Tohi Tohitapu Fika 32—Siona

Tokotaha-Tohí: Siona

Kakato Hono Tohí: 844 K.M. n.

1. Ko e hā ʻa e ngaahi fehuʻi ʻoku tali ʻi he tohi ʻa Sioná, pea ko e hā ʻokú ne fakahaaʻi ʻo kau ki he meesi ʻa Sihová?

KO SIONÁ​—ko ha misinale muli ia ʻo e senituli hono hiva K.M.! Naʻe anga-fēfē ʻene vakai ki hono vāhenga-ngāue meia Sihová? Ko e hā ʻa e ngaahi meʻa foʻou naʻe hokosia naʻe fakaʻatā ʻe he meʻá ni kiate iá? Naʻá ne ʻilo naʻe ongongofua ʻa e kakai ʻi hono vāhenga-ngāué? Naʻe lavameʻa fēfē ʻa ʻene malangá? Ko e lēkooti fakaofo ʻo e tohi Sioná ʻoku tali ai ʻa e ngaahi fehuʻi ko ení. ʻI hono tohi ʻi he taimi naʻe motu ai ʻa e fuakava ʻa e puleʻanga fili ʻa Sihová mo ia pea nau tō ki he tauhi ʻaitoli fakapanganí, ʻoku fakahaaʻi ʻe he lēkooti fakaekikité ko e meesi ʻa e ʻOtuá ʻoku ʻikai ke fakangatangata pē ia ki ha puleʻanga ʻe taha, naʻa mo ʻIsileli. ʻIkai ngata aí, ʻokú ne hakeakiʻi ʻa e meesi lahi mo e ʻaloʻofa ʻa Sihová, ʻi he faikehekehe mo e ʻikai ha meesi, kātaki mo e tui ʻoku faʻa ʻasi ʻi he faʻahinga ʻo e tangata taʻehaohaoá.

2. Ko e hā ʻoku ʻiloʻi fekauʻaki mo Sioná, pea ʻi he taʻu fē nai naʻá ne kikite aí?

² Ko e hingoa Sioná (faka-Hepelū, Yoh·nahʹ) ʻoku ʻuhingá ko e “Lupe.” Ko e foha ia ʻo e palōfita ko ʻAmitai ʻo Kati-hefeli ʻi Kāleli ʻi he vahefonua ʻo Sepuloní. ʻI he 2 Tuʻi 14:​23-25 ʻoku tau lau ai ko Selopoame ko e tuʻi ʻo ʻIsilelí naʻá ne fakalahi atu ʻa e ngataʻanga ʻo e puleʻangá ʻo fakatatau ki he folofola naʻe folofolaʻaki ʻe Sihova ʻo fakafou ʻia Sioná. ʻE fokotuʻu ʻe he meʻá ni ʻa e taimi ʻo e kikite ʻa Sioná ʻi he 844 K.M. nai, ʻa e taʻu ʻo e fakanofo tuʻi ʻo Selopoame II ʻo ʻIsilelí pea ʻi he ngaahi taʻu lahi ki muʻa ke hanga ʻe ʻAsīlia, fakataha mo hono kolomuʻá ʻa Ninive, ʻo kamata puleʻi ʻa ʻIsilelí.

3. Ko e hā ʻokú ne fakamoʻoniʻi ʻoku alafalalaʻanga ʻa e fakamatala ʻi he tohi Sioná?

³ ʻOku ʻikai toe fehuʻia ko e fakamatala kotoa ʻo e tohi Sioná ʻoku alafalalaʻanga. Ko e “Tokotaha-Fakahaohaoa ʻo ʻetau tuí, ʻa Sīsū,” naʻá ne lave kia Siona ko ha tokotaha moʻoni peá ne ʻomai ʻa e fakaʻuhinga fakamānavaʻi ʻo e ua ʻo e ongo meʻa naʻe hoko fakaekikite ʻi he tohi Sioná, ʻo fakahaaʻi ai ko e tohí ʻoku ʻi ai ʻa e kikite moʻoni. (Hep. 12:​2, NW; Mt. 12:​39-41; 16:4; Luke 11:​29-32) Kuo fokotuʻu maʻu pē ʻa e tohi Sioná ʻe he kau Siú ʻi he lotolotonga ʻo ʻenau ngaahi tohi ʻoku kaú pea nau vakai ki ai ʻoku fakahisitōlia. Ko e faitotonu ʻa Sioná tonu ʻi hono fakamatalaʻi ʻa ʻene ngaahi fehālaakí mo hono ngaahi vaivaiʻangá, ʻo ʻikai ha feinga ke fūfuuʻi kinautolú, ʻokú ne toe fakaʻilongaʻi ʻoku moʻoni ʻa e lēkōtí.

