Ko e Toetuʻu ʻa Sīsuú ʻo Aʻu ki he Nofo Pōpula ʻa Paulá

Naʻe toetuʻu ʻa Sīsū ʻi he ʻaho hono tolu hili ʻene maté. ʻI he ʻaho ko iá naʻá ne hā tuʻo nima ki hono kau muimuí ʻi he ngaahi taimi kehekehe. Naʻe hokohoko atu ʻa e hā ʻa Sīsū kiate kinautolú ʻo feʻunga mo e ʻaho ʻe 40. Pea ʻi he lolotonga ʻa e mamata ʻa e niʻihi ʻo ʻene kau ākongá, naʻe foki hake ʻa Sīsū ki hēvani. ʻI he ʻaho ʻe hongofulu mei ai naʻe huaʻi hifo ʻe he ʻOtuá ʻa e laumālie māʻoniʻoní ki he kau muimui ʻo Sīsū naʻa nau tatali ʻi Selusalema.

Ki mui mai, naʻe hanga ʻe he ngaahi fili ʻo e ʻOtuá ʻo tuku pilīsone ʻa e kau ʻapositoló, ka naʻe tuku ange kinautolu ʻe ha ʻāngelo. Naʻe tolomakaʻi ʻo mate ʻa e ākonga ko Sitīveni ʻe he kau fakafepakí. Ka te tau ako ki he anga hono fili ʻe Sīsū ʻa e tokotaha ʻo e kau fakafepaki ko ʻení ke hoko ko ʻene sevāniti makehe, pea naʻe hoko ia ko e ʻapositolo ko Paula. Pea ʻi he ʻosi ʻa e taʻu ʻe tolu mo e konga mei he mate ʻa Sīsuú, naʻe fekau ʻe he ʻOtuá ʻa e ʻapositolo ko Pitá ke malanga ki he tokotaha naʻe ʻikai ko ha Siu ʻa ia ko Koliniusi pea mo hono falé.

ʻI he ʻosi nai ʻa e taʻu ʻe 13 ki mui mai ai naʻe kamata ai ʻe Paula ʻa ʻene ʻuluaki fononga fakamisinalé. ʻI heʻene fononga hono uá naʻe ʻalu ai ʻa Tīmote mo Paula. Te tau ako ki he maʻu ʻe Paula mo hono kaungāfonongá ha ngaahi taimi fakafiefia ʻi he ngāue ki he ʻOtuá. Faifai atu pē pea naʻe tuku pilīsone ʻa Paula ʻi Loma. Naʻe fakatauʻatāinaʻi ia ʻi he ʻosi ʻa e taʻu ʻe ua mei ai, ka naʻe toe tuku pilīsone ia pea naʻe tāmateʻi ai. Ko e ngaahi meʻa ʻoku fakamatalaʻi ʻi he KONGA 7 naʻe hoko ʻi he vahaʻa taimi ko e taʻu nai ʻe 32.