Ongoʻi Malu he Taimí Ni​—Hoko ʻo Malu Taʻengata

KO E HĀ ʻoku faʻa faingataʻa ai ke maʻu ʻa e maluʻangá pea ka maʻu, ʻoku fakataimi pē? ʻOku peheé koeʻuhi ko ʻetau ʻuhinga ki he maluʻangá ʻoku makatuʻunga ia ʻi he fakakaukauloto—ki he meʻa ʻoku tau ʻamanaki ke maʻú kae ʻikai ki he meʻa ʻe lava ke maʻú? Ko ha fakakaukau hala pehē ʻe ui nai ia ko e nofo ʻi ha māmani taʻemoʻoni.

Ko e fakakaukaulotó ʻoku fakaʻatā ai ʻa e ʻatamaí ke ne tukuange ʻa e tuʻunga moʻoni ʻo e moʻuí mo hono ngaahi tuʻunga taʻemalú pea hū atu ki ha tuʻunga fakaʻofoʻofa mo malu, ʻo tukunoaʻi ha meʻa pē te ne maumauʻi nai ʻa e misi ko iá. Neongo ia, ʻoku faʻa hū fakafokifā ʻa e ngaahi palopalema ʻo e māmani moʻoní ki he māmani taʻemoʻoni ko ení ʻo toʻo taʻetoemeesi ai ʻa e ongoʻi leleí pea fakaʻāki ai ʻa e tokotaha misí ki he fakakaukau lelei moʻoní.

Tau vakai angé ki he tafaʻaki ʻe taha ʻa ia ʻoku kumi ai ʻe he kakaí ʻa e maluʻangá—ko e feituʻu fakasiokālafí. Ko e fakatātaá, ʻoku hā ngali fonu talaʻofa nai ʻa e kolo lahí, ʻo ne ʻomai ha vīsone ʻo e ngaahi taimi fakafiefia, ngaahi fuʻu vahe lalahi, mo e ngaahi nofoʻanga lelei. ʻIo, ʻe lava ke hā ngali ʻomai ʻe he meʻa ko iá ʻa e maluʻanga ne tatali fuoloa ki aí. Ka ʻoku ʻi ha tuʻunga moʻoni ʻa e vīsone ko ení?

Feituʻú—Kolo Lahi pe ko e Ngaahi Misi Lahi?

ʻI he ngaahi fonua langalanga haké, ko e tauhele ʻa e kolo lahí ʻoku poupouʻi ia ʻaki ʻa e tuʻuaki te ne fakataueleʻi nai ʻa e ngaahi fakakaukauloto vēkeveké. Ko e ngaahi kautaha ʻoku nau fakapaʻanga ʻa e tuʻuaki peheé ʻoku ʻikai te nau mahuʻingaʻia maʻu pē ʻi ho maluʻangá, ka ko ʻenau ngaahi koloá. ʻOku nau fufū ʻa e ngaahi palopalema ʻo e māmani moʻoní ʻaki ʻa e ngaahi tuʻunga ʻo e lavameʻa ʻo fakaʻaliʻali ai ʻa e maluʻanga. Ko ia ai, ʻoku hoko ai ʻa e maluʻangá ʻo ō fakataha mo ʻenau koloa ʻoku tuʻuakí pea mo e kolo lahí.

