Moʻui ʻo Fakatatau ki he Fakatapui Faka-Kalisitiané ʻi he Tauʻatāina
“ʻIlonga ha potu ʻoku ʻi ai ʻa e Laumalie ʻo e ʻEiki ʻoku ʻi ai ʻa e tauʻataina.”—2 KOLINITO 3:17.
1. Ko hai ʻoku fakatapui ki ai ʻa e Kau Fakamoʻoni ʻa Sihová, pea ko e hā ʻoku nau ngāueʻaki ai ʻa e ngaahi kautaha fakalaó?
ʻOKU tui ʻa e Kau Fakamoʻoni ʻa Sihová ko ʻenau lotú ʻe tuʻu ʻo taʻengata. Ko ia ai, ʻoku nau fakatuʻamelie atu ke ngāue ki he ʻOtuá ʻo taʻengata ʻo “fai ʻi laumālie pea fai ʻi moʻoni.” (Sione 4:23, 24) Koeʻuhi ko e kau fili tauʻatāina kinautolu ki he ʻulungāngá, ko e kau Kalisitiane ko ʻení kuo nau ʻosi fai ha fakatapui taʻefakangatangata kia Sihova ko e ʻOtuá pea ʻoku nau fakapapau ke moʻui ʻo fakatatau ki ai. Ke aʻusia iá, ʻoku nau falala ki he Folofola ʻa e ʻOtuá pea ʻi hono laumālie māʻoniʻoní. ʻI heʻenau tuli ʻaufuatō ki he ʻalunga ʻo ʻenau fakatapui faka-Kalisitiané ʻi he tauʻatāina foaki mei he ʻOtuá, ʻoku fakahāhā ʻe he Kau Fakamoʻoní ʻa e fakaʻapaʻapa ʻoku taau mo e ngafa ʻo e “ngaahi pule ʻoku maʻolunga” fakapuleʻangá pea mo ngāue totonuʻaki ʻa e ngaahi founga mo e ngaahi tokonaki fakalaó. (Loma 13:1; Semisi 1:25) Hangē ko ʻení, ʻoku ngāueʻaki ʻe he Kau Fakamoʻoní ʻa e Sōsaieti Taua Leʻó ko ha meʻangāue fakalao—ko e taha ʻi he ngaahi meʻa lahi ʻi he ngaahi fonua kehekehe—ke fakamafeia kinautolu ke fakahoko ʻenau ngāue ko ia ko hono tokoniʻi ʻa e kaungā faʻahinga ʻo e tangatá, tautefito ʻi he ngaahi founga fakalaumālié. Ka ʻoku fakatapui ʻa e Kau Fakamoʻoní ia ki he ʻOtuá, kae ʻikai ki ha faʻahinga kautaha fakalao, pea ko ʻenau fakatapui kia Sihová ʻe tuʻu ia ʻo taʻengata.
2. Ko e hā ʻoku mātuʻaki fakahoungaʻi ai ʻe he Kau Fakamoʻoni ʻa Sihová ʻa e Sōsaieti Taua Leʻó mo e ngaahi kautaha fakalao peheé?
2 Koeʻuhi ko e kau sevāniti kuo fakatapui ki he ʻOtuá, ko e Kau Fakamoʻoni ʻa Sihová kuo fakafatongiaʻaki ke muimui ki he ngaahi fakahinohino ko ia ʻa Sīsū ke “ngaohi ʻa e ngāhi kakai kotoa pe ko ʻeku kau ako, ʻi he papitaiso kinautolu ki he Huafa ʻo e Tamai mo e ʻAlo mo e Laumalie Maʻoniʻoni, mo e akoʻi kinautolu.” (Mātiu 28:19, 20) Ko e ngāué ni ʻe hokohoko atu ia kae ʻoua kuo ngata ʻa e fokotuʻutuʻu ʻo e ngaahi meʻá, he naʻe toe pehē ʻe Sīsū: “Pea ʻe ʻoua ke fanongonongo ki mamani katoa ʻa e ongoongolelei ko eni ʻo e puleʻanga, ke ai ha fakamatala ki he ngāhi kakai kotoa pe, pea toki hoko ʻa e ngataʻanga.” (Mātiu 24:3, 14) ʻI he taʻu taki taha, ʻoku tokonaki mai ʻe he ngaahi fale pulusi ʻo e Sōsaieti Taua Leʻó mo e ngaahi kautaha fakalao tatau ki he Kau Fakamoʻoni ʻa Sihová, ʻa e laui miliona ʻo e ngaahi Tohitapu, ngaahi tohi, ngaahi polosiua, mo e ngaahi makasini ke ngāueʻaki ʻi heʻenau ngāue fakamalanga ʻi māmani lahí. Ko ia ai, ko e ngaahi ʻotu meʻa fakalao ko ʻení ʻoku mahuʻinga ʻaupito ia ʻi hono tokoniʻi ʻa e kau sevāniti fakatapui ʻa e ʻOtuá ke nau moʻui ʻo fakatatau mo ʻenau fakatapui kiate iá.
