Līpooti ʻa e Kau Fanongonongo ʻo e Puleʻangá
Fai Fakamoʻoni ʻa e Kau Māʻata ʻi Onopōní ʻi Suēteni
KO E foʻi lea faka-Kalisi ki he “fakamoʻoní” ko e martyr, ʻa ia ʻoku haʻu mei ai ʻa e foʻi lea faka-Pilitānia ko e martyr, ko hono ʻuhingá ko e “tokotaha ʻoku fai fakamoʻoni ʻaki ʻene maté.” Ko e kau Kalisitiane tokolahi ʻo e ʻuluaki senitulí naʻa nau ʻoatu ha fakamoʻoni fekauʻaki mo Sihova ʻaki ʻa e mate maʻa ʻenau tuí.
ʻI he tuʻunga tatau, ʻi he senituli hono 20, naʻe laui afe ʻa e Kau Fakamoʻoni naʻa nau mate ʻi he nima ʻo e kau poupou mateaki ʻa Hitilaá koeʻuhi ko ʻenau tauhi maʻu ʻenau tuʻu-ʻatā ʻi he ngaahi ʻīsiu fakapolitikalé mo e fakapuleʻangá. Ko e kau māʻata ko eni ʻi onopōní ʻoku nau toe ʻomai ha fakamoʻoni mālohi. Ko ha meʻa eni naʻe toki hoko ki muí ni ʻi Suēteni.
ʻI he fekauʻaki mo e fakamanatu ʻa e taʻu 50 ʻo e ngata ʻa e Tau II ʻa Māmaní, naʻe langaʻi ai ʻe he puleʻanga Suētení ha feingangāue fakaako ʻi he fonuá kotoa fekauʻaki mo e Tāmate Fakatokolahí. Naʻe ui ʻa e ngāue ko ení ko e Hisitōlia Moʻui. Naʻe fakaafeʻi ʻa e Kau Fakamoʻoni ʻa Sihová ke nau kau ki ai pea ke vahevahe ʻa e ngaahi meʻa ne nau hokosiá.
Naʻe tali ki ai ʻa e Kau Fakamoʻoní ʻaki ʻenau fai ha fakaʻaliʻali naʻe fakakaveinga, Ko e Kau Maʻukovia Kuo Ngalo ʻo e Tāmate Fakatokolahí. Naʻe kamata ia ʻi he Holo ʻAsemipilī ʻo e Kau Fakamoʻoni ʻa Sihová ʻi Strängnäs. Ko e Kau Fakamoʻoni naʻe hao moʻui ʻi he Tāmate Fakatokolahí ne nau mateuteu ke vahevahe ʻa e ngaahi meʻa ne nau hokosiá ki he kau ʻaʻahi laka hake ʻi he toko 8,400 ʻa ia ne nau haʻu ʻi he ʻuluaki ʻahó! ʻI he ngataʻanga ʻo e 1999, naʻe hā ai ʻa e fakaʻaliʻalí ʻi he ngaahi misiume mo e ngaahi laipeli fakapuleʻanga laka hake he 100 ʻi Suēteni kātoa, pea kuo mamata ai ʻa e kakai ʻe toko 150,000. Ko e kau ʻaʻahí naʻe kau ai ha niʻihi ʻo e kau ʻōfisa fakapuleʻangá, ʻa ia naʻa nau fakaongoongoleleiʻi ʻa e meʻa naʻa nau sio aí.
Naʻe ʻikai ha toe meʻa kehe naʻe hokosia ʻi he felāveʻi mo e ngaahi ngāue ʻa e Kau Fakamoʻoni ʻa Sihova ʻi Suētení naʻe fakamafola fakahāhā lahi fau mo talitali lelei ai ʻe he kakaí ʻo hangē ko ení. Naʻe ʻeke ʻe he kau ʻaʻahi tokolahi: “Ko e hā ne ʻikai te mou tala mai ai kiate kimautolu ki muʻa ʻa e ngaahi meʻa ne mou hokosia ʻi he Tāmate Fakatokolahí?”
ʻI he hili hono fai ʻa e fakaʻaliʻalí ʻi honau feituʻú, naʻe līpooti ai ʻe ha fakatahaʻanga ʻe taha ha tupu peseti ʻe 30 ʻi he ngaahi ako Tohitapu ʻi ʻapí! Naʻe fakaafeʻi ʻe ha tokotaha Fakamoʻoni ʻe taha hano kaungāngāue ke sio ʻi he fakaʻaliʻalí. Naʻe tali fiefia ia ʻe he kaungāngāue ko ení peá ne haʻu fakataha ai mo hano kaumeʻa. ʻI he hili iá, naʻe pehē ʻe he kaumeʻa ko ení ʻoku faingataʻa ke ne mahinoʻi ʻa e founga ʻo e malava ʻa e kakaí ke nau maʻu ha tui mālohi pehē ʻo laka ange ke nau mate ʻi haʻanau fakamoʻoni ʻi ha fakamatala ʻo fakafoki ai ʻenau tuí. Naʻe taki atu eni ki ha fakamatala lahi ange, pea naʻe kamata ha ako Tohitapu mo ia.
Hangē pē ko honau tatau ʻi he ʻuluaki senitulí, ko e kau māʻata loto-tōnunga ko eni ʻo e senituli 20 kuo nau fai fakamoʻoni loto-toʻa ko Sihova pē ʻa e ʻOtua moʻoní, ʻa ia ʻokú ne taau mo ʻetau tui mo e mateaki taʻeueʻiá.—Fakahā 4:11.
[Maʻuʻanga ʻo e Tā ʻi he peesi 13]
Pōpula nofo kemi: Państwowe Muzeum Oświęcim-Brzezinka, courtesy of the USHMM Photo Archives