Fakakaukau ki he fakatātā ko ení. Ko e kau ʻofisiale ʻi ha kolo lahi ʻi ʻAfilika Hihifo naʻa nau fokotuʻu ʻa e ngaahi papa tuʻuaki ʻoku fakahaaʻi mataʻāʻā ai ko e ifí ʻi hono moʻoní ʻoku ʻikai toe kehe ia mei hono fakaʻauha ʻa e paʻanga naʻe maʻu ʻi ha ngāue mālohi. Ko e konga ia ʻo ha feingatau ke fakatokanga ai ki hono kau tangataʻifonuá fekauʻaki mo e ifí. Ko e ʻū ngaohiʻanga sikaletí mo e faʻahinga ʻoku nau fakatau atú naʻa nau fakafepakiʻi ia ʻaki hono fakaʻaliʻali pōtoʻi ʻa e ngaahi papa tuʻuaki ne faʻu ʻo fakahaaʻi ai ʻa e kau ifí ʻi he ngaahi tuʻunga fakamānako ʻo e fiefia mo e lavameʻa. Tānaki atu ki ai, naʻe fakatui ʻe ha kautaha sikaleti ʻe taha ʻa e niʻihi ʻo ʻenau kau ngāué ʻaki ʻa e ngaahi teunga ngāue fakaʻofoʻofa mo e ngaahi tatā peisipolo ʻi he sīpinga ʻo e kuongá ke nau tufaki ʻa e sikaletí ki he toʻutupu ʻi he halá, ʻo fakaʻaiʻai ʻa e tokotaha taki taha ke ne “ʻahiʻahiʻi ia.” Ko e tokolahi ʻo e toʻutupú ni ko ʻenau haʻu mei he fanga kiʻi kolo īkí pea ʻi he taʻeʻilo ki he ngaahi founga tuʻuaki pōtoʻí, kuo nau tō ai ʻi he fakaafe ko ení. Kuo nau hoko ai ko e kau ifi maʻunimā. Ko e kau talavou ko eni mei he fanga kiʻi koló naʻa nau haʻu ki he kolo lahí ke kumi ha maluʻanga koeʻuhi ke tokoniʻi honau ngaahi fāmilí pe hoko ʻo lavameʻa fakapaʻanga. ʻI hono kehé, naʻa nau fakaʻauha ʻa e lahi ʻo e paʻanga ne mei malava ke nau ngāueʻaki ki ha ngaahi taumuʻa lelei angé.

Ko e ngaahi tuʻuaki ʻoku fakaʻaliʻali ai ha moʻui lavameʻa ʻi he kolo lahí ʻoku ʻikai ke tupu maʻu pē ia mei he kau mēsianití. ʻOku haʻu nai ia mei he kakai kuo nau hiki ki he kolo lahí pea ʻoku nau mā ke toe foki ki honau kolo nofoʻangá. ʻI he ʻikai loto ke hā ko e kau taʻelavameʻá, ʻoku nau pōlepole fekauʻaki mo e koloa mo e ngaahi lavameʻa fakangalingali kuo nau maʻu ʻi he koló. Kae kehe, ko hano sivisiviʻi ofi ange ʻo honau tuʻunga kuo taukaveʻí, ʻoku fakahaaʻi ai ko ʻenau founga moʻui lolotongá ʻoku ʻikai ko ha laka ki muʻa ia ʻi heʻenau founga moʻui fakakolo siʻi ki muʻá; ʻoku nau fāinga fakapaʻanga ʻo hangē pē ko e tokolahi taha ʻo e kau nofo kolo lahí.

ʻOku tautefito ʻi he ngaahi kolo lalahí ʻa e hoko ʻo maʻukovia ai ʻe he taʻefaitotonú ʻa e kau aʻu foʻou atu ʻi he kumi ki ha maluʻangá. Ko e hā hono ʻuhingá? ʻI he fakalūkufuá, kuo ʻikai ʻi ai hanau taimi ke fakatupu ai ha ngaahi kaumeʻa ofi pea ʻoku nau mamaʻo ʻaupito mei he ngaahi mēmipa ʻo e fāmilí. Ko ia ai, ʻoku ʻikai hanau kau faleʻi ʻe lava ke nau tokoniʻi kinautolu ke fakaʻehiʻehi mei he ngaahi tōʻanga ʻo e founga moʻui fakamatelie ʻi he koló.

