Ngaahi Fehuʻi mei he Kau Lautohí

Kapau ʻoku fanongo ha Kalisitiane ki ha ngaahi leʻo, ʻoku ʻuhinga moʻoni iá ʻokú ne ʻi ha malumalu ʻo e ʻohofi fakatēmenioó?

ʻIkai. Lolotonga kuo līpooti ko e kau tēmenioó ʻoku nau fakahaaʻi kinautolu ʻi he founga ko iá, ko e faʻahinga tāutaha tokolahi ʻoku nau fanongo ki he ngaahi leʻó pe hokosia ʻa e ngaahi ongoʻi fakahohaʻa taʻealafakamatalaʻi kehé kuo nau ʻiloʻi ʻi ha fakatotolo ʻoku nau maʻu ha palopalema fakafaitoʻo.

Naʻa mo e ʻi he ʻuluaki senitulí, naʻe ʻiloʻi mahino ai ko e ngaahi ʻohofi fakatēmenioó mo e ngaahi tuʻunga fakaesinó ʻoku tupu ai ʻi he taimi ʻe niʻihi ʻa e ngaahi ola meimei tatau. ʻI he Mātiu 17:​14-​18, ʻoku tau lau ai ki he kiʻi tamasiʻi naʻe fakamoʻui ʻe Sīsū. Neongo naʻe fakahaaʻi ʻe he kiʻi tamasiʻí ʻa e ngaahi fakaʻilonga ʻo e mahaki-moa lahi, ko ʻene faingataʻaʻiá naʻe fakatupunga moʻoni ia ʻe ha tēmeniō. Kae kehe, ʻi ha taimi ki muʻa ange ʻi hono ʻomai ʻa e fuʻu kakai faingataʻaʻiá kia Sīsū ke fakamoʻuí, naʻe kau heni ʻa e niʻihi ʻa ia naʻe pehē ne “uluisino ʻe he tēmeniō mo e mahaki-moa.” (Mātiu 4:​24, NW) ʻOku hā mahino, naʻe ʻiloʻi ko e ngaahi mahaki-moa ʻe niʻihi naʻe ʻikai uluisino ai ʻa e tēmenioó. Ko ʻenau ngaahi palopalemá naʻe fakaesino ia.

ʻOku līpooti ʻo pehē ko e niʻihi kuo nau tofanga ʻi he ʻāvanga motuʻá, ko ha mahaki ʻoku faʻa lava ke moʻui ʻi hono faitoʻó, fanongo ki he ngaahi leʻo pe hokosia ʻa e ngaahi fakaʻilonga kehe ʻa ia ʻoku hā ko ha meʻa ʻoku fakamisiteli.a Ko e ngaahi tuʻunga fakaesino kehé ʻe toe fakatupunga nai ai ʻa e puputuʻu fakaʻatamai ʻa ia ʻe lava ke fakakaukau hala ai ha niʻihi ko e fakatupunga ʻe he kau tēmenioó. Ko ia ai, lolotonga ko ha tokotaha ʻokú ne līpooti ʻoku fanongo ki he ngaahi leʻó pe ʻokú ne maʻu ʻa e ngaahi ongoʻi fakahohaʻa kehé ʻe ʻikai nai te ne loto ke taʻetokangaʻi ʻa e fakahohaʻasi ʻe he tēmenioó, ʻoku totonu ke fakalotolahiʻi pau ia ke ne fakakaukau ki hono fakatotoloʻi pe ʻoku ʻi ai ha fakamatala fakaesino ki he meʻa ʻokú ne hokosiá.

[Fakamatala ʻi lalo]