Ngaahi Fehuʻi mei he Kau Lau Tohí

Fakatatau ki he Mātiu 17:​20, naʻe ʻikai ke malava ʻa e kau ʻapositoló ke fakamoʻui ha tamasiʻi naʻe puke ‘koeʻuhi pe ko ʻenau tui vaivaí.’ Kae kehe, ʻi he Maake 9:​29, ko ʻenau taʻemalavá ʻoku fakafehokotaki ia ki ha fiemaʻu ke lotu. Ko e hā ʻoku ʻomai ai ʻa e ongo ʻuhinga kehekehe ʻi he ongo fakamatala kehekehe ʻi he Kōsipelí?

Ko hono moʻoní, ko e ongo fakamatalá ʻokú na fefakakakatoʻaki, ʻo ʻikai ke fepakipaki. ʻUluakí, sio angé ki he Mātiu 17:​14-​20. Naʻe fakahaaʻi mai ai ʻe ha tangata ko hono fohá naʻe mahaki-moa pea naʻe ʻikai lava ke fakamoʻui ʻe he kau ākonga ʻa Sīsuú ʻa e tamá. Naʻe toki fakamoʻui leva ʻe Sīsū ʻa e tamasiʻí ʻaki ʻene kapusi ha tēmeniō ʻa ia naʻá ne fakamamahiʻi ia. Naʻe ʻeke ange ʻe he kau ākongá ʻa e ʻuhinga naʻe ʻikai te nau lava ai ʻo kapusi ʻa e tēmenioó. Fakatatau ki he fakamatala ʻa Mātiú, naʻe tali ange ʻe Sīsū: “Koeʻuhi pe ko hoʻomou tui vaivai: he ko au e, ʻoku ou tala atu Ka, ne ai haʻamou tui, ʻo tatau mo ha foʻi tengaʻi musita hono lahi, te mou pehe ki he moʻunga ni, Hiki mei heni ki hena; pea ʻe hiki; pea ʻoku ʻikai ha meʻa ʻe faingataʻa kiate kimoutolu.”​—Fakaʻītali ʻamautolu.

Sai huke angé ki he Maake 9:​14-​29, ʻa ia te tau maʻu ai ha fakaikiiki lahi ange. Ko e fakatātaá, ʻoku ʻomai ʻe he Maake 9:​17 ʻa e fakaikiiki ʻi he tuʻunga ko ʻení ko e faʻahinga puke ʻi he mahaki-moá naʻe fakatupunga ia ʻe ha laumālie ʻuli. ʻOku taau ke fakatokangaʻi ʻi ha konga kehe, naʻe fakamoʻui ʻe Sīsū ʻa e kakai naʻe mahaki-moa mo e kakai naʻe maʻu ʻe he tēmenioó. (Mātiu 4:​24) ʻI he tuʻunga makehe ko ʻení, ko e puké naʻe fakatupunga ia ʻe ha “laumālie tuli mo noa,” ʻa ia, ko ha laumālie fulikivanu, ʻa ia naʻe fakapapauʻi ʻe he toketā ko Luké. (Luke 9:​39; Kolose 4:14) Fakatokangaʻi ʻi he Maake 9:​18 ʻa e kupuʻi lea, “Ko e fe ha potu ʻe puke ai ʻe he [faʻahikehe].” Ko ia, naʻe ʻikai ke fakahohaʻasi hokohoko ʻa e tamasiʻí ʻe he tēmenioó, kae fakataimi pē. Neongo ia, naʻe ʻikai lava ʻe he kau ākongá ʻo kapusi ʻa e tēmenioó pea fakamoʻui ai ʻa e tamá. ʻI heʻenau ʻeke hono ʻuhingá, naʻe tali ange ʻe Sīsū: “Ko e faʻahinga ko eni ʻoku ʻikai lava ke mahuʻi, ka ʻi he lotu pe.”

Neongo ia ko ha lau tokanga ʻa e fakamatala ʻa Maʻaké, ʻoku fakahaaʻi ai ʻoku ʻikai ha fepakipaki ia mo e meʻa naʻe lēkooti ʻe Mātiú. ʻI he Maake 9:​19, ʻoku tau lau ai naʻe mamahi ʻa Sīsū ʻi he taʻetui ʻa e toʻutangata ko iá. Pea ʻi he veesi 23, ʻoku lēkooti ai naʻá ne tala ange ki he tamai ʻa e tamasiʻí: “ʻOku malava ʻa e meʻa kotoa pe ki ha taha ʻoku tui.” Ko ia, ko Maʻake foki ʻokú ne fakamamafaʻi ʻa e mahuʻinga ʻo e tuí. Ka ʻi he veesi 29 pē, ʻoku toe tānaki mai ai ʻe Maʻake ha fakaikiiki. ʻOku tānaki mai ai ʻe Maʻake ʻa e meʻa naʻe leaʻaki ʻe Sīsū fekauʻaki mo e lotú, ʻa ia naʻe ʻikai ha taha ʻia Mātiu pe ko Luke naʻá ne fakakau.

Ko e hā leva ʻe lava ke tau leaʻakí? ʻI he ngaahi taimi kehe naʻe fakatou kapusi ʻe he kau ʻapositolo ʻe toko 12 mo e kau ākonga ʻe toko 70 ʻa e ngaahi laumālie fulikivanu. (Maake 3:​15; 6:​13; Luke 10:17) Ka ʻi he meʻá ni naʻe ʻikai lava ʻe he kau ākongá ʻo kapusi ʻa e tēmenioó. Ko e hā hono ʻuhingá? Kapau te tau fakatahaʻi ʻa e ngaahi fakaikiiki naʻe lave ki ai ʻi he ngaahi fakamatala kehekehé, kuo pau ke tau fakaʻosiʻaki naʻe ʻikai te nau mateuteu ke fai pehē ʻi he tuʻunga ko ʻení. Mahalo pē ko e konga ʻo e palopalemá ko e faʻahinga tēmeniō naʻe kau ki aí, koeʻuhi ʻoku hā ngali ʻoku kehekehe nai ʻa e ngaahi ʻulungaanga, ngaahi mahuʻingaʻia, naʻa mo e ngaahi pōtoʻi ʻoku maʻu ʻe he kau tēmenioó. Fekauʻaki mo e taha ko ʻení, naʻe fiemaʻu tautefito ki ai ʻa e tui mālohi mo e lotu tōtōivi ki he tokoni ʻa e ʻOtuá. Ko e moʻoni, naʻe maʻu ʻe Sīsū ʻa e tui pehē. Naʻá ne toe maʻu foki mo e poupou ʻa e Tokotaha-Fanongo ki he lotú, ko ʻene Tamaí. (Sāme 65:2) Naʻe ʻikai ngata pē ʻi he lava ʻe Sīsū ke fakamoʻui ʻa e tamasiʻi puké ʻaki hono tuli ki tuʻa ʻa e tēmenioó ka naʻá ne fai ia.