Vakai ki he Māmaní
“Ko ha fuʻu peseti ʻe 60 ʻo e kakai he māmaní ʻoku nau [maʻu] he taimí ni ha telefoni toʻotoʻo . . . Ko ha liliu lahi fau ia mei he taʻu pē ʻe ono kuohilí, ʻa ia naʻe siʻi hifo ai ʻi he peseti ʻe 15 ʻa hono maʻu ʻo e telefoni toʻotoʻó.”—MACLEAN’S, KĀNATA.
ʻI he hongofuluʻi taʻu kuohilí, ko e faʻahinga meʻamoʻui foʻou ʻe 1,068 naʻe maʻu ʻi he feituʻu lahi ange ʻo Mekong ʻi he Tonga-Hahake ʻo ʻĒsiá.—WORLD WILDLIFE FUND, ʻAMELIKA.
“Ko ʻAmeliká ʻoku siʻi hifo he 5% ʻa hono kakaí ʻi he kakai ʻo e māmaní kae meimei 25% ʻa ʻene kau pōpulá. ʻOku tukupōpula ai ʻa e kakai ʻe toko 756 ʻi he toko 100,000, ko ha tokolahi ʻoku meimei liunga nima ʻi he ʻavalisi ʻo e māmaní.”—THE ECONOMIST, PILITĀNIA.
“Fakahohaʻa Tōtuʻa”
Ko e founga māʻolunga ʻe niʻihi ʻo e fetuʻutaki fakaeonopōní ʻoku lava ke taʻofi ai ʻa e tokangataha ki he ngaahi fatongia kehé. Ko e kau mataotao ʻoku nau ako ʻa e fetuʻutaki fakaʻilekitulōnika ʻa e tangatá ʻoku nau līpooti ʻo pehē—ko e ngaahi meʻa hangē ko e feʻaveʻaki pōpoakí, fakamanatu ʻo e ʻaho ke fai ai ha meʻá, fakatokanga ʻi he ʻīmeilí, mo e fanga kiʻi tuʻuaki ʻoku ʻasi fakafokifā ʻi he komipiutá—ʻoku tofanga ʻa e māmani ʻo e meʻa fakaʻilekitulōniká ʻi he “fakahohaʻa tōtuʻa mo e hokohoko fakahohaʻasi ʻa e tokangá.” Ko e ola nai ʻo e hokohoko fakahohaʻá “ʻe ʻikai ʻaupito ai te ke tokangataha fakaʻaufuli ki ha fakakaukau ʻo fuoloa pea ʻikai ʻaupito malava ke ke ngāue taʻetuku ke ʻosi ha meʻa pē,” ko e lau ia ʻa e makasini Newsweek. ʻI he lotolotonga ʻo e ngaahi meʻa kehé, ko e ngaahi fakahohaʻa peheé ʻoku lava ke fakatupunga ai ʻa e “mole ʻa e manatú” mo e “hōloa e tonu ʻa e manatú” pea pehē ki he malava ke hoko ʻa e ngaahi hala lahi fakaʻulia.
Fiemaʻu ʻa e Kau Fakatonulea
Ko e ngaahi fakamaauʻangá, ngaahi kautaha fakahoko laó, ngaahi falemahakí mo e ngaahi ngāueʻanga kehe ʻi ʻAmeliká ʻoku nau faʻa fiemaʻu ʻa e tokoni ke mahinoʻi ʻa e meʻa ʻoku leaʻaki ʻe he kakaí. ʻI hono fiemaʻú ko e ngaahi kautaha ʻoku ʻi ai ʻa e kau fakatonuleá ʻoku nau fakalato ʻa e fiemaʻu ke fetuʻutakí ʻi he meʻa ʻoku ui ʻi he fakamatala ongoongo ʻa e Reuters “ko ha māmani ʻoku fakautuutu ai e lahi ʻa e lea kehekehé.” Ko ha kautaha ʻe taha ʻoku tuʻu ʻi Kalefōnia ʻoku ngāue ki ai ʻa e kau fakatonulea ʻe toko 5,200 ʻoku nau poto ʻi he lea ʻe 176—mei he lea anga-maheni, hangē ko e lea faka-Lūsia, Siaina, mo e faka-Sipeiní, ki he lea faingataʻa ange hangē ko e ngaahi lea ʻoku leaʻaki ʻi he ngaahi feituʻu ʻo Mekisikou mo ʻAfilika. Siʻi hifo he miniti ʻe tahá, ʻoku lava ʻe he ngaahi kautaha ko iá ke “fakapapauʻi ʻa e lea ʻoku leaʻaki ʻe he tokotahá” pea ʻai ha tokotaha fakatonulea ʻi he telefoní ke ne tokoniʻi ʻa e kau kasitomaá ke nau “mahinoʻi e lea ʻa e kakaí,” ko e lau ia ʻa e līpōtí.
Maʻuʻanga Koula Taʻeʻamanekina
Ko e Vahefonua Nagano, ʻi he tokelau-hihifo ʻo Tōkioó, kuo “ʻiloʻi ai ha maʻuʻanga koloa foʻou mei he kinohaʻa ʻi he fakatafenga vaí,” ko e lau ia ʻa ha ongoongo ʻi he Reuters mei Siapani. Naʻe fakahaaʻi ʻi he fakatotoló ko e efuefu ʻoku maʻu mei hono tutu ʻo e kinohaʻa ʻi he fakatafenga vai ʻi he ngāueʻanga Suwa naʻe maʻu ai ha peseti lahi ange ʻo e koulá ʻi he makamaka mētale naʻe maʻu mei he ngaahi keliʻanga koula paʻanga lahi taha ʻi Siapaní. ʻOku ʻamanekina ʻe he vahefonuá ke maʻu ha ieni ʻe 15 miliona, ko e $167,000 tupu, ʻi he koula ʻi he taʻu fakapaʻanga pē ʻe tahá. ʻOku pehē ko e mahuʻinga lahi ʻa e koula ʻi he kinohaʻa ʻi he tafenga vaí ko e “tupu ia mei he lahi fau ʻo e ngaahi fale ngāue ʻi he feituʻu ko ia ʻoku faʻu ai ʻa e ngaahi meʻangāue ʻoku ngāueʻaki ki ai ʻa e koulá,” ko e lau ia ʻa e līpōtí.