Naʻe ʻikai ke tō ʻa Siosiua ʻi he tauhele ʻo e ifí. ʻIkai ko ia pē, naʻá ne hoko ʻo ʻiloʻi ko e ngaahi fiemaʻu ʻa e moʻui fakakolo lahí naʻe fakalaka mamaʻo ia ʻi heʻene malava ke fakahoko lavameʻa iá. ʻI hono tuʻungá, ʻi he malumalu ʻo e tuʻunga lelei tahá, ko e meʻa pē taha ne lava ke ʻoange moʻoni kiate ia ʻe he kolo lahí ko e ngaahi ʻamanaki taʻefakahoko lahi. Naʻá ne fakatokangaʻi ʻoku ʻikai te ne maʻu ha maluʻanga moʻoni ʻi he kolo lahí; naʻe ʻikai pē ko ha feituʻu totonu eni ia ki ai. Ko e ongoʻi ngeʻesi, māʻulalo mo e taʻelavameʻá naʻá ne ikuʻi ia, pea naʻe faifai pē ʻo ne folo hifo ʻene loto-pōlepolé peá ne foki ki he kolo siʻí.

Naʻá ne manavahē naʻa manukiʻi ia. ʻI hono kehé, ko hono fāmilí mo hono ngaahi kaumeʻa moʻoní naʻa nau talitali lelei loto-moʻoni ia ki ʻapi. Tupu ʻi he loto-māfana ʻa hono fāmilí, ko e ngaahi ʻātakai maheni ʻo e koló pea mo e ʻofa ʻa hono ngaahi kaumeʻa ʻi he fakatahaʻanga Kalisitiané, naʻe vave ai ʻa ʻene ongoʻi ʻokú ne malu lahi ange ʻi he tuʻunga naʻe ʻi ai ʻi he kolo lahí, ʻa ia ʻoku iku ai ʻa e ngaahi misi ʻa e tokolahi ki he ngaahi tuʻunga fakamamahi. ʻI heʻene ʻohovalé, ko e ngāue mālohi mo ʻene tamaí ʻi he ngoueʻangá naʻe ʻomai ai kiate ia mo hono fāmilí ha paʻanga hū mai māʻolunga ange ia ʻi heʻene toenga paʻanga ne mei maʻu he ʻosi hono totongi ʻa e ngaahi moʻuá ʻi he kolo lahí.

Paʻangá—Ko e Hā ʻa e Palopalema Moʻoní?

ʻE ʻoatu kiate koe ʻe he paʻangá ha ongoʻi malu? Ko Liz mei Kānatá ʻokú ne pehē: “ʻI heʻeku kei siʻí, naʻá ku tui ai naʻe ʻomai ʻe he paʻangá ʻa e tauʻatāina mei he loto-hohaʻá.” Naʻá ne ʻofa ʻi ha tangata ʻa ia naʻe tuʻumālie fakapaʻanga. ʻIkai fuoloa mei ai naʻá na mali. Naʻá ne ongoʻi malu? ʻOku hoko atu ʻa Liz: “ʻI heʻeku malí, naʻe ʻi ai homa ʻapi fakaʻofoʻofa mo e kā ʻe ua, pea naʻe ʻomai kia kimaua ʻe homa tuʻunga fakapaʻangá ʻa e tauʻatāina ke maʻu ʻa e meimei meʻa kotoa pē ʻi he ngaahi meʻa fakamatelié, fefolauʻakí mo e fakafiefiá. Ko e meʻa faikehé, he naʻá ku kei hohaʻa pē ʻo fekauʻaki mo e paʻangá.” ʻOkú ne fakamatala ki hono ʻuhingá: “Naʻe lahi ʻema meʻa ʻe lava ke molé. ʻOku hā ngali ko e lahi ange ʻa e meʻa ʻokú ke maʻú, ko e siʻi ange ia ʻa hoʻo ongoʻi malú. Naʻe ʻikai ke ʻomai ʻe he paʻangá ʻa e tauʻatāina mei he loto-hohaʻá mo e loto-moʻuá.”

