Naʻe Faʻu Ia ke Pehē?

Filo mei he Hiná

◼ ʻOku kiʻi maʻamaʻa ange ia ʻi he vavaé, neongo ko ha ʻaunise ʻa hono mamafá ʻoku mālohi ange ia ʻi he sitilá. Kuo ako ʻe he kau saienisí ʻi he laui hongofuluʻi taʻu ki he filo ko ia ʻoku faʻu ʻe he kalasi hina ʻokú ne lalanga takatakai ʻa hono kupengá. Ko e filo tefito ʻa ia ʻokú ne hokohoko ʻa e ngaahi foʻi fuo takatakai ʻo e kupengá—ʻa ia ʻoku mālohi taha ʻi he filo ʻe fitu ʻoku lava ke faʻu ʻe he fanga hina ko ení—kuo tohoakiʻi lahi taha ki ai ʻa e tokangá. ʻOku mālohi ange pea malu ange ia mei he vaí ʻi he ngaahi tuʻoni filo ʻo e ʻunufe siliká, ʻa ia ʻoku ngāueʻaki anga-maheni ki he tupenú.

Fakakaukau ki heni: Ko e faʻu ʻo e ngaahi filo ʻi he fale ngāué hangē ko e filo Kevlar, ʻa ia ʻoku ngaohiʻaki ʻa e ngaahi kote malu mei he mahafú, ʻoku fiemaʻu ki ai ʻa e mafana lahi pea mo hono ngāueʻaki ʻo e huhuʻa fakavaia ko e ʻēsiti sūlifa. ʻI hono kehé, ʻoku faʻu ʻe he fanga hiná ia ʻa e filó ʻo ʻikai toe fiemaʻu ki ai ha mafana lahi, ʻo ngāueʻaki ʻa e vaí ko ha huhuʻa fakavaia. ʻIkai ko ia pē, ko e filo tefito ko ia mei he hiná ʻoku mālohi ange ia ʻi he filo Kevlar. Kapau ʻe fakalahi hono lahí ke lahi tatau mo ha malaʻe ʻakapulu, ʻe lava ke pukeʻi ʻe he matamata kupenga ngaohiʻaki ʻa e filo tefito mei he hiná ha fuʻu vakapuna lahi fakaʻulia!

ʻOku ʻikai ha ofo, ʻoku mahuʻingaʻia ʻaupito ʻa e kau fakatotoló ʻi he mālohi ʻo e filo tefito ngaohi ʻe he hiná. “ʻOku loto ʻa e kau saienisí ke ngāueʻaki ʻa e faʻahinga mālohi ko iá ʻi ha ngaahi meʻa ʻo lele pē mei he ngaahi kote maluʻi mei he mahafú ʻo aʻu ki he ngaahi fuʻu uaea matolu ʻoku ngāueʻaki ki hono pukepuke ʻo e ngaahi halafakakavakavá,” ko e tohi ia ʻe Aimee Cunningham ʻi he makasini Science News.

Ka ko hono faʻu tatau ʻo e filo tefito ngaohi ʻe he hiná ʻoku ʻikai ke faingofua ia, he ʻoku faʻu ʻa e filó ia ʻi loto ʻi he sino ʻo e hiná pea ʻoku teʻeki ai ke mahinoʻi kakato ʻa e anga hono faʻú. “ʻOku ʻai kitautolu ke tau ongoʻi māʻulalo ʻi hono ʻiloʻi ʻoku feinga ʻa e kakai poto ʻaupito tokolahi ke faʻu ha meʻa tatau mo e meʻa ʻoku lava ke faʻu fakanatula ʻe he fanga hina ʻoku nofo ʻi hotau lalo falé,” ko e lau ia ʻa ha faipaiolosī ko Cheryl Y. Hayashi, ko e toʻo hangatonu mei he makasini Chemical & Engineering News.

Ko e hā hoʻo fakakaukaú? Naʻe hokonoa mai pē ʻa e ʻi ai ʻa e hiná mo ʻene filo ʻoku mālohi tatau mo e sitilá, pe ko hono faʻu ia ʻe ha Tokotaha-Fakatupu poto?

[Fakatātā ʻi he peesi 26]

Ko e sio fakaʻata ki hono faʻu ʻa e filo mei he hiná

[Maʻuʻanga]

Copyright Dennis Kunkel Microscopy, Inc.