3. ʻI he ʻuhinga fē naʻe ngāueʻaki ai ki muʻa ʻe he Kau Fakamoʻoni ʻa Sihová ʻa e kupuʻi lea “ko e Sōsaieti”?
3 ʻE kikihi nai ha taha ʻo pehē ko e founga ʻoku lea ai ʻa e Kau Fakamoʻoní ʻo fekauʻaki mo e Sōsaieti Taua Leʻó—pe taimi lahi ʻoku ui pē “ko e Sōsaieti”—ʻoku fakahaaʻi ai ʻoku nau vakai ki ai ʻo hulu ange ia ʻi ha meʻangāue fakalao pē. ʻIkai ʻoku nau fakakaukau ki ai ko e mafai fakaʻosi ia ʻi he ngaahi meʻa fakalotú? Ko e tohi Jehovah’s Witnesses—Proclaimers of God’s Kingdom ʻokú ne fakamahinoʻi ʻa e poini ko ʻení ʻaki ʻene fakamatalaʻi: “ʻI he taimi naʻe lave ai ʻa e The Watchtower [Sune 1, 1938] ki he ‘Sōsaietí,’ naʻe ʻuhinga ʻeni, ʻoku ʻikai ko ha meʻangāue fakalao pē, ka ko e kulupu ʻo e kau Kalisitiane pani kuo nau fokotuʻu ʻa e meʻa fakalao ko iá pea nau ngāueʻaki ia.”a Ko ia, ko e kupuʻi leá naʻá ne fakafofongaʻi “ae tamaioeiki agatonu mo boto.” (Mātiu 24:45, PM) Ko e ʻuhinga eni naʻe ngāue tefito ʻaki ki ai ʻe he Kau Fakamoʻoní ʻa e kupuʻi lea “ko e Sōsaieti.” Ko hono moʻoní, ko e kautaha fakalaó mo e “tamaioeiki agatonu mo boto” ʻoku ʻikai ko ha ongo hingoa ia ʻoku fefetongiʻaki. Ko e kau talēkita ʻo e Sōsaieti Taua Leʻó ʻoku fili, ka ko e Kau Fakamoʻoni ia ʻoku faʻuʻaki ʻa e ‘tamaioeiki agatonú’ ʻoku pani ia ʻaki ʻa e laumālie māʻoniʻoni ʻo Sihová.
4. (a) ʻOku anga-fēfē ʻa hono fakamatalaʻi ʻe he Kau Fakamoʻoni tokolahi kinautolu koeʻuhi ke kalofi ʻa e taʻefemahinoʻakí? (e) Ko e hā ʻoku totonu ai ke tau mafamafatatau ʻi he fekauʻaki mo e ngaahi kupuʻi lea fakalotú?
4 Koeʻuhi ke kalofi ʻa e taʻefemahinoʻakí, ʻoku feinga ʻa e Kau Fakamoʻoni ʻa Sihová ke nau tokanga ʻo fekauʻaki mo e anga ʻenau fakamatalaʻi kinautolú. ʻI he ʻikai ke pehē, “ʻoku akoʻi ʻe he Sōsaietí,” ko e Kau Fakamoʻoni tokolahi ʻoku nau saiʻia ange ke ngāueʻaki ʻa e ngaahi kupuʻi lea hangē ko e, “ʻoku pehē ʻe he Tohitapú” pe, “ʻoku mahino kiate au ʻoku akoʻi ʻe he Tohitapú.” ʻI he founga ko ʻení ʻoku nau fakamamafaʻi ai ʻa e fili fakafoʻituitui kuo fai ʻe he Fakamoʻoni taki taha ʻi hono tali ʻa e ngaahi akonaki ʻa e Tohitapú pea fakaʻehiʻehi foki ai mei hono fai ha fakafōtunga hala ʻo pehē ko e Kau Fakamoʻoní ʻoku haʻi kinautolu ki he ngaahi tuʻutuʻuni ʻo ha faʻahinga lotu mavahe. Ko e moʻoni, ko e ngaahi fokotuʻu fekauʻaki mo e ngaahi kupuʻi lea fakalotú ʻoku ʻikai ʻaupito totonu ke hoko ia ko e kaveinga ke fakakikihi ai. Ko hono moʻoní, ko e ngaahi kupuʻi lea fakalotú ʻoku mahuʻinga pē ia ʻi he tuʻunga ko ʻene taʻofi ʻa e ngaahi taʻefemahinoʻakí. ʻOku fiemaʻu ʻa e mafamafatatau faka-Kalisitiané. ʻOku akonekina mai kitautolu ʻe he Tohitapú “ke ʻoua . . . fakakikihi ʻi ha lea.” (2 Timote 2:14, 15) ʻOku toe fakahā ʻe he ngaahi Konga Tohitapú ʻa e tefitoʻi moʻoni ko ʻení: “ʻI he faiʻaki homou elelo, kapau ʻoku ʻikai te mou fai ha lea ʻoku ʻilongofua, ʻe ʻilo fefe ʻa e meʻa ʻoku lau?”—1 Kolinito 14:9.
