Līpooti ʻa e Kau Fanongonongo ʻo e Puleʻangá
Aʻu ki he Faʻahinga ʻOku Faingataʻa ke Aʻu ki Aí
ʻOKU feinga ʻa e Kau Fakamoʻoni ʻa Sihová ke fetuʻutaki ki he tokotaha kotoa pē te nau malava ke aʻu ki ai mo e pōpoaki ʻo e Puleʻangá. ʻI he taimi ʻe niʻihi, ʻoku fiemaʻu ha feinga makehe ke aʻu ai ki he faʻahinga ʻoku tātātaha ke maʻu ʻi ʻapí. (Maake 13:10) ʻI he meʻá ni, ko ha faifekau tāimuʻa makehe ʻi ha fonua ʻi ʻAmelika Tonga ʻokú ne lave ki he meʻa ko ʻeni naʻe hokosiá.
“ʻI he ʻaho ʻe taha naʻá ku ʻilo ai ko e kōvana ʻo e fonuá te ne ʻaʻahi mai ki he feituʻu naʻe vaheʻi ki ai au mo hoku uaifí. Koeʻuhi naʻe hā mahino ko ha taha ia ʻo e faʻahinga ʻoku tātātaha ke ʻi ʻapí, naʻá ku fai ha tohi kiate ia pea ʻave fakataha mo ha ngaahi tohi faka-Tohitapu, kau ai ʻa e polosiua Ko e Hā ʻOku Fiemaʻu ʻe he ʻOtuá Meiate Kitautolú? mo e tohi Mankind’s Search for God pea mo e ʻIlo ʻA Ia ʻOku Taki Atu ki he Moʻui Taʻengatá. Naʻe fakamatala ʻi heʻeku tohí ʻa e taumuʻa ʻo e ngaahi tohi taki taha ko ʻení.
“Koeʻuhi naʻá ku mahuʻingaʻia ke ʻilo ʻene tali ki he ngaahi tohí, naʻá ku kole ai ke feʻiloaki mo ia. ʻI ha ngaahi uike ki mui ai naʻe fakaʻatā mai ai ke ma feʻiloaki, pea naʻá ku ʻalu fakataha mo ha tatau ʻo e foʻi vitiō ko e Jehovah’s Witnesses—The Organization Behind the Name. Naʻe feʻunga mo e houa ʻe ua ʻa e fakatahá. ʻI he hili ʻa e mamata ʻi he foʻi vitioó mo e kōvaná, naʻá ku ʻeke ange pe ko e hā ʻene fakakaukau ki aí. Naʻá ne pehē: ‘ʻOku ʻikai ha kautaha kehe ʻi he foʻi māmaní ʻe hangē ko kimoutolú. ʻOku ou fakaʻamu ange naʻá ku maʻu ha kakai hangē ko kimoutolú ʻa ia ʻe lava ke nau tokoni mai kiate au ʻi hono fakakakato ʻeku ngaahi ngāue fakapuleʻangá!’ Naʻá ne ʻeke mai leva pe kuó u ʻosi ʻaʻahi ki he ʻuluʻi ʻapitanga ki he māmaní ʻo ʻetau kautahá. Naʻá ku tala ange kiate ia neongo ko ʻeku taumuʻá ia talu mei heʻeku taʻu 14, naʻe teʻeki ai ke u maʻu ha faingamālie ke ʻaʻahi ki hotau ʻuluʻi ʻapitanga ki he māmaní ʻa ē ʻoku ʻi Brooklyn, Niu ʻIoke. Ko e taha ia ʻo e ngaahi taumuʻa ʻoku faingataʻa ke aʻu ki aí. Naʻá ne sio mai kiate au mo ne fakakaukau ʻi ha mōmeniti. Naʻá ne pehē mai leva ʻokú ne loto ke u maʻu ʻa e faingamālie ko iá. Naʻá ne fakapapauʻi ʻokú ma maʻu ʻa ʻema ngofua fakalaó pea naʻá ne meʻaʻofaʻaki mai kiate kimaua ha ongo tikite vakapuna!
“ʻOku maʻu maʻu pē ʻe he kōvaná he taimí ni ʻa e ngaahi makasini Taua Leʻo mo e ʻĀ Hake! ʻOkú ma fakaʻamu ʻe vavé ni ke ma malava ʻo kamata ha ako Tohitapu mo ia.”