“Ko ha Tali ki he Lotú”

Ko e anga ia hono fakamatalaʻi ʻe ha faʻē ʻa ha tamasiʻi taʻu hiva ki hono tukuange mai ʻa e tohi Ako mei he Faiako Lahí ʻi ha fakataha-lahi fakavahe ʻa e Kau Fakamoʻoni ʻa Sihova ʻi ʻAilaní. “Naʻá ne ʻomai ʻa e loʻimata ki hoku matá!” ko ʻene kalangá ia. “Ko ha tāpuaki ia tautefito koeʻuhi ʻi he uike kuo ʻosí pē naʻá ku hohaʻa ai koeʻuhi naʻe ʻikai te u ʻiloʻi lelei pe ko e hā ke ako ai mo hoku fohá.

“Naʻá ku lotu kia Sihova,” ko e fakamatala ia ʻa e fefiné, “ke tokoniʻi au ke u akoʻi kiate ia ʻa e ngaahi moʻoni loloto ange ʻo e Tohi Tapú ʻi ha founga faingofua ʻa ia ʻoku fakamānakó, pea naʻe ʻikai te u ʻiloʻi pe te u kamatá ʻi fē. Ko ia ko hono maʻu ʻa e tohi fakaʻofoʻofa mo fakatātā lelei ko ení ko ha tali ia ki he lotú.”

Ko ha faʻē ʻa ha fānau ʻe toko nima ʻi Kalefōnia, U.S.A., naʻá ne tohi ʻa e meʻa meimei tatau. “ʻI heʻemau foki ki he hōtelé mei he fakataha-lahí,” ko ʻene leá ia, “naʻá ku sio ai ki heʻeku fānau iiki taha ʻe toko tolú ʻoku nau lau, sio mo fetalanoaʻaki fakataha ki he meʻa naʻá ne puke ʻenau tokangá ʻi he ngaahi peesi ʻo e tohi Ako mei he Faiako Lahí.”

Naʻá ne fakamatala: “Ko e fiefia naʻá ku ongoʻi ʻi hono maʻu ʻa e meʻaʻofa ko eni meia Sihová naʻe lahi fau moʻoni—ʻo hangē ia ko ha fiefia ʻi ha fāʻele, ko ha mali, ko ha papitaiso, ko ha monū naʻe maʻu mei he Tokotaha-Fakatupu ʻo e ʻunivēsí. ʻI he taimi ʻe niʻihi ʻoku ou fakapapauʻi ko hotau loʻimata ʻo e fiefiá ʻokú ne fakahaaʻi ki heʻetau Tamai ko Sihová, ʻa e meʻa ʻoku ʻikai lava ke fai ʻe he leá pē.”

Mahalo pē te ke maʻu ha ongoʻi meimei tatau ʻi he taimi te ke sivisiviʻi ai mo ako ʻa e tohi fakatātā fakaʻofoʻofa peesi 256 ko ení ʻoku lahi tatau hono pēsí mo e makasini ko ení. ʻE lava ke ke kole ha tatau ʻaki hono fakafonu ʻa e kūponi ʻoku ʻoatu hení pea meiliʻi ia ki he tuʻasila ʻoku ʻoatú pe ki ha tuʻasila feʻungamālie ʻoku fakahokohoko ʻi he peesi 5 ʻo e makasini ko ení.

□ ʻI he ʻikai kounaʻí, ʻoku ou kole atu ha tatau ʻo e tohi Ako mei he Faiako Lahí.

□ Kātaki fetuʻutaki mai kiate au ʻo fekauʻaki mo ha ako Tohi Tapu taʻetotongi ʻi ʻapi.