Kau Toketā, Kau Fakamaau, mo e Kau Fakamoʻoni ʻa Sihová

ʻI MAʻASI 1995, naʻe fakapaʻanga ai ʻe he Kau Fakamoʻoni ʻa Sihová ʻa e seminā ʻe ua ʻi Pelēsila. Ko e taumuʻá? Ke kumi ki he fāitaha mo e kau ngāue fakafaitoʻó mo fakalaó ʻi he taimi ko ia ʻoku hoko ai ha taha ʻo e Kau Fakamoʻoni ʻa Sihová ko ha mahaki ʻi ha falemahaki, pea ʻikai lava ke ne tali ha huhu totó.​—Ngāue 15:29.

Ko e meʻa pangó, he kuo tukunoaʻi ʻe he kau toketaá ia ʻi he ngaahi keisi ʻe niʻihi ʻa e ngaahi fakaʻamu ʻa e kau mahaki Fakamoʻoní pea kuo nau kumi ke maʻu ha ngaahi tuʻutuʻuni fakaefakamaau ke fakamālohiʻi ha huhu toto. ʻI he ngaahi tuʻunga peheé, kuo ngāueʻaki ʻe he Kau Fakamoʻoní ha founga fakalao pē naʻe ala maʻú ke maluʻiʻaki kinautolu. Kae kehe, kuo nau fili ki he fāitahá kae ʻikai ko e fakafepaki. Ko ia ai, naʻe fakamamafaʻi ʻi he ongo seminaá, ʻoku ʻi ai ʻa e ngaahi meʻa lahi ke fili mei ai kae ʻikai ko e faitoʻo huhu ʻo e toto kalasi tataú, pea ʻoku tali fiefia ʻa e ngaahi meʻá ni ʻe he Kau Fakamoʻoni ʻa Sihová.a

Kuo ʻosi poupouʻi ʻi ha fakataha ʻa e Kautaha Fakafaitoʻo Fakavahe ʻo São Paulo ʻa e tuʻunga ʻo e Kau Fakamoʻoní. ʻI Sanuali 1995 naʻe fakapapauʻi ai kapau ʻoku ʻi ai ha taʻeloto ki ha faitoʻo kuo fakahinohino ʻe ha toketā, ʻoku ʻi ai ʻa e totonu ʻa e mahakí ke fakafisingaʻi ia pea ke fili ha toketā ʻe taha.

Ko e mālié, he ʻoku ʻi ai he taimí ni ʻa e laui ngeau ʻi he feituʻu fakafaitoʻo ʻo Pelēsilá ʻoku nau loto-lelei ke fai ha faitoʻo ʻikai ʻaki ʻa e totó ki heʻenau kau mahaki ʻoku nau kole iá. Talu mei he ongo seminā ʻi Maʻasi 1995, mo e lelei ange fakaofo ʻa e fāitaha ʻi he vahaʻa ʻo e kau toketaá, kau fakamāú, mo e Kau Fakamoʻoni ʻa Sihova ʻi Pelēsilá. ʻI he 1997, naʻe pulusi ai ʻi he makasini Pelēsila fakafaitoʻo ko e Âmbito Hospitalar ha kupu ʻoku fakamatematē ʻi he ngaahi totonu ʻa e Kau Fakamoʻoni ʻa Sihová ke tokaʻi honau tuʻunga ʻi he ʻīsiu totó. ʻOku ʻilolahia he taimí ni, ʻo hangē ko ia naʻe lau ki ai ʻa e Ngaahi Kautaha Fakafaitoʻo Fakavahe ki he ongo vahefonua ʻo Rio de Janeiro mo São Paulo, “ʻoku ʻikai totonu ke māʻolunga ange ʻa e fatongia ia ʻo e toketaá ke maluʻi ʻa e moʻui ʻa ʻene mahakí ʻi hono fatongia ke taukapoʻi ʻa e totonu ʻa e mahakí ke filí.”

[Fakamatala ʻi lalo]