ʻOkú Ke Houngaʻia ʻi he ʻOfa ʻa e ʻOtuá?
NAʻE fakamatalaʻi ʻi ha taimi ʻe taha ʻe he tangata ko Siopé ʻa e tuʻunga taʻehaohaoa fakaetangatá ʻi he ngaahi leá ni: “Ko e tangata kuo fanauʻi ʻe he fefine ʻoku fuonounou ʻene moʻui, pea ʻoku fonu ʻi he mamahi; ʻokú ne tupu hake pea tuʻusi, hange ha fisiʻi ʻakau; ʻokú ne mole hange ha ʻata, pea ʻoku ʻikai ʻaupito haʻane tuʻumaʻu.” (Siope 14:1, 2) Ko e moʻuí, hangē ko ia naʻe hokosia ʻe Siopé, naʻe fonu ʻi he mamahi mo e faingataʻa. Kuó ke ongoʻi pehē ʻi ha taimi?
Kae kehe, neongo ʻa e ngaahi faingataʻa mo e ngaahi palopalema kotoa ʻoku tau fehangahangai nai mo iá, ʻoku ʻi ai ha ʻamanaki makatuʻunga lelei, ʻa e taha ko ia ʻoku makatuʻunga ʻi he manavaʻofa mo e ʻofa ʻa e ʻOtuá. ʻUluakí, kuo tokonaki ʻe heʻetau Tamai fakahēvani faimēsí ha feilaulau huhuʻi ke huhuʻiʻaki ʻa e faʻahinga ʻo e tangatá mei honau tuʻunga hinga mo angahalaʻiá. Fakatatau ki he Sione 3:16, 17, naʻe pehē ʻe Sīsū Kalaisi: “Naʻe ʻofa pehe ʻa e ʻOtua ki māmāni [faʻahinga ʻo e tangatá], ko ia naʻá ne foaki hono ʻAlo tofu-pe-taha-ne-fakatupu, koeʻuhi ko ia kotoa pe ʻoku tui pikitai kiate ia ke ʻoua naʻa ʻauha, kae maʻu ʻa e moʻui taʻengata. He talaʻehai naʻe fekau ʻe he ʻOtua ʻa e ʻAlo [Sīsū] ki māmāni ke fakamāua ʻa māmani; ka koeʻuhi ke moʻui ʻa mamani ʻiate ia.”
Toe fakakaukau ki he ʻulungaanga anga-ʻofa ʻa e ʻOtuá kiate kitautolu tangata taʻehaohaoá. Naʻe talaki ʻe he ʻapositolo ko Paulá: “Naʻá ne oʻi foki ʻa e ngaahi faʻahinga kakai ʻa ia ʻoku nau tupunga taha kotoa pe, ke nau nofoʻia ʻa e funga kotoa ʻo māmani; he ne ne fakafuofua ʻa e ngaahi kuonga naʻe tuʻutuʻuni ki heʻenau nofo, mo honau ngaahi kauʻā; koeʻuhi ke nau kumi ki he ʻOtua, heiʻilo te nau fāfā ia ʻo ʻiloʻi, ka talāʻehai ʻokú ne mamaʻo mei hatau toko taha.” (Ngāue 17:26, 27) Fakakaukau atu ki ai! Neongo ko e tangata taʻehaohaoa kitautolu, ʻoku kei lava pē ke tau maʻu ha vahaʻangatae fakafoʻituitui mo hotau Tokotaha-Fakatupu anga-ʻofá, ʻa Sihova ko e ʻOtuá.
ʻI he loto-falalá leva, ʻoku lava ke tau hanga atu ki he kahaʻú, ʻi he ʻiloʻi ʻoku tokanga mai ʻa e ʻOtuá kiate kitautolu pea kuó ne tokonaki anga-ʻofa mai ki heʻetau lelei tuʻuloá. (1 Pita 5:7; 2 Pita 3:13) Ko hono moʻoní leva, ʻoku tau maʻu ʻa e ʻuhinga kotoa ke ako lahi ange ai fekauʻaki mo hotau ʻOtua ʻofá fakafou ʻi ha ako ʻo ʻene Folofolá, ko e Tohitapú.