Ngaahi Fehuʻi mei he Kau Lautohí
Ko e hā naʻe ʻikai fakapoongi ai ʻa Tēvita mo Patisepa ʻi heʻena fakahoko ʻa e tonó, lolotonga ia naʻe mate ʻa hona foha naʻe toki fanauʻí?
Naʻe tuʻutuʻuni ʻi he Lao ʻa Mōsesé: “Ka maʻu ha tangata ʻoku ne mohe mo ha fefine alafia, te na mate pe fakatouʻosi, ʻa e tangata naʻe mohe mo e fefine, pea mo e fefine: ka ke ʻave ai ʻa e kovi mei Isileli.” (Teutalonome 22:22) Kapau naʻe fakaʻatā ʻe Sihova ko e ʻOtuá ʻa e keisi fakaefakamaau ʻo e angahala ʻa Tēvita mo Patisepá ke ngāue ki ai ʻa e kau fakamaau fakaetangatá ʻi he malumalu ʻo e Laó, naʻe mei fakapoongi ai ʻa e ongo meʻa tonó. Koeʻuhi naʻe ʻikai lava ʻa e kau fakamaau fakaetangatá ke ʻiloʻi ʻa e lotó, naʻe pau ke nau fakahoko ʻa e fakamāú makatuʻunga ʻi he tōʻonga ʻa e kau faihalá hangē ko ia ʻoku ʻomai ʻe he ngaahi moʻoniʻi meʻá. Ko ha tōʻonga ʻo e tonó naʻe fiemaʻu ai ʻa e tautea mate. Naʻe ʻikai fakamafaiʻi ʻa e kau fakamaau ʻIsilelí ke nau fakamolemoleʻi ʻa e angahala ko iá.
ʻI he tafaʻaki ʻe tahá, ko e ʻOtua moʻoní ʻoku lava ke ne ʻafioʻi ʻa e lotó pea fakamolemoleʻi ʻa e ngaahi angahalá kapau ʻokú ne ʻafioʻi ha makatuʻunga ke fai pehē. Koeʻuhi ko e keisí naʻe fekauʻaki mo Tēvita, ʻa ia naʻá Ne fai ʻa e fuakava mo ia ki he Puleʻangá, naʻe fili ai ʻe Sihova ha tuʻunga kehe, ʻo ne fakamāuʻi ʻe ia tonu ʻa e meʻá ni. (2 Samiuela 7:12-16) Ko e “Tuʻi Fakamāu ʻo mamani katoa” ʻokú ne maʻu ʻa e totonu ke fai ha fili pehē.—Senesi 18:25.
Ko e hā naʻe ʻafioʻi ʻe Sihova ʻi heʻene sivisiviʻi ʻa e loto ʻo Tēvitá? Ko e fakamatala ʻi ʻolunga ki he Sāme 51 ʻoku pehē ai ʻoku fakahaaʻi ʻe he sāmé ni ʻa e ngaahi ongoʻi ʻa Tēvitá “ʻi he ʻalu kiate ia ʻa e palofita ko Nētane, hili ʻene ʻalu kia Patisepa.” ʻOku fakahaaʻi ʻi he Sāme 51:1-4: “Ke ke mēsi kiate au, ʻe ʻOtua, he ko ho tau ʻa e manavaʻofa: ke ke tamateʻi ʻeku ngaahi angahala ke hoa mo e lahi ʻo hoʻo ʻaloʻofa. Ke ke matuʻaki fo au mei heʻeku hia, pea ʻai ke u maʻa mei heʻeku angahala. He ʻoku ou ʻiloʻi ʻeku talangataʻa, pea ʻoku ma feʻao maʻu pe mo ʻeku angahala. Ko koe—ko koe pe kuo u angahala ki ai: pea kuo u fai ʻa e meʻa ʻoku kovi ʻi hoʻo vakai.” Kuo pau pē naʻe vakai ʻa Sihova ki he mamahi lahi ko eni ʻi he loto ʻo Tēvitá ko ha fakamoʻoni ia ʻo e fakatomala moʻoni peá ne fakapapauʻi ai naʻe ʻi ai ha makatuʻunga ki hono fakahaaʻi ʻa e meesi ki he ongo faihalá. ʻIkai ngata aí, ko Tēvitá tonu ko ha tokotaha naʻe mohu meesi pea ʻoku fakahaaʻi ʻe Sihova ʻa e meesi ki he kau mohu mēsí. (1 Samiuela 24:4-7; Mātiu 5:7; Semisi 2:13) Ko ia, ʻi he taimi naʻe fakahaaʻi ai ʻe Tēvita ʻa ʻene angahalá, naʻe tala ange ʻe Nētane kiate ia: “Kuo ave foki e Jihova a hoo agahala; e ikai te ke mate.”—2 Samiuela 12:13, PM.
Ko Tēvita mo Patisepá naʻe ʻikai pau te na hao mei he ngaahi nunuʻa kotoa ʻo ʻena angahalá. “Ko eni, kuo ke tuku ʻi he ngaue na ha tuʻunga ke lauʻikovi ai ʻa Sihova,” ko e tala ange ia ʻe Nētane kia Tēvitá, “ko ia foki ko e tamasiʻi kuo fanauʻi kiate koe ʻe mate ia.” Naʻe hoko ʻo puke ʻa ʻena tamá pea mate neongo ʻa e ʻaukai mo e fakamamahi hokohoko ʻa Tēvita ʻo feʻunga mo e ʻaho ʻe fitú.—2 Samiuela 12:14-18.
ʻOku faingataʻa ki he niʻihi ke nau mahinoʻi ʻa e ʻuhinga naʻe pau ke mate ai ʻa e fohá, koeʻuhi ʻoku pehē ʻi he Teutalonome 24:16: “ʻE ʻikai mate ʻa e fanau koeʻuhi ko e matuʻa.” Ka kuo pau ke tau manatuʻi kapau ko e keisí naʻe ngāue ki ai ha kau fakamaau fakaetangata, ne mei mole ʻa e moʻui ʻa e ongo mātuʻá pea pehē foki ki he tama ne teʻeki ai fanauʻi ʻi manavá. Ko e mole ʻa e fohá naʻe tokoniʻi nai ai ʻa Tēvita ke ne ʻiloʻi lelei ange ʻa e anga ʻo e taʻehōifua ʻa Sihova ki heʻene angahala mo Patisepá. ʻE lava ke tau tuipau naʻe feangainga faitotonu ʻa Sihova mo e meʻá ni, he “ko hono ʻalunga ʻoku haohaoa.”—2 Samiuela 22:31.
[Fakatātā ʻi he peesi 31]
Naʻe fakahāhā ʻe Tēvita ʻa e fakatomala moʻoni