Holoki ʻe he Laumālie ʻo e ʻOtuá ʻa e Fiemaʻu ʻo e Ngaahi Tuʻutuʻuní
5. ʻE mahinoʻi fēfē ʻa e 1 Kolinito 10:23?
5 “Ko e meʻa kotoa pe ʻoku ngofua, ka ʻoku ʻikai ʻaonga ʻa e meʻa kotoa pe,” ko e lau ia ʻa e ʻaposetolo ko Paulá. Naʻá ne tānaki atu: “Ko e meʻa kotoa pe ʻoku ngofua, ka ʻoku ʻikai ke fai ʻe he meʻa kotoa pe ha langa hake.” (1 Kolinito 10:23) ʻOku hā mahino naʻe ʻikai ʻuhinga ʻa Paula ia ʻoku ngofua ke fai ʻa e ngaahi meʻa ʻoku fakahalaʻi fakapatonu mai ʻe he Folofola ʻa e ʻOtuá. ʻI hono fakahoa ki he ngaahi lao ʻe 600 nai naʻe ʻoange ki ʻIsileli ʻo e kuonga muʻá, ʻoku mātuʻaki siʻisiʻi pē ʻi hono fakahoa atú ʻa e ngaahi fekau fakapatonu ia ʻokú ne puleʻi ʻa e moʻui faka-Kalisitiané. Ko ia ai, ko e ngaahi meʻa lahi ʻoku tuku pē ia ki he konisēnisi fakafoʻituituí. Ko ha taha kuó ne fai ha fakatapui kia Sihova ʻokú ne fiefia ʻi he tauʻatāina ʻoku iku atu ki ai mei hono tataki ʻe he laumālie ʻo e ʻOtuá. ʻI hono ʻai ʻa e moʻoní ko ʻene meʻa tonú, ʻoku muimui ai ha Kalisitiane ʻi hono konisēnisi kuo akoʻi faka-Tohitapú pea falala ai ki he tataki ʻa e ʻOtuá fou ʻi he laumālie māʻoniʻoní. ʻOku tokoni ʻeni ki he Kalisitiane fakatapuí ke fakapapauʻi ko e hā ʻe “langa hake” pea hoko ʻo “ʻaonga” kiate ia mo e niʻihi kehé. ʻOkú ne ʻiloʻi ko e ngaahi fili ʻokú ne faí ʻe uesia ai hono vahaʻangatae fakafoʻituitui mo e ʻOtuá, ʻa ia ʻokú ne fakatapui ki aí.
6. ʻI he ngaahi fakataha faka-Kalisitiané, ʻe lava fēfē ke tau fakahāhā kuo tau ʻai ʻa e moʻoní ko ʻetau meʻa tonu?
6 ʻOku fakahāhā ʻe ha Fakamoʻoni kuó ne ʻosi ʻai ʻa e moʻoní ko ʻene meʻa tonú ʻaki ʻene poupou ʻi he ngaahi fakataha faka-Kalisitiané. ʻI he kamatá, te ne lau pē nai ʻa e meʻa ʻoku ʻasi ʻi he tohi ko ia ʻoku akó. Ka ʻi he faai mai ʻa e taimí, te ne fakalakalaka ʻo aʻu ki ha tuʻunga te ne fakamatalaʻi ai ʻa e ngaahi akonaki faka-Tohitapú ʻi he lea pē ʻaʻaná. Te ne fakamoʻoniʻi leva ai ko iá ʻoku tupulekina ʻa ʻene mafai fakaefakakaukaú, ʻo ʻikai ko hano toe leaʻaki pē ʻa e meʻa kuo leaʻaki ʻe he niʻihi kehé. Ko hono faʻu ʻa e ngaahi fakakaukaú ʻi heʻene lea pē ʻaʻaná pea fakamatalaʻi ʻa e ngaahi lea totonu ʻo e moʻoní ʻi ha founga tupu mei he lotó, ʻe ʻomi ai kiate ia ʻa e fiefia pea fakahā ai kuó ne tui pau ʻi he fakakaukau tonu pē ʻaʻaná.—Koheleti 12:10; fakafehoanaki mo Loma 14:5e.
