisaké.

19 ʻI he fanongo pē ki he meʻá ni ʻa Tuʻi Hesekaiá, naʻá ne hae ʻa hono ngaahi kofú pea ʻai tauangaʻa peá ne hū ki he fale ʻo Sihová.+ 2 Naʻá ne fekauʻi atu leva ʻa ʻIlaiakimi, ʻa ia naʻá ne tokangaʻi ʻa e falé,* mo Sepinā ko e sekelitalí, pea mo e kau tangata taʻumotuʻa ʻi he kau taulaʻeikí, ʻa ia kuo nau ʻai tauangaʻá, ki he palōfita ko ʻAiseá,+ ʻa e foha ʻo ʻĀmosí. 3 Naʻa nau pehē ange kiate ia: “Ko eni ʻa e folofola ʻa Hesekaiá, ‘Ko e ʻaho ní ko ha ʻaho ia ʻo e mamahi, ʻo e valoki,* pea mo e ngalivale; he kuo teu ke fanauʻi* ʻa e fānaú, ka ʻoku ʻikai ha mālohi ke fanauʻi+ kinautolu. 4 Mahalo pē ʻe fanongo mai ʻa Sihova ko ho ʻOtuá ki he ngaahi lea kotoa ʻa e Lapisaké, ʻa ē naʻe fekauʻi mai ʻe heʻene ʻeiki ko e tuʻi ʻo ʻAsīliá ke ne lumaʻaki ki he ʻOtua moʻuí,+ pea te ne ʻekeʻi kiate ia ʻa e ngaahi lea kuo fanongo ki ai ʻa Sihova ko ho ʻOtuá. Ko ia ke ke fai ha lotu+ maʻá e toenga ko ia kuo nau haó.’”

5 Ko ia naʻe ʻalu atu ʻa e kau sevāniti ʻa Tuʻi Hesekaiá kia ʻAisea,+ 6 pea naʻe pehē ange ʻe ʻAisea kiate kinautolu: “Ko e meʻa eni te mou leaʻaki ki homou ʻeikí, ‘Ko e folofola eni ʻa Sihová: “ʻOua naʻá ke ilifia+ koeʻuhí ko e ngaahi lea naʻá ke fanongoá, ʻa e ngaahi lea ʻa ia naʻe laukovi ʻaki kiate au+ ʻe he kau tamaioʻeiki ʻa e tuʻi ʻo ʻAsīliá. 7 Ko eni ʻoku ou ʻai ha fakakaukau ki hono ʻatamaí,* pea te ne fanongo ki ha ongoongo pea foki ki hono fonua ʻoʻoná; pea te u ʻai ia ke ne tō ʻi he heletā ʻi hono fonua pē ʻoʻoná.”’”+

8 ʻI he hili ʻa e fanongo ʻa e Lapisaké kuo mavahe ʻa e tuʻi ʻo ʻAsīliá mei Lākisí,+ naʻá ne foki kiate ia ʻo ne maʻu atu ʻokú ne tauʻi ʻa Līpina.+ 9 Pea naʻe fanongo ʻa e tuʻí ki he lau ʻo fekauʻaki mo Tuʻi Tilaka ʻo ʻItiopeá: “Ko eni kuó ne haʻu ke tauʻi koe.” Ko ia naʻá ne toe fekauʻi atu ai ha kau talafekau+ kia Hesekaia, ʻo pehē: 10 “Ko e meʻa eni te mou leaʻaki kia Tuʻi Hesekaia ʻo Siutá, ‘ʻOua naʻa tuku ke kākaaʻi koe ʻe ho ʻOtua ʻa ia ʻokú ke falala ki aí ʻaki ʻa e pehē: “ʻE ʻikai ke tuku ʻa Selusalema ki he nima ʻo e tuʻi ʻo ʻAsīliá.”+ 11 Vakai! Kuó ke fanongo ʻi he meʻa naʻe fai ʻe he ngaahi tuʻi ʻo ʻAsīliá ki he ngaahi fonuá kotoa ʻaki hono tuku atu kinautolu ki he fakaʻauhá.+ ʻE fakahaofi toko taha koā koe? 12 Naʻe fakahaofi koā kinautolu ʻe he ngaahi ʻotua ʻo e ngaahi puleʻangá ʻa ia naʻe fakaʻauha ʻe heʻeku fanga kuí? Ko fē ai ʻa Kōsani, Hālani,+ Lesafi, pea mo e kakai ʻo ʻĪteni ʻa ia naʻa nau ʻi Tela-lasá? 13 Ko fē ai ʻa e tuʻi ʻo Hēmatí, ko e tuʻi ʻo ʻĀpatí, pea mo e tuʻi ʻo e kolo ko Sipalavaimi, ʻo Hena, pea mo ʻIvá?’”+

14 Naʻe toʻo ʻe Hesekaia ʻa e ngaahi tohí mei he nima ʻo e kau talafekaú peá ne lau ia. Naʻe ʻalu hake leva ʻa Hesekaia ki he fale ʻo Sihová ʻo ne folahi kinautolu* ʻi he ʻao ʻo Sihová.+ 15 Pea naʻe kamata ke lotu+ ʻa Hesekaia ʻi he ʻao ʻo Sihová ʻo pehē: “ʻE Sihova ko e ʻOtua ʻo ʻIsilelí, ʻokú ke ʻafio ʻi he taloni ʻi ʻolunga ʻi he* ongo selupimí,+ ko koe pē toko taha ʻa e ʻOtua moʻoni ʻo e ngaahi puleʻanga kotoa ʻo e māmaní.+ Naʻá ke ngaohi ʻa e langí pea mo e māmaní. 16 Fokotuʻu telinga mai muʻa, ʻe Sihova, peá ke fanongo!+ Hāngaifofonga mai,+ ʻe Sihova, peá ke ʻafio mai! Fanongo ki he ngaahi lea kuo ʻomi ʻe Senakalipe ke lumaʻi ʻaki ʻa e ʻOtua moʻuí. 17 Ko e moʻoni, ʻe Sihova, kuo fakaʻauha ʻe he ngaahi tuʻi ʻo ʻAsīliá ʻa e ngaahi puleʻangá mo honau ngaahi fonuá.+ 18 Pea kuo nau laku honau ngaahi ʻotuá ki he afí, koeʻuhí naʻe ʻikai ko e ngaahi ʻotua+ kinautolu ka ko e ngāue ʻa e nima ʻo e tangatá,+ ko e ʻakau pea mo e maka. Ko e ʻuhinga ia naʻe lava ai ke nau fakaʻauha kinautolú. 19 Ka ko eni, ʻe Sihova ko homau ʻOtua, fakahaofi muʻa kimautolu mei hono nimá, koeʻuhí ke ʻiloʻi ai ʻe he ngaahi puleʻanga kotoa pē ʻo e māmaní ko koe toko taha pē ʻa e ʻOtuá, ʻe Sihova.”+

20 Naʻe ʻoatu leva ʻe ʻAisea ko e foha ʻo ʻĀmosí ʻa e pōpoakí ni kia Hesekaia: “Ko e meʻa eni ʻoku folofolaʻaki ʻe Sihova ko e ʻOtua ʻo ʻIsilelí, ‘Kuó u fanongo ʻi hoʻo lotu+ mai kiate au ʻo fekauʻaki mo Tuʻi Senakalipe ʻo ʻAsīliá.+ 21 Ko e meʻa eni kuo folofolaʻaki ʻe Sihova kiate iá:

“Ko e ʻofefine kei nofo anga-maʻa ʻo Saioné ʻokú ne taʻetokaʻi koe, ʻokú ne katakataʻi koe.

Ko e ʻofefine ʻo Selusalemá ʻokú ne kalokalo ʻa hono ʻulú kiate koe.

22 Ko hai ia kuó ke lumaʻi mo laukovi+ ki aí?

Ko e Tokotaha Māʻoniʻoni ia ʻo ʻIsilelí!+

Te u tā hifo ʻa hono ʻulu sita māʻolungá, ʻa hono ʻulu siunipa lelei tahá.

Te u hū ki hono ngaahi feituʻu mālōlōʻanga mamaʻo tahá, ki hono ngaahi vaotā fihi tahá.

