Ako mei he Ngaahi Fehālaaki he Kuohilí
KO E ngaahi lao fakaeʻulungaanga ʻa hotau Tokotaha-Fakatupú ʻoku taʻengata mo taʻemaliliu. ʻI he ʻuhingá ni ko e tefitoʻi moʻoni kuo maʻu ʻi he Kaletia 6:7 ʻoku ngāueʻaki ia ʻi he ʻahó ni: “ʻIlonga pe meʻa ʻoku to ʻe ha tangata, ko ia ia te ne utu foki.” Ko e moʻoni, ʻe fakaʻikaiʻi nai ʻe ha tokotaha ʻa e pau ke fai ha fakamatala ki he ʻOtuá, ka ʻoku kei tuʻumaʻu pē ʻa e lao fakaʻotuá. ʻOku ʻikai leva ha tangata ʻe hao mei he ngaahi nunuʻa ʻo ʻene ngaahi tōʻongá.
Fēfē leva kapau ko ha tokotaha ʻokú ne moʻui talangataʻa peá ne toki liliu, ʻo hoko ko ha sevāniti ʻa e ʻOtuá? ʻE kei pau pē nai ke ne feʻao mo e ngaahi nunuʻa ʻo ʻene founga moʻui ki muʻá. Kae kehe, ʻoku ʻikai ke ʻuhinga ʻení kuo ʻikai ke fakamolemoleʻi ia ʻe he ʻOtuá. Naʻe ʻomai ʻe he vā fakaetono ʻa Tuʻi Tēvita mo Patisepá ha faingataʻa lahi ki heʻene moʻuí. Naʻe ʻikai lava ke ne hao mei heni. Ka naʻá ne ʻosi fakatomala, pea naʻá ne ʻosi maʻu ʻa e fakamolemole ʻa e ʻOtuá.—2 Samiuela 12:13-19; 13:1-31.
Kuó ke teitei ongoʻi loto-siʻi ʻi he taimi ʻokú ke faingataʻaʻia ai ʻi ha ngaahi fehālaaki kuó ke fai? Kapau naʻe vakai ki ai ʻi he founga totonú, ko e ongoʻi fakatomalá ʻe lava ke tokoni ia ko ha fakamanatu kiate kitautolu ke ‘tau tokanga: ʻoua te tau hinga ki he koví.’ (Siope 36:21) ʻIo, ko e ongoʻi fakatomalá ʻe lava ke ne tokoniʻi kitautolu ke fakaʻehiʻehi mei hano toutou fai ʻo ha hala. Ko e toe lelei angé, naʻe ngāueʻaki ʻe Tēvita ʻa e taukei naʻe maʻu mei he angahala naʻá ne faí ke ʻaonga ʻo ʻikai ngata pē kiate ia ka ki he niʻihi kehé foki. Naʻá ne pehē: “Te u toki ako ho ngaahi hala ki he kau talangataʻa; pea ʻe foki kiate koe ʻani kau angahala.”—Sāme 51:13.
[Fakatātā ʻi he peesi 7]
Naʻe ako ʻa Tēvita mei heʻene faiangahala mo Patisepá