7. Ko e hā ʻa e ngaahi fili kuo fai tauʻatāina ʻe he kau sevāniti ʻa Sihová?
7 ʻOku ueʻi ʻa e Kau Fakamoʻoni ʻa Sihová ʻe he ʻofa ki he ʻOtuá pea mo honau kaungā faʻahinga ʻo e tangatá. (Mātiu 22:36-40) Ko e moʻoni, ʻoku fakafāʻūtahaʻi kinautolu ʻe he haʻi ʻo e ʻofa faka-Kalaisí ko ha kautaha ʻa e fanga tokoua ʻi māmani lahi. (Kolose 3:14; 1 Pita 5:9) Ka koeʻuhi ko e fili tauʻatāina ki he ʻulungāngá, kuo fakapapau fakafoʻituitui ai ʻa e tokotaha taki taha ke talaki ʻa e ongoongo lelei ʻo e Puleʻanga ʻo e ʻOtuá, ke tuʻu ʻatā fakapolitikale ai pē, ke fakaʻehiʻehi mei he totó, ke fakaʻehiʻehi mei he faʻahinga fakafiefia ʻe niʻihi, pea ke moʻuiʻaki ʻa e ngaahi tuʻunga faka-Tohitapú. ʻOku ʻikai ke fakamālohiʻi ʻa e ngaahi fili ko ʻení kiate kinautolu. Ko e ngaahi fili ia ʻoku tō ʻi loto ʻi he faʻunga ʻo ha founga moʻui kuo fili tauʻatāina ki ai ʻe he faʻahinga ʻoku ala lava ke hoko ko e Kau Fakamoʻoní, ki muʻa ia pea faifai ange kuo nau laka ʻi he sitepu ʻo e fakatapui faka-Kalisitiané.
Fai ha Fakamatala ki ha Kulupu Pule?
8. Ko e hā ʻa e fehuʻi ʻoku fiemaʻu ke fakamahinoʻí?
8 ʻOku fakahā mahino ʻe he Tohitapú ko e kau Kalisitiane moʻoní ʻoku ʻikai te nau tauhi ʻa e ʻOtuá ʻi hano fakamālohiʻi. ʻOkú ne pehē: “Ko e ʻEiki ko eni ko e Laumalie: pea ʻilonga ha potu ʻoku ʻi ai ʻa e Laumalie ʻo e ʻEiki ʻoku ʻi ai ʻa e tauʻataina.” (2 Kolinito 3:17) Ka ʻe lava fēfē ke fetāiaki ʻa e moʻoni ko ʻení mo e fakakaukau ko ia ki ha “tamaioeiki agatonu mo boto” mo ʻene Kulupu Pulé?—Mātiu 24:45-47, PM.
9, 10. (a) ʻOku anga-fēfē ʻa hono ngāueʻaki ʻa e tefitoʻi moʻoni ʻo e tuʻunga-ʻulú ʻi he fakatahaʻanga Kalisitiané? (e) Ko e hā naʻe fiemaʻu ai ʻa e muimui ki he tefitoʻi moʻoni ʻo e tuʻunga-ʻulú ʻi he fakatahaʻanga Kalisitiane ʻo e ʻuluaki senitulí?
9 Ke tali ʻa e fehuʻi ko ʻení, kuo pau ke tau manatuʻi ʻa e tefitoʻi moʻoni faka-Tohitapu ko ia ʻo e tuʻunga-ʻulú. (1 Kolinito 11:3) ʻI he Efeso 5:21-24, ʻoku fakaʻilongaʻi ai ʻa Kalaisi ko e “ʻulu ʻo e siasi,” ʻa e tokotaha “ʻoku anganofo” ki aí. ʻOku mahino ki he Kau Fakamoʻoni ʻa Sihová ko e tamaioʻeiki anga-tonu mo potó ʻoku faʻuʻaki ia ʻa e ngaahi tokoua fakalaumālie ʻo Sīsuú. (Hepelu 2:10-13) Ko e kalasi tamaioʻeiki ko ʻení kuo fakanofo ia ke tokonaki ki he kakai ʻa e ʻOtuá ʻa e meʻakai fakalaumālie “ʻi hono taimi totonu.” ʻI he taimi ko ʻeni ʻo e ngataʻangá, kuo fakanofo ʻe Kalaisi ʻa e tamaioʻeiki ko ʻení “ke ne pule ki heʻene ngāhi meʻa kotoa.” Ko ia ai, ko hono tuʻungá ʻoku tuha ia mo e fakaʻapaʻapa ʻa ha taha pē ʻoku taku ko ha Kalisitiane.
