Kuo ʻOsi Fakamoʻui Koe?

NAʻE taʻu hongofulu ʻa Johnny ʻi he taimi naʻe taʻofi ai ia ʻe ha tangata ʻi ha fea ʻo ʻeke ange: “Kiʻi tangata, ʻokú ke tali ʻa Sīsū ko ho ʻEiki mo ho Fakamoʻui?” Naʻe hangē naʻe ongo ngali kehe ʻa e fehuʻi ko iá kia Johnny, koeʻuhi naʻá ne tui maʻu pē kia Sīsū. Ko ia, naʻá ne tali ange, “Ko ia tofu pē ʻoku ou faí.” “Fakafetaʻi ki he ʻEikí!” ko e kaila ia ʻa e tangatá ke fanongo ki ai ʻa e faʻahinga kotoa. “Ko e toe laumālie ʻeni ʻe taha kuo fakamoʻui mai maʻa Kalaisi!”

ʻOku faingofua pehē ʻa e fakamoʻuí? Naʻe “fakamoʻui” ʻa Johnny ʻi he mōmeniti pē ko ia naʻá ne leaʻaki ai ʻa e ngaahi foʻi lea ko iá, tatau ai pē pe ko e hā ha meʻa ia te ne fai ʻi he toenga ʻo ʻene moʻuí? ʻE tali ʻio ʻa e kakai loto-totonu tokolahi. ʻOku pehē ʻe he ngaahi tuleki fakalotu ʻe niʻihi ke tohiʻi hifo ʻa e ʻaho naʻe “fakamoʻui” ai koé koeʻuhi ke ke manatuʻi ia.

Naʻe tohi ha tangata faifekau ʻe taha ʻo pehē “ko e mōmeniti pē ko ia ʻo ʻete tui faingofua kia Kalaisí . . . ʻoku papau tuʻuloa ai pē hoto ikuʻangá ʻoʻota.” Naʻá ne taukaveʻi ʻoku pehē ʻe he Tohitapú ʻoku fakatuʻunga ʻa e fakamoʻuí ʻo tā tuʻo taha pē ʻi ha “foʻi ngāue ʻo e tuí, ʻikai ʻi he hokohoko atu ʻo e tuí.” Naʻe tohi ʻe ha toe faʻutohi fakalotu ʻe taha: “Ko ha foʻi ngāue tā tuku ʻeni ia. Kuo ʻosi fakamoʻui koe ia . . . Ko hoʻo ‘faitaú kuo ngata.’ Ko hoʻo ‘angahalá kuo toʻo atu ia.’” Ka naʻa mo e kakai ʻoku nau tui pau loto-maʻu ʻoku moʻoni ʻení, ʻoku nau fakatokangaʻi nai ha palopalema heni. ʻOku hā mahino ko e kakai tokolahi ko ia kuo tala ki ai kuo “fakamoʻui” kinautolú ʻoku ʻikai te nau moʻui ʻi he founga ko ia ʻoku fakahā mai ʻe he Tohitapú ʻoku totonu ke nau ʻi aí. Ko ha kupuʻi lea pē ʻoku lahi ngāueʻaki ki aí ʻoku pehē naʻe ʻikai nai te nau “tali” moʻoni ʻa Kalaisi.

Ko ia, ko e hā ʻoku ʻuhinga moʻoni ki ai ʻa e “tali” ʻo Sīsuú? Ko ha foʻi ngāue ʻo e tuí ʻe taha pē, pe ko ha founga ʻo e moʻuí ʻoku hokohoko atu? Kuo pau ke mālohi feʻunga ʻa ʻetau tuí ke ne ueʻi kitautolu ke tau ngāue? ʻE lava moʻoni ke tau maʻu ʻa e ngaahi ʻaonga ʻo e feilaulau ʻa Sīsuú ʻo taʻekau ai ʻa e fatongia ke muimui kiate iá?

ʻOku fiemaʻu ʻe he kakai tokolahi ʻa e ngaahi tāpuakí kae ʻikai ko e fatongia ke muimui mo talangofua kia Sīsuú. Ko hono moʻoní, ʻoku faʻa fakahohaʻa kiate kinautolu ʻa e foʻi lea ko ia ko e “talangofua.” Ka naʻe pehē ʻe Sīsū: “Haʻu, o muimui iate au.” (Luke 18:18-​23, PM) Pea ʻoku fakahā mai ʻe he Tohitapú: “Ki he kau taʻetalangofua ki he Kosipeli ʻo hotau ʻEiki ko Sisu . . . te nau kai hono nunuʻa ko e fakaʻauha taʻengata.”​—2 Tesalonaika 1:​8, 9; Mātiu 10:38; 16:24.

ʻOku fakahā mai ʻe he Tohitapú ʻa e ngaahi meʻa lahi ʻokú ne langaʻi hake ʻa e ngaahi fehuʻi mafatukituki ʻo fekauʻaki mo e meʻa kuo akoʻi ʻo kau ki he fakamoʻuí. Kapau te ke loto ke ke fakamoʻoniʻi pe ko e hā ʻoku leaʻaki ʻe he Tohitapú ʻi he kaveinga ko ʻení, te ke ʻilo ʻe mātuʻaki mahuʻinga kiate koe ʻa e ngaahi peesi hono hoko maí. Fakaava hoʻo Tohitapú, pea lau ʻa e ngaahi konga tohi ʻoku lave ki aí ke ke ʻilo ʻa e meʻa naʻe akoʻi ʻe Sīsū mo ʻene kau ʻaposetoló ʻo kau ki he meʻa mātuʻaki mahuʻingá ni.