25 Kuo ʻikai koā te ke fanongo ai? Talu mei muʻa mo hono fakapapauʻi ia.*+

Mei he ngaahi ʻaho kuo mahili atú kuó u teuteu* ia.+

Ko eni te u fakahoko ia.+

Te ke fulihi ʻa e ngaahi kolo fakakolotaú ke hoko ko e ngaahi fokotuʻunga maumau ʻa ia kuo liʻaki.+

29 “‘Pea ko eni ʻa e fakaʻilonga kiate koé:* ʻI he taʻú ni te ke kai ai ʻa e meʻa ʻoku tupu ʻiate ia peé;* pea ʻi he taʻu hono uá te ke kai ai ʻa e uite ʻoku huli hake mei aí;+ ka ʻi he taʻu hono tolú te mou tūtuuʻi ai ʻa e tengá pea tuʻusi, pea te mou tō ʻa e ngaahi ngoue kālepi pea kai ʻa honau fuá.+ 30 Ko e faʻahinga ko ia ʻo e fale ʻo Siutá ʻa ia ʻoku haó, ʻa e faʻahinga ʻoku toé,+ te nau faiaka ʻi lalo pea laku fua ʻi ʻolunga. 31 He ʻe ʻalu atu ha toenga mei Selusalema mo e kau hao mei Moʻunga Saione. Ko e faivelenga ʻa Sihova ʻo e ngaahi kau taú te ne fai ai ení.+

32 “‘Ko ia ko e meʻa eni ʻoku folofolaʻaki ʻe Sihova fekauʻaki mo e tuʻi ʻo ʻAsīliá:+

35 ʻI he pō pē ko iá naʻe ʻalu atu ai ʻa e ʻāngelo ʻa Sihová ʻo taaʻi ʻa e kau tangata ʻe toko 185,000 ʻi he ʻapitanga ʻo e kau ʻAsīliá.+ ʻI he tuʻu pongipongia hake ʻa e kakaí, naʻa nau sio atu ki he kotoa ʻo e ngaahi ʻangaʻangá.+ 36 Ko ia naʻe mavahe ai ʻa Tuʻi Senakalipe ʻo ʻAsīliá peá ne foki ki Ninive+ ʻo ne nofo ai.+ 37 Pea ʻi heʻene punou hifo ʻi he fale* ʻo hono ʻotua ko Nisilokí, ko hono ongo foha tonu ko ʻAtalameleki mo Salesá naʻá na taaʻi ia ʻaki ʻa e heletā+ peá na hola leva ki he fonua ko ʻAlalaté.+ Pea naʻe hoko ʻa hono foha ko ʻEsa-hātoní+ ko e tuʻi ʻo fetongi ia.

20 ʻI he ngaahi ʻaho ko iá naʻe puke ai ʻa Hesekaia ʻo ne meimei mate.+ Naʻe haʻu ʻa e palōfita ko ʻAiseá, ʻa e foha ʻo ʻĀmosí ʻo pehē ange kiate ia, “Ko e meʻa eni ʻoku folofolaʻaki ʻe Sihová: ‘Fai ha fakahinohino ki ho falé, he ko koé te ke mate; ʻe ʻikai te ke toe sai.’”+ 2 Ko ia naʻá ne hanga ai ki he holisí pea kamata ke ne lotu kia Sihova: 3 “ʻOku ou kōlenga atu kiate koe, ʻe Sihova, ke ke manatuʻi muʻa ʻa ʻeku ʻaʻeva ʻi he anga-tonu ʻi ho ʻaó ʻi he loto kakató, pea kuó u fai ʻa e meʻa naʻe lelei ʻi hoʻo vakaí.”+ Pea naʻe kamata ke tangi lahi ʻa Hesekaia.

4 ʻI he teʻeki ai ke ʻalu atu ʻa ʻAisea ki he lotoʻā ʻi lotó naʻe hoko mai ʻa e folofola ʻa Sihová kiate ia, ʻo pehē:+ 5 “Foki ʻo lea kia Hesekaia, ko e taki ʻo hoku kakaí, ‘Ko e meʻa eni ʻoku folofolaʻaki ʻe Sihova ko e ʻOtua ʻo Tēvita ko hoʻo kuí: “Kuó u fanongo ki hoʻo lotú. Kuó u mamata ki ho loʻimatá.+ Ko eni te u fakamoʻui koe.+ ʻI he ʻaho hono tolú te ke ʻalu hake ai ki he fale ʻo Sihová.+ 6 Te u tānaki atu ʻa e taʻu ʻe 15 ki hoʻo moʻuí,* pea te u fakahaofi koe pea mo e koló ni mei he nima ʻo e tuʻi ʻo ʻAsīliá,+ pea te u maluʻi ʻa e koló ni koeʻuhí ko hoku huafá pea koeʻuhí ko Tēvita ko ʻeku sevānití.”’”+

7 Naʻe pehē ange leva ʻe ʻAisea: “ʻOmi ha takaonga fiki* mōmoa.” Ko ia naʻa nau ʻomi ia ʻo ʻai ki he hangatāmakí, ʻi he hili iá, naʻe faifai pē peá ne sai.+

8 Naʻe ʻeke ange ʻe Hesekaia kia ʻAisea: “Ko e hā ʻa e fakaʻilonga+ ke fakahaaʻi ai ʻe fakamoʻui au ʻe Sihova pea te u ʻalu hake ʻi he ʻaho hono tolú ki he fale ʻo Sihová?” 9 Naʻe tali ange ʻe ʻAisea: “Ko e fakaʻilonga eni meia Sihova ke fakahaaʻi atu ai kiate koe ʻe fakahoko ʻe Sihova ʻa e folofola kuó ne folofolaʻakí: ʻOkú ke loto ke ʻunu ki muʻa ʻa e ʻata ʻi he sitepú* ʻaki ʻa e manga ʻe hongofulu pe ʻunu ki mui ʻaki ʻa e manga ʻe hongofulu?”+ 10 Naʻe pehē ange ʻe Hesekaia: “Ko ha meʻa faingofua ia ke ngaʻunu atu ʻa e ʻatá tonu ʻi ha manga ʻe hongofulu kae ʻikai ke foki ʻaki ʻa e manga ʻe hongofulu.” 11 Ko ia naʻe ui ʻa ʻAisea ko e palōfitá kia Sihova, pea naʻá Ne ʻai ʻa e ʻata ʻi he sitepu ʻa ʻĀhasí ke foki hake ʻaki ʻa e manga ʻe hongofulu, hili ia ʻene ʻosi ʻalu hifo ʻi he sitepú.+

12 ʻI he taimi ko iá ko e tuʻi ʻo Pāpilone, ko Pelotaki-palatani ko e foha ʻo Palataní, naʻá ne fai ha ngaahi tohi ʻo ʻave mo ha meʻaʻofa kia Hesekaia, he naʻá ne fanongo naʻe puke+ ʻa Hesekaia. 13 Naʻe talitali lelei kinautolu ʻe* Hesekaia peá ne fakahā kiate kinautolu ʻa e kotoa ʻo hono fale tukuʻanga koloá+—ko e siliva, mo e koula, ko e lolo paʻame* mo e lolo mahuʻinga kehe, ko ʻene ngaahi meʻataú, mo e meʻa kotoa naʻe maʻu ʻi heʻene ngaahi tukuʻanga koloá. Naʻe ʻikai ha meʻa naʻe taʻefakahaaʻi ʻe Hesekaia kiate kinautolu ʻi hono falé* tonu pea ʻi he feituʻu kotoa naʻá ne pule ki aí.

14 ʻI he hili iá, naʻe haʻu ʻa ʻAisea ko e palōfitá kia Tuʻi Hesekaia ʻo ʻeke ange kiate ia: “Ko e hā ʻa e meʻa naʻe leaʻaki ʻe he kau tangatá ni, pea naʻa nau haʻú mei fē?” Ko ia naʻe pehē ange ʻe Hesekaia: “Naʻa nau haʻu mei ha fonua mamaʻo, mei Pāpilone.”+ 15 Ko hono hokó naʻá ne ʻeke ange: “Ko e hā ʻa e meʻa naʻa nau sio ki ai ʻi ho falé?”* Naʻe tali ange ʻe Hesekaia: “Naʻa nau sio ki he meʻa kotoa pē ʻi hoku falé.* Naʻe ʻikai ha meʻa te u taʻefakahaaʻi ange kiate kinautolu ʻi heʻeku ngaahi tukuʻanga koloá.”

