Naʻe Maʻu ʻe Sēkope ha Fāmili Lahi

KIʻI sio ange ki he fuʻu fāmilí ni. Ko e ngaahi foha ʻeni ʻe toko 12 ʻo Sēkopé. Pea naʻe ʻi ai foki mo hono ngaahi ʻofefine. ʻOkú ke ʻilo ha hingoa ʻo e fānaú? Tau ako ke ʻilo ha niʻihi ʻo kinautolu.

Naʻe fāʻeleʻi ʻe Lia ʻa Lūpeni, Simione, Līvai mo Siuta. Naʻe loto-mamahi ʻaupito ʻa Lesieli ʻi heʻene sio naʻe ʻikai haʻane fānaú. Ko ia naʻá ne ʻoatu kia Sēkope ʻene sevāniti fefine ko Pilaa, pea naʻe maʻu ʻe Pilaa ha ongo tama tangata ko Tani mo Nafitalai. Pea naʻe toe foaki ʻe Lia kia Sēkope ʻene sevāniti fefine ko Silipa, pea naʻe fāʻeleʻi ʻe Silipa ʻa Kata mo ʻAseli. Naʻe toe fāʻeleʻi ʻe Lia mo e ongo foha ko ʻIsaka mo Sepulone.

Faifai atu pē pea naʻe maʻu ʻe Lesieli ha tama. Naʻá ne fakahingoa ia ko Siosifa. Te tau toki ako ʻamui ange ha meʻa lahi ʻo kau kia Siosifa, koeʻuhi he naʻe hoko ia ko e tangata mahuʻinga ʻaupito. Ko e ngaahi foha kotoa ia ʻe toko 11 naʻe fāʻeleʻi kia Sēkope ʻi heʻene nofo mo e tamai ʻa Lesieli ko Lēpaní.

Naʻe ʻi ai foki mo e ngaahi ʻofefine ʻo Sēkope, ka ʻoku hā ʻi he Tohitapú ʻa e hingoa pē ʻe taha ʻo kinautolu. Ko hono hingoá ko Taina.

Naʻe aʻu ki he taimi naʻe fakakaukau ai ʻa Sēkope ke mavahe meia Lēpani ʻo foki ki Kēnani. Ko ia naʻá ne fakatahaʻi hono fuʻu fāmilí mo ʻene tākanga sipi lahi mo e fanga pulu pea kamata leva ʻa e fononga mamaʻó ni.

Hili ha taimi ʻo e nofo ʻa Sēkope mo hono fāmilí ʻi Kēnaní, naʻe toe fāʻeleʻi ʻe Lesieli ha foha ʻe taha. Naʻe hoko ʻeni lolotonga ʻenau fonongá. Naʻe fuʻu faingataʻaʻia ʻa Lesieli, peá ne mate lolotonga ʻene fāʻelé. Ka naʻe sai pē ʻa e kiʻi pēpē tangatá ia. Naʻe fakahingoa ia ʻe Sēkope ko Penisimani.

ʻOku lelei ke tau manatuʻi ʻa e ngaahi hingoa ʻo e ngaahi foha ʻe toko 12 ʻo Sēkopé koeʻuhi he ko e kotoa ʻo e puleʻanga ʻIsilelí ko e tupu meiate kinautolu. Ko hono moʻoní, ko e ngaahi matakali ʻe 12 ʻo ʻIsilelí ʻoku fakahingoa ia ki he ngaahi foha ʻe toko 10 ʻo Sēkope mo e ongo foha ʻo Siosifa. Naʻe moʻui ʻa ʻAisake he ngaahi taʻu lahi hili hono fāʻeleʻi kotoa ʻa e tamaiki tangatá ni, pea ʻoku pau naʻe fakatupu fiefia kiate ia ke ne maʻu ha ngaahi makapuna tangata tokolahi pehē. Ka tau sio ange pe ko e hā naʻe hoko ki hono mokopuna fefine ko ia ko Tainá.