10 Ko e taumuʻa ʻo e tuʻunga-ʻulú ko hono tauhi maʻu ʻa e fāʻūtahá pea fakapapauʻi ko e “meʻa kotoa pe ke fai ke tāu mo māu.” (1 Kolinito 14:40) Ke aʻusia ʻa e meʻá ni ʻi he ʻuluaki senitulí, naʻe fili ai ha niʻihi ʻo e kau Kalisitiane paní mei he kalasi tamaioʻeiki anga-tonu mo potó ke fakafofongaʻi ʻa e kulupú fakakātoa. Hangē ko ia kuo fakamoʻoniʻi ʻe he ngaahi meʻa hokohoko mai aí, ko e pule naʻe fakahoko ʻe he kulupu pule ko ʻeni ʻo e ʻuluaki senitulí naʻa nau maʻu ʻa e hōifua mo e tāpuaki ʻa Sihová. Naʻe tali fiefia ʻe he kau Kalisitiane ʻo e ʻuluaki senitulí ʻa e fokotuʻutuʻú. ʻIo, naʻa nau talitali moʻoni pea nau fakamālōʻia ʻi he ngaahi ola lelei naʻá ne tokonaki maí.—Ngāue 15:1-32.
11. ʻOku totonu ke anga-fēfē ʻa e vakai ki he Kulupu Pule ʻo e ʻaho ní?
11 Ko e mahuʻinga ʻo ha faʻahinga fokotuʻutuʻu pehē ʻoku kei ʻi aí ni. ʻI he lolotongá ni, ko e Kulupu Pule ʻa e Kau Fakamoʻoni ʻa Sihová ʻoku faʻuʻaki ia ʻa e kau Kalisitiane pani ʻe toko hongofulu, kuo nau foua kotoa mai ʻa e taukei faka-Kalisitiane ʻi he laui hongofuluʻi taʻu. ʻOku nau ʻoatu ʻa e fakahinohino fakalaumālie ki he Kau Fakamoʻoni ʻa Sihová, ʻo hangē ko ia naʻe fai ʻe he kulupu pule ʻo e ʻuluaki senitulí. (Ngāue 16:4) Hangē pē ko e muʻaki kau Kalisitiané, ʻoku hanga fiefia ʻa e Kau Fakamoʻoní ki he fanga tokoua matuʻotuʻa ʻo e Kulupu Pulé ki he fakahinohino mo e tataki makatuʻunga ʻi he Tohitapú ʻi he ngaahi meʻa fekauʻaki mo e lotú. Neongo ko e kau mēmipa ʻo e Kulupu Pulé ko e kau tamaioʻeiki ia ʻa Sihova pea mo Kalaisi, ʻo hangē pē ko honau kaungā Kalisitiané, ʻoku fakahinohino mai kitautolu ʻe he Tohitapú: “Mou tuitala ki he kau tuʻukimuʻa ʻomoutolu, pea fakavaivai kiate kinautolu; he ko kinautolu ia ʻoku nau ʻā ke leʻohi homou laumalie, he ko kinautolu te nau fakamatala kimoutolu ʻamui; koeʻuhiā ke nau fai fiefia ʻenau ngaue ko ia, ʻo ikai fai mo e toʻe: he ʻe taeʻaonga ia kiate kimoutolu.”—Hepelu 13:17.
12. Ko hai kuo pau ke fai ki ai ʻe he Kalisitiane taki taha ha fakamatala?
12 ʻOku ʻuhinga ʻa e tuʻunga-pule ʻoku fakanofo ʻe he ngaahi Konga Tohitapú ki he Kulupu Pulé, ko e tokotaha taki taha ʻo e Kau Fakamoʻoni ʻa Sihová kuo pau ke ne fai ki ai ha fakamatala ʻo kau ki heʻene ngaahi ngāué? ʻOku ʻikai ke pehē ia fakatatau ki he ngaahi lea ʻa Paula ki he kau Kalisitiane ʻi Lomá: “Ko e ha ʻoku ke angaʻi ai ho tokoua na? ʻio, mo koe na, ko e ha ʻoku ke taʻetokaʻi ai ho tokoua na? he te tau hopo kotoa pe ʻi he fakamāuʻanga ʻo e ʻOtua . . . Te tau taki taha fai ha fakamatala ki he ʻOtua maʻata.”—Loma 14:10-12.