Kapau ʻokú ke ongoʻi ʻoku ʻikai haʻo paʻanga feʻunga ke hoko ai ʻo malu, ʻeke hifo kiate koe, ‘Ko e hā ʻa e palopalema moʻoní? Ko e ʻikai moʻoni ha paʻangá, pe ko e ʻikai ke fakapotopotoʻi ʻa e paʻangá?’ ʻI he fakakaukau atu ki hono kuohilí, ʻoku pehē ʻe Liz: “ʻOku ou ʻiloʻi he taimí ni ko e tupuʻanga ʻo e ngaahi palopalema ʻo hoku fāmilí ʻi heʻeku kei siʻí ko e taʻefakapotopotoʻi ʻa e paʻangá. Naʻa mau fakatau, fakamoʻua pea ko ia ai, naʻa mau hokohoko mafasia maʻu pē ʻi he moʻuá. Ne ʻomai ʻe he meʻá ni ʻa e loto-moʻua.”

Kae kehe, ʻi he ʻahó ni, ʻoku ongoʻi malu lahi ange ai ʻa Liz mo hono husepānití, neongo ʻoku siʻi ange ʻa ʻena paʻangá. ʻI heʻena ako ʻa e moʻoni fekauʻaki mo e Folofola ʻa e ʻOtuá, naʻe tuku ai ʻena fanongo ki he ngaahi taukaveʻi fakatauele fekauʻaki mo e paʻangá pea kamata fanongo ki he poto ʻo e ʻOtuá, ʻo kau ai ʻa e ngaahi leá ni: “Ka ko ia ʻoku fakaongo kiate au te ne nofo nonga [“malu,” NW], pea te ne ʻatā mei he manavahe ki he kovi.” (Palovepi 1:​33) Naʻá na fiemaʻu ke ʻi ai ha ʻuhinga lahi ange ki heʻena moʻuí ʻi he meʻa ʻe lava ke ʻomai ʻe ha ʻakauni pangikē lahi. ʻI he taimí ni, ʻi he hoko ko e ongo misinale ʻi ha fonua mamaʻo, ko Liz mo hono husepānití ʻokú na akoʻi tatau ki he kakai koloaʻiá mo e masivá ʻe vavé ni ke ʻomai ʻe Sihova ko e ʻOtuá ʻa e maluʻanga moʻoni ki he māmaní kotoa. ʻOku ʻomai ʻe he ngāue ko ení ʻa e fiemālie lahi mo e tuʻumaʻu ʻa ia ʻoku tupu mei ha taumuʻa māʻolunga ange mo e ngaahi meʻa mahuʻinga lahi ʻaupito, ʻo ʻikai mei he tupu fakapaʻangá.

Manatuʻi ʻa e foʻi moʻoni tefito ko ení: Ko e fakatupu koloa ki he ʻOtuá ʻoku mahuʻinga mamaʻo ange ia ʻi hono maʻu ʻa e ngaahi koloa fakamatelié. ʻI he kotoa ʻo e ngaahi Konga Tohitapu Toputapú, ʻoku fokotuʻu ai ʻa e fakamamafá, ʻo ʻikai ʻi hono maʻu ʻa e ngaahi koloa fakamatelié, ka ʻi hono maʻu ha tuʻunga lelei mo Sihova, ko ha tuʻunga ʻe lava ke tau tauhi maʻu ʻaki ʻa e hokohoko atu hono fai ʻa e finangalo ʻo e ʻOtuá ʻi he tuí. Naʻe fakalotolahiʻi kitautolu ʻe Kalaisi Sīsū ke tau “fakatupu koloa ki he ʻOtua” pea ke faʻoaki “koloa . . . ʻi Hēvani.”​—Luke 12:​21, 33.

Lakangá —Ko Hoʻo ʻAlú ki Fē?

