ʻEke ʻe he Kau Lautohí

ʻOku Tui ʻa e Kau Fakamoʻoni ʻa Sihová ko Kinautolu Pē ʻa e Faʻahinga ʻe Haó?

ʻOku fakakaukau ʻa e Kau Fakamoʻoni ʻa Sihová kuo nau maʻu ʻa e lotu moʻoní. Kapau naʻe ʻikai te nau fakakaukau pehē, naʻa nau liliu ʻenau tuí. ʻI he hangē ko e kau muimui ʻo e ngaahi tui fakalotu lahi, ʻoku ʻamanaki ʻa e Kau Fakamoʻoni ʻa Sihová ke nau hao. Kae kehe, ʻoku nau toe tui ʻoku ʻikai ko ʻenau ngāué ia ke fakamāuʻi ʻa e faʻahinga ʻe haó. ʻI he fakamulitukú, ko e ʻOtuá ʻa e Fakamāú. Ko ia ʻokú ne fai ʻa e filí.—Aisea 33:22.

ʻOku fakahaaʻi ʻi he Folofola ʻa e ʻOtuá ko e faʻahinga ʻe haó kuo pau ke ʻikai ngata pē ʻi heʻenau fiemaʻu ʻa e fakamoʻuí ka ke toe fāitaha foki mo e Fakamoʻuí. Ke fakatātaaʻi: Tau pehē ʻoku hē ha tokotaha fononga lalo ʻi he toafá. ʻOkú ne fiemaʻu vavale ke ʻilo hono halá. Te ne mate, pe te ne hao? Ko e olá ʻoku fakatuʻunga ia ʻi he anga ʻo ʻene tali ʻa e tokoní. ʻI he hīkisiá, te ne fakafisingaʻi nai ʻa e tokoni ʻa ha tokotaha faifakahaofi, pe fakamoʻui. ʻI he tafaʻaki ʻe tahá, ʻe lava ke ne tali anga-fakatōkilalo ʻa e tokoní ka ne hao moʻui.

ʻI ha founga meimei tatau, ko e fakamoʻuí ʻoku ʻanautolu ia ʻoku ngāue fāitaha mo e Tokotaha Faifakahaofi ʻo e faʻahinga ʻo e tangatá, ko e ʻOtua ko Sihová. Ko e fakamoʻuí ko ha meʻaʻofa ia mei he ʻOtuá, ka heʻikai ke maʻu ia ʻe he kakai kotoa pē. Ko e ʻAlo ʻo e ʻOtuá, ʻa Sīsū, naʻá ne pehē: “ʻOku ʻikai ko ia pe ʻoku ne lau mai, ʻEī, ʻEī, te ne hū ki he Puleʻanga ʻo Hevani; ka ko ia ʻoku ne fai ʻa e finangalo ʻo ʻeku Tamai ʻoku ʻi Hevani.”—Mātiu 7:21.

ʻOku tui ʻa e Kau Fakamoʻoni ʻa Sihová ʻe fakahaofi pē ʻe he ʻOtuá ʻa e faʻahinga ʻoku nau ngāueʻi ʻa e tui ki he feilaulau huhuʻi ʻa Sīsuú pea muimui ofi ʻi heʻene ngaahi akonakí. (Ngāue 4:10-12) Fakakaukau ki he fiemaʻu mahuʻinga ʻe tolu ki he fakamoʻuí ʻa ia ʻoku fakahaaʻi ʻi he Folofola ʻa e ʻOtuá.

(1) “Ko e meʻa kó é ʻe ʻilo ai ʻe he kakai kotoa pē ko e kau ako kimoutolu aʻaku, ʻo kapau ʻe ai haʻamou feʻofaʻaki,” ko e tala ia ʻe Sīsū ki hono kaungāfeohí. (Sione 13:35) Ko e faʻifaʻitakiʻanga tonu ʻa Sīsū ʻi hono foaki ʻene moʻuí maʻá e niʻihi kehé naʻe fakamamafaʻi ai ʻa e mahuʻinga ʻo e ʻofá. Ko e faʻahinga ʻoku ʻofa ʻi he niʻihi kehé ʻoku nau fakahāhā ha ʻulungāanga mātuʻaki mahuʻinga ki he fakamoʻuí.

(2) “Kuo u fakaʻilo kiate kinautolu ho huafa,” ko e lea ia ʻa Sīsū ʻi he lotu ki heʻene Tamaí. (Sione 17:26) Naʻe ʻiloʻi ʻe Sīsū ʻa e mahuʻinga ʻo e huafa fakafoʻituitui ʻo e ʻOtuá, ʻa e Sihová, ki heʻene Tamaí. Naʻe lotu ʻa Sīsū ke “toputapu” ʻa e huafa ʻo ʻene Tamaí. (Mātiu 6:9, Ko e Taulua) Ko e fakatoputapuʻi ʻa e huafa ʻo e ʻOtuá ʻoku kau ki ai ʻa hono ʻiloʻi ʻa e huafa ko iá mo e tōʻongafai ki ai ʻoku mahuʻinga mo māʻoniʻoni. ʻI he hangē ko Sīsuú, ko e faʻahinga ʻoku kumi ki he fakamoʻuí ʻoku fiemaʻu ke nau ngāueʻaki ʻa e huafa ʻo e ʻOtuá. ʻOku toe fiemaʻu ke nau akoʻi ki he niʻihi kehé ʻa e huafa pea mo e ʻulungāanga ʻo e ʻOtuá. (Mātiu 28:19, 20) Ko hono moʻoní, ko e faʻahinga pē ʻoku ui ki he huafa ʻo e ʻOtuá ʻe haó.—Loma 10:13.

(3) “Ko hoku puleʻanga ʻoku ʻikai ʻo e maama ko eni,” ko e lea ia ʻa Sīsū kia Ponitō Pailató. (Sione 18:36) Ko e tokosiʻi pē he ʻahó ni ʻoku nau fakahāhā ʻa e tui ki he Puleʻanga, pe founga-pule ʻa e ʻOtuá, ʻa ia ʻoku Tuʻi ai ʻa Sīsuú. Ka ʻoku tuku ʻenau falalá ki he ngaahi kautaha fakaetangatá. ʻI hono kehé, ko e faʻahinga ʻa ia ʻe haó ʻoku nau poupou mateaki ki he Puleʻanga ʻo e ʻOtuá pea akoʻi ʻa e niʻihi kehé fekauʻaki mo e founga te ne fakatauʻatāinaʻi ai ʻa e faʻahinga faitōnunga kotoa ʻo e tangatá.—Mātiu 4:17.

Hili hono ako ʻa e niʻihi ʻo e ngaahi fiemaʻu ki he fakamoʻuí, naʻe pehē ʻe he kau ākonga ʻa Sīsuú: “Ko hai nai ʻe ala moʻui?” Naʻe tali ʻe Sīsū: “Ko e ngaahi meʻa ʻoku ʻikai faʻa lava ʻi he vakai ʻa e tangata, ʻoku malava pe ki he ʻOtua.” (Luke 18:18-30) ʻOku feinga tōtōivi ʻa e Kau Fakamoʻoni ʻa Sihová ke aʻusia ʻa e ngaahi fiemaʻu ko eni ki he fakamoʻuí. ʻOku nau toe ngāue mālohi ke tokoniʻi ʻa e niʻihi kehé ke nau hao.