16 Naʻe pehē ange leva ʻe ʻAisea kia Hesekaia: “Fanongo mai ki he folofola ʻa Sihová,+ 17 ‘Vakai! ʻOku hoko mai ʻa e ngaahi ʻaho, pea ko e meʻa kotoa ʻoku ʻi ho falé* mo e meʻa kotoa naʻe tuku tauhi ʻe hoʻo fanga kuí ʻo aʻu mai ki he ʻaho ní ʻe ʻave ia ki Pāpilone.+ ʻE ʻikai ke toe ha meʻa ʻe taha,’ ko e folofola ia ʻa Sihová. 18 ‘Pea ko e niʻihi ʻo ho ngaahi foha ʻa ia te ke hoko ko ʻenau tamaí ʻe ʻave+ kinautolu pea te nau hoko ko e kau ʻōfisa ʻo e lotoʻā ʻi he palasi ʻo e tuʻi ʻo Pāpiloné.’”+

19 Ko ia naʻe pehē ai ʻe Hesekaia kia ʻAisea: “Ko e folofola ʻa Sihova ʻa ia kuó ke leaʻakí ʻoku lelei.”+ Pea naʻá ne hoko atu: “ʻOku lelei kapau ʻe ʻi ai ha melino mo e maʻumaʻuluta* ʻi he lolotonga ʻo ʻeku moʻuí.”*+

20 Ko e meʻa ki he toenga ʻo e hisitōlia ʻo Hesekaiá, mo e kotoa ʻo hono fuʻu mālohí mo ʻene ngaohi ʻa e vaí+ pea mo e fakatafenga vaí ʻo taki ai ʻa e vaí ki he koló,+ ʻikai kuo hiki ia ʻi he tohi ʻo e hisitōlia ʻo e taimi ʻo e ngaahi tuʻi ʻo Siutá? 21 Pea naʻe toka ʻa Hesekaia ʻo mālōlō fakataha mo ʻene fanga kuí;+ pea naʻe hoko ʻa hono foha ko Manasé+ ko e tuʻi ʻo fetongi ia.+

21 Naʻe taʻu 12 ʻa Manase+ ʻi heʻene hoko ko e tuʻí, pea naʻá ne pule ʻi he taʻu ʻe 55 ʻi Selusalema.+ Ko e hingoa ʻo ʻene faʻeé ko Hepisipa. 2 Naʻá ne fai ʻa e meʻa naʻe kovi ʻi he vakai mai ʻa Sihová, ʻi heʻene muimui ʻi he ngaahi tōʻonga fakalielia ʻa e ngaahi puleʻanga+ naʻe kapusi ʻe Sihova mei he ʻao ʻo e kakai ʻo ʻIsilelí.+ 3 Naʻá ne toe langa ʻa e ngaahi potu māʻolunga naʻe fakaʻauha+ ʻe heʻene tamai ko Hesekaiá, peá ne fokotuʻu ʻa e ngaahi ʻōlita kia Pēali peá ne ngaohi ha pou ʻakau toputapu,*+ ʻo hangē tofu pē ko e meʻa naʻe fai ʻe ʻĒhapi ko e tuʻi ʻo ʻIsilelí.+ Pea naʻá ne punou ki he kongakau kotoa ʻo e langí mo tauhi ki ai.+ 4 Naʻá ne toe fokotuʻu ʻa e ngaahi ʻōlita ʻi he fale ʻo Sihová,+ ʻa ia naʻe folofola ʻa Sihova fekauʻaki mo ia: “ʻI Selusalema, te u ʻai ki ai ʻa hoku hingoá.”+ 5 Pea naʻá ne fokotuʻu ha ngaahi ʻōlita ki he kongakau kotoa ʻo e langí+ ʻi he ongo lotoʻā ʻo e fale ʻo Sihová.+ 6 Pea naʻá ne ʻai ʻa hono fohá tonu ke ne fou atu ʻi he afí;* naʻá ne faimana, kumi ki ha ngaahi fakaʻilonga,+ peá ne fakanofo ha kau taula faʻahikehe mo ha kau tala meʻa ki he kahaʻú.+ Naʻá ne fai ʻo lahi ʻaupito ʻa e meʻa naʻe kovi ʻi he vakai mai ʻa Sihová, ke fakalotomamahiʻi ai ia.

7 Naʻá ne fakahū ʻa e ʻīmisi kuo tongi ʻo e pou ʻakau toputapu*+ ʻa ia naʻá ne ngaohí ki he fale ʻa ia naʻe folofola ʻa Sihova fekauʻaki mo ia kia Tēvita pea ki hono foha ko Solomoné: “ʻI he falé ni pea ʻi Selusalema, ʻa ia kuó u fili mei he ngaahi matakali kotoa pē ʻo ʻIsilelí, te u fokotuʻu maʻu ai ʻa hoku hingoá.+ 8 Pea ʻe ʻikai ʻaupito te u toe ʻai ʻa e vaʻe ʻo ʻIsilelí ke ʻalu hē mei he fonua naʻá ku foaki ki heʻenau fanga kuí,+ ʻo kapau pē te nau mātuʻaki tauhi ʻa e ngaahi meʻa kotoa kuó u fekauʻi kiate kinautolú,+ ʻa e Lao kotoa naʻe tuʻutuʻuni ʻe heʻeku sevāniti ko Mōsesé ke nau muimui ki aí.” 9 Ka naʻe ʻikai te nau talangofua, pea naʻe hanganaki takiheeʻi kinautolu ʻe Manase, ʻo fakatupunga ai ke nau fai ʻa e kovi lahi ange ʻi he meʻa naʻe fai ʻe he ngaahi puleʻanga naʻe fakaʻauha ʻosi ʻe Sihova mei he ʻao ʻo e kau ʻIsilelí.+

10 Naʻe hanganaki folofola ʻa Sihova fakafou ʻi heʻene kau sevāniti ko e kau palōfitá,+ ʻo pehē: 11 “Kuo fai ʻe Manase ko e tuʻi ʻo Siutá ʻa e ngaahi meʻa fakalielia kotoa ko ení; kuo fulikivanu ange ʻene meʻa naʻe faí ʻi he meʻa naʻe fai ʻe he kau ʻĀmoli+ kotoa ki muʻa ʻiate iá,+ pea kuó ne fakaangahalaʻi ʻa Siuta ʻaki ʻene ngaahi ʻaitoli fakalieliá.* 12 Ko ia ko e folofola eni ʻa Sihova ko e ʻOtua ʻo ʻIsilelí: ‘Ko eni ʻoku ou ʻomi ha fuʻu fakatamaki ki Selusalema+ mo Siuta ʻa ia te ne ʻai fakatouʻosi ai ʻa e ongo telinga ʻo ha taha pē ʻe fanongo ki ai ke makini.+ 13 Pea te u falō atu ki Selusalema ʻa e afo fua+ naʻe ngāueʻaki ki Samēliá+ pea ngāueʻaki ʻa e fua-vai* naʻe ngāueʻaki ki he fale ʻo ʻĒhapí,+ pea te u holoholoʻi ke maʻa ʻa Selusalema, ʻo hangē tofu pē ko hono holoholoʻi ʻe ha taha ha poulu ke maʻa, pea fakafoʻohifoʻi.+ 14 Te u liʻaki ʻa e toenga ʻo hoku tofiʻá+ pea tuku atu kinautolu ki he nima ʻo honau ngaahi filí, pea te nau hoko ko e faʻahinga ʻe ʻave fakamālohi mo vete ʻenau koloá ʻe honau ngaahi filí+ kotoa, 15 koeʻuhí naʻa nau fai ʻa e meʻa naʻe kovi ʻi heʻeku vakaí pea hokohoko atu ʻenau fakalotomamahiʻi au talu mei he ʻaho naʻe haʻu ai ʻa ʻenau fanga kuí mei ʻIsipité ʻo aʻu mai ki he ʻahó ni.’”+

16 Naʻe toe lilingi foki ʻe Manase ʻa e toto taʻehalaia lahi ʻaupito ʻo aʻu ki heʻene fakafonu ʻa Selusalema mei he ngataʻanga ʻe tahá ki he ngataʻanga ʻe tahá,+ tuku kehe ʻa ʻene angahala ʻi heʻene fakatupunga ke faiangahala ʻa Siuta ʻaki hono fai ʻa e meʻa naʻe kovi ʻi he vakai mai ʻa Sihová. 17 Ko e meʻa ki he toenga ʻo e hisitōlia ʻo Manasé mo e meʻa kotoa naʻá ne faí pea mo e ngaahi angahala naʻá ne faí, ʻikai kuo hiki ia ʻi he tohi ʻo e hisitōlia ʻo e taimi ʻo e ngaahi tuʻi ʻo Siutá? 18 Pea naʻe toka ʻa Manase ʻo mālōlō fakataha mo ʻene fanga kuí pea naʻe tanu ia ʻi he ngoue ʻi hono ʻapí, ʻi he ngoue ʻa Usá;+ pea naʻe hoko ʻa hono foha ko ʻĀmoné ko e tuʻi ʻo fetongi ia.

