Līpooti ʻa e Kau Fanongonongo ʻo e Puleʻangá
“Ki he ʻOtua ʻOku Malava ʻa e Meʻa Kotoa Pe”
KO E ngaahi lea ʻi ʻolungá, ʻa ia ʻoku maʻu ʻi he Mātiu 19:26, naʻe fakamoʻoniʻi ʻene hoko ʻo moʻoní ki ha finemui ʻi Venisuela. ʻI he hili ʻa ʻene ako ke tuku ʻene falala kakató kia Sihová, naʻá ne malava ai ke ne ikuʻi ha palopalema mamafa. ʻOkú ne pehē:
“Naʻe mātuʻaki anga-ʻofa mo ʻofa ʻeku kui-fefiné. ʻOku fakamamahí, naʻá ne mate ʻi he taimi naʻá ku toki taʻu 16 pē aí. Ko ʻene maté ko ha toki tā fakaʻulia ia kiate au. Naʻá ku hoko ʻo ʻikai kei fakakaukau mafamafatatau, ʻo ʻikai pē te u loto ke hū atu mei he falé ki tuʻa. Naʻá ku iku ʻo mei hangē tofu ha taha nofo tokotahá.
“Naʻe ʻikai te u ʻalu ki he akó, pea naʻe ʻikai te u maʻu ha ngāue. Naʻá ku nofo pē ʻi hoku lokí. ʻI he tuēnoa mo e ʻikai ha ngaahi kaungāmeʻá, naʻá ku fuʻu loto-mafasia ʻaupito. Naʻá ku ongoʻi taʻefeʻunga ʻaupito peá u loto ke u mate mo fakangata ʻeku moʻuí. Naʻá ku hanganaki ʻeke hifo kiate au, ‘Ko e hā hono ʻuhinga ʻoku ou moʻui aí?’
“Naʻe faʻa maʻu ʻe heʻeku faʻeé ʻa e ngaahi makasini Taua Leʻo mo e Awake! mei ha finemui Fakamoʻoni naʻe hingoa ko Gisela. ʻI he ʻaho ʻe taha naʻe fakatokangaʻi atu ʻe heʻeku faʻeé ʻa Gisela ʻi heʻene fakalaka hake ʻi homau ʻapí peá ne kole ange kiate ia pe te ne malava ʻo tokoniʻi au. Naʻe loto-lelei ʻa Gisela ke ʻahiʻahi, ka naʻá ku fakafisi ke sio kiate ia. Naʻe ʻikai ke taʻofi ʻe he meʻá ni ʻa Gisela. Naʻá ne faitohi mai kiate au peá ne tala mai ʻokú ne loto ke ne hoko ko hoku kaumeʻa pea ʻoku ʻi ai mo e tokotaha ʻoku mātuʻaki mahuʻinga ange ia ʻiate ia ʻokú ne loto mo ia ke hoko foki ko hoku kaumeʻa. Ko e tokotaha ko iá, ko ʻene leá ia, ko Sihova ko e ʻOtuá.
“Naʻe maongo kiate au ʻa e meʻá ni, pea naʻá ku tali ʻene tohí. Naʻe feʻunga mo e māhina ʻe tolu ʻa ʻema fetohiʻakí. ʻI he hili pē ha fakaʻaiʻai mo ha fakalotoʻi meia Gisela, naʻe toki faifai atu pē ʻou maʻu ai ha loto-toʻa ke feʻiloaki mo ia. ʻI heʻema ʻuluaki feʻiloakí, naʻá ku ako ʻa e Tohitapú mo Gisela, ʻo ngāueʻaki ʻa e tohi Te Ke Malava ʻo Moʻui Taʻengata he Palataisi ʻi he Māmaní. ʻI he hili ʻa e akó, naʻá ne fakaafeʻi au ke u maʻu ha fakataha ʻi he Fale Fakatahaʻanga ʻi he feituʻú. Naʻá ku ʻohovale. Naʻe teʻeki ai ke u hū ki tuʻa mei fale feʻunga mo e taʻu ʻe fā, pea ko e fakakaukau atu ke ʻi he halá naʻe fakalilifu.