Kapau ʻoku fakataueleʻi koe ke ke ongoʻi ko e kumi ki he lakanga māʻolungá ʻa e founga ki he maluʻangá, ʻeke hifo kiate koe: ‘Ko hai ia ʻi he lakanga māʻolungá kuó ne maʻu moʻoni ʻa e maluʻanga moʻoní? Ko e hā e lahi ʻo e lakanga kuo pau ke u feinga ki ai ke maʻu ai iá?’ ʻE ʻoatu nai kiate koe ʻe ha ngāue lavameʻa ha ongoʻi hala fekauʻaki mo e maluʻangá, ʻo iku ai ki he ʻamanaki-tōnoa, pe ko e kovi angé ki ha tō fakatupu mamahi.

Ko e ngaahi meʻa moʻoni ʻoku hokosiá ʻoku fakahaaʻi ai ko ha hingoa lelei ki he ʻOtuá ʻoku ʻomai ai ʻa e maluʻanga lahi ange ia ʻi ha hingoa ki he tangatá. Ko Sihova pē ʻe lava ke ne foaki ki he faʻahinga ʻo e tangatá ʻa e meʻaʻofa ʻo e moʻui taʻengatá. ʻOku kau ki ai ʻa e tohi hotau hingoá, ʻikai ʻi ha tohi hohoko fakasōsiale, ka ʻi he tohi ʻa e ʻOtuá ki he moʻuí.​—Ekisoto 32:32; Fakahā 3:5.

ʻI hoʻo tuku ki tafaʻaki ʻa e fakakaukau fakaʻānauá, ʻoku anga-fēfē hoʻo fakafuofua ho tuʻunga lolotongá, pea ko e hā ʻe lava ke ke ʻamanekina totonu mei he kahaʻú? ʻOku ʻikai ke maʻu ʻe ha taha ʻa e meʻa kotoa pē. Hangē ko hono fakalea ia ʻe ha Kalisitiane fakapotopoto ʻe taha, “naʻe pau ke u ako ko e moʻuí ʻoku ʻikai ʻaupito ko e ko eni MO E ko ena, ka ko e ko eni PE ko ena.” Tuʻu hifo ʻi ha mōmeniti ʻo lau ʻa e puha “Talanoaʻi ʻi Penini.”

Sai, tali ʻa e ngaahi fehuʻi ko ení: Ko e hā ha feituʻu pe taumuʻa mahuʻinga ʻi heʻeku moʻuí? Ko e hā ʻa e hala hangatonu taha ke aʻu ai ki aí? ʻE lava ke pehē ʻoku ou ʻi ha hala takai lōloa taʻepau pea ko e meʻa ʻoku ou fiemaʻu moʻoní mo e meʻa ʻoku ala lava moʻoní ʻe lava ke maʻu ia ʻi ha hala ʻoku siʻi ʻene fihí?

Hili hono fai e akonaki ʻi he tuʻunga mahuʻinga ʻo e ngaahi meʻa fakamatelié ʻi hono fakahoa mo e mahuʻinga ʻo e ngaahi meʻa fakalaumālié, naʻe pehē ʻe Sīsū ke tauhi ʻa e matá ke “huʻufataha,” pe “fakahangataha.” (Mātiu 6:​22) Naʻá ne ʻai ke mahino ko e ngaahi meʻa tefito ʻi he moʻuí ko e ngaahi meʻa fakalaumālié mo e ngaahi taumuʻa ʻoku fakatefito ʻi he huafa ʻo e ʻOtuá pea ʻi hono Puleʻangá. (Mātiu 6:​9, 10) ʻOku siʻi ʻa e mahuʻinga ʻo e ngaahi meʻa kehé pe hangē ko e laú, ʻoku ʻikai ko e meʻa tefito ia ke fai ki ai ʻa e tokangá.

