Ko e Kau Tēmenioó ko e Kau Tāmate!

Kuo anga-fakamamahi mo fakatuʻutāmaki maʻu ai pē ʻa Sētane mo e kau tēmenioó. ʻI he kuonga muʻá naʻe tāmateʻi ai ʻe Sētane ʻa e fanga manu pea mo e kau sevāniti ʻa e tokotaha angatonu ko Siopé. Hili iá naʻá ne tāmateʻi ʻa e fānau ʻe toko hongofulu ʻa Siopé ʻaki ʻene fakatupunga ha “matangi lahi” ke fakaʻauha ʻa e fale naʻa nau ʻi aí. ʻI he hili iá naʻe taaʻi ʻe Sētane ʻa Siope ʻaki ʻa e “ngaahi hangatamaki kovi mei hono ʻaofivaʻe ʻo aʻu ki hono tumuʻaki.”​—Siope 1:7-19; 2:7.

ʻI he taimi ʻo Sīsuú, naʻe ʻai ʻe he kau tēmenioó ʻa e kakai ʻe niʻihi ke nau noa mo kui. (Mātiu 9:32, 33; 12:22) Naʻa nau fakamamahiʻi ha tangata ʻe taha ʻo ʻai ke ne tafatafaʻiʻaki ia ʻa e ngaahi maka. (Maʻake 5:5) Naʻa nau toe ʻai ha tamasiʻi ke kaikaila, ʻo nau lī ia ki he kelekelé pea “fuʻu fakatekeliliʻi” ia.​—Luke 9:42.

ʻI he ʻahó ni, ʻoku kei loto ai pē ʻa Sētane mo ʻene kau tēmenioó ke fai ʻa e fakapoó. Ko hono moʻoní, kuo tupulekina ʻa ʻenau ngāue fulikivanú talu mei hono lī hifo kinautolu mei hēvaní. ʻOku fakamoʻoniʻi ʻe he ngaahi fakamatala mei māmani lahí ʻa ʻenau anga-fakamamahí. ʻOku nau fakahohaʻasi ʻa e kakai ʻe niʻihi ʻaki ʻa e mahamahakí. ʻOku nau fakahohaʻasi ʻa e niʻihi kehe ʻi he taimi poʻulí, ʻo taʻofi kinautolu ke ʻoua te nau mohe, pe ʻai ke nau maʻu ʻa e ngaahi misi fakailifia. ʻOku nau ngaohikoviʻi fakaefehokotaki fakasino ʻa e niʻihi kehe. ʻOku nau ʻai ʻa e niʻihi ke hoko ʻo fakasesele, pe fai ʻa e fakapō, pe taonakita.

ʻOku fakamatala ʻa Lintina, ʻa ia ʻokú ne nofo ʻi Sulineimi, ʻo pehē naʻe tāmateʻi ʻe ha tēmeniō, pe laumālie kovi, ʻa e ngaahi mēmipa ʻe toko 16 ʻo hono fāmilí pea fakamamahiʻi fakaesino mo fakaeʻatamai ia ʻi he taʻu ʻe 18. Tupu mei he meʻa naʻe hokosia tonu ʻe iá ʻokú ne pehē ko e kau tēmenioó “ʻoku nau maʻu ʻa e fiefia ʻi hono fakamamahiʻi ʻo aʻu ki he maté ʻa e faʻahinga ʻoku fakapāpākuú.”

Ka ʻoku malava ke maluʻi ʻe Sihova ʻa ʻene kau sevānití mei he ngaahi ʻohofi ʻoku fai ʻe Sētané.​—Palōvepi 18:10.