Naʻe Toe Moʻui ʻa Sīsū

ʻOKÚ KE ʻilo pe ko hai ʻa e fefine mo e ongo tangata ko ení? Ko e fefiné ko Mele Makitaline, ko ha kaungāmeʻa ʻo Sīsū. Pea ko e ongo tangata kofu hinehiná ko e ongo ʻāngelo. Ko e kiʻi loki ʻa ia ʻoku sio ki ai ʻa Melé ko e feituʻu ia naʻe tuku ki ai ʻa e sino ʻo Sīsuú ʻi he hili ʻo ʻene maté. ʻOku ui ia ko e fonualoto. Ka ko ē kuo pulia ʻa e sinó ia! Ko hai naʻá ne ʻave iá? Tau sio ange.

ʻI he hili ʻo e mate ʻa Sīsuú, naʻe pehē ʻe he kau taulaʻeikí kia Pailato: ‘Naʻe pehē ʻe Sīsū ʻi heʻene kei moʻuí te ne toetuʻu ʻi he ʻosi ʻa e ʻaho ʻe tolu. Ko ia fekau ke leʻohi ʻa e fonualotó. Ke ʻoua naʻa lava ʻe heʻene kau ākongá ʻo kaihaʻasi hono sinó mo pehē kuó ne ʻosi toetuʻu mei he maté!’ Naʻe tala ʻe Pailato ki he kau taulaʻeikí ke fekau ha kau sōtia ke leʻohi ʻa e fonualotó.

Ka ʻi he kei pongipongia ʻo e ʻaho hono tolu mei he mate ʻa Sīsuú naʻe haʻu fakafokifā ha ʻāngelo ʻa Sihova. Naʻá ne tekaʻi ʻa e maká mei he fonualotó. Naʻe fuʻu ilifia ʻaupito ʻa e kau sōtiá ʻo ʻikai toe lava ke nau ngaue. Faifai atu pē pea nau sio ki loto ki he fonualotó, kuo pulia ʻa e sinó ia! Naʻe ʻalu ha niʻihi ʻo e kau sōtiá ki he koló ʻo fakahā ʻa e meʻá ni ki he kau taulaʻeikí. ʻOkú ke ʻilo ʻa e meʻa naʻe fai ʻe he kau taulaʻeiki koví? Naʻa nau totongi ʻa e kau sōtiá ke nau loi. Naʻe tala ʻe he kau taulaʻeikí ki he kau sōtiá: ‘Mou pehē naʻe haʻu ʻene kau ākongá ʻi he pō, lolotonga ʻoku mau mohe, ʻo kaihaʻasi ʻa e sinó.’

Lolotonga ʻení, naʻe ʻaʻahi ki he fonualotó ha kau fefine ko e ngaahi kaungāmeʻa ʻo Sīsū. Ko ha ofo lahi ē ʻi heʻenau ʻilo naʻe ʻikai ke ʻi ai ha taha ʻi aí! Fakafokifā naʻe hā mai ha ongo ʻāngelo kofu ngingila. Naʻá na ʻeke: ‘Ko e hā ʻoku mou kumi ai kia Sīsū ʻi hení? Kuo ʻosi fokotuʻu ia. ʻAlu leva ʻo fakahā ki heʻene kau ākongá.’ Ko e vave ē ka ko e lele ʻa e kau fefiné! Ka ʻi heʻenau ʻalú naʻe taʻofi kinautolu ʻe ha tangata. ʻOkú ke ʻilo pe ko hai ia? Ko Sīsū ia! Naʻá ne pehē ange: ‘ʻAlu ʻo fakahā ki heʻeku kau ākongá.’

ʻI hono tala ʻe he kau fefiné ki he kau ākongá kuo moʻui ʻa Sīsū pea kuó nau sio kiate iá, naʻe faingataʻa ki he kau ākongá ke nau tui ki ai. Naʻe lele ʻa Pita mo Sione ki he fonualotó ke na sio tonu, ka naʻe ʻikai ke ʻi ai ha taha ʻi he fonualotó! ʻI he ʻalu ʻa Pita mo Sioné, naʻe nofo pē ʻa Mele Makitaline ia. Ko e taimi ia naʻá ne sio ai ki loto ʻo ne mamata ki he ongo ʻāngeló.

ʻOkú ke ʻilo pe ko e hā naʻe hoko ki he sino ʻo Sīsuú? Naʻe ʻai pē ia ʻe he ʻOtuá ke pulia. Naʻe ʻikai ke toe fakamoʻui ʻe he ʻOtuá ʻa Sīsū ʻi he sino kakano ʻa ia naʻá ne mate ʻakí. Naʻá ne ʻoange kia Sīsū ha sino fakalaumālie foʻou, ʻo hangē ko ia ʻoku maʻu ʻe he kau ʻāngelo ʻi hēvaní. Ka ke fakahā ki heʻene kau ākongá kuó ne toe moʻuí, naʻe lava ʻe Sīsū ke ne ʻai ha sino ʻe lava ke sio ki ai ʻa e kakaí, ʻo hangē ko ia te tau ako ki aí.