4. Ko e faʻahinga ika fēfē nai naʻá ne folo ʻa Sioná? Ka, ko e hā ʻoku feʻunga ki heʻetau fakamatalá?

⁴ Fēfē ʻa e “fuʻu ika lahi” naʻá ne folo ʻa Sioná? Kuo ʻi ai ʻa e fakamahamahalo lahi pe ko e faʻahinga ika fēfē nai eni. Ko e sipamueló ʻokú ne malava lelei ke folo ha tangata kakato. ʻOku pehē pē mo e ʻanga lahi hinehiná. Neongo ia, ʻoku pehē pē ʻe he Tohitapú: “Kuo tokonaki ʻe Sihova ha fuʻu ika lahi ke folo ʻa Siona.” (Siona 1:17) ʻOku ʻikai ke fakahaaʻi pau ʻa e faʻahinga ʻo e iká. ʻOku ʻikai lava ke fakapapauʻi moʻoni pe ko ha sipamuelo, ko ha fuʻu ʻanga hinehina lahi, pe ko ha meʻamoʻui kehe ʻi tahi ʻoku ʻikai fakahaaʻi.a Ko e lēkooti ʻe he Tohitapú ko ha “fuʻu ika lahi” ʻoku feʻunga pē ia ki heʻetau fakamatalá.

ʻUHINGA ʻOKU ʻAONGA AÍ

9. Ko e hā ʻa e fakakaukau mo e ʻalunga ʻo Siona ʻoku totonu ke tuʻu ko ha fakatokanga kiate kitautolú?

⁹ Ko e ʻalunga ʻo e ngāue ʻa Sioná mo hono olá ʻoku totonu ke tuʻu ia ko ha fakatokanga kiate kitautolu. Naʻá ne hola mei he ngāue naʻe foaki ange ʻe he ʻOtuá; naʻe totonu ke ne fai ʻa e ngāué pea falala ki he ʻOtuá ke ne poupouʻi ia. (Siona 1:3; Luke 9:62; Pal. 14:26; Ai. 6:8) ʻI heʻene hoko ʻo ʻalu ʻi he feituʻu halá, naʻá ne fakahaaʻi ai ʻa e fakakaukau taʻepau ʻi he ʻikai malava ke fakahaaʻi tauʻatāina ia tonu ki he kau kauvaká ko ha tokotaha lotu ʻa “Sihova ko e ʻOtua ʻo langi.” Naʻe mole ʻa ʻene loto-toʻá. (Siona 1:​7-9; Ef. 6:​19, 20) Ko e tokanga pē ʻa Siona kiate iá naʻe taki ai ia ke ne vakai ki he meesi ʻa Sihova ki Ninivé ko ha meʻa fakatupu-ʻita fakafoʻituitui; naʻá ne feinga ke fakatonuhiaʻi ia ʻaki ʻene tala kia Sihova naʻá ne ʻosi ʻiloʻi pē ʻe ia ko e meʻa eni ʻe hokó​—ko ia ko e hā naʻá ne fekauʻi ai ia ke hoko ko ha palōfitá? Naʻe valokiʻi ia ʻi he fakakaukau taʻeʻapasia mo lāunga ko ení, ko ia ʻoku totonu ke tau maʻu ʻaonga mei he meʻa naʻá ne hokosiá pea fakaʻehiʻehi mei he kumi ha hala ʻi hono fakahaaʻi ʻe Sihova ʻa e mēsí pe ʻi heʻene founga ʻo hono fai ʻo e ngaahi meʻá.​—Siona 4:​1-4, 7-9; Fili. 2:​13, 14; 1 Kol. 10:10.

10. ʻOku anga-fēfē ʻa hono fakatātaaʻi ʻa e ʻaloʻofa mo e meesi ʻa Sihová ʻi he tohi Sioná?

¹⁰ ʻOku kāpui ʻa e meʻa kehe kotoa pē ʻi he tohi Sioná ʻi heʻene fakatātaaʻi ʻa e ongo anga fisifisimuʻa ko e ʻaloʻofa mo e meesi ʻa Sihová. Naʻe fakahaaʻi ʻe Sihova ʻa e ʻaloʻofa ki Ninive ʻi hono fekauʻi atu ʻa ʻene palōfitá ke ne fakatokanga fekauʻaki mo e fakaʻauha ʻoku tuʻunuku maí, pea naʻá ne mateuteu ke fakahaaʻi ʻa e meesi ʻi he taimi naʻe fakatomala ai ʻa e koló—ko ha meesi naʻá ne fakaʻatā ai ʻa Ninive ke hao ʻi he taʻu laka hake he 200 ʻo aʻu mai ki hono toki fakaʻauha ia ʻe he kau Mītiá mo e kau Pāpiloné ʻi he 632 K.M. nai. Naʻá ne fakahaaʻi ʻa e meesi kia Siona ʻi hono fakahaofi ia mei he tahi naʻe liaki holo ʻe he afaá pea ʻi hono tokonaki mai ʻa e fuʻu lepo ke “fakalelulelu ki heʻene mamahi.” ʻI hono tokonaki mai ʻa e fuʻu lepo maluʻí pea toe ʻave iá, naʻe ʻai ai ʻe Sihova ke ʻiloʻi ʻe Siona te Ne fakahaaʻi ʻa e mēsí mo e ʻaloʻofá ʻo fakatatau ki Heʻene hōifua lelei pē ʻaʻaná.—Siona 1:2; 3:​2-4, 10; 2:10; 4:​6, 10, 11.