Ko e ngaahi meʻa faitā lahi he ʻaho ní ʻoku ʻotomētiki pē ʻene fakahangataha ki he ngaahi meʻa mamaʻó mo e ofí fakatouʻosi. ʻOkú ke hehema ke hangē ko iá? ʻI he meimei meʻa kotoa pē ʻokú ke vakai “fakahangataha” ki aí—ʻa ē ʻoku mahuʻinga, fakamānako pea fakataha mo ha fakakaukau fakaʻānauá, ʻoku ala maʻu ia? Kapau ʻoku aʻu ʻo pehē ia ʻi ha konga, ko e taumuʻa mahuʻinga ki he kau Kalisitiané, ʻa e Puleʻangá, ʻe faingofua ke mole ia ʻi he ngaahi ʻata felekeu kehé, ʻo nau taki taha feʻauhi ke maʻu hoʻo tokangá. Ko e enginaki mālohi eni ʻa Sīsuú: “Mou fuofua kumi ae buleaga oe Otua, mo ene maonioni; bea e fakalahi aki ae gaahi mea ni kotoabe kiate kimoutolu.”—Mātiu 6:​33, PM.

Malu he Taimí Ni pea Taʻengata

ʻOku tau fakaʻamua kotoa nai ha ngaahi meʻa lelei ange maʻatautolu pea ki he faʻahinga ʻoku tau ʻofa aí. Kae kehe, ko e moʻoniʻi meʻa ko ia ʻo ʻetau taʻehaohaoá, nofo ʻi ha māmani taʻehaohaoá, pea fakangatangata ʻa e vilo ʻo ʻetau moʻuí ʻoku fakamālohiʻi ai kitautolu ke fakangatangata ʻa e ngaahi meʻa ʻe lava moʻoni ke tau ʻamanaki ke maʻú. Naʻe fakamatalaʻi ʻe ha tokotaha-tohi Tohitapu ʻi he lau afeʻi taʻu kuohilí: “Foki au, ʻo u vakai ʻi he lalo laʻa, ta ko e pue ʻoku ʻikai ko e meʻa ʻa e veʻevave pe, pea ko e tau ʻoku ʻikai ko e meʻa ʻa e kau mafi pe; pehe foki ko e meʻakai ʻoku ʻikai ko e meʻa ʻa e poto pe, mo e koloa ʻoku ʻikai ko e meʻa ʻa e maʻu ʻatamai pe, kaeʻumaʻa ʻa e tokangaʻekina ʻoku ʻikai ko e meʻa ʻa e kakai ʻilomeʻa pe; he ʻoku hokonoa ki he faʻahinga kotoa pe ʻa e faingamalie mo e tuʻutamaki.”—Koheleti 9:​11.

ʻI he taimi ʻe niʻihi ʻoku tau hoko ai ʻo nōfoʻi ʻi he founga-tuʻumaʻu fakaʻaho fakaongosia ʻo e moʻuí ʻo ngalo ai ke tau sio ki he meʻa mahuʻinga ange ʻo kau kia kitautolú tonu mo e meʻa ʻoku tau fiemaʻu moʻoni koeʻuhi ke ongoʻi malu moʻoni aí. Fakakaukau angé ki he ngaahi lea motuʻa ko eni ʻo e potó: “Kapau ʻokú ke ʻofa he paʻangá, ʻe ʻikai ʻaupito te ke fiemālie; kapau ʻokú ke fakaʻamu ke koloaʻia, ʻe ʻikai ʻaupito te ke maʻu ʻa e meʻa kotoa ʻokú ke fiemaʻú. ʻOku taʻeʻaonga ia. Ko ha tangata ngāue ʻe lava pe ʻikai lava nai ke ne maʻu ha meʻa feʻunga ke kai, ka ʻi ha tuʻunga ʻe lava ke ne maʻu ha mohe lelei. Kae kehe, ko ha tangata koloaʻia, ʻokú ne maʻu ʻo fuʻu lahi ʻo ne hanganaki ʻā ai ʻi he hohaʻa.” (Koheleti 5:​10, 12, Today’s English Version) ʻIo, ʻoku ʻi fē ho maluʻangá?