“Naʻe fuʻu anga-kātaki ʻa Gisela kiate au. Naʻá ne fakapapauʻi mai naʻe ʻikai ha meʻa ia ke ilifia ki ai pea te ne ʻalu fakataha mo au ki he fakatahá. Naʻe faifai atu pē ʻou loto ki ai. ʻI he taimi naʻá ma aʻu ai ki he Fale Fakatahaʻangá, naʻá ku kamata ke tetetete mo tautaʻa. Naʻe ʻikai te u malava ke fakafeʻiloaki ki ha taha. Ka neongo ia, naʻá ku loto ke hokohoko atu ʻa hono maʻu ʻa e ngaahi fakatahá, pea faitōnunga ʻa e ʻaʻahi mai ʻa Gisela kiate aú ʻi he uike taki taha.
“Ke tokoniʻi au ke ikuʻi ʻeku manavasiʻí, naʻe ʻave vave au ʻe Gisela ki he ngaahi fakatahá. Naʻá ma tuʻu ʻi he matapaá ʻo fakafeʻiloaki ki he tokotaha kotoa pē naʻa nau ō maí. ʻI he founga ko iá naʻá ku fesiofaki ai mo e toko taha pe toko ua pē ʻi ha taimi, kae ʻikai ko ha kulupu fakakātoa ʻi he taimi pē ʻe taha. ʻI he taimi naʻá ku ongoʻi ai ʻoku ʻikai te u kei malava ke matuʻuakí, naʻe fakahā mai kiate au ʻe Gisela ʻa e Mātiu 19:26: ‘ʻI he vakai ʻa e tangatá ko e meʻa ia ʻe ʻikai lava; ka ki he ʻOtuá ʻoku malava ʻa e meʻa kotoa pe.’
“Neongo naʻe ʻikai ke faingofua, naʻe faifai atu pē ʻo malava ke u maʻu ha fakatahataha lalahi ange ʻo e kakaí ʻi ha ʻasemipilī fakafeituʻu. He lākanga mātuʻaki lahi ē kiate au! ʻI Sepitema 1995, naʻá ku fakapapauʻi ai ʻi he loto-toʻa ke lea ki he kau mātuʻá fekauʻaki mo e kau ki he ngāue fakafaifekau matapā-ki-he-matapaá. ʻI he māhina pē ʻe ono ki mui ai, ʻi ʻEpeleli 1996, naʻá ku fakahāhaaʻi ai ʻeku fakatapui kia Sihová fakafou ʻi he papitaiso ʻi he vaí.
“ʻI he taimi naʻe ʻeke mai ai ʻe ha taha ki muí ni mai ʻa e founga naʻá ku maʻu ai ʻa e loto-toʻa ke fai ʻení, naʻá ku tali ange: ‘Ko ʻeku holi ke fakahōifuaʻi ʻa Sihová ʻoku lahi ange ia ʻi heʻeku ilifiá.’ Lolotonga ʻoku ou kei loto-mafasia pē ʻi he taimi ki he taimi, ʻoku fakalahi ange ʻeku fiefiá ʻi heʻeku ngāue ko ha tāimuʻa tuʻumaʻu. ʻI he sio ki muí, ʻoku ou loto-tatau mo Gisela. ʻOku ou maʻu he taimí ni ha Kaumeʻa ʻa ia ʻokú ne mahuʻingaʻia ʻiate au pea ʻokú ne ‘fakamalohiʻi au.’”—Filipai 4:13, PM.
[Fakatātā ʻi he peesi 8]
“Ko ʻeku holi ke fakahōifuaʻi ʻa Sihová ʻoku lahi ange ia ʻi heʻeku ilifiá”