11. Ko e hā ʻa e “fakaʻilonga ʻo Siona”?

¹¹ ʻI he Mātiu 12:​38-41, naʻe tala ai ʻe Sīsū ki he kau taki lotú ko e fakaʻilonga pē ʻe ʻoange kiate kinautolú ko e “fakaʻilonga ʻo Siona.” Hili ʻa e ʻaho ʻe tolu mo e pō ʻe tolu ʻi “loto hetesi,” naʻe ʻalu ʻa Siona ʻo malanga ki Ninive, ʻo ne hoko ai ko ha “fakaʻilonga” ki he kau Ninivé. (Siona 1:17; 2:2; 3:​1-4) ʻI he founga meimei tatau, naʻe fakamoleki ʻe Sīsū ʻa e ngaahi konga ʻo e ʻaho ʻe tolu ʻi he faʻitoká pea naʻe fokotuʻu hake. ʻI hono fanongonongo ʻe heʻene kau ākongá ʻa e fakamoʻoni ʻo e meʻa ko ia naʻe hokó, naʻe hoko ai ʻa Sīsū ko ha fakaʻilonga ki he toʻutangata ko iá. Fakatatau ki he founga faka-Siu ʻo hono fakafuofua ʻa e taimí pea mo e ngaahi moʻoniʻi meʻa ʻi hono fakahoko ʻo e tuʻunga ʻo Sīsuú, ko e vahaʻa taimi ko eni ʻo e ‘‘ʻaho tolu mo po tolu” ʻoku fakaʻatā ai ke siʻi hifo ʻi he ʻaho kakato ʻe tolú.b

12. (a) Ko e hā ha toe meʻa ʻoku leaʻaki ʻe Sīsū fekauʻaki mo e kau Ninivé pea mo e kau Siu ʻi hono toʻutangatá? (e) Naʻe anga-fēfē ʻa e hā ha “meʻa ʻoku lahi ʻia Siona,” ʻo ne maʻu ʻa e fehokotaki ko e hā pea mo e Puleʻanga mo e fakamoʻui ʻa Sihová?

¹² ʻI he lāulea tatau, naʻe fakafaikehekeheʻi ai ʻe Sīsū ʻa e fakatomala ʻa e kau Ninivé mo e tuʻunga loto-fefeka mo e talitekeʻi fakahangatonu naʻá ne hokosia mei he kau Siú lolotonga ʻa ʻene ngāue fakafaifekaú tonu, ʻo ne pehē: “ʻE hopo mo e toʻutangata ni ʻi he fakamāu ʻa e kakai Ninive, pea te nau fakahalaia ia: he naʻe fakatomala ʻe kinautolu ʻi he malanga ʻa Siona: kae vakai, ʻoku ʻi heni ha meʻa ʻoku lahi ʻia Siona.” (Sio foki ki he Mātiu 16:4 mo e Luke 11:​30, 32.) “Meʻa ʻoku lahi ʻia Siona”—ko e hā ʻa e ʻuhinga ʻa Sīsū ʻi he ngaahi lea ko ení? Naʻá ne ʻuhingá kiate ia tonu ko e palōfita lahi tahá, ʻa e Tokotaha naʻe fekauʻi mai ʻe Sihova ke malanga: “Mou fakatomala, he kuo ofi ʻa e Puleʻanga ʻo Hevani.” (Mt. 4:17) Ka neongo ia, ko e tokolahi taha ʻo e kau Siu ʻo e toʻutangata ko iá naʻa nau talitekeʻi ʻa e “fakaʻilonga ʻo Siona.” Fēfē ʻa e ʻahó ni? Neongo ko e tokolahi tahá ʻoku ʻikai te nau tokanga ki he pōpoaki ʻo e fakatokanga ʻa Sihová, ko e laui afe tokolahi ʻi māmani lahi ʻoku nau maʻu ʻa e faingamālie lāngilangiʻia ʻo e fanongo ki he ongoongo lelei ʻo e Puleʻanga ʻo e ʻOtuá ʻa ia naʻe tomuʻa malangaʻi ʻe Sīsū, ko e “Fanautama ʻa Tangata.” ʻI he hangē ko e kau Ninive fakatomalá, ʻa ia naʻe tāpuakiʻi fakafou ʻi he malanga ʻa Sioná, ko e faʻahingá ni foki te nau kau ʻi he tokonaki lahi mo faimeesi ʻa Sihova ki he moʻui fuoloá, he ko e moʻoni “oku mei a Jihova ae fakamoui.”—Siona 2:​9, PM.

[Fakamatala ʻi lalo]