19 Naʻe taʻu 22 ʻa ʻĀmone+ ʻi heʻene hoko ko e tuʻí, pea naʻá ne pule ʻi he taʻu ʻe ua ʻi Selusalema.+ Ko e hingoa ʻo ʻene faʻeé ko Mesuilemeti ko e ʻofefine ʻo Halusi mei Siotipá. 20 Naʻe hokohoko atu ʻene fai ʻa e meʻa naʻe kovi ʻi he vakai mai ʻa Sihová, ʻo hangē tofu pē ko e meʻa naʻe fai ʻe heʻene tamai ko Manasé.+ 21 Naʻá ne hanganaki ʻaʻeva ʻi he ngaahi hala kotoa naʻe ʻaʻeva ai ʻa ʻene tamaí, pea naʻe hokohoko atu ʻene tauhi mo punou ki he ngaahi ʻaitoli fakalielia naʻe tauhi ki ai ʻa ʻene tamaí.+ 22 Ko ia naʻá ne liʻaki ʻa Sihova ko e ʻOtua ʻo ʻene fanga kuí, pea naʻe ʻikai te ne ʻaʻeva ʻi he founga ʻa Sihová.+ 23 Naʻe faai atu pē ʻo faʻufaʻu ʻe he kau sevāniti ʻa ʻĀmoné ha kovi kiate ia pea nau tāmateʻi ʻa e tuʻí ʻi hono falé. 24 Ka naʻe taaʻi ʻe he kakai ʻo e fonuá ʻa e faʻahinga kotoa naʻa nau faʻufaʻu ha kovi kia Tuʻi ʻĀmoné, pea naʻa nau fakanofo ʻa hono foha ko Siosaiá ko e tuʻi ʻo fetongi ia.+ 25 Ko e meʻa ki he toenga ʻo e hisitōlia ʻo ʻĀmoné, mo e meʻa naʻá ne faí, ʻikai kuo hiki ia ʻi he tohi ʻo e hisitōlia ʻo e taimi ʻo e ngaahi tuʻi ʻo Siutá? 26 Ko ia naʻa nau tanu ia ʻi hono faʻitoká ʻi he ngoue ʻa Usá,+ pea naʻe hoko ʻa hono foha ko Siosaiá+ ko e tuʻi ʻo fetongi ia.

22 Naʻe taʻu valu ʻa Siosaia+ ʻi heʻene hoko ko e tuʻí, pea naʻá ne pule ʻi he taʻu ʻe 31 ʻi Selusalema.+ Ko e hingoa ʻo ʻene faʻeé ko Sitita ko e ʻofefine ʻo ʻAtaia mei Posikatá.+ 2 Naʻá ne fai ʻa e meʻa naʻe totonu ʻi he vakai mai ʻa Sihová peá ne ʻaʻeva ʻi he ngaahi ʻalunga kotoa ʻo Tēvita ko ʻene kuí,+ pea naʻe ʻikai te ne afe ki he toʻomataʻú pe ki he toʻohemá.

3 ʻI he taʻu hono 18 ʻo e pule ʻa Tuʻi Siosaiá, naʻe fekauʻi atu ʻe he tuʻí ʻa Sāfani ko e sekelitalí, ko e foha ʻo ʻAsalia ko e foha ʻo Mēsuilamé, ki he fale ʻo Sihová,+ ʻo pehē: 4 “ʻAlu hake kia Hilikaia+ ko e taulaʻeiki lahí, pea ʻai ia ke ne tānaki ʻa e paʻanga kotoa kuo ʻomi ki he fale ʻo Sihová,+ ʻa ia kuo tānaki ʻe he kau leʻo matapaá mei he kakaí.+ 5 ʻAi ke nau ʻoange ia ki he faʻahinga naʻe fakanofo ke nau tokangaʻi ʻa e ngāue ʻi he fale ʻo Sihová, ʻa ia, te nau ʻoange leva ia ki he kau ngāue ʻi he fale ʻo Sihová ʻa ē te nau fakaleleiʻi ʻa e maumau* ʻi he falé,+ 6 ʻa ia, ko e kau tangata nima-meaʻá, ko e kau langá, pea mo e kau tufunga maká; pea te nau ngāueʻaki ia ke fakatau mai ʻaki ʻa e papa mo e maka kuo tā ke fakaleleiʻiʻaki ʻa e falé.+ 7 Ka ʻe ʻikai ke ʻeke meiate kinautolu ha fakamatala ki he paʻanga ʻoku ʻoange kiate kinautolú, koeʻuhí he ʻoku nau falalaʻanga.”+

8 Ki mui ai, naʻe pehē ange ʻe Hilikaia ko e taulaʻeiki lahí kia Sāfani ko e sekelitalí:+ “Kuó u maʻu ʻa e tohi Laó+ ʻi he fale ʻo Sihová.” Naʻe ʻoange ai ʻe Hilikaia ʻa e tohí kia Sāfani, ʻa ia naʻe kamata ke ne lau ia.+ 9 Naʻe ʻalu leva ʻa Sāfani ko e sekelitalí ki he tuʻí peá ne tala ange kiate ia: “Kuo huhua atu ʻe hoʻo kau sevānití ʻa e paʻanga ko ia naʻe maʻu ʻi he falé, pea kuo nau ʻoange ia ki he faʻahinga kuo fakanofo ke nau tokangaʻi ʻa e ngāue ʻi he fale ʻo Sihová.”+ 10 Naʻe tala ange foki ʻe Sāfani ko e sekelitalí ki he tuʻí: “ʻOku ʻi ai ha tohi+ naʻe ʻomai kiate au ʻe Hilikaia ko e taulaʻeikí.” Pea naʻe kamata ke lau ia ʻe Sāfani ʻi he ʻao ʻo e tuʻí.

11 ʻI he fanongo pē ʻa e tuʻí ki he ngaahi lea ʻo e tohi Laó, naʻá ne hae ʻa hono ngaahi kofú.+ 12 Naʻe fai leva ʻe he tuʻí ʻa e tuʻutuʻuni ko ení kia Hilikaia ko e taulaʻeikí, ʻAhikami+ ko e foha ʻo Sāfaní, ʻAkepoa ko e foha ʻo Maikaiá, Sāfani ko e sekelitalí, pea mo ʻAsaia ko e sevāniti ʻa e tuʻí, ʻo pehē: 13 “Mou ō, ʻo fehuʻi kia Sihova koeʻuhi ko au, koeʻuhi ko e kakaí, pea koeʻuhi ko Siuta kotoa ʻo fekauʻaki mo e ngaahi lea ʻo e tohi ko eni kuo maʻú; he ko e houhau kakaha ʻa Sihova kuo hoko kiate kitautolú ʻoku lahi,+ koeʻuhí naʻe ʻikai ke talangofua ʻa ʻetau fanga kuí ki he ngaahi lea ʻo e tohí ni ʻaki hono tauhi ʻa e meʻa kotoa kuo hiki ai ʻo fekauʻaki mo kitautolú.”

14 Ko ia naʻe ʻalu atu ʻa Hilikaia ko e taulaʻeikí, ʻAhikami, ʻAkepoa, Sāfani pea mo ʻAsaia kia Hūlita ko e palōfita fefiné.+ Ko e uaifi ia ʻo Salumi ko e foha ʻo Tikiva ko e foha ʻo Hāhasi, ko e tokotaha tauhi ʻo e tukuʻanga valá, pea naʻá ne nofo ʻi he vahefonua hono ua ʻo Selusalemá; pea naʻa nau lea ʻi ai kiate ia.+ 15 Naʻá ne pehē ange kiate kinautolu: “Ko e meʻa eni ʻoku folofolaʻaki ʻe Sihova ko e ʻOtua ʻo ʻIsilelí, ‘Tala ki he tangata ʻa ia naʻá ne fekauʻi mai kimoutolu kiate aú: 16 “Ko eni ʻa e folofola ʻa Sihová, ‘Te u ʻomi ʻa e mala ki he feituʻú ni mo hono kakaí, ʻa e lea kotoa ʻo e tohi ʻa ia kuo lau+ ʻe he tuʻi ʻo Siutá. 17 Koeʻuhi kuo nau liʻaki au pea ʻoku nau fai ʻa e ngaahi feilaulau ke kohu ki he ngaahi ʻotua kehé+ koeʻuhi ke fakalotomamahiʻi ai au ʻaki ʻa e ngāue kotoa ʻa honau nimá,+ ʻe kakaha ʻa ʻeku houhaú ki he feituʻú ni pea ʻe ʻikai ke ʻosi ia.’”+ 18 Ka ki he tuʻi ʻo Siutá ʻa ia naʻá ne fekauʻi mai kimoutolu ke fehuʻi kia Sihová, ko e meʻa eni te mou leaʻaki kiate iá, “Ko e meʻa eni ʻoku folofolaʻaki ʻe Sihova ko e ʻOtua ʻo ʻIsilelí: ‘ʻI he fekauʻaki mo e ngaahi lea kuó ke fanongoá, 19 koeʻuhí naʻe ongongofua* ho lotó pea naʻá ke fakavaivaiʻi koe+ ʻi he ʻao ʻo Sihová ʻi hoʻo fanongo ki he meʻa kuó u leaʻaki ki he feituʻú ni mo hono kakaí—te nau hoko ko ha meʻa ke fai ai ha fakalilifuʻia pea mo ha malaʻia—pea naʻá ke hae ho ngaahi kofú+ pea tangi ʻi hoku ʻaó, kuó u fanongo foki kiate koe, ko e fakahaaʻi ia ʻe Sihová. 20 Ko e ʻuhinga ia te u fakatahaʻi ai koe ki hoʻo fanga kuí,* pea te ke toka ʻo mālōlō ʻi ho faʻitoká ʻi he melino, pea ʻe ʻikai ke sio ho matá ki he mala kotoa te u ʻomi ki he feituʻú ni.’”’” Pea naʻa nau ʻalu mo e talí ki he tuʻí.