Kapau ʻoku kiʻi meimei tatau ho tuʻungá mo e misi taʻemoʻoni ʻa Siosiuá, ʻe lava ke ke liliu hoʻo ngaahi palaní? Ko e faʻahinga ʻoku nau ʻofa moʻoni ʻiate koé te nau poupouʻi koe, ʻo hangē ko ia naʻe fai ʻe he fāmili mo e ngaahi kaumeʻa ʻo Siosiua ʻi he fakatahaʻanga Kalisitiané. Te ke maʻu nai ʻa e maluʻanga lahi ange ʻi he ngaahi ʻātakai māʻulaló fakataha mo e faʻahinga ʻoku nau ʻofa ʻiate koé ʻo laka ia ʻi he faʻahinga he kolo lahí ʻa ia te nau feinga nai ke ngāueʻaki koé.

Kapau kuo ʻosi lahi ʻa e meʻa ʻokú ke maʻú, ʻo hangē ko Liz mo hono husepānití, ʻe lava ke ke feʻunuʻaki hoʻo founga moʻuí ke fakahanga ha taimi mo ha ivi lahi ange ki hono tokoniʻi ʻa e kakaí, pe ʻoku nau koloaʻia pe masiva, ke nau ako fekauʻaki mo e Puleʻangá, ʻa e founga ki hono maʻu ʻa e maluʻanga moʻoní?

Kapau kuó ke feinga ki ha lakanga māʻolunga ʻi he sōsaietí pe ʻi he ngāueʻangá, te ke loto nai ke faitotonu ʻi he fakakaukau atu ki he meʻa ʻokú ne ueʻi koé. Ko e moʻoni, ko ho ngaahi faingamālie ʻe niʻihi ʻe fakalahi nai ai ʻa e fiefia ki he moʻuí. Neongo ia, ʻoku malava ke ke tauhi ʻa e Puleʻangá—ʻa e founga moʻoni ki hono maʻu ʻa e maluʻanga tuʻuloá —ʻi he fakahangataha? Manatuʻi ʻa e ngaahi lea ʻa Sīsuú: “ʻOku lahi ange ʻa e fiefia ʻi he foaki atú ʻi he maʻu maí.” (Ngāue 20:​35, NW) Kapau ʻokú ke kau ʻi ha ngaahi ngāue kehekehe ʻi he fakatahaʻanga Kalisitiané, te ke hokosia ai ha maluʻanga fakafiemālie.

Ko e faʻahinga ʻoku nau falala kakato kia Sihova mo hono Puleʻangá ʻoku nau lakalakaimonū ʻi ha maluʻanga fakafiefia he taimí ni pea fakatuʻotuʻa atu ai ki he maluʻanga kakato ʻi he kahaʻú. Naʻe pehē ʻe he tokotaha-tohi-sāmé: “Kuo u ʻai ʻa Sihova ʻi hoku ʻao maʻu pē; ko e meʻa ʻi heʻene ʻi hoku toʻomataʻu ko ia ai ʻe ʻikai te u ngaūe. Ko ia kuo neka ai ʻa hoku loto, pea vikiviki ʻa hoku ʻelelo; kae ʻumaʻa ʻe nofo falala [“malu,” NW] foki ʻa hoku kakano.”—Sāme 16:​8, 9.

[Puha/Fakatātā ʻi he peesi 6]

Talanoaʻi ʻi Penini

Kuo talanoaʻi ʻo tuʻo laui afe ʻa e foʻi talanoá ni ʻi he ngaahi tuʻunga kehekehe lahi. Ki muí ni mai, naʻe fai ai ʻe ha tokotaha māʻolunga ʻi ha kolo ʻi Penini, ʻAfilika Hihifo, ʻa e fakamatala ko ení ki ha faʻahinga kei siʻi ange.

ʻOku foki atu ʻa e tangata toutaí ʻi hono kiʻi vaká ki ʻapi peá ne fetaulaki ai mo ha mataotao muli ʻoku ngāue ʻi he fonua langalanga hake ko ení. ʻOku ʻeke ange ʻe he mataotaó ki he tangata toutaí pe ko e hā ʻa e ʻuhinga ʻokú ne foki vave mai aí. ʻOkú ne tali ange ne mei lava pē ke nofo fuoloa atu ka kuó ne ʻosi maʻu ʻe ia ʻa e meʻa feʻunga ke tokangaʻi ʻaki hono fāmilí.

