ʻE Lava Ke Ke ʻUnuʻunu Ofi ki ha ʻOtua Taʻehāmai?

‘ʻE lava fēfē ke u fakatupu ha vahaʻangatae vāofi mo ha taha ʻoku ʻikai lava ke u sio ki ai?’ ko haʻo ʻeke nai ia. ʻE hā ngali ko ha foʻi fehuʻi totonu ia. Kae fakakaukau angé:

ʻOKU mahuʻinga fēfē ʻa e sió ki hono fakatupu ha ngaahi vahaʻangatae anga-ʻofa mo tuʻuloa? ʻIkai ʻoku mahuʻinga tatau, kapau ʻoku ʻikai lahi ange, mo e ngaahi meʻa tefito ʻoku ʻikai lava ke sio ki aí? ʻOku moʻoni ia! He ʻi he ʻuhinga ko iá kuo fakatupu ai ʻe he kakai ʻe niʻihi ha vahaʻangatae vāofi mo e niʻihi kehé fakafou ʻi he fetuʻutaki tuʻumaʻu​—ko ʻenau ngaahi tohi ʻo fakahaaʻi totonu ai ʻenau ngaahi saiʻiá, ngaahi fehiʻá, ngaahi taumuʻá, ngaahi tefitoʻi moʻoní, fakakatá, mo e ngaahi tōʻonga fakaeʻulungaanga pe ngaahi mahuʻingaʻia kehe.

Ko e kakai kuí foki ʻoku nau fakahāhā ʻoku ʻikai ke mahuʻinga ʻa e sió ki hono fakatupu ha vahaʻangatae vāofi mo ha tokotaha ʻe taha. Fakakaukau angé ki he fakatātā fekauʻaki mo ʻEtuate pea mo Uani, ko ha ongo meʻa mali ʻokú na kui.a Naʻe fetaulaki ʻa ʻEtuate mo Uani ʻi ha akoʻanga maʻá e kau kuí, ʻa ia naʻe hoko ai ʻa Uani ko ha kaungāako ʻi he kakai lalahí. Naʻá ne manako ʻi he ngaahi ʻulungaanga ʻo Uaní, tautefito ʻi heʻene lea faitotonú mo hono angá, pea mo ʻene fakakaukau lelei ʻaupito fekauʻaki mo e ngāué. ʻI he tafaʻaki ʻe tahá, naʻe tohoakiʻi ʻa e tokanga ʻa Uani kia ʻEtuaté, koeʻuhi naʻá ne lea ʻo pehē, “naʻe fakahāhā ʻe ʻEtuate ʻa e ngaahi ʻulungaanga kotoa naʻe ʻohake au ke u tui naʻe mahuʻingá.” Naʻe kamata ai ha faisō, pea ʻi ha taʻu ʻe tolu ki mui ai naʻá na mali.

“ʻI he taimi ʻokú mo fakataha aí,” ko e lea ia ʻa ʻEtuaté, “ʻoku ʻikai moʻoni ke ʻomai ʻe he kuí ia ha faikehekehe ʻi hono langa hake ha vahaʻangatae mo e tokotaha ʻe tahá. ʻOku ʻikai nai malava ke mo fesiofaki, ka ʻoku ʻikai ke kui ʻa e ngaahi ongoʻí.” ʻI he taimí ni, ko e taʻu ia ʻe 57 ki mui ai, ʻokú na kei feʻofaʻaki lahi pē. ʻOkú na fakamatala ko e fakapulipuli ki hona vahaʻangatae fakaofó ʻoku kau ki ai, ʻo ʻikai siʻi hifo ʻi he meʻa ʻe fā: (1) ko hono fakatokangaʻi ʻa e ngaahi anga ʻo e tokotaha ʻe tahá, (2) fakakaukau fekauʻaki mo ia pea hoko ai ʻo tohoekina ki he ngaahi anga ko iá, (3) tauhi maʻu ʻa e fetuʻutaki leleí, pea (4) ko hono fai fakataha ʻo e ngaahi meʻá.

Ko e ngaahi poini ko eni ʻe faá ʻoku mātuʻaki mahuʻinga ia ki ha vahaʻangatae lelei pē, tatau ai pē pe ʻi he vahaʻa ʻo e ngaahi kaumeʻá, ngaahi hoa malí, pe toe mahuʻinga angé, ʻi he vahaʻa ʻo e faʻahinga ʻo e tangatá mo e ʻOtuá. ʻI he kupu hoko maí, te tau sio ai ki he lava ke tokoniʻi kitautolu ʻi hono ngāueʻaki ʻa e ngaahi poini ko ení ke fakatupu ha vahaʻangatae vāofi mo e ʻOtuá, neongo ʻoku ʻikai lava ke tau sio kiate ia.b

[Fakamatala ʻi lalo]