23 Ko ia naʻe ʻoatu ʻe he tuʻí ha fekau, pea naʻa nau ui mai ʻa e kau mātuʻa kotoa ʻo Siuta mo Selusalemá.+ 2 ʻI he hili iá, naʻe ʻalu hake ʻa e tuʻí ki he fale ʻo Sihová mo e kau tangata kotoa ʻo Siutá, mo e kakai kotoa ʻo Selusalemá, mo e kau taulaʻeikí, pea mo e kau palōfitá—ʻa e kakaí kotoa, mei he iiki ki he lalahi. Naʻá ne lau ʻo nau fanongo ki he ngaahi lea kotoa ʻo e tohi+ ʻo e fuakava+ ʻa ia naʻe maʻu ʻi he fale ʻo Sihová.+ 3 Naʻe tuʻu ʻa e tuʻí ʻi he veʻe fuʻu poú ʻo ne fai ha fuakava* ʻi he ʻao ʻo Sihová,+ te ne muimui kia Sihova pea tauhi ki heʻene ngaahi fekaú, ko ʻene ngaahi fakamanatú, mo ʻene ngaahi tuʻutuʻuní ʻaki ʻa hono lotó kotoa pea mo ʻene moʻuí kotoa ʻi heʻene fai ki he ngaahi lea ʻo e fuakava ko eni kuo hiki ʻi he tohí ni. Pea naʻe loto-taha ʻa e kakaí kotoa ki he fuakavá.+

4 Naʻe tuʻutuʻuni leva ʻa e tuʻí kia Hilikaia+ ko e taulaʻeiki lahí, mo e kau taulaʻeiki tokoní, pea mo e kau leʻo matapaá ke ʻomi ki tuʻa mei he temipale ʻo Sihová ʻa e ngaahi naunau kotoa naʻe ngaohi kia Pēalí, pea ki he pou ʻakau toputapú,*+ pea ki he kongakau kotoa ʻo e langí. Pea naʻá ne tutu kinautolu ʻi tuʻa Selusalema ʻi he ngaahi tahifo ʻo Kitiloné, pea naʻá ne ʻave honau efuefú ki Pēteli.+ 5 Ko ia naʻá ne taʻofi ʻa e ngāue ʻa e kau taulaʻeiki ʻotua mulí, ʻa ia naʻe fakanofo ʻe he ngaahi tuʻi ʻo Siutá ke nau fai ʻa e feilaulau fakakohu ʻi he ngaahi potu māʻolunga ʻi he ngaahi kolo ʻo Siutá pea mo e ngaahi feituʻu takatakai ʻi Selusalemá, pea pehē ki he faʻahinga naʻa nau fai ʻa e feilaulau fakakohu kia Pēali, ki he laʻaá, ki he māhiná, ki he ngaahi pupunga fetuʻu ʻo e sōtiaká, pea ki he kongakau kotoa ʻo e langí.+ 6 Naʻá ne ʻomi ki tuʻa ʻa e pou ʻakau toputapú*+ mei he fale ʻo Sihová ki he tuʻa kolo ʻo Selusalemá, ki he Teleʻa Kitiloné, pea naʻá ne tutu ia+ ʻi he Teleʻa Kitiloné pea tuki ia ke efuefu pea afuhi hono efú ʻi he ngaahi faʻitoka ʻo e kakai lāuvalé.+ 7 Naʻá ne holoki hifo foki ʻa e ngaahi fale ʻo e kau tangata feʻauaki ʻi he temipalé,+ ʻa ia naʻe ʻi he fale ʻo Sihová pea naʻe lalanga ai ʻe he kau fefiné ʻa e ngaahi tēniti toputapu ki he pou ʻakau toputapú.*

8 Naʻá ne ʻomi leva ʻa e kau taulaʻeikí kotoa mei he ngaahi kolo ʻo Siutá, pea naʻá ne ʻai ke taʻefeʻunga ki he lotú ʻa e ngaahi potu māʻolunga ʻa ia naʻe fai ai ʻe he kau taulaʻeikí ʻa e feilaulau fakakohú, mei Kepā+ ki Pea-sipa.+ Naʻá ne holoki hifo foki ʻa e ngaahi potu māʻolunga ʻo e ngaahi matapā naʻe ʻi he hūʻanga ʻo e matapā ʻo Siosiua ko e ʻeiki ʻo e koló, ʻa ia naʻe ʻi he toʻohemá ʻi he hū atu ha taha ʻi he matapā ʻo e koló. 9 Naʻe ʻikai ke ngāue ʻa e kau taulaʻeiki ʻo e ngaahi potu māʻolungá ʻi he ʻōlita ʻo Sihova ʻi Selusalemá,+ ka naʻa nau kai ʻa e mā taʻelēvaní fakataha mo honau fanga tokouá. 10 Naʻá ne ʻai foki ke taʻefeʻunga ki he lotú ʻa Tōfeti,+ ʻa ia ʻoku ʻi he Teleʻa ʻo e Ngaahi Foha ʻo Hīnomí,*+ koeʻuhi ke ʻoua naʻa lava ke ʻai ʻe ha taha ʻa hono fohá pe ko hono ʻofefiné ke fou atu ʻi he afí* kia Moloke.+ 11 Pea naʻá ne tapui ʻa e fanga hoosi naʻe fakatapui* ʻe he ngaahi tuʻi ʻo Siutá ki he laʻaá mei heʻenau hū mai ki he fale ʻo Sihová ʻi he loki* ʻo Nētane-meleki ko e ʻōfisa ʻo e lotoʻaá, ʻa ia naʻe ʻi he fakafaletoló; pea naʻá ne tutu ʻa e ngaahi saliote naʻe fakatapui ki he laʻaá.+ 12 Naʻe holoki hifo foki ʻe he tuʻí ʻa e ngaahi ʻōlita naʻe fokotuʻu ʻe he ngaahi tuʻi ʻo Siutá ʻi he ʻato+ ʻo e loki ʻi ʻolunga ʻo ʻĀhasí, pea pehē ki he ngaahi ʻōlita naʻe fokotuʻu ʻe Manase ʻi he ongo lotoʻā ʻo e fale ʻo Sihová.+ Naʻá ne laiki kinautolu pea afuhi honau efú ʻi he Teleʻa Kitiloné. 13 Pea naʻe ʻai ʻe he tuʻí ke taʻefeʻunga ki he lotú ʻa e ngaahi potu māʻolunga ʻi muʻa ʻi Selusalema ʻa ia naʻe ʻi he fakatonga* ʻo e Moʻunga ʻo e ʻAuhá,* ʻa ia naʻe langa ʻe Solomone ko e tuʻi ʻo ʻIsilelí kia ʻAsiteloti ko e ʻotua fefine fakalielia ʻo e kau Saitoní; pea kia Kīmosi ko e ʻotua fakalielia ʻo Mōapé; pea kia Milikomi+ ko e ʻotua palakū ʻo e kau ʻĀmoní.+ 14 Naʻá ne haveki ke kongokonga ʻa e ngaahi pou maka toputapú peá ne tā hifo ʻa e ngaahi pou ʻakau toputapú*+ peá ne fakafonu honau tuʻuʻangá ʻaki ʻa e ngaahi hui ʻo e tangatá. 15 Naʻá ne holoki hifo foki ʻa e ʻōlita ʻi Pētelí, mo e potu māʻolunga naʻe ngaohi ʻe Selopoame ko e foha ʻo Nīpatí ʻa ia naʻá ne fakatupunga ke faiangahala+ ʻa ʻIsilelí. ʻI he hili hono holoki ʻa e ʻōlita ko iá mo e potu māʻolungá, naʻá ne tutu ʻa e potu māʻolungá, ʻo tuki ia ke efuefu, peá ne tutu ʻa e pou ʻakau toputapú.*+