“Kae kehe, ko e hā leva ʻokú ke fai ʻaki he taimí ni ʻa e kotoa ʻo ho taimí?” ko e ʻeke ange ia ʻe he mataotaó.

ʻOku tali ange ʻa e tangata toutaí: “Sai, ʻoku fai ʻeku kiʻi toutai. ʻOku ou vaʻinga mo ʻeku fānaú. ʻOku mau maʻu kotoa ha mālōlō ʻi he taimi ʻoku vela aí. ʻI he efiafí, ʻoku mau kai efiafi fakataha. Ki mui aí, ʻoku ou fakatahataha mo hoku ngaahi kaumeʻá ki ha ngaahi fasi, mo e hā fua.”

ʻOku taʻofi ange ʻe he mataotaó: “Sio mai, ʻoku ou maʻu ha mataʻitohi ʻunivēsiti pea kuó u ako ʻa e ngaahi meʻá ni. ʻOku ou fie tokoniʻi koe. ʻOku totonu ke ke nofo ʻo toutai ke toe fuoloa atu. Te ke maʻu ai ʻa e meʻa lahi ange pea ʻe vave ai hoʻo malava ke fakatau mai ha vaka lahi ange ʻi he kiʻi vaka ko ení. ʻI ha vaka lahi angé, te ke kei maʻu ai ʻo lahi ange pea ʻe vave ʻa e malava ai ke ke fokotuʻu ha ngaahi vaka kupenga.”

“Pea hā leva?” ko e ʻeke ange ia ʻe he tangata toutaí.

“Pea ʻi he ʻikai leva ke ke fakatau atu ʻa e iká fakafou ʻi ha fakafofongá, ʻe lava ke ke fetuʻutaki hangatonu mo e fale ngāué pe aʻu ʻo kamata hao fale ika ʻoʻou. Te ke malava ai ke mavahe mei ho koló ʻo hiki ki Cotonou, pe Pālesi, pe Niu ʻIoke ʻo fakalele kotoa mei ai ʻa e pisinisí. ʻE aʻu ʻo lava ke ke fakakaukau ai ke fakahū hoʻo pisinisí ki he māketi fefakatauʻakí pea maʻu mai ai ʻa e laui miliona.”

“Ko e hā hono fuoloa ʻo e meʻa kotoa ko iá?” ko e ʻeke ia ʻa e tangata toutaí.

“Mahalo pē ko e taʻu ʻe 15 ki he 20,” ko e tali ia ʻa e mataotaó.

“Pea hā leva?” ko e hoko atu ia ʻa e tangata toutaí.

“Ko e taimi ia ʻe hoko ai ʻo fakamānako ʻa e moʻuí,” ko e fakamatala ia ʻa e mataotaó. “ʻE lava leva ai ke ke mālōlō mei he ngāué. ʻE lava ke ke hiki mei he femoʻuekina ʻo e ngaahi ngāue ʻi he koló ki ha kiʻi kolo mamaʻo.”

“Pea iku ai ki he hā?” ko e ʻeke ia ʻa e tangata toutaí.

“ʻE ʻi ai leva ho taimi ke fai ai ha kiʻi toutai, vaʻinga mo hoʻo fānaú, maʻu ha mālōlō ʻi heʻene velá, kai efiafi fakataha mo e fāmilí, pea fakatahataha mo e ngaahi kaumeʻá ki ha ngaahi fasi.”

[Fakatātā ʻi he peesi 7]

ʻOku ʻomai ʻe he hiki lakangá ha maluʻanga?

[Fakatātā ʻi he peesi 8]

ʻOku mahuʻingaʻia moʻoni ho kaungā Kalisitiané ʻi ho maluʻangá