“ʻĀvanga” Telefoni Toʻotoʻo
FAI ʻE HE TOKOTAHA-TOHI ʻĀ HAKE! ʻI SIAPANI
“KO E Fakafalala ki he Telefoni Toʻotoʻó Kuo Aʻu ki ha Tuʻunga ʻĀvanga,” ko e lau ia ʻa ha uluʻi ongoongo ʻi he The Daily Yomiuri ʻa Siapaní. ʻĀvanga? “ʻOku hā ko e kau talavoú ʻoku nau vakai ki heʻenau ʻū telefoni toʻotoʻó ko e konga ia honau sinó pea ʻe aʻu nai ʻo nau mei vale ʻo ka nau mavahe mei heʻenau ngaahi telefoní,” ko e fakamatala ia ʻa e nusipepá. ʻI he manavasiʻi naʻa motuhia kinautolu mei he niʻihi kehé, ko e tokolahi ʻoku nau tuku moʻui pē ʻenau ngaahi telefoni toʻotoʻó ʻi he taimi kotoa, ʻi he feituʻu kotoa pē. Kapau “ʻoku ʻikai [ke nau] maʻu ha faʻahinga pōpoaki ʻi heʻenau ngaahi telefoni toʻotoʻó, ʻoku nau ongoʻi taʻemanonga mo ʻiteʻita, pea kamata ke ongoʻi ʻoku ʻikai toe fiemaʻu kinautolu ʻe ha taha.” Ko e taʻemanonga ko ení ʻokú ne ueʻi ai kinautolu ke tali leva ʻa e ngaahi pōpoaki ʻoku hā ʻi heʻenau ngaahi telefoní, ʻa ia ʻoku ʻikai ke faʻa fiemaʻú.
Ko e moʻoni, ko e ngaahi telefoni toʻotoʻó ʻe lava ke ʻaonga ia. Ko e moʻoni, kuo nau faʻa hoko ʻo mahuʻinga taʻehanotatau ʻi he ngaahi tuʻunga fakavavevavé. Naʻa mo hono ngāueʻaki fāinoa ʻo e telefoni toʻotoʻó ʻoku ʻikai ke hala ʻaupito ia, kapau pē ʻoku fai eni ʻi ha tuʻunga mafamafatatau. Ka ʻoku pehē ʻe he ngaahi maʻu mafai ia ʻe niʻihi ko e “ʻāvanga” telefoni toʻotoʻó ʻoku malava ke ne maumauʻi ʻe ia ʻa e ngaahi pōtoʻi anga-maheni ʻo e fetuʻutakí. ʻOku hohaʻa ha faiako kolisi lotoloto ʻi Osaka koeʻuhi ko e ʻū telefoni toʻotoʻó, “ʻoku mole ai mei he fānaú ʻa e malava ke mahinoʻi ʻa e fōtunga ʻo e matá, tōʻongá mo e tō e leʻo ʻo e niʻihi kehé. Ko ha nunuʻa leva ʻo e meʻá ni ko e tupulaki ʻa e fakaaoao ʻi he fānaú, fakataha mo ha taʻetokaʻi ʻo e ngaahi ongoʻi ʻa e niʻihi kehé,” ko e lau ia ʻa e nusipepá.
ʻOku fakaʻosiʻaki ʻe he kupú: “ʻOku hā ʻoku taʻealataʻofi he ko e fakafalala ko ia ʻa e fānaú ki he telefoni selulaá ʻe tupulaki ia ʻi he kahaʻú. Ko e founga pē taha ke fakasiʻisiʻi ai ha ngaahi ola kovi ʻo e hehema ko ení ko e fakapapauʻi ko e kakai lalahí ʻoku nau fokotuʻu ha faʻifaʻitakiʻanga lelei ʻi hono ngāueʻaki ʻo e ngaahi telefoni selulaá.”