16 ʻI he tafoki hake ʻa Siosaia ʻo ne sio atu ki he ngaahi faʻitoka ʻi he moʻungá, naʻá ne fekau ke toʻo ʻa e ngaahi huí mei he ngaahi faʻitoká pea tutu ia ʻi he ʻōlitá, ʻo ʻai ai ke taʻefeʻunga ia ki he lotú, fakatatau ki he folofola ʻa Sihova naʻe fanongonongo ʻe he tangata ʻa e ʻOtua moʻoní ʻa ia naʻá ne tomuʻa tala ʻe hoko ʻa e ngaahi meʻa ko ení.+ 17 Naʻá ne pehē ange leva: “Ko e hā ʻa e maka fakamanatu ko ē ʻoku ou sio ki aí?” ʻI he meʻá ni naʻe pehē ange kiate ia ʻe he kau tangata ʻo e koló: “Ko e faʻitoka ia ʻo e tangata ʻa e ʻOtua moʻoní mei Siutá+ ʻa ia naʻá ne tomuʻa tala ʻa e ngaahi meʻa ko eni kuó ke fai ki he ʻōlita ʻo Pētelí.” 18 Ko ia naʻá ne pehē ange: “Tuku ia ke mālōlō. ʻOua naʻa fakaʻatā ha taha ke ne ueʻi ʻa hono ngaahi huí.” Ko ia naʻa nau tuku ʻo ʻikai ke ueʻi ʻa hono ngaahi huí, pea pehē ki he ngaahi hui ʻo e palōfita naʻe haʻu mei Samēliá.+

19 Naʻe toʻo foki ʻe Siosaia ʻa e ngaahi fale faiʻanga lotu kotoa ʻi he ngaahi potu māʻolungá ʻa ē naʻe ʻi he ngaahi kolo ʻo Samēliá,+ ʻa ia naʻe langa ʻe he ngaahi tuʻi ʻo ʻIsilelí ke fakahouhau ki he ʻOtuá, pea naʻá ne fai ki ai ʻa e meʻa tatau mo ia naʻá ne fai ʻi Pētelí.+ 20 Ko ia naʻá ne feilaulauʻi ʻi he ngaahi ʻōlitá ʻa e kau taulaʻeiki kotoa ʻo e ngaahi potu māʻolungá ʻa ia naʻa nau ʻi aí, pea naʻá ne tutu ai ʻa e ngaahi hui ʻo e tangatá.+ ʻI he hili iá, naʻá ne foki ki Selusalema.

21 Pea naʻe fekauʻi ʻe he tuʻí ki he kakaí kotoa: “Fai ha Pāsova+ kia Sihova ko homou ʻOtuá ʻo hangē ko ia kuo tohi ʻi he tohi ko eni ʻo e fuakavá.”+ 22 Naʻe ʻikai ke fai ha Pāsova hangē ko ení talu mei he ngaahi ʻaho ʻa ia naʻe fakamāuʻi ai ʻe he kau fakamāú ʻa ʻIsilelí pe ʻi he ngaahi ʻaho kotoa ʻo e ngaahi tuʻi ʻo ʻIsilelí mo e ngaahi tuʻi ʻo Siutá.+ 23 Ka ʻi he taʻu hono 18 ʻo e pule ʻa Tuʻi Siosaiá, ko e Pāsova ko eni kia Sihová naʻe fai ia ʻi Selusalema.

24 Naʻe toʻo atu foki ʻe Siosaia ʻa e kau taula faʻahikehé, mo e kau tala meʻa ki he kahaʻú,+ mo e ngaahi ʻīmisi telafimí,*+ mo e ngaahi ʻaitoli fakalieliá,* pea mo e ngaahi meʻa fakalielia kotoa pē naʻe ʻasi ʻi he fonua ko Siutá mo Selusalemá, koeʻuhí ke fakahoko ʻa e ngaahi lea ʻo e Laó+ ʻa ia naʻe hiki ʻi he tohi naʻe maʻu ʻe Hilikaia ko e taulaʻeikí ʻi he fale ʻo Sihová.+ 25 Naʻe ʻikai ha tuʻi ki muʻa ʻiate ia ʻe hangē ko iá, ʻa ia naʻá ne foki kia Sihova ʻaki hono lotó kotoa mo ʻene moʻuí+ kotoa mo hono mālohí kotoa, ʻo fakatatau ki he kotoa ʻo e Lao ʻa Mōsesé; pea naʻe ʻikai ha taha naʻe hoko hake ki mui ai, ʻe hangē ko iá.

26 Ka neongo ia, naʻe ʻikai ke tafoki ʻa Sihova mei heʻene houhau kakaha ki Siutá koeʻuhi ko e ngaahi meʻa fakatupu houhau kotoa naʻe fai ʻe Manase ke fakahouhauʻi ai Iá.+ 27 Naʻe folofola ʻa Sihova: “Te u toʻo atu foki ʻa Siuta mei hoku ʻaó,+ ʻo hangē pē ko ʻeku toʻo atu ʻa ʻIsilelí;+ pea te u siʻaki ʻa e kolo ko eni naʻá ku filí, ʻa Selusalema, pea mo e fale ʻa ia naʻá ku pehē fekauʻaki mo ia, ‘ʻE hokohoko atu ʻa e ʻi ai ʻa hoku hingoá.’”+

28 Ko e meʻa ki he toenga ʻo e hisitōlia ʻo Siosaiá, mo e meʻa kotoa naʻá ne faí, ʻikai kuo hiki ia ʻi he tohi ʻo e hisitōlia ʻo e taimi ʻo e ngaahi tuʻi ʻo Siutá? 29 ʻI hono ngaahi ʻahó naʻe haʻu ai ʻa Felo Neko ko e tuʻi ʻo ʻIsipité ke feʻiloaki mo e tuʻi ʻo ʻAsīliá ʻi he veʻe Vaitafe ʻIufaletesí, pea naʻe ʻalu atu ʻa Tuʻi Siosaia ke tauʻi ia; ka ʻi he sio ʻa Neko kiate iá, naʻá ne tāmateʻi ia ʻi Mekito.+ 30 Ko ia naʻe fakahāʻele ʻe heʻene kau sevānití ʻa hono ʻangaʻangá ʻi ha saliote mei Mekito ʻo ʻomi ia ki Selusalema pea tanu ia ʻi hono faʻitoká. Naʻe ʻave leva ʻe he kakai ʻo e fonuá ʻa e foha ʻo Siosaia ko Sihoaasí ʻo pani ia pea fakanofo ia ko e tuʻi ke ne fetongi ʻa ʻene tamaí.+

31 Naʻe taʻu 23 ʻa Sihoaasi+ ʻi heʻene hoko ko e tuʻí, pea naʻá ne pule ʻi he māhina ʻe tolu ʻi Selusalema. Ko e hingoa ʻo ʻene faʻeé ko Hamutali+ ko e ʻofefine ʻo Selemaia mei Līpiná. 32 Naʻe kamata ke ne fai ʻa e meʻa naʻe kovi ʻi he vakai mai ʻa Sihová, ʻo hangē ko e meʻa kotoa naʻe fai ʻe heʻene fanga kuí.+ 33 Naʻe tuku pōpula ia ʻe Felo Neko+ ʻi Līpila+ ʻi he fonua ko Hēmatí, ke taʻofi ia mei heʻene pule ʻi Selusalemá, pea hilifaki leva ki he fonuá ha moʻua ko e talēniti* siliva ʻe 100 mo ha talēniti koula.+ 34 ʻIkai ko ia pē, naʻe fakanofo ʻe Felo Neko ʻa e foha ʻo Siosaia ko ʻIlaiakimí ke ne hoko ko e tuʻi ʻo fetongi ʻa ʻene tamai ko Siosaiá pea liliu ʻa hono hingoá ko e Sihoiakimi; ka naʻá ne ʻave ʻa Sihoaasi ʻo ne ʻomi ia ki ʻIsipite,+ ʻa ia naʻe faai atu pē ʻo ne mate ai.+ 35 Naʻe ʻoange ʻe Sihoiakimi ʻa e siliva mo e koula kia Felo, ka naʻe pau ke ne tukuhauʻi ʻa e fonuá ke ʻoange ai ʻa e siliva naʻe fiemaʻu ʻe Feló. Naʻá ne kounaʻi ha lahi pau ʻo e silivá mo e koulá mei he tokotaha taki taha ʻo e kakai ʻo e fonuá ke ʻoange kia Felo Neko.