13. Ko e hā ʻoku līpooti ai ʻe he Kau Fakamoʻoni ʻa Sihová ʻenau ngāue fakamalangá?
13 Kae kehe, ʻikai ʻoku moʻoni, ko e Kau Fakamoʻoni taki taha ʻoku ʻamanekina ke nau līpooti ʻenau ngāue fakamalangá? ʻIo, ka ko e taumuʻa ʻo e meʻá ni ʻoku fakamatala mahino ia ʻi ha tohi fakamatala ʻa e Kau Fakamoʻoní ʻa ia ʻoku pehē: “Ko e muʻaki kau muimui ʻo Sīsū Kalaisí naʻa nau mahuʻingaʻia ʻi he ngaahi līpooti ʻo e fakalakalaka ʻi he ngāue fakamalangá. (Maake 6:30) ʻI he lakalakaimonū ʻa e ngāué, naʻe fakatahatahaʻi ʻa e ngaahi līpooti tohi kakai fakataha mo e ngaahi fakamatala ʻo e ngaahi meʻa tuʻu-ki-muʻa naʻe hokosia ʻe he faʻahinga naʻa nau kau ʻi hono malangaʻi ʻo e ongoongo leleí. . . . (Ngāue 2:5-11, 41, 47; 6:7; 1:15; 4:4) . . . He meʻa fakalototoʻa moʻoni ia ki he kau ngāue anga-tonu Kalisitiane ko iá ke fanongo ki he ngaahi līpooti ʻo e meʻa naʻe lava ʻo fakahokó! . . . ʻI he founga tatau, ʻoku feinga ʻa e kautaha ʻi onopooni ʻa Sihová ke tauhi ha ngaahi lēkooti totonu ʻo e ngāue ʻoku fai ʻi hono fakahoko ʻo e Mātiu 24:14.”
14, 15. (a) ʻOku anga-fēfē ʻa hono ngāueʻaki ʻo e 2 Kolinito 1:24 ki he Kulupu Pulé? (e) Kuo pau ke makatuʻunga ʻi he hā ʻa e ngaahi fili ʻoku fai fakafoʻituitui ʻe he Kalisitiane tāutaha, ʻi hono ʻiloʻi ʻo e foʻi moʻoni fē?
14 Ko e Kulupu Pulé ko ha tokonaki anga-ʻofa ia mo ha faʻifaʻitakiʻanga ʻo e tuí ʻoku taau ke faʻifaʻitaki ki ai. (Filipai 3:17; Hepelu 13:7) ʻI heʻenau pīkitai mo muimui ʻia Kalaisi ko e faʻifaʻitakiʻangá, ʻoku lava ke nau fakaongo atu ʻa e ngaahi lea ʻa Paulá: “Ka ʻoku ʻikai ko ʻeku pehe ʻoku ʻamautolu ke pule ki hoʻomou tui: kae kehe ko e kau tokoni pe kimautolu ki he langaʻi ʻo hoʻomou fiefia. Seuke, ko e meʻa ki he tui ʻoku mou tuʻu.” (2 Kolinito 2:2 [1:24, PM]) ʻI hono siofi ʻa e ngaahi ʻalungá, ʻoku tohoaki ai ʻe he Kulupu Pulé ʻa e tokangá ki he ngaahi ʻaonga ʻo e tokanga ki he akonaki ʻa e Tohitapú, ʻomai ʻa e ngaahi fokotuʻu fekauʻaki mo hono ngāueʻaki ʻo e ngaahi lao mo e ngaahi tefitoʻi moʻoni Fakatohitapú, fakatokanga fekauʻaki mo e ngaahi faingataʻa pulipuliá, pea tokonaki ki hono “kau tokoni” ʻa e fakalototoʻa ʻoku fiemaʻú. ʻOkú ne fakahoko ai hono tuʻunga setuata faka-Kalisitiané, tokoniʻi kinautolu ke tauhi maʻu ʻenau fiefiá, mo langa hake kinautolu ʻi he tuí koeʻuhiā ke nau lava ʻo tuʻumaʻu.—1 Kolinito 4:1, 2; Taitusi 1:7-9.
15 Kapau ʻe fai ʻe ha Fakamoʻoni ha ngaahi fili ʻo makatuʻunga ʻi he akonaki Fakatohitapu ʻoku ʻomai ʻe he Kulupu Pulé, ʻokú ne fai ia ʻi he fili pē ʻaʻana, koeʻuhí ko ʻene ako tonu ʻa e Tohitapú kuo fakatui pau ai ia ko e ʻalunga totonu ʻeni. ʻOku tākiekina ʻa e Fakamoʻoni taki taha ʻe he Folofola tonu ʻa e ʻOtuá ke ngāueʻaki ʻa e akonaki faka-Tohitapu totonu ʻoku ʻomai ʻe he Kulupu Pulé, ʻi he ʻiloʻi pau ko e ngaahi fili ʻokú ne faí ʻe uesia ai hono vahaʻangatae fakafoʻituitui mo e ʻOtuá, ʻa ia ʻokú ne fakatapui ki aí.—1 Tesalonaika 2:13.
