‘Fakaeako mo Fakatupu-ʻIlo’
Ko e lea ʻi ʻolungá ko e anga ia ʻa hono fakamatalaʻi ʻo e ʻĀ Hake! ʻe ha tangata taʻu 26 ʻi he Fonua Moʻunga ʻo Pāpua Niu Kiní.
ʻI ha tohi ki he ʻōfisi vaʻa fakalotofonuá, naʻá ne tohi: “ʻOku ou fakaongoongoleleiʻi kimoutolu ʻi hono pulusi ʻa e ngaahi kupu mālie, moʻoni, fakaeako pea mo fakatupu-ʻilo ʻi hoʻomou makasini manakoa ko e ʻĀ Hake!” Naʻe fakamatala ʻa e tangatá: “Neongo ʻoku ʻikai ko ha mēmipa au ʻo e tui ʻa e Kau Fakamoʻoni ʻa Sihová, ʻoku ou fiefia moʻoni ʻi hono lau ʻa e ngaahi tatau ʻo e makasini ʻĀ Hake!, ʻa ia naʻá ku kole mei ha ngaahi kaumeʻa. . . . ʻI he taimi taki taha ʻoku ou lau ai ha tatau, ʻoku ou ongoʻi fie faitohi atu ke fakaongoongoleleiʻi ʻa hoʻomou ngaahi ngāue leleí. Ka ʻi he ʻamanaki ke u faitohi atú, ʻoku aʻu mai ha makasini ʻe taha ʻo ne toe fakafemoʻuekinaʻi ai au.”
Naʻe fakaʻosiʻaki ʻe he tokotaha lautohi houngaʻia ko ʻení: “Fakatatau ki heʻeku fakakaukaú, ʻoku mahuʻinga moʻoni ʻa e ʻĀ Hake! ki ha taha pē ʻoku lava ke lautohí. Mei ha loto-moʻoni, ʻoku ou fakaʻamu ke fakamālō atu ʻi he taimi lahi taʻefaʻalaua.”
ʻOku tokonaki mai ʻe he ʻĀ Hake! ha fakamaama ʻi he ngaahi kaveinga lahi. Ko e meʻa mahuʻinga tahá, ʻokú ne langa hake ʻa e tuipau ki he talaʻofa ʻa e Tokotaha-Fakatupú ʻo fekauʻaki mo ha māmani foʻou melino ʻa ia te ne fetongi ʻa e fokotuʻutuʻu ʻo e ngaahi meʻa lolotongá.
Ko e polosiua peesi ʻe 32 Ko e Hā ʻOku Fiemaʻu ʻe he ʻOtuá Meiate Kitautolú? ʻoku fakamatala fakaikiiki ai ki he taumuʻa ko ia ʻa e ʻOtuá, ʻo tokonaki mai ai ʻa e fakamatala mei he Tohitapú ke fakahaaʻi ʻa e meʻa ʻoku fiemaʻu ke tau fai ke maʻu ai ʻa ʻene hōifuá. ʻE lava ke ke kole nai ha tatau ʻo e polosiua ko ʻení ʻaki hono fakafonu ʻa e kūponi ʻoku ʻoatu hení pea lī ia ki he tuʻasila ʻoku hā ʻi he kūponí pe ki ha tuʻasila feʻungamālie ʻoku fakahokohoko ʻi he peesi 5 ʻo e makasini ko ʻení.
□ ʻOmai muʻa kiate au ha tatau ʻo e polosiua Ko e Hā ʻOku Fiemaʻu ʻe he ʻOtuá Meiate Kitautolú?
□ Kātaki fetuʻutaki mai kiate au ʻo fekauʻaki mo ha ako Tohitapu taʻetotongi ʻi ʻapi.