Līpooti ʻa e Kau Fanongonongo ʻo e Puleʻangá

Ko Hono Maʻu ʻa e Moʻoní ʻi ha Feituʻu Taʻeʻamanekina

KO E finangalo ia ʻo e ʻOtuá ke “maʻu moʻui ʻe he kakai kotoa pe, pea ke nau aʻusia ʻa e ʻilo kanokano [“totonu,” NW] ki he moʻoni.” (1 Timote 2:​3, 4) Ke lavaʻi ʻa e taumuʻa ko iá, naʻe pulusi mo tufaki ai ʻe he Kau Fakamoʻoni ʻa Sihová ha ngaahi tatau ʻe laui miliona ʻo e Tohitapú mo e ngaahi tokoni fakaeako Tohitapú. ʻI he taimi ʻe niʻihi, kuo tokoniʻi ʻe he ngaahi tohi ko ʻení ha faʻahinga loto-totonu ke nau ako ʻa e moʻoní ʻi ha ngaahi founga mātuʻaki taʻeʻamanekina. ʻI he meʻá ni, ʻoku līpooti mai ai mei he kau fanongonongo ʻo e Puleʻangá ʻi Freetown, Siela Leoné, ʻa e meʻa ko ʻeni naʻe hokosiá.

Ko Osman ko ha foha ia hono ua ʻi ha fāmili ko e fānau ʻe toko hiva. ʻI he tupu hake ʻi ha fāmili lotú, naʻá ne ʻalu maʻu pē mo ʻene tangataʻeikí ki he lotú. Kae kehe, naʻe loto-mamahi lahi ʻa Osman ʻi he meʻa naʻe akoʻi heʻene lotú fekauʻaki mo e helí. Naʻe ʻikai ke ne mahinoʻi ʻa e founga ʻe fakamamahiʻi ai ʻe ha ʻOtua meesi ha kakai fulikivanu ʻaki hono tutu kinautolu ʻi he afí. Ko e ngaahi fakamatala kotoa naʻe ʻoange ke tokoniʻi ʻaki ʻa Osman ke ne mahinoʻi ʻa e tokāteline ʻo e afi ʻo helí naʻe ʻikai ke ʻoange ai kiate ia ha nonga.

ʻI he ʻaho ʻe taha, ʻi he taimi naʻe taʻu 20 ai ʻa Osman, naʻá ne fakatokangaʻi ai ha tohi lanu pulū naʻe tanumia fakakonga ʻi ha kapa veve. Koeʻuhi ko ʻene saiʻia ʻi he ngaahi tohí, naʻá ne toʻo hake ia, ʻo ʻai ke maʻa, peá ne fakatokangaʻi hifo ʻa e kaveingá—Ko e Moʻoni ʻA Ia ʻOku Fakatau ki he Moʻui Taʻengatá.a

‘Ko e hā ʻa e moʻoni ko ʻení?’ ko e fifili ia ʻa Osman. Naʻe langaʻi hake ʻa ʻene fieʻiló, pea ʻave ai ʻe Osman ʻa e tohí ki hono ʻapí ʻo ne lau kotoa leva ia. He fiefia ē ka ko ia ʻi heʻene ʻilo ko e ʻOtuá ʻoku ʻi ai hono huafa fakaeia—ko Sihova! (Sāme 83:18) Naʻe toe ako ʻe Osman ko e ʻulungaanga māʻolunga taha ʻo e ʻOtuá ko e ʻofa pea naʻa mo e fakakaukau ki hono fakamamahiʻi ʻa e kakaí ʻi ha feituʻu ko ha afi fakamamahí ʻoku fakalielia ia kiate Ia. (Selemaia 32:35; 1 Sione 4:8) Ko hono fakaʻosí, naʻe lau ʻe Osman ʻo pehē ʻe vavé ni ke ʻomai ʻe Sihova ha palataisi fakamāmani ʻa ia ʻe malava ai ʻa e kakaí ke moʻui taʻengata. (Sāme 37:29; Fakahā 21:​3, 4) Ko ha moʻoni fakaofo ē mei ha ʻOtua meesi mo anga-ʻofa! ʻI ha houngaʻia loloto, naʻe fakamālō ai ʻa Osman kia Sihova ʻi heʻene fakaʻatā ia ke ne maʻu ʻa e moʻoní ʻi ha feituʻu taʻeʻamanekina lahi taha.

ʻI ha ngaahi ʻaho siʻi ki mui ai, ʻi he tokoni ʻa ha ngaahi kaumeʻa ʻe niʻihi, naʻe ʻilo ai ʻe Osman ʻa e Fale Fakatahaʻanga ʻo e Kau Fakamoʻoni ʻa Sihová pea maʻu ha fakataha ʻi he ʻuluaki taimí. He lolotonga ʻo ʻene ʻi aí, naʻá ne kole ai ki ha Fakamoʻoni ke ako ʻa e Tohitapú mo ia. Neongo ʻa e fakafepaki mālohi ʻa e fāmilí, naʻe hokohoko atu ʻa Osman ke fai ha laka ki muʻa fakalaumālie pea naʻá ne papitaiso. (Mātiu 10:36) ʻI he ʻahó ni, ʻokú ne ngāue ko ha tokotaha mātuʻa ʻi he fakatahaʻangá. He fakaofo ē ko e meʻá ni kotoa naʻe hoko ia mei hono maʻu ha tohi faka-Tohitapu ʻi ha kapa veve!

[Fakamatala ʻi lalo]