Kau Ako mo e Kau Sōtia
16. Neongo ko e ngaahi fili fekauʻaki mo e ʻulungāngá ko ha meʻa fakafoʻituitui, ko e hā ʻoku tuʻusi ai ʻa e niʻihi ia?
16 Ka ʻo kapau ko e ngaahi fili fekauʻaki mo e ʻulungāngá ko ha meʻa fakafoʻituitui, ko e hā ʻoku tuʻusi ai ʻa e niʻihi ia ʻo e Kau Fakamoʻoni ʻa Sihová? ʻOku ʻikai ha taha te ne fakapapauʻi fakaefakamaau ʻo pehē ko hono fai ha faʻahinga angahala pau ʻoku fiemaʻu ia ke tuʻusi. Ka, ko e tōʻongafai ko ení ko e fiemaʻu faka-Tohitapu ia ʻi he taimi pē ʻoku kau taʻefakatomala atu ai ha mēmipa ʻo e fakatahaʻangá ʻi ha ngaahi angahala mamafa, ʻo hangē ko ia ko e ngaahi meʻa ʻoku fakalautelau mai ʻi he vahe hono 5 ʻo e ʻUluaki Kolinitoó. Ko ia ai, lolotonga ʻe tuʻusi nai ha Kalisitiane ʻi hano fai ʻo e feʻauakí, ʻe hoko pē ʻeni kapau ʻoku fakafisi ʻa e toko tahá ke tali ʻa e tokoni fakalaumālie ʻa e kau tauhi-sipi anga-ʻofá. ʻOku ʻikai ko e Kau Fakamoʻoni pē ʻa Sihová ʻoku nau muimui ʻi he tōʻonga faka-Kalisitiane ko ʻení. ʻOku pehē ʻe he The Encyclopedia of Religion: “ʻOku maʻu ʻe ha feohiʻanga pē ʻa e totonu ke ne maluʻi ia mei he kau mēmipa angatuʻu ko ia ʻe fakatuʻutāmaki nai ki he lelei fakalūkufuá. ʻI ha fokotuʻutuʻu fakalotu ko e totonu ko ʻení kuo faʻa fakamālohiʻiʻaki ʻa e tui ko e tauteá [ʻa e tuʻusí] ʻokú ne uesia ʻa e tuʻunga ʻo ha taha ʻi he ʻao ʻo e ʻOtuá.”
17, 18. ʻOku fakatātaaʻi fēfē nai ʻa e totonu ʻa hono fai ʻo e tuʻusí?
17 Ko e Kau Fakamoʻoni ʻa Sihová ko e kau ako ia ʻo e Tohitapú. (Siosiua 1:8; Sāme 1:2; Ngāue 17:11) Ko e polokalama ʻo e ako Fakatohitapu ʻoku tokonaki mai ʻe he Kulupu Pulé ʻe fakahoa nai ia ki ha ngaahi lēsoni ʻa ha akoʻanga ʻoku fokotuʻutuʻu mai ʻe he poate ʻo e akó. Neongo ʻoku ʻikai ko e poaté tonu ia ʻa e matavai ʻo e ngaahi meʻa ʻoku akoʻí, ʻokú ne fokotuʻutuʻu ʻe ia ʻa e ngaahi lēsoní, fakapapauʻi ʻa e founga ʻo e fakahinohinó, pea tokonaki ʻa e ngaahi tataki ʻoku fiemaʻú. Kapau ʻe fakafisi mataʻāʻā ha taha ke moʻui ʻo fakatatau ki he ngaahi fiemaʻu ʻa e potungāué, fakatupu ha faingataʻa ki he kaungāakó, pe fakamaaʻi ʻa e akó, ʻe lava ke tuli ia. ʻOku maʻu ʻe he kau maʻu mafai ki he akó ʻa e totonu ke fai ha meʻa maʻá e lelei fakalūkufua ʻa e fānau akó.