36 Naʻe taʻu 25 ʻa Sihoiakimi+ ʻi heʻene hoko ko e tuʻí, pea naʻá ne pule ʻi he taʻu ʻe 11 ʻi Selusalema.+ Ko e hingoa ʻo ʻene faʻeé ko Sepiuta ko e ʻofefine ʻo Petaia mei Lumá. 37 Naʻe hokohoko atu ʻene fai ʻa e meʻa naʻe kovi ʻi he vakai mai ʻa Sihová,+ ʻo hangē ko e meʻa kotoa naʻe fai ʻe heʻene fanga kuí.+

24 ʻI he ngaahi ʻaho ʻo Sihoiakimí naʻe ʻalu atu ai ʻa Tuʻi Nepukanesa+ ʻo Pāpiloné kiate ia, pea naʻe hoko ʻa Sihoiakimi ko ʻene sevāniti ʻi he taʻu ʻe tolu. Kae kehe, naʻá ne tafoki hake ʻo angatuʻu kiate ia. 2 Pea naʻe kamata ke tuku atu ʻe Sihova kiate ia ʻa e kau kaihaʻa fakamālohi ʻo Kalitia,+ Sīlia, Mōape, pea mo ʻĀmoní. Naʻá ne hanganaki tuku atu kinautolu ki Siuta ke fakaʻauha ia, ʻo fakatatau ki he folofola ʻa Sihova+ naʻá ne folofolaʻaki fakafou ʻi heʻene kau sevāniti ko e kau palōfitá. 3 Ko e moʻoni naʻe hoko ʻa e meʻá ni ki Siuta ʻi he tuʻutuʻuni ʻa Sihová, ke toʻo kinautolu mei hono ʻaó+ koeʻuhi ko e ngaahi angahala kotoa naʻe fai ʻe Manasé,+ 4 pea pehē foki ki he toto taʻehalaia naʻá ne lilingí,+ he naʻá ne fakafonu ʻaki ʻa Selusalema ʻa e toto taʻehalaiá pea naʻe ʻikai finangalo ʻa Sihova ke fakamolemoleʻi+ ia.

5 Ko e meʻa ki he toenga ʻo e hisitōlia ʻo Sihoiakimí, mo e meʻa kotoa naʻá ne faí, ʻikai kuo hiki ia ʻi he tohi ʻo e hisitōlia ʻo e taimi ʻo e ngaahi tuʻi ʻo Siutá?+ 6 Pea naʻe toka ʻa Sihoiakimi ʻo mālōlō fakataha mo ʻene fanga kuí;+ pea naʻe hoko ʻa hono foha ko Sihoiakiní ko e tuʻi ʻo fetongi ia.

7 Naʻe ʻikai ʻaupito ke fakatoʻotoʻa ʻa e tuʻi ʻo ʻIsipité ke mavahe mei hono fonuá, he naʻe ʻave kotoa ʻe he tuʻi ʻo Pāpiloné ʻa e meʻa ʻa e tuʻi ʻo ʻIsipité,+ mei he Teleʻa* ʻo ʻIsipité+ ki he Vaitafe ʻIufaletesí.+

8 Naʻe taʻu 18 ʻa Sihoiakini+ ʻi heʻene hoko ko e tuʻí, pea naʻá ne pule ʻi he māhina ʻe tolu ʻi Selusalema.+ Ko e hingoa ʻo ʻene faʻeé ko Nehusita ko e ʻofefine ʻo ʻElinatani mei Selusalemá. 9 Naʻe hokohoko atu ʻene fai ʻa e meʻa naʻe kovi ʻi he vakai mai ʻa Sihová, ʻo hangē pē ko e meʻa kotoa naʻe fai ʻe heʻene tamaí. 10 ʻI he lolotonga ʻa e taimi ko iá naʻe ʻalu hake ai ʻa e kau sevāniti ʻa Tuʻi Nepukanesa ʻo Pāpiloné ke tauʻi ʻa Selusalema, pea naʻe ʻākoloʻi ʻa e koló.+ 11 Naʻe haʻu ʻa Tuʻi Nepukanesa ʻo Pāpiloné ki he koló lolotonga hono ʻākoloʻi ia ʻe heʻene kau sevānití.

12 Pea naʻe ʻalu atu ʻa Tuʻi Sihoiakini ʻo Siutá ki he tuʻi ʻo Pāpiloné,+ fakataha mo ʻene faʻeé, ko ʻene kau sevānití, mo ʻene kau māʻolungá, pea mo ʻene kau ʻōfisa ʻi he lotoʻaá;+ pea naʻe taki pōpula ia ʻe he tuʻi ʻo Pāpiloné ʻi he taʻu hono valu ʻo ʻene pulé.+ 13 Naʻá ne toʻo leva mei ai ʻa e koloa kotoa ʻo e fale ʻo Sihová mo e ngaahi koloa ʻo e fale*+ ʻo e tuʻí. Naʻá ne tuʻutuʻu kongokonga ʻa e ngaahi naunau koula kotoa naʻe ngaohi ʻe Solomone ko e tuʻi ʻo ʻIsilelí ʻi he temipale ʻo Sihová.+ Naʻe hoko ʻa e meʻá ni ʻo hangē tofu pē ko ia naʻe tomuʻa tala ʻe Sihová. 14 Pea naʻá ne ʻave fakamālohi ʻa Selusalema kotoa, mo e kau māʻolungá+ kotoa, mo e kau tangata toʻa ʻi he taú kotoa, mo e tangata nima-meaʻa mo e tuki ukamea*+ kotoa—naʻá ne ʻave fakamālohi ha toko 10,000. Naʻe ʻikai ha taha naʻe toe, tuku kehe pē ʻa e kakai masiva taha ʻo e fonuá.+ 15 Ko ia naʻá ne ʻave fakamālohi ʻa Sihoiakini+ ki Pāpilone;+ naʻá ne taki foki ai ʻa e faʻē ʻa e tuʻí, ko e ngaahi uaifi ʻo e tuʻí, ko ʻene kau ʻōfisa ʻo e lotoʻaá, pea mo e kau tangata tuʻu-ki-muʻa ʻo e fonuá, ʻo ne ʻave fakamālohi kinautolu mei Selusalema ki Pāpilone. 16 Naʻe toe ʻave fakamālohi foki ʻe he tuʻi ʻo Pāpiloné ki Pāpilone ʻa e kau tangata taú kotoa, ko e toko 7,000, pea pehē ki he kau tangata nima-meaʻa mo e kau tuki ukamea* ʻe toko 1,000, ko kinautolú kotoa ko e kau tangata toʻa pea kuo ʻosi akoʻi ki he taú. 17 Naʻe fakanofo ʻe he tuʻi ʻo Pāpiloné ʻa Matanaia, ko e tokoua ʻo e tamai ʻa Sihoiakiní,+ ko e tuʻi ʻo fetongi ia pea liliu hono hingoá ko e Setekaia.+

18 Naʻe taʻu 21 ʻa Setekaia ʻi heʻene hoko ko e tuʻí, pea naʻá ne pule ʻi he taʻu ʻe 11 ʻi Selusalema. Ko e hingoa ʻo ʻene faʻeé ko Hamutali+ ko e ʻofefine ʻo Selemaia mei Līpiná. 19 Naʻe hokohoko atu ʻene fai ʻa e meʻa naʻe kovi ʻi he vakai mai ʻa Sihová, ʻo hangē pē ko e meʻa kotoa naʻe fai ʻe Sihoiakimí.+ 20 Koeʻuhi ko e houhau ʻa Sihová naʻe hoko ai ʻa e ngaahi meʻá ni ʻi Selusalema pea mo Siuta, kae ʻoua kuó ne kapusi kinautolu mei hono ʻaó.+ Pea naʻe angatuʻu ʻa Setekaia ki he tuʻi ʻo Pāpiloné.+

25 ʻI he taʻu hono hiva ʻo e pule ʻa Setekaiá, ʻi he māhina hono hongofulú, ʻi he ʻaho hono hongofulu ʻo e māhiná, naʻe haʻu ai ʻa Tuʻi Nepukanesa+ ʻo Pāpiloné mo ʻene kau taú kotoa ke tauʻi ʻa Selusalema.+ Naʻá ne ʻapitanga ke tauʻi ia pea langa ha ʻā ʻo ʻākoloʻi takatakai ia,+ 2 pea naʻe ʻākoloʻi ʻa e koló ʻo aʻu ki he taʻu hono 11 ʻo e pule ʻa Tuʻi Setekaiá. 3 ʻI he ʻaho hono hiva ʻo e māhina hono faá naʻe mafatukituki ʻa e hongé+ ʻi he koló, pea naʻe ʻikai ha meʻakai maʻá e kakai ʻo e fonuá.+ 4 Naʻe avangi ʻa e ʻā ʻo e koló,+ pea naʻe hola poʻuli ʻa e kau sōtiá kotoa ʻi he matapā ʻi he vahaʻa ʻo e ongo ʻā naʻe ofi ki he ngoue ʻa e tuʻí, lolotonga ia naʻe takatakaiʻi ʻe he kau Kalitiá ʻa e koló; pea naʻe ʻalu atu ʻa e tuʻí ʻi he hala ʻo e ʻAlapá.+ 5 Ka naʻe tulimui ʻa e kau tau Kalitiá ʻi he tuʻí, pea naʻa nau maʻu ia ʻi he toafa ʻo Sielikoó, pea naʻe movete mei hono tafaʻakí ʻa ʻene kau taú kotoa. 6 Naʻa nau puke leva ʻa e tuʻí+ pea ʻohake ia ki he tuʻi ʻo Pāpiloné ki Līpila, pea naʻa nau hilifaki kiate ia ha tautea. 7 Naʻa nau tāmateʻi ʻa e ngaahi foha ʻo Setekaiá ʻi hono ʻaó; pea naʻe fakakuihi leva ʻe Nepukanesa ʻa e mata ʻo Setekaiá, ʻo haʻi ia ʻaki ʻa e meʻa-haʻi kopa, pea ʻave ia ki Pāpilone.+

