“ʻOku Fakahalaiaʻi Moʻoni ʻe he ʻOtuá ʻa e Kakaí ke Tutu ʻi Heli?”
“ʻOkú mo ako teolosia?”
Ko e fehuʻi ko ʻení naʻe fakaʻohovale ia kia Joel mo Carl. Ko e ongo talavoú ni—ko e ongo ngāue pole ʻi he ʻuluʻi ʻapitanga ʻo e Kau Fakamoʻoni ʻa Sihova ʻi Brooklyn, Niu ʻIoké—naʻe fai ʻena sio tohi ʻi ha fale tohi ofi mai. ʻI hono vakaiʻi ʻe Joel ʻa e ngaahi konikōtieni Tohitapú, naʻe fakahaaʻi ange ai ʻe Carl kiate ia ha fetalanoaʻaki naʻá ne fiefia ai ʻi he ngāue fakafaifekaú. ʻI he fanongo ki ha konga ʻo e fetalanoaʻaki ko ʻení, naʻe ueʻi ai ha tangata naʻe tuʻu ʻo ofi ai ke ne fakaofiofi atu kiate kinaua.
Kae kehe, naʻe ʻi ai ʻa e meʻa naʻe tokanga fakafoʻituitui lahi ange ki ai ʻa e tangatá ʻi heʻene fieʻilo pē pe naʻe ako teolosia ʻa e ongo talavoú ni. Naʻá ne pehē: “Ko aú ko e Siu, pea ko e niʻihi ʻo hoku ngaahi kaungāmeʻa Kalisitiané naʻa nau tala mai ʻe tutu au ʻi heli koeʻuhi he naʻe fakataleʻi ʻe he kau Siú ʻa Sīsū. ʻOku fuʻu mātuʻaki fakahohaʻa ʻa e meʻá ni kiate au. Ko ha tautea pehē ʻoku haʻu mei ha ʻOtua ʻofa ʻoku ʻikai ke hā ngali totonu ia. ʻOku fakahalaiaʻi moʻoni ʻe he ʻOtuá ʻa e kakaí ke tutu ʻi heli?”
Naʻe tala ange ʻe Joel mo Carl ki he tangata loto-totonu ko ʻení ko kinauá ko ha ongo ako tōtōivi ʻo e Tohitapú. Naʻá na fakahaaʻi kiate ia mei he ngaahi Konga Tohitapú, ko e maté ʻoku ʻikai te ne ʻilo ha meʻa pea ʻoku nau mohe pē ʻi he maté ʻo tatali ki ha toetuʻu. Ko ia ai, ʻoku ʻikai ke fakamamahiʻi kinautolu pe mamahi ʻi ha afi ko heli. (Sāme 146:3, 4; Koheleti 9:5, 10; Taniela 12:13; Sione 11:11-14, 23-26) ʻI he hili ʻa e miniti ʻe 45 ʻo ʻenau fetalanoaʻakí, naʻe ʻoange ʻe he tangatá hono tuʻasilá kia Joel mo Carl peá ne kole ki ha fakamatala lahi ange ʻi he kaveingá.
Kapau ko helí ko ha feituʻu ʻo ha afi fakamamahi, ʻe faifai angé pea kole ʻe ha taha ke ʻave ia ki ai? Ka, ko e pēteliake ko Siopé, ʻi he fakaʻamu ke hao mei hono tuʻunga fakamamahí, naʻá ne fai ai ʻa e kole ko ʻení: “Ko hai te ne fai ʻeni kiate au, ke ke maluʻi nai au ʻi heli, pea fufū au kae ʻoua ke mole atu ho houhaú na?” (Siope 14:13, Douay Version) ʻOku hā mahino, naʻe ʻikai ke tui ʻa Siope ko helí ko ha feituʻu fakamamahi. Ka ʻi hono kehé, naʻá ne kumi ki ha maluʻanga ai. Ko e maté ko ha tuʻunga ʻo e ʻikai ke ʻi ai, pea ko e heli ʻi he Tohitapú ko e faʻitoka anga-maheni ia ʻo e faʻahinga ʻo e tangatá.
Kapau te ke saiʻia ke maʻu ha fakamatala lahi ange fekauʻaki mo e meʻa ʻoku hoko kiate kitautolu ʻi heʻetau maté pea mo e ʻamanaki ʻoku maʻu ʻi he hili nai iá, ʻoku fakaafeʻi loto-māfana atu koe ke ke tali ʻa e tuʻuaki ko ʻení.