18 Tuku kehe ʻenau hoko ko e kau akó, ʻoku hoko ʻa e Kau Fakamoʻoni ʻa Sihová ko e kau sōtia ʻa Sīsū Kalaisi, kuo fakahinohinoʻi ke “tau ʻa e tau lelei ʻo e tui.” (1 Timote 6:12; 2 Timote 2:3) ʻI hono totonú, ko ha kīvoi ʻi ha tōʻonga taʻengali mo ha sōtia Kalisitiane ʻe fakatupu nai ai ha taʻehōifua fakaʻotua. Koeʻuhi ko ha tokotaha ia kuo fakakoloaʻaki ʻa e tauʻatāina ke filí, ʻoku lava ʻe ha sōtia Kalisitiane ke fili ʻo hangē ko ia ko ʻene ngaahi fakaʻamú, ka kuo pau ke ne fuesia ʻa e ngaahi nunuʻa ʻo ʻene filí. ʻOku fakaʻuhinga ʻa Paula: “Ka ko ha sotia ʻoku moʻua ʻi he tau, talaʻehai te ne tuku ke ne fihia ʻi he ngaahi moʻua ʻo e moʻui ni, koeʻuhi ke hohóʻia ʻiate ia ʻa e ʻeiki naʻe fokotuʻu ia ki he tau. Kaeʻumaʻā, ka ko ha taha ʻoku kau ʻi ha feʻauhi, talaʻehai ʻoku fakapaleʻi ia ʻo kapau ʻoku ʻikai te ne fai ʻo hange ko e lao.” (2 Timote 2:4, 5) Ko e kau Kalisitiane matuʻotuʻá, kau ai ʻa kinautolu ʻi he Kulupu Pulé, ʻoku nau nofo maʻu fakaʻaufuli ʻi he faʻiteliha ʻa honau Takí, ʻa Sīsū Kalaisi, ʻo tauhi ʻa e “lao” koeʻuhí ka nau lava ʻo maʻu ʻa e pale ʻo e moʻui taʻengatá.—Sione 17:3; Fakahā 2:10.
19. ʻI hono sivisiviʻi ʻa e ngaahi moʻoni fekauʻaki mo e fakatapui faka-Kalisitiané, ko e hā ʻoku lava ke tau fakapapauʻí?
19 ʻIkai ʻoku fakahā mahino ʻe he ngaahi moʻoniʻi meʻá ko e Kau Fakamoʻoni ʻa Sihová ko e kau sevāniti ʻa e ʻOtuá, ʻikai ko e tamaioʻeiki ʻa e tangatá? Koeʻuhi ko e kau Kalisitiane kuo fakatapuí ʻoku nau fiefia ʻi he tauʻatāina ʻa ia naʻe fakatauʻatāinaʻi kinautolu ki ai ʻe Kalaisí, ʻoku nau fakaʻatā ʻa e laumālie ʻo e ʻOtuá mo ʻene Folofolá ke ne puleʻi ʻenau moʻuí ʻi heʻenau ngāue fāʻūtaha mo honau fanga tokouá ʻi he fakatahaʻanga ʻa e ʻOtuá. (Sāme 133:1) Ko e ngaahi fakamoʻoni ʻo e meʻá ni ʻoku totonu ke ne toe tāmateʻi ha filifilingaua pē fekauʻaki mo e matavai ʻo honau mālohí. Fakataha mo e tokotaha-tohi-sāmé, ʻoku lava ke nau hiva: “Ko Sihova ʻa hoku malohinga mo fakaū; naʻe falala ki ai ʻa hoku loto, pea kuo tokonia au: Ko ia ʻoku meʻe hopohopo hoku loto; pea te u fai ʻaki ʻeku hiva ni hono fakamālō.”—Sāme 28:7.
[Fakamatala ʻi lalo]
a Naʻe pulusi ʻi he 1993 ʻe he Watchtower Bible and Tract Society of New York, Inc.
ʻE Fēfē Haʻo Tali?
◻ ʻOku tokoniʻi fēfē ʻe he Sōsaieti Taua Leʻó mo e ngaahi kautaha fakalao peheé ʻa e Kau Fakamoʻoni ʻa Sihová?
◻ ʻOku maʻu ʻaonga fēfē ʻa e kau Kalisitiané mei he ngafa ʻo e Kulupu Pule ʻo e Kau Fakamoʻoni ʻa Sihová?
◻ Ko e hā ʻoku līpooti ai ʻe he kakai ʻa Sihová ʻenau ngāue fakamalangá?
◻ ʻI he malumalu ʻo e ngaahi tuʻunga fē ʻoku feʻungamālie ai ʻa hono tuʻusi ha Kalisitiane kuo fakatapui?
[Fakatātā ʻi he peesi 19]
Ko e kulupu pule ʻi he ʻuluaki senitulí naʻa nau tauhi maʻu ʻa e fāʻūtaha ʻo e tokāteliné
[Fakatātā ʻi he peesi 23]
Takatakai ʻi he māmaní, ʻoku fiefia ʻa e Kau Fakamoʻoni ʻa Sihová ʻi he tauʻatāina ko ia naʻe fakatauʻatāinaʻi kinautolu ki ai ʻe Kalaisí