8 ʻI he māhina hono nimá, ʻi he ʻaho hono fitu ʻo e māhiná, ʻa ia, ʻi he taʻu hono 19 ʻo e pule ʻa Tuʻi Nepukanesa ko e tuʻi ʻo Pāpiloné, naʻe haʻu ai ʻa Nepusaletani+ ko e pule ʻo e kau kaʻaté, ko e sevāniti ʻa e tuʻi ʻo Pāpiloné, ki Selusalema.+ 9 Naʻá ne tutu ʻa e fale ʻo Sihová,+ ko e fale*+ ʻo e tuʻí, pea mo e ngaahi fale kotoa pē ʻi Selusalemá;+ naʻá ne tutu foki mo e fale ʻo e tangata tuʻu-ki-muʻa+ kotoa pē. 10 Pea ko e ngaahi ʻā takatakai ʻi Selusalemá naʻe holoki ia ʻe he kau tau Kalitia kotoa ʻa ia naʻe ō mo e pule ʻo e kau kaʻaté.+ 11 Naʻe ʻave fakamālohi ʻe Nepusaletani ko e pule ʻo e kau kaʻaté ʻa e toenga ʻo e kakai naʻe toe ʻi he koló, mo e faʻahinga naʻe mavahe ʻo kau ki he tuʻi ʻo Pāpiloné, pea mo e toenga ʻo e kakaí.+ 12 Ka naʻe tuku ʻe he pule ʻo e kau kaʻaté ʻa e niʻihi ʻo e kakai masiva taha ʻo e fonuá ke nau ngāue ʻi he ngoue kālepí pea hoko ko e kau ngāue fakatamaioʻeiki taʻetotongi.+ 13 Pea naʻe haveki ʻe he kau Kalitiá ʻa e ongo fuʻu pou kopa+ ʻo e fale ʻo Sihová mo e ngaahi salioté+ pea mo e fuʻu ʻaiʻanga vai kopa+ naʻe ʻi he fale ʻo Sihová, pea naʻa nau ʻave ʻa e kopá ki Pāpilone.+ 14 Naʻa nau ʻave foki ʻa e ngaahi kané, ko e ngaahi sāvoló, ko e ngaahi helekosí, ko e ngaahi ipú, pea mo e naunau kopa kotoa pē naʻe ngāueʻaki ʻi he ngāue he temipalé. 15 Naʻe ʻave ʻe he pule ʻo e kau kaʻaté ʻa e ngaahi ʻaiʻanga malalá mo e ngaahi poulu ʻa ia naʻe ngaohi mei he koula+ mo e siliva+ moʻoní. 16 Ko e meʻa ki he ongo fuʻu poú, ko e fuʻu ʻaiʻanga vaí, pea mo e ngaahi saliote naʻe ngaohi ʻe Solomone ki he fale ʻo Sihová, ko e kopa ʻo e ngaahi koloa kotoa ko ení naʻe ʻikai lava ke fua ʻa hono mamafá.+ 17 Ko e fuʻu pou taki taha naʻe kiupite* ʻe 18 ʻa hono māʻolungá,+ pea ko e ʻuluʻi-pou ʻi aí naʻe ngaohi mei he kopá; pea ko e māʻolunga ʻo e ʻuluʻi-poú ko e kiupite ʻe tolu, pea ko e meʻa vangavangá mo e ngaahi foʻi pomikānite takatakai ʻi he ʻuluʻi-poú naʻe ngaohi kotoa ia mei he kopá.+ Ko e fuʻu pou hono uá mo hono meʻa vangavangá naʻe tatau pē mo ia.

18 Naʻe ʻave foki ʻe he pule ʻo e kau kaʻaté ʻa Sēlaia+ ko e taulaʻeiki lahí, ko Sēfanaia+ ko e taulaʻeiki hono uá, pea mo e kau leʻo matapā+ ʻe toko tolu. 19 Pea naʻá ne ʻave mei he koló ʻa e ʻōfisa ʻe taha ʻo e lotoʻaá ʻa ia naʻe pule ki he kau sōtiá, mo e kaungāmeʻa ofi ʻe toko nima ʻo e tuʻí ʻa ia naʻe maʻu ʻi he koló, pea pehē ki he sekelitali ʻa e ʻeikitaú, ʻa e tokotaha naʻá ne fakatahatahaʻi ʻa e kakai ʻo e fonuá ki he ngāue fakakautaú, pea mo e kau tangata ʻe toko 60 mei he kakai lāuvale ʻo e fonuá ʻa ia naʻe maʻu ʻi he koló. 20 Naʻe ʻave kinautolu ʻe Nepusaletani+ ko e pule ʻo e kau kaʻaté ʻo ne ʻomi kinautolu ki he tuʻi ʻo Pāpiloné ki Līpila.+ 21 Naʻe taaʻi kinautolu ʻe he tuʻi ʻo Pāpiloné pea tāmateʻi kinautolu ʻi Līpila ʻi he fonua ko Hēmatí.+ Ko ia naʻe ʻave fakamālohi ai ʻa Siuta mei hono fonuá.+

22 Naʻe fakanofo ʻe Tuʻi Nepukanesa ʻo Pāpiloné ʻa Ketalaia+ ko e foha ʻo ʻAhikami+ ko e foha ʻo Sāfaní+ ke ne pule ki he kakai naʻá ne tuku ʻi he fonua ko Siutá.+ 23 ʻI he fanongo ʻa e ngaahi ʻeikitaú kotoa mo ʻenau kau tangatá kuo fakanofo ʻe he tuʻi ʻo Pāpiloné ʻa Ketalaiá, naʻa nau haʻu he taimi pē ko iá kia Ketalaia ki Misipā. Ko ʻIsimeʻeli ko e foha ʻo Nētanaiá, ko Siohānani ko e foha ʻo Kaleá, ko Sēlaia ko e foha ʻo Tanumeti ko e tangata Netofá, pea mo Siasanaia ko e foha ʻo e tangata Māká, fakataha mo ʻenau kau tangatá.+ 24 Naʻe fai ʻe Ketalaia ha fuakava kiate kinautolu mo ʻenau kau tangatá peá ne pehē kiate kinautolu: “ʻOua naʻa mou ilifia ʻi he hoko ko e kau sevāniti ki he kau Kalitiá. Mou nofo ʻi he fonuá pea tauhi ki he tuʻi ʻo Pāpiloné, pea te mou lelei.”+

25 Pea ʻi he māhina hono fitú, naʻe haʻu ai ʻa ʻIsimeʻeli+ ko e foha ʻo Nētanaia ko e foha ʻo ʻElisama, ʻa ia naʻe haʻu mei he laine fakatuʻí,* mo e kau tangata kehe ʻe toko hongofulu, pea naʻa nau taaʻi ʻa Ketalaia ʻo ne mate, fakataha mo e kau Siu pea mo e kau Kalitia naʻe ʻiate ia ʻi Misipaá.+ 26 ʻI he hili iá, ko e kakaí kotoa mei he iiki ki he lalahi, ʻo kau ai ʻa e kau ʻeikitaú, naʻa nau tuʻu hake ʻo ʻalu ki ʻIsipite,+ he naʻa nau ilifia ʻi he kau Kalitiá.+

27 Pea ʻi he taʻu hono 37 ʻo e ʻave fakamālohi ʻo Tuʻi Sihoiakini+ ʻo Siutá, ʻi he māhina hono 12, ʻi he ʻaho hono 27 ʻo e māhiná, ko Tuʻi ʻIvili-melotaki ʻo Pāpiloné, ʻi he taʻu naʻá ne hoko ai ko e tuʻí, naʻá ne tuku ange ʻa* Tuʻi Sihoiakini ʻo Siutá mei he pilīsoné.+ 28 Naʻá ne lea anga-ʻofa kiate ia pea ʻai ʻa hono taloní ke māʻolunga ange ia ʻi he ngaahi taloni ʻo e ngaahi tuʻi kehe naʻe ʻiate ia ʻi Pāpiloné. 29 Ko ia naʻe vete ʻe Sihoiakini ʻa hono ngaahi kofu fakapōpulá, pea naʻá ne kai maʻu pē ʻi he ʻao ʻo e tuʻí ʻi he ngaahi ʻaho kotoa ʻo ʻene moʻuí. 30 Naʻe ʻoange kiate ia ha ʻinasi tuʻumaʻu ʻo e meʻakaí mei he tuʻí, ʻi he ʻaho ki he ʻaho, ʻi he ngaahi ʻaho kotoa ʻo ʻene moʻuí.