ʻOkú Ke Fakakaukau Fekauʻaki mo e Nofo Malí?

Kapau te tau fakahoa ʻa e foʻi moʻoni ʻo e vete mali ʻi he kolopé ki ha mofuike, ʻe ʻi he konga tefitó ʻa e ʻIunaite Seteté. ʻI ha taʻu ki muí ni, naʻe ngata ai ʻa e ngaahi nofo mali laka hake ʻi he taha milioná​—ko ha fakaʻavalisi ia ko e ua ʻi he miniti kotoa pē. Ka ʻokú ke ʻiloʻi lelei nai ʻoku ʻikai ʻaupito ko e ʻIunaite Seteté pē taha ʻoku ʻi he faingataʻaʻia fakaemalí.

FAKATATAU ki he ako ʻe taha, ko e lahi ʻo e vete mali ʻi Kānatá, ʻIngilani mo Uēlesi, Falanisē, Kalisi, mo e ʻOtu Netalení kuo laka hake ia ʻi he liunga uá talu mei he 1970.

ʻOku tau maʻu ʻa e ʻuhinga kotoa ke tui ai ko e tokolahi taha ʻa e ngaahi hoa malí ʻoku nau kau ki he tuʻunga ʻo e malí koeʻuhi ʻoku nau feʻofaʻaki pea loto ke nofo fakataha ʻi he toenga ʻo ʻenau moʻuí. Kae kehe, ʻoku fakamamahí, ko e fakaʻānaua ki ha nofo mali fiefiá ʻoku faʻa fakamoʻoniʻi ʻene hoko tofu pē​—ko ha misí. ʻI he ʻā hake ki he meʻa ʻoku moʻoní, kuo pehē ʻe he tokolahi naʻe fuʻu vave ʻenau malí pe mali mo ha tokotaha hala pe ko ia fakatouʻosi.

Ko e hā ʻoku ʻikai lavameʻa ai ʻa e ngaahi nofo mali lahi? “Ko e ʻuhinga tefitó ko e ʻikai ha teuteú,” ko e lau ia ʻa ha faʻu-tohi ʻo ha tohi fekauʻaki mo e faisoó. ʻOkú ne tānaki mai ki ai: “ʻI heʻeku feangainga mo e ngaahi hoa malí ʻi he ngaahi fāinga mo e faingataʻa fakaemalí ʻoku lōmekina au ʻe ha ongo ʻe ua​—ko e manavaʻofa mo e ʻita. ʻOku ou ongoʻi manavaʻofá koeʻuhi ko e ʻikai te nau maʻu ʻenau ngaahi taumuʻa ki ha vahaʻangatae fekoekoeʻi fakafiemālié. ʻOku ou ongoʻi ʻitá koeʻuhi ko ʻenau taʻeʻilo ʻo kau ki he pelepelengesi ʻo e fatongiá.”

Ko e moʻoni, ʻoku kau ʻa e tokolahi ki he nofo malí, mo e siʻi pe halaʻatā ha fakakaukau ʻo kau ki he founga ʻo hono ʻai ia ke lavameʻá. Ka, ʻoku ʻikai ʻaupito fai ha ofo ʻi he meʻá ni. Naʻe fakamatala ha faiako ʻe taha: “Ko e toko fiha nai ʻi heʻetau kau talavoú kuo nau fou atu ʻi he ako he kolisí fekauʻaki mo e tōʻonga ʻa e fanga kumaá mo e fanga mokó, kae ʻikai malava ke nau ako fekauʻaki mo e tōʻonga ʻa e ongo kakai ʻe ua ʻoku ui ko e husepānití mo e uaifí?”

ʻOkú ke fakakaukau fekauʻaki mo e nofo malí​—pe ko e fekauʻaki mo e malava ke mali ʻi he kahaʻú pe fekauʻaki mo e nofo mali ʻokú ke ʻi ai he taimi ní? Kapau ko ia, ʻoku totonu ke ke lāuʻilo ko e vahaʻangatae moʻoní ʻoku kehe mamaʻo ia mei he meʻa ko ia ʻoku fakahaaʻi mai ʻi he ngaahi heleʻuhilá, ʻi he ngaahi faiva he televīsoné, pea ʻi he ngaahi tohi talanoa ʻevá. ʻI he taimi tatau, ko e nofo mali ʻa ha ongo meʻa matuʻotuʻa ʻa ia ʻokú na feʻofaʻaki moʻoní ʻe vakai nai ki ai ko ha tāpuaki ia mei he ʻOtuá. (Palovepi 18:22; 19:14) ʻE lava fēfē leva ke ke fakapapauʻi ʻokú ke mateuteu ke fetaulaki mo e ngaahi fiemaʻu ʻa e nofo malí? Ko e hā ʻa e ngaahi moʻoniʻi meʻa ʻoku totonu ke ke fakakaukau ki ai ʻi hono fili ha hoa malí? Pe kapau kuó ke ʻosi mali, ʻe lava fēfē ke ke fakatupulekina ʻa e faingamālie ko ia ʻo hono maʻu ha fiefia tuʻuloa ʻi hoʻo nofo malí?